Gazeta Elektronike: "Futbolli Ndërkombtar" (Nr.3)

[viganv]

Futboll Miks

Merkato, lamtumirë shpenzime të mëdha



Kur jemi në gjysmën e merkatos së verës në Europë, ende nuk është shënuar një blerje e tipit "bombë" që të elektrizonte opinionin sportiv, siç ka ndodhur zakonisht në pragsezonet e fundit. Duke parë atë që ka ndodhur në merkaton europiane, që pas vitit 1995, kur u fut në fuqi ligji i famshëm "Bosman", me milionat e dollarëve që shpenzoheshin për blerje nga më të bujshmet, dallojmë se merkatoja e sivjetshme është shumë e kujdesshme, një kujdes në formën e depresionit. Eshtë e mjaftueshme që shohim paratë e shpenzuara në periudhën 1996-2001, për të parë kontrastin e madh që tregon kursyeshmërinë e mijëvjeçarit të ri. Bukuria e merkatos qëndronte pikërisht për faktin se nga viti 1996 dhe deri në vitin 2001, në çdo verë vendosej një rekord i ri blerjesh në merkato. Në harkun e pesë viteve kaluan nga 28 milionë dollarët (Alan Shirer kalon nga Blekbërni te Njukasëlli), te 85 milionë dollarët (Zinedin Zidan kalon nga Juventusi te Torino). Tani u bënë katër vjet që po presim për një tjetër blerje të përmasave të tilla dhe për këtë ndoshta shpresojmë ende te "bomba" që do të bëjë të flitet gjatë gjithë gushtit në të gjitha qarqet sportive.
Në vitin 1973, Johan Krujf kaloi nga Ajaksi te Barcelona për 1.7 milionë dollarë, duke thyer rekordin e vendosur nga blerja e Juventusit të Pietro Anastasit, nga Vareze. Katër vjet më vonë, bardhezinjtë u përsëritën duke marrë për 3.25 milionë dollarë Paolo Rosin nga Viçenca. Rekord ishte edhe transferimi më 1982-shin i Maradonës nga Boka Zhuniors te Barcelona, për 9.25 milionë euro. Në rastet e Maradonës dhe Krujfit, këta futbollistë që më pas do të konsideroheshin si nga më të mëdhenjtë që ka njohur historia e futbollit, ishin ende të rinj dhe kishin përpara të gjithë karrierën.
Rekordin e Zidanit tani do ta mposhtnin vetëm dy futbollistë. Pra, vetëm në rast se Ronaldinjo ose Adriano do të largoheshin nga skuadrat aktuale, do të shpenzoheshin për ta më shumë se 85 milionë dollarë. Por duket haptazi se Barcelona dhe Interi nuk kanë ndër mend të privohen nga "yjet" e tyre. Surprizat nuk janë asnjëherë të përjashtueshme, por le të shohim ç'ka ndodhur në merkaton e deritanishme. Aty rreth 15 milionë dollarëve, Çelsi mori Del Hornon nga Bilbao, ndërsa Arsenali nga Shtutgarti, Hlebin. Të paktën këto dy skuadra u kanë dhënë një interes më shumë tifozëve të tyre për sezonin e ardhshëm. Shumë të tjera presin, por në atë mënyrë që të lejojnë të mendosh se mund të bëjnë ndonjë blerje "bombë" në minutat e fundit. Kjo për më optimistët, sepse, në të vërtetë, në katër vitet e fundit nuk ka ndodhur diçka e tillë. Në Itali, Interi merr Solarin, Milani Jankulovskin, Roma merr vetëm futbollistë me kosto zero, ashtu si Juvja. Ndërsa dy futbollistët më të lakmuar, Xhilardino dhe Kasano, të cilët klubet janë gati t'i shesin, qëndrojnë ende pa një të ardhme. Arsyeja? Mungojnë paratë. Kjo shihet qartë edhe në Spanjë, Barça është marrë me rinovime kontratash dhe me blerje futbollistësh me paramatër zero, ndërsa Reali ka një "shekull" që po përpiqet të bindë Santosin për të marrë Robinjon. Gjithsesi, bëhen fjalë vetëm për 25 milionë dollarë. Shifër që gjashtë vjet më parë shpenzohej rregullisht nga një skuadër mesatare në Premier Ligë, Serinë A dhe Primera Divizion.
Ka edhe futbollistë të tjerë si Fernando Torres, Xherrard, Henri, Shevçenko apo Trezege që mund të prishin sadopak monotoninë e kësaj merkatoje, por më mirë pyesni Abramoviçin sa ka vuajtur në bisedimet me këta futbollistë. Dhe të mendosh se rusi është i vetmi që mund të bëjë të shpërthejë merkaton më të shterptë të dekadës së fundit.

[viganv]

Futboll Miks

Kupa Libertadores, vjen finalja


Kupa Libertadores ka arritur në aktin e fundit për sezonin 2005-06, finalen. Dy skuadra braziliane do të ndeshen në këtë veprimtari të ngjashme me Ligën e Kampioneve në Europë. Pra, ndeshja ndërmjet Sao Paolos dhe Atletiko Paranaenses do të përcaktojë kampionen e Amerikës së Jugut në rang klubesh. Veprimtaria e sivjetshme arrin në epilog me një ngjarje të shëmtuar, gjatë ndeshjes çerekfinale ndërmjet Boka Zhuniorsit dhe Guadalaharës. Meksikanët ishin në avantazh 4-0 dhe ndeshja u ndërpre pesë minuta nga fundi, pasi futbollistët argjentinas provokuan një varg me sherre dhe shkaktuan faulle të rënda ndaj kundërshtarëve. Pas ndeshjes, kampionët e Argjentinës u dënuan të mos merrnin pjesë në Kupën Libertadores deri në vitin 2007. Gjithsesi, në derbin e "sambas", spektakli pritet të jetë ndryshe. Do të jenë dy ndeshje në harkun e shtatë ditëve që do të përcaktojnë gjithçka. Sao Paolo vjen në këtë finale pas fitores në gjysmëfinale ndaj Riverit, në një ndeshje që u shoqërua me rrëmuja brenda dhe jashtë fushës. Brazilianët janë në qendër të kritikave në vendin e tyre, pasi në ndeshjen ndaj Palmeirasit shkaktuan 72 faulle për 45 minuta, por vetëm një futbollist i tyre u nxor jashtë me karton të kuq. Sao Paolo është favorit, për shkak të historisë të saj të lavdishme, ndërsa situata te Paranaense është mjaft e qetë dhe nuk përjashtohet një fitore e kampionëve në fuqi të Brazilit.

[viganv]

Premier Liga

Xherrard ndërron mendje për 24 orë

Kapiteni i Liverpulit, Stiven Xherrard, ka bërë një kthesë 180 gradë. Të martën, ai deklaroi se do të largohej nga "Anfild Road", por, vetëm 24 orë më vonë, mesfushori anglez pohoi se nuk mund të qëndronte larg skuadrës së zemrës. Gjatë kësaj kohe, Çelsi kishte ofruar deri në 50 milionë euro për shërbimet e tij, por Liverpuli refuzoi. Xherrardi tha: "Të martën deklarova se do të largohem, por u premtova tifozëve se do të mendohesha edhe 24 orë dhe tani vendimi im ka ndryshuar. Kam fikur celularin dhe televizorin, dhe kam qëndruar i mbyllur me veten time, sepse ky vendim më takon vetëm mua dhe nuk dua të ndikohem nga faktorë të jashtëm. Të them të drejtën, asnjëherë nuk më ka tërhequr ideja për t'u larguar nga Liverpuli, por u vura me shpatulla pas muri nga drejtuesit dhe më duhej të merrja një vendim. Mendova se nuk kisha zgjidhje tjetër përveç largimit, por me kalimin e orëve e ndjeva se nuk mund të rrija larg Liverpulit. E pranoj që gabova me atë deklaratë, por edhe drejtuesit e klubit kanë gabimet e tyre në lidhje me këtë çështje. Por tani gjërat kanë ndryshuar dhe unë do të punoj për Liverpulin, dhe do të qëndroj në "Anfild Road".
Xherrardi synon të lërë pas shpine këtë episod dhe është i përqendruar në sfidat e reja që e presin me "të kuqtë": "U kam kërkuar falje drejtuesve, por edhe ata më kanë kërkuar falje për gabimet e tyre. Gjithçka është e sqaruar dhe tani do të shohim përpara. Kjo është më e rëndësishmja. U pendova për vendimin e djeshëm dhe kur po qëndroja me të dashurën time, fillova të mendoja një mënyrë për ta shlyer këtë gabim. Rinovimi i kontratës me Liverpulin mendoj se është mënyra më e mirë për të bërë diçka të tillë. Dashuria ime për Liverpulin më jep forcë për të vazhduar karrierën në "Anfild Road". Kam zemrën te kjo skuadër dhe këtë besoj se e kam treguar në të kaluarën dhe po e tregoj tani që jam gati të rinovoj kontratën. Të gjithë ata që më njohin, e dinë se gjëja e fundit që doja, ishte largimi nga Liverpuli dhe për këtë u habitën për vendimin tim. Por tani gjithçka është kthyer në normalitet dhe shoh me optimizëm sfidat e reja që na presin në sezonin e ardhshëm futbollistik, ku do të luajmë si kampionë Europe."
Mesfushori anglez pranon se dashuria për tifozët, ka ndikuar jo pak në vendimin e tij për të luajtur sërish me "të kuqtë": "Marrëdhëniet e mia me tifozët kanë qenë gjithmonë shembullore dhe unë njoh shumë njerëz që do të mërziteshin në rast se do të largohesha. Kur mendova për të ardhmen time, tifozët ishin një pjesë e këtyre mendimeve." Në fundin e deklaratës së tij, mesfushori 25-vjeçar projektoi të ardhmen: "Dua të fitoj sërish me Liverpulin. Tani që vendosa të rinovoj, kam filluar të mendoj për punën që duhet bërë në të ardhmen, për t'i dhënë trofe të tjerë kësaj skuadre."

[viganv]

Premier Liga

Perri: Xherrard, i domosdoshëm për ne

Drejtuesi i Liverpulit, Rik Perri, tha se puna e tyre bëri që Stiven Xherrard të qëndronte në "Anfild Road", pavarësisht se 24 orë më parë mesfushori anglez deklaroi se do të largohej. "I shpjeguam Xherrardit se është shumë i rëndësishëm për ne, për të mos thënë i domosdoshëm, dhe se do të bënim çmos për ta mbajtur në skuadër, - tha Perri. - Eshtë e vërtetë që javët e fundit kanë qenë stresuese për të, por ne shpresonim deri në fund se zemra nuk do ta lejonte kapitenin të largohej."

[viganv]

Premier Liga

Çelsi, merkatoja në vend numëro



Merkatoja e Çelsit nuk ka filluar ende!? Drejtuesit blu, 45 ditë nga fillimi i merkatos në Premier Ligë, kanë arritur vetëm marrëveshjen për të marrë nga Atletiko e Bilbaos Aisier Del Hornon. Shumë pak për një skuadër, e cila duket e kënaqur nga fitimi i titullit kampion që i mungonte prej 50 vitesh. Besimi te përbërja aktuale e skuadrës e ka shtyrë trajnerin Hoze Mourinjo, që të mos kërkojë përforcime. Të paktën kjo është deklaruar publikisht, sepse manovrat e Çelsit në merkato kanë vazhduar, por janë mbyllur në mënyrën më negative të mundshme, pra pa arritjen e asnjë marrëveshjeje. Kjo ka ndodhur me Milanin për Shevçenkon, me Barcelonën për Etonë, me Juventusin për Trezegenë, me Atletikon për Torresin dhe me Interin për Adrianon. Pa harruar këtu që londinezët jo vetëm që nuk i morën shërbimet e Eshli Kolit nga Arsenali, por edhe u gjobitën për shkak të disa takimeve të fshehta me mbrojtësin e majtë të kombëtares angleze. Së fundmi për "blutë", që nuk kanë zgjidhje tjetër përveç se të rikthejnë në "Stemford Birdxh" Krespon pas largimit të Kezhmanit, ka ardhur edhe një refuzim nga Mançester Siti. Drejtuesit e këtij klubi nuk i kanë pranuar 22 milionë eurot e ofruara nga Abramoviçi për talentin e tyre Shon Rajt-Filips. Kështu, Çelsi është gati të shpenzojë edhe oferta 50 milionë euroshe, si ajo e Xherrardit, por gjithsesi merkatoja e "bluve" mbetet në vend numëro. Nuk duhet harruar se bëhet fjalë për një skuadër që në dy sezonet e fundit të merkatos është shpallur "Mbretëresha e Europës."

[viganv]

Serie A

Xhilardino: Parma, ma plotëso dëshirën!


Alberto Xhilardino është kthyer në Itali, pasi ka kaluar një periudhë pushimesh në Meksikë dhe si gjë të parë kërkon Milanin. "Brenda meje i kam idetë e qarta se ç'të ardhme do të doja për veten time, - tha ai. - Milani është skuadra ime e preferuar, por ka edhe të tjera. Nuk e prisja Vierin. Shpresoj që Parma të ma plotësojë dëshirën, sepse kemi një marrëdhënie shumë miqësore dhe shpresoj që të ndahemi si miq." Xhilardino është kthyer dhe ka rihapur merkaton. E vetmja gjë që lojtari duket se e përjashton, është qëndrimi i tij në Parmë, pasi të gjitha alternativat e tjera ai i merr parasysh, edhe pse Milani mbetet zgjedhja e tij e preferuar. "Nuk është vendosur ende asgjë, ﷓ tha ai, ﷓ preferenca ime është për Milanin, por do të mirëprisja edhe ndonjë zgjedhje tjetër dhe, nëse do të mbërrijnë oferta të tjera, do t'i marr parasysh. Ky është viti i botërorit, ﷓ vijoi Xhila, - unë dua të jem protagonist në një skuadër që lufton për kreun." Xhilardinos i vjen keq që bisedimet po zgjasin kaq shumë. "Shpresoja që pas ndeshjes shtesë, çështja të zgjidhej, - ka shpjeguar pyka, - por ja që u ktheva nga pushimet dhe s'e di ende se ku do të luaj. Jam i gatshëm edhe të shkoj qetësisht në grumbullim me Parmën, por shpresoj që më parë të njoh të ardhmen time dhe shpresoj që gjërat të zgjidhen shpejt." Duke qëndruar në temën e Milanit, golashënuesi shprehu habinë e tij për vajtjen e Vierit, i cili mund të jetë një konkurrent i rrezikshëm për një vend si titullar. "Mësova se Vieri kishte kaluar te Milani dhe sinqerisht nuk e prisja të shkonte një futbollist kaq i fortë, edhe pse zë vendin e Krespos. Tani ka tre sulmues me vlera të mëdha." Dhe tani duket se te Parma, nuk ka më vlerë asgjë. Kishte disa parulla të gjata 12 metra, me të shkruar "Anxhiolini largohu", plus një tjetër kundër të gjithë asaj që ka mbetur nga drejtuesit e vjetër. Një përfaqësi tepër e zhgënjyer e tifozëve ka hyrë në zyrat e Parmës, ku ka pasur një ballafaqim që ka zgjatur rreth një orë. Kalisto Tanzi ka vendosur të shprehet për bisedimet e dështuara mes Parmës aktuale dhe shoqërisë së Gaetano Valencës. "Po ai tjetri? - pyeste ish-pronari i Parmës, teksa dilte nga salla e gjyqit, - çfarë ka nodhur? Ka përfunduar? Ka dështuar?" Thjesht nuk mbërritën paratë, - i thotë dikush. "Atëhere janë arsye teknike. Më vjen keq që ka dështuar shitja, shpresoj që Parma të rigjejë atë pozicion në renditje që ka pasur në vitet e fundit. Dhe do të më bëhej qejfi nëse do të merrej nga një bashkësi biznesmenësh parmixhianë. Ku do të shkojë Xhilardino? Nuk e di", dhe kështu ai u largua pa iu përgjigjur hipotezës që, në kohët e tij, ndoshta nuk do ta kishte shitur. "Pronarët, që tani përfaqësohen nga Bondi dhe Anxhiolini, më kanë thënë se largimet nuk do të jenë më shumë se një apo dy." Me pak fjalë, do të mjaftonin Xhilardino dhe Bonera, por tifozët edhe i besojnë, edhe jo kësaj gjëje.

[viganv]

Premier Liga

Përcaktohet kalendari i Primera Divizionit



Eshtë përcaktuar kalendari i kampionatit të ardhshëm të Primera Divizonit. Përballja e madhe Real Madrid-Barcelona do të jetë më 20 nëntor. Java e parë do të luhet më 28 gusht, ndërsa e fundit më 14 maj. Në takimet e fundit Reali do të luajë në Sevilja, ndërsa Barcelona në Bilbao ndaj Atletikos. Ndërkohë kampionia e Spanjës, Barça, do të fillojë mbrojtjen e titullit në fushën e Alavesit. Reali, i etur për sukses, do të luajë ndeshjen e parë të kampionatit në Kadiz. Në javën e parë spikat derbi bask Atletiko Bilbao-Societad. Ja cilat janë ndeshjet e javës së parë të Primera Divizonit: Valencia Betis, Sevilja Santander, Kadiz-Real, Selta-Malaga, Espanjol Getafe, Bilbao-Sociedad, Alaves Barcelona, Majorka Deportivo, Atletiko M-Saragoza, Osasuna Vilareal.

[viganv]

Serie A

Mançini i beson Adrianos për të ardhmen

Roberto Mançini dhe Adriano e kanë mbyllur prfundimisht "luftën e ftohtë", që ekzistonte mes tyre, duke lënë pas shpine keqkuptimet e kampionatit të shkuar. Kampioni brazilian ka qenë mik në barkën e trajnerit e ankoruar pranë Porto Rotondos, ku të dy kanë folur për të ardhmen e skuadrës. Gjatë takimit me yllin amerikanolatin, Mançini mund të ketë menduar të kalojë nga skema 4-4-2, në 4-2-3-1, që është e "markës" braziliane.
Tifozët zikaltër, të paktën ata më supersticiozët, po druhen pas bisedës private mes Mançinit dhe Adrianos, që ndodhi në jahtin e trajnerit nga Jesi. Një druajtje që lind, nga ajo që ka ndodhur një vit më parë, kur në vend të brazilianit, ai që bisedoi me "Mançion" ishte pikërisht Bobo Vieri. Dhe duke parë se si u mbyll historia, me "bomberin" zikaltër që nënshkroi për Milanin një kontratë 2-vjeçare, në mjedisin interist kanë nisur ethet, që edhe me Adrianon mund të jetë i njëjti fund.
Duke lënë supersticionin mënjanë, të dy kanë pritur rastin për të filluar të flasin për të ardhmen e skuadrës, që do të ndërtohet rreth "Perandorit". Duke i harruar keqkuptimet e lashta, Mançini dhe Adriano do të bëjnë më të mirën e tyre për t'i dhuruar Interit atë titull që i mungon që prej vitit 1989. Trajneri, për të plotësuar dëshirat e Adrianos, duket se është i gatshëm të heqë dorë nga skema e famshme 4-4-2, për të kaluar te ajo 4-2-3-1, me një sulmues të vetëm dhe tri mesfushorë pas shpinës së tij (Veron, Stankoviç dhe njëri mes Rekobës dhe Martinsit). Një lëvizje taktike, që ngre në qiell aftësitë e numrit 10 brazilian, që luan më mirë kur ka peshën e sulmit mbi shpatullat e tij. Kjo u pa edhe në Kupën e Konfederatave që u mbyll para pak javësh, ku "viktima" u bënë mbrojtjet e Gjermanisë dhe Argjentinës, të cilat nuk e përballuan dot superfuqinë e "Perandorit".

[viganv]

Serie A

Sampdoria: Jemi në pritje te Rekobës

Në shtëpinë blukaltër, vazhdon kërkimi për një sulmues. Fabio Bazani, duket se po shkon drejt Udinezez, ku do të gjente Serse Kozmin, ndërsa Sampdoria synon te emrat e zakonshëm: Kruz, Tomason dhe Korradi. Por është edhe Rekoba: "Është një telenovelë, - tha drejtori i përgjithshëm gjenovez, Marota. - Ne po presim, por nga Interi nuk vijnë sinjale". Ndërkohë është pohuar, që skuadra do të prezantohet më 15 korrik në orën 21.00 në stadiumin "Marasi".

[viganv]

Serie A

Menaxheri: Van der Meide drejt Fiorentinës

Qëllimet e Fiorentinës janë të qarta: të ndërtojë një skuadër të rëndësishme për të ardhmen. Kohët e fundit, ka qarkulluar emri i Van der Meides si një "pedinë" e re në merkato. Është vetë menaxheri i mesfushorit holandez të Interit, që pohon mundësinë e një kalimi të lojtarit në Firence: "Të dyja klubet po flasin mes tyre për asistentin tim, - tha menaxheri. - Për momentin nuk jemi duke biseduar, por Fiorentina mbetet një mundësi konkrete".