Edi Rama: 70 ditët e mia të para në opozitë
Bilanci i kryetarit të PS: Jam i kënaqur, por mbetet akoma shumë për të bërë
Edi Rama: 70 ditët e mia të para në opozitë
Vlerësimi për Berishën, për qeverinë, për Metën...
Pregaditi : Skënder Minxhozi
70 ditë pasi është zgjedhur në krye të PS, kryetari i Partisë Socialiste Edi Rama bën një bilanc të zhvillimeve brenda partisë më të madhe të opozitës. Ai flet gjerësisht për situatën brenda selisë socialiste dhe sfidat e afërta të rinovimit dhe reformimit. Rama shprehet se në janar do të startojë projekti i ndryshimeve brenda PS, i cili ka muaj që përgatitet dhe merr formë.
Kryetari i PS flet më pas rreth marrëdhënieve mes PS dhe partive të tjera të majta, duke komentuar pozicionet politike të LSI dhe forcave të tjera të opozitës. Rama shprehet se askush nuk mund të kërkojë ‘gjyqe publike’ kundër PS, duke rikujtuar faktin se tashmë të gjithë të majtët janë në opozitë. Rama komenton edhe zhvillimet e fundit në Tiranë, duke u ndalur tek bllokimet e disa projekteve të infrastrukturës në kryeqytet nga qeveria.
Zoti Rama, janë mbushur 70 ditë që nga momenti kur keni marrë në dorë drejtimin e PS-së. Si e gjykoni këtë periudhë të kaluar në krye të formacionit më të madh të opozitës? Sa përputhet realiteti i PS-së së sotme me atë çka ju kishit parashikuar para se të zgjidheshit?
“Unë mund të them me plot gojën pas dy muajve, se e kisha parashikuar më të vështirë, e kisha parashikuar më të ndërlikuar dhe më të gjatë kohën e një kompaktësimi në radhë të parë psikologjik për të bërë një skuadër e cila sigurisht ende është larg e të qenit të një skuadër me tipare të pakonfondueshme fituesi por gjithsesi, tashmë është një skuadër. Kjo me jep shumë shpresë, pasi unë kam marrë përsipër sigurisht që t’i kaloj përmasat e arritshme në dy muaj apo qoftë edhe në dy vjet. Është një punë që ka të bëjë me një ndryshim kryesor të kulturës të të bërit opozitë dhe politikë dhe natyrisht do të kërkojë kohën e vet, por ajo çka unë mund të them,është se tanimë në godinën e PS-së punohet me orë të zgjatura, në këtë godinë po ndërtohet një bërthamë e përbërë nga politikanë dhe ekspertë, e cila çmoj se funksionon apo ka filluar të funksionojë ne rastin konkret, me domosdoshmërinë për një analizë profesionale dhe për një vlerësim politik të projektbuxhetit. Kjo rrugë e re pa asnjë dyshim, do të jetë gati të japë rezultatet mjaft shpresëdhënëse në momentin që ne do të ndezim makinën elektorale për zgjedhjet e ardhshme”.
Para disa javësh keni deklaruar se keni në kokë një opozitë krejt ndryshe. Çfarë ka që nuk shkon sipas jush në aksionin aktual të PS-së së sotme?
“Në aksionin aktual të PS–së, nuk është se ka gjëra që nuk shkojnë, por ky aksion është larg së pasuri intensitetin e nevojshëm të komunikimit me njerëzit dhe intensitetin e duhur të përcjelljes së mesazheve tek publiku. Në aksionin aktual mungon ende intensiteti i nevojshëm i thithjes së opinionit të njerëzve në raport me çështje të vendit dhe me vetë PS-në, mungon intensiteti e nevojshëm i hapjes së partisë ndaj njerëzve në planin psikologjik dhe atë fizik. Në rast se do të shikonim aksionin tonë opozitar vetëm 70 ditor në vlerë relative, unë do të shprehesha i kënaqur. Kemi mundur që në 70 ditë, të ndërtojmë një opozitë e cila mund të krenohet se nuk ka prodhuar asnjë shpifje dhe akuzë false, asnjë fyerje, se nuk ka cënuar asnjë familje apo familjar të atyre që qeverisin, duke e ndarë jetën private nga aktiviteti politik i personave të mandatuar.
Tashmë mund të them se ka një opozitë që kërkoi ndjesë për gjerat që nuk i kishte bërë dhe për ato gjëra që i kishte bërë keq dhe kjo gjë e bën PS-në partinë e parë politikë të këtij vendi që jo vetëm e la pushtetin në mënyrë paqësore dhe dorëzoi çelësat e qeverisë me inventar, por edhe që kërkoi ndjesë. Ndërkohë që sot kemi një parti në qeverisje, e cila megjithëse shkatërroi vendin, jo vetëm që nuk kërkoi kurrë ndjesë për cka bëri, jo vetëm u fsheh pas disa formulimesh hipokrite elektorale, por sot nëpërmjet gojës së shefit të saj politik, ka marrë përsipër t’i rikthehet historisë së vitit 97, të cilin jo vetëm që nuk e njeh si produkt të keq të qeverisë së vet, por kërkon t’ia rifaturojë kundërshtarëve politikë.
Më tej akoma, sot një opozitë e cila në vetëm në 70 ditë arriti që të kthejë mbrapsht, megjithëse me një numër të pamjaftueshëm kartonësh, me forcën e argumentit dhe me komunikimin intensiv me komunitetin ndërkombëtar, një sërë nismash aventureske, duke filluar nga heqja e imunitetit të parlamentarëve etj. Pavarësisht se sot ne nuk kemi mundur të korrigjojmë dot trajektoren antidemokratike dhe mbi të gjitha alogjike të kësaj qeverisjeje, natyrisht që jemi një opozitë, e cila nuk eksporton më në zyrat dhe mjediset e partnerëve ndërkombëtarë baltën e shpifjeve, akuzave false dhe denigrimit të kundërshtarit politik, por ka krijuar një precedent krejt ndryshe nga e kaluara e palavdishme e opozitës se djeshme, duke u bërë pjesë dhe nxitëse pranë partnerëve për të firmosur një orë e më parë Marrëveshjen e Stabilizim-Asociimit.
E gjitha kjo, vlen për të thënë se aksioni ynë politik i këtyre 70 ditëve, është një aksion i cili mund të vlerësohet i kënaqshëm në vlerë relative ndërsa në vlerë maksimale, sigurisht mbetet akoma shumë për t’u bërë”.
Vihet re se pas ardhjes suaj në krye të PS-së, pozita ka ndërmarrë një sërë hapash për të goditur funksionin tuaj të dytë, atë të kryetarit të bashkisë. A mendoni se qëllimi i pozitës është që të mbajë nën presion kryetarin e bashkisë së Tiranës, lidhur me disa projekte infrastrukturore për të mos lënë të qetë kështu, kryetarin e opozitës në rolin e tij politik?
“Sigurisht që kjo mund të konsiderohet si njëra nga rezultantet e kësaj strategjie, por ajo që unë besoj se ajo që është më shqetësuesja, është mungesa e plotë e një vizioni te kjo qeveri dhe kjo mazhorancë për të ardhmen e vendit, mungesa e plotë e një sensi të ndërtimit dhe jo të shkatërrimit, mungesa e plotë e ndjenjës së përgjegjshmërisë karshi qytetarëve dhe mandatit që këta qeveritarë dhe ky kryeministër ka marrë, e cila shprehet në vënien në përdorim të instrumenteve të shtetit për të marrë masa me karakter antikushtetues, antiligjor dhe regresiv, siç është bllokimi i Tiranës, apo për të ndërmarrë sulme nga më të panevojshmit dhe nga më të dënueshmit ndaj të gjitha institucioneve të pavarura.
Pra, jemi përballë një mazhorance pa ide, para një mazhorance që shterpësinë e mendjes se kryeministrit dhe shefit të vet, e ka tashmë vijë sjelljeje politike dhe njëra nga pasojat është ajo që rëndon padrejtësisht mbi Tiranën dhe qytetarët e saj në formën e bllokimit të paligjshëm të punëve, që po fillon t’i kushtojë jo vetëm qytetarëve të Tiranës, por edhe të gjithë qytetarëve të Shqipërisë në sytë e partnerëve tanë ndërkombëtarë, duke rrezikuar të kthejë në axhendën e komunikimit me partnerët ndërkombëtarë, çështje të standardeve të demokracisë, lirisë dhe të të drejtave të komuniteteve, gjë e cila deri më tani konsiderohej e kapërcyer.
Për fat të keq, kostoja e këtij aksioni idiotesk për të bllokuar Tiranën me qëllim goditjen e imazhit të suksesshëm të qytetit të Tiranës dhe marrjen peng të kryetarit të bashkisë së Tiranës, është një kosto jashtëzakonisht e madhe politike për iniciuesit e kësaj nisme krejtësisht primitive dhe të papajtueshme me shekullin ku jetojmë, por është edhe një kosto për të gjithë qytetarët. Dhe kjo do të na bëjë të mendojmë përtej nënkalimit të Zogut të Zi, sepse praktikisht kështu po vështirësohet kalimi ynë në botën e përparuar dhe kapërcimi i këtij tranzicioni pambarim që po mbahet gjallë nga një frymë e vjetër, e cila sot mishërohet tek kryeministri Sali Berisha”.
Votimi i ndryshimeve në KLD, hapi papritur një kapitull delikat brenda të majtës, atë të marrëdhënieve mes partive të këtij spektri përballë lëvizjeve të PD-së. A e konsideroni ju në krizë përshpejtimin e të majtës së bashkuar pas ashpërsimit të deklaratave mes PS-së nga njëra anë dhe LSI-së e PD-së nga ana tjetër? Përse e majta vazhdon të mbajë të njëjtin konfigurim bashkë me pasojat që ai sjell me vete të para zgjedhjeve të 3 korrikut?
“Unë mendoj që i është dhënë një rëndësi shumë më e madhe se ç’ka në të vërtetë në funksion të së ardhmes së të majtës, atij votimi, që natyrisht për ne ishte i papranueshëm në radhë të parë, sepse binte ndesh me kushtetutën e vendit dhe me atë stabilitet të institucioneve dhe atë progres edhe në reformat në drejtësi që vendi ynë duhet të bëjë domosdoshmërisht. Përtej demagogjisë dhe vulgaritetit të analizës së cekët të ditës që e konsideruan atë votim si një fitore të luftëtarëve antikorrupsion ndaj sistemit të korrupsionit, shohim sesi u prononcua misioni i ekspertëve të BE-së, i cili shprehu qartë nga pozita tërësisht të pavarura nga politika e ditës apo politika jonë e brendshme, të njëjtin qëndrim të shprehur nga PS-ja, atë të antikushtetuetshmërisë. Ku ligj praktikisht përbën një akt shkeljeje të kushtetutës dhe është teorikisht i padekretueshëm dhe praktikisht i pazbatueshëm. PS-ja është në rrugën e krijimit të një identitetit të mirëfilltë opozitar, si një parti që përfaqëson shumicën e shqiptarëve dhe interesat dhe vlerat e patjetërsueshme, e cila ka misionin historik të çmontimit të kësaj mazhorance të ngritur mbi pakicën e shqiptarëve që është në krye të vendit për arsye dallaveresh elektorale si pasojë e deformimeve që prodhoi sistemi famëkeq i Dushkut.
E pra, për ne ky është momenti që ne po ecim me shumë shpejtësi në rrugën e krijimit të këtij identiteti, duke qenë të fokusuar në dy binarë. Nga njëra anë, në betejën pa kompromis politik dhe profesionale me qeverinë e paaftë dhe gënjeshtare të Berishës dhe nga ana tjetër, hapjen e një procesi reformues, i cili starton në muajin janar, ku PS-ja do të vazhdojë të këmbëngulë në domosdoshmërinë e ripërtëritjes së vet nën parimin se “të gjithë janë të nevojshëm dhe se asnjëherë nuk jemi mjaft” dhe për këtë na duhet një hapje dhe një integrim brenda nesh i të gjitha atyre forcave dhe energjive që ka sot Shqipëria, të cilat u margjinalizuan gjatë viteve të fundit të qeverisë socialiste.
Si konkluzion do të thosha se për momentin në këtë rrugë të kërkimit të një identiteti opozitar, janë edhe forca të tjera brenda kampit të majtë, të cilat kanë secila problemet e veta. Gjykoj se kjo është një çështje e tyre dhe nuk më takon mua t’ua bëj analizën, aq më tepër në publik, por është e qartë që në këtë përpjekje të përbashkët dhe të përveçme të kërkimit të një identiteti opozitar, LSI-ja ka edhe problematikën më shqetësuese në raport me vetveten”.
Zoti Meta ka deklaruar se socialistët duhet të heqin dorë nga korrupsioni dhe konflikti i interesave dhe se duhet të kërkojnë falje për atë që i kanë bërë LSI-së. Si i interpretoni ju këto deklarata?
“Socialistët e PS-së dhe LSI-së, janë sot të gjithë në opozitë dhe janë me qindra dhe me mijëra kontributorë të së majtës në qeverisjen dhe përpjekjet tetëvjeçare për të sjellë të gjitha ato përmirësime që erdhën në vend. Sigurisht janë këta socialistë që nuk e meritonin këtë dhuratë që lideshipi i përçarë dhe konfliktual i PS-së gjatë mandatit të dytë, u solli me çarjen e vet përmes gjuhës përjashtuese që u ndoq si rrugë komunikimi mes pjesës së mbetur dhe pjesës së ikur, ku u bë e qartë për të gjithë publikun se për përfaqësuesit e secilës nga këto dy palë, preferenca ndaj Berishës ishte më e fortë se preferenca ndaj njëri-tjetrit.
Në këtë aspekt, unë do të nënvizoja shqetësimin tim për të gjithë këta qindra e mijëra socialistë që në zgjedhjet e 3 korrikut, shkuan të ndarë si pasojë e mungesës së një frymë bashkëpunuese në shtabet e dy partive. Sot PS-ja paguan çmimin e gabimeve të veta dhe njëkohësisht edhe çmimin e kësaj ndarjeje që sigurisht është përgjegjësi e lidershipit të atëhershëm të PS-së, por nga ana tjetër, PS-ja është larg të qenit në pozita kur mund t’i vendosen kushte apo t’i bëhen gjyqe nga forca të tjera politike. Ne jemi të vendosur që të ecim përpara në rrugën e reformimit tonë dhe të kërkojmë kohezionin maksimal brenda të gjithë spektrit të të gjithë forcave politike të rreshtuara majtas dhe njëkohësisht jemi tërësisht të hapur për ato forca që do të jenë të vendosura të bashkëpunojnë me opozitën dhe për opozitën në këtë sens. Unë besoj se nuk na takon ne që të përcaktojmë rrugën e të tjerëve, çka do të thotë se nuk përcaktojmë as rrugën e LSI-së, e cila aktualisht ka një trotuar në opozitë dhe një trotuar në pushtet”.
Zoti Rama, a është një perceptim i gabuar ai që vazhdon t’ju shohë më shumë si një kryetar bashkie, sesa si një kryetar partie? A mendoni se keni vendosur një ekuilibër të kënaqshëm mes dy funksioneve tuaja?
“Mendoj se kam vendosur një ekuilibër të kënaqshëm, por kam hasur në problemin e pasqyrimit mediatik të të dyja aktiviteteve, pasi shoh që mediat i referohen sidomos aktivitetit tim partiak, duke qenë gjithmonë e më pak të interesuar për t’ju referuar aktivitetit tim si bashkiak, përveçse kur bëhet fjalë për telenovelën e Zogut të Zi”.
Po flitet për shtyrjen e zgjedhjeve lokale. Çfarë pozicioni ka PS në lidhje me këtë temë?
“Nuk mund të them nëse PS-ja e ka një pozicion ne lidhje më këtë çështje. Ne jemi tërësisht të fokusuar në çështjen e buxhetit të 2006, në domosdoshmërinë për ta zbërthyer deri në vidën e fundit këtë mekanizëm kaq të dobët dhe kaq të trishtueshëm që është ky buxhet dhe njëkohësisht jemi tërësisht të fokusuar në nevojën që të bëjmë diferencën mes jo vetëm premtimeve dhe materializimit zero të tyre në këtë buxhet, por edhe mes vizionit tërësisht obskurantist të kësaj mazhorance dhe vizionit tonë të kthjellët për mënyrën sesi duhet administruar ky vend.”
Së afërmi qeveria e re mbush 100 ditët e para të drejtimit. Çfarë bilanci i bëni ju kabinetit të zoti Berisha deri tani?
“Pa u mbushur ende 100 ditë, ky kabinet na ka dhënë 100 prova se është i paaftë dhe gënjeshtar, sepse i paaftë dhe gënjeshtar është kryeministri dhe sepse të tërë ministrat sikundër e kemi thënë që në fillim, nuk janë gjë tjetër, veçse kopje e kryeministrit që nuk kanë asnjë shans dhe njëkohësisht dhe asnjë fuqi për të bërë diferencë. Kështuqë sikundër edhe për buxhetin edhe për 100 ditët, kemi një analizë të gjerë dhe të gjatë që do t’ia bëjmë me dije publikut”.
Nga info@besiana.de Më 20 Dec. 2005 13:22
Përgjigju Duke Cituar
Krijoni Kontakt