Gazeta Elektronike: "Futbolli Ndërkombtar" (Nr.3)

[viganv]

Futboll Miks

Hidink, trajneri i PSV Eindhovenit, ka pasur një takim me drejtuesit e Federatës Australiane të Futbollit dhe nuk përjashtohet mundësia që holandezi të bëhet trajneri i kombëtares së këtij vendi. Sipas shtypi australian, Hidinku është kandidatura më e fortë për të zëvendësuar Farianën, që u largua pas dështimit në Kupën e Konfederatave.

[viganv]

Futboll Miks

Shilavert, ish-portieri i kombëtares paraguajane, është dënuar me gjashtë muaj liri me kusht, për falsifikimin e disa dokumenteve gjatë kalimit të tij për te Strasburgu në Francë, në vitin 2002. Shilaverti duhet të paguajë gjithashtu një gjobë 12 mijë dollarëshe te klubi francez.

[viganv]

Futboll Miks


Porto ka marrë shërbimet e sulmuesit turk Fatik Sonjaka nga Beshiktashi. 25-vjeçari, i kërkuar me ngulm nga trajneri i skuadrës portugeze Ko Adrianse, ka firmosur një kontratë katërvjeçare me ish-kampionët e Europës.

[viganv]

Futboll Miks

Pander, drejtuesi i Borusias së Mynshengladbahut, ka deklaruar se nuk ka pasur asnjë ofertë nga Shtutgarti për sulmuesin Vaclav Sverkos. Ky përgënjeshtrim erdhi pasi shtypi gjerman kishte piketuar sulmuesin çek, si objektivin e radhës në merkato për skuadrën e Trapatonit.

[viganv]

Futboll Miks

Doraso, kur durimi shpërblehet



Shembulli i Dorasosë tregon se durimi është arma më e mirë në momentet e vështira. Lojtari i kombëtares së Francës, pas kalimit të tij nga Lioni për tek ekipi i Milanit, ka kaluar 12 muaj, duke qëndruar në stolin e kuqezinjve.
Zhgënjim i dyfishtë
Sikur të mos mjaftonte, Milani iu afrua shumë fitimit të Ligës së Kampioneve dhe kampionatit italian, duke dështuar në fund të këtyre kompeticioneve. Dikush tjetër nuk do ta kishte pranuar të qëndronte në stol për aq kohë, ndërsa ish-organizatori i Lionit nuk polemizoi asnjëherë, duke preferuar të qëndronte në pritje të rasteve që do t'i jepeshin me fanellën kuqezi.
Oferta nga Parisi
Durimi i Dorasosë u ripagua gjatë javës së kaluar, pas ofertës së marrë nga ekipi i PSG-së, i cili do t'i japë mundësinë të rikonfirmohet në futbollin francez. Kalimi për në Paris u prit me entuziazëm nga ana e mesfushorit anglez, i cili tha: "Ishte një vendim i vuajtur, - shpjegoi francezi. - Po largohem nga ekipi më i mirë në botë, por kam shumë arsye që më shtyjnë të shkoj në Paris. Kur isha i vogël, kaloja shumë orë duke qëndruar përballë stadiumit "Park de Prince" dhe kjo më bën shumë të lumtur. Jam i lumtur që po bëj një zgjedhje jete, në vend të një zgjedhjeje sportive dhe shpresoj ta ndihmoj PSG-në të arrijë suksese në të ardhmen.
Kontrata 2-vjeçare
Pas firmosjes së kontratës 2-vjeçare me PSG-në, Doraso ka dëshirë të tregojë sërish se është një nga mesfushorët më të mirë të Europës. "Nuk doja të largohesha nga Milani, pasi ndihesha mirë atje. Por në fillim të majit, menaxheri im më foli për interesimin e PSG-së."
Fundi i lumtur
"E mendova disa herë largimin tim nga Milano dhe pastaj kërkova edhe mendimin e njerëzve më të afërt, dhe në fund bëra çmos që ky transferim të konkretizohej. Drejtuesit e Milanit nuk donin që të largohesha, por më pas arritën të kuptonin arsyet e mia dhe çdo gjë u mbyll mirë. Nuk kemi pasur asnjëherë mosmarrëveshje me njëri-tjetrin."
Objektivi europian
Aspekti negativ i kalimit të Dorasosë drejt PSG-së, është fakti që pas një sezoni zhgënjyes, ekipi kryeqytetas nuk arriti të kualifikohej për në Europë. Megjithatë, Doraso është i bindur se do rikthehet së shpejti në Ligën e Kampioneve. "Jam i sigurtë që gjërat do të përmirësohen ndjeshëm gjatë këtij sezoni. Nuk e di se çfarë nuk funksionoi gjatë sezonit të kaluar, por jam optimist për të ardhmen. Këtu po ndërtohet një ekip i madh dhe objektivi ynë do të jetë të rikthehemi sa më shpejt në Ligën e Kampioneve." Në sezonet e kaluara, Doraso ka luajtur me ekipe që kanë marrë pjesë rregullisht në Ligën e Kampioneve. "Për mua do të jetë pak e vështirë. Kam disa vite radhazi që luaj në Ligën e Kampioneve dhe më vjen keq që nuk do të marr pjesë gjatë këtij sezoni," - përfundoi Doraso.

[viganv]

Futboll Miks

Miqësi "qensh" për Devid Bekhamin


Duke marrë në konsideratë se lista e miqve të famshëm të Devid Bekhamit po rritet me një ritëm të pabesueshëm, më të shpejtë sesa kaçurrelat bjonde të shokut të tij të skuadrës të Real Madridit, Guti, duhej pritur vetëm pak që gruaja e tij e adhuruar, Viktoria, të vendoste që t'ia jepte dikujt. Duke parë që tema e bamirësisë është njëra prej më aktualeve, cila do të ishte skena më e mirë sesa koncerti "Live 8" në Londër për të bërë ca thashetheme? Në atë koncert, zonja Bekham vuri re se i shoqi po hynte shumë në konfindenca me reperin Snup Dog. Ndërsa Bekhami dhe beniamini i tij po bënin shakara të shumta, nga rregulli i pozicionit jashtë loje deri te teknikat e shumta për të bërë rritjen e flokëve më të shpejtë, zonja Bekham nuk e ka pëlqyer aspak idenë se nga biseda e këndshme mes të dyve doli një hipotezë për të kaluar një mbrëmje së bashku. "Atëherë, zoti Snupi - ka thënë ajo duke iu drejtuar reperit. - Ju nuk do të dilni me bashkëshortin tim. Kam dëgjuar shumë gjëra rreth jush." Një Bekham pa dyshim i zhgënjyer nuk e ka marrë me të qeshur këtë lajm dhe ka thënë se artisti e kishte befasuar me gjykimet e tij të urta rreth futbollit. "Doja ta takoja prej një jete. U kuptuam menjëherë. Më ka habitur diapazoni i tij për lojën e futbollit." Si mendoni nëse sezonin e ardhshëm reperi ulet në pankinën e "Santiago Bernabeut" për të ndihmuar Bekhamin e shokët e tij për t'i hequr titullin FC Barcelonës?

[viganv]

Futboll Miks

Terapia e të ftohtit
Ish-Posh Spajs, nuk ka ndonjë të keqe nëse kjo rubrikë e përcakton në mënyrë të tillë, ai është një person që e pëlqen komoditetin. Kështu që, ajo kurrë nuk do të firmoste për Paris Sën Zhërmen përpara skadencës së kohës së transferimeve. Ka qenë pa dyshim një sezon për t'u harruar për skuadrën e qytetit që pa dyshim do të ketë shumë inat me londinezin Bekham dhe për impenjimin e tij në konkurrimin e Londrës, që arriti t'i marrë olimpiadën Parisit (kaliforniani Snup Dog, siç kuptohet lehtësisht, mbështeste kandidaturën e Nju Jorkut). Në mes të përgatitjeve për sezonin e ardhshëm të PSG-it, skuadra po u nënshtrohet seancave të krioterapisë. Për të kursyer shfletimin e fjalorit, po ju kujtojmë që krioterapia është një praktikë thellësisht akute, që bëhet në brendësi të ambienteve shumë të ftohta, deri në -111 gradë. Nudo (me përjashtim të dorezave, berretës, çorapeve dhe të mbathurave). Sipas stafit mjekësor të PSG-së, kjo është një praktikë efikase për të rregulluar fluksin e gjakut dhe për rehabilitimin fizik. Sipas redaktorëve të kësaj rubrike, edhe me një sfungjer të thjeshtë arrihen të njëjtat rezultate.

[viganv]

Futboll Miks

Fitojnë këngëtarët
Na falni nëse kthehemi dhe flasim për Bekhamët, por siç do ta shihni, tani ata kanë rivalë në triumviratin kurioz të përbërë nga futbolli-moda-muzika (një tjetër disiplinë për Londra 2012). Për ata që të shtunën kanë ndjekur "Live 8" kanë humbur ndeshjen e madhe në stadiumin "Dashrath të Katmandusë, që ka parë të zbresë në fushë një skuadër të përbërë nga modele nepaleze dhe një këngëtare. Duke u qëndruar besnik fjalëve të Sneha Moktanit të gazetës "Katmandu Post": "Skuadrat luftonin për zotërimin e topit në konfuzionin të plotë. Zënka të tmerrshme, shkelma dhe rrëzime me fytyrë në tokë dhe kundërsulmet e disa prej këngëtareve më të pompoze, si Joti Ghimire, kanë qenë momentet më entuziaste të ndeshjes". Këngëtari i vogël Raju Lama është përshkruar si "një nxënës i vogël me pantallona të shkurtra", ndërsa modelet e papërmbajtshme ankoheshin për gjërat e rënda që kishin veshur. Moktan, më pas ka vazhduar: "Pas një fillimi me një mori raste golash, gjëja e parë që ka goditur rrjetën nuk ka qenë topi, por plot tre nga këto futbolliste të sajuara. Gjatë një rrëmuje konfuze, në fakt, Manchin Shakja, Dependra Dangol dhe Daniel Karthak janë rrotulluar brenda në portë të ngatërruar trup më trup." Ngadalë, ndeshja filloi të marrë një pamje të zakonshme dhe për fatin e madh të të pranishmëve, pas rezultatit 6-6, gjithçka kaloi në shtesë, ku këngëtaret kanë arritur të fitojnë me shifrat 8-7.

[viganv]

Futboll Miks


Paranaense, "kockë e fortë" për San Paolon



Atletiko Paranaense dhe San Paolo e kanë mbyllur në një barazim 1-1 finalen e parë të Kupës Libertadores. I mërzitshëm u konsiderua derbi i parë i gjithi brazilian në këtë veprimtari të ngjashme me Ligën e Kampioneve në Europë. 62 faulle u shkaktuan në këtë takim nga dy skuadra shumë nervoze që nuk e pranonin kurrsesi humbjen. Edhe pse po luante rreth 700 kilometra larg stadiumit të saj, sepse impianti i Paranaenses nuk i ka kushtet për të pritur një finale, Atletiko kaloi në avantazh me Aloision që në minutën e 15-të. Gjithsesi, dy herë fituesi i kësaj veprimtarie, San Paolo, arriti të barazonte i ndihmuar edhe nga fati pas autogolit të mbrojtësit Durval, në minutën e 53-të. Në minutat e mbetura, ndeshja ngjasonte më shumë me një lojë regbie sesa me një derbi brazilian. San Paolo është favorite për të fituar Kupën Libertadores, pasi më 14 korrik do të presë në fushën e saj finalen e kthimit. Duhet thënë që kjo është finalja e parë e gjitha braziliane në historinë 45-vjeçare të Kupës Libertadores. Në fund të ndeshjes së parë, trajneri i Paranaenses, Antonio Lopez, ka kritikuar gjyqtarin e ndeshjes nga Uruguaji: "Ai e ndalonte lojën kur duhej të lejonte avantazhin dhe nuk ndëshkonte me karton faullet e rënda." Por kritikat mbi gjyqtarin nuk munguan edhe nga San Paolo. Portieri i kësaj skuadre, Roxherio Ceni, tha: "Gjyqtari na mohoi një 11-metërsh dhe nuk akordoi shumë faulle në pozicione të rrezikshme pranë portës së Atletikos." Atletiko Paranaense luan finalen e parë në historinë e saj, ndërsa Sao Paolo e ka fituar Kupën Libertadores në vitet 1992 dhe 1993.

[viganv]

Premier Liga

Venger, në pritje për Rajt-Filipsin



Arsen Venger pohoi se Arsenali nuk do të bënte asnjë ofertë për Shon Rajt-Filipsin, derisa Çelsi të hiqte dorë nga 23-vjeçari. Mesfushori i Mançester Sitit është vënë nën shënjestrën e ekipit të Abramoviçit, i cili ka ofruar 20 milionë paund për shërbimet e tij. Trajneri i Çelsit, Hoze Mourinjo, ka shprehur interesimin e tij për Rajt-Filipsin, pas refuzimit të mesfushorit të Liverpulit, Stiven Xherrardit. Mançester Sitit kërkon ta mbajë talentin anglez në ekip, por shuma e ofruar mund të zgjidhë të gjitha problemet financiare të klubit. 23-vjeçari kërkohet edhe nga ekipi i Arsenalit, por "topçinjtë" nuk mund të krahasohen financiarisht me ekipin e Roman Abramoviçit. Trajneri Arsen Venger u shpreh se Arsenali nuk do të bënte asnjë ofertë për mesfushorin anglez, derisa Çelsi të mbyllte përfundimisht tratativat me klubin e Mançester Sitit. "Më pëlqen shumë Rajt-Filips, por ne jemi pjesë e një merkatoje ku Çelsi vendos i pari dhe më pas vendosin ekipet e tjera. Pas refuzimit të Xherrardit, ata janë vënë në ndjekje të Rajt-Filipsit. Ne duhet të presim dhe të shohim se ç'do të ndodhë", - deklaroi Vengeri.