Gazeta Elektronike: "Futbolli Ndërkombtar" (Nr.3)

[Davius]

Maradona-Boka, drejt lamtumirës

Aventura e Diego Armando Maradonës si drejtor sportiv i Boka Juniorsit, mund të jetë drejt përfundimit. Argjentinasi ka dyshime të forta mbi marrëdhëniet e tij me skuadrën, pas eliminimit nga Kupa Libertadores. "Firma ime me Bokën ka qenë vetëm prej shtypit, - ka thënë Maradona. - Nuk kam nënshkruar asgjë dhe nuk do të firmos nëse do të kuptoj se jam i bezdisshëm për skuadrën." Karrierën si drejtues, Maradona e filloi pak muaj më parë, kur si fillim u mor si këshillues në klub. Një eksperiencë që mund të përfundojë pa filluar. Arsyeja e fillimit të problemeve në klubin argjentinas ka qenë një polemikë e Maradonës me lojtarët, pasi ai nuk i ka deklaruar akoma çmimet e sezonit të ri të lojtarëve. Heshtja dhe mërzitja e tij me lojtarët filloi që kur ekipi u eliminua nga Kupa Libertadores.

"Nuk do të firmos asgjë nëse do të kuptoj se do të jem një pengesë. Nëse nuk mund të jem një urë lidhëse midis lojtarëve dhe drejtuesve, historia ime përfundon, por do të kthehem në tribunë." Përpara se të marrë një vendim përfundimtar, Maradona do të takohet me lojtarët për të kuptuar se çfarë mendimesh kanë ata. Ai premton se çdo përshtypje që do të dëgjojë, do ta mirëpresë, duke mos pasur asnjë problem me ta.

"Do të takohem një herë me skuadrën dhe më pas çdo gjë do të shkojë në bazë të rrjedhës së takimit. Pas tij do të vendos nëse do të firmos apo jo me klubin." Kjo është dhe detyra e fundit e Maradonës që, me sa duket, do të përfundojë më shpejt se ç'pritej. Argjentinasi e ka provuar edhe më parë të ketë role drejtuese në klube sportive, por asnjëherë nuk ka arritur të qëndrojë gjatë.

[Davius]

Sounes: Emre zgjodhi Njukasëllin në vend të Milanit


Trajneri i ekipit të Njukasëllit, Grim Sounes, u shpreh se klubi i tij kishte dalë fitimtar ndaj Milanit në blerjen e mesfushorit turk, Emre Bezoglu. Mesfushori turk firmosi një kontratë 5-vjeçare në "St.James Park", pasi luajti për tri sezone tek ekipi i Interit. Përveç Fenerbahçes dhe Galatasarajit, edhe ekipi i Milanit kishte shprehur interes për mesfushorin 26-vjeçar.

Sounesi u shpreh se do të kishte qenë e vështirë për Emrenë të kalonte te Milani, për shkak të rivalitetit me ekipin e Interit, megjithatë ai u shpreh i kënaqur për nënshkrimin e tij. "Kishte disa klube të interesuara për të. Ai është shumë i famshëm në vendin e tij dhe ekipet më të mëdha të Turqisë, Galatasaraji dhe Fenerbahçe, kërkonin me çdo kusht të kishin shërbimet e tij. Milani ishte një ndër ekipet e interesuara për të. Jam shumë i lumtur që arritëm një marrëveshje dhe tashmë ai do të veshë fanellën tonë", - deklaroi Sounesi

[viganv]

Terri: Bëja gjilpëra çdo ditë



Xhon Terri, mbrojtësi i kombëtares angleze, pohoi se gjatë sezonit të kaluar i është dashur të bënte një injeksion çdo ditë, për të lehtësuar dhimbjen dhe për të ndihmuar Çelsin të shpallej kampion në Premier Ligë. Kapiteni i ekipit të Çelsit luajti një rol të rëndësishëm në fitimin e titullit të parë të ekipit të tij, në 10 vitet e fundit, duke shpërfillur dhimbjen e vazhdueshme të këmbës së tij. Terri iu nënshtrua menjëherë operacionit, pasi Çelsi arriti të siguronte titullin kampion, megjithatë mbrojtësi anglez deklaroi se nuk ishte rikuperuar plotësisht. Terri do të luajë sot në Boston, ndaj ekipit të Milanit, në miqësoren e parë të turneut të SHBA-së. "Nga të dyja anët e gishtit të këmbës më ishin deformuar kockat dhe sa herë vija këmbën në tokë, ato fërkoheshin me njëra-tjetrën, duke më shkaktuar shumë dhimbje. Në fillim të verës iu nënshtrova një operacioni dhe tashmë gjithçka duket në rregull. Ndiej akoma pak dhimbje, por besoj se kjo është pasojë e operacionit. Jam i lumtur që jam rikthyer sërish në 100% të formës sime dhe tashmë jam gati për sezonin e ri. Këtë problem e kam pasur që para 4-5 vitesh, por gjatë fazës së dytë të sezonit të kaluar më duhej të bëja një injeksion çdo ditë, përpara se të stërvitesha. Para ndeshjeve duhej të bëja edhe një tjetër, për të luajtur për 90 minuta. Sapo siguruam titullin në fund të sezonit të kaluar, iu nënshtrova operacionit dhe tashmë ndihem mirë. Injeksionet më trembnin pak, por doja me çdo kusht të luaja futboll, kështu që isha gati të bëja gjithçka. Më pas trajneri më tha se mund të vija vetëm një ose dy herë në javë, për t'u stërvitur. Unë dëshiroj të stërvitem çdo ditë, pasi vetëm kështu ndihem vërtet mirë. Falënderoj shumë kirurgët, fizioterapistët dhe doktorët e tjerë. Nuk mund të vazhdoja më me injeksionet. Fatmirësisht, nuk kam pasur më probleme dhe shpresoj të vazhdoj kështu gjatë të gjithë sezonit", - deklaroi Terri. Shpirti luftarak i Xhon Territ simbolizonte këmbënguljen e Çelsit për të fituar titullin kampion. Gjithashtu, Terri arriti të fitonte një vend titullari në kombëtaren e Anglisë, duke lënë jashtë Sol Kempëllin dhe duke fituar çmimin "lojtari i vitit" në Angli. Kurajoja e Territ ishte një nga arsyet që disa lojtarë të Çelsit u mërzitën me mesfushorin Arjen Roben, i cili iu përgjigj negativisht kërkesës së trajnerit Mourinjo për të luajtur, edhe pse nuk ishte plotësisht i rikuperuar nga dëmtimi i tij. Robeni deklaroi se vendimi i tij kishte qenë i drejtë, por pranoi se dëmtimet e shumta të sezonit të kaluar e kishin bërë të ndihej i tepërt në ekipin e Çelsit. "Që të bësh një punë të mirë, duhet të jesh në 100% të formës tënde dhe unë nuk do të luaja kurrë nëse nuk do të ndihesha i gatshëm. Jam i vendosur të jap maksimumin tim gjatë këtij sezoni, pasi gjatë sezonit të kaluar nuk kontribuova shumë në fitimin e titullit. Gjatë këtij sezoni dua të fitoj titullin, duke luajtur në të gjitha ndeshjet", - deklaroi Robeni.

[viganv]

Ferguson: I kënaqur me lojtarët e rinj


Mançesteri arriti një fitore 2-0 në ndeshjen e parë të turneut aziatik, ndaj ekipit të Hong-Kongut. Një nga golat e Mançesterit u shënua nga lojtari 20-vjeçar kinez, Dong Fangzhou, i cili sezonin e kaluar ishte dhënë hua tek ekipi belg i Rojal Anterpit. Dongu u duartrokit nga një turmë prej 34.000 vetash, pasi rrëmbeu një top në zonën kundërshtare dhe arriti të shënonte golin e dytë të takimit në minutën e 73-të. Pas ndeshjes, trajneri Aleks Ferguson deklaroi: "Dongu shënoi një gol vërtet të bukur. Ai është një lojtar shumë i shpejtë. Mbeta vërtet i impresionuar". Fergusoni deklaroi se klubi i Mançesterit do të mundohej të siguronte lejen angleze të punës për 20-vjeçarin Dong, i cili nuk ka luajtur asnjë ndeshje zyrtare me ekipin e Mançesterit, që nga blerja e tij para dy vitesh. Klubi anglez, i cili u ble nga miliarderi amerikan, Malkom Glazer, po konkurron me klube të tjera europiane, në tregun e 1.3 bilionë kinezëve. Ish-sulmuesi i Mançester Junajtidit, Erik Kantona, përuroi një muze të tijin në Hong-Kong, ku do të prezantojë veshjet e reja të këtij sezoni. Goli i parë në takimin e djeshëm u shënua nga sulmuesi 18-vjeçar Xhuzepe Rosi, i cili sezonin e kaluar ka qëndruar në stolin e "Djajve të kuq". "Të dy lojtarët janë të rinj, por kanë shumë potencial", - deklaroi Fergusoni. Në dy pjesët e takimit, Mançesteri aktivizoi dy ekipe krejtësisht të ndryshme. Në pjesën e parë, Uejn Runi dhe Rud van Nistëlroi humbën disa raste për të shënuar në portën e ekipit të Hong-Kongut. Nesër Mançesteri do të udhëtojë për në kryeqytetin kinez, Pekin, për t'u ndeshur ndaj ekipit të Bejzhin Hyndait. Dy ditë më pas, ekipi i drejtuar nga Fergusoni do të udhëtojë për në Tokio, ku do të luajë ndaj ekipit të Kashimës dhe ndaj ekipit Uraua Red Dajmonds

[viganv]

Endi Kol debuton me gol te Man.Siti

Mançester Siti arriti të fitonte vendin e tretë të trofeut aziatik, pas fitores 4-2 me penallti ndaj ekipit të Evertonit. Endi Kol debutoi në mënyrën më të mirë me ekipin e tij të ri, pasi i dha avantazhin ekipit të tij në minutën e 25-të, pas krosimit të saktë të Trevor Sinkleirit. Xheims Biti arriti të barazonte rezultatin në minutën e 7-të të pjesës së dytë, për ekipin e Evertonit. Pas gjuajtjeve të penalltive, Mançester Siti arriti të dilte fitues me rezultatin 4-2.

[viganv]

Sounes konfirmon interesimin për Hipianë

Trajneri i ekipit të Njukasëllit, Grim Sounes, konfirmoi interesimin e klubit të tij për mbrojtësin finlandez, Sami Hipia. Trajneri i "qymyrxhinjve" kërkon të sjellë në ekip një mbrojtës me eksperiencë dhe alternativë më e mirë është Hipia. Liverpuli i ka ofruar një kontratë të re Hipiasë, por ai nuk e ka firmosur ende atë dhe kjo gjë i ka dhënë shpresë ekipit të Njukasëllit. Megjithatë, Sounesi u shpreh se nuk do të ishte i gatshëm t'i ofronte një kontratë të përhershme Hipiasë në "Seint Xheims Park". "E admiroj Hipianë dhe do të doja ta kisha në ekip. Por ai kërkon një kontratë 3-vjeçare dhe ne nuk mund t'ia ofrojmë këtë", - deklaroi Sounesi.

[viganv]

Nevill: Duhet të japim maksimumin

Geri Nevill, mbrojtësi i ekipit të Mançesterit, u bëri thirrje shokëve të tij të ekipit, që të japin maksimumin gjatë këtij sezoni, nëse duan të ruajnë vendin e titullarit në ekipin e "Djajve të kuq". "Në Azi, tifozët kanë parë lojtarë, të cilëve nuk ua njihnin emrat, por me kalimin e kohës ata do të bëhen pjesë e përhershme e ekipit tonë. Të gjithë ne duhet të japim maksimumin, nëse duam të luajmë si titullarë", - deklaroi Nevilli.

[viganv]

Venger: Çështja "Van Persi", drejt fundit

Trajneri i Arsenalit, Arsen Venger, shpreson që hetimi mbi sulmuesin Robin van Persi të përfundojë sa më shpejt. 21-vjeçari, i cili është akuzuar për ngacmime seksuale, u mbajt për 48 orë në rajonin e policisë së Roterdamit. "Eshtë e rëndësishme që kjo situatë të mos zgjatet për shumë kohë. Kjo çështje na ka shqetësuar të gjithëve", - deklaroi Vengeri.

[viganv]

Vesterveld rikthehet në Premier Ligë

Ish-portieri i Liverpulit, Sander Vesterveld, u shpreh optimist për rikthimin e tij në Premier Ligë, pasi arriti një marrëveshje 2-vjeçare me ekipin e Portsmuthit. 30-vjeçari, i cili vitin e kaluar luajti për ekipin e Majorkës në kampionatin spanjoll, deklaroi: "Jam shumë i lumtur që u riktheva në Premier Ligë".

[viganv]

Feilhaber firmos për Hamburgun

Mesfushori amerikan, Beni Feilhaber, ka firmosur një kontratë 3-vjeçare me ekipin e Hamburgut. 20-vjeçari, i cili ka luajtur për ekipin e Los Anxhelosit, deklaroi: "Kisha marrë disa oferta nga klubet gjermane, por vendosa të zgjedh Hamburgun. Në Europë zhvillohen kampionatet më të bukura në botë", - deklaroi Feilhaberi.