Jaku: Çastet me pistoletë te koka

[Genti^Itali]

Kryebashkiaku i Lezhës, Gjokë Jaku, pohon se autorit i dridheshin duart, kur i vuri pistoletën në kokë në hyrje të pallatit

Jaku: Çastet me pistoletë te koka


Lindita Çela

TIRANË- “Të ruajti Zoti. Ke lindur për së dyti”. Është ky urimi që i bëjnë vizitorë të shumtë kryetarit të Bashkisë së Lezhës, Gjok Jaku. Të afërm të tij, po edhe të njohur, gjatë ditës së djeshme kanë qendruar me orë të tëra në hyrje të sallës së kirurgjisë së spitalit Ushtarak, në pritje për ta takuar. Për shumicën prej tyre, ka qenë fat që kryebashkiaku është gjallë pas atentatit në hyrje të shtëpisë. Pas 7 orësh ndërhyrje kirurgjikale, mjekët më në fund thonë se Gjok Jaku është jashtë rrezikut për jetën, ndërkohë që vetëm pas mesditës, kryetari i bashkisë ka qenë në gjendje të tregojë ngjarjen, së cilës i ka mbijetuar falë një mrekullie. Këmbët, aty ku edhe ka marrë plumbat pothuajse nuk i lëviz, ndërkohë që herë pas herë detyrohet të ndërpresë rrëfimin për shkak të vizitave të shumta. Ka arritur ta shohë atentatorin që ka qëlluar mbi të, megjithëse e ka patur të pamundur t’u shmangej krejtësisht plumbave.
Z. Jaku, a mund të na tregoni sesi ndodhi plagosja juaj, mesnatën e së enjtes?
Po kthehesha në shtëpi dhe ishte mesi i natës. Me thënë të drejtën, as që ma merrte mendja që do të më ndodhte një gjë e tillë dhe për fat të keq, në apartamentin ku unë jetoj, nga kati i parë deri në të tretin nuk ka energji elektrike nëpër shkallë, kështu që pamja ishte pak e zbehtë. Po ecja i shpenguar, pa menduar që më kishin zënë pritë. Kur afrohem në hyrje të pallatit, një person më vë armën në kokë, gati për të më qëlluar.
Ju e njohët këtë person?
Si fytyrë po. Se kush ishte me saktësi, nuk e kuptova për momentin.
Përpara se të vendoste pistoletën në kokën tuaj, a pati ndonjë konflikt apo shkëmbim fjalësh mes jush?
Jo. Menjëherë sapo më vuri re që po futesha në hyrje të pallatit, më vuri pistoletën në kokë dhe më thoshte vazhdimisht që do më vriste. Unë pashë që po i dridheshin duart dhe e sulmova për t’u vetëmbrojtur. Në atë moment, pistoleta ra përtokë. Zgjas këmbën për ta shtyrë, e për fatin tim të keq ai e kapi para meje dhe filloi të më qëllonte. Këtë moment nuk e mbaj mend se çfarë ndodhi me saktësi, sepse humba ndjenjat dhe jam përmendur këtu.
Ju thatë që e njohët për fytyrë personin që ju qëlloi me pistoletë. A kishit ndonjë konflikt të mëparshëm me të?
Të them të drejtën, konflikt personal jo. Por familja e tij ka një ndërtim pa leje në varrezat e qytetit dhe një tjetër përballë bashkisë. Unë nuk kam miratuar lejet e ndërtimeve për këto dy objekte. Madje, para ca ditësh, babai i tij, Ndue Bajraktari, më kishte kërcënuar edhe në telefon. Ata kanë zënë një sipërfaqe shumë të madhe tek varrezat. Thonë se e kanë për të gjithë familjen, por nuk e di përse e duan. Aty kanë ndërtuar një varr shumë të madh, që është ndërtim i paligjshëm. Ky ka qenë konflikti që unë kam pasur me ta, për shkak të detyrës time si kryetar i Bashkisë së Lezhës.
Zoti Jaku, a keni bërë ju denoncim në polici, për telefonatën kërcënuese që ju ka bërë babai i personit që qëlloi në drejtimin tuaj, duke u rrezikuar jetën?
Jo, nuk e kisha denoncuar. Duke ndjekur zakonet tona, kisha vënë njerëz që të na njihnin të dy palët që ky konflikt të mos shkonte deri këtu. Me thënë të drejtën, as mua nuk më shkonte mendja se ai do të guxonte të më vriste, vetëm për këtë vendim që unë kam marrë.
A ka pasur konflikte të tjera mes jush dhe personit që u zuri pritë në hyrje të pallatit tuaj?
Absolutisht jo. I vetmi komunikim ka qenë me Nduen, të atin e personit që më qëlloi dhe ky ka qenë me telefon. Ndërsa këtë djalin, fillimisht edhe nga pamja nuk e njoha, sepse sapo ishte kthyer nga Italia. Jo vetëm me këtë familje, po me askënd tjetër nuk kam probleme të tjera, ndaj në qytet eci serbes. U thashë që as më shkonte mendja se do të tentonin të më vrisnin, për një vendim të drejtë që unë kam marrë.


PLAGOSJA

E shoqja: S’më besohej që plumbat godisnin tim shoq

TIRANË- Marie Jaku i ka qendruar të shoqit mbi krye, gjatë gjithë ditës së djeshme. Sytë e enjtur dhe pamja e lodhur të lënë të kuptosh që për Marien, mesnata e së enjtes është ndër më të tmerrshmet e jetës së saj. Ka qenë ndër personat e parë që ka parë të shoqin të mbuluar në gjak, e më pas ka qendruar gjatë gjithë natës pas derës së urgjencës, me zemër të ngrirë për fatin e bashkëshortit. E vetëm atëherë kur mjekët kanë thënë se Gjokë Jaku është jashtë rrezikut për jetën, gruaja rreth të 35-ave ka marrë frymë lirisht. Maria thotë se në momentin kur është qëlluar i shoqi, ndodhej në shtëpi. “Prisnim të kthehej nga Shkodra, kur dëgjojmë në hyrje të pallatit të shtëna. Kurrë nuk më besohej se ato plumba po godisnin tim shoq”,-rrëfen për “Shekullin” Maria. Të shtënat e armëve duket se nuk kanë tronditur vetëm anëtarët e familjes së kryetarit të Bashkisë së Lezhës. Pothuajse i tërë pallati është alarmuar në mes të natës. Maria tregon se më pas ka dalë në shkallë dhe aty ka parë të shoqin, të mbytur në gjak. Tmerrin që ka përjetuar, Maria nuk është në gjendje ta shpjegojë, por thotë se menjëherë ka kërkuar që Gjoka të dërgohet në spitalin e qytetit të Lezhës dhe më pas është transferuar në Tiranë, ku është kryer operacioni i vështrirë.



Kryetari i bashkisë së Lezhës, Gjokë Jaku dje në Spitalin Ushtarak

[Brari]

Sherim te shpejte kryetarit te Lezhes..!

edvinit i ra shi ne kallamoq te vet.. me kte rast..
Kishte shkruar 1 meter intervist kunder Berishes.. a thua se Berisha e vrau Jakun e ngrate..
Per Genc Sinen nuk tha gjysem llafe Edvini..as per Vathin as per doktor Kastratin.. sepse nuk ju du "shi ne kallamoq te vet" ajo pun.. sepse ishte Nano kryeminister..

[Genti^Itali]

Ndue Bajraktari negocion që i biri të dorëzohet vetë. Gëzimi telefonon dhe pohon frikën që ka

Gëzimi: Dorëzohem nëse policia nuk më qëllon


Lindita Çela

Gëzim Bajraktari, njeriu që tre ditë më parë qëlloi me armë mbi kryetarin e Bashkisë së Lezhës është gati që të dorëzohet nëse policia e siguron që nuk do të qëllojë me armë mbi të. Pasditen e djeshme ai ka kontaktuar në linjë telefonike me televizionin A1 dhe ka deklaruar se është gati që të dorëzohet. Ndërkohë, po dje, ai ka folur në telefon edhe me të atin, Nduen. “Baba nuk kisha ndërmënd ta qëlloja. Por pasi më sulmoi nuk kisha rrugë tjetër”. Kështu mësohet t’i ketë thënë të atit, Gëzim Bajraktari. I ati, Ndue, thotë për gazetën “Shekulli” se i biri e ka telefonuar me një numër të fshehur dhe se nuk ka asnjë ide se ku mund të ndodhet. Ajo që siguron Ndueja është se Gëzimi nuk është larguar jashtë territorit të Shqipërisë por ai qëndron i fshehur deri sa të sqarohet e vërteta mbi konfliktin e lindur ndëmjet familjes Bajraktari dhe Gjok Jakut. “Ajo që thotë Gjoka nëpër intervista nuk është apsolutisht e vërtetë. Unë në varrëza nuk po ndërtoja biznes, po ashtu as nuk e kam kërcënuar. Përkundrazi, ka qenë ai që ka fyer familjen time. Ndaj dhe im bir donte ta takonte”,- thotë Ndue Bajraktari. Sipas burrit 65- vjeçar, ky ka qenë edhe motivi i takimit ndërmjt Gëzimit dhe Gjokë Jakut por gjërat kanë shkuar për ters në momentin e fundit.
Dorëzimi
Pasditen e djeshme, në redaksinë e televizionit A1 ka marrë një pesron që është prezantuar si shok i Gëzim Bajraktarit, njeriut që qëlloi me armë mbi kryebashkiakun e Lezhës, Gjok Jaku. Pas tij në telefon ka dalë vetë Gëzimi, i cili ka pohuar se është gati që të dorëzohet në polici. “Unë jam gati që të dorëzohem por kam frikë. Nëse policia nuk qëllon mbi mua unë dorëzohem”, -ka thënë dje Gëzim Bajraktari. Ai ka shtuar se donte që të dorëzohej dhe që e gjithë e vërteta e kësaj ngjarjeje të zbardhej. Ndërkohë ai i druhej policisë se mos e qëllonte në momentin që do të dilte haptazi në qytetin e Lezhës. I frikësuar nga policia ai vazhdon që të qendrojë i fshehur.
Telefonata
Një ditë pas ngjarjes, Gëzim Bajrakatari i ka telefonuar të atit për t’i treguar atë çfarë kishte ndodhur. “E prita për ta takuar dhe sapo më pa filloi të më shante. Më pas u zumë dhe unë u detyrova të gjuaja mbi të”. Është ky shpjegimi që jep Ndue Bajraktari në bazë të telefonatës së të birit. Ai thotë se ndërmjet Gëzimit dhe Gjok Jakut ka patur edhe një përleshje me trup, sherr ky që ka përfunduar në të shtëna nga i biri. Ndueja thotë se nuk ka idenë nga e ka siguruar Gëzimi pistoletën por thotë se e ka marrë me vete pasi e dinte se edhe kryetari i bashkisë qëndronte tërë kohën i armatosur. Plaku 65- vjeçar thotë se nuk ka asnjë ide se ku mund të jetë fshehur i biri. “Edhe nëpërmjet kësaj interviste i bëj thirrje tim biri të dorëzohet sepse për veprimin që ka bërë duhet t’i përgjigjet ligjeve të shtetit. Por një nga porositë e tij është që unë të tregoj të vërtetën për atë çfarë ka ndodhur”,- thotë Ndue Bajraktari. Nga ajo çfarë rrëfen Nduja mëson se i biri qëndron i fshehur pasi ka frikë nga një ekzekutim i forcave të policisë. Ndërkohë që vetë Nduja thotë se po bën të pamundurën për të bindur të birin të dorëzohet dhe të mbajë përgjegjësi ligjore për veprimin që ka kryer.



Kanuni, ngujohet familja e Bajraktarëve
Ka ligj por ka dhe Kanun. Dhe me sa duket, në krahinat e Mirditës më shumë të dënon kanuni se sa ligji, madje me këtë të fundit, hesapet lahen më kollaj. Në familjn e Ndue Bajrakatarit duket se problemi më i madh është zbatueshmëria e Kanunit. Në bazë të tij, familja e Bajraktarëve është në gjak me Gjok Jakun dhe për këtë arsye është ngujuar. Kjo nuk ndodh vetëm me gjashtë motrat dhe prindërit e gjaksit por me të gjithë fisin e tij. Brënda 24 orëve pas ngjarjes, në bazë të Kanunit, familja e dëmtuar kishte të drejtë të qëllonte mbi autorin ose këdo nga fisi i tij për të vënë nderin e gjakun në vënd. Kjo e drejtë i njihet edhe më pas por jo më për gratë e famijes. Për këtë arsye dhe Ndueja gjatë gjithë ditës së djeshmë është përpjekur të gjejë njerëz për të pajtuar gjakun. “Pikësëpari do t’i kërkojnë falje Gjok Jakut për shkak se ishte im bir që nxori armë mbi të. Dhe në rast se nuk më fal gjakun do t’i kërkoj që ky gjak të bjerë mbi mua dhe jo mbi anëtarët e tjerë të familjes sime. Sepse edhe im vëlla që jeton larg prej këtu sapo ka ndodhur ngjarja është ngujuar. Tani do të jetë Kanuni ai që do të vendosë”,- të thotë Ndue Bajraktari. Po në bazë të Kanunit pritet që tre burra të shkojnë sot në derë të Gjok Jakut për të kërkuar falje. Ndue thotë se mirëpret çdo vendim të kryetarit të Bashkisë sepse është ai i dëmtuari në këtë rast dhe se atij i takon ta nderojë. “Por do të ishte në nder të tij të falte gjakun sepse askush prej nesh nuk donte që gjërat të shkonin deri këtu”,-thotë Nduja i cili pas ngjarjes nuk e ka kapërcyer pragun e shtëpisë.


Kreu i Policisë së Shtetit paralajmëron dënimin me pesë vjet burg për ata që ndihmojnë të kërkuarin
Ibraj: Ndëshkohet kush ndihmon Bajraktarin
Në lidhje me ngjarjen e tre ditëve më parë ka reaguar dje edhe kreu i Policisë së Shtetit, Bajram Ibraj. Me anë të një deklarate për shtyp ai ka pohuar se ngjarja po ndiqet me prioritet nga policia dhe Prokuroria për Krimet e Rënda. “Policia e Shtetit në këto momente është duke lokalizuar vendin ku ndodhet autori dhe po përgatisim veprimet për kapjen dhe vënien përpara përgjegjësisë ligjore të tij. Gjithashtu do të veprojmë me forcën e ligjit edhe ndaj personave që i japin përkrahje autorit të krimit si: furnizime me ushqime, me mjete të tjera për jetesë ose sigurimi i një banese, vendqëndrimi ose në çdo mënyrë tjetër me qëllim që t’i shpëtojë kërkimit, kapjes ose arrestimit të tij. Kjo është vepër penale që parashikohet në nenin 302 të Kodit Penal dhe dënohet me gjobë ose burgim deri në 5 vjet”,- tha Ibraj. Me këtë deklaratë kreu i policisë ka paralajmëruar se do të ndëshkohen të gjithë ata që do të ndihmojnë Bajraktarin. “Prokuroria e Krimeve të Rënda ka filluar çeshtjen penale për vrasje në rrethana cilësuese e mbetur në tentativë, në bashkëpunim dhe për armëmbajtje pa leje, parashikuar nga nenet 29/c, 22, 25 dhe 278 të Kodit Penal. Policia e Shtetit është maksimalisht e angazhuar dhe po punon me intensitet për kapjen e autorit, ndërkohë që kemi bllokuar akset kryesore rrugore, por edhe ato dytësore, si dhe kemi bashkëpunuar me policitë e vendeve fqinjë”, -thuhet në njoftimin e policisë.