Ha do te kete lufte civile ne shqiperi ?

[Benito Graziani]

Lexova kete artikull tek gazeta "Dita" dhe te them te drejten per momentin nuk besova. Por pastaj nje pyetje me shqetesoi po sikur te kerkojne dhe djemte dhe niprit e Enverit pronat e tyre a do te kete lufte civile? Kini kujdes ju qe jeni ne mergim, po keni bler ndonje coper toke me djersen e ballit,se vjen Leka i madh dhe me nje mandat ja u perfshin. Mos harroni se dhe ai dhe babai i tij kane derdhur djerse dhe c`fare djerse. Djerse te fshatarit te myzeqes. Une vendosa meqe ne kohen e Hametit shqiperia ishte nje kopeshte me lule dhe njerezit jetonin shume mire te kthehem ne shqiperi qe te punoj si ysmeqar tek tokat qe do ti kthehen Lekes.
P.S. Do me falni meqe me internet tani mund te gjejme cdo adrese,kush nga ju me gjen adresen e ndonje trashgimtari te Skenderbeut,se dhe ai ka per te marr ca toka,do ti kerkoj ndonje ngasterr per ta punuar,se per momentin jam pa pune. Kush me gjen adresen e tij si shperblim ka buken e pare te misrit qe do te bej nga prodhimi i pare. Ho Shqiperi e mjera shqiperi,kur do te shesin me mandat dhe ty ?
(U shit dhe kultura vllezer)
Rikthimi/ Godina që mori dje në zotërim, vitet e fundit ka shërbyer për zyrat e Institutit të Monumenteve të Kulturës

Leka Zogu rimerr pronën e parë

Ekziston edhe një ligj, i dalë në kohën e qeverisjes së PD-së, që e ndalon kthimin e pronave kur ato janë institucione shtetërore

Manjola Bregasi

TIRANË - Leka Zogu ka marrë më në fund pronën e tij të parë. Bëhet fjalë për ish-pallatin e pionerëve, pronë e dikurshme e Ahmet Zogut, për të cilën qeveria aktuale e Shqipërisë ka vendosur kthimin tek pronari. Godina që Leka mori dje në zotërim, vitet e fundit ka shërbyer për zyrat e Institutit të Monumenteve të Kulturës. Në një ceremoni modeste dorëzimi, përfaqësuesi ligjor i mbretit, Shevqet Dizdari dhe drejtoresha e Institutit të Monumenteve të Kulturës, Edlira Caushi, kanë firmosur në banesën e re të monarkut shqiptar dokumentin zyrtar që kthen përfundimisht këtë godinë tek ish-pronari. Pas këtij momenti dhe dorëzimit të çelësave tek përfaqësuesi i Pallatit Mbretëror, Fluturak Gërmenji, pritet që Leka Zogu, (i cili që nga viti 1961 është vetëshpallur Leka I, Mbreti i shqiptarëve) të lerë vilën me qira në fshatin Vishnje dhe të vendoset në shtëpinë e vjetër të familjes mbretërore, e cila tashmë do të kthehet në një rezidencë monarkike. Duke e konsideruar optimale për të jetuar, përfaqësuesit e pallatit kanë menduar të mos ndërhyjnë në gjendjen aktuale të ndërtesës, por të zhvendosen aty sa më parë të jetë e mundur. Në këtë godinë do të vijë të jetojë jo vetëm Leka Zogu, por edhe trashëgimtari i tij i vetëm, princi i ri Leka, që shumë shpejt kthehet nga studimet në Akademinë Mbretërore Ushtarake. Gjithashtu në këtë rezidencë do të vendosen edhe zyrat e punonjësve të oborrit. Ndoshta kthimi i kësaj prone do ta lehtësojë sadopak edhe anën financiare të Lekës, i cili ka treguar se me ardhjen në Shqipëri jeton me kursime dhe trashëgiminë e pronave të bashkëshortes Suzana. Mbërritja e Lekës në Shqipëri do të sillte edhe lindjen e debatit në lidhje me pronat që ish-mbreti Zog zotëronte këtu përpara se të largohej nga vendi më 6 prill 1939. Leka tha se do t'i shikonte ligjet shqiptare për çështjen e pronave, ndaj diskutimet dhe kërkesat në lidhje me këtë çështje kanë vazhduar gjatë. U mendua se nga ana e ish-kryeministrit Nano pati një angazhim për zgjidhjen e këtij problemi, i cili në bazë të ligjit Nr.9063, datë 08.05.2003, për statusin e trashëgimtarëve të ish-familjes mbretërore, kërkoi zyrtarisht zgjidhjen e çështjes, duke ngarkuar ministrin e Shtetit në atë kohë, që ta ndiqte me përparësi. Por vetëm dje trashëgimtari i familjes mbretërore ka arritur të marrë ligjërisht një prej pronave të shumta për të cilat ai shprehet se i posedon. Janë pikërisht ish-zyrat e Institutit të Monumenteve të Kulturës që tashmë janë transferuar në godinën e Agjencisë Kombëtare të Energjisë, duke sjellë si pasojë edhe zhvendosjen e zyrave të kësaj të fundit. Ndërkohë, ekziston edhe një ligj tjetër, i dalë në kohën e qeverisjes së PD-së, që e ndalon kthimin e pronave në rastet kur ato janë institucione shtetërore, si: spitale, shkolla, qendra kulture, etj.

Trashëgimtari

Kthimi i Lekës në Shqipëri

Gjatë Luftës së Dytë Botërore, me largimin e forcave gjermane dhe italiane nga Shqipëria, pushtetin e morën komunistët. Largimi i Mbretit nga vendi nisi nga Greqia dhe që andej në Britaninë e Madhe, për të përfunduar në Francë. Zogu u përpoq ta merrte sërish fronin e tij, por Shqipëria tashmë kishte hyrë në sferën e ndikimit rus dhe regjimi i Enver Hoxhës do të qëndronte në fuqi për 45 vjet. Zogu hoqi dorë nga kërkesa e tij, por e mbajti emrin si Mbret. Në vitin 1997, pasi në Shqipëri ishte rrëzuar regjimi komunist, djali i Ahmet Zogut, Leka Zogu (i cili që nga viti 1961 e kishte quajtur veten Leka I, Mbreti i shqiptarëve), u kthye, pavarësisht rezistencës së qeverisë shqiptare të asaj kohe. Pas referendumit që u mbajt për kthimin e monarkisë në vitin 1997, 66,7 % e shqiptarëve votuan qeverinë republikane. Në fillim të viteve 2000 Leka Zogu nisi një jetë aktive në politikën e vendit, duke e cilësuar qeverinë socialiste si mafioze. Pas ardhjes në Shqipëri nga Afrika e Jugut, Leka humbi nënën, Mbretëreshën Geraldinë dhe bashkëshorten, Suzana.

Vendosja/Për herë të parë Leka Zogu jeton në një nga godinat e veta. Familja pret kthimin e pronave të tjera

Veprim moral dhe ligjor i Berishës

Ndërtesa do të shërbejë si rezidencë e familjes mbretërore. Aty do të instalohen edhe zyrat e oborrtarëve

Leka Zogu do të kërkojë sipas ligjeve shqiptare kthimin dhe kompensimin e të gjitha pronave që Ahmet Zogu la përpara se të largohej në prill të vitit 1939. Avokati i familjes mbretërore, Shevqet Dizdari, i cili është duke u marrë drejpërdrejt me këtë çështje, ka bërë të ditur se dosjet përkatëse të kthimit të pronave janë duke u shqyrtuar në komisionet përkatëse. Ai ka shtuar gjithashtu se kthimi i godinës së Institutit të Monumenteve të Kulturës tek Leka Zogu, është një veprim moral dhe ligjor i qeverisë Berisha. “Është hera e parë që pas ardhjes së tyre në Shqipëri që trashëgimtarët e familjes mbretërore,jetojnë në një nga pronat e tyre. Edhe pse kanë vite këtu, ata kanë jetuar në prona të marra me qira, gjë që nuk ishte aspak normale. Me iniciativën e kryeministrit dhe të stafit të tij, u bë e mundur dorëzimi i këtij objekti, ndërsa lidhur me kthimin dhe kompensimin e pronave të tërësi, janë dorëzuar gjithë dosjet në komisionet përkatëse dhe komisionet e kthimit dhe kompensimit të pronave do t’i shqyrtojnë sipas ligjit”, ka përfunduar Dizdari. Përfaqësuesi i oborrit mbretëror, Fluturak Gërmenji, i cili pasi është larguar drejtoresha e Institutit të Monumenteve ka marrë në dorëzim çelësat e godinës, ka shtuar se shumë shpejt mbreti do të jetë në banesën e re: “Mbreti do të vijë të jetojë këtu. Ndërtesa është në gjendje të mirë fizike dhe nuk do të ndërhyjmë me rikonstruksione. Kjo do të konsiderohet si një rezidencë, ku përveç banesës do të jenë edhe zyrat e oborrit, të cilat do të nisin të funksionojnë që sot. Mendojmë që edhe pritja tradicionale e 28 nëntorit këtë vit të kryhet këtu, në banesën e vërtetë të mbretit”.

Avokati/ “Trualli i “Dajtit” është pronë mbretërore. Duhet të jemi favoritë në blerje”

Në pritje të hotel “Dajtit”

Pas anulimit të dytë që pësoi pak kohë më parë tenderi për shitjen e hotel “Dajtit”, avokati i familjes mbretërore, Shevqet Dizdari ka kërkuar që klienti i tij duhet të jetë favoriti kryesor për blerjen e këtij objekti, duke u nisur nga fakti se se trualli mbi të cilin është ndërtuar hoteli shtetëror është nën pronësinë e familjes mbretërore. “Hoteli është ndërtuar mbi pronën e Mbretit Zog dhe për pasojë, shteti duhet t’ia ofrojë kundrejt një vlere familjes mbretërore. Nëse ajo refuzon, mund të vijohet me zhvillimin e tenderit”, ka deklaruar Dizdari pak kohë më parë. Trashëgimtarët e mbretit kanë kërkuar që t’i kthehen pronat që dikur ishin nën posedimin e tyre. Ndërkohë, Leka Zogu mund të përfitojë ndonjë kompensim për pronat e të atit, vetëm nëse ai ka dokumentet, tapitë e këtyre pronave dhe i paraqet. Ky përfitim, sipas ligjvënësve, mund të ndodhë me miratimin e ligjit "Për kthimin dhe kompensimin e pronave".