Gazeta Elektronike: "Futbolli Ndërkombtar" (Nr.3)

[viganv]

Primera Division

Kovaçeviç përgënjeshtron largimin

Sulmuesi i Sociedadit, Darko Kovaçeviç, ka deklaruar se zërat për një kalim të tijin te Beshiktashi, janë të pabazuara. Serbi 32-vjeçar tha: "Vitin e ardhshëm do të luaj në Sociedad. Kam një kontratë deri në 2007-n dhe për më shumë që nuk kam pasur asnjë ofertë nga Turqia. Po përgatitem për sezonin e ardhshëm dhe mendoj vetëm për të dhënë maksimumin me Sociedadin."

[viganv]

Primera Division

Ouen qesh për zërat e merkatos

Sulmuesi i Realit, Majkëll Ouen, deklaroi se zërat për një largim nga Reali nuk e bezdisin më. 25-vjeçari tha: "Tanimë zërat për largimin tim nga Reali, nuk më bezdisin më. Përkundrazi, lexoj dhe dëgjoj aq shumë absurditete në lidhje me të ardhmen time, sa më vjen për të qeshur. Sikur të mos mjaftonte, vetëm dje pata një takim me Sakin që më ka konfirmuar qëndrimin."

[viganv]

Primera Division

Valencia synon mbrojtësin Kromkamp

Valencia e ka pothuajse të kompletuar skuadrën me të cilën do të përballojë sezonin 2005-06, por trajneri Sançez Flores vazhdon të kërkojë një mbrojtës së djathtë. Kështu ka të ngjarë të jetë Jan Kromkamp blerja e fundit e skuadrës spanjolle në këtë merkato. AZ Alkmar, skuadra që zotëron pronësinë e futbollistit të kombëtares holandeze, kërkon tetë milionë euro.

[viganv]

Primera Division

Saragoza, në kërkim të një sulmuesi

Saragoza vazhdon të jetë në kërkim të një sulmuesi, pas shitjes së David Vilës te Valencia. Drejtuesit e klubit spanjoll kanë lënë pezull bisedimet me Birmingemin për të marrë Valter Pandianin, pasi duken të tërhequr nga argjentinasi Klaudio Lopez. Drejtuesit e Saragozës janë gati t'i japin pesë milionë dollarë klubit meksikan "Klub Amerika", në të cilën po luan aktualisht ish-sulmuesi i Lacios dhe Valencias.

[viganv]

Liga 1

Zyrtare, Vikash Doraso te PSG-ja



Paris San Zhermeni ka marrë shërbimet e Vikash Dorasosë. Kryeqytetasit do të paguajnë tri milionë euro në arkat e Milanit, skuadër tek e cila u aktivizua Doraso në sezonin e kaluar. Mesfushori 31-vjeçar ka luajtur shtatë ndeshje me kombëtaren franceze. Ish-organizatori i Lionit kaloi në Serinë A verën e kaluar, por luajti vetëm 12 ndeshje me kuqezinjtë. Trajneri i PSG-së, Lorent Fournier, tha: "I njoh cilësitë e Vikashit. Ai do t'i jap diçka më shumë mesfushës sonë." Ndërsa vetë futbollisti shtatshkurtër tha: "Milani më ofroi rinovimin e kontratës për dy vjet, por zgjodha Parisin, sepse kërkoja sfida të reja." Te Parisi ai synon të jetë në vëmendjen e trajnerit të kombëtares franceze, Rajmod Domenek, për një vend në skuadrën kombëtare që do të luajë në botërorin gjerman.

[viganv]

Liga 1

Lioni, në gjurmët e Drogbasë dhe Baroshit


Presidenti i ekipit të Lionit, Zhan Aulas, deklaroi se blerjet e ardhshme të ekipit, mund të vijnë pikërisht nga Premier Liga. Sulmuesi i Çelsit, Didië Drogba, mund të përfshihet në tratativat për blerjen e mesfushorit Mikael Esien. "Eshtë e vërtetë që Çelsi ka shprehur interes për Esienin, por unë shpresoj që ai të qëndrojë edhe për një vit, ndërsa për Baroshin nuk kemi bërë akoma asnjë ofertë, megjithatë shpresojmë që ai të veshë fanellën tonë në sezonin e ardhshëm", - deklaroi Aulasi.

[viganv]

Primera Division

Lioni, basti i karrierës për Hulierin



Xherrard Hulier është rikthyer në arenën futbollistike si trajneri i Lionit, ekipit kampion të Francës. Hulieri, i cili mori postin e trajnerit të Lionit para disa ditësh, është duke ndjekur një kurs edukativ për trajnerë, të organizuar nga UEFA. Që pas largimit të tij nga ekipi i Liverpulit, Hulieri punonte në një televizion sportiv në Angli, por përkushtimi ndaj futbollit ishte shumë i fortë për të qëndruar larg fushave për një kohë të gjatë. Hulieri e pranoi menjëherë ofertën e Lionit, i cili e ka lënë firmën e tij në edicionin e kaluar të Ligës së Kampioneve. Ish-trajneri i Liverpulit u shpreh i kënaqur për suksesin e arritur nga ish-ekipi i tij, i cili arriti të fitonte në finalen e Stambollit ndaj Milanit. "Pasioni dhe entuziazmi për futbollin nuk më lejuan të qëndroja gjatë jashtë fushave të blerta. Lioni është klub i madh dhe është e rrallë që një klub të arrijë të luajë gjshtë vjet radhazi në Ligën e Kampioneve. Lioni ka në përbërje shumë lojtarë të talentuar, të cilët po përmirësohen çdo ditë, - deklaroi Hulieri, i cili në vitin 1986 arriti të fitonte kampionatin francez me ekipin e Paris Sen Zhermeinit. - Natyrisht, te Lioni kemi si qëllim fitimin e titullit të pestë radhazi, i cili do të ishte një rekord në kampionatin francez. Mendoj se është një sfidë e vështirë, por ekipi i ka cilësitë për ta arritur këtë. Ata janë të gjithë profesionistë të afirmuar dhe do jepnin gjithçka për këtë klub. Gjithashtu, dëshirojmë të kemi sukses edhe në Ligën e Kampioneve. Ata e dinë se ku ndodhen, dinë se ku duan të shkojnë dhe duan t'ia arrijnë qëllimit. Tashmë shpresoj të jem unë ai që do t'i shoqëroj drejt suksesit," - përfundoi Hulieri. Trajneri francez falenderoi edhe tifozët e Liverpulit për përkrahjen gjatë viteve të kaluara në "Anfield Road": "Me Liverpulin kam kaluar momente të paharrueshme. Në vitin 2001 arritëm të fitonim disa trofe, përfshi Kupën UEFA dhe Kupën e Anglisë." Gjithashtu, Hulieri nuk la pa përmendur meritat e pasardhësit të tij, Rafa Benitezit, i cili arriti ta fitonte Championsin në vitin e parë në "Anfield Road". "Ai është një trajner i suksesshëm, dhe këtë e ka treguar edhe në Spanjë. Me Benitezin në krye, Liverpuli do të ketë një të ardhme të lavdishme". Pas përfundimit të ndeshjes në Stamboll, Hulierit iu lejua të vizitonte dhomat e zhveshjes, për të përgëzuar ish- lojtarët e tij: "Pata një pritje të jashtëzakonshme, kur hyra në dhomat e Liverpulit. Isha shumë i lumtur për lojtarët dhe për drejtuesit e klubit, pasi ata janë të gjithë miqtë e mi. Nuk mund të kalosh gjashtë vjet dhe të ikësh pa përshëndetur. Unë jam tifozi numër një i Liverpulit, dhe ata e dinë këtë. Nëntë lojtarë të Liverpulit kanë qenë nën drejtimin tim për disa vite dhe gëzimi i tyre ishte edhe i imi. Jam i kënaqur, pasi më 2004-n arritëm ta përfundonim kampionatin në vend të katërt. Finalja e Stambollit ishte një ndeshje e veçant;. Vetëm futbolli mund të të dhurojë emocione të tilla," - përfundoi Hulieri.

[viganv]

Futboll Miks

Vazhdon inspektimi i stadiumeve të Shqipërisë


Licensimet: Kujdes klube të kategorisë së parë!
Shefi i sektorit të licensimeve në federatë, Kreshnik Agolli, së bashku me disa nga anëtarët e komitetit ekzkutiv dhe drejtuesit e sektorit të garave, kanë filluar punën për inspektimin e të gjitha stadiumeve shqiptare në prag të sezonit të ri futbollistik. Agolli së bashku me sekretarin Bici dhe dy anëtarët e komitetit Bode dhe Dervishi kanë parë nga afër të gjitha stadiumet e skuadrave të kategorisë superiore. "Të them të vërtetën, të gjitha stadiumet e kategorisë superiore i plotësojnë kushtet për sezonin e ri futbollistik. Vetëm fusha me bar natyror i Peqinit mund të ketë ndonjë problem gjatë dimrit. Në stadiumet e tjera, si fushat, por edhe kushtet e brendshme, janë të shkëlqyera dhe mund të them se i plotësojnë të gjitha kushtet që ka vënë komiteti ekzekutiv," ﷓ është shprehur dje Agolli. Gjithsesi, ky i fundit ka pohuar se inspektimi nuk ka mbaruar. "Në ditët në vijim do të vazhdojmë inspektimin. Do të shohim të gjitha stadiumet e kategorisë së parë, të dytë dhe të tretë. Për këtë kemi bërë edhe një plan pune. Mund të them se, me sa shoh dhe di, probleme do të kenë stadiumet dhe skuadrat që sapo janë ngjitur në kategorinë e parë. Këtu bëhet fjalë për Adën, Cërrikun, Tepelenën dhe Butrintin. Këto katër ekipe mendohet se kanë probleme me infrastrukturën dhe, më saktë, me stadiumin ku do të luajnë në kategorinë e parë. Sipas informacioneve që kemi për momentin, ata nuk i plotësojnë kushtet. Ne do të verifikojmë gjithçka në terren dhe më pas do të flasim dhe do të vendosim," ﷓ është shprehur dje shefi i licensimeve. Ky i fundit ka shtuar se këto klube duhet të rregullojnë stadiumet deri më 1 gusht, kur do të ndahen përfundimisht edhe licensat për klubet që do të marrin pjesë në kategorinë e parë. Nëse këto katër klube brenda pak kohësh nuk plotësojnë kushtet e licensimit, mund të ndëshkohen rëndë. Rregullorja e këtij aktiviteti e sanksionon qartë se, nëse një klub ka një stadium që nuk plotëson kushtet, skuadra nuk mund të luajë në atë kategori dhe komisioni i disiplinës mund ta ulë një kategori më poshtë.

[viganv]

Futboll Miks

Top-lista, gati emrat e gjyqtarëve të rinj


Federata Shqiptare e Futbollit pritet që të vazhdojë reformën e saj në radhët e gjyqtarëve. Kështu, në mbledhjen e radhës së komitetit ekzekutiv që do të zhvillohet ditën e enjte, veç shumë çështjeve që do të diskutojë, pritet të shqyrtojë edhe listën e gjyqtarëve për sezonin e ri. Këtë fakt e kanë pohuar dje drejtuesit e sektorit të garave. Sipas informacioneve, sektori i garave prej kohësh ka bërë gati listën me të gjithë emrat e gjyqtarëve, të cilët mendohet se do të gjykojnë në sezonin e ri në kategorinë superiore. Në sektorin e garave të bëjnë të ditur se lista shumemërore e gjyqtarëve të top-listës pritet të ketë ndryshime të vogla. Kështu, nga gjyqtarët që kanë mbajtur mbi shpatulla gjykimet në këtë sezon pritet të mos ketë asnjë ikje të bujshme. Kjo sepse, sipas sektorit të garave, "bluzat e zeza" në përgjithësi janë paraqitur mirë. Në këtë drejtim, drejtuesit e sektorit të garave janë shprehur se testimet kanë bërë punën e tyre, duke seleksionuar më së miri gjyqtarët që kanë vullnet dhe dëshirë për të punuar. Ndërkohë, dje është mësuar se, përveç konfirmimit të "gardës së vjetër" në top-listën e gjyqtarëve pritet që të ketë edhe ndonjë "new entry". Kështu, sektori i garave ka propozuar që në top-listë të ngjiten edhe 4 gjyqtarë të rinj, të cilët kanë gjykuar shumë mirë në kategorinë e parë këtë sezon. Bëhet fjalë për Lorenc Jeminin, Ervis Pezën, Tanush Latifin dhe Agim Guçen. Të katër këta gjyqtarë të rinj pritet që të jenë e reja në top-listën e gjyqtarëve për këtë sezon. Edhe të rinj të tjerë, por në listën e anësorëve, pritet që të kalojnë në komitetin ekzekutiv për miratim. Gjithsesi, këta 4 gjyqtarë, para se të gjykojnë në kategorinë superiore, duhet të marrin miratimin e komitetit ekzekutiv. Do të jetë ky organ që do të vendosë nëse do të shtojë emra të rinj në listën e gjyqtarëve më të mirë të Shqipërisë apo jo.

[viganv]

Futboll Miks

Xhorxh Best, i pafajshëm


Ndaj ish-futbollistit të Irlandës, Xhorxh Bestit, nuk do të merret asnjë masë ndëshkimore pas akuzave për dhunimin e një gruaje.
Besti, 59-vjeçar, u arrestua dhe u mor në pyetje për nëntë orë, por mohoi çdo akuzë të bërë ndaj tij. "Pas arrestimit të 59-vjeçarit bëmë një hetim të plotë dhe u konsultuam edhe me prokurorinë e rrethit. Vendimi është marrë dhe ndaj tij nuk do të merret asnjë masë. Akuzat e bëra ndaj tij u mohuan edhe nga dëshmitarët që ndodheshin në vendin e ngjarjes," - deklaroi komisari i policisë së qytetit të Surreit. Besti u ndalua për 48 orë, pasi dyshohej se kishte sulmuar një grua dhe një vajzë të re në një bar të Londrës. Ish-lojtari i Mançester Junajtidit konsiderohet si një nga futbollistët më të famshëm të Premier Ligës. Ai ka luajtur 37 ndeshje me kombëtaren e Irlandës dhe ka shënuar 136 gola për ekipin e Mançesterit. Ai u tërhoq nga futbolli në moshën 26-vjeçare, për shkak të alkoolit.