Gazeta Elektronike: "Futbolli Ndërkombtar" (Nr.3)

[viganv]

Primera Division

P.Garsia dhe Diogo, te Reali



Reali i Madridit ka marrë dy futbollistët e kombëtares uruguajane, Pablo Garisa dhe Karlos Diogo, duke shënuar kështu blerjet e para në këtë sezon të merkatos. Garsian e mori nga Osasuna, ndërsa bashkatdhetarin e tij, Diogo, nga River Plejti. Nuk janë bërë ende të ditur paratë që do të përfitojnë dy klubet që kanë pasur pronësinë e futbollistëve, por drejtuesit e Realit kanë konfirmuar se Pablo Garsia ka firmosur një kontratë katërvjeçare, ndërkohë Diogo është lidhur me "merengesët" për pesë vitet e ardhshme. Për agjencinë e lajmeve spanjolle EFE, Garsia e komentoi kështu këtë kalim të tijin te Reali: "Eshtë ëndrra e çdo futbollisti të luajë për Realin dhe tani që e realizova këtë ëndërr, nuk ka si të mos jem i lumtur." Garsia është një mesfushor me tipare mbrojtëse dhe sezonin e kaluar tek Osasuna ka marrë 19 kartona të verdhë, më shumë se kushdo tjetër në Primera Divizion. Uruguajani konsiderohet si zëvendësuesi i Gravesenit dhe ka kaluar në Spanjë në vitin 2002, pas dy sezoneve me Venecian dhe Milanin. Zv.presidenti i Realit të Madridit, Emilio Butragenjo, tha për Garsian: "Pablo është një futbollist me eksperiencë dhe mjaft i aftë taktikisht."
Diogo, 21-vjeçar, ka firmosur për Realin menjëherë sa skuadra e tij, River Plejt, u eliminua në gjysmëfinalet e Kupës Libertadores nga Sao Paolo. Për të, Butragenjo tha: "Eshtë një futbollist i ri me të ardhmen e garantuar. Eshtë një futbollist i aftë jo vetëm teknikisht, por edhe psikologjikisht." Kështu, Reali ka bërë dy blerjet për merkaton 2005 dhe mbetet gjithmonë në pritje për të marrë nga Santosi të sulmuesin 20-vjeçar Robinjo

[viganv]

Primera Division



Braziliani Edu sulmon Vengerin


Edu, i cili një muaj më parë kaloi nga Valencia tek Arsenali, ka sulmuar edhe një herë ish-trajnerin e tij, Arsen Venger. Braziliani 27-vjeçar tha: "Në sezonin e kaluar nuk isha në lartësinë e duhur, sepse nuk aktiviziohesha shpesh. Një futbollist e ka të vështirë të luajë në nivele të larta kur zbret rrallëherë në fushë. Vengeri nuk më aktizionte, sepse unë refuzova ta rinovoja kontratën me Arsenalin."

Espanjoli shënjestron Saviolën


Espanjoli kërkon të marrë shërbimet e sulmuesit argjentinas Havier Saviola, nga skuadra rivale e të njëjtit qytet, Barcelona. Saviola nuk e ka të sigurtë të ardhmen në "Kamp Nou" dhe drejtuesi i Espanjolit, Sebastian Havier, tha në lidhje me të ardhmen e sulmuesit që sezonin e kaluar luajti te Monako: "Besojmë tek aftësitë e Saviolës dhe jemi të bindur së bashku me Tamudon se do të formojnë një dyshe sulmuese për t'u pasur zili."

[viganv]

Primera Division

Maksi Rodrigez tek Atletiko


Lajmi që qarkullonte prej kohësh, ka marrë formë të prerë. Mesfushori argjentinas, Maksi Rodrigez, do të kalojë nga Espanjoli tek Atletiko e Madridit, kundrejt pesë milionë eurove. Futbollisti u kthye vetëm dje nga Kupa e Konfederatave dhe pritet që sot të jetë në Madrid për vizitat mjekësore dhe për të hedhur firmën në një kontratë trivjeçare me skuadrën e drejtuar nga Karlos Bianki.

Saragoza kërkon K.Lopezin


Saragoza vazhdon të jetë në kërkim të një sulmuesi, pas shitjes së David Vilës te Valencia. Drejtuesit e klubit spanjoll kanë lënë pezull bisedimet me Birmingemin për të marrë Valter Pandianin, pasi duken të tërhequr nga argjentinasi Klaudio Lopez. Drejtuesit e Saragozës janë gati t'i japin pesë milionë dollarë klubit meksikan "Klub Amerika", në të cilën po luan aktualisht ish-sulmuesi i Lacios dhe Valencias.

Kezhman: Forlan, shembulli im


Sulmuesi serb, Mateja Kezhman, ka deklaruar se synon të imitojë ecurinë e Diego Forlanit, i cili sezonin e kaluar shënoi 25 gola me fanellën e Vilarealit: "Dua të shënoj 25 gola. Mendoj se kjo shifër është optimale për një sulmues në çdo kampionat. Shembulli më i mirë për këtë është Forlani. Ashtu si unë, edhe uruguajani nuk shpërtheu në Premier Ligë, por e gjeti veten në Spanjë. Ecuria e tij është për t'u marrë si shembull."

[viganv]

Liga 1

Lioni, në gjurmët e Drogbasë dhe Baroshit


Presidenti i ekipit të Lionit, Zhan Aulas, deklaroi se blerjet e ardhshme të ekipit, mund të vijnë pikërisht nga Premier Liga. Sulmuesi i Çelsit, Didië Drogba, mund të përfshihet në tratativat për blerjen e mesfushorit Mikael Esien. "Eshtë e vërtetë që Çelsi ka shprehur interes për Esienin, por unë shpresoj që ai të qëndrojë edhe për një vit, ndërsa për Baroshin nuk kemi bërë akoma asnjë ofertë, megjithatë shpresojmë që ai të veshë fanellën tonë në sezonin e ardhshëm", - deklaroi Aulasi.


Lioni, basti i karrierës për Hulierin



Xherrard Hulier është rikthyer në arenën futbollistike si trajneri i Lionit, ekipit kampion të Francës. Hulieri, i cili mori postin e trajnerit të Lionit para disa ditësh, është duke ndjekur një kurs edukativ për trajnerë, të organizuar nga UEFA. Që pas largimit të tij nga ekipi i Liverpulit, Hulieri punonte në një televizion sportiv në Angli, por përkushtimi ndaj futbollit ishte shumë i fortë për të qëndruar larg fushave për një kohë të gjatë. Hulieri e pranoi menjëherë ofertën e Lionit, i cili e ka lënë firmën e tij në edicionin e kaluar të Ligës së Kampioneve. Ish-trajneri i Liverpulit u shpreh i kënaqur për suksesin e arritur nga ish-ekipi i tij, i cili arriti të fitonte në finalen e Stambollit ndaj Milanit. "Pasioni dhe entuziazmi për futbollin nuk më lejuan të qëndroja gjatë jashtë fushave të blerta. Lioni është klub i madh dhe është e rrallë që një klub të arrijë të luajë gjshtë vjet radhazi në Ligën e Kampioneve. Lioni ka në përbërje shumë lojtarë të talentuar, të cilët po përmirësohen çdo ditë, - deklaroi Hulieri, i cili në vitin 1986 arriti të fitonte kampionatin francez me ekipin e Paris Sen Zhermeinit. - Natyrisht, te Lioni kemi si qëllim fitimin e titullit të pestë radhazi, i cili do të ishte një rekord në kampionatin francez. Mendoj se është një sfidë e vështirë, por ekipi i ka cilësitë për ta arritur këtë. Ata janë të gjithë profesionistë të afirmuar dhe do jepnin gjithçka për këtë klub. Gjithashtu, dëshirojmë të kemi sukses edhe në Ligën e Kampioneve. Ata e dinë se ku ndodhen, dinë se ku duan të shkojnë dhe duan t'ia arrijnë qëllimit. Tashmë shpresoj të jem unë ai që do t'i shoqëroj drejt suksesit," - përfundoi Hulieri. Trajneri francez falenderoi edhe tifozët e Liverpulit për përkrahjen gjatë viteve të kaluara në "Anfield Road": "Me Liverpulin kam kaluar momente të paharrueshme. Në vitin 2001 arritëm të fitonim disa trofe, përfshi Kupën UEFA dhe Kupën e Anglisë." Gjithashtu, Hulieri nuk la pa përmendur meritat e pasardhësit të tij, Rafa Benitezit, i cili arriti ta fitonte Championsin në vitin e parë në "Anfield Road". "Ai është një trajner i suksesshëm, dhe këtë e ka treguar edhe në Spanjë. Me Benitezin në krye, Liverpuli do të ketë një të ardhme të lavdishme". Pas përfundimit të ndeshjes në Stamboll, Hulierit iu lejua të vizitonte dhomat e zhveshjes, për të përgëzuar ish- lojtarët e tij: "Pata një pritje të jashtëzakonshme, kur hyra në dhomat e Liverpulit. Isha shumë i lumtur për lojtarët dhe për drejtuesit e klubit, pasi ata janë të gjithë miqtë e mi. Nuk mund të kalosh gjashtë vjet dhe të ikësh pa përshëndetur. Unë jam tifozi numër një i Liverpulit, dhe ata e dinë këtë. Nëntë lojtarë të Liverpulit kanë qenë nën drejtimin tim për disa vite dhe gëzimi i tyre ishte edhe i imi. Jam i kënaqur, pasi më 2004-n arritëm ta përfundonim kampionatin në vend të katërt. Finalja e Stambollit ishte një ndeshje e veçant;. Vetëm futbolli mund të të dhurojë emocione të tilla," - përfundoi Hulieri.

[viganv]

Liga 1

Marseja fillon ndërtimin e skuadrës



Marseja këmbëngul për të mbajtur shërbimet e mesfushorit Benoit Pedreti, por ka konfirmuar se aventurës së Stiv Marletit në "Velodrom" i ka ardhur fundi. Pedreti është një nga futbollistët që Xherrard Hulier kërkon ta ketë sezonin e ardhshëm te Lioni. Vetë futbollisti, ditë më parë u shpreh se do të ishte i lumtur të luante për kampionët në fuqi. Gjithsesi, presidenti i Olimpikut, Pape Diuf, premtoi se do të bënte të pamundurën për ta mbajtur edhe një vit në skuadër Pedretin, i cili është grumbulluar edhe në kombëtaren franceze nga trajneri Domenek. "Pedreti është një futbollist i rëndësishëm për ne, - tha Diuf -. Jo më kot e kemi marrë 6 milionë euro. Jam gati të ulem në bisedime me të dhe të plotësoj kërkesat e futbollistit." Ndërkohë, Diuf pranon largimin e Marletit: "Ai është një futbollist i Fulhamit. Do të kishim dëshirë ta mbanin edhe për një sezon, por klubi britanik e ka të drejtën të vendosë për të ardhmen e tij." Marseja ka piketuar edhe obiektivin e saj në merkato. Bëhet fjalë për sulmuesin e Strasburgut Niang. Ky i fundit ka deklaruar se është i gatshëm të largohet nga Strasburgu, por për të marrë shërbimet e tij, presidenti Diuf duhet ta mposhtë konkurrencën e Arsenalit dhe Evertonit. Ndërkohë, javën e ardhshme do të bëhet i ditur edhe emri i trajnerit që do ta drejtojë Marsejën sezonin e ardhshëm, pas largimit të Filië Truziesë. Kantidati kryesor për këtë post është trajneri aktual i Metzit Zhan Fernandez.

[viganv]

Liga 1

Zyrtare, Zherard dhe Moulida te Monako



Monako ka zyrtarizuar dy blerjet e para për sezonin e ardhshëm futbollistik. Skuadra e Deshampit ka marrë shërbimet e mesfushorit të Barcelonës, Zherard, dhe të sulmuesit të Rënesë, Moulida. Zherardi ka kryer dje kontrollin mjekësor dhe ka firmosur një kontratë katërvjeçare me drejtuesit e Principatës. I kushtëzuar nga dëmtimet, Zherardi nuk ka arritur asnjëherë te Barcelona formën që ka pasur tre katër vjet më parë te Valencia e Kuperit. Skuadër me të cilën u bë i famshëm në të gjithë botën. Zherardi fillon kështu një aventurë të re në Ligën 1. Ndërkohë, futbollisti i dytë i blerë nga Monako, Toifiloi Moulida, menjëherë pas firmosjes së kontratës katërvjeçare, tha: "Jam shumë i lumtur që vitin e ardhshëm do të luaj me Monakon. Do të jem në një nga skuadrat më të forta të Francës dhe do të punoj me Deshampin, trajner të cilin e kam pasur idhull si futbollist." Sulmuesi 25-vjeçar me Rënenë në sezonin që sapo u mbyll, shënoi shtatë gola në 31 ndeshje

[viganv]

Liga 1

Santini, trajneri i ri i Okserit



Ish-trajneri i kombëtares franceze, Zhak Santini, është trajneri i ri i ekipit të Okserit. Santini do të zëvendësojë trajnerin e larguar Gi Ru, i cili u tërhoq në moshën 66-vjeçare, pasi drejtoi ekipin e tij drejt fitimit të Kupës së Francës. "Santini pranoi ofertën tonë dhe ne jemi të kënaqur që ai do të drejtojë ekipin në dy vitet e ardhshme", - deklaroi presidenti i Okserit, Zherard Burguan. "Jam i lumtur dhe ndihem krenar që do të zëvendësoj Gi Runë, i cili është një legjendë e vërtetë e futbollit francez", - deklaroi Santini. Në karrierën e tij si futbollist, Santini ka arritur të fitojë katër tituj kampion dhe dy kupa me ekipin e St.Etienit. Si Trajner, ai ka drejtuar ekipet e Tuluzës, Lilës, Soshosë dhe Lionit. Në vitin 2000, Santini e drejtoi Lionin drejt titullit të parë kampion, përpara se të kalonte në drejtimin e kombëtares franceze. Me Francën, Santini arriti të shpallej kampion i Europës, në vitin 2000, përpara se të largohej pas humbjes në çerekfinalet e Euro 2004-s, ndaj Greqisë.

[viganv]

Liga 1

Lioni: Nuk ka largime nga skuadra



Ekipi i Lionit ka pohuar se nuk ka ndër mend të shesë asnjë nga lojtarët titullarë në sezonin e ardhshëm. Presidenti i ekipit kampion të Francës, Zhan-Mishel Aulas, ka konfirmuar lojtarët, Esien, Diara dhe Zhuninjo, për sezonin e ardhshëm. "Objektivi ynë i parë për sezonin e ardhshëm është të mbajmë të gjithë lojtarët titullarë në ekip. Jemi pranë marrëveshjes me brazilianin Zhuninjo dhe Diarra firmosi një kontratë 2-vjeçare. Esien? Kemi arritur një marrëveshje me menaxherin e lojtarit dhe tani presim konfirmimin nga vetë lojtari", - deklaroi Aulasi. Deklarata e presidentit të Lionit i ka shuar shpresat e shumë klubeve europiane si Reali, Mançesteri, Çelsi, Arsenali, Milani, Interi dhe Juventusi, të cilët e kërkonin me ngulm mesfushorin Esien. Lioni ka vënë një çmim prej 20 milionë eurosh për lojtarin 23-vjeçar, i cili deklaroi: "Nuk ndihem gati për t'u transferuar në një kampionat tjetër. Mund të qëndroj te Lioni edhe për një vit dhe më pas të largohem gjatë verës së ardhshme", - përfundoi Esieni.

[viganv]

Futboll Miks

Pele këshillon Runin


Legjenda e futbollit, Pele, u shpreh se Runi duhet të qëndronte me këmbë në tokë, pavarësisht suksesit të tij. Ish-sulmuesi i Brazilit, i cili ka shënuar më shumë se 1000 gola gjatë karrierës së tij, tha: "Kur je i ri dhe i famshëm, të gjithë të përgëzojnë dhe të konsiderojnë si më të mirin. Por, nëse mendon se këto gjëra janë të vërteta, atëherë mund të humasësh mendjen".

[viganv]

Futboll Miks

UEFA njeh si ndërkombëtar "Niko Dovanën"



Pas dy ditësh pritjeje, UEFA ka konfirmuar se stadiumi "Niko Dovana" ka arritur të marrë licensën, duke i dhënë mundësi ekipit të Teutës që ndeshjet e kupave europiane t'i zhvillojë në Durrës, para sportdashësve tanë. Kanë qenë burime zyrtare në FSHF ato që e kanë bërë të ditur një fakt të tillë. Kështu, sipas shefit të licensimeve në FSHF, Kreshnik Agolli, UEFA ka dhënë dje "ok"-in dhe ka miratuar stadimun "Niko Dovana" për ndeshjet ndërkombëtare. Sipas drejtuesve të UEFA s, stadiumi shqiptar i plotëson kushtet e infrastrukturës dhe të licensimeve dhe kështu në të mund të luhen ndeshje ndërkombëtare. "Para pak minutash, UEFA solli përgjigje për licensën e stadiumit "Niko Dovana". Sipas shkresës zyrtare që ka dërguar në FSHF sektori i licensimeve në UEFA, kjo i ka konsideruar të mjaftueshëm punimet që janë bërë në Durrës. Kështu, ata kanë vendosur që t'i japin licensën këtij stadiumi, çka do të thotë se në këtë impiant mund të luhen ndeshje ndërkombëtare. Thënë më shkurt, në Durrës do të luhet edhe ndeshja e parë e Kupës UEFA nëpërmjet Teutës së Durrësit dhe Shiroki Brijegut," është shprehur dje shefi i licensimeve, Kreshnik Agolli.
Ky i fundit, pak ditë më parë, së bashku me dy anëtarët e komitetit ekzekutiv kanë shkuar në Durrës dhe kanë inspektuar me imtësi të gjithë impantin ku i zhvillon ndeshjet Teuta. Kjo sepse UEFA ia ka deleguar sektorit të licensimeve në FSHF këtë veprim.
3 shja e FSHF së ka parë nga afër të gjitha punimet dhe meremetimet që janë bërë në stadium me porosi të UEFA s. Pasi janë bërë edhe fotografitë përkatëse dhe një relacion, gjithçka i është dërguar UEFA s me e mail. Zyra e infrastrukturës në Nion të Zvicrës, pasi ka shqyrtuar të gjithë dosjen e stadiumit "Niko Dovana", ka dhënë sot përgjigjen pozitive. Kështu, Teuta është lejuar që të luajë në stadiumin e tij ndeshjen e parë të Kupës UEFA, duke mos pasur fatin e keq të luajë në stadiumin "Qemal Stafa". Madje stadiumi "Niko Dovana" ka marrë licensën jo vetëm për ndeshjet e UEFA s, por edhe ndeshjet ekipeve përfaqësuese nga U 15 deri U 21. Stadiumi i Durrësit është impianti i 5 të në Shqipëri që arrin të marrë licensën e UEFA s. Këtë status prej shumë kohësh e gëzon stadiumi kombëtar "Qemal Stafa, ai i Shkodrës, "Loro Boriçi", stadiumi "Roza Haxhiu" dhe "Ruzhdi Bizhuta". Licensa që iu dha nga UEFA stadiumit të Durrësit është fryt i investimeve të bëra nga klubi "Teuta", FSHF dhe Bashkia e Durrësit.