Gazeta Elektronike: "Futbolli Ndërkombtar" (Nr.3)

[viganv]

Serie A

Kaljari: I gatshëm për shitjen e Espozitos

Mund të jetë Roma skuadra e ardhshme e Mauro Espozitos. Konfirmimi ka mbërritur nga vetë drejtori sportiv i klubit sard, Nikola Salerno: "Roma zotëron lojtarë që ne na pëlqejnë: për shembull Ferroneti dhe Akuilani janë futbollistë që mund të na interesojnë, - ka shpjeguar ai. - Tani duhet të shohim disponueshmërinë e tyre për t'i shitur. Ne s'kërkojmë medoemos shitjen, mund t'i pranojmë edhe hua ose në bashkëpronësi.

[viganv]

Serie A

Kovaç dhe Xhanikeda, jo sa për numër


Ky është "big club" dhe natyrisht ai është "very happy". Roberto Kovaç nuk njeh një fjalë italisht, flet pak kroatisht dhe pak anglisht, por kuptohet. Dhe bën të ditur menjëherë që në Torino nuk është sa për t'u dukur. I ka idetë e qarta djaloshi i lindur në Gjermani, por me kombësi kroate, thuajse ka kuptuar gjithçka: "Jam i lumtur që jam këtu dhe që do të luaj te Juventusi, - thotë mbrojtësi. - Ky është një klub i madh që synon Ligën e Kampioneve, e di dhe e cilësoj të rëndësishme. E ka fituar 28 herë titullin dhe vetëm dy herë Championsin. Duke parë që Milani ka 6 kupa, është normale që këtu e kërkojnë me këmbëngulje atë..."
Në ditët e para te Juventusi, me flokë të shkurtra, bjond dhe fanellë të kuqe, Kovaçi e shikon gjithçka me kureshtje, por nuk çorientohet, përkundrazi: "Jam këtu për të luajtur në nivele të larta dhe për të fituar, - vazhdon ish-lojtari i Bajernit në Mynihut. - E pres këtë nga jeta e re në Torino. Do të bëj gjithçka për të fituar një vend titullari. Kanavaro dhe Turam janë lojtarë të mirë, por unë jam në lartësinë e duhur. Mbrojtje me tre apo katër lojtarë, pak ndryshon, e rëndësishme është të luaj dhe e di që mund t'ia dal". Ja pra, Kovaçi me kokën lart në një stil të përsosur që i shkon përshtat te Juvja. E vetmja fytyrë e vërtetë e re (për momentin), nga surprizat e pakta të sezonin 2005-2006. Kapelo e prezanton: "Na bëri shumë përshtypje ndaj Bajernit". "Dhe kemi lëvizur në kohë deri sa e morëm, përmes merkatos së lojtarëve të lirë," - mbështet i zakonshmi Moxhi. Kovaçi ka nënshkruar për tre vjet, ku do të fitojë 1.5 milionë euro në sezon me bardhezinjtë. "Mirë, mirë, tani të luajmë", - buzëqesh. Pastaj vazhdon: "E njoh trajnerin me famë (Kapelon), është një nga më të rëndësishmit në Itali, apo jo? Për t'u përshtatur, do të më ndihmojë Tudori". Dhe në të vërtetë, Igori, kroat si ai, bën rolin e përkthyesit. Por deri këtu, sepse Tudori duhet të largohet.
Topi kalon te Xhuliano Xhanikeda, i cili ka nënshkruar një kontratë 2-vjeçare me një mundësi për një të tretë. Në moshën 30-vjeçare, ai e di mirë se çfarë mundësie i ka ardhur në duar: "Në moshën 30-vjeçare, nëse të zgjedhin, do të thotë se të çmojnë, - pranon ish-laciali. - Në fushë dhe jashtë, sepse Juvja shikon gjithçka, edhe aspektin njerëzor". Për këtë, Xhanikeda është krenar: "Për të ardhur te Juvja, kam biseduar dhe nuk ishte e vështirë të thosha "po", - shpjegon mesfushori i ri i kampionëve. - Fillon një aventurë e bukur, ku duhet të ripaguaj besimin që më është dhënë. Dua të jap ndihmën time". Ndërkohë merr një të shtyrë (me shaka) nga Nedvedi, ish-lacial si ai: "Më kanë pritur mirë", - nënvizon Xhanikeda. Edhe Blazi dhe Takinardi? Po nëse do të vinte Vieira? Xhanikeda driblon, leksionin e ka të memorizuar tashmë. "Janë gjëra që i vendos klubi, - vijon ai, - megjitjatë, kjo skuadër është e ndërtuar për të luftuar në të gjitha veprimtaritë. Nuk besoj se Milani me Vierin është më i plotë ose më i fortë. Ka si qëllim, sikundër dhe Interi me Juven për të luftuar për titullin dhe kupën. Pastaj, në skuadër, konkurrenca të bën gjithnjë mirë". Vërtet, por sezoni i gjatë është plot me të papritura dhe i lodhshëm. "Do të punoj dhe do ta ndjek Kapelon me vëmendje, - përfundon Xhanikeda. - Dua të zbuloj sekretet e tij dhe të kuptoj se çfarë kërkon nga lojtarët. Jam i gatshëm për një mesfushë me tre lojtarë, sikundër dhe atë me katër. E rëndësishme është të fitojmë".

[viganv]

Serie A


Nedved: Trezege, arma plus e jona



Nuk ka ditur t'i rezistojë tërheqjes magnetike të "Zonjës së vjetër". Pavel Nedved, 33 vjeç në gusht, nga stërvitja në Saliçe Terme, shpjegon pse do të jetë bardhezi edhe për tri sezone: "Jam i lumtur që e kam zgjatur kontratën deri më 2008-n, - tha çeku, - dhe që do të kërkoj ende të fitoj trofe të rëndësishëm me këtë fanellë. Ishte Juventusi që më bëri një ofertë dhe unë nuk arrita t'i rezistoja. Vendimi ishte i pjekur edhe për faktin që në fund të sezonit të shkuar isha shumë mirë".
Nedvedi e kishte deklaruar disa herë qëllimin e tij për t'u tërhequr nga futbolli në fund të 2006-s, por një muaj më parë, në mënyrë të papritur vjen rinovimi i kontratës deri më 2008-ën. Juvja dhe Nedvedi janë të lidhur ngushtë me njëri-tjetrin, efekt që i ka bërë të dyja palët të jenë të lumtura. Por para së gjithash duan të fitojnë. Gjithnjë dhe kudo. Dhe kanë një objektiv të përbashkët dhe prioritar: Ligën e Kampioneve. Nedvedi është një njeri në mision. Kërkon të ngrejë kupën me "veshë të mëdhenj", më shumë se çdo gjë tjetër, për të "rishenjtëruar" një karrierë të një niveli të lartë, që i mungon vetëm një trofe ndërkombëtar. Një karton i verdhë i mallkuar në gjysmëfinalen me Realin e Madridit dy vjet më parë, e pezulloi nga finalja e pafatë e Mançesterit kundër Milanit. Tani ka edhe tri sezone të tjera për të mbajtur nën trysni Ligën e Kampioneve. Çeku e motivon rinovimin e kontratës edhe me rigjetjen e formës fizike. Pas një sezoni të lëkundur, në finalen e kampionatit të shkuar, ka gjetur një formë të mirë, që ishte një element thelbësor e lojës së tij shumë të vendosur, ku cilësia dhe sasia ndërthuren shumë mirë. Dhe Nevedi e sheh Juventusin e këtij viti më të fortë se ai i sezonit të shkuar: "Do të jetë Trezegeja njeriu më shumë në këtë Juve. Ne e dimë se sa vlen kur është në formë", - e mbyll Nedvedi.

[viganv]

Serie A

Juventus, "triada" në Londër për Vieiranë



Pas grumbullimit të bardhezinjve në Saliçe Terme, "trioja" drejtuese e Juventusit është vënë në lëvizje. Luçiano Moxhi, Roberto Betega dhe Antonio Xhiraudo ndodhen në Londër për të bindur drejtuesit e Arsenalit për të shitur mesfushorin 29-vjeçar francez Patrik Vieira te Juvja. Palët duken shumë afër marrëveshjes, pasi lojtari i ka prishur marrëdhëniet me "topçinjtë", të cilët kanë refuzuar ofertën e fundit të Juves (5 milionë plus Apiah), duke pretenduar se kërkojnë vetëm lojtarë dhe jo para. Për të marrë francezin, Moxhi duhet të shesë për të fituar para, Mikolin, Mareskën, Blazin apo Tudorin.

[viganv]

Serie A

Prandeli frenon entuziazmin e Fiores

Në ditën e parë të stërvitjes ka vetëm një problem: është ai i erës. Çezare Prandeli, trajneri i Fiorentinës, buzëqesh duke frenuar entuziazmin e Stefano Fiores: "Unë isha në Sardenjë dhe Fiore në Spanjë. Folëm në telefon dhe ndoshta ndonjë fjalë ka "fluturuar" për shkak të erës. Por nuk i thashë që duhet të luajë si anësor i djathtë, nuk folëm fare për skemën 4-4-2. Megjithatë, falënderoj Fioren për gatishmërinë e tij, por kam thënë vetëm dhe konfirmoj që do të luajmë me një mbrojtje me katër lojtarë".

[viganv]

Serie A

Lacio, katër mungesa kundër Tamperes

Në debutimin europian të së dielës, Lacio do të paraqitet në "Olimpiko" pa Inzagin (ka thyer një brinjë në stërvitje), por edhe pa Lekin. Mbrojtësi argjentinas ka pësuar një bllokim në kofshën e djathtë që do të shihet edhe në ditët e ardhshme. Leki do të qëndrojë pushim në ndeshjen e parë me finlandezët e Tamperes në turin e tretë të Kupës Intertoto. Ndeshja që trajneri Rosi duhet ta përballojë edhe pa të ardhurit e fundit, Peruci e Odo, Pikolo dhe Baronio. Ka mundësi të riaftësohet Dabo.

[viganv]

Serie A

Pelicoli dhe Vixhiani kalojnë te Rexhina

Blerje e dyfishtë për Rexhinën. Klubi i presidentit Foti ka zyrtarizuar dje blerjen e Ivan Pelicolit, portierit të Romës për të cilin është arritur një marrëveshje me klubin verdhekuq për bashkëpronësinë. Në Rexhio Kalabria vjen edhe Luka Vixhiani nga Livorno. Për mesfushorin 29-vjeçar, formula është ajo e huazimit me të drejtë rimbajtjeje.

[viganv]

Serie A


Xhiraudo. Kasano jo këtë vit te Juvja

Kasano po, Kasano jo. Vazhdon "telenovela" e verës (pas asaj të Xhilardinos) e lidhur mes Antonio Kasanos dhe Juventusit. Sipas Antonio Xhiraudos, talenti nga Bari, të paktën këtë vit, nuk do të vijë në Torino: "Është një talent, por ne i kemi tashmë pesë sulmues të mëdhenj, - tha administratori i deleguar juventin. - Dhe me këtë nuk ka pse të vijë te Juvja këtë vit. Ne jemi përforcuar në krahasim me sezonin e shkuar".

[viganv]

Serie A

Bazani: Vitin e shkuar s'isha shumë i vlefshëm

Fabio Bazani kthehet nën urdhrat e Novelinos pas huazimit te Lacio. Qendërsulmuesi i Sampdorias kërkon të sheshojë mosmarrëveshjet me trajnerin blukaltër, që për të gjithnjë ka pasur, pavarësisht nga gjithçka, fjalë stimuluese: "U largova, - shpjegoi Bazani, - sepse e kuptova që nuk isha më i vlefshëm për shokët në një moment kur skuadra po ecte me ritme të shpejta. Marrëdhënia ime me Alesian (gruaja e tij), nuk ka të bëjë fare me zgjedhjet e saj të punës".

[viganv]

Primera Division

Maksi: Dua të zë një vend në formacion



Sulmuesi argjentinas, Maksi Lopez, u rikthye në Kamp Nou të martën, pasi kaloi disa kohë pushime. Ai u kthye një javë përpara shokëve të ekipit, për të rikuperuar ditët pushim që bëri në muajin maj, për shkak të një dëmtimi. Pasi e kaloi dëmtimin me sukses, Maksi është rikthyer në gjendje shpirtërore shumë të mirë. "Pushimet ishin një rast i mirë për të thyer rutinën e përditshme, - tha ai. - Është pak e vështirë, pasi unë do të filloj sërish nga fillimi, por kam bërë një punë të madhe në Buenos Aires, që të arrij një formë të mirë. Jam i kënaqur me mënyrën se si shkojnë gjërat dhe nuk mund të pres shokët e mi që të filloj stërvitjen." Maksi takoi mjekët e ekipit të martën dhe do të nisë një stërvitje speciale, që të arrijë formën e tij më të mirë. "Unë ndihem shumë mirë, pasi fillova të martën punën me fizioterapistët dhe takova edhe doktor Ardevolin. Tani duhet të përfundoj programin dhe të rikthehem në stërvitje," - tha ai. Argjentinasi po kërkon të jetë sa më në formë, në mënyrë që të zërë një vend në formacionin e Barcelonës. "Jam i kënaqur sesi po shkojnë gjërat. Dua që këtë vit mos të kem probleme fizike, në mënyrë që të fitoj një rol të rëndësishëm në ekip. Rivaliteti është i madh, por besoj se trajneri do të ketë besim tek unë." Maksi nuk luajti shumë kur erdhi te Barcelona dhe ka deklaruar se është i aftë për një vend stabël në formacion. Ekipi katalanas ka emra të mëdhenj në sulmin e vet, gjithsesi trajneri i ekipit ka deklaruar që do të luajë ai që ka formën më të mirë.