President Rugova, kthehu kah Qabja

[nusret]

President, kthehu kah kibla!



Presidenti i Kosovës e mban të njëjtin emër të Pejgamberit që ndërtoi Qaben, ndërsa nga shiptarët e Kosovës po ashtu është quajtur Pejgamber për shkak të identifikimit të tij me pavarësinë e Kosovës, dëshirës më të madhe të kosovarëve.Besimtarët e fesë islame në Kosovës, së fundi, kanë kërkuar nga Pejgamberi i tyre në Tokë, që të tregojë më shumë respekt për fenë e tyre



Arlinda Desku, Arianit Osmani


Besimtarët e fesë islame në Kosovë, të martën, ende pa zbardhur mirë drita, me nga një sexhade në krah, nëpër mjegull, janë nisur për në xhamitë më të afërta për ta falë Fitër Bjaramin.
Atyre që nuk kanë mundur të zënë vend brenda xhamive, nuk u ka penguar aspak lagështia e ajrit, të ftohtit e mëngjesit dhe lloçi nëpër oborret e xhamive për të rënë në gjunj, siç e kërkon riti i tyre fetar.
Pamje të tilla janë shënuar në shumë qytete dhe fshatëra të Kosovës, ditën kur është bërë falja e namazit.
Në ditën e Bajramit të Madh, siç quhet festa që vie pas 30 ditë agjërimi të Ramazanit, muajit të madhërueshëm për myslimanët, gjithçka ka pushuar së funksionuari në Kosovë, përpos ndonjë kafiterie aty-këtu.
Gjatë ditëve të Ramazanit, në orën 16:30, kur në tavolinat e shtëpive të besimtarëve myslimanë shtrohej iftari, kryeqyteti i Kosovës, Prishtina, shndërrohej në një vend krejtësisht të qetë. Shumë prej pronarëve ua vënin dryrin lokaleve të tyre, me përjashtim të furrave të bukës, të cilat nxirrnin pitalkat e nxehta për drekë. Për ata që nervozohen me komunikacionin e stërngarkuar, kjo ishte një kohë ideale, për shkak se rrugët zbrazeshin në masë të madhe.
Mbi nëntëdhjetë për qind e popullatës shqiptare të Kosovës, siç pohohet, i takon besimit islam, përfshirë edhe vetë presidentin e vendit, Ibrahim Rugovën.
Zeqir Rrahmani, 70 vjeç, i ardhur në Prishtinë, pas luftës, nga një fshat i Llapit, kësaj radhe nuk i ka shijuar si të ëmbla hurmat dhe bakllavën, për shkak se presidenti nuk ua kishte uruar besimtarëve myslimanë Ramazanin.
“Valla bre mixhë, jam prekë fort pse Rugova nuk na e uroi Ramazanin. Diqysh si me na lanë mas shpine. Ban vaki që po lypim shumë, ai i din punët ma mirë se na. Nashta, bre mixhë, qashtu duhet me ja ba, sebep këtynë të hujve, veç apet s’po më doket sjellje me mendë, nuk po na respekton sa duhet”, thotë ai, pasi ka mbaruar faljen e namazit në oborrin e Xhamisë së Madhe në Prishtinë, ditën e Fitër Bajramit.
Liderët politikë kosovarë, si dhe përfaqësues të zyrave ndërkombëtare në Prishtinë, kanë tubuar në restorane të ndryshme udhëheqësit e Bashkësisë Islame të Kosovës dhe u kanë shtruar atyre iftar për nder të muajit të Ramazanit.
Ata, po ashtu, ditën e Bajramit, kanë shkuar në lokalet e Bashkësisë Islame për t’u uruar festën atyre.
Kështu nuk ka vepruar Presidenti i Kosovës, Ibrahim Rugova. Besimtarëve myslimanë ai nuk ua ka uruar Ramazanin, nuk ka shtruar iftar, as nuk ka shkuar në Bashkësinë Islame për ditën e Bajramit. Ai është mjaftuar vetëm më një urim për Bajram, të cilin e kanë transmetuar mediat.
Naim Tërnava, kryetar i Bashkësisë Islame të Kosovës, ka pritur që në mesin e liderëve tjerë kosovarë dhe ndërkombëtare të ishte edhe Presidenti i Kosovës.
“Rugova nuk ka qenë për vizitë tek ne për Bajram, por na e ka uruar. Është problem i tij personal pse nuk ka ardhur. Natyrisht, është dashur të vijë edhe ai. Rugova nuk e ka uruar Ramazanin, as nuk ka shtruar iftar. Sigurisht nuk ka pasur kohë. Por, shpresojmë se Ramazanin që vjen të gjej kohë”, thotë ai për “Javën”.
Muhamet Hamiti, zëdhënës i Presidencës, ndonëse fillimisht pranoi të përgjigjej në pyetjet e “Javës”, lidhur me këtë mungesë, më vonë ai ishte i padisponueshëm në telefonin e tij celular.
Gjergj Dedaj, kryetar i Partisë Liberale të Kosovës, i cili i takon besimit katolik, e praktikon fenë së cilës i përket, ndërsa tërheq vërejtjen se këtë duhet ta bëjnë të gjithë politikanët tjerët, pa marrë parasysh se cilit besim i takojnë.
“Është bindje e tij personale. Nuk kam dëshirë të përzihem në orientimin e tij shpirtëror. Por, mendoj se Rugova është dashur ta vizitonte Bashkësinë Islame. Ne duhet të paraqitemi ashtu si jemi. Askush në Kosovë nuk mund të paraqitet më katolik se Papa”, thotë ai.
Besimtarët myslimanë në Kosovë nuk e kanë pritur mirë mungesën e kujdesit të presidentit të tyre për festat fetare. Atyre nuk u ka kaluar pa u vërejtur ky detaj i fundit. Megjithatë, Qemajl Morina, dekan i Fakultetit të Studimeve Islame, konsideron se nuk është bërë nami pse Rugova nuk ka shkuar në Bashkësinë Islame, mjafton që ai e ka uruar Bajramin.
“Kjo nuk prish asgjë. Nuk shohim tendenciozitet. Besoj se ka respekt. Ai na ka uruar. Iftar s’ka shtruar, por e ka shtruar Darkën e Lamës”.



Rugova i quan myslimanët “Musla”

Hera e fundit kur Presidenti i Kosovës, Ibrahim Rugova, ka vizituar lokalet e Bashkësisë Islame të Kosovës, siç mësohet, ka qenë para dhjetë vjetësh. Kjo ka ndodhur kur partia e tij, Lidhja Demokratike e Kosovës, për shkaqe sigurie, kishte mbajtur një nga kuvendet e saj në medresenë “Alaudin”.
Ndërkohë, gjatë gjithë karrierës së tij politike, në paraqitjet e tij publike Ibrahim Rugova është munduar që Kosovën ta paraqesë si një vend me simpati të veçanta ndaj katolicizmit. Fotografia e tij me Papa Gjon Palin II, dhe sidomos kërkesa për ndërtimin e Katedralës në qendër të Prishtinës, kanë kontribuuar që ky imazh të përforcohet edhe më shumë.
Ka të tillë që mendojnë se e tërë kjo ka një prapavijë politike, duke pohuar se Rugova ndanë frikën me një pjesë të njerëzve që thonë se Kosova duhet të rrijë sa më larg myslimanizmit, meqë ajo është e varur nga Perëndimi.
Por, analisti i njohur kosovar, Shkëlzen Maliqi, mendon se kjo politikë nuk mund të qëndrojë. Ai thotë se Rugova ka një koncept të ngushtë të politikës së tij, duke i shikuar gjërat vetëm bardh dhe zi.
“Kjo, në fakt, s’është e arsyeshme. Skena politike në botë është komplekse. Politikani vizionar nuk i adresohet vetëm një superfuqie, vetëm një adrese, por kërkon ta bëjë për vete edhe atë që e konsideron ‘armik’… ”, thotë Maliqi.
Mirëpo, njërëz që e njohin për së afërmi presidentin Rugova nxjerrin në pah se, në fakt, bëhet fjalë për një bindje të tij personale dhe orientim shpirtëror kah krishtërizmi. « Myslimanë jemi, po, por veç të çlirohemi një herë… », citohet të ketë thënë Rugova kur ka ndodhur të kritikohet për qëndrimin e tij indiferent ndaj myslimanizmit, gjatë kohës së pushtimit serb. Por, preferencat e tij për katolicizmin kanë vazhduar edhe pas përfundimit të luftës.
Gjergj Dedaj tërheq vërejtjen se Europa e di për përkatësinë fetare të popullit të Kosovës, prandaj nuk ka arsye për kamuflim.
“Duhet të paraqitemi çfare jemi. Nuk mund t’i hyjmë në qejf Europës duke i shkelur vlerat tona, duke e shkelur vetveten. Bishtërimet, ngjyrimet, nuk janë korrekte para të tjerëve. Nuk mund t’i shesim mend ashtu Europës”, thotë ai për “Javën”.
Një nga karakteristikat thelbësore që i është atribuar shqiptarëve është indiferenca religjioze, shkruan historiani i njohur anglez Noel Malcolm në punimin e tij “Mitet e Identitetit Kombëtar Shqiptar: Disa elemente kyqe”.
Pasi jep disa referenca të shumë autorëve të cilët multikonfesionalitetin e shqiptarëve e shpjegojnë me të qenit indiferent ndaj religjionit, Malcolm citon autorin shqiptar të fillimit të shekullit 20, Kostandin Çekrezi: “Myslimani shqiptar asnjëherë nuk ka harruar…religjionin e tij të mëhershëm, shenjtorët e të cilit ai ende i kujton si psh, Shën Gjergjin…dhe Shën Dimitrin”.
Ky duket të jetë edhe qëndrimi i dr. Rugovës. Ai i rikthehet katolicizimit jo ndoshta si religjion, por si simbolikë që paraqet më mirë shqiptarizmën. Pjetër Bogdani, me të cilin Rugova thotë se është mahnitur (Vepra e Bogdanit) dhe e ka një lloj idhulli personal, ka qenë prift katolik, autor i veprës së parë të shkruar në gjuhën shqipe (Çeta e Profetëve) dhe atdhetar i dëshmuar në luftë kundër turqve.
Por, sipas Malcolmit, kjo shkakton konfuzion.
Nëse shqiptarët paskan qenë kaq besnikë ndaj krishterizmit, i cili në një kohë ishte religjioni i tyre kombëtar, atëherë pse kaq shumë shqiptarë u kthyen në Islam, pyet Malcolm.
Një burim nga Presidenca e Kosovës, pohon se në «Shtëpinë ë Bardhë», në Velani, feja islame është praktikuar në një masë vetëm deri sa ishte gjallë nëna e Presidentit, por jo më.
“Prej vdekjes së saj gjithçka ka përfunduar. Kurrë më nuk është zier hallvë për Natën e Madhe, nuk është bërë bakllava për Bajram, as iftar e agjërim për Ramazan….Ndërkaq, githçka që ka lidhje me fenë katolike, është prezente në atë shtëpi. Rugova e praktiton atë fe. Ai i feston Krishtlindjet dhe i dekoron dhomat për këtë festë. Kumonat janë aty…”, thotë ky burim.
Sipas po këtij burimi Rugova asnjëherë nuk ka organizuar ndonjë manifestim që ka lidhje me traditat e kulturën islame.
“Ai, madje, myslimanët i thërret ‘Musla’, në kuptimin pezhorativ të kësaj fjale”, bën të ditur ky burim .
Një nga këshilltarët e Presidentit, Sali Cacaj, siç merret vesh, ka ndërruar fenë, nga mysliman është bërë katolik.



Hipokrizia e politikanëve kosovarë

Ajo që karakterizon skenën “politiko-fetare” në Kosovë është preferenca që kanë udhëheqësit politikë dhe të jetës shoqërore për të qenë prezentë në Kishën Katolike në Prishtinë për Krishtlindje, ndërsa mungojnë papërjashtim në faljen e namazit për Bajram.
Kisha e Shën Ndout në Ulpianë, çdo 24 dhjetor, rendet e para të ulëseve i rezervon për udhëheqës institucionesh, kryetarë partish, deputetë e VIP-a të tjerë të shoqërisë kosovare.
Asnjë prej udhëheqësve kryesorë politik të Kosovës nuk është parë të ketë falur namazin e Bajramit të martën në mëngjes, ndonëse, shumica prej tyre i përkasin besimit islam dhe në një mënyrë apo tjetrën, e praktikojnë atë në shtëpitë e tyre.
Naim Tërnava thotë se Bashkësia Islame e Kosovës pret që liderët politikë, ata që i takojnë besimit islam, të jenë edhe nëpër xhami.
“Besoj se në të ardhmen e afërt ata do t’i përgjigjen edhe kësaj detyre dhe do të jemi së bashku edhe nëpër manifestime fetar”, thotë Tërnava.
Gjergj Dedaj, kryetar i Partisë Liberale të Kosovës, e praktikon fenë së cilës i përket. Natën e Krishlindjeve ai shkon në Kishë. Ai thotë se nuk mohon në asnjë mënyrë identitetin e tij fetar dhe këtë ua sugjeron edhe kolegëve të tij nga politika.
“Nuk ka asgjë të keqe nëse ata shkojnë ta falin namazin në xhami. Është hipokrizi që ata nuk shkojnë. Por, është hipokrizi edhe më e madhe nëse për Krishlindje shkojnë në Kishë, e për Bajram nuk shkojnë në Xhami”, thotë Dedaj.
Një tjetër politikan, Fuad Ramiqi, i Partisë së Drejtësisë, thotë se problemi me politikanët kosovarë që nuk vizitojnë xhamitë dhe nuk shprehin religjiozitetin e tyre vjen nga ndikimi i gjatë 50 vjeçar i komunizmit te shqiptarët.
Ai mendon se Presidenti i Kosovës është dashur të urojë Ramazanin, nëse nuk i shkohet në xhami për Bajram.
“Kryetari përfaqëson unitetin e popullit. Me mosurimin e Ramazanit ai, nëse nuk e ka fyer, së paku, e ka injoruar pjesën e popullit që i takon besimit islam”, thotë Ramiqi, sekretar i PD-së.
Kjo dukuri e të vizituarit të një objekti fetar (të krishter) dhe jo të një tjetri (mysliman) nga shumë njerëz është komentuar si tendencë e politikanëve shqiptarë për ta paraqitur veten si të emancipuar dhe popullin shqiptar si europian.
Fuad Ramiqi, që i takon besimit të fesë islame, dhe Gjergj Dedaj, që i takon besimit të fesë katolike, konsiderojnë se nuk është në rregull që liderët politikë të paraqiten çfarë nuk janë. Ata thonë se bota di mirë për përkatësinë fetare të popullit të Kosovës dhe kjo nuk ka nevojë të fshehet.
Dekani i i Fakultetit të Studimeve Islame, Qemail Morina, konsideron se udhëheqësit e vendit sillen kështu, sepse dëshirojnë të fitojnë poena politikë. Por, nga kush? Nëse shumica e votuesve janë myslimanë, atëherë si mund të fitohen votat nëse nuk respektohen ndjenjat e tyre fetare? Morina jep një përgjigjje për këtë.
“Aq sa do të jenë afër liderët tanë ndaj popullatës së tyre – aq do të jetë edhe autoriteti e renomea e tyre në mesin e besimtarëve”.



“Ani që e mban Papën, por pse nuk e mban edhe naj hoxhë”

Mosprezenca e politikanëve në xhami, por jo edhe në kishë, në njëfarë mënyre i bën ata të njëanshëm, gjë që nuk u lejohet politikanëve në demokracitë e avansuara. Aq më shumë kur, një përfaqësues institucioni shpreh hapur këtë, siç bën Presidenti, duke mbajtur fotografinë e Papës në hapësirat e asaj që e quan Presidencë, gjest ky që nuk i pëlqen fort shumicës së besimtarëve myslimanë.
“Ani që e mban Papën, por pse nuk e mban edhe naj hoxhë”, vëren Zeqir Rrahmani, cili thotë se prej që e mban mend veten - ka agjëruar Ramazanin dhe ka falë namazin e Bajramit.
Në fillimin e viteve ’90-ta, Ibrahim Rugova kishte filluar ta ekspozojë foton e tij me Papa Gjon Palin II në zyrën e partisë së tij, Lidhjes Demokratike të Kosovës, e cila ishte vendosur në lokalet e Shoqatës së Shkrimtarëve të Kosovës. Qysh atëherë ai kishte marrë kritikat e para.
Në shtetet moderne ka kohë që feja është ndarë nga politika. Në Europë sekularizmi është bërë shumë herët dhe ka nisur si kërkesë që nga Humanizmi dhe Renesansa. Në botën perëndimore kjo ndarje është bërë për shkak të nevojës së krijimit të një shteti neutral. Njëra fe e pranishme në institucionet publike – mohon të drejtën e feve tjera. Kjo, rëndomë, ka shkaktuar luftëra fetare. Shteti modern është themeluar si shtet neutral ndaj feve. Hapësira shtetërore i është lënë njerëzve që meren me politikë. Fesë i është lënë një hapësirë tjetër për aktivitetin e saj brenda shoqërisë civile dhe sferës private.
Muhamedin Kullashi, profesor i filizofisë në Universitetin Parisi VIII, për “Javën” thotë se parimisht kërkohet që në institucionet publike shtetërore të mos jenë të pranishme fare simbolet dhe figurat fetare.
“Prania e tyre është më tepër përjashtim sesa rregull. Rregull është që në institucionet publike mos të ketë shenja fetare. Ata që punojnë në institucione publike nuk duhet të afishojnë përkatësinë fetare. Kjo duhet të mbetet për një hapësirë tjetër, pikërisht që të garantohet neutraliteti i institucioneve ndaj feve. Kjo ndarje bëhet edhe me ligj”, thotë ai.
Akademik Rexhep Qosja pohon se është e drejtë e çdo qytetari që në shtëpinë e tij private të shquajë fotografi të kujt dëshiron ai, prandaj edhe të prijësve fetarë, të Papës, të shenjtorëve e të tjerëve, por kur këtë e bën në institucionet partiake, politike e shtetërore, atëherë e drejta e tij themelore kthehet në propagandë fetare, që në vendet demokratike nuk është e lejueshme.
“Për shkak se feja është e ndarë prej politikës dhe shetit, në vendet demokratike perëndimore as partitë demokristiane nuk i shquajnë në zyrat e tyre partiake e shtetërore fotografitë e prijësve fetarë, prandaj as të Papës a të shenjtorëve të ndryshëm. Jofetarësia e politikës dhe e shtetit është obligim kushtetar”.
Pse kryetari i LDK-së dhe i Kosovës Ibrahim Rugova mban fotografinë e Papës dhe simbolet fetare në presidencën e Kosovës nuk është shumë e çuditshme për Qosjen.
“E çuditshme është pse ende as përfaqësues të partive, as përfaqësues të institucioneve qeverisëse vendore nuk ia tërheqin vërejtjen se ashtu cënon një të arritur tepër të rëndësishme të qytetërimit e të demokracisë: jofetarësinë e politikës e të shtetit, se ashtu, më ne fund, mund të provokojë bashkëkombësit e besimit mysliman”, thotë akademik Rexhep Qosja.
Përgjigja e dr. Rugovës, për të gjithë kritikuesit, në vitet ’90, kishte qenë se foton e Papës e mban njësoj siç i mban fotografitë tjera të shkrimtarëve shqiptarë Fan Nolit dhe Naim Frashërit.
Dallimi i vetëm ishte se Papa ekspozohej para mediave, ndërsa dy foto tjera ishin të vendosura në vende më pak të dukshme.
Fuad Ramiqi nga Partia e Drejtësisë pohon se gabimi më i madh është kur një personalitet, politikën shtetërore e bën sipas preferencave personale, mendimet personale i shpreh si politika kombëtare, duke pretenduar se kjo na sjell dobi te ndërkombëtarët
“Unë jam besimtar dhe çdo ditë kthehem nga Kibla, bëj namaz. Por, edhe kthehem nga perëndimi, sepse komunikoj me teknologji moderne. Duhet t’i marrim të mirat Perëndimi, por nuk duhet t’i përjashtojmë as ato të Lindjes. Presidenti zgjedhet me votën e lirë të popullit, varet prej popullit që të deklarohet nëse ai do të jetë përsëri president i atij vendi”, thotë ai.
Isa Blumi në punimin e tij “Islami politik te shqiptarët”, duke cituar librin “Religion and the Politics of Identity in Kosovo” të autorit danez Ger Duijzings, thotë se shqiptarët tradicionalisht kanë praktikuar islamin në një mënyrë të veçantë në gjithë rajonin, që ka përfshirë sintezën e një numri të formave lokale të traditave shpirtërore, të cilat përfundimisht kanë evoluar në rituale më të përbëra gjatë të cilave muslimanët dhe të krishterët lokalë shpesh kanë ndarë të njejtin objekt shpirtëror.
Zeqir Rrahmani është qytetari i parë i cili i ka bërë një ftesë të jashtëzakonshme presidentit të Kosovës, Ibrahim Rugova duke e ftuar atë që të kthejë kokën edhe kah të mirat e Lindjes.
“Nuk u kanë keq që Presidenti jonë me u kthye najhere kah Kibla”!
“Kible”, siç shpjegon Kur’ani, i thuhet anës kah e cila orientohet dikush, e këtu është fjala për orientimin e atij që falet, ndërsa të gjithë myslimanët kanë një kible dhe të gjithë, kudo që të gjenden, gjatë lutjeve i kthehen asaj.
Kur’ani thotë se Zoti i dha për detyrë Pejgamberit Ibrahim që të ndërtojë Qaben, vend në të cilin drejtim duhet të kthehen të gjithë besimtarët e drejtë.
Ibrahimi ishte Pejgamber i dalluar, i cili sinqerisht iu dorëzua Zotit. Ai i porositi pasardhësit e vet t’i përmbahen vetëm fesë, të cilën zgjodhi Zoti, fesë islame. Ashtu bënë edhe pasardhësit e tij.
Presidenti i Kosovës e mban të njëjtin emër të Pejgamberit që ndërtoi Qaben, ndërsa nga shiptarët e Kosovës po ashtu është quajtur Pejgamber për shkak të identifikimit të tij me pavarësinë e Kosovës, dëshirës më të madhe të kosovarëve.
Besimtarët e fesë islame në Kosovës, së fundi, kanë kërkuar nga Pejgamberi i tyre në Tokë, që të tregojë më shumë respekt për fenë e tyre.
Kryetari i Bashkësisë Islame të Kosovës, Naim Tërnava, thotë se Presidenti i Kosovës duhet të tregojë më shumë kujdes në këtë drejtim.
“Nëse themi injorim është fjalë e madhe. Mohim është gati si injorim. Por, sigurisht se Presidenti Rugova duhet të ketë një përkujdesje më të madhe”.

[Fringo]

Nese Rrugova nuk ua ka uruar besimtareve Ramazanin, ka bere shume gabim.
Mos te harroje, se jane ata qe ja japin voten e jo UNMIKu.
Po ama, nje fragment me beri pershtypje.
Me hoqi mallin e diktatures dhe kultit te individit.

Zeqir Rrahmani, 70 vjeç, i ardhur në Prishtinë, pas luftës, nga një fshat i Llapit, kësaj radhe nuk i ka shijuar si të ëmbla hurmat dhe bakllavën, për shkak se presidenti nuk ua kishte uruar besimtarëve myslimanë Ramazanin.
“Valla bre mixhë, jam prekë fort pse Rugova nuk na e uroi Ramazanin. Diqysh si me na lanë mas shpine. Ban vaki që po lypim shumë, ai i din punët ma mirë se na. Nashta, bre mixhë, qashtu duhet me ja ba, sebep këtynë të hujve, veç apet s’po më doket sjellje me mendë, nuk po na respekton sa duhet”, thotë ai, pasi ka mbaruar faljen e namazit në oborrin e Xhamisë së Madhe në Prishtinë, ditën e Fitër Bajramit.

Zeqir, Rrugova nuk eshte Perendia, ai nuk eshte i pagabueshem.
Une do te te keshilloja te mos ulje koken, se e dinka Rrugova ma mire, por ti nisesh nje leter, ti besh nje telefon, po ashhtu dhe gjithe besimtaret muslimane madje dhe ata te krishtere, e ti thone mendimin e tyre, se ai eshte sherbetori i popullit, e jo anasjelltas.

[iliria e para]

Per mendimin tim as Rugova e as Nano, Berisha e asnjre politikan nuk duhet te perzihet ne ceshtjet fetare. Feja le te mbetet private per secilin person, kush te done beson ne cka te done.
C lidhje ka ns Nao apo Berisha i urojne popullit haptas Bajramin apo Krishtlindjen nese ata e kan cuar popullin ne gremine?

Politikanet te merren me politike, prifterinjet e hoxhallaret me fene. Keshtu kurr nuk do te kete probleme.

[INDRITI]

Si e mencur qe je beji keshillat por kujdes kur te akuzosh dike e sidomos kur nuk ke fakte fare.

[vetem_TI]

Postuar më parë nga iliria e para
Per mendimin tim as Rugova e as Nano, Berisha e asnjre politikan nuk duhet te perzihet ne ceshtjet fetare. Feja le te mbetet private per secilin person, kush te done beson ne cka te done.
C lidhje ka ns Nao apo Berisha i urojne popullit haptas Bajramin apo Krishtlindjen nese ata e kan cuar popullin ne gremine?

Politikanet te merren me politike, prifterinjet e hoxhallaret me fene. Keshtu kurr nuk do te kete probleme.

ilaria ndaj disa koncepte me te vertete feja eshte dicka personale,por dime qe edhe dicka personale e nje lideri ndikon ne menyre aktive tek populli pasi personale eshte edhe vesi i vjedhjes i kondrabandes e i shume gjerave te tjera por ne fund te fundit ndikon tek nje popull,pastaj cdo te htoje ti nese nano te nderronte flamurin do te nxeheshe besoj se po se edhe ti si shqiptare mire qe je e do pak atdheun spo jo?atehere ndryshimi i fese tek shume shqiptare eshte me i rende se ndryshimi i flamurit sipas teje ne nuk kemi te drejte te nxehemi e te protestojme per dicka qe e quajme te drejte,ja qe paskemi,po ta marrim nga nje kendveshtrim tjeter me patriotik do te shohim qe per kosoven kane rene shume heroj nderta edhe me i madhi adem jashari qe per shkak kane pasur edhe fene atehere mund te tallet rrugova me gjakun e tyre ku e gjeti te drejten,ah po nese rrugova nuk do te perfaqesonte nje popull mund te bente cte donte me veten e tij por arsyeja qe perfaqeson nje popull e kushtezoj te mos cenoj interesat e tij dhe sidomos interesin e tij me sublim sic eshte feja apo atedheu.

[fundamentalisti]

une ju kisha lute rugoves bile nese nuk na urone te mos te na shane se ne jemei ata qe ua japime voten e nese ai nuk na respektone ne do te jemi ata qe do tja thejme qafen se kush nuk ka fe ai nuk ka as atdhe.
po nuk quditem aspak nga kjo se ai me nje kohe ka thene se trimate luftetare jane terorista po nejse mos te politizoje kete teme veq kisha me thone diqka presidente mos u kthe kah kiblja se kiblja eshte per njereze te ndersheme.....ju dua....tung

[Lefter]

Po ne spo e presim te na perzihet RUGOVA ne punet e fese sepse ate pune te bejne ata qe e kane profesion(prifterinjet dhe hoxhallart) e jo rugova te vendos nese ai nuk ka ndermend te miret me ata pune te del dhe te na skjaroj ce ka nevoj te udhetoj per ne vatikan jave per jave,por le te kqyr punet qe i ka i lutem te mos perzihet ne punet e fese se krejt e dime mo se kush eshte ai edhe ska nevoj te na uroj as bajrama as ramazan veq te festoj festa te krishtereve.Une nuk jam kunder krishterizmit,por kerkoj te na raspektoj ,sepse na e kena pru ate ne poziten ne te cilen eshte sot,pra RESPEKT ME SHUME per popullin te cilin e njeh krejt BOTA se jena 95% musliman VETEM RESPEKT I KERKOJM pasi qe eshte zgjedhur nga ky popull ju pershendes...

[Shpresmiri]

Sa per dijeni: Vatikani eshte shtet!

Gjithe te mirat!

[Lefter]

Postuar më parë nga Shpresmiri
Sa per dijeni: Vatikani eshte shtet!

Gjithe te mirat!

edhe na e dime qe vatikani eshte shtet dhe asgje kunder nuk kam,por pres respekt nuk ka nevoj as ajo per mu as une per ate ,por respekti eshte anasjelltas nese ti sme respekton mua atehere si mund te presesh respekt nga une(kete jam ka e flas per RUGOVEN)

[dodoni]

Kjo është një nga veprat më të mira të Rugovës në politikë.
Largimi nga islamizmi i shqiptarëve është një nga çështjet më të rëndësishme kombëtare tonat, dhe tani jo vetëm populli i thjeshtë por edhe lider kryesor që kanë një histori sado të vogël të islamizuar dhunshëm janë duke u rikthyer në rrënjë.
Tani edhe në Kosovë, nuk janë shumicë muslimanët duke pasur parasysh konvertimet e këtyre 20 viteve të fundit.
Do të ishte mirë të bëhej një statistikë.
Shumë mirë që shqiptarët janë ka vetdijësohen dhe më askush nuk mund ti fus jo kombin por as edhe asnjë shqiptar (shumë shpejt) me pis mileta si arabët e turqit.

Forca Rugova për punën e fesë.