Gazeta Elektronike: "Futbolli Ndërkombtar" (Nr.3)

[viganv]

Premier Liga

K.Ronaldo: Nuk iki nga "Old Traford"



Mesfushori portugez i ekipit të Mançesterit, Kristiano Ronaldo, është pranë rinovimit të kontratës e tij në "Old Traford". Asi portugez ka zhvilluar një sezon të jashtëzakonshëm, megjithëse ekipi i Mançesterit nuk arriti të fitonte asnjë trofe. Ronaldo, i cili erdhi në "Old Traford" dy vite më parë nga ekipi i Sportingut të Lisbonës, është pranë firmosjes së një kontrate katërvjeçare me ekipin anglez. Në fund të sezonit të kaluar, Ronaldo u përfol për një kalim të mundshëm drejt Barcelonës ose Realit të Madridit, por Ronaldoi pohoi se ndihej i lumtur tek ekipi i Mançesterit: "Kemi diskutuar për disa çështje të rëndësishme dhe besoj se do ta rinovoj kontratën time me Mançester Junajtidin. Bisedimet po shkojnë shumë mirë dhe së shpejti do të firmos kontratën time të re. Menaxheri im, Horge Mendes, po merret me procedurat e fundit dhe unë besoj se do të ketë një fund të lumtur. Në kontratën time aktuale kam akoma dy vjet. Propozimi i klubit është që ta rinovoj këtë kontratë edhe për tri vite të tjera. Jam i lumtur te Mançesteri dhe ky është klubi ku unë dua të luaj në të ardhmen. Eshtë e vështirë të flas për një kontratë deri në përfundim të karrierës, pasi në të ardhmen gjërat mund të ndryshojnë". Ndërkohë, dy sulmues të Mançesterit mund të largohen këtë verë nga "Old Traford". Alan Smith është vënë nën shënjestrën e ekipit të Njukasëllit, ndërsa Luis Saha kërkohet nga ekipi i Evertonit. Njukasëlli ka ofruar 7 milionë paund për Smithin, i cili mund të luajë përkrah Alan Shirerit. Trajneri i Njukasëllit, Grim Sounes, është vënë në kërkim të një sulmuesi, pas largimit të mundshëm të Kreig Belamisë. Sounesi është një nga admiruesit e sulmuesit anglez dhe ka shprehur disa herë dëshirën e tij për ta pasur në ekip. Evertoni, i cili do të marrë pjesë në edicionin e ardhshëm të Ligës së Kampioneve, kërkon të përforcojë ekipin duke sjellë Luis Sahën, i cili është shprehur i pakënaqur nga qëndrimi i gjatë në stolin e Mançesterit.

[viganv]

Premier Liga

Glazer hap "thesin" për Mançesterin



Presidenti i ri i Mançester Junajtidit dhe djali i milionerit amerikan, Malkom Glazer, i siguroi tifozët e klubit të "Djajve të kuq", që trajneri Sër Aleks Ferguson do të ketë një buxhet të madh financiar në merkaton e kësaj vere. Në një intervistë të dhënë për televizionin "MUTV", Xhole Glazer tha: "Më vjen keq kur lexoj nëpër gazeta që fondet e Mançesterit do të jenë të kufizuara përsa i përket merkatos. Nuk është absolutisht e vërtetë. Jemi të gatshëm t'i ofrojmë trajnerit atë që duhet, për ta risjellë ekipin e Mançesterit në nivelet e larta të futbollit europian. Nuk do të ketë kufizime në planin financiar. Gjërat ndryshojnë dhe ne nuk do të merrnim përsipër ta drejtonim këtë klub, nëse nuk do të kishim mundësitë për të investuar. Prandaj më vjen keq kur lexoj nëpër gazeta për këtë çeshtje. Dëshiroj t'ua bëj të ditur edhe tifozëve të Mançesterit, që nuk kemi ndër mend të ndryshojmë politikën e klubit. Përkundrazi, shpresojmë të japim kontributin tonë për të transformuar Mançesterin në klubin më të famshëm në Europë". Gjithashtu, Glazeri deklaroi se, nëse do të ishte e mundur, do të sillte në ekip një lojtar tjetër të nivelit të lartë. "Gjatë vitit të kaluar ishim shumë entuziastë pas nënshkrimit të Uejn Runit. Por, nëse do të na jepet sërish mundësia për të sjellë në "Old Traford" yjet e futbollit, klubi është i gatshëm të shpenzojë, pasi të gjithë lojtarët kanë dëshirë të luajnë këtu. Aleks Ferguson do të ketë mundësi të kryejë një merkato shumë aktive", - deklaroi Xhoel Glazer. Nga ardhja e Glazerit do të përfitojnë edhe strukturat rinore të klubit të Mançesterit: "Ky klub është një thesar për komunitetin e këtij vendi dhe për të gjithë futbollin botëror, prandaj kemi një përgjegjësi të madhe mbi shpatulla. Do t'i japim trajnerit dhe drejtorit ekzekutiv mjetet e duhura për të bërë punën e tyre". Ndërkohë, një grup tifozësh të Mançesterit kanë protestuar edhe ndaj Sër Bobi Robsonit, i cili i kërkoi falje familjes Glazer, për pritjen e pakëndshme të mërkurën në "Old Traford". Mark Longden, kryetari i shoqatës së pavarur të tifozëve të Mançesterit, tha: "Tifozët nuk bënë asgjë që të kërkojnë të falur. Ata thjesht po mundohen të shpëtojnë klubin e tyre. E respektoj shumë Bobi Robsonin dhe planet e tij për të radhmen, por nuk jam i sigurtë nëse ka bërë pyetjet e duhura. Glazerat thonë që gjërat do të vazhdojnë normalisht. Por do të doja të më shpjegonin se si kanë ndër mend të paguajnë borxhin prej 500 milionë paundësh, duke marrë nga klubi një fitim prej 19 milionë paundësh. Nuk ka nevojë të jesh një ekspert financiar për të kuptuar që diçka negative do të ndodhë dhe ne nuk kemi ndër mend të presim për dy vitet e ardhshme". Drejtori ekzekutiv i Mançesterit, David Gill, deklaroi: "Ajo që ndodhi në "Old Traford", ishte shumë zhgënjyese. Më vjen keq që ardhja e Glazerave në këtë klub vazhdon të kundërshtohet nga një grup i vogël tifozësh".

[viganv]

Serie A


Napoli tani ëndërron Serinë B



Vera e nxehtë e bilanceve ka nisur zyrtarisht. Torino në Serinë A, Peruxhia dhe Salernitana në Serinë B nuk mund të regjistrohen për momentin në kampionatet përkatëse. Ndërkohë, "Covisoc"-u po verifikon dokumentet e Mesinës dhe të Xhenoas (në Serinë A) dhe ato të Krotones (në Serinë B). Me përjashtimin e Peruxhias nga kampionati i kategorisë së dytë, vendim ky që u mor nga Liga e Futbollit, janë rindezur shpresat për një ripeshkim të mundshëm të Napolit në Serinë B. Përpara kampanëve do të ishin Viçenca dhe skuadrat e tjera të rëna në Serinë C1, në përfundim të këtij sezoni, por të gjitha po merren me probleme financiare, ndërsa klubi i De Laurentisit mund të mbështetet te një soliditet financiar, që mund të ketë shumë peshë. Qetësi, kthjelltësi, por bindje se mund t'ia dilet mbanë. Napoli hëpërhë preferon të mbajë një profil të ulët, por është te llogaritë që i sheh të gjitha shpresat se mund ta arrijë në mënyrë burokratike atë Seri B që i rrëshkiti nga duart në fushë. Pikërisht ato llogari që për momentin e kanë përjashtuar Peruxhian dhe që e vënë në një rrezik serioz regjistrimin e klubeve të tjera. Në shkallën hierarkike, përpara partenopeve duhet të jenë klube të tjera të gatshme për t'u rikapur prej flokësh, duke nisur nga ato që ranë në Serinë C në këtë sezon. Por problemi është se në sajtin e "Covisoc"-ut mund të mbesin ende edhe një klub i Serisë A dhe plot gjashtë të B-së. "Covisoc"-u do të shprehet më 9 korrik dhe, mes apelesh dhe gjërash të tjera, do të arrihet më 15, ose më saktë ditën e Këshillit të Federatës, në të cilin do t'i vihet vetoja kësaj situate. Për këtë arsye, Napoli, që ishte i pesti në renditjen e skuadrave ndoshta të ripeshkueshme, tani ndodhet në vendin e tretë. Ka gjasa që mund të ngjisë edhe ndonjë tjetër shkallë. Ndërkohë, De Laurentisi ia ka gati që tani 15 milionë euro, të cilat duhet të lërë si garanci falimentimi në rast se do të ripeshkohet.

[viganv]

Serie A

Vieri, divorc me Interin, tani drejt Londrës



Pasaporta dhe karriera e "Bobos"
Një titull me Juventusin
Kristian Vieri ka lindur në Bolonjë më 12 korrik 1973. Është sulmues, i gjatë 1 metër e 85 cm dhe peshon 82 kilogramë.
Fillimet
Rritet te Prato, pastaj kalon në Torino, me të cilën debuton në Serinë A në moshën 18-vjeçare. Më pas dërgohet për një sezon te Piza. Më tej kalon te Ravena dhe Venecia.
Titulli
Në 1995-n kthehet në Serinë A me fanellën e Atalantës. Shënon 7 gola në 19 ndeshje dhe përfundon te Juventusi. Në Torino, me 8 gola në 23 ndeshje, ndihmon në fitimin e titullit dhe të Superkupës Europiane. Por as te Juvja nuk ndalon. E blen Atletiko e Madridit, me të cilën shënon 24 gola në 24 ndeshje. Një vit më vonë shkon te Lacio, ku fiton Kupën e Kupave.
Tek Interi
Pasi kishte "bredhur" ca si shumë, Vieri duket se gjen destinacionin përfundimtar tek Interi. Në të vërtetë luan në Milano për 6 sezone. Një rekord për një lojtar që për tetë sezone kishte luajtur në tetë skuadra. Bilanci i tij me zikaltrit është 103 gola në 143 ndeshje në kampionat. Sezoni më i mirë është 2002-2003, me 24 gola në 23 ndeshje. I vetmi sukses është Kupa e Italisë 2005.


Tani është zyrtare: Kristian Vieri s'është më një lojtar i Interit. Këtë e ka bërë të ditur vetë klubi zikaltër, përmes një buletini të botuar në faqen zyrtare të klubit interist në internet: "Interi dhe Kristian Vieri, - shkruhej, - kanë vendosur në mënyrë të përbashkët që ta zgjidhin përpara kohe kontratën që përfundon më 30 qershor 2006. Në zyrat e Ligës së Futbollit janë depozituar dokumentet për zgjidhjen konsensuale të kontratës."
Një marrëveshje që kishte ditë që pritej të arrihej dhe që i kënaq të dyja palët: Veri tani mund të gjejë një skuadër ku mund të luajë me vazhdimësi dhe t'i luajë të gjitha shanset e tij për të merituar një vend për në botëror, ndërsa Mançini mund të ruajë qetësinë në ekip, të cilën një Bobo i pakënaqur mund ta kishte cënuar ndjeshëm. Duhej vetëm firma dhe Serxhio Bertit, agjentit të Kristian Vierit, i kanë mjaftuar pesë minuta për të nënshkruar zgjidhjen e kontratës. Berti u largua nga zyra e zv.presidentit të Interit, Rinaldo Gelfi, pak përpara orës 11.00 të ditës së djeshme. Interi e botoi në sajtin e tij lajmin e zgjidhjes së kontratës me falënderimet reciproke. "F.C. Internacionale, shkruhej në njoftim, falënderon Kristian Vierin që ka kontribuar për gjashtë sezone në historinë e klubit. Kristian Vieri falënderon Interin dhe tifozët e tij për respektin profesional dhe ngrohtësinë që kanë karakterizuar marrëdhëniet." Në seli nuk ishin të pranishëm as pronari Masimo Morati, as presidenti Xhiaçinto Faketi, ashtu sikurse edhe drejtori teknik Marko Branka, i cili ndodhej në Madrid për të mbyllur bisedimet për kalimin e Solarit dhe Samuelit te zikaltrit.
Tani lamtumira e Vierit ndaj Interit është zyrtare. Është arritur zgjidhja konsensuale e kontratës, që do t'i kushtojë Moratit 9 milionë euro, mes pagës së vitit të fundit dhe të drejtave të imazhit. Golashënuesi tani mund ta zgjedhë në liri të plotë të ardhmen e tij. Juventusi është i gatshëm të hidhet në sulm, por duhet të mposhtë konkurrencën e Totenhemit, që i ka ofruar lojtarit 3 milionë euro në sezon. Si gjithnjë, protagonist i merkatos verore, Bobo Vieri, kësaj here i ka bërë gati me të vërtetë valixhet. Divorci nga Interi, i zyrtarizuar dje në mëngjes, do t'u kushtojë 9 milionë euro arkave zikaltër. Tre milionë e gjysmë përbëjnë 50% të pagës së tij në vitin e fundit të kontratës, një milionë për të drejtat e imazhit dhe katër e gjysmë të tjera përbëjnë lënien mënjanë të 30%-shit të pagës së tij të dy viteve të fundit.
Tani mund të nisë një "vals" i vërtetë sulmuesish. Vieri nuk ka pengesa të asnjë lloj tipi: mund të zgjedhë skuadrën që do të dojë si në Itali, ashtu edhe jashtë saj. Në rast se do të kalojë te Juventusi, klubi bardhezi mund ta shesë me më pak dhimbje David Trezegenë te Çelsi. Është e sigurt se tani që Vieri është larguar, Interi mund të synojë me vendosmëri Makinuan, i cili kishte kohë që ndodhej në shënjestrën zikaltër, por në këtë pikë s'do të krijonte më probleme mbipopullimi në një repart, i cili është gjithsesi i kompletuar.

[viganv]

Serie A



Palermo zyrtarizon blerjen e Karaçiolos


Tani është zyrtare. Palermo ka blerë nga Breshia Andrea Karaçiolon. Sulmuesi 23-vjeçar, që ka luajtur 34 ndeshje me 12 gola në sezonin e shkuar, ka nënshkruar dje me siçilianët një kontratë 5-vjeçare. Karaçiolo do të paraqitet sot në Palermo së bashku me Virgën dhe Bonanin, dy blerje të tjera të presidentit Zamparini. Në bazë të kësaj lëvizjeje, te Breshia u shit Davide Posancini. Karaçiolo pritet të luajë në krah të Tonit, në modulin e ri sulmues të studiuar nga Del Neri.

Roma, gati të denoncojë Franko Baldinin


Roma është bllokuar në merkaton e blerjeve dhe të shitjeve për të gjithë sezonin, të paktën deri tani. Një "shuplakë" e fortë, gjithçka për shkak të çështjes "Mekses". Por ishte Franko Baldini, ish-drejtori sportiv verdhekuq që arriti marrëveshjen e kalimit të francezit te Roma. Tani duket se klubi i Trigorias po mendon ta denoncojë. Në arsyet e FIFA-s për pezullimin u është dhënë jehonë e madhe dy fakseve të dërguara nga Baldini drejt klubit francez. Por sipas tij, çdo lëvizje është konsoliduar me krerët e Romës.

[viganv]

Serie A

Lacio merr Pikolon: Modeli im është Nesta


Blerja e parë e Lacios së "re", e frymëzuar nga presidenti Lotito, quhet Felipe Pikolo. Mbrojtësi, në bashkëpronësi mes Juves e Rexhinës, përfaqëson blerjen e parë, edhe pse do ta veshë fanellën bardhekaltër i huazuar me të drejtë rimarrjeje. Ish-lojtari i të rinjve lacialë ndiqej prej kohësh nga drejtori sportiv i Lacios, Osti. Pikolo, i kënaqur, tha: "Modeli im është Nesta. Do të punoj me përulësi dhe do të përpiqem të fitoj hapësira sa mundem. Jam i kënaqur që erdha te Lacio".

Fiorentina, 8 milionë euro për Luka Tonin


Pas kalimit të Karaçiolos te Palermo, vendi i Luka Tonit dridhet dhe ofertat për të nuk mungojnë në merkato. Sidomos nga Fiorentina që jep për qendërsulmuesin 8 milionë euro plus portierin Lupateli. Por drejtori sportiv siçilian, Foski, nuk ka vonuar të replikojë, sepse kërkon 15 milionë euro, edhe pse Tonit i skadon kontrata në 2008-ën. Megjithatë, Zamparini pret rikthimin e lojtarit nga pushimet, për t'i afruar rinovimin e kontratës.

Paladino te Livorno, Kosu te Kaljari


Premtimi mbahet. Rafaele Paladino, sulmuesi 21-vjeçar i zbuluar në Serinë B me Salernitanën, u shit i huazuar nga Juvja te Livorno. Paladino do të paraqitet më 5 korrik. Ndërkohë, Kaljari ka bërë blerjen e parë në këtë merkato. Ai është veronezi Andrea Kosu që vjen me çmimin zero. Sulmuesi ka nënshkruar një kontratë që do ta lidhë me sardët për dy vite. Çështje orësh edhe zyrtarizimi i trajnerit të ri, Teses, që vjen nga Triestina.

[viganv]

Bundesliga


Zyrtare, Kuranji te Shalke




Kevin Kuranji ka lënë Shtutgartin dhe vitin e ardhshëm do të luajë për Shalken. Sulmuesi i kombëtares gjermane ka firmosur një kontratë pesëvjeçare me klubin e Gelsenkirshit. "Jam i lumtur për marrëveshjen, - tha sulmuesi me origjinë braziliane, pas firmosjes së kontratës. - Shpresoj të fitoj sa më shumë me këtë skuadër dhe fatmirësisht do të luaj për ta sezonin e ardhshëm. Largimi nga Shtutgarti nuk ishte i lehtë, duke qenë se kam luajtur për këtë skuadër shtatë vitet e fundit. Gjithsesi, drejtuesit e klubit nuk u përpoqën të më mbanin në skuadër dhe një ofertë të tillë si ajo e Shalkes ishte e parefuzueshme. Faktikisht, edhe Shtutgarti do të përfitojë ekonomikisht nga largimi im." Shtutgarti u detyrua ta shiste sulmuesin për shtatë milionë euro, për të shpëtuar bilancin e një kampionati të dështuar me vendin e pestë, jashtë zonës Champions.

[viganv]

Bundesliga


Hitcfeld, te Shtutgarti?!



Ekipi i Shtutgartit ka bërë të ditur se ka në plan të sjellë në ekip një trajner me eksperiencë, për të zëvendësuar trajnerin e shkarkuar, Matias Samer. Favoriti kryesor për këtë post është ish-trajneri i ekipit të Bajernit të Mynihut, Otmar Hitcfeld, i cili ka arritur të shpallet kampion në Ligën e Kampioneve, me ekipin bavarez dhe me Borusian e Dortmundit. Në një intervistë të dhënë për televizionin gjerman "ZDF", presidenti i ekipit të Shtutgartit, Ervin Shtod, tha: "Nuk do të vijë një emër i panjohur, përkundrazi, trajneri i ardhshëm do të jetë një emër i njohur, që garanton sukses." Mundësitë e tjera të çojnë drejt trajnerit Kristof Daum, i cili udhëhoqi ekipin turk të Fenerbahçes drejt titullit kampion, dhe drejt trajnerit të Danimarkës, Morten Olsen. Otmar Hitcfeld nuk ka drejtuar asnjë ekip, që nga largimi i tij nga ekipi i Bajernit të Mynihut, një vit më parë. Gjatë këtij sezoni, ai ka refuzuar ekipe si Reali i Madridit dhe Lioni, por u shpreh se nuk ishte në dijeni për ofertën e Shtutgartit. "Nuk di asgjë mbi këtë çështje dhe nuk dua të komentoj asgjë", - deklaroi Hitcfeldi. Daumi, i cili në vitin 1992 drejtoi Shtutgartin drejt titullit kampion në Bundesligë, ka rinovuar kontratën e tij me Fenerbahçen. Shtutgarti e shkarkoi trajnerin Samer, pasi dështoi të kualifikohej për në Ligën e Kampioneve. Në javën e fundit të kampionatit, Shtutgarti ra në vend të pestë, duke ia lënë vendin Hertës së Berlinit, e cila në sezonin e ardhshëm do të luajë në Champions. Ky zhgënjim do të thotë që shumë lojtarë të njohur mund të largohen nga ekipi, në sezonin e ardhshëm. Kevin Kuranji është një nga të sapolarguarit, kurse Aleksander Hleb është akoma në bisedime me drejtuesit gjermanë.

[viganv]

Bundesliga



Shtutgarti "ëndërron" Trapatonin




Xhovani Trapatoni vazhdon të jetë një nga trajnerët më të lakmuar në Europë. 66-vjeçari, i cili sezonin e kaluar i dha Benfikës titullin kampion në Portugali, ka hyrë në planet e Shtutgartit. Drejtuesit e skuadrës gjermane kanë vlerësuar Trapatonin si zëvendësuesin ideal të Matias Samerit, i cili dha dorëheqjen pas sezonit të dështuar. Shtutgarti e mbylli kampionatin në vendin e pestë dhe sezonin e ardhshëm do të luajë në Kupën UEFA. Për më shumë, ata humbën edhe shërbimet e sulmuesit kryesor Kevin Kuranji, i cili sezonin e ardhshëm do të luajë për Shalken. Presidenti i kësaj skuadre, Ervin Staudt, konfirmoi: "Për t'u rikthyer në majat e futbollit gjerman dhe europian, na duhet një trajner me eksperiencën dhe njohuritë e Trapatonit." Italiani, i cili e ka fituar më parë Bundesligën nën drejtimin e Bajernit, do të pranojë ofertën e gjermanëve, vetëm në rast se nuk arrin të gjejë një vend si trajner në Serinë A.

[viganv]

Primera Division

Takim jozyrtar, Laporta-Dein



Presidenti i Barcelonës, Huan Laporta, dhe zv.presidenti i Arsenalit, Devid Dein, kanë pasur një takim jozyrtar në zyrën e presidentit katalanas dhe kanë biseduar për disa çështje në futbollin ndërkombëtar, të cilat nuk janë bërë të ditura për shtypin. Lajmin e ka bërë të ditur faqja zyrtare në internet e Barcelonës, sipas së cilës Laporta dhe Deini janë të shqetësuar për mbledhjen e ardhshme të G-14-s, në të cilën klubet më në zë të botës do t'i kërkojnë UEFA-s ndryshimin e datave të ndeshjeve eliminatore për kampionatin e ardhshëm europian. Flitet që gjatë këtij takimi, është përcaktuar edhe e ardhmja e Tierri Henrisë. Francezi do të luajë sezonin e ardhshëm në "Hajburi", por transferimi i tij në "Kamp Nou" në vitin 2006 nuk është i pamundur. Gjithsesi, pas takimit, Laporta tha: "Deini ndodhej në Barcelonë dhe pata një takim me të. Duke qenë se ai nuk ka qenë zyrtar, nuk mund të them asgjë për temat që u biseduan në të."