A duhet të hyje Shqipëria në BE ?

[no name]

BE: Lehtësimi i vizave hyn në fuqi më 1 janar 2008

Firmosen në Bruksel marrëveshjet me nëntë ministrat e Brendshëm të Ballkanit

Bashkimi Evropian është zotuar dje se që nga 1 janari i vitit të ardhshëm do të lehtësojë regjimin e vizave me vendet e Ballkanit Perëndimor. Një premtim shtesë pas deklaratave të panumërta të dhëna nga krerët e Brukselit është dhënë dje nga zëvendëspresidenti i Komisionit Evropian, Franco Frattini, dhe ministri i Punëve të Brendshme të Portugalisë, Ruiz Carlos, të cilët firmosën zbutjen e regjimit të vizave për qytetarët e rajonit më problematik të kontinentit. Në një ceremoni të mbajtur dje në Bruksel, me praninë e zëvendëspresidentit të Komisionit Evropian, Franko Frattini, dhe ministrit të Punëve të Jashtme të Portugalisë, Rui Carlos Pereira nga Presidenca e radhës e Bashkimit Evropian dhe me praninë e ministrave të Brendshëm të Shqipërisë, Bosnjë-Hercegovinës, Malit të Zi, Serbisë dhe ish-Republikës Jugosllave të Maqedonisë u nënshkruan marrëveshjet e ripranimit dhe lehtësimit të vizave mes Bashkimit Evropian dhe vendeve të Ballkanit Perëndimor. Zëvendëspresidenti Frattini tha se "nënshkrimi i marrëveshjes është një vendim i rëndësishëm politik drejt një bashkëpunimi më të ngushtë mes Bashkimit Evropian dhe vendeve të Ballkanit Perëndimor në fushat e një rëndësie të madhe si migrimi dhe lëvizja e lirë e njerëzve. Vënia në jetë e këtyre marrëveshjeve në mënyrën e duhur, së bashku me një përparim të dukshëm në fushat kryesore të drejtësisë, lirisë dhe sigurisë, do t‘i krijojë komisionit mundësinë për të filluar në të ardhme një dialog të strukturuar për një regjim të lirë të mundshëm të vizave për qytetarët e vendeve të Ballkanit Perëndimor". Ndërkaq, Komisioneri Evropian për Zgjerimin, Olli Rehn, theksoi se "këto marrëveshje janë një provë e mëtejshme që Bashkimi Evropian është plotësisht i angazhuar në perspektivën evropiane të rajonit. Tani ne presim që këto marrëveshje të vihen në jetë ashtu siç duhet, në mënyrë që t‘i hapin rrugë dialogut për heqjen e vizave dhe kushteve që secili prej vendeve të rajonit duhet të plotësojë që kjo të arrihet". Pas dhënies së mandatit nga Këshilli i Bashkimit Evropian më 13 nëntor 2006, Komisioni Evropian filloi më 30 nëntor negociatat për nëntë marrëveshje të komunitetit me këto vende dhe ia doli mbanë të përfundonte të gjithë procesin dhe të siglonte draft-marrëveshjet me të gjitha vendet e Ballkanit Perëndimor në prill/maj 2007. Në përgjithësi marrëveshjet kanë për qëllim që të lehtësojnë procedurat për qytetarët e vendeve të Ballkanit Perëndimor, në veçanti për ata që udhëtojnë më shumë drejt BE-së, për të kërkuar viza të shkurtra qëndrimi në Bashkimin Evropian, ndërsa njëkohësisht nga ana tjetër përcaktojnë rregulla të qarta për të luftuar imigrimin e paligjshëm. Marrëveshjet e lehtësimit të vizave bëjnë të mundur uljen në një tarifë të përballueshme për vizë deri në 35 euro në vend të 60 eurove për të gjithë qytetarët e Ballkanit Perëndimor dhe për disa kategori të aplikuesve parashikojnë një përjashtim të plotë nga tarifa për vizë. Për më tepër, për disa kategori të caktuara qytetarësh, si për shembull për biznesmenët, për studentët dhe për gazetarët, janë thjeshtësuar edhe dokumentet e nevojshme mbështetëse për aplikimin për vizë. Për disa kategori të qytetarëve që udhëtojnë shpesh për në BE bëhet i mundur lëshimi i vizave me shumë hyrje-dalje për periudha të gjata vlefshmërie. Dhe së fundmi, mbajtësit e pasaportave diplomatike përjashtohen nga detyrimi për të pasur vizë hyrëse në BE. Marrëveshjet e ripranimit përcaktojnë detyrime dhe procedura të qarta për autoritetet, si të vendeve të Ballkanit Perëndimor, ashtu edhe të vendeve anëtare të Bashkimit Evropian, kur dhe si duhet të kthejnë mbrapsht qytetarët që qëndrojnë në mënyrë të jashtëligjshme në territoret e përcaktuara nga marrëveshjet. Përmbyllja e procesit të ratifikimit dhe vënia në jetë e marrëveshjeve deri më 1 janar 2008 do të shënojë respektimin e të gjithë axhendës me afate ekstremisht të ngushta dhe do ta bëjë tarifën e vizave për qytetarët e Ballkanit Perëndimor 35 euro.



Gazeta Shqip

[TOKE GEGA]

Shqipëria po trajtohet si partner i barabartë nga vendet e BE-së, po eksportojmë stabilitet në rajon!



Majlinda Bregu, Ministrja për Integrim në kabinetin “Berisha” thotë në një intervistë për Europën e Lirë se marrëveshja për lehtësimin e vizave, ndryshimi i imazhit të qeverisjes dhe ndalimi i plotë i trafikut të klandestinëve do të sjellë heqjen e plotë të vizave për lëvizjen drejt shteteve të BE-së


Zonja ministre, çfarë do të thotë për shqiptarët nënshkrimi i marrëveshjes për lehtësimin e vizave? A do të ketë në të vërtetë lehtësim në marrjen e tyre?
Marrëveshja e lehtësimit të vizave, e cila tashmë është nënshkruar përfundimisht dhe hyn në fuqi në janar të vitit 2008, krijon sigurisht premisa për një lëvizje të lirë dhe për të ndihmuar, le të themi, ato grupe, individë, kategori, të cilat përfitojnë pikësëpari nga kjo marrëveshje. Ajo që është pozitive në marrëveshjen e lehtësimit të vizave, ose këndvështrimi im në rolin e ministres së Integrimit, ka të bëjë me faktin që për ne marrëveshja e lehtësimit të vizave do të thotë një vlerësim i reformave të ndërmarra nga Qeveria, një besueshmëri më e lartë në menaxhimin e kufijve në luftën kundër krimit të organizuar, të cilat janë elementet kryesore që kanë fasilituar dhe bënë të mundshëm nënshkrimin e marrëveshjes për lehtësimin e vizave. Një nga kriteret kryesore sigurisht që është menaxhimi i kufijve, pra menaxhimi i integruar i kufijve. Por, nga ana tjetër, tashmë Shqipëria shihet si një rast pozitiv apo si një eksperiencë pozitive edhe për vendet tjera. Vetëm para pak ditësh ka pasur një deklaratë të ministrit të Jashtëm italian, D’Alema, i cili vlerësonte këtë ndryshim të këtij imazhi që ka pasur deri diku Shqipëria, të një vendi që transportonte klandestinë, të një vendi, kufijtë e të cilit ishin krejtësisht të pasigurt për një shtet tjetër perëndimor, si një shembull dhe histori pozitive, e cila ia vlen të implementohet në vendet tjera, me të cilat një shtet perëndimor, sikurse Italia, mund të ketë problematika, për shembull, kohët e fundit me vendet tjera, sikurse ishte Libia. Fakti që Shqipëria tashmë përmendet si rast pozitiv, ne na bën të ndjehemi shumë mirë. Kategoritë që përfitojnë nga kjo marrëveshje janë kategori që janë të lidhura drejtpërsëdrejti me proceset integruese të Shqipërisë, janë studentët që përfitojnë nga marrëveshja e lehtësimit të vizave, janë gazetarët që do të përfitojnë nga kjo marrëveshje, janë biznesmenët, janë qytetarët e thjeshtë, të cilët kanë njerëzit e tyre familjarë që duan t’i vizitojnë në vendet evropiane. Ajo që është pozitive dhe që ia vlen të theksohet është fakti që në momentin kur në janar të vitit 2008 do të hyjë në fuqi marrëveshja e lehtësimit të vizave, Komisioni Evropian do të shqyrtojë mundësinë për hapjen e një dialogu me shtetet anëtare për të liberalizuar krejtësisht regjimin e vizave me Shqipërinë, pra për një ‘Visa Free Entry Regime’, që do të thotë që shqiptarët të kenë mundësi të lëvizin lirisht, pa barrierat e vizave, në shtetet evropiane dhe në shtetet e vendeve anëtare të BE-së. Sigurisht se kjo nuk është një gjë që do të ndodhë më 1 janar të 2008-s. Më 1 janar fillon lehtësimi, por paralelisht do të punohet edhe për këtë aspekt tjetër të rëndësishëm, që është liberalizimi i vizave. Dhe, unë do të thosha se për aq kohë sa të dëshmohet seriozitet në ndërmarrjen e reformave që kanë të bëjnë me mbarëvajtjen e vendit, për aq kohë sa të ketë një stabilitet politik, një stabilitet makroekonomik, tashmë të dukshëm dhe të pranuar nga vlerësuesit, nga të gjitha strukturat ndërkombëtare që monitorojnë progresin e Shqipërisë, për ne sigurisht se ky është një vlerësim dhe një hap shumë pozitiv.

Përtej nënshkrimit të marrëveshjes së stabilizim asociimit, cilat janë gjasat e tjera reale për afrimin e mëtejshëm të Shqipërisë në Bashkimin Evropian?
Marrëveshja e Stabilizim-Asociimit është një nga hapat apo një nga hallkat e këtij procesi integrues, nëpër të cilin duhet të kalojë normalisht një vend që aspiron për të qenë pjesë e Unionit Evropian. Por, njëkohësisht, kemi marrëveshjen e ndërmjetme, e cila ka hyrë në fuqi në dhjetor të vitit 2006, pra nuk është mbushur një vit nga hyrja në fuqi e marrëveshjes së ndërmjetme, qëllimi kryesor i të cilës ishte që deri në momentin që do të hynte në fuqi marrëveshja e stabilizim asociimit, procesi që do të ndodhë pas ratifikimit të kësaj marrëveshjeje nga parlamentet e vendeve anëtare, marrëveshja e ndërmjetme do të shërbejë si urë për të lehtësuar komunikimin dhe për të lehtësuar marrëdhëniet e Shqipërisë me tregun evropian. Sigurisht që në këtë proces ngjarjet janë të parashikuara; në momentin që zhvillohet apo plotësohet dhe kalohet një hallkë e zinxhirit, ka një hallkë tjetër përpara, derisa të mbërrihet në finish. Normalisht, në një procedurë normale do të duheshin 2 deri në 3 vjet për ratifikimin e marrëveshjes së stabilizim asociimit. Duke llogaritur se ka hyrë në fuqi në vitin 2006, ne pretendojmë, shpresojmë dhe urojmë që të mbyllet procesi i ratifikimit brenda vitit 2008, gjë që do të na jepte mundësinë që në bashkëpunim me Komisionin Evropian, në bazë të dialogut me ta, të vendosim për momentin për kërkimin e statusit të vendit kandidat, i cili është hapi tjetër parafinal, nëse do ta quaja kështu, para marrjes së konsensusit për hapjen e negociatave për aderimin e plotë, pra për pranimin në BE. Ratifikimi është thjesht një proces plotësimi i një procedure. Ajo që ka rëndësi është kontinuiteti, vazhdimësia, serioziteti dhe dëshmia ose dëshmimi i vullnetit për të ndërmarrë reforma, që për hir të së vërtetës janë jo gjithmonë të mirëpritura nga një faktor i brendshëm, ose jo gjithmonë të mirëkuptuara nga faktori i brendshëm. Shpjegimi i reformave që bëhen për hir të integrimit brenda një shteti, një vendi që aderon të jetë pjesë e BE-së, është një eksperiencë e vështirë për të gjitha shtetet që janë anëtare të reja të BE-së, pra për të gjitha ato shtete që kanë kaluar në këtë fazë dhe në këtë ecuri deri në momentin e anëtarësimit të plotë ne BE. Momenti i qasjes së standardeve kombëtare me standardet e BE-së sigurisht që është një moment i vështirë, nganjëherë me shkopinj nën rrota. Dhe, për hir të mosmarrëveshjeve apo duke qenë se është një çështje dhe një aspiratë kaq madhore, fatkeqësisht nganjëherë edhe bëhet peng i debateve politike, që i keqpërdorin reformat dhe debatin për integrim për hir të interesave të ngushta partiake. Por, ndonjëherë edhe ndoshta jo i mirëpritur nga grupet e interesit, sepse vendosja e disa rregullave, të cilat qasin ekonominë, për shembull, në një rast, pra plotësimin e kriterit ekonomik me standardet e BE-së, nganjëherë sigurisht që nuk është e mirëpritur nga grupet e interesit.

Aktualisht, Kosova po gjendet në fazën më kritike për çështjen e përcaktimit të statusit. Ju, si ministre e Integrimit, a mendoni se një integrim ndoshta më i mirë i shqiptarëve në rajon do të sillte një integrim më dinjitoz të tyre në Bashkimin Evropian?
Sot, në Evropë diskutohet për një perspektivë të zgjerimit të Ballkanit perëndimor. Dhe, në qasjen pozitive që kanë për të qenë pjesë e BE-së, duhet të dëshmojnë një vullnet dhe seriozitet, së pari për të respektuar njëri-tjetrin në rajon. Fakti që tashmë ne ndodhemi jo vetëm si shqiptarë, pra në bashkëkombësi, por edhe si një shtet i Ballkanit, para një vendimi i cili duhet marrë dhe që është vonuar shumë, pra pavarësia e Kosovës, përcaktimi final i statusit të saj, sigurisht që një vlerësim pozitiv i reformave të Shqipërisë do të sillte mundësinë që kjo perspektivë pozitiviste të transmetohej, të përdorej edhe si eksperiencë për shtetet tjera, qoftë edhe për shtetet, të cilat pritet që shumë shpejt ta fitojnë pavarësinë e tyre, sikurse është rasti i Kosovës. Absolutisht që ndërmjet nesh dhe Kosovës ka një lidhje tjetër që është shumë e fuqishme, sa që shkëmbimi i eksperiencës midis dy vendeve fqinje. Ne kemi filluar dhe kemi projektuar ide dhe iniciativa, se si kjo eksperiencë e jona mund t’u vijë në ndihmë për të mos pasur rrugë të ndërmjetme dhe boshllëk në procesin e integrimit të nesërm të Kosovës në BE. Përfaqësues të Qeverisë së Kosovës dhe të vendeve të tjera të rajonit kanë ardhur disa herë në Shqipëri, ku është diskutuar për iniciativa të përbashkëta, për programe të fqinjësisë që ne kemi në kuadër të asistencës së IPA-s (Instrumenti për para-anëtarësim), pra programet e fqinjësisë me vendet e rajonit. Kosova sigurisht që është një nga ato vendet që do të përfitojnë nga këto programet e fqinjësisë me Shqipërinë dhe që janë përfshirë në listën e projekteve, për të cilat ne paraqesim pranë Komisionit Evropian kërkesën për miratim për fondet e IPA-s. Për shembull, në programin e IPA-s 2008, një nga komponentët në programet e fqinjësisë dhe bashkëpunimit rajonal është edhe hartimi i projekteve jo vetëm ndërmjet njerëzve, pra njerëzit për njerëzit, por edhe i projekteve të rëndësishme infrastrukturore ndërmjet Shqipërisë dhe Kosovës. Retorikat, shpeshherë të prapambetjes, të konflikteve, të tezave diversioniste, të ndarjeve, të rindarjeve, të kthimit të teorive të vjetra të braktisura nacionaliste, të braktisura prej kohësh tashmë nga qasjet evropiane dhe perëndimore, nuk janë rasti për t’u diskutuar apo trumbetuar me forcë nga çdo politikan që ka kuptuar se ku është e ardhmja e një vendi të Ballkanit perëndimor.

[land]

Hyrja ne BE eshte rruga e vetme e shpetimit.
Per interesa korrupsioni,klasa politike Shqiptare e ka penguar vazhdimisht hyrjen ne BE.
Shpresojme te triumfojne politikanet e ndershem,nese ka,nese jo na mori lumi(jo me falni,ju mori lumi,desha te them ,se une ne nje shtet te BE jetoj)

[Daja-GONI]

Per mendimin tim me mire do te ishte sikur Shqiperia te zhvillohej e ndertohej,jasht cdo bashkesie.Te medhenje jan te tjeret dhe do na perbijne shume shpejt.Andaj shpresoj se hyrja ne BE do te zgjase edhe shume e shume vite.
Rrofte Shqiperia etnike,sovrane!

[alibaba]

Masat e gjera të popullit, shumë lehtë përbijnë mbeturinat dogmatike të OKB-së.
Andaj duhet logjukar mirë se çfarë sjell, hyrja në BE. Unë them asgjë, kjo është vetëm një perandori e dytë romake, dhe kush është më hileçar do të marrë pushtetin, kaq.

[brooklyn2007]

A duhet të hyje Shqipëria në BE ?


Nuk e di por me duket shume absurde kjo pyetje!! Ajo s'do shume mend qe PO duhet te hyje. Po nuk hyme ne BE ku tjeter duhet te hyjme?!!

[land]

A duhet të hyje Shqipëria në BE ?


Nuk e di por me duket shume absurde kjo pyetje!! Ajo s'do shume mend qe PO duhet te hyje. Po nuk hyme ne BE ku tjeter duhet te hyjme?!!

Exactly.............

[Daja-GONI]

Me hy eshte leht,por me dale eshte veshtire.

[bebushja]

Kure eshte futur dhe rumenia ne BE ,mos mbehte kemb vendi pa u fut aty(na mbyten duke vjedhur dhe packitur neper londer pupupu si harixhinjt e shqiperise)keshtu qe mos cani koken se te kapme e kemi DO FUTEMI DHE PIKE

[Edvin83]

A duhet të hyje Shqipëria në BE ?


Nuk e di por me duket shume absurde kjo pyetje!! Ajo s'do shume mend qe PO duhet te hyje. Po nuk hyme ne BE ku tjeter duhet te hyjme?!!

A duhet gjithmone te futemi diku Po sikur te behet nje referendum nese doni te futeni ne SHBA apo BE atehere si mendoni se do te dilte rezultati?