Gazeta Elektronike: "Futbolli Ndërkombtar" (Nr.3)

[viganv]

Serie A

E.Filipini: Zor se kthehemi në Romë

Binjakët Filipini largohen edhe më shumë nga Lacio. Këtë e ka konfirmuar vetë Emanuele Filipini. "Kam folur pikërisht dje me agjentin tim, i cili gjatë drekës kishte folur me Lotiton." Presidenti e ka ritheksuar ofertën e tij, duke thënë "këtë, ose s'ka tjetër." "Në këtë pikë kam frikë se s'do të bëhet asgjë, pasi nëse gjërat mbeten kështu, zor se do të kthehemi në Romë. Sipas nesh, propozimi që na është bërë, nuk përkon me nivelin që kemi".

[viganv]

Serie A

Lacio i kërkon Udinezes dhe Belerin

Lacio ka nevojë të menjëhershme për mbrojtës. Dhe jo vetëm për të përballuar Intertoton. Bardhekaltrit mund të arrijnë shpejt një marrëveshje me Udinezen për Kribarin dhe t'i shtrojnë bisedimet me friulianët edhe për Belerin. Anësori i djathtë, që e ka nisur nga Lumecane dhe është rritur në Empoli, hyn në planet e Delio Rosit. Bisedimet ndodhen në një pikë të mirë. E vetmja nyje për t'u zgjidhur ka të bëjë me formulën e blerjes. Lotito ka ndër mend ta marrë hua me të drejtë blerjeje, ndërsa Poco do ta jepte vetëm përkundrejt blerjes reale.

[viganv]

Bundesliga

Shtutgarti dështon në blerjen e Makinuas

Shtutgarti ka dështuar në blerjen e sulmuesit nigerian të Atalanës, Stefen Makinua. Trajneri i ri i Shtutgartit, Trapatoni, kërkonte që me shërbimet e 21-vjeçarit të mbulonte largimin e Kuranjit për te Shalke. Refuzimi i ofertës së gjermanëve tregon se nigeriani është i projektuar drej Interit.

[viganv]

Bundesliga

Meksikani Borgeti, një hap larg Hertës

Sulmuesi meksikan, Xhared Borgeti, ka pranuar se është pranë kalimit te Herta e Berlinit. Futbollisti që shënoi tre gola në Kupën e Konfederatave, dy ndaj Gjermanisë dhe një ndaj Brazilit, u shpreh se menaxheri i tij po vazhdonte bisedimet dhe se do të kishte dëshirë të luante sezonin e ardhshëm me Hertën.

[viganv]

Bundesliga

M'gladbah kërkon Helveg nga Noruiçi

Skuadra gjermane Borusia Mynshengladbah është pranë danezit Tomas Helveg. Gjermanët do të paguajnë 200 mijë stërlina te Noruiçi, gjithmonë në rast se Helvegu pranon oferën e tyre. Lajmin e ka bërë të ditur vetë drejtuesit i klubit anglez, Neil Donkaster.

[viganv]

Primera Division

Real-Robinjo, komplikohet gjithçka


Sulmuesi brazilian Robinjo ka shprehur disa herë dëshirën e tij për të luajtur tek ekipi i Realit të Madridit. Dëshira e tij është është mohuar nga drejtuesit e ekipit të Santosit, të cilët duken të vendosur ta mbajnë sulmuesin 21-vjeçar edhe në sezonin e ardhshëm. Deri para disa javësh, Robinjo gëzonte një raport të mirë me klubin brazilian, i cili e ndihmoi të ngrihej në nivelet e larta të futbollit botëror. Por, pas fitimit të Kupës së Konfederatave, Robinjo dha një intervistë për shtyp, e cila e ndryshoi të gjithë situatën. Robinjo deklaroi se kishte biseduar me drejtuesit e Realit dhe se ishte i gatshëm të luante me ekipin spanjoll. Pothuajse menjëherë pas kësaj deklarate, presidenti i Santosit, Marselo Teiksera, deklaroi për televizionin brazilian se Robinjo kishte një kontratë që skadonte në 2008-n. Tekseira akuzoi Realin për një afrim të paligjshëm të lojtarit, duke thënë: "Kjo është një mungesë respekti ndaj Santosit. Ata kanë fuqi ekonomike, por kjo nuk do të thotë se mund të bëjnë çfarë të duan. Kjo nuk do të ndodhë, pasi Robinjo nuk do të luajë për ata në sezonin e ardhshëm." Që nga kjo deklaratë, presidenti i Santosit është i vendosur të provojë që klubi ku ka luajtur Peleja për pjesën më të madhe të karrierës së tij, meriton respektin e duhur. Tekseira nënvizoi një klauzolë në kontratën e Robinjos, në të cilën shkruhej se në rast prishjeje të kontratës para vitit 2008, duhet të paguajë një gjobë prej 50 milionë dollarësh. Ai i kërkoi Robinjos të rikthehej në stërvitje dhe të përgatitej për sezonin e ardhshëm të kampionatit brazilian. Robinjo u gjobit, pasi nuk mori pjesë në stërvitjen e së premtes. Në konferencën e dhënë për shtypin vendës, Robinjo deklaroi se Reali kishte ofruar 25 milionë dollarë për shërbimet e tij, por oferta ishte refuzuar nga drejtuesit e ekipit të Santosit. Nga ana tjetër, klubi i Santosit deklaroi: "Drejtuesit e Santosit e njohin mirë karakterin e Robinjos dhe janë të sigurtë se ai po orientohet gabim nga njerëz, të cilët kanë vetëm interesa financiare mbi të. Edhe Robinjo është i vetëdijshëm për faktin që Santosi i dha mundësinë për t'u bërë një lojtar i nivelit botëror." Qëndrimi i presidentit Teikseira ka fituar respektin e shumë tifozëve brazilianë, të cilët janë të lodhur duke parë talentet e ekipeve të tyre, teksa largohen drejt ekipeve europiane. "Kjo marrëveshje duhet të arrihet me aprovimin e klubit të Santosit. Ata e kanë zbuluar dhe i kanë kushtuar kohën e nevojshme," - deklaroi një tifoz i Santosit. Gjithashtu, kritikët brazilianë u ankuan për çmimin e vogël që ofrohej nga klubet europiane për lojtarë të Amerikës së Jugut. Për shembull, Reali ka ofruar gjysmën e shumës së Xherrardit për sulmuesin Robinjo. Tekseira vazhdoi: "Asnjë nuk e detyroi Robinjon të nënshkruante një kontratë me ne deri në 2008-n. Nëse ai e bëri këtë, ishte vetëm sepse dëshironte të qëndronte këtu", - përfundoi presidenti i Santosit.

[viganv]

Primera Division

Di Vaio: Dua të luaj në botëror



"Tashmë objektivi ynë kryesor është që të fitojmë në Intertoto, për t'u kualifikuar më pas në Kupën UEFA," - kanë qenë pikërisht këto fjalët e Marko Di Vaios. Me sa duket, sulmuesi italian kërkon me çdo kusht që të harrojë sezonin e kaluar, i cili e pa disi në hije dhe pa dyshim që synon të rikthehet në nivelet më të larta. Më pas, ai ka vazhduar deklaratën e tij, duke shtuar: "Jemi të detyruar të fitojmë në Intertoto, më pas do të ishte vërtet një tragjedi për ne. Vitin e kaluar ishim në një periudhë të errët dhe nuk i arritëm objektivat, por në këtë sezon të gjithë jemi më shumë të motivuar dhe kërkojmë me çdo kusht të rikthehemi aty ku synojmë. Si jemi me merkaton? Kemi bërë shumë blerje dhe tashmë janë të shumtë lojtarët në skuadër. Pra do të kemi disa mundësi zgjedhjeje për të aktivizuar futbollistë në të gjithë sektorët, sidomos në atë të sulmit. Tashmë më duhet të luftoj çdo javë për të zënë një vend në skuadër si titullar, gjithsesi deri tani kam pasur shumë mbështetje nga të gjithë drejtuesit. Objektivi im personal është që të zë një vend në përfaqësuesen e vendit tim për kampionatin botërorë të Gjermanisë. Për të arritur këtë synim, duhet të luaj vërtet shumë mirë." Në të vërtetë, skuadra e Valencias deri tani ka qenë shumë aktive në merkato. Përveç trajnerit të ri, Kuik Sançes Flores, skuadra spanjolle ka marrë edhe Patrik Klaivert së bashku me talentin e ri David Vila. Përsa i përket repartit të mesfushës, ata kanë marrë ish-lojtarin e Arsenalit, Edu.

[viganv]

Primera Divison

Ronaldinjo: E ardhmja ime, vetëm te Barça



Ronaldinjo i ka plotësisht që qarta mendimet në kokën e tij. Braziliani mendon vetëm për fanellën e Barcelonës dhe për një të ardhme afatgjatë në "Kamp Nou". Në ditën e fundit të qëndrimit në Greqi, Ronaldinjo ka dhënë një intervistë për televizionet greke, ku mbi të gjitha ka konfirmuar dëshirën e tij për të qëndruar te Barça. Me sa duket, titulli kampion i fituar sivjet, i ka shtuar oreksin për trofe talentit brazilian, që vetëm një javë më parë fitoi Kupën e Konfederatave, si kapiten i kombëtares braziliane. 24-vjeçari tha: "E kam shumë të qartë të ardhmen time, ajo do të jetë në Barcelonë. Jam shumë i lumtur në "Kamp Nou" dhe mendoj se do të qëndroj edhe për disa vjet në këtë skuadër." Kësisoj, braziliani nuk u lë vend dyshimeve dhe firma në kontratën e tij të re deri në vitin 2014, duket thjesht një çështje kohe.
Sezoni i ardhshëm do të jetë shumë i rëndësishëm për Ronaldinjon. Në vitin e edicionit 2005-06, ai duhet të jetë gati për kampionatin botëror, për të mbrojtur titullin kampion me Brazilin. Për më shumë, synimi kryesor me fanellën e Barcelonës do të jetë fitimi i Ligës së Kampioneve. Numri 10 i skuadrës së Rajkardit komenton: "Sezonin e ardhshme duhet të fitojmë Ligën e Kampioneve. Sigurisht, në kampionatin spanjoll do të synojmë në çdo ndeshje të tregojmë se jemi kampionët, por titulli kampion Europe është synimi im kryesor. Edicionin e kaluar na mungonte përvoja, por tani mendoj se jemi gati." Në lidhje me një kursim forcash nga futbollistët që do të luajnë në botëror, Ronaldinjo tha: "Nuk e di se ç'do të bëjnë të tjerët, por personalisht do të jap maksimumin në të gjitha ndeshjet, pavarësisht nga finalet e Kupës së Botës. Në veprimtari të tilla, këmbët motivohen vetë dhe lodhja zhduket. Brazili e tregoi diçka të tillë edhe në Kupën e Konfederatave dhe jo më në një veprimtari si botërori." Gjithsesi, ai nuk e fsheh se Gjermania 2006 është një nga etapat më të rëndësishme të karrierës së tij: "Do t'ju mashtroja në rast se nuk do të pranoja se po pres me padurim të luaj në botërorin gjerman. Kjo veprimtari është më e rëndësishmja në karrierën e një futbollisti." Në fund, Ronaldinjo, i cili përgatitet të luajë sezonin e tij të tretë në Barcelonë, refuzoi të fliste për një kalim të mundshëm te Reali i kolegut të tij brazilian, Robinjo: "Me sa di unë, Robinjo është një futbollist i Santosit dhe nuk mund ta komentoj një kalim të tij te Reali. Nuk do të ishte etike të jepje mendimin për një ngjarje që nuk ka ndodhur."

[viganv]

Primera Division

Luis Fabiano nënshkruan për Seviljen

Sulmuesi brazilian, Luis Fabiano, ka nënshkruar një kontratë katërvjeçare me ekipin e Seviljes. Ekipi spanjoll arriti një marrëveshje me ish-klubin e brazilianit, Porton, dhe tashmë sulmuesi i ardhur në Europë nga Sao Paolo do të luajë në Primera Divizion. Në 2002-shin, Fabiano arriti të shpallej golashënuesi më i mirë i kampionatit brazilian, me 19 gola të shënuar në 23 takime dhe një vit më pas arriti të shënonte 29 gola në 24 takime. Në vitin 2004, ai u shpall edhe golashënuesi më i mirë i Kupës Libertadores, duke e ndihmuar ekipin e Sao Paolos të arrinte deri në gjysmëfinalet e këtij kompeticioni. Me Porton, Luis Fabiano ka arritur të fitojë një Kupë UEFA dhe kampionatin portugez. Në mars të këtij viti, e ëma e tij u rrëmbye dhe u mbajt e fshehur për dy muaj, përpara se të lirohej.

[viganv]

Primera Division

Majorka merr italianin Betarini

Majorka ka arritur një marrëveshje dyvjeçare me ish-mbrojtësin e Parmës, Stefano Betarini. Italiani ka qenë kështu blerja e parë e ishullorëve të Kuperit për sezonin e ardhshëm. Te Majorka, 33-vjeçari do të luajë përkrah bashkatdhetarit të tij, Mark Iuliano. Nuk janë bërë ende të ditur termat financiarë të kësaj marrëveshjeje.