Gazeta Elektronike: "Futbolli Ndërkombtar" (Nr.3)

[viganv]

Serie A

Roma dhe Xhenoa për Plasenten

Është ndërlikuar çështja për Diego Plasenten, i cili është lënë i lirë nga Leverkuseni, por që s'mund të qëndrojë shumë kohë pa një skuadër. Ai i pëlqen Romës, por verdhekluqtë shpresojnë ta zgjidhin bllokimin që u ka vënë FIFA për çështjen Mekses brenda javës së ardhshme, në mënyrë që më pas të tentojnë ta blejnë mbrojtësin argjentinas. Amerikanojugori ka një ofertë edhe nga Xhenoa, megjithatë ai mund ta presë Romën, pasi kuqeblutë nuk i kanë ofruar atë çfarë ai synon.

[viganv]

Serie A

Konti: Roma do të jetë konkurruese



I palodhshëm Bruno Konti. Në pritje të njihet me detyrën e tij të re në kampin verdhekuq ai punon pa rreshtur dhe garanton: "Po sistemojmë sektorin e të rinjve dhe disa gjëra të tjera. Më pas duhet të presim atë që do të ndodhë".
Hëpërhë ai nuk po shqetësohet që të behet drejtor teknik. "Do të bëhem kur të jetë momenti i duhur. Pres vetëm që dikush të më japë "ok"-in. Vetëm atëherë do të filloj". Ish-trajneri i Romës nënvizon se vazhdon të ruajë marrëdhënie të shkëlqyera me klubin. "Nuk jam grindur me askënd, ka rrëfyer Konti. - Thjesht kemi folur dhe më është shpjeguar se disa situata janë modifikuar në bazë të vendimit të FIFA-s për Meksesin." Pavarësisht nga pushimet e kluara, i ka ende në mendje 100 ditët në stolin e Romës, përfshi edhe finalen e Kupës së Italisë: "Unë besoja. U përpoqa t'ia përçoj besimin tim djemve, por shumë gjëra nuk shkuan siç desha. Kujtimi më i bukur? Fakti që mora në dorë një situatë të vështirë dhe arrita t'i kontrolloj problemet dhe vështirësitë që ekzistonin me lojtarët. Nëse i druhesha rënies nga kategoria? Po, pas humbjes ndaj Parmës, por pas fitoreve në Udine dhe Bergamo pati një shpërthim të madh gëzimi." Sipas trajnerit, e keqja më e madhe e Romës ishte mungesa e një dialogu: "Këtë e vura re menjëherë. Vitin e ardhshëm do t'i shmangim problemet e tilla. Kemi një organikë të mirë dhe deri tani kemi kryer blerje të mira. Tadei do të sjellë vazhdimësi dhe teknikë, Kufuri përvojë dhe qetësi. Më pas janë Nonda dhe Bovo. Do të jemi konkurrues, - garantoi ai. - Pizarro? Udinezja kërkon me të vërtetë shumë para për të".
Dhe për kritikat ndaj klubit, Konti që e njeh mirë publikun e vshtirë verdhekuq, saktëson: "E kuptoj gjendjen e tyre shpirtërore, por për një gjë mund të jenë të sigurtë: këtu punohet me shumë përkushtim dhe mendohet vetëm për të mirën e Romës. Gabimet e së kaluarës, - saktësoi ai, - nuk do të përsëriten". Duke garantuar se stoli s'do t'i mungojë aspak, Konti porosit Spaletin: "Ka qenë një zgjedhje e studiuar mirë ajo që na çoi te Luçiano. Pas një sërë vlerësimesh kuptuam se ai mund të ishte njeriu i duhur për të kontrolluar punën në fushë. Zeman? S'është lënë gjë pa u thënë, por unë e përsëris pse zgjodhëm Spaletin, pasi kemi besim tek ai".

[viganv]

Serie A

Seria A me modelin e Premier Ligës


Pas diveregjencave të së enjtes, presidentët e Serisë A janë të vendosur të krijojnë një ligë të pavarur nga ajo e Serisë B. Që gjatë mbledhjes iu dha përfaqësuesve ligjorë mandati për të krijuar statutin e ligës së re. Modeli pritet të jetë si ai i Anglisë, në të cilën ndryshimet janë fare të pakta, dhe First Division ose më saktë kagetoria e dytë, duhet të mbijetojë thuajse ekskluzivisht me burimet e veta. Edhe pse ka kohë që është hedhur si ide, duke qenë se mes dy ligave ka kohë që ka përplasje, ajo që ndodhi të enjten ka qenë një prishje epokale. Ajo që ka sjellë frakturën ka qenë, mbi të gjitha, debati për ndryshimet. Propozimi i A-së parashikonte 110 milionë euro sivjet për B-në, por 99, duke nisur nga 2007-a, me një shkurtim prej 10%. Pra një reduktim prej 11 milionësh që kategoria e dytë nuk e pranoi. Më pas, ajo që e shtoi edhe më shumë tensionin ka qenë kërkesa e B-së për të zgjedhur "ekskluzivisht" një përfaqësues si zëvendëspresident i deleguar, një propozim të cilin A-ja e rrëzoi. Dhe ja që nisi përçarja. Një avokat është ngarkuar të ndërtojë statutin e Ligës së re të A-së, akti i parë i së cilës tani është shkruar. Kështu që nga pikëpamja ekonomike kontaktet mes dy serive do të jenë shumë të kufizuara. B-ja do të jetë e detyruar të mbijetojë, thuajse ekskluzivisht me këmbët e saj, ndërsa burimet do të shpërndahen në brendësi të kategorisë së parë, mes presidentëve të së cilës ekziston një marrëveshje thuajse totale. Në fakt, Seria A ka arritur të gjejë një marrëveshje në brendësi të saj për dëmshpërblimin ndaj të rënave nga kategoria, të cilave do t'u jepet një shumë prej 2,5 milionë eurosh.

[viganv]

Bundesliga

Jeremis: Bajern, jam edhe unë



Fitorja e të së mërkurës 14-1 ndaj ekipit modest të FC Rotak mund të ketë qenë thjesht një miqësore për të gjithë lojtarët e Bajenrit, por për Jens Jeremisin mbajtja e shiritit të kapitenit do të thotë shumë. Ish-lojtari i kombëtares së Gjermanisë është në sezonin e tij të shtatë tek ekipi i Bajernit, dhe ka fituar çdo gjë që mund të fitohet në nivel klubesh. Megjithatë, ai ka paguar një çmim të shtrenjtë që nga suksesi në Ligën e Kampioneve të vitit 2001, duke u operuar pesë herë radhazi në gju, për shkak të dëmtimve të shumta. Ja dhe intervista e tij e plotë:
- Gjatë sezonit të kaluar keni luajtur vetëm në shtatë ndeshje të bundesligës, dhe në asnjë prej tyre nuk keni luajtur për 90 minuta. Si ndiheni në prag të sezonit të ri 2005-'06?
- Nuk ka qenë zgjedhja ime për të luajtur kaq pak. Fizikisht nuk kam arritur të rikuperohem, dhe nuk kam mundur të rikthehem në formën time të mëparshme. Jam i sigurtë se do të luaj më shumë, nëse do të jem i gatshëm fizikisht, por nëse nuk do të jem gati, do të jetë e vështirë.
- Çfarë nënkuptoni me të qenurit i gatshëm?
- Kam bërë pesë operacione në gju, megjithatë nuk kam pasur asnjëherë mundësinë për t'u rikthyer si më parë. Jam stërvitur përditë me ekipin, edhe pse ndiej akoma dhimbje në gju. Nuk kam mundur të luaj në sezonin e kaluar; jam i lumtur që kam arritur të qëndroj gjithmonë pranë ekipit. Në të tilla situata kënaqesh edhe me sukseset e vogla.
- Çfarë qëllimesh keni për sezonin e ardhshëm?
- Aktualisht nuk jam akoma në formë, megjithatë gjuri nuk më dhemb. më . Qëllimi im kryesor është të rikthehem e të luaj pa frikën e dëmtimeve. Nëse do të jem i shëndetshëm fizikisht, jam i bindur që do të arrij ta gjej formën time të mëparshme.
- Mendoni se largimi i Torshten Fringsit do ta bëjë më të lehtë aktivizimin tuaj në ekip? Ai luante në të njëjtin rol me ju.
- Nuk ka të bëjë fare më këtë, çdo gjë varet nga unë. Nëse do të jem gati do të luaj, nëse jo, do të më duhet t'ia lë vendin një lojtari tjetër.
- E keni konsideruar largimin tuaj gjatë kësaj vere? Eshtë folur gjatë për një kalim drejt Austrisë?
- Kam pasur disa oferta, por nëse do të jem në formë do të luaj për Bajernin. Nëse nuk luaj dot këtu, nuk "do të funksionojë" në asnjë vend tjetër.
- Eshtë e vërtetë që problemet e gjurit janë pasojë e një aktivizimi në kohë rekord në gjysmëfinalen e 2001-shit ndaj Realit të Madridit?
- Nuk e di përgjigjen e kësaj pyetjeje. Kam luajtur gjithmonë në maksimumin e mundësive të mia. Por natyrisht, vjen një kohë kur paguan çmimin e sforcimeve të tepruara, sidomos kur ndodhesh në limit dhe luan vetëm falë qetësuesve të dhimbjeve. Megjithatë këtë e dija që më parë. Isha gati të rrezikoja gjithçka për ta realizuar endrrën time që ta fitoja Ligën e Kampioneve.
- Mendoni se ekipi aktual i Bajernit i ka cilësitë e duhura për ta fituar Ligën e Kampioneve?
- Vjet iu afruam shumë, pasi të gjithë lojtarët ishin në formë të jashtëzakonshme. Mund të kishim fituar ndaj Çelsit. Megjithatë, le të shohim se çdo të mund të bëjmë gjatë këtij sezoni. Nëse do të arrijmë të përmirësohemi edhe më, do të arrijmë më shumë se në çerekfinalet e Championsit.

[viganv]

Bundesliga

Bajerni edhe më pranë Podolskit

Talenti i futbollit gjerman, Lukas Podolski, mund të kalojë nga Këlni te Bajerni vitin e ardhshëm. Ka qenë vetë sulmuesi 20-vjeçar që e ka pranuar diçka të tillë në një deklaratë për të përditshmen gjermane "Bild". Nga ana tjetër, drejtuesi i Bajernit, Uli Hënes, ka pranuar: "Na intereson Podolski. Këlni do ta shesë dhe ne jemi të parët në listë."

[viganv]

Bundesliga

Viltord: Asnjë problem me Hulierin

Sulmuesi i Lionit, Silven Viltord, ka deklaruar se nuk ka asnjë problem ndërmjet tij dhe trajnerit të kampionëve të Francës, Zherard Hulier. "Jam gati për një sezon të ri me Lionin, dhe si futbollist profesionist jam gati të punoj me çdo trajner. Kemi pasur debate në të kaluarën, por nuk kam asnjë problem me Hulierin."

[viganv]

Liga1

Sosho largon trajnerin Lakomb


Soshoja, skuadra e Ligës 1 në Francë, ka shkarkuar nga detyra trajnerin e kësaj skuadre, Gaj Lakomb. Abdel Djadaui do të jetë trajneri i ri i skuadrës që u rendit e dhjeta në sezonin e kaluar. Gjithsesi, Lakombi 49-vjeçar nuk ka mbetur pa punë. Trajneri francez do të drejtojë në sezonin e ardhshëm ish-skuadrën e tij, Nantën. Nanta në sezonin e kaluar shpëtoi vetëm në ndeshjen e fundit nga rënia nga kategoria.

[viganv]

Premier Liga

Gigs: Mançesteri, pretendent për titull



Rajan Gigs është i bindur se Mançester Junajtidi do të arrijë të rikthejë në "Old Traford" titullin e Premier Ligës. Sezonin e kaluar, Mançesteri e mbylli kampionatin në vend të tretë, 18 pikë pas ekipit të Çelsit, duke mos arritur të fitonte asnjë trofe. Megjithatë, mesfushori 31-vjeçar është i bindur se ekipi i tij mund të arrijë të mposhtë ekipin e drejtuar nga Hoze Mourinjo, nëse shokët e tij të ekipit do të përqendrohen më shumë në fushën e blertë: "Jam i bindur se mund ta fitojmë titullin. Njerëzit flasin akoma për diferencën e pikëve në sezonin e kaluar, por për mendimin tim kjo nuk është e rëndësishme. Lojtarët e Mançesterit janë po aq cilësorë sa ata të Çelsit. Gjatë sezonit të kaluar na ka munguar përqendrimi në momentet kyçe të kampionatit dhe kemi humbur kundër disa ekipeve që normalisht duhej të fitonim. Nuk varet vetëm nga aftësitë e lojtarëve. Duhet edhe përqendrim për të pasuar topin në momentin dhe në vendin e duhur. Gjithashtu, duhet përqendrim edhe kur zgjedh momentin për të gjuajtur para portës. Këtë sezon, trajneri do të sigurohet që gjithçka të shkojë mirë. I kam të gjitha arsyet për të besuar te fitimi i titullit, pasi shumë lojtarë të rinj kanë arritur të përmirësohen shumë." Gjithashtu, Gigsi foli edhe për mesfushorin e talentuar Kristiano Ronaldo. "Ai ka arritur të përmirësohet shumë që nga ardhja e tij në "Old Traford". Në sezonin e kaluar, trajneri vendosi ta aktivizonte gjatë të gjithë kampionatit dhe Ronaldo arriti të ambientohej plotësisht me futbollin anglez." Gigsi, i cili luan sezonin e tij të 8-të me Mançester Junajtidin, ka arritur të fitojë gjithçka në nivel klubesh. Që nga aktivizimi i tij në vitin 1995, ku zëvendësoi mbrojtësin legjendar Irvin, mesfushori uellsian ka luajtur si titullar në ekipin e "Djajve të kuq". Në vitin 2000, ai arriti të fitonte Ligën e Kampioneve me ekipin e Mançesterit, pas finales dramatike ndaj Bajernit të Mynihut. Në Angli, Gigsi ka arritur të koleksionojë pesë tituj të Premier Ligës, një Kupë Lige dhe dy Kupa të Anglisë.

[viganv]

Premier Liga

Parku mbyll burokracitë e fundit



U zgjidh pozitivisht problemi për mesfushorin korean Park Ji-Sung, i cili nuk mund të firmoste kontratën e tij me Mançester Junajtidin, pa pasur lejen britanike të punës. Parku ka arritur të marrë lejen e punës dhe tashmë mund të firmosë përfundimisht me klubin e Mançesterit. Koreani 24-vjeçar ka firmosur një kontratë 4-vjeçare dhe u stërvit për herë të parë me shokët e tij të skuadrës, që pas largimit të tij nga PSV Eindhoveni. Parku, i cili i kushtoi Mançesterit 6 milionë euro, është blerja e dytë e "Djajve të kuq", pas portierit holandez Edvin Van der Sar.

[viganv]

Premier Liga

Benitez: Vendësit, çelësi i suksesit tonë


Trajneri i ekipit të Liverpulit, Rafael Benitezi, beson se ndikimi i lojtarëve vendës si Stiven Xherrard dhe Xhimi Karager do të jenë çelësi i suksesit në të ardhmen e Liverpulit. Dy lojtarët e "rritur" tek ekipi i Liverpulit rinovuan para disa ditësh kontratat e tyre deri në vitin 2009. Për Benitezin, ky ka qenë një lajm shumë i gëzueshëm, sidomos pas zërave për një largim të mundshëm të Stiven Xherrardit. Përveç dyshes së talentuar, Benitezi u jep rëndësi të veçantë talenteve të reja që luajnë në "Anfield Road". "Kemi shumë lojtarë të mirë në përbërje të ekipit, por është gjithmonë e rëndësishme të kesh djem vendës dhe Stiveni me Xhimin kanë ardhur nga akademia e këtij qyteti. Jam shumë i kënaqur me të gjithë lojtarët e ekipit, por të kesh Xherrardin dhe Karagerin, të cilët do të qëndrojnë këtu edhe për shumë vite, më bën të ndihem i sigurtë në prag të sezonit të ri." Benitezi falënderoi Karagerin për kontributin e dhënë në ekip. "Gjatë të gjithë sezonit të kaluar kam folur mirë për Xhimin, sepse është njeriu i duhur për të mposhtur ekipet e mëdha. Ai është shumë i lidhur me Liverpulin dhe për mua është shumë e rëndësishme të kem në ekip lojtarë, të cilët luajnë me pasion. Na duhet të punojmë akoma me Xhimin, pasi mund të përmirësohet akoma në sezonin e ardhshëm." Të dy lojtarët do të luajnë sot në një ndeshje miqësore ndaj ekipit të Wrexhamit. Javën e ardhshme, Liverpuli do të fillojë të mbrojë titullin e Ligës së Kampioneve, teksa do të luajë ndaj ekipit uellsian të TNS-së.