"Ju tregoj dosjet e korrupsionit"

[Genti^Itali]

Prokurori i Përgjithshëm, Theodhori Sollaku, flet për marrëdhëniet e tij me Berishën, Moisiun si dhe arrestimet e bujshme të kohëve të fundit

"Ju tregoj dosjet e korrupsionit"


Ened Janina

TIRANE – Prokurori i Përgjithshëm, Theodhori Sollaku, thotë se kohët e fundit ka pasur një fluks denoncimesh për korrupsion dhe evazion fiskal në Prokurori. Ai deklaron se ndaj tyre do të ketë vëmendje maksimale, por është vënë re se denoncimet janë të paplota dhe se mund të të jenë taktika për të justifikuar luftën kundër korrupsionit. Në intervistën e tij për “Shekullin”, Sollaku flet për marrëdhëniet e tij me Berishën, Moisiun si dhe arrestimet e bujshme të kohëve të fundit.
Shqipëria dhe dhe institucionet e saj u përballën me tranzicionin e pushtetit që u konsiderua botërisht si tranzicioni i parë paqësor i pushteteve. Prokuroria përfaqëson atë institucion, i cili, të paktën
kushtetutshmërisht nuk duhet të preket prej tij. E pra, cili është bilanci juaj në këtë periudhë pas 3 vjetësh drejtimi të tij?
Mendoj se kemi bërë më të mirën e mundshme në terrenin politik, shoqëror, institucional të Shqipërisë gjatë kësaj periudhe. Janë afro 41 mijë çështje të përfunduara, janë vënë nën akuzë afro 30 mijë persona për vepra të ndryshme penale, ku për 24 mijë prej tyre është ngritur akuzë në gjykatë.
Gjatë këtyre viteve, si asnjëherë tjetër, numri i procedimeve që lidhen me krimin e organizuar, trafiqet e të gjitha llojeve, veprimtarinë e kundërligjshme të zyrtarëve të shtetit, të korrupsionit etj. kanë shënuar rritje. Janë afro 900 zyrtarë të të gjitha niveleve të vënë nën akuzë për vepra penale që lidhen me detyrën si kërkim ryshfeti, shpërdorim detyre, shkelje të barazisë në tendera, veprime arbitrare etj. Megjithatë, puna
e Prokurorisë nuk mund të matet vetëm me shifra e tregues sasiorë apo me realizime planesh. Situata e përmirësuar e rendit në vend, goditja me sukses e trafiqeve të drogës dhe qenieve njerëzore, do t'i konsideroja si tregues të punës, për të cilat, nëse do të përdorja shprehjen tuaj, na lejon të jemi me "me ballin lart".
Megjithatë, sidomos kohët e fundit ka pasur mjaft ngjarje kriminale, i dedikohej kjo tranzicionit të pushtetit apo ka arsye të tjera?
Jemi të ndërgjegjshëm që nuk mund të ketë kriminalitet "zero", as në Shqipëri, por as edhe në vende të tjera shumë më të zhvilluara. Janë një sërë faktorësh që ndikojnë në treguesit e kriminalitetit në vend, si, p.sh, ato ekonomikë e socialë, që lidhen ngushtë me krimin në familje. Pa u zgjatur në teori kriminologjike, duhet thënë se vetëm vitet e fundit mediat shqiptare e sidomos ato elektronike, kanë arritur të mbulojnë me kronika në kohë reale nga i gjithë teritori i vendit, duke rritur ndjeshëm peshën e kronikës se zëzë në lajmet e përditshme. Kjo nuk ndodh vetëm në Shqipëri, megjithatë vlen të përmendet se ka nevojë për të kërkuar më shumë profesionalizën në publikimin e kronikave të zeza apo pasqyrimin e informacioneve që cënojnë jetën private të qytetareve, sidomos të minorenëve.
Me këtë bilanc që thoni, mendoni se i keni kredencialet për të qendruar në postin e Prokurorit të Përgjithshëm tani që vendi ka një maxhorancë të re?
Mendoj se nuk shtrohet çështja e qëndrimit apo jo në detyrë të prokurorit të Përgjithshëm. Nuk janë bilancet ato që përcaktojnë nëse do të vazhdoj të qëndroj apo jo një prokuror i Përgjithshëm në detyrë. Unë mendoj se respektimi i Kushtetutës, respektimi i kuadrit ligjor që normon punën e prokurorit të Përgjithshëm, ruajtja pastër e figurës së prokurorit të Përgjithshëm, janë të mjaftueshme për të mos kontestuar këtë që pyesni ju. Natyrisht nuk kemi bërë çudira, por jemi përpjekur të mos abuzojmë me detyrën, jemi përpjekur të luftojmë të keqen, t'i trajtojmë të gjitha rastet sipas ligjit duke zbatuar parimin e një procedimi të drejtë, të barabartë dhe të rregullt ligjor, duke kontribuuar kështu në forcimin e rendit
Juridik dhe zbatimin e Kushtetutës dhe të ligjeve.
Në krye të vendit po vjen zoti Berisha. Ai dhe opozita shpeshherë kanë qenë kritikë me punën e prokurorisë. Z.Berisha ka përmendur vazhdimisht shprehjen "prokuroria fle mbi dosjet e krimit". A mendoni se rëndon një moment i tillë në bashkëjetesën tuaj të ardhshme me qeverinë e djathtë?
Mendoj se politika, dhe sidomos politika që prodhon opozita, shpesh nuk janë në një linjë me prokurorinë. Arsyet janë të ndryshme, por po përmend vetëm njërën. Foltorja e politikanit është kudo, brenda dhe jashtë
institucioneve, mjafton të ketë publik apo media, ndërsa "foltorja e prokurorit" është kryesisht salla e gjyqit, por në çdo rast brenda institucioneve dhe e mbështetur në fakte e argumente ligjore. Në vijim të kësaj logjike, është e natyrshme që opozita paraqitet më aktive me deklarata e akuza politike, por këto të fundit, qoftë edhe kur bëhen gjatë debateve në komisione hetimore parlamentare, nuk shndërrohen automatikisht në çështje penale.
A jeni ndikuar ju në punën tuaj gjatë qeverisjes socialiste nga kryeministri Nano, i cili ka qenë akuzuar për shumë histori, për të cilat, ju madje, keni dhe çështje të hapura, si për shembull, historia e Shkallnuerit?
Që me marrjen e detyrës, në prill 2002, kam deklaruar si kredon time që "nuk do të lejoj që prokurorëve ligjin t'ua lexojnë të tjerët", që do të thotë se në asnjë rast, drejtues të lartë politikë në pozitë apo opozitë nuk do mund të ndikojnë në zbatimin me korrektësi dhe paanshmëri të ligjit. Kam bindje se këtë kredo morale e kam përmbushur gjatë këtyre viteve në ushtrimin e detyrës. Për hir të vërtetës, çdo vendimarrje në prokurori është bazuar në ligj dhe ndërgjegjen juridike të secilit prokuror. Kemi pasur fatin që kemi punuar në mënyrë të pavarur jo vetëm nga kryeministri, por nga çdo segment i shtetit apo politikës. Asnjë vendimmarrje e Prokurorisë nuk është influencuar nga faktorë të tjerë jashtë Prokurorisë. As kryeministri, as Presidenti, as kryetari i opozitës apo ndonjë politikan tjetër nuk kanë kërkuar që të influencojnë në punën e Prokurorisë. Përsa iu përket akuzave që ju përmendni, nuk ka ndonjë të tillë nga prokuroria. Është e vërtetë që ka një dosje për aksidentin e Shkallnuerit, e rihapur muaj më parë, por ende nuk ka asnjë akuzë për ndonjë person, përfshi dhe atë që përmëndet ju. Dosja është në ndjekje nga policia, dhe nëse do të paraqiten fakte të reja, ajo me siguri do të rihapet. Të jeni të bindur se edhe kur pezullohet apo pushohet një dosje, ajo nuk quhet e mbyllur. Me daljen e fakteve të reja, ajo vihet në lëvizje përsëri.
Në përgjithësi, si ka ndikuar politika në punën tuaj? Nëse jo në punën tuaj si kreu i akuzës, në atë të vartësve tuaj në rrethe, ku miq ministrash, krerë lokalë partie kanë kontrolluar jetën e institucioneve, përfshi tuajin si feudalë të vegjël?
Mendoj se pyetjes se si ka ndikuar politika në punën time, iu përgjigja më lart. Ndërsa lidhur me pjesën e dytë ta saj, "miq ministrash, krerë lokalë partie kanë kontrolluar jetën e institucioneve, përfshi prokurorinë", nuk jam dakord. Natyrisht që nuk marr përsipër të analizoj institucionet e tjera të administratës shtetërore në rrethe, por deklaroj me bindje se punën e prokurorivë në rrethet e vogla apo të mëdha e kanë "kontrolluar" mbi baza ligjore vetëm strukturat e Prokurorisë së Përgjithshme dhe hallkat
gjyqësore në çdo çështje penale që shkon për gjykim. Nëse në ndonjë rast, që do ta quaja të veçuar, ndonjë drejtues apo prokuror i thjeshtë në rreth është ndikuar nga njerëz me pushtet, kjo ka të bëjë me karakterin e tij dhe në asnjë rast nuk mund të përgjithësoj apo të errësojë punën dhe përkushtimim e prokurorëve që në shkallë të parë ndjekin penalisht gati 15 mijë çështje në vit. Mendoj se marrëdhëniet në qendër janë reflektuar edhe në nivelet më të ulta të prokurorisë. Mendoj se, përderisa në qendër nuk ka pasur ndonjë
interferencë politike, aq më pak mund të ketë ndodhur kjo në bazë.
A mund të rreshtoni një listë çështjesh, zbulimi i të cilave ju ka dhënë kënaqësi? Domethënë, veprime që shënojnë arritje në sektorë të caktuar të goditjes së shtetit ndaj krimit të organizuar?
Së pari dua të sqaroj se prokuroria nuk është organ zbulimi, as organ hetimi, megjithëse ka të drejtë të kryejë veprime hetimore. Ajo është organ akuze, që do të thotë se ka monopolin që, mbi bazën e fakteve të
paraqitura nga subjekte të ndryshme apo të grumbulluara gjatë hetimeve paraprake, qoftë edhe me iniciativën e vet, të marrë vendim për të ngritur apo jo akuzë penale, të kërkojë në gjykatë kufizimin e disa të drejtave dhe lirive të personave që pandehen si autorë të veprave penale dhe, së fundi, të vendosë nëse janë provat e plota për të dërguar një person në gjykatë apo jo. Roli kryesor i prokurorit është në debatin gjyqësor ku ai ka përgjegjësinë për fatin e çështjes, aty del në pah drejtësia e vendimmarrjes së tij. Nga ana tjetër, sistemi ynë i procedimit është i tipit obligator, që do të thotë se për prokurorin dosjet janë të barabarta, ai nuk ka diskrecionin që të mbivlerësojë një çështje dhe të nënvlerësojë një tjetër, duke u nisur nga rëndësia. Gjithsesi, bazuar në prioritetet e qeverisë çështjet që kanë të bëjnë me krimin e organizuar dhe që ndiqen nga Prokuroria e Krimeve të Rënda, dhe ato ndaj korrupsionit kanë qenë prioritare në veprimatrinë e prokurorisë. Besoj se çështjet penale nuk mund të listohen si artistët punët, apo këngëtarët "hitet" më të mira. Po ashtu, "zbulimi" si nocion lidhet më shumë me punën e policisë në fazat paraprake të hetimit të çështjeve. Megjithatë mund të konstatoj me kënaqësi rritjen e forcës goditëse të ligjit penal në vend sidomos ndaj fenomeneve e formave të krimit të organizuar. Vlen të përmendet se para disa vitesh dukej si pothuaj e pamundur goditja e krimit të organizuar për një sërë faktorësh, midis të tjerëve mungesën e përvojës, bazën ligjorë, logjistikën etj,. Gjatë viteve të fundit, sidomos me krijimin e Prokurorisë për Krimet e Renda, por edhe bashkëpunimin e ngushtë me Prokuroritë homologe të vendeve të tjera, ndjekja penale ka shënuar hapa të dukshëm e të pamohueshëm cilësor.
A mendoni se duhet të ketë ndryshime në konceptimin kushtetues të prokurorisë? Ç'mund të na thoni për njerëzit, motivimi i tyre, lidhjet institucionale, kontrolli i ekzekutivit?
Modelet e prokurorive janë të ndryshme në botë. Ato janë organizuar diku nën autoritetin e Ministrit të Drejtësisë, diku janë të pavarura nga ministri i Drejtësisë, siç është në vendin tonë Por edhe në rastin e
parë, prokurorët janë të pavarur, nuk marrin urdhra nga ekzekutivi se si duhet të procedojnë dhe çarë vendime do të marrin. Në disa vende janë institucione kushtetuese, në të tjera rregullohen me ligj. Prokuroria tek ne është një institucion kushtetues i pavarur dhe ka monopolin e ndjekjes penale dhe të
përfaqësimit të akuzës në gjyq në emër të shtetit. Askush tjetër nuk mund t'i ushtrojë këto atribute kushtetuese. Nëse dikush ka objeksione ndaj punës së prokurorve, dy janë rrugët: ankim në gjykatë ndaj vendimmarrjes së prokurorit ose ankim tek prokurori i Përgjithshëm. Mendoj se urgjentisht ka nevojë të vihet dorë në organet e hetimit. Policia duhet të marrë më mirë përsipër përgjegjësitë e hetimit dhe këtu ka nevojë për reforma strukturore që do të mundësojnë një hetim cilësor dhe nxjerrje të përgjegjësisë individuale. Ka ardhur koha që karriera e një oficeri të policisë duhet të përcaktohet së pari nga bilanci i punës me dosjet konkrete që ai ka ndjekur, me cilësinë e veprimeve proceduriale, me shpejtësinë e tyre. Natyrisht, motivimi në punë i njerëzve që merren me krimin, pavarësisht hapave të hedhur në këtë drejtim, është moment tjetër shumë i rëndësishëm, por mendoj se zgjidhja do të jetë graduale sepse kërkon faturë financiare. Përsa i përket bashkëpunimit institucional, ai është i parashikuar në ligj. Ligji Policisë Gjyqësore, kodi i procedurës penale, ligji për prokurorinë dhe policinë etj. krijon bazën e mjaftueshme për bashkëpunim. Ne jemi shumë të interesuar për këtë bashkëpunim, pasi jemi të bindur se në rritjen eefikasitetit të drejtësisë penale, strukturat në varësi të ekzekutivit luajnë rol kyç. Jo vetëm Policia e Shtetit, por të gjitha policitë e tjera, si ajo Doganore, Tatimore, strukturat e auditimit financiar, shërbimet e ekspertimit etj, nëpunësit e shtetit që kanë detyrim të kallëzojnë çdo vepër kriminale, nëse do të kryejnë me përgjegjësi detyrimet ligjore, ashtu siç parashikohen në ligj, duke administruar çdo fakt që provon ekzistencën e veprës penale dhe individualizon përgjegjësinë penale, suksesi i luftës kundër krimit është i garantuar. Nuk mund të ketë prokuror aq "trim" që, nëse i referohen fakte, të mos ngrejë akuzë dhe të mos kërkoj deklarimin fajtor të një personi që akuzohet për një vepër penale. Reformat dhe diskutimet për përmirësimin e drejtësisë penale janë të pranishme sot gati në çdo shtet të BE-së. Kjo është e domosdoshme aq më shumë në vende si Shqipëria, por kjo kërkon mënçuri, kërkon transparencë, përfshirje të
gjërë të komunitetit të juristëve prokurorë, gjyqtarë, avokatë etj. Reforma nuk mund të bëhet në zyra të mbyllura duke u konceptuar thjesht një punë draftimi ligjesh. Reforma në organet e drejtësisë duhet të bëhet me hapa shumë të kujdesshëm, sepse kemi të bëjmë me institucionet natyrore të shtetit, siç janë gjykata dhe prokuroria, të cilat nuk i shërbejnë vetëm një mazhorance, por më gjatë se kaq.
Si ka qenë raporti juaj me presidentin? A ju ka mbështetur ai në punën tuaj?
Me presidentin marrëdhëniet kanë qënë institucionale korrekte, por edhe njërëzore. E kam ndjerë mbështetjen e tij të vazhdueshme në punën time dhe për këtë e falenderoj. Roli dhe mbështetja e Presidentit ka qenë e vazhdueshme dhe konkrete në drejtim të rritjes se bashkëpunimit midis institucionve të drejtësise në vend, çuarjes përpara të reformës në fushën penale, ku dëshiroj të veçoj rolin aktiv të Presidentit në ngritjen dhe fuqizimin e Gjykatës dhe Prokurorisë për Krimet e Rënda.
Është deklaruar se në Prokurori ka një numër të madh kallëzimesh që bëjnë fjalë për abuzime me paratë e shqiptarëve, apo për evasion fiskal. Ç’po bëhet nga Prokuroria?
Është e vërtetë që ka një fluks kallëzimesh në Prokurori këto kohët e fundit për çështje që lidhen me pretendime për abuzime me fondet shtetërore nga ana e zyrtarëve të ndryshëm apo për evazion fiskal. Ka një vlerësim maksimal të këtyre kallëzimeve nga të gjitha prokuroritë e vendit. Por, pa paragjykuar asnjë prej tyre, prokurorët po hasin vështirësitë e para, që janë rrjedhojë e mosrespektimit të detyrimeve ligjore të subjekteve që kallëzojnë këta zyrtarë apo tregtarë. Neni 281, pika 4, e Kodit të Procedurës Penale parashikon që çdo kallëzues duhet të paraqesë fakte që të krijojnë së pari, dyshimin e bazuar se ka ndodhur një veprimtari kriminale, pra duhet të paraqesë çdo dokument, duhet të tregojë dispozitën ligjore që është shkelur (ligji, neni), deklarime administrative të personave që kanë lidhje me situatën që pretendohet se është kriminale, pasojën e ardhur nga kjo shkelje e ligjit dhe së dyti, kur është e mundur, edhe personat që janë përgjegjës për këto shkelje të ligjit. Nëse kallëzimi vë gishtin tek një person konkret duhet të shpjegojë arsyet përse, kush është ligji që ka shkelur, kush janë objeksionet e tij dhe përse ato nuk qëndrojnë etj. Kallëzimet penale ndaj zyrtarëve kanë një specifikë të veçantë. Ato duhet të vijnë si rregull, pasi të jenë bërë procedurat e hetimit administrativ të shkeljeve nga punëdhënësi sipas rregullave të përcaktuara në ligj. Para se të kërkosh që të përgjigjet penalisht një zyrtar, punëdhënësi është i detyruar që të provojë shkeljet administrative që justifikojnë së pari, largimin nga puna, së dyti përgjegjësinë financiare nëse ka vend për një gjë të tillë.
Nuk mund të pushohet një zyrtar nga puna vetëm për faktin se është kallëzuar për ndjekje penale, pasi siç dihet vepron parimi kushtetues i prezumimit të pafajësisë së çdo personi përderisa në ngarkim të tij nuk ka një vendim penal të formës së prerë. Është absurde të pretendosh përgjegjësi penale, kur nuk je i sigurtë nëse ka apo jo fakte për përgjegjësi administrative apo financiare, apo kur nuk bën asnjë procedurë për të sqaruar ka apo jo shkelje. Procedimi penal nuk është mjet për të argumentuar pushimet nga puna dhe prokuroria nuk ka as kohën e nevojshme, dhe as burime njerëzore të tepërta që të kryej detyrën e institucioneve të tjera, apo të merret me çështje që nuk janë të natyrës penale. Jo çdo shkelje e ligjit është objekt i punës së prokurorisë, por vetëm ato shkelje të ligjit që janë të lidhura me një sanksion penal, pra ato që parashikohen shprehimisht nga kodi penal. Në të kundërt zbatohen sanksionet administrative e financiare që ligjet e ndryshmeparashikojnë.
Kallëzimet e paplota, për më tepër kur në to nuk ka dyshime të bazuara në fakte, janë "taktika" për të justifikuar luftën kundër korrupsionit, duke lënë topin në derën e prokurorisë. Nëse edhe prokuroria do të ecë me këtë mendësi, duke e lënë topin para gjykatës edhe për çështje që nuk kanë fakte kriminale, atëhere demokracia, të drejtat e njeriut do të rrezikohen seriozisht, dhe kriminelët e vërtetë nuk do të ndëshkohen. Edhe ata që kallëzojnë në kundërshtim me ligjin, mund të jenë nesër viktima të kësaj mëndësie. Kallëzimet e paplota detyrojnë prokurorët, opgj-të, të prodhojnë akte, të bëjnë dosje, të bëjnë sekuestrime etj që do të thotë shpenzim kohe, shpenzim parash. Të gjitha këto veprime kanë koston e tyre që mbulohet nga taksat e shqiptarëve. Prandaj është e domosdoshme që të gjitha institucionet e shtetit të bëjnë detyrën ashtu siç e kërkon ligji. Kur Kuvendi i ka dhënë buxhetin prokurorisë apo numrin e punonjësve, ka patur parasysh përmbushjen vetëm të detyrimeve që i përkasin institucionit të prokurorisë, dhe jo edhe
detyrimet e të tjerëve.
Aksioni i fundit i Prokurorisë për arrestimin e një biznesmeni të lidhur me ish-kryeministrin Nano është përfolur shumë si i frymëzuar nga zoti Berisha. Si qëndron e vërteta?
Nuk ka asnjë frymëzim jashtë ligjit. Është rutinë normale e prokurorisë. Është një procedurë mëse normale. Është bërë grumbullim i provave, është dërguar kërkesa në gjykatë dhe ajo ka marrë vendim. Kjo është kompetencë e Prokurorisë të Krimeve të Rënda. Është për të ardhur keq që askush nuk thotë një fjalë të mirë për punën e prokurorëve, apo të gjyqtarit që vendosi arrestimin, por vetëm e politizojnë çështjen. Kjo ishte çështje provash. Ndryshimet politike mund të kenë ndërgjegjësuar njerëzit që kanë pasur dijeni per kete ngjarje per te bashkepunuar me shtetin. Unë i kuptoj hamendësitë e medias shqiptare, por ju garantoj se është zbatuar vetëm ligji. Nëse do ta bënim pak më vonë, do të thoshin se Berisha urdhëroi arrestimin. Nëse do ta bënim me parë gjatë fushatës, do të thoshin se Prokuroria po bën lojën e opozitës. Në çdo situatë do të thoshin nga ndonjë gjë, që do ta politizonte procesin në fjalë. Dy ditë më parë një koleg Italian qe bashkëpunon me Prokurorinë, pasi kishte pare politizimin e çështjes ne media na tha: Mos u mërzisni, koincidenca te tilla ndodhin edhe tek. Ne 1994 Berluskoni ishte pjesëmarres ne nje takim ne Napoli ku diskutohej kunder krimit te organizuar dhe prokurori i Milanos kishte derguar zyres se tij, po ne te njeten dite, njoftimin se ai ishte person nen hetim per nje veper penale. Pikërisht koecindenca e takimit me veprimin e prokurorit u quajt skandal, veprimi i prokurorit nga media afër Berluskonit u quajt provokacion politik që donte të diskretitonte figurën e tij. Por ne fakt ishte nje situatë normale e punës së Prokurorisë.
Deputeti Nikollë Lesi nisi një proces akuzash ndaj kryeministrit Nano për të ashtuquajturën "çështje e Shkallnuerit" dhe trafikun e armëve. Si rezultuan çështjet e ngritura: Lesi gënjente apo çështjet janë të hapura dhe presin kohë më të mira për t'u vazhduar?
Është një debat tashmë i mbyllur. Miku im i vjetër pati një betejë me ish- kryeministrin, ku kërkoi angazhimin e prokurorisë në sqarimin e disa momenteve të akuzave të tij. Qëndrimi ynë ka qenë ligjor, pavarësisht se kush ishte Lesi apo Nano. Besoj se e kemi mirëkuptuar njëri-tjetrin, Prokuroria në rolin e akuzës dhe Lesi në rolin e mbrojtjes.

[gent durazzo]

akoma keni besim ne kete maskara.ky duhet te shporret nga ai post pasi po fle mbi dosjet e krimit.Ky eshte pjese e krimit nano@xhoana

[Genti^Itali]

Drejtuesit e institucioneve shtetërore, në garë për të denoncuar rastet e korrupsionit në Prokurorinë e Përgjithshme

Korrupsioni, 170 dosje në prokurori

Tatim-Taksat kallëzojnë 120 subjekte private. Hetim Doganave për vonesa në denoncimet e shkeljeve

Ened Janina

TIRANË - Rrotacioni politik duket se ka vënë në garë drejtuesit e institucioneve shtetërore për të denoncuar në prokurori rastet korruptive. Qindra dosje janë grumbulluar vetëm gjatë ditëve të fundit në zyrën e luftës kundër krimit ekonomik, e prokurorët janë duke i kthyer denoncimet në çështje penale. Për drejtuesit e Prokurorisë së Përgjithshme, fundi i muajit gusht dhe fillimi i shtatorit kanë pasur një fluks shumë të madh kallëzimesh penale të mbërritura në organin e akuzës nga Kontrolli i Lartë i Shtetit, drejtoria e Tatim- Taksave si dhe nga Doganat. Të gjitha këto kallëzime penale janë regjistruar nga ana e prokurorisë dhe kanë filluar procedimet përkatëse. Lajmi është pohuar dje nga burimet zyrtare të Prokurorisë së Përgjithshme, të cilat pohojnë për “Shekullin” se vetëm Tatimet kanë denoncuar në prokurori mbi 120 raste korrupsioni në të gjithë territorin e Shqipërisë, ku qytetet më problematike janë Tirana me 44 kallëzime dhe Vlora me rreth 70 kallëzime.


Tatim-Taksat
Muajt e fundit, në organin qendror të akuzës, ka pasur një fluks shumë të madh kallëzimesh penale të bëra nga ana e institucioneve shtetërore në drejtim të subjekteve private si dhe zyrtarëve shtetërorë. Me fillimin e shtatorit, të gjitha këto institucione shtetërore janë turrur në prokurori për të denoncuar shkelësit, duke u bashkuar edhe ata në luftën kundër korrupsionit. Kështu, vendin e parë nga institucionet denoncuese e zë zyra e Tatim- Taksave. Ajo ka denoncuar në organin e akuzës më shumë se 120 raste ku subjekte private nuk kanë paguar detyrimet. Kallëzimet më të shumta janë për qytetin e Vlorës, me rreth 70 raste si dhe në Tiranë ku janë denoncuar 44 raste. Ndërkohë, një fluks i madh denoncimesh ka mbërritur edhe nga qyteti i Shkodrës. Për secilin nga denoncimet, Prokuroria e Përgjithshme ka urdhëruar fillimin e hetimeve dhe shqyrtimin deri në detajin më të vogël të materialit kallëzues. Burime të prokurorisë pohuan se këto kallëzime janë për firma që kanë kryer aktivitetin e tyre shumë kohë më parë, ose për dëme minimale. Doganat
Drejtoria e Doganave mban vendin e dytë për numrin e madh të denoncimeve antikorrupsion, drejtuar organit qendror të akuzës. Ky institucion ka paditur në prokurori një numër të madh subjektesh private, të cilat nuk kanë paguar detyrimet doganore gjatë viteve të fundit. Rreth 40 subjekte janë denoncuar si debitore tek doganat dhe për vite me radhë nuk kishin paguar detyrimet. Oficerët e policisë gjyqësore të doganave i kishin konstatuar këto raste dhe kishin punuar për dokumentimin e tyre. Edhe pse shumica e rasteve ishin konstatuar në vitet 2000-2003, ato janë mbajtur në zyrat e doganave dhe janë referuar në prokurori vetëm gjatë ditëve të fundit. Për secilin prej rasteve përkatëse Prokuroria e Përgjithshme ka nisur hetimet dhe verifikimet. Ndërkohë, burimet nga prokuroria pohojnë se do të hetojë edhe shkakun e vonesës së doganave në bërjen e kallëzimeve penale. Burimet e prokurorisë pohuan dje se këto çështje po ndiqen me përparësi por është ende shumë herët për të nxjerrë konkluzione.


Denoncimet e KLSH
Institucioni i tretë që ka denoncuar në prokurori është Kontrolli i Lartë i Shtetit. Në datat 21 dhe 23 shtator KLSH-ja ka denoncuar në organin e akuzës disa shkelje të konstatuara së fundmi. Burimet zyrtare të Prokurorisë së Përgjithshme pohuan dje se KLSH-ja ka denoncuar në prokurori pesë tendera rrugësh, tre kallëzime për ambasadorin shqiptar në SHBA, Fatos Tarifa, si dhe kallëzimin për tre inspektorë të tatim- taksave, gjithsej 11 dosje. Në kallëzimet e saj, KLSH-ja pretendon se në tenderat e rrugëve është ndryshuar qëllimi i tenderimit. Sipas saj, pas zhvillimit të tenderit ka pasur rritje të volumit, ndryshime të zërave përkatëse si dhe pagesa për punime të pakryera. Për secilin kallëzim organi i akuzës ka filluar verifikimet përkatëse. Burimet e prokurorisë pohuan dje se në organin qendror të akuzës është ngritur një grup pune, i cili do të shqyrtojë të gjitha kallëzimet e ardhura nga ana e KLSH-së. Madje javën e ardhshme ky grup pune ka caktuar një takim me përfaqësuesit e KLSH-së për të sqaruar shkeljet e pretenduara si dhe për të marrë disa materiale shtesë.


TATIMET

Zyra e Tatim-Taksave mban vendin e parë për numrin e madh të kallëzimeve, dërguar prokurorisë. Nga ky institucion janë denoncuar në prokurori mbi 120 subjekte private, të cilat nuk kanë paguar detyrimet për vite me radhë. Qytetet më problematike janë Vlora e Tirana

DOGANA

Mëse 40 dosje janë denoncuar në prokurori nga drejtoria e Doganave për mosshlyerje të detyrimeve. Sipas prokurorisë, këto dosje janë bërë gati gjatë viteve 2002-2003, por janë mbajtur në sirtarë për gati 2 vjet. Organi i akuzës do hetojë edhe arsyet e vonesave të denoncimeve

KLSH

Zyra e Antikrimit Ekonomik në Prokurorinë e Përgjithshme numëron rreth 11 dosje të denoncuara pak ditë më parë nga Kontrolli i Lartë i Shtetit. Pesë dosje janë për shkelje në tendera të rrugës, 3 për abuzimet e ambasadorit Fatos Tarifa dhe 3 kallëzime të tjera për inspektorët e Tatimeve