Kreu i shoqatës së talasemikëve kërkon mbështetje nga shteti për katër fëmijët e prekur nga virusi i shekullit
Talasemikët me SIDA, nga Tirana, Elbasani e Lushnja
Lindita Çela
Katër fëmijët talasemikë që rezultojnë të infektuar me virusin HIV, jetojnë një një gjendje të vështirë ekonomike. Kështu ka bërë të ditur dje për gazetën “Shekulli”, kryetari i shoqatës së telasemikëve, Musa Zeneli. Fëmijët e infektuar me këtë virus gjatë transfuzionit të gjakut rezultojnë të jenë në një moshë mesatare 12 vjeç dhe jetojnë në Tiranë, Elbasan dhe dy fëmijë në Lushnjë. “Po të kesh një fëmijë talasemik në shtëpi të paktën duhet të shpenzosh në muaj 20 mijë lekë vetëm për të ruajtur gjendjen e tyre normale, ndërkohë që nuk bëhet fjalë sesa mund të shpezohet kur kanë komplikacione. Pjesa më e madhe e prindërve, fëmijët e të cilëve vuajnë nga kjo sëmundje, harxhojnë një shumë të konsiderueshme në muaj vetëm nëpër spitale”, - thotë kryetari i shoqatës së talasemikëve. Fëmijët e infektuar gjatë transfuzionit të gjakut, sipas Musa Zenelit, kanë një gjendje të rënduar ekonomike, madje në njërin nga rastet e identifikuar si i infektuar me SIDA, rezulton që po në të njëjtën familje të jetë i sëmurë edhe një fëmijë tjetër nga talasemia.
Talasemikët pa përkrahje
Rreth 35 mijë lekë në muaj shpenzon një familje që ka në shtëpi një person që vuan nga talasemia, ndërkohë shteti kompenson vetëm një ilaç për këta të sëmurë. Sipas kryetarit Zeneli, shteti shqiptar nga një sërë medikamentesh që marrin talasemikët rimburson deseralin si dhe jep një pension prej 650 lekësh, ndërkohë që shpenzimet për këta të sëmurë janë shumë më të mëdha. Zeneli thotë se pjesa më e madhe e fëmijëve që vuajnë nga kjo sëmundje janë në një gjendje të rënduar ekonomike, ndërsa rimbursimi që i bën shteti është qesharak. “Vetëm për të ruajtur gjendjen normale të fëmijëve, pa përmendur komplikacionet, një prind shpenzon rreth 35 mijë lekë në muaj, ndërkohë që ne kemi kërkuar që të paktën ilaçet për fëmijët talasemikë të jenë falas”, - thotë kryetari i shoqatës së talasemikëve. Ndërsa për katër fëmijët talasemikë të infekuar Zeneli thotë se janë një gjendje të vështirë ekonomike dhe do ta kenë të pamundur të përballojnë shpenzimet për t’u kuruar edhe nga virusi i SIDA-s. “Do të ishte mirë që shteti të ndërhynte për kurimin e talasemikëve, ndërkohë që për katër fëmijët e infektuar do të ishte mirë që atë t’i nënshtroheshin një trajtimi të veçantë, sepse për familjet e tyre është e vështirë të mbajnë nën kontroll me medikamente për dy sëmundje kaq të rënda për të cilat duhen ilaçe shumë të shtrenjta”, - thotë Musa Zeneli. Vetëm dy ditë më parë ministri i Shëndetësisë, Maksim Cikuli, bëri të ditur skandalin e infektimit të katër fëmijëve talasemikë gjatë transfuzionit të gjakut. Sipas tij, skandali është mbajtur i fshehtë nga autoritetet e mëparshme të Ministrisë së Shëndetësisë, ndërkohë që përveç katër fëmijëve të infektuar nga SIDA rezultojnë që edhe 34 fëmijë talasemikë janë infektuar me Hepatitin B dhe C. Këto të dhëna kanë dalë pas ekzaminimit të bërë në 195 fëmijë me talasemi në vendin tonë, nga 500 që numërohen gjithsej. Musa Zeneli thotë se sot pritet që të fillojnë të bëjnë analizat edhe pjesa tjetër e fëmijëve talasemikë, të cilët nuk i janë nënshtruar këtij procesi. Sipas kryetarit të Shoqatës së Talasemikëve, pas skandalit të infektimit të katër fëmijëve, në pjesën më të madhe të prindërve është përhapur paniku i rrezikut të infektimit nga ky virus vdekjeprurës. Sipas të dhënave të publikuara 2,1% e fëmijëve të ekzaminuar me talasemi janë të infektuar me virusin vdekjeprurës, ndërsa 18% e tyre me Hepatitin B dhe C. Mësohet se infektimi i katër fëmijëve është bërë nga gjaku i dhuruesve me pagesë, por nuk është zbuluar nga analizat e bëra, për shkak të të ashtuquajturës periudhë dritare, periudhë në të cilën virusi HIV është në trupin e njeriut, dhe nuk shfaqet si i tillë dhe është e pamundur të kapet mes analizave.
Përgjigju Duke Cituar
Postuar më parë nga Genti^Itali
Krijoni Kontakt