Gazeta Elektronike: "Futbolli Ndërkombtar" (Nr.3)

[viganv]

Premier Liga

Liverpuli, në ndjekje të Galasit

Liverpuli ka bërë gati një ofertë për mbrojtësin e ekipit të Çelsit, Uilliam Galasin. Mbrojtësi francez zhvilloi një sezon të suksesshëm tek ekipi londinez, ku arriti të fitonte titullin e Premier Ligës dhe Kupën e Anglisë. Me ardhjen e mbrojtësit spanjoll, Asier Del Hornos, vendi i Galasit në ekip mund të vihet në dyshim, pasi Xhon Terri dhe Rikardo Karvalo duken të palëvizshëm nga vendi i tyre prej titullari.

[viganv]

Premier Liga


Everton, Mojes synon të arrijë majat

Trajneri i ekipit të Evertonit, David Mojes, është i bindur se ekipi i tij do të arrijë të qëndrojë midis standardeve të larta të futbollit europian, pavarësisht vështirësive me të cilat do të përballet gjatë këtij sezoni. "Qëllimi ynë është të arrijmë të përsërisim suksesin e sezonit të kaluar, kështu që unë mund të synoj për fitimin e titullit. Edhe pse kjo është pothuajse e pamundur dhe ne jemi realistë për këtë, do të mundohemi të bëjmë një paraqitje dinjitoze në Ligën e Kampioneve", - deklaroi Mojesi.

[viganv]

Premier Liga


Erikson, i bindur për sukses

Trajneri i kombëtares së Anglisë, Sven Goran Erikson, është i bindur që ekipi i tij mund të fitojë Botërorin e ardhshëm të 2006-s. "Po të më pyesnit disa vite më parë nëse kishim mundësi ta fitonim botërorin, do të përgjigjesha duke thënë se kishim potencialin e duhur për ta bërë këtë. Por tani përgjigjja ime ka ndryshuar. Jam i sigurtë se mund ta fitojmë botërorin e Gjermanisë. Kur të mbërrijmë atje, do të tregojmë vlerat tona të vërteta", - deklaroi Eriksoni

[viganv]

Premier Liga

Boltoni kërkon meksikanin Borgeti

Ekipi i Boltonit është vënë në ndjekje të sulmuesit meksikan, Jared Borgeti. Trajneri Sam Alerdais po kërkon të përforcojë ekipin e tij në prag të edicionit të ardhshëm të Kupës UEFA. Sulmuesi Borgeti, i cili shënoi katër gola gjatë Kupës së Konfederatave, luan me ekipin meksikan të Paçukas. 31-vjeçari ka tërhequr vëmendjen e shumë klubeve europiane, si Herta e Berlinit, Panathinaikosi dhe së fundi Boltoni, që ka ofruar 4 milionë euro për lojtarin meksikan.

[viganv]

Premier Liga





FA: Në 2012-ën, Britania e Madhe edhe në futboll

Federata Angleze e Futbollit shpreson që në lojërat e ardhshme olimpike, të cilat do të zhvillohen në Londër në vitin 2012, Britania e Madhe të përfaqësohet nga një ekip i përbashkët futbolli, si për femra, ashtu edhe për meshkuj. Shefi ekzekutiv i FA-së, David Dejvis, shpreson që kjo dëshirë të realizohet në lojërat e ardhshme olimpike: "Kjo do të bëhet vetëm për të treguar se ky vend mund të arrijë suksese kur të gjitha kombësitë janë të bashkuara."

[viganv]

Premier Liga

Ferguson: Ferdinand? Jo i pazëvendësueshëmp


Trajneri i ekipit të Mançesterit, Aleks Ferguson, nuk pranon ta dramatizojë vendimin e Rio Ferdinandit për të mos rinovuar kontratën e tij me klubin e "Djajve të kuq". Menaxheri i mbrojtësit të kombëtares së Anglisë, Pini Zahavi, deklaroi se Ferdinandi nuk do ta rinovonte kontratën e tij aktuale me ekipin e Mançesterit, edhe pse u shpreh i bindur se e ardhmja e lojtarit ishte pikërisht në "Old Traford". Trajneri Ferguson deklaroi: "Nuk më shqetëson ky fakt. Kemi një kontigjent të mirë lojtarësh, por asnjë nuk është i pazëvendësueshëm. Tani çdo gjë varet nga vetë lojtari. I kemi bërë një ofertë Ferdinandit dhe nuk ka shumë rëndësi nëse ai e pranon apo jo. Ai ka edhe dy vite të tjera në kontratën e tij, kështu që nuk kemi pse të shqetësohemi. Në ditët e sotme, bisedimet zgjasin më shumë, pasi menaxherët luajnë një rol të rëndësishëm. Në rastin e Ferdinandit, unë dëshiroja që ai të firmoste, që të mos vihej në qendër të polemikave nga mediat, megjithatë ky është një vendim që kërkon kohë dhe reflektim". Ferdinandit i është ofruar një kontratë 4-vjeçare, nga e cila do të përfitonte 100.000 paund në javë, por menaxheri i tij, Pini Zahavi, ka kërkuar që paga e mbrojtësit 24-vjeçar të arrijë kuotën e 120.000 paundëve në javë. "Nuk po negociojmë me askënd. Ai ka edhe dy vite të tjera në kontratë, kështu që nuk ka nevojë për spekullime të kota. U mendua për një rinovim të kontratës së tij, por nuk u arrit një marrëveshje. Megjithatë, Ferdinandi ndihet i lumtur këtu dhe besoj se e ardhmja e tij është në "Old Traford"", - deklaroi Zahavi.

[viganv]

Premier Liga

Xherrard: Dua titullin në Premier Ligë



Pasi rinovoi kontratën e tij me klubin e Liverpulit, Stiven Xherrard mendon për të ardhmen dhe në veçanti për titullin e Premier Ligës. Mesfushori i kombëtares së Anglisë luajti dje në një ndeshje miqësore ndaj ekipit të Wrexhamit. Kampionët e Europës arritën të fitonin me rezultatin 4-3. Disa ditë më parë, Xherrardi u shpreh i vendosur të largohej nga "Anfield Road", por 24 orë më pas ndryshoi mendim, duke thënë se nuk mund të rrinte larg "Anfield Road"-it. 24-vjeçari firmosi një kontratë 4-vjeçare, nga e cila do të përfitojë 100.000 paund në javë. Tani Xherrardi mendon vetëm për trofeun që nuk ka arritur ta fitojë asnjëherë, Premier Ligën. Pas takimit të djeshëm, Xherrardi tha: "Për mua ishte e mrekullueshme të rikthehesha përsëri të luaja me këtë fanellë. Shpresoj që në këtë sezon të arrij të fitoj titullin me ekipin e Liverpulit. Eshtë i vetmi trofe që më mungon dhe shpresoj që këtë vit të arrij ta fitoj. Megjithatë, nëse nuk do të arrijmë ta fitojmë këtë vit, do ta bëjmë këtë në katër vitet e mbetura të kontratës sime. Sezonin e kaluar e mbyllëm kampionatin 22 pikë pas Çelsit, megjithatë arritëm të fitonim Ligën e Kampioneve. Shpresoj që këtë vit të arrijmë t'i fitojmë të dyja." Xherrardi deklaroi se nuk ishte penduar për vendimin e marrë dhe u shpreh i gatshëm të jepte maksimumin e tij për ekipin e Liverpulit. Mesfushori anglez refuzoi për herë të dytë brenda 12 muajve, ofertën e ekipit të Çelsit, i cili ofroi 45 milionë euro për shërbimet e 24-vjeçarit.
"Mendoj se kam bërë zgjedhjen e duhur. Nuk kam nevojë të them se sa të vështirë e pata të vendosja, pasi për këtë mjafton të lexosh gazetat dhe revistat e ditëve të fundit. Këtu ndihem mirë. Më pëlqen të luaj futboll, por nuk më pëlqejnë situatat e komplikuara. E gjithë kjo puna e kontratës më ka stresuar shumë. Kam dëshirë t'i harroj të gjitha dhe të rifilloj të luaj për ekipin e Liverpulit." - deklaroi Xherrardi. Mesfushori anglez pohoi se bisedimet për të rinovuar kontratën pas fitimit të Ligës së Kampioneve, patën dështuar fillimisht dhe për këtë mbanin përgjegjësi edhe drejtuesit e klubit të Liverpulit. "Unë kisha edhe dy vite të tjera në kontratë, por drejtuesit donin të përshpejtonin procedurat për rinovimin e saj, pasi i trembeshin largimit tim. Pas fitimit të Ligës së Kampioneve u shpreha qartë që dëshiroja të qëndroja tek ekipi i Liverpulit, megjithatë... Tani kontrata është e firmosur dhe nuk ka asnjë klauzolë që mund të më largojë nga "Anfield Road". Shpresoj që kjo situatë të mos përsëritet më në karrierën time. Dua vetëm të përqendrohem te futbolli dhe të fitoj sa më shumë trofe me këtë klub", - përfundoi Xherrardi, i cili me ekipin e Liverpulit ka arritur të fitojë një Kupë UEFA, dy Kupa Anglie dhe një Ligë Kampionesh.

[viganv]

Premier Liga

Runi: Nuk ka rëndësi se ku luaj



Uejn Runi është i kënaqur që luan në pozicione të ndryshme te Mançester Junaitid dhe nuk e ka problem nëse një gjë e tillë do të ndodhë edhe në sezonin e ri. Ai bëri një paraqitje shumë të mirë në sezonin debutues me fanellën e "Djajve të kuq", kur shënoi 17 gola që nga koha që la ekipin e Evertonit. Ai u përdor nga trajneri në pozicione të ndryshme, madje për tre muaj mbuloi sulmin, pasi mungonte Rud Van Nistëlroi. Pas rikthimit të holandezit, Runi kaloi në krahun e majtë, gjithsesi ai e tregoi edhe në atë pozicion talentin e tij, pa pasur problem. "Unë luajta disa herë në krahun e majtë për Mançesterin dhe nuk kisha problem se ku luaja, - tha ai. - Nëse luan në pozicione të ndryshme, madje jo në pozicion tënd ideal, nuk ka problem, pasi mëson shumë gjëra të tjera, të cilat të rrisin cilësitë si lojtar. Kjo gjë ndodhi me mua, pasi kur luaja në krahun e majtë, u bëra një lojtar i shpejtë dhe lëvizja shumë në fushë, duke mos ndjerë asnjëherë lodhje." Pasi Mançesteri dështoi për të fituar ndonjë kupë në sezonin e kaluar, ai u shpreh që do ta ndihmonte me sa mundej ekipin e tij, që të arrinte sa më shumë sukses në sezonin e ri. Sulmuesi i kombëtares angleze është një figurë e rëndësishme në fushatën e "Djajve të kuq" për sezonin e ri dhe ka paralajmëruar kundërshtarët e tij se do të jetë akoma më i mirë në sezonin që vjen. "Të punosh me trajnerin dhe lojtarët e Mançesterit, është diçka e mrekullueshme. Kjo gjë më ndihmoi që të kem një formë shumë të mirë, - tha ai. - Unë jam akoma i ri dhe duhet të mësoj sa më shumë nga shokët e mi të ekipit ose lojtarët që më rrethojnë. Unë jam duke mësuar shumë dhe mendoj se në sezonin tjetër do të jem shumë në formë. Ishte fati im që kalova në një ekip të tillë dhe tani dua t'ia shpërblej sa më shumë interesin e treguar ndaj meje Mançesterit," - përfundoi Runi. Djaloshi anglez, i cili shpërtheu në Europianin e vitit 2004, edhe pse ishte vetëm 17 vjeç, është cilësuar si e ardhmja e futbollit anglez. Mançesteri e bleu lojtarin nga ekipi i Evertonit, duke paguar një shumë të majme, gjithsesi talenti anglez po tregon se është i aftë ta justifikojë shumën e paguar.

[viganv]

Premier Liga

Totenhem-Everton, lufta për Gutin


Totenhemi dhe Evertoni po rivalizojnë njëri-tjetrin në luftën për blerjen e mesfushorit të Realit të Madridit, Guti. 28-vjeçari, i cili ka edhe tre vjet kontratë me ekipin madrilen, është duke menduar për të ardhmen, pasi kërkon që të luajë rregullisht në këtë periudhë të karrierës. Reali mund të heqë dorë nga shërbimet e lojtarit, duke qenë se trajneri Vanderlei Luksemburgo ka thënë që lojtarët e pakënaqur mund të ikin nga ekipi. Guti ka deklaruar se nëse do të largohej nga Reali, do të shkonte për të luajtur në Angli. Trajneri i Evertonit, Devid Mojes, po kërkon një mesfushor për ekipin e tij dhe pasi humbi luftën ndaj Liverpulit për mesfushorin Sisoko, mendon se alternativa më e mirë do të ishte Guti. Evertoni po mundohet që të bëjë një paraqitje sa më të mirë në Ligën e Kampioneve këtë vit. Ndërsa ekipi i Totenhemit po kërkon të bëjë blerje sa më cilësore dhe të ndërtojë një ekip rivalizues për sezonin e ri. Guti është lojtari i duhur për mesfushën e tyre. Menaxheri i lojtarit, Zoran Vekiç, pasi konfirmoi interesimin e dy klubeve angleze për të, deklaroi që Guti nuk e ka vendosur akoma nëse do të largohet apo jo nga Reali i Madridit. "Ky është një vendim delikat për lojtarin, pasi i duhet të ikë nga shtëpia e tij," - tha Vekiçi.

[viganv]

Premier Liga

Liverpuli, kontratë të re për Hipian



Liverpuli ka deklaruar që po përgatitet t'i ofrojë një kontratë të re mbrojtësit Sami Hipia. Hipia ka qenë një pjesë e rëndësishme e ekipit në suksesin e Ligës së Kampioneve, kështu që vazhdon të jetë i rëndësishëm për ekipin. Finlandezi mund të luajë shumë mirë me Xhemi Karragerin në mbrojtje dhe kjo mund të jetë edhe një arsye që klubi kërkon shërbimet e tij. Shefi ekzekutiv i klubit anglez, Rik Perri, tha: "Ne po bisedojmë me lojtarin dhe kërkojmë që ai të vazhdojë të jetë pjesë e klubit tonë. Ne e dimë që mosha nuk e lejon të luajë 50 ndeshje në sezon, por eksperienca e tij është tepër e rëndësishme."