Zhduket në sheshin e trageteve gruaja e pronarit të "Bruno"

[zeus]

----------------------------------------------

Ka zbritur si gjithë pasagjerët e tjerë në sheshin e trageteve, por pak minuta më pas nuk është gjetur nga i shoqi, që ishte vonuar duke u marrë me dokumentat e një makine. Kjo është historia më e re e zhdukjeve në Shqipëri, që këtë radhë ka goditur familjen e një tregtari të njohur, Agim Musho, pronari i ish-kompleksit "Bruno", të shitjes së elektroshtëpiakeve. Sipas burimeve të policisë së Tiranës, ku është bërë edhe denoncimi i Mushos, për këtë çështje po punohet prej disa ditësh, porse ende nuk ka ndonjë provë, që jep mundësinë për të patur një variant të besueshëm për të fokusuar hetimet.

----------------------------------------------

[Brari]

denoncimi behet ne policin e trageteve e jo ne Tirane..
Pra ktu ka nji hile..
Ky Gim Bosi sic duket i eshte merzitur ajo shalthata qe ka pasur e ndonji qengjushe e njome ja ka prish mendjen dhe kur trageti do ket qene ne rrug naten ja ka fut nji te shtyme dhe e ka hedh ne det te mjeren..

[Brari]

shekulli

--

Letër e hapur, drejtuar Prokurorit të Përgjithshëm, Theodhori Sollaku nga familjarët e gruas së zhdukur, Irena Selit

Letra, nëna e Irenës në psikiatri


Familjarët Seli

Zoti Sollaku! Kanë kaluar mëse 5 muaj dhe për ne, familjarët e Irenës, por edhe për opinionin publik, zhdukja e saj është kthyer në një mister të pashpjegueshëm. Megjithë kërkimet e bëra nga Prokuroria e Krimeve të Rënda, asnjë shenjë jete, aq shumë e shpresuar prej nesh, nuk është zbuluar. Mund të themi se kjo heshtje e frikshme për çështjen “Irena” po na lë të kuptojmë se nuk do ta marrim vesh kurrë fatin e vajzës sonë. Duke u nisur nga rrjedha e ngjarjeje, që nga dita e parë e zhdukjes së Irenës, ne dyshimin e parë e kemi hedhur tek bashkëshorti i saj, Agim Musha, e ky dyshim sa vjen e shtohet, pasi ai gënjen gjithë kohën, kur thotë se ka zbritur nga trageti e është larguar në drejtim të paditur. Irena nuk ka zbritur nga trageti. Kush i ka vërtetuar fjalët e të shoqit? Ai thotë se kanë qenë të parët në listën e pasagjerëve, domethënë numri 1 dhe 2 dhe sipas tij, ata kanë vulosur të parët pasaportat. Por si është e mundur që në atë turmë të madhe prej 100 personash, nuk ka dalë asnjë njeri të thotë se e kanë parë Irenën në fillim të radhës. Do të ishte e lehtë të mbahej mend figura e saj, pasi një grua e bukur si Irena s’do të ishte e vështirë të vihej re. Duke u nisur nga argumentet e paqarta që jep i shoqi dhe kontradiktat në thëniet e tij, për ne qëndron gjithnjë dyshimi se ai e ka hedhur në det. Me mbërritjen e tij në Gjermani, pas marrjes së pasaportës në mënyrë të pashpjegueshme, duke na habitur ne si familjarë të Irenës dhe mbarë opinionin publik që kanë ndjekur fatin e saj, Agim Musha merr natën në telefon nënën e Irenës, zonjën Semiha Dervishi dhe i thotë “Irenën e ke në fund të detit dhe s’ka bir nëne që e gjen më” dhe e kërcënon “ do ta këpus kokën edhe ty”. Zemra e nënës nuk e duron dot një vdekje makabër për fëmijën e saj. Pas 5 muajsh ankthi, një tjetër traumë kaloi ajo, kur në media u diskutua se koka e gjetur në Sukth dyshohej se ishte e Irenës. Si pasojë e gjithë këtyre vuajtjeve dhe pas telefonatës kërcënuese të Agimit, ajo kalon në depresion të rëndë si dhe një goditje në zemër, duke u shtruar në spital. Zoti kryeprokuror, nga depresioni nëna e Irenës tenton të hidhet nga ballkoni i spitalit, në orën katër të mëngjesit. Fatmirësisht është shpëtuar nga personeli i spitalit, por e kanë transferuar menjëherë drejt një spitali psikiatrik, ku po mjekohet me një përkujdesje të madhe nga mjekët atje. Kanë qenë mjekët gjermanë që lajmëruan policinë, se tentativa e vetëvrasjes erdhi si pasojë e një telefonate kërcënuese. Ku e gjen të drejtën ky njeri i paskrupullt që po sfidon drejtësinë shqiptare, duke e çuar atë drejt dështimit të hetimit të krijojë tragjedi të tjera në familjen e Irenës?
Ne po na forcohet dyshimi se ajo nuk jeton më, pasi mendojmë se Agimi ka gënjyer se Irena ka zbritur nga trageti, ashtu si paturpësisht gënjeu duke e prezantuar në media si ish-gruan e futbollistit gjerman, Shuster, mikeshën e tij të vjetër, Zylfien. Kjo gjë mund të verifikohet fare lehtë nëpërmjet internetit. Kështu, ai ka zbuluar padashur karakterin e tij si njeri imoral, duke gënjyer se i nevojitej pasaporta për të shkuar në Gjermani për të sistemuar fëmijët. Por ndodhi krejt e kundërta, se me të mbërritur atje, Agimi braktisi fëmijët duke vrapuar tek e dashura. Shikoni me sa bindje gënjen publikisht se Zylfia është gjermane, se zilet nga Shtetet e Bashkuara të Amerikës i ka bërë ish-ministri i Rendit, Ilir Gjoni, e se me gjuhën e rrugaçit ka hedhur baltë mbi Irenën, duke u munduar të krijojë një kornizë të zezë mbi figurën e saj morale, gjë që s’pati efekt të gjatë në opinion. Kjo pasi Agimi e kompletoi shumë shpejt figurën e tij si imoral, mashtrues dhe manipulues i pakrahasueshëm, që arriti deri aty sa të vërë para një udhëkryqi dhe çorientuar hetues profesionistë, duke lënë gojëhapur dhe të habitur opinionin që e kanë ndjekur çështjen “Irena” me keqardhje, për ata që e kanë njohur dhe si lajmin e ditës për shumë kohë, për ata që nuk e kanë njohur personalisht.
Zoti Sollaku, mos e harroni çështjen “Irena”. Ajo është vetëm 39 vjeç. Ju lutem mos ndaloni të na ndihmoni të mësojmë fatin e saj. Na ndihmoni të marrë fund tragjedia e familjes sonë. Po na pyesin njerëzit që na duan të mirën: Ç’po bëhet me gjetjen e Irenës? Si do t’u përgjigjemi zoti Sollaku?!


16 dhjetor

Irena Seli, bashkëshortja e pronarit të kompleksit “Bruno“ është zhdukur në portin e Durrësit, teksa po kthehej nga Gjermania. Nuk ka dokumentacion për zbritjen e saj nga trageti në Durrës

20 dhjetor

Bashkëshorti i saj, Agim Musho, ka shkuar në komisariatin numër 2 të policisë, ku ka denoncuar zhdukjen e së shoqes në portin e Durrësit. Ka treguar se ishte zënë me të në traget

23 dhjetor
Daja i Irenës,Shefqet Dervishi, ka denoncuar zhdukjen e së mbesës në policinë e portit të Durrësit. Ai ka deklaruar gjithë versionin që i kishte thënë i shoqi si dhe faktin që Irena nuk ishte bërë e gjallë

5 janar
Agim Musha, bashkëshorti i Irenës largohet nga Shqipëria. Ai ka ikur së bashku me të birin, Brunon, për t’u kthyer në Shqipëri në fillim të shkurtit. Ai dëshmoi në prokurori për “Irenën”.

ZHDUKJA

Irena, e zhdukur pa asnjë gjurmë

Irena Seli, gruaja që ende nuk i ka mbushur të 40-tat është zhdukur pa asnjë gjurmë më 16 dhjetor. Sipas bashkëshortit të saj, Agim Musha, e shoqja ka zbritur në portin e Durrësit, ku ka gjetur momentin dhe është larguar. Por familjarët e Irenës pohojnë se deri më tani nuk kanë takuar asnjë njeri, që ta ketë parë Irenën, duke zbritur nga trageti i linjës së Triestes. Ata frikësohen për fatin e saj, pasi që prej kësaj dite nuk është bërë më e gjallë. Kjo çështje është klasifikuar tashmë si rrëmbim personi, edhe pse ka pak prova. Prokuroria e Krimeve të Rënda ndodhet ende larg ngritjes së akuzës për ndonjë njeri. Sipas burimeve nga Prokuroria e Krimeve të Rënda, mbetet ende i paqartë momenti i zhdukjes së nënës së dy fëmijëve. Sipas burimeve nga policia e Durrësit, mësohet se as Irena dhe bashkëshorti i saj, Agimi, nuk i kanë vulosur pasaportat, në port. Tashmë, në dosje ndodhen vetëm dëshmi të personelit të tragetit, që pohojnë se e kanë parë gruan bjonde të zbresë nga trageti. Tre muaj pas zhdukjes së Irena Selit, është zhvilluar edhe ballafaqimi i parë mes të shoqit, Agim Mushës dhe vëllait të saj, Ylli Selit, të cilët kanë pretendime të ndryshme në lidhje me këtë çështje.




24/05/2005

[Brari]

panorama


----

zhdukja irenes
familja

Reagojnë familjarët: Dikush po mundohet që të deformojë hetimin e Prokurorisë për këtë çështje


“Na ka marrë malli për Irenën”

Trishtim në familjen Seli 6 muaj pas zhdukjes misterioze

Trashgim Sokolaj
Një fatkeqësi si zhdukja e Irena Selit, që sot mbush 6 muaj, nuk ka qenë vetëm e tillë për familjen e saj.

Pas gjashtë muajve të kaluar në bashkëjetesë me misterin, ankthin dhe frikën për njeriun e afërt, familjarët e të zhdukurës thonë se ndjenjave që po i mundojnë u është shtuar malli. Ata mblidhen datat 16 të çdo muaji dhe nuk dinë çfarë t’i thonë njëri-tjetrit, nuk dinë çfarë të besojnë. Kohët e fundit kur nëpërmjet shtypit mësuan se një telefonatë në Prokurori kishte njoftuar se Irena Seli, gruaja e zhdukur më 16 dhjetor 2004, kishte shkuar në Amerikë, në familjen e saj është rikthyer shpresa. Por pa kaluar shumë ditë, organi hetimor konfirmoi se informacioni i telefonuesit nuk ishte i vërtetë dhe se gjurmët e gruas së zhdukur ishin po aq të humbura sa më parë. Kur zhdukja e mbuluar me mister për mënyrën se si ndodhi dhe shkaqet a rrethanat e vërteta të saj, mbush sot gjashtë muaj, në familjen e 39-vjeçares shpresat janë tretur sërish. Pas telefonatës në Prokurori, të afërmit e Irenës janë bindur më shumë se dikush është përpjekur të pengojë hetimin e ngjarjes. Një letër në adresë të ministrit të Rendit, Igli Toska, dhe më pas një e tillë edhe në zyrën e Prokurorit të Përgjithshëm, nuk kanë pasur më shumë efekt sesa për të tërhequr vëmendjen te “çështja e pazbardhur” nga drejtësia. Gjithçka ka mbetur në këtë situatë. Dosja nuk ka asnjë autor të dyshuar, asnjë version mbi fatin e Irena Selit, dhe asnjë dyshim rreth shkaqeve a rrethanave të zhdukjes së mbuluar nga misteri.

Malli i familjes
Prej ditëve që pasuan ngjarjen misterioze të 14 dhjetorit 2004 në Durrës, nga organet hetimore dhe palët në ngjarje janë hetuar dy pista të kundërta. Asnjëra prej tyre nuk është vërtetuar, megjithatë misteri i ngjarjes nuk i ka rrëzuar përfundimisht ato. Hetuesit nuk kanë prova për të besuar në largimin e Irena Selit me dëshirën e saj, por as për të menduar rreth një vrasjeje të mundshme. Agim Musha, ish-pronari i kompleksit “Bruno” dhe bashkëshort i Irenës, ka deklaruar disa herë se gruaja e tij ishte larguar sipas një plani të saj të paramenduar. Ndërkaq familja e Irenës, ka hedhur vazhdimisht dyshime për vrasjen e 39-vjeçares a hedhjen e saj në det gjatë udhëtimit nga porti i Triestes për në Durrës. Ylli Seli, vëllai i Irenës, thotë për gazetën “Panorama” se ai dhe familja e tij ndiejnë mall për njeriun e tyre të zhdukur pa gjurmë prej gjashtë muajsh. Nga momenti kur kanë mësuar ngjarjen, të afërmit e Irenës nuk kanë ditur çfarë të besojnë, edhe pse kanë qenë të bindur se ajo nuk është larguar me dëshirën e saj. Për disa kohë, të afërmit kanë uruar që kjo të ketë ndodhur dhe 39-vjeçarja të ishte gjallë të paktën, por sërish shpresat kanë humbur. Irena nuk është bërë e gjallë edhe pse gjatë gjithë kohës llogaritë bankare të çiftit Musha janë mbikëqyrur nëse ajo do të tërhiqte para. Asnjë gjurmë e të zhdukurës nuk është zbuluar, edhe pse nëna e saj ndodhet nën mjekime intensive në Gjermani për shkak të ngjarjes. Zhurma mediatike rreth ngjarjes, edhe pse e pazakontë sërish nuk ka shërbyer për të vërtetuar se e zhdukura mund të jetë e gjallë, pasi është larguar sipas një plani të saj.



.

[Antimafia]

Reforma jo shaka.

Pas kesaj bandes se Lushnjes dhe bandes qe zhduku kryetarin e PD ne Has, do i dridhen leqet e kembeve.

Qe sot e tutje banda e Lushnjes nuk do bej me as nje krim ordiner, por do specializohet ne rrembim Demokratesh (P.sh. deputetet fitues ndaj Islamit, Rukes)

Kurse ata te Kukesit duhet te bejne ndonje krim ordiner tani, qe te largohet vemendja nga grabitja e kryedemokratit te Hasit.

[Brari]

Ylli Seli ka marrë dy telefonata anonime, që sinjalizonin vendndodhjen. Prokuroria: S’është gjetur asnjë trup

Telefonata anonime: Trupi i Irena Selit, në brigjet e Adriatikut


Ened Janina

TIRANË- “Trupi i Irena Selit është gjetur në brigjet e detit Adriatik”. Pista më e fundit e hetimit është shtyrë nga dy telefonata anonime, që janë bërë gjatë ditës së shtunë në shtëpinë e familjes Seli. Telefonata e parë është bërë nga një grua që është prezantuar sikur fliste nga Italia dhe se kishte marrë vesh se trupi i Irenës ishte gjetur në brigjet e Adriatikut. Telefonata e dytë është bërë pasdite dhe telefonuesi, një djalë ende i mitur, është prezantuar se banonte në Kavajë. Edhe ai ka thënë të njëjtën gjë si telefonuesja e parë, duke shtuar dozat e ankthit tek familjarët e gruas së zhdukur prej mëse 7 muajsh. Këto të dhëna, vëllai i Irenës, Ylli Seli, ia ka transmetuar Prokurorisë për Krimet e Rënda, por verifikimet e organit të akuzës kanë treguar se nuk është gjetur asnjë kufomë në brigjet e detit Adriatik. Kjo e dhënë është ende në proces verifikimi, nga ana e prokurorisë.
Telefonatat
Paraditen e së shtunës, në telefonin e shtëpisë së familjes Seli ka mbërritur një telefonatë alarmuese. Telefoni është ngritur nga bashkëshortja e Ylli Selit dhe zëri nga ana tjetër i ka pohuar se po merrte nga Italia. “Unë që po ju telefonoj rri në Itali. Kam mësuar se trupi i mbytur i Irena Selit është gjetur në brigjet e detit Adriatik. Njoftoni familjarët…”, -kanë qenë fjalët e shqiptuara në anën tjetër të receptorit. Sipas Ylli Selit, telefonuesja ishte një femër, e cila kishte një zë të qetë. Ajo ka bërë pohimin e çuditshëm, por nuk i ka lënë kohë familjes Seli që ta pyesë për gjëra të tjera. Edhe pasi është mbyllur telefoni, familja Seli ka pritur se mos telefonuesja anonime do të merrte sërish për të dhënë ndonjë detaj tjetër, por më kot. Ndërkohë, pasditen e së shtunës, në familjen Seli ka mbërritur një tjetër telefonatë anonime. Këtë herë në telefon ishte një djalë, i cili është prezantuar sikur merrte nga Kavaja, por nuk ka pranuar që të thotë emrin e tij. Edhe ky djalë ka thënë të njëjtën gjë si telefonuesja e mëparshme. Djali nga Kavaja u ka thënë familiarëve të Irena Selit se trupi i saj ka dalë në brigjet detit Adriatik dhe më pas ka mbyllur telefonin. Sipas Ylli Selit, telefonuesi që është prezantuar si nga Kavaja duhet të ishte një djalë i vogël. “Duke gjykuar nga zëri i tij, mua m’u duk sikur ishte rreth 15-vjeç. Ai më tha të njëjtën gjë me telefonuesen nga Italia dhe më pas më mbylli telefonin”, -ka pohuar dje për “Shekullin” Ylli Seli.
Prokuroria
Menjëherë sapo ka marrë telefonatën e parë, vëllai i Irenës, Ylli Seli, ka kontaktuar me anëtarët e grupit hetimor të çështjes. Ai ka folur me një nga prokurorët e Krimeve të Rënda dhe i ka treguar për telefonatën anonime. Sipas Ylli Selit, por edhe prokurorit që ka folur me të, njoftimi në Prokurorinë për Krimet e Rënda është bërë në orën 13 e 30 minuta të së shtunës. Burimet zyrtare të prokurorisë pohuan dje se Ylli Seli në telefonatën e tij nuk është fokusuar tek Italia, por ka thënë se personi që i kishte telefonuar i kishte përmendur Durrësin. “Ylli Seli na tha se trupi ishte gjetur në Durrës. Menjëherë ne kryem verifikimet tona duke bashkëpunuar edhe me policinë e Tiranës dhe të Durrësit. Të dyja na dhanë përgjigjjen se në brigjet e detit Adriatik nuk është gjetur asnjë trup femre, që të na bëjë të dyshojmë se bëhet fjalë për Irena Selin. Po përpiqemi që të verifikojmë, por nuk kemi marrë asnjë informacion zyrtar”, -thanë burimet e prokurorisë. Sipas tyre, është kontaktuar menjëherë me policinë dhe përgjigjja e tyre ka qenë negative. Organi i hetimit është ende duke e verifikuar këtë çështje, ndërkohë që policia është vënë në alarm për gjetjen e trupit të ndonjë femre në brigjet e detit Ardiatik. Përsa i përket Italisë, prokuroria nuk ka bërë asnjë verifikim në vendin fqinj, pasi telefonata e bërë nga Ylli Seli nuk e kishte përmendur atë shtet, por Durrësin. Ndërkohë burimet e prokurorisë pohuan se nuk janë njoftuar për telefonatën e dytë anonime, të mbërritur në familjen e vëllait të Irena Selit.




25/07/2005

[Era1]

Telefonata anonime: Irena Seli udhëtoi nga Europa drejt SHBA


Autori i Lajmit: V.Picaku

TIRANË-”Irena Seli po udhëton nga një vend i Europës drejt Shteteve të Bashkuara të Amerikës”. Një telefonatë e një të njohuri të gruas së zhdukur muaj më parë, ka mbërritur në prokurorinë e Tiranës dhe ka entuziasmuar jo pak hetuesit e kësaj çështjeje. Sipas telefonuesit, Irena Seli, bashkëshortja e Agim Mushos kishte udhëtuar një javë më parë drejt Amerikës. Në këtë mënyrë, i njohuri i saj (ashtu sikurse është prezantuar) ka konfirmuar faktin e të qënit gjallë të gruas së zhdukur në mënyrë misterioze 16 dhjetorin e vitit të kaluar.
Hetimet
Menjëherë pas telefonatës, për të cilën thuhet se është bërë nga një kabinë publike e një vendi europian, hetuesit kanë nisur punën për të zbuluar itinerarin e mundshëm të lëvizjeve dhe udhëtimeve të Irena Selit. Megjithatë, nuk bëhet e ditur asgjë për ecurinë e hetimeve të deritanishme, për shkak të çështjes së ndërlikuar. Telefonata ka qenë e shkurtër dhe e qartë: “Irena po udhëton drejt Amerikës”. Telefonuesi anonim pretendon se Irena ka udhëtuar nga një shtet europian drejt Amerikës, rreth një javë më parë.
Kërkesa
Burime të Prokurorisë së Përgjithshme thonë se informacioni telefonik nuk është nënvlerësuar. “Do të kryhen të gjitha verifikimet dhe hetimet e mundshme”, shtuan burimet, sipas të cilave, pas kësaj telefonatës janë kërkuar informacione nga vendi prej të cilit i njohuri pretendon telefonatën dhe largimin e Irenës. Informacioni i kërkuar lidhet me datën dhe linjën ajrore, me të cilën telefonuesi pohon se Irena është larguar në Amerikë. Bëhet e ditur se është dërguar tashmë një letër-porosi me fotografinë dhe të dhëna fizike të Irenës, për të bërë verifikimet e duhura në disa linja ajrore. Prokuroria shqiptare tha se do të bashkëpunojë me drejtësinë amerikane për të verifikuar listat e të gjithë pasagjerëve që kanë zbritur nga avioni i disa linjave ajrore.


Gazeta Ballkan

[ChuChu]

po pra ka shkuar ne amerike Irena Seli dhe prokuroria u entuziasmua, lol.

si ka ikur me deshiren e saj kjo grua pa i thene te pakten prinderve e vellait ku gjendet? (se mire burrin mund ta kete pasur ndonje monster e s'i ve faj). Ajo eshte nene vete, e njeh dhimbjen e prindit per femijen dhe ne asnje menyre s'do ua shkaktonte prinderve te saj kete dhimbje.

qe irena seli e ka ngrene, e ka ngrene. se nga kush is yet to be found. po hetuesit nuk e kane mendjen te irena tani, fakiret kane hall se ku do gjejne pune me ndryshimin e pushtetit...Se pushtetaret tane jane si gra xheloze, nuk duan te kene asnje gjurme te ex-it verdalle...and can u blame them? lol

p.s. c'eshte kjo qe po zhduken middle aged women ne Shqiperi? nuk u pelqejne me njomeshtaket perverteve tane?

[Brari]

gjurme mafiozesh nuk do populli ne shtetin e ri.. prandaj votoi kunder kryemafiozit..



Panorama:

--

zhdukja e irena selit
intervista

Flet Ylli Seli: Morëm tre telefonata për 15 minuta


“Alo! Trupi i Irenës është gjetur në Itali”




Trashgim Sokolaj
Tri telefonata brenda 15 minutave kanë mbërritur dy ditë më parë në numrin e Ylli Selit, vëllait të Irena Selit, e cila humbi gjurmët në rrethana të panjohura më 16 dhjetor 2004, në portin e Durrësit, teksa udhëtonte nga Gjermania me bashkëshortin e saj Agim Musha.

Dy nga tre personat, që kanë kontaktuar me vëllain e të zhdukurës, kanë pretenduar se trupi i Irena Selit ishte gjetur në detin Adriatik. Bisedat me telefonuesit kanë shkaktuar momente tmerri tek familjarët dhe të afërmit e 39-vjeçares së zhdukur në mënyrë misterioze, muajin e fundit të vitit të shkuar. Edhe pse kanë kaluar shtatë muaj, duke jetuar me paqartësinë e fatit të Irenës, lajmi se trupi i të zhdukurës ishte gjetur në det ka shkaktuar tronditje në familje dhe tek të afërmit. Në një intervistë për gazetën “Panorama”, Ylli Seli tregon momentin e telefonatave kur ka dialoguar me njerëzit e panjohur, dy prej të cilëve nuk janë identifikuar, si dhe lajmin se “trupi i Irenës ishte gjetur në Adriatik”.

Kur janë bërë telefonatat?
Telefonata e parë është bërë dje (e shtunë) rreth drekës. Ka qenë ora 13:30. Thirrjes në telefon fillimisht i është përgjigjur bashkëshortja ime. Nga ana tjetër është dëgjuar një zë gruaje, e cila ka folur vetëm pak kohë dhe më pas e ka mbyllur telefonin. Vetëm dy minuta më pas ka rënë sërish telefoni dhe kësaj radhe u përgjigja unë.

Çfarë ju tha personi që po ju telefononte?
Ishte sërish një gruaja. Më tha se “flas nga Italia, u gjet trupi i Irenës në Adriatik”. Gruaja tha se donte të lajmëronte familjen e Irenës. Në momentin që e kemi pyetur për emrin, gruaja që kishte telefonuar tha se po i mbaronte karta dhe e mbylli telefonin.

Si vepruat më pas?
Mora menjëherë në telefon Prokurorinë. Ndërkaq u përpoqa të lajmëroja edhe të afërmit (dajën e Irenës).

Patët ndonjë telefonatë tjetër?
Po, na morën sërish në telefon, pa kaluar shumë kohë nga telefonata e parë. Kësaj radhe ishte një zë që dukej si i një djali të ri, ndoshta 13 vjeç. Dukej si njeriu që përpiqet të ndryshojë zërin, megjithatë nuk njihej. U përpoqa ta kuptoj kush mund të ishte, por nuk e njihja.

U prezantua ky person?
Po, këmbëngula të mësoja emrin e tij, dhe më tha se ishte Astrit Vetullahu nga Kavaja dhe se donte të na njoftonte se trupi i Irenës ishte gjetur në det.

Kush mendoni se mund t’ju ketë telefonuar? A keni të afërm në Itali?
Personat që na kanë telefonuar nuk i kemi njohur nga zëri, edhe pse ishim të tronditur në ato momente.

Çfarë mendoni për këto telefonata, a ju thanë telefonuesit çfarë interesi kishin t’ju lajmëronin?
Nuk e di. Ndoshta janë telefonata që janë bërë edhe nga Tirana. Ne u përpoqëm, por zërat që morën në telefon nuk i njohim. Në fakt unë kam pasur shqetësime në telefon gati prej një muaji e gjysmë. Gjithsesi, unë pres përgjigjen e Prokurorisë. Kam njoftuar hetuesit dhe pres përgjigje prej tyre, edhe pse ata ende nuk e kanë bërë këtë. Nuk përjashtoj edhe mundësinë që këto telefonata të jenë si ajo që u bë vetëm pak kohë më parë në Prokurori, për ta çuar hetimin në një rrugë të gabuar. Ne po përjetojmë çaste tmerri.



Ylli Seli, vëllai i Irenës

Ylli Seli, vëllai i 39-vjeçares Irena Seli, vazhdon të kërkojë zbulimin e fatit të motrës së tij. Ylli vazhdimisht shkon në Prokurori dhe kërkon të mësojë aq sa i lejohet për ecurinë e hetimeve, ndërsa ka kërkuar ndihmë për zbulimin e çështjes “Irena” me anë të tri letrave, dërguar në adresë të Presidentit të Republikës, Alfred Moisiu, ministrit të Rendit, Igli Toska dhe kryeprokurorit, Theodhori Sollaku. Vëllai i të zhdukurës, që në dëshminë e parë që ka dhënë në Prokurorinë e Tiranës në dhjetor 2004, ka hedhur dyshimet se Irena mund të ishte hedhur në det gjatë udhëtimit nga porti i Triestes për në Durrës.



pista 1
Pista e parë, në të cilën Prokuroria e Tiranës dhe më pas Krimet e Rënda kanë hetuar për zhdukjen e Irena Selit, ka qenë rrëmbimi i saj me pasojë vdekjen. Grupi hetimor i Krimeve të Rënda është ndarë në dy pjesë, ndërsa njëri grup i hetuesve ka zhvilluar hetime vetëm në këtë pistë. Verifikimet brenda dhe jashtë vendit në këtë version nuk kanë gjetur prova për të besuar në rrëmbimin e 39-vjeçares. Në këtë pistë janë kryer hetime në Durrës, me dyshimin se e zhdukura nuk ka zbritur aty, por dokumentacioni i portit është shumë i paqartë dhe nuk lë mundësi për të konfirmuar diçka rreth këtij fakti.

pista 2
Versioni i dytë, në të cilin janë zhvilluar hetimet, është ai i largimit të Irena Selit, me dashje dhe me paramendim. Hetuesit konfirmojnë se kjo pistë, më shumë sesa tek provat dhe faktet, është bazuar në deklaratat e Agim Mushës, bashkëshortit të gruas së zhdukur. Në muajin e shtatë të hetimeve, edhe ky version ka mbetur pa u provuar si i vërtetë, ndërsa nuk ka asnjë provë për ta hedhur poshtë atë. Grupi hetimor që ka zhvilluar procedurat këtë pistë e ka verifikuar në SHBA, ku Agim Musha pretendonte se ndodhej Irena, por asgjë nuk është konfirmuar në mënyrë përfundimtare.

hetimi
Për herë të parë në historinë e drejtësisë shqiptare, Prokuroria e Krimeve të Rënda me dosjen “Irena” ka aplikuar metodën e hetimit kolegjial. Kjo procedurë nënkupton pjesëmarrjen në hetim të më shumë se një prokurori, ndërsa grupi në tërësi merr vendime kolegjiale, duke u këshilluar me të gjithë anëtarët e tjerë, si dhe duke ballafaquar provat e mbledhura gjatë verifikimeve. Prokuroria e Krimeve të Rënda, në mënyrë zyrtare, ka sqaruar se ka zhvilluar të gjitha verifikimet dhe procedurat e mundshme për zbardhjen e dosjes “Irena”.



39-vjeçarja humbi gjurmët në port
Në Durrës, aty ku fshihet misteri i zhdukjes

Agim Musha me bashkëshorten e tij është nisur në një udhëtim nga qyteti i Dortmundit në Gjermani më 14 dhjetor 2004. Dy bashkëshortët kanë mbërritur në Itali, ndërsa janë nisur drejt Shqipërisë me tragetin “Venezia” më 15 dhjetor 2004. Agjencia turistike dhe policia italiane kanë konfirmuar se bileta e Irena Selit është paguar dhe se ajo është parë duke hipur në traget. Mjeti i udhëtimit ka mbërritur në portin e Durrësit në orën 14:00 të 16 dhjetorit. Atë ditë në darkë, familja e Irenës është njoftuar për zhdukjen e 39-vjeçares. Të afërmit e saj kanë shkuar në Durrës dhe nuk kanë gjetur asnjë provë se Irena kishte zbritur në port. Ndërkaq, marrja në pyetje e dy efektivave të policisë, që kanë pasur turnin kur ka mbërritur trageti “Venezia”, nuk ka zbuluar asgjë, pasi policët kanë thënë se kanë pasur një fluks shumë të madh ushtarësh. Dokumentacioni nuk konfirmon asnjë version. Kujtesa e kamerave të vëzhgimit, të cilat janë verifikuar dy muaj pas ngjarjes kishte kapacitet t’i mbante pamjet vetëm për dhjetë ditë.
--

zhdukja e irena selit
hetimi

Policia e Durrësit dhe e Vlorës nis komunikimin me portet italiane


Prokuroria: Hetuesit po kërkojnë në Itali




Tirane
Grupi hetimor i dosjes “Irena” tha dje se po verifikon informacionin e dhënë me anë të telefonatave në adresë të Ylli Selit.

Sipas burimeve nga Prokuroria, nuk ka shumë prova për të besuar në telefonatat që kanë lajmëruar gjetjen e trupit të gruas së zhdukur. “Ne e kemi verifikuar informacionin që është dhënë me anë të disa telefonatave në familjen e të zhdukurës Irena Seli. Fillimisht kemi komunikuar me autoritetet policore në portet e Durrësit dhe të Vlorës. Këto struktura mbajnë komunikim të rregullt me policinë bregdetare italiane për shkak të transportit detar. Nga këto verifikime, informacioni për gjetjen e trupit të shtetases Irena Seli nuk rezulton i besueshëm. Organi hetimor nuk e përjashtoi mundësinë se telefonatat kanë qenë një “lojë”, qëllimet e së cilës mbeten të panjohura.

Mosbesimi
Pasi Ylli Seli ka njoftuar Prokurorinë për telefonatat që ka pasur me tre persona, hetuesit kanë kërkuar menjëherë identitetin e telefonuesve. Vëllai i të zhdukurës i ka bërë të ditur Prokurorisë se personat që e kishin marrë në telefon nuk kishin dhënë detaje rreth pretendimit për gjetjen e trupit në detin Adriatik. Seli ka treguar se nga tre personat që e kanë marrë në telefon, vetëm njëri prej tyre është prezantuar si Astrit Vetullahu që telefononte nga Kavaja, duke lënë gjithçka në mister. Organi i hetimeve tha se nuk ka asnjë argument për të besuar informacionin se trupi i Irena Selit është gjetur në det. “Telefonuesit nuk kanë dhënë asnjë detaj rreth vendit dhe mënyrës se si është gjetur trupi. Ata nuk japin kohën kur ka ndodhur ngjarja e pretenduar prej tyre dhe nuk pranojnë të identifikohen. Gjetja e pretenduar e trupit të gruas së zhdukur, kur kanë kaluar më shumë se shtatë muaj nga ngjarja, duket e pabesueshme, pasi personi nuk mund të identifikohet pa kaluar në verifikimet dhe ekspertizat e policisë. Kjo procedurë duhet të kryhet edhe nëse valët e detit e kanë nxjerrë kohë më parë trupin e të zhdukurës në bregdetin italian dhe më pas nëse ai është gjetur nga ndonjë turist i rastësishëm. Emri i saj si person i zhdukur është shpërndarë në zyrat e Inetrpolit të cilat nuk kanë asnjë gjurmë të 39-vjeçares. Edhe policia italiane nuk ka asnjë informacion për këtë fakt”, sqaruan dje burimet e hetimit.

Verifikimet
Rreth mbrëmjes së djeshme, dozat e mosbesimit të Prokurorisë rreth pretendimeve për gjetjen e trupit të Irena Selit janë shtuar edhe më shumë. Komunikimi me policinë dhe kapitanerinë e portit të Durrësit dhe Vlorës nuk ka dhënë asnjë konfirmim për gjetjen e trupit. Sipas Prokurorisë është e pamundur që policia italiane të mos ketë informacion rreth ngjarjes, nëse ajo ka ndodhur vërtet siç pretendojnë telefonuesit në adresë të vëllait të gruas së zhdukur. Policia dhe kapitaneria në Durrës dhe Vlorë kanë shfrytëzuar të gjitha rrugët e komunikimit me autoritetet portale italiane, të cilat nuk e kanë konfirmuar informacionin. Nga ky fakt, edhe Prokuroria tha se nuk ishte shumë e interesuar të verifikonte rreth personave, që fshihen pas telefonatave të bëra mesditën e së shtunës, për shkak të mosbesimit ndaj pretendimeve të personave, të cilët nuk kanë dhënë arsye bindëse për pretendimin e tyre.



FAMILJA

Të afërmit e të zhdukurës kanë hedhur dyshime të vazhdueshme rreth vrasjes së saj. Në disa deklarata, familja e Irenës ka hedhur dyshime edhe për hedhjen e mundshme të 39-vjeçares në det gjatë udhëtimit të fundit.



Çifti i ri Musha, me pushime në Itali

Agim Musha, ish-pronari i kompleksit “Bruno” dhe bashkëshort i të zhdukurës Irena Seli ndodhet në Itali për të kaluar sezonin e pushimeve. Musha, i cili ka qenë në kontakte të vazhdueshme me grupin që heton zhdukjen e gruas së tij, ka përfituar muajin e fundit edhe zhbllokimin e llogarisë bankare. Sipas një deklarimi të tij, Agim Musha pasi kishte marrë pasaportën që i ishte bllokuar nga Prokuroria, kishte shkuar me para borxh në Gjermani. Llogaritë bankare të çiftit. Sipas deklarimeve të Mushës, Irena kishte akses në depozitat bankare ndaj hetuesit i kanë mbajtur në mbikëqyrje ato për të zbuluar ndonjë gjurmë të gruas së zhdukur. Gjatë kontakteve me grupin e hetimit si dhe nga burimet e çështjes, Musha e ka njoftuar Prokurorinë se ndodhet në Itali duke kaluar pushimet e verës në shoqërinë e bashkëshortes së re me të cilën është njohur dhe banon në Gjermani. Vetëm pak ditë më parë, Prokuroria e Përgjithshme ka kërkuar nga Krimet e Rënda, të ribëhen një pjesë e mirë e veprimeve hetimore që ishin kryer për gjetjen e Irena Selit. Prokuroria ka filluar ripërsëritjen e procedurave më të rëndësishme të hetimit të dosjes.




Hetuesit: Informacioni është i pavërtetë
Telefonata e parë në Prokurori: Irena Seli shkoi në SHBA

Më 15 qershor 2005, një person ka telefonuar në zyrat e hetuesve të Prokurorisë së Krimeve të Rënda. Ai ka pretenduar se ishte i njohur i Irena Selit dhe se telefononte nga jashtë Shqipërisë. Në dialogun e zhvilluar më hetuesit, telefonuesi ka pretenduar se e kishte parë gruan e zhdukur, Irena Seli, të kalonte nga një vend i Evropës në SHBA. Prokuroria nuk e paragjykoi informacionin dhe filloi procedurat zyrtare për verifikimin e tij. Rreth një muaj pasi ishte bërë telefonata, Interpoli dhe policitë e disa vendeve në Evropë kanë kthyer përgjigjen në Tiranë. Sipas informacionit, gruaja e zhdukur nuk ishte ndodhur në ndonjë vend të Evropës dhe as kishte kaluar në SHBA. Më 13 korrik 2005, Prokuroria e Krimeve të Rënda tha se, pas verifikimeve ndërkombëtare informacioni i dhënë nga personi që kishte telefonuar kishte qenë i pavërtetë. Ndërkaq, Ylli Seli në deklarimet e tij, por edhe në letrën e dërguar Presidentit Moisiu ka theksuar se telefonata ishte bërë me qëllim deformimin e hetimeve në një rrugë pa shpresë. Me nota të ngjashme, por më të rezervuara është shprehur edhe Prokuroria, e cila për një muaj kishte bashkëpunuar me organet ndërkombëtare të policisë dhe Interpolit, duke konfirmuar se informacionet e dhëna nga telefonuesi kishin qenë të pavërteta. Përvoja me këtë telefonatë duket se i ka bërë hetuesit mosbesues ndaj të dhënave që paraqiten nga personat, që marrin në telefon qoftë në zyrat e Prokurorisë, por edhe pranë familjarëve të gruas së zhdukur shtatë muaj më parë. Organi i hetimit nuk ka asnjë të dhënë për të ngritur ndonjë version mbi fatin e Irena Selit, ndërsa kohët e fundit dosja është deleguar për kompetencë hetimi në Prokurorinë e rrethit Tiranë.



---
zhdukja e irena selit
hetimi

Hetuesit po verifikojnë nëse banon në Kavajë Astrit Vetullahu ai që telefonoi për trupin e Irena Selit


Prokuroria në kërkim të telefonuesit

“Nuk kemi asnjë konfirmim nga Italia për gjetjen e trupit”

Trashgim Sokolaj
Astrit Vetullahu, personi që ka telefonuar në adresë të Ylli Selit, është shpresa e vetme e Prokurorisë për të zbuluar të vërtetën e telefonatave, që kanë “lajmëruar” gjetjen e trupit të Irena Selit, 39-vjeçares së zhdukur më 16 dhjetor 2004.

Hetuesit e dosjes “Irena” janë vënë prej ditës së djeshme në ndjekje të Astrit Vetullahut, personit që ka telefonuar në adresë të Ylli Selit, vëllait të gruas së zhdukur në rrethana misterioze. Zyrtarë të hetimeve në Prokurorinë e Përgjithshme konfirmuan për gazetën se gjatë ditës së djeshme Krimet e Rënda kanë verifikuar nëse emri me të cilin është prezantuar telefonuesi është i vërtetë. “Me ndihmën e policisë dhe të organeve të pushtetit lokal, grupi hetimor po verifikon nëse ky person është i regjistruar si person që banon në qytetin e Kavajës”, thanë burimet e hetimit.

Përgjimi i pamundur
Organi i akuzës tha se, sipas verifikimeve të hetuesve, por edhe sipas dëshmive të Ylli Selit, telefonatat nga Italia që kanë pretenduar gjetjen e trupit të Irena Selit janë bërë në numrin fiks. “Ky është shkaku pse ne nuk mund të konfirmojmë ndonjëherë nëse këto telefonata janë bërë. Dhe nëse janë bërë, sa kanë zgjatur, cili është zëri i telefonuesve dhe pretendimet e tyre”, sqaruan burimet e hetimit. Sipas tyre, mbikëqyrja e telefonave fiks është e pamundur përveçse në kushte specifike, kurse konfirmimi për telefonatat e bëra në një numër të tillë telefoni duket se është i pamundur. Gjatë ditës së djeshme, organi i hetimeve që ka në duar dosjen “Irena” ishte më i vendosur në qëndrimin e tij se, telefonatat në adresë të vëllait të gruas së zhdukur mund të kenë qenë një lojë e personave me qëllime të panjohura. Ndërkaq, zyrtarë të Krimeve të Rënda kanë thënë dje për mediat se, pas publikimit të lajmit në shtyp, Prokuroria do të verifikojë informacionet më të fundit, që kanë dalë në dritë për të zhdukurën pa asnjë gjurmë, Irena Seli.

Telefonatat
Mesditën e së shtunës, rreth orës 13:30, tri telefonata kanë mbërritur në numrin fiks të shtëpisë së Ylli Selit. Sipas intervistës së dhënë për gazetën nga Ylli Seli, dy gra kanë telefonuar nga Italia dhe kanë pretenduar gjetjen e trupit të Irenës në Adriatik. Pas këtyre thirrjeve telefonike, Ylli Seli i është përgjigjur një tjetër telefonate. Kësaj radhe, një person që ngjante i ri në moshë e që fliste nga Kavaja ka dhënë të njëjtin lajm. Pasi Ylli Seli ka kërkuar emrin e telefonuesit, ai është prezantuar si Astrit Vetullahu. Krimet e Rënda thanë dje se po bashkëpunojnë ngushtë me policinë e Tiranës, Durrësit dhe Vlorës, të cilat kanë pasur komunikim edhe me homologët italianë, por ende nuk ka asnjë konfirmim rreth gjetjes së trupit të gruas së zhdukur.



Dëshmia
Seli dhe Dervishi në Prokurori

Ylli, vëllai i Irena Selit, si dhe daja i saj, Shefqet Dervishi, janë paraqitur mëngjesin e djeshëm në Prokurorinë e Krimeve të Rënda. Gjatë kohës që kanë qëndruar në Prokurori, Seli dhe Dervishi kanë sqaruar për hetusit momentin e telefonatës së ditës së shtunë, si dhe kanë dhënë të gjitha detajet rreth pretendimeve të tre personave që kanë telefonuar.



Informacionet
“Grupi hetimor ka detyrimin ligjor për të verifikuar çdo informacion, që vjen për këtë çështje, jo vetëm nga të afërm të Irena Selit, por edhe nga persona të tjerë, që kanë dijeni për këtë çështje. Hetimet nuk janë kufizuar vetëm në Tiranë, por është aktivizuar edhe policia e Durrësit dhe e Vlorës”. Ky është deklarimi i titullarëve të Prokurorisë së Krimeve të Rënda, rreth zhvillimeve të fundit të dosjes “Irena”.

Interpoli
Burime të hetimit thanë se janë duke mbajtur kontakte edhe me zyrat e Interpolit, për të verifikuar të gjitha informacionet e mbërritura në zyrat e Prokurorisë, rreth fatit të Irena Selit. “Në bashkëpunim me Interpolin po verifikohen të gjitha versionet e mundshme të ngjarjes”, tha dje njëri prej personave të aktivizuar në hetimin e çështjes.



..
panorama

[Blue_sky]

Ky Gim Bosi sic duket i eshte merzitur ajo shalthata qe ka pasur e ndonji qengjushe e njome ja ka prish mendjen dhe kur trageti do ket qene ne rrug naten ja ka fut nji te shtyme dhe e ka hedh ne det te mjeren..

Mesa duket po pasi "bossi" ne fjale as pa u bere nje vit nga zhdukja e te shoqes kalon pushimet me gruan e tije te re ne Itali.Eh cfare njerezish mban kjo bote!