Shqipëria - Kazakistani (2:1)

[Davius]

Brigel: Bëmë detyrën, morëm tripikëshin

Pavarësisht fitores, loja e kombëtares sonë ndaj Kazakistanit është kritikuar në disa aspekte. Por ai që nuk pranon kritika është trajneri Hans Peter Brigel, i cili deklaron: "Çfarë kërkonit më shumë, të merrnim pesë pikë? Ne e bëmë detyrën tonë, morëm fitoren, për atë çka kishim hyrë në fushë sonte. Ndaj kundërshtarëve të dobët loja nuk del ashtu siç e mendon, ndoshta kjo ishte arsyeja që nuk fituam bindshëm.

Po të shikoni, edhe rivalët e tjerë, si Ukraina, e kanë pasur shumë vështirë për t'i marrë pikët e plota Kazakistanit. Ukraina fitoi në minutën e 94-t, pasi loja ishte 1-1. E dinim që ndeshja nuk ishte shumë e vështirë, prandaj u thashë djemve që të kenë durim për të arritur te goli, pasi duke e kërkuar atë me ngulm, mund të rrezikonim." Ndërsa në lidhje me lojën e kundërshtarit, trajneri gjerman thekson:

"Kazakistani bëri një lojë difensive, duke larguar çdo top që hynte në zonën e tyre. Në dublim ishin mjaft mirë, pasi shpesh bëheshin tre lojtarë kundër Bogdanit apo Myrtajt. E dija pak a shumë që në pjesën e dytë ata do të binin, pasi kam parë kasetat e ndeshjeve të tyre. Fizikisht ata ishin më dobët se sa ne dhe kjo u vu re edhe nga agresiviteti i tyre. Lëshuan shumë terren në pjesën e dytë dhe ne përfituam nga kjo, duke shënuar dy gola të shpejtë." Por Brigeli nuk harron të qortojë edhe kuqezinjtë për golin e pësuar. "Në momentin e pësimit të golit skuadra jonë ishte në gjumë.

Gabimi erdhi që nga mesfusha, pastaj kaloi te mbrojtja dhe në fund te portieri. Por edhe pas golit ne rrezikuam, por në fund të fundit fituam. Shkatërruese do të ishte po të kishte përfunduar në barazim loja. Ishte tepër normale që ne të luanim të qetë në minutat e fundit dhe tepër e rëndësishme që të merrnim tripikëshin. Atë e morëm, duke bërë detyrën tonë," - shton numri një i pankinës shqiptare.

Ndërsa për dy ndeshjet e mbetura, Brigeli përfundon: "Ukraina tashmë është e kualifikuar në botëror, kështu që nuk do të japë maksimumin, ndërsa ne do të mundohemi të marrim një pikë. Për sa i përket Turqisë, do të bëjmë të pamundurën për të marrë fitoren, duke u bërë një mbyllje sa më të mirë këtyre eliminatoreve. Shpresojmë të kapim sa më shumë pikë."

[Davius]

Kombëtarja, fitore "me litar në grykë"

Strakosha: Kjo ndeshje, thikë me dy presa

Nuk mund të mungonte Foto Strakosha në ndeshjen e mbrëmshme. Madje i është bashkuar ekipit kombëtar që në stërvitje në Durrës. Por mbrëme e ka përjetuar 90-minutëshin me Kazakistanin nga tribuna VIP e "Qemal Stafës", përkrah Igli Tares, i cili ishte e pamundur të luante për shkak të dëmtimit. I pyetur pas ndeshjes së mbrëmshme, ish-kapiteni dhe portieri kuqezi, Foto Strakosha, tha: "Në ndeshje të tilla, ku përballë ke kundërshtar të dobët, siç konsiderohet në grupin tonë Kazakistani, futbollistët janë tepër të ngarkuar psikologjikisht. Pse e them këtë? Sepse fitorja nga të gjithë konsiderohet si diçka e kryer, ose si një detyrë e thjeshtë, ndërsa po të ndodhë e kundërta, pra të humbësh, konsiderohet katastrofë. Pra, gjendesh mes dy zjarreve, kështu që je i detyruar të luash i ngarkuar psikologjikisht. Kjo ndodhi edhe sonte me ekipin tonë kombëtar.

Gjithsesi, rëndësi ka që fituam, sepse fitorja mbahet mend dhe jo loja e bukur. Pavarësisht kësaj, ekipi kombëtar m'u duk disi i lodhur, mbase këtu ndikoi edhe ndonjë shenjë nënvlerësimi për kundërshtarin. Kur e panë se minutat kalonin, iku pjesa e parë në barazim, lojtarët e rritën presionin në gardhin e mbrojtjes kazakistanase, derisa shënuan gol. Goli sikur na çliroi pak, dhe shumë shpejt shënuam edhe të dytin, i cili i kaloi pak në eufori lojtart tanë. Për pasojë pësuam një gol dher mund të ishim ndëshkuar edhe me të dytin. Falë Zotit fituam dhe kjo ka më shumë rëndësi."


Haxhi: Nuk shoh zëvendësues për ne

Ka qenë fatkeq Altin Haxhi në ndeshjen e mbrëmshme, sepse ka pësuar një dëmtim të rëndë. Ai ka pësuar një hematomë në gjurin e këmbës së majtë, që sipas mjekut të ekipit kombëtar, Akim Bulinger, është këputje e muskulit. Sidoqoftë, mes dhimbjeve të këmbës, Haxhi ka thënë dy fjalë për ndeshjen me Kazakistanin: "Fituam një ndeshje që duhej fituar me çdo kusht. Përndryshe, do të ishte katastrofale për ne të linim pikë në fushën tonë, ndaj Kazakistanit të vendit të fundit, pa asnjë pikë. Pra, fitorja u vë kapak të gjithave, edhe lojës jo të mirë në momente të veçanta. Kjo përsa i takon ndeshjes me Kazakistanin. Por, ajo që më shqetëson mua është fakti se nuk po shoh lojtarë të aftë për të na zëvendësuar ne të vjetërve. Ky është një problem i madh, nëse flasim për perspektivën e ekipit kombëtar."


Bogdani: Goli, meritë e gjithë ekipit

Ka qenë pa dyshim lojtari më i mirë në fushë në ndeshjen e mbrëmshme. Ka luftuar fort në sulm, madje është tërhequr hera-herës edhe në mbrojtje, duke qenë pikë referimi për lojën e kuqezinjve. Ka qenë rreziku permanent i mbrojtjes kazakistanase, të cilës ka dalë t'ia "lagë" dy herë, në rastin e golit të parë, të firmosur nga Myrtaj dhe në golin e dytë, që ka qenë i gjithi i tij. Sidoqoftë, shtatlarti i kombëtares sonë dhe i Sienës në Itali, Erion Bogdani, e konsideron meritë të të gjithë ekipit golin e tij: "Vërtet shënova unë, por golin e konsideroj meritë të gjithë ekipit.

Në ndeshje të këtij lloji, edhe skuadra me emër kanë probleme, madje ndonjëherë mezi fitojnë. Kjo na ndodhi edhe ne me Kazakistanin, i cili zhvilloi një lojë mbrojtëse dhe me ndërhyrje të ashpra. Gjithsesi na gëzon fitorja, sepse ajo ka më shumë rëndësi. Tani na kanë mbetur për t'u luajtur edhe dy ndeshje, në të cilat duhet të tregojmë veten tonë. Kam përshtypjen se ekipi ynë do të përcaktojë fatin e skuadrës së dytë në grup, që do të synojë më tej finalet e Botërorit të Gjermanisë përmes play-off-it. Pra, Shqipëria do të jetë faktor vendimtar deri në fund, në grupin e dytë kualifikues."


Myrtaj: I kënaqur për golin e parë kuqezi
Një nga futbollistët më të kënaqur pas ndeshjes së djeshme ka qenë pa dyshim Florian Myrtaj. Sulmuesi i kombëtares shqiptare, pas gati 3 vjetësh në ekipin kuqezi, ka shënuar golin e parë. Vetë Myrtaj pas ndeshjes është shprehur i kënaqur. "Të them të vërtetën, jam shumë i kënaqur që shënova golin tim të parë me fanellën e ekipit kombëtar. Për mua ishte një gëzim më vete që arrita të shënoja para publikut shqiptar në një ndeshje që u fitua nga ekipi unë kombëtar. Për sa i përket bashkëpunimit me Bogdanin, them se shkoi mirë. Ne jemi lojtarë profesionistë dhe duhet të përshtatemi me të gjitha vendimet e trajnerit. Shpresoj që pas kësaj fitoreje të marrim edhe ndonjë pikë tjetër,"? është shprehur dje Myrtaj.

Igli Tare: Kemi arritur rekord pikësh
"Mendoj se ishte një fitore e merituar nga skuadra jonë, ndonëse nuk kemi dhënë maksimumin në fushën e lojës. Them se luajtëm mirë dhe të dy golat tanë ishin shumë të bukur. Kazakistani shënoi një gol të rastësishëm. Gjithsesi, tani duhet të mendojmë për dy ndeshjet e ardhshme. Kemi arritur një rekord pikësh dhe shpresojmë që të bëjmë më shumë në të ardhmen."

Jupi: Nuk luajtëm mirë në këtë ndeshje
"Nuk kemi luajtur shumë mirë në këtë takim. Sidomos në pjesën e parë loja nuk ishte e mirë. Në pjesën e dytë arritëm të kthenim lojën dhe të shënonim dy golat. U munduam që të mos e nënvleftësonim kundërshtarin pasi niseshim si favoritë. Jam i mendimit se tri pikët ishin të merituara. Trajneri provoi edhe Agollin, që për mua luajti shumë mirë. Mendoj se nuk do të ndalemi me kaq, por do të shohim edhe në ndeshjet e ardhshme, duke u bazuar tek rezultatet e arritura sot. Shpresoj që në Ukrainë të zhvillojmë një lojë të mirë dhe të marrim maksimumin në fushën e lojës."

Ilion Lika: Ishim favoritë, fituam
"Një ndeshje e mirë për ne. U munduam që të fitonim, pasi ndeshjen e nisnim si favoritë. Jam i mendimit se zhvilluam një ndeshje të mirë, duke mundur një kundërshtar që nuk ishte favorit në këtë takim. Luajtëm në përgjithësi mirë dhe fituam. Shpresoj që të bëjmë lojë të mirë dhe në dy takimet e tjera që janë në tetor. 12 pikë? Mendoj se kemi arritur një kuotë shumë të lartë, por ndoshta do të ishte më mirë sikur të merrnim edhe disa pikë të tjera."

Murati: Fituam një ndeshje që duhej fituar
"Fituam një ndeshje që normalisht duhet ta kishim fituar. Luajtëm në përgjithësi mirë. Ndoshta shtatori është me fat për ne. Shpresoj që edhe në tetor të arrijmë të marrim pikë. Jemi të kënaqur dhe ndoshta në eliminatoret e ardhshme do të marrim akoma më shumë pikë

[mad]

per ate qe ka interes te shikoje golat e fitores te se shtunes:

Myrtaj - goli 1
Bogdani - goli2

pasi te hapet faqja, mund te zgjidhni edhe permasat e videos.

{^_^}

[StormAngel]

Urime per fitoren