E Paske NjË Mall

[SkenderRusi]

NË SE VDES…

Në se vdes një ditë te kjo rrugë,
E di:
Do kem mbetur te bari,midis gurëve!

Në se vdes pranë kësaj molle,
E di:
Do jem i mbuluar me lule!

Në se vdes te ky lumë,
E di:
Trupi im do mbetet në një dallgë!

Në se vdes pranë teje,
E dashur:
M’i lerë sytë hapur!


RASTËSI TRAGJIKE

Në fytyrën e një foshnje
të shëmtuar,
Ndodhet statuja e gjallë
e dy njerëzve!
Ata nuk mund ta dinin
që mëkatuan,
Që do sillnin një bukuri
të dënuar me vdekje!

Mbi supet prej dridhje
të një gruaje,
U ulën dhjetë pëllumba
të dhunshëm.
Oh,ata harruan përplasjen
e krahëve,
Dhe mizoritë e tmerrshme
të luftës!

Qielli i tyre ish ai,
brenda perdeve,
Të një dhome,me një shtrat
të frikshëm!
Aty u harrua se kishte
të nesërme,
Dhe koha u kthye në klithmë!


Në fytyrën e një foshnje
të shëmtuar,
Ndodhet marrëzia
e dy njerëzve!
Asnjë prej tyre nuk ish
i dashuruar,
Ndaj bukuria u dënua
me vdekje!


VEÇSE NJË IMAZH

Sytë e mi janë dy zero të mëdha,
Piktorja e të cilave ,mund të jesh ti!
Ngjyra e tyre është veçse një imazh,
I një shpirti që pozon lakuriq!


Nata brenda tyre nuk ka për të ikur,
Dhe unë jam mësuar me këtë!
O,ti mund të jesh një kolombe e lindur,
Por janë dy ishuj ku s’do të gjesh asgjë!


Sytë e mi janë dy zero të mëdha,
(Piktorja humbi rrugën brenda tyre!)
Eh,unë do ta quaj 1000 herë me faj,
Atë që beson në ngjyrën e syve!


VDEKJA E TIGRIT

Ke qënë më tepër se një mister!
Me ata sy jeshilë tigri!
Një dreq e merr vesh se përse
Ti kishe diçka prej sfinksi!



Vetëm kur qeshje,
Ai vdiste,
Shfaqej shpirti!


E PASKE NJË MALL



E paske një mall kur zë e thinjesh,
Për vitet që s’kanë më kthim!
Por ne nuk njohim shirat e ikjes,
As qielli yt,as qielli im!


Unë sot i mbusha njëqind vjeç!
Njëqind i mbushe edhe ti!
Sikur të rronim veç e veç,
S’do ishim kaq,jo,kursesi!


I mbledhka vitet dashuria,
Megjithëse zemra,moshë s’ka!
Ndaj jemi sot për njeri-tjetrin,
Si dy mesdita të mëdha!



UNAZA


E solli koha që edhe ty,
Ta futën gishtin në unazë!
Edhe në qoftë krejt flori,
Ajo për ty është një prangë!



Atë tani e ke në gisht,
Ndaj shkrije po qe e mundur,
Se nesër do ta kesh në shpirt
Moj badallaçkë e bukur!

[macia_blu]

Nuk kam e nuk di c'te them tjeter, vecse Urime.
Dhe te te lutem qe te vish disi me shpesh!
macia_blu

[dikeafajtore]

Unë sot i mbusha njëqind vjeç!
Njëqind i mbushe edhe ti!
Sikur të rronim veç e veç,
S’do ishim kaq,jo,kursesi!

I mbledhka vitet dashuria,
Megjithëse zemra,moshë s’ka!
Ndaj jemi sot për njeri-tjetrin,
Si dy mesdita të mëdha!

..te mrekullueshme te gjitha!!!!