Gazeta Elektronike: "Futbolli Ndërkombtar" (Nr.3)

[viganv]

Premier Liga

Zenden firmos për Liverpulin



Mesfushori holandez Budevin Zenden do të veshë fanelën e Liverpulit në sezonin e ardhshëm. Pas përfundimit të kontratës së tij me ekipin e Midëllsboros, Zenden ka arritur një marrëveshje me ekipin kampion të Europës. 28-vjeçari i kombëtares së Holandës të hënën do të kryejë vizitat mjekësore dhe do të prezantohet në "Anfield Road". Zendez zhvilloi një sezon të suksesshëm me ekipin e Midëllsboros, pasi u dha në formë huaje nga ekipi i Çelsit. Zëdhënësi për shtyp i ekipit të Liverpulit, Ian Koton, tha: "Zenden do të luajë te Liverpuli në sezonin e ardhshëm. Kemi arritur një marrëveshje me lojtarin dhe të hënën do të firmoset kontrata e tij. Më pas do të zhvillojmë një konferencë për shtyp, ku do të sqarohen edhe detajet e kontratës së tij". Zenden do të jetë i gatshëm të luajë për Liverpulin në ndeshjet e turit të tretë të Ligës së Kampioneve.
Xherrard-Liverpul, asgjë e vendosur
Bisedimet mbi rinovimin e kontratës së Stiven Xherrardit nuk po japin rezultatet e pritura nga tifozët e Liverpulit. Gjatë ditëve të fundit është folur përsëri për një kalim të mundshëm drejt Realit të Madridit, dhe mesfushori i kombëtares së Anglisë nuk e ka mohuar këtë fakt. Suksesi në Ligën e Kampioneve dukej sikur ia kishte mbushur mendjen Xherrardit të qëndronte në "Anfield Road", por, sipas gazetës "The Sun", lojtari nuk ka mbetur i kënaqur nga ofertat e drejtuesve të Liverpulit. Tashmë drejtuesit anglezë i tremben konkurrencës së Realit, i cili është i gatshëm t'i ofrojë lojtarit një pagë javore prej 150 000 paundësh, ndërsa Liverpuli do të përfitonte 20 milionë paund dhe shërbimet e mbrojtësit Valter Samuel. Benitezi e cilësoi këtë ofertë si "të papranueshme", por pas zhvillimeve të fundit drejtuesit e Liverpulit po fillojnë seriozisht të mendojnë për shitjen e mesfushorit anglez.

[viganv]

Premiera Division

K.Ronaldo: Nuk iki nga "Old Traford"



Mesfushori portugez i ekipit të Mançesterit, Kristiano Ronaldo, është pranë rinovimit të kontratës e tij në "Old Traford". Asi portugez ka zhvilluar një sezon të jashtëzakonshëm, megjithëse ekipi i Mançesterit nuk arriti të fitonte asnjë trofe. Ronaldo, i cili erdhi në "Old Traford" dy vite më parë nga ekipi i Sportingut të Lisbonës, është pranë firmosjes së një kontrate katërvjeçare me ekipin anglez. Në fund të sezonit të kaluar, Ronaldo u përfol për një kalim të mundshëm drejt Barcelonës ose Realit të Madridit, por Ronaldoi pohoi se ndihej i lumtur tek ekipi i Mançesterit: "Kemi diskutuar për disa çështje të rëndësishme dhe besoj se do ta rinovoj kontratën time me Mançester Junajtidin. Bisedimet po shkojnë shumë mirë dhe së shpejti do të firmos kontratën time të re. Menaxheri im, Horge Mendes, po merret me procedurat e fundit dhe unë besoj se do të ketë një fund të lumtur. Në kontratën time aktuale kam akoma dy vjet. Propozimi i klubit është që ta rinovoj këtë kontratë edhe për tri vite të tjera. Jam i lumtur te Mançesteri dhe ky është klubi ku unë dua të luaj në të ardhmen. Eshtë e vështirë të flas për një kontratë deri në përfundim të karrierës, pasi në të ardhmen gjërat mund të ndryshojnë". Ndërkohë, dy sulmues të Mançesterit mund të largohen këtë verë nga "Old Traford". Alan Smith është vënë nën shënjestrën e ekipit të Njukasëllit, ndërsa Luis Saha kërkohet nga ekipi i Evertonit. Njukasëlli ka ofruar 7 milionë paund për Smithin, i cili mund të luajë përkrah Alan Shirerit. Trajneri i Njukasëllit, Grim Sounes, është vënë në kërkim të një sulmuesi, pas largimit të mundshëm të Kreig Belamisë. Sounesi është një nga admiruesit e sulmuesit anglez dhe ka shprehur disa herë dëshirën e tij për ta pasur në ekip. Evertoni, i cili do të marrë pjesë në edicionin e ardhshëm të Ligës së Kampioneve, kërkon të përforcojë ekipin duke sjellë Luis Sahën, i cili është shprehur i pakënaqur nga qëndrimi i gjatë në stolin e Mançesterit.

[viganv]

Serie A

Torino, 34 milion euro për regjistrimin në A


Në qendër të hetimeve të Guardia si Financa-s dhe prokurorisë së Torinos ndaj klubit të kuqërremtë është në mes një mashtrim prej 18 milionë e 700 mijë eurosh, të paraqitura nga padroni Çimineli për agjencinë e hyrjeve, e cila më pas ka dalë e rreme. Për atë dokument, pronari i Torinos ka paguar 1 milion e 700 mijë euro. Çimineli ka thënë se e ka dorëzuar atë shumë, dhe ka paraqitur më pas një akuzë kundër njeriut që i ka shitur "dosjet". Një mashtrim i vërtetë që tani rrezikon t'i kushtojë Torinos qëndrimin në A.
Tani, sipas llogarive të para, për të bërë të mundur regjistrimin, klubi torinez duhet të gjejë brenda 10 ditësh 34 milionë euro, një arritje jo dhe aq e lehtë.

[viganv]

Serie A


Parma ul çmimin për Xhilardinon


Alberto Xhilardino dhe Milani afrohen. Parma e ka ulur çmimin e kërkesës për lojtarin, nga 35 milionë në 30 milionë euro, dhe tani bisedimet mund të vazhdojnë. Kuqezinjtë në takimin e fundit me Baraldin (që më pas dha dorëheqjen nga klubi dukal si administrator i deleguar) ishin të gatshëm të shpenzonin 25 milionë euro, ndaj diferenca është e dukshme dhe marrëveshja gjithnjë e më e mundur. Situata mund të zhbllokohet javën e ardhshme.

[viganv]

Primera Division

Roma, tani "humbet" edhe blerjet


Një "vrasje" e vërtetë. Kështu mund të konsiderohet procesi i FIFA-s ndaj Romës me bllokimin për dy seksione të merkatës të çështjeve në "hyrje". Tri blerjet e bëra nga klubi verdhekuq para pak javësh, të gjithë të ardhur me çmimin zero, Kufur, Tadei dhe Nonda, nuk janë të federuar. Lojtarët tani nuk mund të shkojnë në skuadra të tjera (duke parë që kontratat janë të pezulluara, jo të anuluara), por, nga ana tjetër, nuk mund të zbresin në fushë as me skuadrën verdhekuqe. Ka thuajse 24 orë që Roma ka apeluar vendimin e FIFA-s në gjykatën sportive ndërkombëtare. Gjithçka ka të bëjë me çështjen "Mekses", që u mor vjet në Okseri, pa u bazuar në parametrat dhe rregulloren e FIFA-s. Kështu, Romës mund t'i mohohen shumë çështje shit-blerjeje. Tani edhe blerjet konsiderohen "të zhdukura". Rodrigo Tadei, Sami Kufur dhe Shabani Nonda janë ende në "ajër", por klubi roman tani ka reaguar. Lëvizja e parë është apelimi në Gjykatën Ndërkombëtare në Lozanë, e cila është nisur drejt Zvicrës. Drejtuesit besojnë se do t'i marrin lajmet e para rreth datës 10 korrik, me shpresën për të parë merkatën e zhbllokuar dhe për të mundur të plotësojnë organikën në prag të fillimit të grumbullimit për fazën përgatitore të sezonit të ardhshëm, që nis më 17 korrik në Romë. Kërkesa e parë është mbajtja pezull e çështjes, në mënyrë që krerët e merkatës verdhekuqe të mund t'i vazhdojnë blerjet në pritje të apelit që duhet të diskutohet brenda gjysmës së gushtit. Në mjediset e Trigorias janë optimistë në lëvizjen e parë, ndërsa është shumë më e vështirë të pranohet (të paktën plotësisht) apelimi. Duket praktikisht e pamundur që pezullimi të shndërrohet në një gjobë, siç duket thuajse e mundur reduktimi i dënimit vetëm për një seksion të merkatës, ndoshta atë të dimrit 2006. Në këtë mënyrë, klubi i Sensit mund ta ndërtojë skuadrën për sezonin e ardhshëm pa probleme, por duke mos mundur ta përforcojë atë në janar ose në merkatën e riparimit; një zgjidhje që duhet të jetë gjithsesi pozitive.

[viganv]

Primera Division







Montela i thotë "jo" Shtutgardit


Lojtari është pëlqyer nga Trapatoni, Roma nga oferta e Shtutgardit. Por Vinçenco Montela do të vazhdojë të veshë fanelën verdhekuqe. Trapatoni donte ta merrte me vete në Gjermani, dhe klubi gjerman e vlerësoi kërkesën e trajnerit të ri, duke dërguar një ofertë në Trigoria. Para se të përgjigjej klubi (që gjithsesi ka shpenzuar shumë për sulmuesin, duke e konsideruar një nga pikat e referimit të projektit), ka menduar "aeroplani" që ka thënë: "Faleminderit, por do të qëndroj këtu!". Për Montelën, që pikërisht këtë vit e ka rinovuar kontratën me Romën deri më 2010-ën, qëndrimi në kryeqytet është një zgjedhje jete. Kërkon ta mbyllë karrierën në Romë, duke e mbajtur veshur fanelën verdhekuqe deri në moshën 36-vjeçare.

[viganv]

Serie A

Toti: Merkato? Nuk di gjë, nuk flas


Rikthim i hidhur për Françesko Totin, i kthyer nga muaji i mjaltit me Ilari Blazin. Kapiteni verdhekuq, që sapo ka rinovuar kontratën me Romën, ishte nisur i sigurtë për të gjetur pas kthimit një Romë të fortë. Por tani klubi i Sensit vuan dënimin e FIFA-s që bllokoi merkatën për çështjen "Mekses". Pas rikthimit nga Majami dhe Karaibet, lojtari që u prit në aeroportin e Fiumiçinos nga i vëllai dhe mbesa ishte pak i qartë: "Nuk di asgjë, nuk flas," - tha kapiteni, duke iu referuar bllokimin të merkatës verdhekuqe.

[viganv]

Serie A

Milan, shumë mesfushorë për tre mbrojtës


Tre "mure" para portierit Dida
Maldini - 36 vjeç, 33 ndeshje në kampionat, 13 në Champions këtë sezon
Stam - 32 vjeç, 17 ndeshje në Serinë A, 7 në Champions
Nesta - 29 vjeç, 29 ndeshje në kampionat dhe 12 në Champions

Duke e konsideruar që edhe familjet më të mëdha dinë të hapen kur bëhet fjalë për modernizëm, nuk është një çudi që Silvio Berluskoni ka vendosur një pjesë në stemën e Milanit, duke "urdhëruar" për çdo trajner të tij një mbrojtje me katër lojtarë. "Katër mbrojtës dhe dy sulmues do t'i vendosim në markën tonë", - ritheksonte në fillim të sezonit që shkoi Adriano Galiani, pasi i kishte dhuruar Ançelotit edhe Jap Stamin. Nesta, Maldini dhe Stam, pra "trioja" e qendërmbrojtësve, ndoshta më të mirët në botë, të përbërë nga lojtarë që gjenden gjithnjë në krye të listës së më të famshmëve në këtë repart. Me një "park" të tillë duket mundim këmbëngulja me një mbrojtje me katër lojtarë.
Në kampionatin që është mbyllur Ançeloti më shumë se një herë e ka ndryshuar skemën e mbrojtjes së tij gjatë lojës. Por tani, me këtë treshe të sigurtë dhe me përfshirjen e padronit, gjithnjë i gatshëm të diskutojë skemat taktike, trajneri kuqezi mund të projektojë një Milan të mirë për të luajtur me modulin 3-4-1-2 që nga minuta e parë, duke shfrytëzuar më së miri karakteristikat e blerjes së fundit Marej Jankulovski. Në të vërtetë, Ançeloti trajner, që i është përmbajtur përvojës së tij që nga fillimi i karrierës, edhe pse mbetet në shumë drejtime një "sakian ortodoks", nuk e dëshiron mbrojtjen me tre lojtarë, që e konsideron një boshllëk të dukshëm në fazën mbrojtëse. "Me një mbrojtje me tre lojtarë zbulohesh më shumë duke parë punën që janë të detyruar të bëjnë dy anësorët," - pati thënë Ançeloti. Fillojmë nga anësorët, që përfaqësojnë forcën e këtij moduli. Katu zakonisht luan i tërhequr në shumë ndeshje, siç e di mirë Gatuzo, dhe tre mbrojtësit. Në skemën 3-4-1-2 do kishte më shumë hapësirë lëvizjeje, sikundër do të ndodhte edhe me Masimo Odon, me të cilin Milani mund të synojë të rinojë "parkun" e mbrojtësve. Do t'i takonte atij ose brazilianit të shtynte në krahun e djathtë, ndërsa në krahun e majtë duket se ka shumë mundësi zgjedhjeje, pavarësisht nga largimi i Kalaxes (ndoshta), që nuk është i përshtatshëm të sulmojë. Në të majtë mund të përdoret edhe Serzhinjoja. Pikërisht në këtë krah Jankulovski mund të hyjë në konkurrencë me Sedorfin, që prej kohësh është mësuar të luajë si anësor, edhe pse parapëlqen të zbresë në qendër të fushës. Skema e re nuk favorizon, sigurisht listën e mesfushorëve qendrorë, që Milani i ka të gatshëm: Ambrozini, Rui Kosta, Vogel, Doraso. Njëri mes tyre është i tepërt, por nuk do të jetë e lehtë për Milanin të privohet ndaj tyre, dhe nuk do të jetë e lehtë të gjendet edhe një zgjidhje në merkato. "Nëse asnjë nuk niset, asnjë nuk vjen," - pati thënë javën e shkuar drejtori i përgjithshëm Ariedo Braida. Por Rui Kosta është konsideruar i pashitshëm. "Ai nuk do të largohet dhe ne duam ta mbajmë ende", - tha Braida. Përpjekjet e shumta, të bëra nga Panathinaikosi dhe Gallatasaraj për numrin 10 portugez, janë refuzuar me kortezi nga drejtuesit milanistë, sepse Rui Kosta do të qëndrojë ende si zëvendës i Pirlos. Nuk është ende i qartë roli i Johan Vogelit. Dikush e cilëson si zëvendës të Pirlos, por zviceriani, pavarësisht nga krahasimi që iu bë me Krujfin, luan në linjë horizontale dhe nuk është lojtar pasimesh të gjata, ndaj maksimumi mund të zëvendësojë Gatuzon apo Ambrozinin. Pikërisht ky i fundit duket më i sakrifikuari, me një modul të mundshëm 3-4-1-2. Por edhe sikur ky modul të përdoret në një numër të kufizuar rastesh, vendi i tij s'është i sigurtë në formacion.

[viganv]

Serie A

Mikoli: Ndihem i tradhëtuar nga Korvino


Fabricio Mikoli ndihet i tradhëtuar. Fiorentina e humbi përmes zarfëve, duke vendosur të mos shpenzojë miliona të tjerë për të kërkuar të zgjidhë në favorin e vet bshkëpronësinë me Juven. Dhe tani, fati i sulmuesit kryqëzohet sërish me atë të klubit bardhezi: "Probleme nuk ka dhe falënderoj Moxhin, - tha Mikoli. - Nëse kanë shpenzuar aq milionë, do të thotë se besojnë tek unë. Në Leçe thonë se jam "djali" i Korvinos, por që të martën i kam mbyllur përfundimisht marrëdhëniet me të. Më telefonoi dhe më tha: "Fabricio, nuk patëm fat". E pabesueshme. Konfirmoj që është një tragjedi rikthimi në Torino, por Juvja nuk ka të bëjë. I referohesha familjes sime, që i ndjen ndryshimet e vazhdueshme të qyteteve". Në Firence, Mikoli lë shumë miq: "Nëse zgjedhja do të varej nga unë, nuk do të largohesha asnjëherë. Jam naiv, jo budalla: afruan 1 milionë e gjysmë euro, kjo do të thotë se vjollcët nuk besonin tek unë. S'mund të thoshin dot, i paguaja unë ato para. Roma? Eshtë një qytet i jashtëzakonshëm. Të luash me Totin do të ishte fantastike, por është shpejt. Të shohim".

[viganv]

Premier Liga

Renditja e Iffhs-së, Interi ruan kryesimin



Interi mbetet në krye të renditjes së Iffhs-së, Federata Ndërkombëtare e Historisë dhe Statistikës së Futbollit. Zikaltrit kanë fituar pikë nga fitorja e Kupës së Italisë ndaj Romës. Menjëherë pas zikaltërve vinte Milani. Në vendin e tretë Cska-ja e Moskës. Juventusi vetëm në vendin e dhjetë.