Kryeministri malazez anullon takimin me Berishen& 2 kryeministrat e rajonit

[Blue_sky]

Berisha, anulohet vizita në Prishtinë


N. P

TIRANË-Anulohet takimi i planifikuar i kryeministrit Sali Berisha me tre kryeministrat e vendeve të rajonit në Prishtinë. Kanë qenë arsye të nxjerra nga kryeministri malazez, Milo Gjukanovic, të cilat kanë anuluar takimin e kryeministrave të Malit të Zi, Shqipërisë, Kosovës e Maqedonisë. Burime nga Kryeministria kanë konfirmuar mbrëmë vonë faktin se takimet e parashikuara të kryeministrit Berisha në Prishtinë janë shtyrë për një kohë të pacaktuar. Ishte parashikuar dhe pritej që Sali Berisha të takonte kryeministrat e fqinjëve tanë, më të cilët, ndër të tjerash do të bisedonte dhe do të shprehte mendimin e Tiranës zyrtare për statusin përfundimtar të Kosovës. Nëse takimi nuk do të anulohej nga kryeministri malazez Gjukanovic pë arsye ende te panjohura, Berisha do të nisej gjatë paradites së nesërme për në Prishtinë dhe ishte parashikiuar që vizita e tij të zgjaste dy ditë. Gjatë kësaj vizite të anuluar, kreu i ekzekutivit do të takonte kryeministrin maqedonas, Vlado Buçkovski, atë të Malit të Zi, Milo Gjukanovic dhe kryeministrin e Kosovës, Bajram Kosumi, të cilët në një zë janë shprehur për pavarësinë e Kosovës. Ideja për zhvillimin e një tryeze mes tyre ka qenë e kryeministrit shqiptar, Sali Berisha, iniciativë kjo e pranuar së fundmi edhe nga kryeministri i Kosovës gjatë vizitës që pati në Tiranë.
Ftesa e kryeministrit Sali Berisha vjen pas takimeve kokë me kokë që ka zhvilluar me secilin prej tyre.
Në këtë tryezë gjerësisht do të diskutohej për çështjen e Kosovës dhe të ardhmen e saj. Nga ana e tij, kryeministri Sali Berisha do të shprehte edhe qëndrimin e qeverisë shqiptare për pavarësinë e Kosovës dhe garantimin e të drejtave e lirive të serbëve dhe pakicave të tjera si një kusht thelbësor për paqen dhe stabilitetin në Kosovë dhe rajon. Qeveria shqiptarem ndër të tjera, në takimin e ardhshëm do të inkurajojë gjithashtu udhëheqësit kosovarë të angazhohen në dialogun me Beogradin paralelisht me procesin e përcaktimit të statusit. Anulimi i këtij takimi ka sjellë dhe anulimin e një takimi që ishte parashikuar të kryhej mes presidentit të Kosovës, Ibrahim Rugova dhe kryeministrit Berisha. Ky takim ishte parashikuar në axhendën e kryeministrit Sali Berisha.


Shekulli