Gazeta Elektronike: "Futbolli Ndërkombtar" (Nr.3)

[Davius]

Vieira: Juvja, një sfidë që më tërheq

Kam zgjedhur Juventusin, sepse për mua përfaqëson skuadrën e përsosur". Këto janë fjalët e para të Patrik Vieirasë, i prezantuar dje në selinë e Juventusin në rrugën "Galileo Ferraris" në Torino. "Jam krenar që ndodhem këtu. - vazhdoi francezi, - Kjo është një ditë speciale, sepse vij në një nga skuadrat më të mira në aspektin kombëtar dhe ndërkombëtar. Të largoheshe nga Arsenali pas 9 vjetësh ishte e vështirë, por në jetë duhet të ecësh përpara. Kur m'u desh të zgjidhja mes Juventusit dhe Realit të Madridit, parapëlqeva stabilitetin e Juves. Më telefonuan Trezege dhe Zidane, që i kam që të dy miq, por në fund zgjodhi vetëm mendja ime. Ky është një vendim i imi, sepse kjo është jeta ime".

Vieira duket shumë i vendosur, si në fushë. Nuk shpreh fjalë pa kuptim, parapëlqen ide të qarta dhe domethënëse. Flet pa siklet. Ka dashur të vijë te Juvja me çdo kusht, që kur filluan bisedimet. Dhe e shpjegon qartësisht në ditën e parë të tij si juventin: "Unë me Arsenalin kam fituar shumë, - vijoi mesfushori 29-vjeçar, - dhe shpresoj të vazhdoj të fitoj edhe me Juven, por është e pamundur të bësh krahasime mes këtyre dy skuadrave. Le të themi se kam më shumë mundësi të fitoj Ligën e Kampioneve me Juven sesa me Arsenalin. Por kjo nuk mjafton; jo gjithnjë ekipet më të forta në "letër" fitojnë, sepse vitin e shkuar e fitoi Liverpuli...". Championsi është objektivi i tij i parë, sikundër është edhe për Juven. "Martesa" bazohet mbi baza të forta. Kapelo e ka krahasuar Vieiranë me Rajkardin:

"Jam krenar, - shtoi ish-kapiteni i "topçinjve", - sepse Rajkardi ishte një nga idhujt e mi që kur isha fëmijë, ndërsa me Kapelon kam kujtime të bukura. Kur erdha i ri te Milani, ai ishte trajner dhe në detyronte të punonim shumë, duke gjetur gjithnjë fjalët e duhura për të më bërë që të ndihesha i rëndësishëm dhe të besoja te vetja ime, edhe pse në atë Milan kishte kampionë të konfirmuar. Nga ajo periudhë nuk kam keqardhje, sepse erdha në Itali shumë i ri dhe pa përvojë. Nuk kam hakmarrje për të marrë me futbollin italian". Në mesfushë Vieira do të ketë në krah brazilianin Emerson: "Nuk e di, - reagon francezi, - këtu te Juvja ka shumë kampionë. Sigurisht që nuk mund të mos mendoj për Emersonin: është një nga mesfushorët më të fortë në aspektin ndërkombëtar, dhe mezi pres që të luaj në krah të tij. Por në të vërtetë, e gjithë Juvja më tërheq. Mezi po pres orën të rifilloj".

[Davius]

Moxhi: Ia hodhëm Realit për francezin

Ka ardhur një lojtar shumë i rëndësishëm, një nga mesfushorët më të mirë në Europë. Jo rastësisht bisedimet ishin të gjata, sepse edhe Reali i Madridit bëri të pamundurën për ta marrë. Por Patrik Vieira parapëlqeu Juven, dhe kjo gjë na sjellë kënaqësi".

Është drejtori i përgjithshëm i Juventusit, Luçiano Moxhi, që zbulon detajet e fundit të blerjes së fundit të bardhezinjve dhe praninë e një konkurrenti të fortë si "merengesët". "Arsenali, - shtoi Moxhi, - bëri çmos për ta mbajtur, por kur dy klube të rëndësishme, si Juvja dhe Reali i Madridit këmbëngulin, nuk mund ta injorosh dëshirën e lojtarit.

Vieira na zgjodhi ne, sepse e di që ka ardhur në një skuadër të fortë, dhe ai është këtu për ta në bërë edhe më të fortë. Mareska? E shitëm te Sivilja, ndërsa Apiah, edhe pse është një kampion, mund të niset. Sigurisht ose ai, ose një mesfushor tjetër do të shitet, varet nga ofertat. Edhe Mikoli do të shkojë të luajë në një skuadër tjetër. Ajo që mund të siguroj për Fabricion është se nuk ngutemi për ta shitur: do të vlerësojmë dhe pastaj do të vendosim".

[Davius]

Milanezët këmbëngulin për Çivunë

Me apo pa Kasanon, Interi po ushtron trysni ndaj Romës për të sjellë te zikaltrit Kristian Çivunë, që vazhdon të preferohet ndaj Samuelit, çështja e të cilit vazhdon të mbetet pezull. Në ditët e kaluara ishte shfaqur hipoteza e një goditjeje të dyfishtë nga ana e interistëve, për të marrë njëherazi mbrojtësin rumun dhe Antonio Kasanon, për një shumë të përgjithshme prej rreth 25 milionë eurosh. Por tani Roma po vlerëson mënyrën për të rikuperuar para, për t'i propozuar një rinovim talentit barez dhe rruga e detyrueshme do të ishte ajo e shitjes së veçuar të Çivusë, ose ajo e brazilianit Mansini, gjithnjë në pritje që Tas-i ta zhbllokojë merkaton romaniste.

[Davius]

Samuel, Juventusi sfidon Interin

Interi duhet të kujdeset prapa krahëve. Ndërkohë që bisedimet për të çuar Valter Samuelin në Milano ndodhen në një fazë pezullimi, Juventusi mund të tentojë t'ia "rrëmbejë" mbrojtësin Moratit. Ato që e kanë bllokuar çështjen në kampin interist, janë mbi të gjitha problemet e bilancit. Bardhezinjtë, që pas blerjes së Vieirasë janë duke negociuar për Kristiano Zanetin, mund të vënë një "stërkëmbësh", duke ofruar mbi tryezën e bisedimeve Emersonin.
Pas blerjes së Vieirasë nga bardhezinjtë dhe të dyshes sulmuese Vieri-Xhilardino nga Milani, tani i takon Interit të paraqesë goditjen e tij në merkato. Sikurse dihet prej kohësh, mund të mbërrijë dikush në repartin e mbrojtjes.

Objektivi numër një i zikaltërve është Samueli, por çështja me "merengesët" për argjentinasin duket se është arnosur. Paktet e përcaktuara dyzetë ditë më parë me Florentino Perezin kanë qenë të qarta: Reali është i gatshëm t'ua japë lojtarin hua për një sezon (për 2 milionë euro), me të drejtë blerjeje nga ana e zikaltërve në vitin 2006, për 14 milionë euro të tjera. Por spanjollët nuk kanë arritur ta sigurojnë ende zëvendësuesin e qendërmbrojtësit (Ramos i Seviljës) dhe zikaltrit kanë mbetur të çoroditur nga kostoja e lartë e çështjes. Por pikërisht nga ky moment reflektimi mund të përfitojë Juventusi, i cili që në pranverë kishte kryer më tepër se një sondazh për lojtarin. Në fakt, Samueli është një kanakar i Kapelos që në kohët kur "Don Fabio" drejtonte Romën dhe trajneri bardhezi do të ishte i gatshëm të bënte gjithçka për ta ripasur në Torino amerikano-jugorin, në sezonin e ardhshëm.

Por, pas 20 milionë eurove të shpenzuara për Vieiranë, Moxhi nuk ka ndër mend ta vendosë sërish dorën në xhep dhe kështu që e vetmja mënyrë për t'ia "rrëmbyer" lojtarin Interit, është të parashtrohet në tryezën e bisedimeve një lojtar që pëlqehet nga spanjollët, të cilët nuk e kanë fshehur kurrë faktin se kanë një simpati të veçantë për Emersonin. Nëse mesfushori brazilian deri një javë më parë konsiderohej i pashitshëm, tani diçka mund të ndryshojë. Në fakt, me blerjen e Vieirasë dhe hyrjen në bisedime me Interin për të sjellë në Torino Kristiano Zanetin, prania e brazilianit nuk konsiderohet më e domosdoshme. Interi, nga ana tjetër, është gjithnjë në pritje të vendimit të Tas-it për Romën, për të kuptuar nëse do të jetë i mundur të hedhë një tjetër sulm për Çivunë, i cili ka qenë gjithnjë zgjedhja e parë e Mançinit. Si alternativë, zikaltrit djekin brazilianin Aleks, kartoni i të cilit i përket Çelsit.

[Davius]

Adriano zgjat pushimet, Mançini mërzitet


Korrektësia nuk është një nga pikat e tij më të forta. Edhe një herë tjetër, Adriano e ka shtyrë kthimin e tij nga Brazili në krahasim me datën e paracaktuar. Leja edhe për një ditë i është dhënë drejtpërdrejt nga pronari Morati, i vetmi me të cilin sulmuesi amerikano-jugor ka kontaktuar personalisht, duke i telefonuar. Një vonesë që me siguri nuk i ka pëlqyer Mançinit. Trajneri, lidhur me këtë, u mjaftua me një thënie karakteristike "no comment".

Mesatarja e tij e vonesave në grumbullim ka një përqindje shumë më të lartë se ajo e golave të shënuar: 100%. "Perandori", në axhendën e tij, dje në mëngjes duhej të paraqitej në aeroport, ku do ta priste një veturë e klubit zikaltër, e cila do ta kishte shoqëruar për në grumbullimin e Brunikos. Por ja që dëshira e tij për të qëndruar edhe disa orë me familjen, ka fituar mbi gjithçka.

Gjithsesi, nuk bëhet për ndonjë "mëkat" edhe aq të madh, pasi Adriano do të humbë vetëm një ditë stërvitje, por ajo që duket e sigurt është se të paktën në aspektin e parimit, Roberto Mançini e ka pranuar këtë gjë duke shtrënguar dhëmbët. Ajo që bezdis më tepër është konstantja e futbollistit në shtyrjen e rikthimeve, që nuk ndodh me amerikano-jugorët e tjerë (Havier Zaneti dhe Kambiaso ishin të pranishëm dje në grumbullim) dhe fakti që e kërkon gjithnjë lejen vetëm në momentin e fundit.

Megjithatë, trajneri, duke qenë se lejen ia ka dhënë pronari Morati, edhe pse ky fakt mund të mos i pëlqejë, është i detyruar ta presë "Perandorin" në Bruniko, sikurse të mos kishte ndodhur asnjë gjë. Ky sezon është tepër i rëndësishëm dhe ndaj është më mirë që ndonjë polemikë e vogël të shmanget, në vend që të kthehet në një situatë shkatërrimtare.

[Davius]

Sheva këmbëngul: Nuk largohem nga Milani

Pas interesimit të Abramoviçit dhe diskutimit të filmuar nga telekamerat me Ançelotin, Andrei Shevçenko shuan çdo dyshim mbi të ardhmen e tij: "Nuk ishte një grindje", - ka shpjeguar ukrainasi. Ndoshta kështu u shpreh edhe Ançeloti para dy ditësh, por zërat për një megaofertë të Çelsit për sulmuesin po riqarkullojnë dhe thashethemet flasin se Shevçenko kërkon të largohet, Shevçenko është grindur me Maldinin, Shevçenko, që kur ka fituar "Topin e artë, nuk pyet më për të tjerët. Por Sheva mohon: "Kështu është bota dhe pastaj jo të gjithë më njohin". Mbi ofertën e Çelsit, numri 7 kuqezi sqaron edhe një herë:

"Unë nuk do të shkoj gjëkundi. Pra, nuk dua të largohem gjetkë. Milani më do shumë dhe unë e dua shumë Milanin. Më mjafton për të vendosur". Nga Londra vijnë zëra për një ofertë 80 milionë euroshe, por nga Milani të bëjnë me dije se nuk kanë marrë asnjë ofertë dhe Shevçenko jep të njëjtën përgjigje. Miku i tij, Abramoviç, nuk e ka thirrur asnjëherë për motive të tilla: "I kam thënë gjithnjë, nuk mund të flasim për gjëra të tilla. Para të gjithave vjen klubi. Dhe nëse Milani nuk kërkon të më shesë, unë nuk shkoj në asnjë skuadër tjetër".

[Davius]

Toti: Edhe Roma mes skuadrave të mëdha

Fjalë prej kapiteni. Nga grumbullimi i verdhekuqve në Kastelroto, Françesko Toti i largon problemet dhe tensionet (është shtyrë për nesër vendimi i Tas-it për çështjen Mekses) dhe shprehet me optimizëm për sezonin e Romës. "Duhet të tregohemi realistë, është normale që Juventusi, Milani dhe Interi kanë diçka më shumë. Por edhe ne jemi në lartësinë e këtyre tri skuadrave, e rëndësishme është të qëndrojmë të bashkuar dhe të luajmë mirë. Me dëshirë dhe vendosmëri mund të arrihen gjëra të mëdha." Kështu që Toti nuk i fsheh marrëdhëniet e vërteta të forcës, kur mungon thuajse një muaj nga fillimi i kampionatit. Edhe falë goditjeve të freskëta të merkatos (Vieira, Xhilardino dhe Pizarro), treshja që zotëroi sezonin e kaluar niset një shkallë sipër rivalëve. Por Toti u tërheq vëmendjen të gjithë shokëve. Boshllëku mund të plotësohet duke shfrytëzuar plotësisht cilësitë që munguan në sezonin e kaluar:

"Grupi është arma jonë shtesë këtë vit, lojtarët janë të vlefshëm, kemi një organikë të madhe. Presim lojtarë të tjerë, mendoj se do të formohet një grup i madh që do të ketë shumë dëshirë të bëjë kthesë sa më parë të jetë e mundur. Të rinjtë? Si fillim që është, janë paraqitur goxha mirë, edhe pse ka vetëm 2-3 ditë që jemi bashkë." Mes të rinjve ndodhet, natyrisht, edhe trajneri Spaleti, i cili vjen pas aventurës së shkëlqyer në stolin e Udinezes: "Ai është një trajner dhe një njeri i madh, edhe ai ka stimuj shumë të mëdhenj, kjo është e rëndësishme." Ashtu sikurse do të jetë stabiliteti i drejtimit teknik: vitin e kaluar ndërrimet e shumta në stolin verdhekuq, nga Prandeli te Fëleri, nga Del Neri te Konti, i hoqën detyrimisht diçka ecurisë së klubit të Franko Sensit. Roma dhe Toti kanë shumë dëshirë t'i shpalosin sërish vlerat e tyre dhe të tregojnë se kush janë në të vërtetë, aq më tepër në këtë sezon, që do ta çojë drejt Botërorit Gjermania 2006. "Ka kohë, mungon edhe një vit nga fillimi i botërorit në Gjermani, - saktësoi numri dhjetë i kryeqytetasve.

- Tani mendoj vetëm për Romën dhe për asgjë tjetër, dua të zhvilloj një kampionat në nivele sa më të larta dhe të tregoj edhe një herë se sa i lidhur jam me këtë fanellë." Fjalinë e fundit, ai e ka shpenzuar për tifozët e Romës, të cilët kishin vajtur në një numër të konsiderueshëm në Kastelroto: "Tifozët? Nuk mund të gjej më asnjë fjalë për t'i përshkruar, ngado që shkojmë, i kemi pranë. Na tregojnë gjithnjë se sa shumë na duan". Dhe ai, pavarësisht nga joshjet e shumta italiane dhe të huaja, nuk i ka tradhëtuar: Roma është e kaluara, e tashmja dhe e ardhmja e fantazistit të kombëtares italiane.

[Davius]

Eto: Duhet të luftojmë te të gjitha kompeticionet


Sulmuesi kamerunas i Barcelonës, Samuel Eto, u dërgon një mesazh të gjithëve për sezonin e ri, duke shprehur që shokët e tij të ekipit janë të aftë ta ruajnë titullin dhe do të jenë të suksesshëm në Ligën e Kampioneve. "Kur je kampion, rrezikon atë që ke fituar dhe kjo do të ndodhë me ne në sezonin e ri. Në dolëm kampionë sezonin e kaluar, por këtë sezon do ta nisim sikur të mos kishte ndodhur gjë, në mënyrë që të mos ndiejmë presion. Nuk është e lehtë të fitosh, por është akoma më e vështirë të ruash atë që ke fituar," - tha Eto.

Sulmuesi kamerunas deklaroi që kampionati i fituar është diçka e së kaluarës dhe lojtarët e Barcelonës duhet të mendojnë për të ardhmen. Golashënuesi më i mirë i klubit katalanas deklaroi se çelësi i sukseseve në sezonin e ri, do të jetë ruajtja e atmosferës së mirë në grup. "Ne kemi një atmosferë të gëzueshme në skuadër dhe ky ishte çelësi i arritjeve tona vitin e kaluar. Nëse arrijmë të ruajmë harmoninë e grupit, do t'i tregojmë botës se sa vlejmë," - vazhdoi kamerunasi. Ai komentoi edhe blerjet e reja të ekipit. "Mark van Bomel dhe Santi Ezkuerro janë integruar shumë mirë në ekip. Ata janë një ndihmë e madhe për skuadrën dhe për më tepër janë shokë shumë të mirë," - tha ai. Gjithashtu, sulmuesi komentoi edhe për ekipin e Barcelonës, i cili do të fillojë një sezon me shumë synime dhe me shumë vështirësi. "Jemi kampionët në fuqi në kampionat, por kjo nuk do të thotë se jemi të pamposhtshëm. Do të fillojmë një sezon me vështirësi të reja dhe shumë klube në Spanjë janë përforcuar me lojtarë shumë të mirë.

" Ashtu si dhe kapiteni i Barcelonës, Çarles Pujol, Eto ka të njëjtin mendim për synimet e klubit: "Do të ishte një gabim i madh nëse do t'i vinim më shumë rëndësi Ligës së Kampioneve. Është vërtet një kompeticion prestigjioz dhe ne do të luftojmë për të arritur maksimumin, por pa harruar trofetë e tjerë." Gjithashtu, ai ka komentuar edhe për synimet e tij personale në sezonin e ri: "Nuk mund të them se do të shënoj 30 gola, apo jo. Por jam i sigurt që do të jap maksimumin në fushë dhe do të bëj gjithçka që të ndihmoj sa më shumë Barcelonën." Në kampin katalanas, të gjithë lojtarët, përveç Ronaldinjos, Rafael Markezit dhe Leo Mesit, të cilët e kanë lejen e pushimeve deri në 27 korrik, për shkak se ishin me kombëtaret e tyre, lojtarët e tjerë u janë rikthyer përgatitjeve për sezonin e ri.

"Jemi të gjithë të motivuar dhe duam të fitojmë sa më shumë. Kemi shumë besim tek aftësitë tona," - tha Eto. Kamerunasi ka komentuar edhe çështjen e Saviolës: "Ai është një lojtar shumë i mirë. Do të më vinte keq nëse do të ikte dhe do të ishte një humbje e madhe për klubin. Dua t'u them drejtuesve të Barcelonës që të mos marrin vendime të gabuara." Ndërsa kur u pyet nëse merkatoja e Barcelonës është akoma e hapur, sulmuesi tha: "Presidenti po kërkon disa lojtarë të mirë. Do të ishte një ndihmë akoma më e madhe për ekipin nëse do të vinte njëri prej tyre. Uroj që të jetë Albert Luke një prej blerjeve, pasi është një lojtar i jashtëzakonshëm dhe një shok shumë i mirë," - përfundoi kamerunasi

[Davius]

Ajala: Do të luftojmë për titull

Mbrojtësi argjentinas i Valencias, Roberto Fabian Ajala, është shprehur optimist për sezonin e ri, nën drejtimin e trajnerit Kike Sançez Flores. "Trajneri ka krijuar një atmosferë tepër të mirë në skuadër dhe ne do të tregojmë që jemi akoma një nga ekipet më të mira në botë. Kemi fituar kampionatin dhe Kupën Uefa para pak vitesh dhe në sezonin e ri do të fitojmë përsëri trofe të rëndësishëm," - tha Ajala.

Ai është tepër i kënaqur nga ekipi i krijuar dhe mendon se ekipi i Valencias do të rikthehet sërish fuqishëm. "Kemi krijuar një ekip shumë të fortë dhe jemi gati për të luftuar për titulll në kampionat. Gjithashtu, ne do të synojmë të arrijmë sa më shumë edhe në kompeticionet e tjera," - deklaroi mbrojtësi argjentinas. Valencia pati një sezon shumë zhgënjyes vitin e kaluar dhe këtë vit klubi po kërkon të rikthehet sërish si elitar në kampionat. "Ne kemi gabuar dhe nga gabimet mëson. Besoj se kemi një ekip të kompletuar dhe me eksperiencë të mjaftueshme për të fituar kampionatin. Është e vërtetë që kemi rivalë të fortë në luftën për titull, por asnjë ekip nuk është i pakalueshëm," - përfundoi argjentinasi.


Kezhman: Spanja, vendi ideal për mua
Sulmuesi serb, Mateja Kezhman, ka deklaruar menjëherë përshtypjet e tij të para për lojën e ekipeve spanjolle. "Është kampionati në të cilin duhej të kisha ardhur më parë. Kam luajtur në kampionate të ndryshme, por në Spanjë loja përshtatet me karakteristikat e mia," - tha ai.

Rajkard grumbullon 23 lojtarë për në Danimarkë
Trajneri i Barcelonës ka grumbulluar 23 lojtarë për stërvitjen që do të bëjë në Arhus të Danimarkës. Lojtarët do të qëndrojnë aty gjashtë ditë. Ai ka grumbulluar edhe dy lojtarë që kanë dalë nga ekipet zinxhir të klubit katalanas, Rodri dhe Pitu.

Plasente firmos për Selta Vigon
Mbrojtësi i majtë, Diego Plasente, ka kaluar te klubi i Selta Vigos. Lojtari që ishte një hap larg klubit të Romës, firmosi një kontratë trivjeçare me klubin spanjoll. Ai do të transferohej më parë tek ekipi italian, por problemet e klubit e prishën marrëveshjen me lojtarin.

Maksi prezantohet me fanellën e Atletikos
Maksi Rodrigez është prezantuar me fanellën e Atletikos së Madridit. Lojtari, që sezonin e kaluar shënoi 26 gola me Espanjolin, u prezantua te klubi i tij i ri. "Jam shumë i kënaqur që ndodhem këtu. Jam i sigurt që do të fitoj shumë me fanellën e Atletikos," - tha lojtari.

[Davius]

Ferguson: Smith, zëvendësuesi i Roi Kinit

Trajneri i Mançesterit, Aleks Ferguson, pohoi se gjatë këtij sezoni, Alan Smith mund të aktivizohet në ekip në rolin e mesfushorit dhe mund të konsiderohet si një zëvendësues i mundshëm i kapitenit 34-vjeçar, Roi Kin. Ish-sulmuesi i ekipit të Lidsit erdhi në "Old Traford" gjatë verës së kaluar, por nuk arriti të zinte një vend titullari në sulmin e "Djajve të kuq". Smithi e filloi mirë sezonin e kaluar, por më pas nuk u aktivizua pothuajse fare gjatë fazës së dytë të Premier Ligës. Sulmuesi i kombëtares së Anglisë luajti në pjesën e dytë të takimit miqësor ndaj ekipit të Peterboros, duke mbajtur fanellën me numrin katër dhe duke luajtur në rolin e mesfushorit, përkrah Pol Skolsit dhe Rajan Gigsit. Mançesteri arriti ta fitonte takimin me rezultatin 6-0 dhe Fergusoni u shpreh i kënaqur nga paraqitja e 24-vjeçarit:

"Ka shumë potencial dhe është shumë i talentuar. Ai është vetëm 24 vjeç. Ai është shumë i ri dhe mendoj se mund të jetë një zëvendësues i denjë i Roi Kinit. Kam folur edhe me Alanin për këtë ide dhe ai u shpreh entuziast për këtë. Roi Kin është një mesfushori i pazëvendësueshëm, por Alan Smith është Alan Smith dhe ka një karakter të ndryshëm nga Roi. Me Rud van Nistëlroin, Uejn Runin dhe Luis Sahën, në repartin e sulmit, zgjidhja logjike e Fergusonit do të ishte aktivizimi i Alan Smithit në mesfushë, sidomos nëse Mikael Balak nuk pranon të largohet nga Bajerni i Mynihut.