Vehbi Moqi ka denoncuar në polici ngatërrimin e foshnjes së tij në maternitet. E uruan për vajzë, e më pas i thanë se e shoqja lindi djalë
Babai: Më ndërruan vajzën me djalë në maternitet
Dashamir Biçaku
TIRANË - “Më ndërruan fëmijën në maternitet. Ime shoqe lindi vajzë, por mjekët ma bënë djalë”. Denoncimi i padëgjuar ndonjëherë nga oficerët e policisë ka mbërritur në mjediset e komisariatit numër 1 në Tiranë, mesditën e së shtunës. Vehbi Moqi, 25 –vjeçari nga fshati Shupal i komunës së Zallbastarit në Tiranë i është drejtuar policisë, duke denoncuar mjekët e spitalit për ndërrimin e foshnjes. Lajmi bëhet i ditur nga burime të besueshme të policisë së Tiranës, ndërsa është konfirmuar edhe për “Shekullin” nga të afërmit e fëmijës së lindur. Vehbi e Dëshira Moqi, prindër për herë të dytë, kanë marrë fillimisht urime për lindjen e vajzës, por pak orë më vonë punonjësit e maternitetit u thanë se Dëshira Moqi kishte lindur djalë. “Në fakt, ka pasur një ngatërresë në dokumentacion, çka shkaktoi edhe hutimin e irritimin e prindërve të foshnjes së seksit mashkull, që lindi pasditen e së premtes. Për këtë ngatërresë, drejtuesit e spitalit pezulluan maminë që kishte uruar çiftin për vajzën, por në fakt ata lindën djalë”,-pohojnë burime jozyrtare nga materniteti “Kiço Gliozheni”.
Dyshimet e prindërve
“T’u rrojë vajza”. Ky ka qenë urimi që njëra prej mamive të maternitetit “Kiço Gliozheni” i ka dhënë Vehbi Moqit, 25- vjeçarit nga fshati i thellë i Shupalit që kishte sjellë gruan e tij për të lindur gjatë mbrëmjes së të premtes. “Ne vajzë e prisnim, pasi e kishim një djalë, që lindi vetëm një vit më parë”,-pohoi Moqi për “Shekullin”, duke shtuar se urimi i mamisë solli dyshimet e mëpasme tek ai dhe e shoqja. Një tjetër arsye që ka shtuar dyshimet dhe shqetësimin e çiftit Moqi ka qënë edhe eko-ja e bërë javë më parë, ku mjeku kishte paralajmëruar prindërit se do të lindnin vajzë. “Në eko e kishim parë foshnjen para disa muajsh dhe na thanë se e kemi vajzë”,- tregon motra e Vehbi Moqit, e cila shton se këtë fakt ia kishin pohuar edhe mjekët në momentin e parë të lindjes. Sipas saj, ka qenë mjekja gjinekologe, Mimoza Keta, e cila së bashku me infermieren i kishin uruar fillimisht për lindjen e një vajze.
Mjekët: Foshnja e lindur, djalë
Vetëm një ditë më vonë, pasi familjarët Moqi ishin gëzuar për lindjen e vajzës, ishte shokues lajmi që foshnja në të vërtetë ishte djalë. Konstatimi i mjekëve të maternitetit ka irrituar familjarët Moqi, të cilët dyshuan se fëmija i tyre ishte ndërruar në maternitet. “Djali është shëndoshë e mirë dhe ndodhet në inkubator sepse ka pak temperaturë”- i ka pohuar një tjetër infermiere nënës së fëmijës, Dëshira Moqit. Ky njoftim e ka habitur por për më tepër e ka trembur 20- vjeçaren nga fshati Shupal. Menjëherë ajo ka njoftuar të shoqin, e ky i fundit, i alarmuar ka kërkuar të takojë mjekët dhe drejtuesit e maternitetit. Pas një takimi dhe sqarimeve nëpërmjet kartelës së lindjes, mjekët i kanë pohuar se fëmija është i seksit mashkull, por ka qenë vetëm një ngatërresë gjatë përgatitjes së dokumentacionit që çifti Moqi ishte lajmëruar për lindjen e një foshnje të seksit femër. Lidhur me ngjarjen e mësipërme, mjekët dhe infermierët që shërbejnë në katin e pestë të maternitetit, ku edhe qëndron e shtruar Dëshira Moqi pohojnë se janë kujdesur në inkubator për një foshnje mashkull, gjendja e të cilit është në përmirësim. Por Vehbi Moqi i është drejtuar komisariatit numër 1, ku ka denoncuar mjekët për ngatërrimin e foshnjes së tij, edhe pse ata e kanë garantuar se djali është i tiji. Gjatë ditës së djeshme, në maternitet kanë shkuar disa oficerë policie, të cilët kanë marrë dëshmitë e prindërve dhe të personelit mjekësor për sqarimin e kësaj ngjarjeje të rrallë, por me pasoja për dy prindërit e vogëlushit.
LINDJA
Dëshmira Moqi nga fshati i thellë Shupal i Tiranës, ka mbërritur mbrëmjen e së premtes në maternitet. Ajo e ka lindur foshnjen sapo ka mbërritur në oborr dhe pohon se nuk ka mundur ta shikojë në ishte vajzë apo djalë
DENONCIMI
Një ditë pas lindjes së bashkëshortes, Vehbi Moqi i është drejtuar komisariatit numër 1, ku ka denoncuar se në maternitetin “Koço Gliozheni” i kishin ngatërruan foshnjen. Dyshimi lindi nga urimi i infermieres
NGATËRRESA
Sipas mjekëve të maternitetit, konflikti është krijuar si pasojë e ngatërresës së bërë në kartelën e lindjes së foshnjes. Mbetet ende i paqartë fakti sepse në kartelë është shënuar që Dëshira Moqi ka lindur vajzë
ANALIZA
Bashkëshortët Moqi kanë kërkuar bërjen e analizës së ADN-së, për foshnjen e seksit mashkull që ndodhet në inkubator. Pas krahasimit të kampionëve të gjakut, mjekët kanë konstatuar se struktura gjenetike e foshnjes përputhet me të prindërve
Përgjigju Duke Cituar
Postuar më parë nga KaLTerSi
Krijoni Kontakt