Shën Hilarioni i Madh - 21 tetor

[Albo]

Shën Hilarioni i Madh

Shën Hilarioni i Madh ka lindur në vitin 291 në fshatin Tabatha të Palestinës. E dërguan që të studionte në Aleksandri. Atje ai u njoh me Krishtërimin dhe u pagëzua. Kur dëgjoi një rrëfim mbi jetën engjëllore tl Shën Thanasit të Madh (17 janar), Hilarioni shkoi që ta takonte atë, duke dashur që të mësonte nga ai se cilat vepra të njerëzve e kënaqin Perëndinë. Më pas Hilarioni u kthye në vendlindje ku mësoi se prindërit i kishin vdekur. Pasi e ndau gjithë pasurinë e familjes tek të varfërit, Hilarioni u vendos në shkretëtirën përreth qytetit Maium.

Në shkretëtirë murgu vuajti shumë me mendimet e papastra, turbullimet e mendjes dhe pasionet e zjarrta të mishit, por ai ia doli që ti mposhti të gjitha me punë të rënde, agjerim dhe lutje papushim. Djalli u mundua që ta trembte shenjtorin me fantazma dhe vegime. Gjatë lutjes Shën Hilarioni dëgjonte fëmijë që qanin, gra që vajtonin, ulërima luanësh dhe egërsirash të tjera. Murgu e kuptoi se ishin demonët që i krijonin këto terrore në mënyrë që ta largonin atë nga shkretëtira. Ai e tejkaloi edhe këtë frikë me ndihmën e lutjes pa ndërprerje. Njëherë, hajdutët i zunë pritë Shën Hilarionit dhe ai i bindi ata që të hiqnin dorë nga jeta e krimit me fuqinë e fjalëve të tij.

Shumë shpejt e gjithë Palestina mësoi për këtë asketik të shenjtë. Perëndia i dhuroi Shën Hilarionit fuqinë që të largojë shpirtrat e papastër. Me këtë dhuratë të hirshme, ai i këputi zinxhirët me të cilët demonët mbanin të skllavëruar shumë shpirtra njerëzish te pushtuar. Të sëmurët vinin për tu shëruar dhe murgu i kuroi falas duke u thënë se hiri i Perëndisë nuk është në shitje (Matheu. 10:8)

Aq i madh ishte hiri që ai mori nga Perëndia sa që ai e dallonte që nga era e veshjes së dikujt se nga çfarë pasioni vuante shpirti i atij njeriu. Njerëzit vinin tek Shën Hilarioni me dëshirën për të shpëtuar shpirtrat e tyre me udhëzimet e tij. Me bekimin e Shën Hilarionit manastiret filluan të lindnin në gjithë Palestinën. Duke shkuar nga një manastir në tjetrin, ai krijoi një mënyrë jetese asketike strikte.

Rreth 7 vjet para vdekjes së tij (+ 371-372), Shën Hilarioni shkoi në Qipro, ku ai jetoi në një vend të izoluar nga bota derisa Perëndia e thirri para Tij.