Gazeta Elektronike: "Futbolli Ndërkombtar" (Nr.3)

[viganv]

Serie A

Udinezja e Kozmit duket si "Peruxhia"



Dhe tani Bazani. "Nëse doni pikërisht të më shisni Iakuintën, më jepni sulmuesin tek i cili unë kam besim". Duhet të ketë menduar kështu Serse Kozmi, trajneri i ri i Udinezes, kur krerët e klubit i shpjeguan që një tjetër "xhevahir" i grupit, Vinçenco Iakuinta, është duke shkuar në një tjetër "muze", tek ai i Firences, që vepra arti zotëron shumë.
Një Udineze "ala" Peruxhia, për momentin është vetëm fantazi futbolli, por pak nga pak "gurët" e çmuar të gatshëm për t'u përfshirë në skuadër, mund të jenë pesë apo gjashtë. Ghedafi dhe Obodo janë blerë. Iakuinta (si Jankulovski, Kroldrup dhe ndoshta Pizarro) duhet të sakrifikohet. Destinacioni, Fiorentina, gjithnjë nëse Xhampaolo Poco do të shohë teorinë e tij, që t'ia shesë lojtarët e mirë vetëm skuadrave që janë renditur më mirë se Udinezja në kampionatin e fundit, apo klubeve të huaja të nivelit të lartë. Mirëpo Vinçencoja duhet zëvendësuar. Duke konsideruar që Di Mikele dhe Di Natale janë një siguri, duhet një "pykë". Pra, një terminal loje që shndërron në gola aksionet e prodhuara nga dy "Di"-të. Ideja Bazani e intrigon patjetër Kozmin, që e ka drejtuar tek Areco në 1999-2000 (C1, 20 gola në 31 ndeshje, në atë që ishte sezoni shpërthyes për të) dhe te Peruxhia në 2001-2002 (10 gola në 29 ndeshje), duke e bërë të njohë klubet e mëdha. Të dy kanë mbetur miq. Sampi do të privohej nga sulmuesi, duke parë që marrëdhëniet me Novelinon nuk janë dhe aq të mira. Bazani është në Meksikë ende për muajin e mjaltit dhe asnjë nuk e ka lajmëruar se si janë gjërat. Vetëm ia kanë sugjeruar, por te Kozmi ai do të shkonte me vrap. Dhe kjo gjë do t'i jepte çështjes një kthesë të rëndësishme. Pa dyshim që Sampdoria duhet të gjejë një zgjedhje dhe ditët e fundit është folur për Korradin e Valencias. Por i shoqi i Alesia Merxit nuk është i vetmi lojtar i shkollës së Kozmit, që i pëlqen Udinezes. Për mesfushën, duke parë largimin e mundshëm të Pizarros, mendohet Fabio Liverani, që Kozmi e adhuron. Liverani do të shkëputej menjëherë nga Lacio, madje ka dashur ta bëjë një gjë të tillë edhe vjet kur Kozmi drejtonte Xhenoan në Serinë B. Bisedimet kanë filluar dhe me tërheqjen drejt Ligës së Kampioneve, lojtari nuk do të thoshte jo. Siç do të ishte i lumtur të kthehej te "mjeshtri" i tij, Marko Di Loreto, qendërmbrojtësi 31-vjeçar. Një këmbim ideal dhe i besueshëm për "gjyshin" Sensini, që sapo ka rinovuar kontratën edhe për një sezon, por thuajse në moshën 39-vjeçare nuk mund të sigurojë ecurinë taktike gjatë sezonit. Di Loreto, me Kozmin tek Areco dhe Peruxhia, është prej ditësh në shënjestrën e familjes Poco (në Udine sapo ka zbarkuar edhe ish-atalantini Natali), por duhen pritur zhvillime të reja nga çështja "Peruxhia". Atij do t'i bashkohej edhe portieri Zheljko Kalac, 32 vjeç, australian, tepër i besueshëm në këmbim të Morgan De Sanktisit, që kohët e fundit është ankuar nga rroga e ulët.
Ndërkohë, Serse Kozmi, në prag të grumbullimit të skuadrës së tij për sezonin e ri, tha: "Grupi është dhe për turin paraeliminator jemi gati. Sigurisht, koha është e pakët, por Udinezja është një skuadër e madhe dhe pa pikë të dobëta. Për mënyrën se si jemi vendosur tani, rolet janë të stërmbuluara. E ardhjma e Pizarros dhe e Iakuintës? Nuk është diçka që varet nga unë. Unë mund të them vetëm se janë dy lojtarë vendimtarë që mund të konfirmohen në nivele të larta".

[viganv]

Serie A

Spaleti vlerëson projektin roman



Luçiano Spaleti ka besim. Ai i beson recetës së Bitëllsave: "Shpresojmë që spektakli t'ju pëlqejë, do të ketë padyshim buzëqeshje. Rehatohuni dhe të fillojmë mbrëmjen". Donte të thoshte sezonin. Megjithatë, ai do ta provojë, jini të sigurtë. Ndoshta do t'i duhet pak ndihmë nga miqtë e tij: "Unë do të jap përkushtimin maksimal, - vazhdon Spaleti. - Por do të varet edhe nga futbollistët që do të kem të gatshëm". Pak koncepte deri tani, por të paktën janë të qarta. "Do të rikrijojmë një shpirt skuadre, do të luftojmë të gjithë së bashku dhe do të punojmë me përulësi, pavarësisht nga vështirësitë". Vështirësi që kanë lidhje me merkaton e bllokuar për momentin nga FIFA, për shkak të çështjes "Mekses". Nëse nuk vjen Pizarroja, çdo gjë është e siguruar në mesfushë. "Pizarro më pëlqen, - pranon Spaleti, - por "regjisorin" mund ta krijojmë në shtëpi, kemi zgjedhje të vlefshme. Akuilani për shembull. Organika aktuale e Romës më bën të qetë. Me ata lojtarë që kam, mund të drejtojmë një skuadër me aftësi të mira. A i kam kërkuar klubit të shesë Mansinin? I kam thënë vetëm që është një futbollist i mirë, me karakteristika shumë të rëndësishme". Ndoshta Kasano do ta nisë stërvitjen me Romën. A do të jetë problem? "Pse? Ai është një lojtar si gjithë të tjerët, - përgjigjet tekniku verdhekuq. - Përkundrazi, jam kureshtar ta njoh dhe të punoj me të. Jemi një grup, të gjithë kanë karakteristikat e tyre dhe të gjithë duhet të bashkëpunojnë". Roma është një qytet "i sëmurë" nga futbolli, flitet në çdo orë për të nga të gjitha moshat, ndaj dhe kërkesat e njerëzve do të jenë maksimale, përfshirë këtu edhe kritikat. "Varet nga ajo që do të më thuhet, - reagon Spaleti. - Më duket se këtë vit, tifozët e kanë mbështetur skuadrën deri të dielën e fundit, pavarësisht nga rezultatet. Nuk vdes nga dashuria e madhe. Vetëm nëse e përdor keq bëhet e rrezikshme. Dhe në këtë rast ndodh që ndonjë lojtar më i dobët, nuk arrin të shprehë nivelet e tij. Për këtë duhet të reflektojë mirë, para se të luajë me një lojtar të mirë e të ri si Kurçi"

[viganv]

Serie A

Pizarro këmbëngul: S'më intereson Championsi

Vazhdojnë mosmarrëveshjet mes Pizarros e Udinezes. Mesfushori kilian, që s'është rikthyer ende nga pushimet, lëshon mesazhe të qarta, por kësaj here tepër kërcënuese: "Nuk më intereson të luaj në Ligën e Kampioneve me Udinezen, dua të shkoj në një klub të madh, - tha Pizarro. - Klubi duhet të mbajë premtimin që më ka bërë kohë më parë, që do të më shiste kur të mbaronte kampionati. Zgjedhje nuk kam. Një mes Juves, Interit e Romës do të ishte mirë". Por nga Udine replikon drejtori sportiv Leonardi: "Pizarro kërkon të ikë? Të na sjellë një ofertë serioze dhe do ta marrim në konsideratë, ndryshe do të qëndrojë këtu".

[viganv]

Serie A

Moxhi zgjedh mes Kasanos e Vieirasë

"Antenat" e Luçiano Moxhit janë drejtuar nga Kasano e Vieira. Dy raste që Juvja kërkon t'i përmbushë, por që të dy kushtojnë 20 milionë euro dhe paratë nuk janë. 29-vjeçari francez, për momentin, duket më në epërsi sesa sulmuesi 23-vjeçar, para së gjithash sepse Roma, për shkak të çështjes "Mekses", nuk mund të pranojë lojtarë në merkaton e futbollit. Moxhi e pret zgjidhjen edhe nga një tjetër aspekt: shitja e Trezegesë që mund të sjellë para në kasafortat bardhezi.

[viganv]

Serie A

Gjyqtarët: Bergamo ikën, Paireto jo

Paolo Bergamo largohet nga detyra e "dizenjatorit" të gjyqtarëve, që e mbulonte së bashku me Pierluixhi Paireton. "Kam ndjerë një dhimbje që lindi në momentin ku kritikat u bënë të parezistueshme, - shpjegoi vendimin e tij Bergamo, - ndaj po largohem nga detyra ime". Ndërsa kolegu i tij, Paireto, shtoi: "Do të qëndroj i gatshëm për shoqatën e gjyqtarëve në të ardhmen". Detyra e dy ish-drejtuesve skadonte më 30 qershor dhe tani Karraro, presidenti i federatës italiane, duhet të bëjë emërime të reja.

[viganv]

Serie A


Markexhani: Jam gati të vij te Roma

Ish-portieri i Lacios, Luka Markexhani, pranon bisedimet me Romën: "E falënderoj për stimulin, - tha 39-vjeçari. - Unë jam i gatshëm. Megjithatë, nuk duhet të nxitoj, Kurçi është i mirë. Menaxheri im ka marrëdhënie të mira me Praden, por për momentin më duket pak e mundshme të flas. Mosha ime nuk është një problem. Para punës nuk shihet njeriu".

[viganv]

Serie A

Roma pëlqen Godeasin e Triestinës

Denis Godeas është në shënjestrën e Romës. Qendërsulmuesi 33-vjeçar i Triestinës i pëlqen trajnerit të ri verdhekuq, Spaleti. Konfirmimi vjen edhe nga Paolo Vagexhi, menaxheri i lojtarit: "Kemi pasur bisedime me klubin verdhekuq dhe Denisi i intereson shumë. Kemi marrë oferta nga klube të tjera si Breshia e Modena, por është e dukshme që Roma do të ishte një zgjeshje shumë e rëndësishme".

[viganv]

Serie A


Paljuka: Dua Serinë A, por me Bolonjën

Një "dishezë" e pa kuptuar ende. Xhanluka Paljuka, pavarësisht se ka shumë kërkesa për të qëndruar në Serinë A, kërkon ta bëjë me skuadrën e zemrës: Bolonjën. Ish-portieri i kombëtares, shpreson te "ripeshkimi" i kuqebluve: "Jam thuajse 39 vjeç dhe nuk dua të tërhiqem, - tha Paljuka, - sepse jam gjithnjë një nga më të mirët. Kam dëshirë dhe kënaqësinë të shtang ende, por dua të qëndroj te Bolonja, mundësisht në Serinë A. Bolonja në B, është e padrejtë, ka skuadra të tjera që s'janë në rregull. Shpresoj që "beteja" e Gaxonit të fitohet, jo vetëm për të. Kjo është edhe "beteja" ime, ose më saktë, duhet të jetë "beteja" e të gjithë pjesës së pastër të futbollit.

[viganv]

Serie A

Lacio, Simone Inzagi thyen brinjën

Nisin problemet e para për Delio Rosin. Në fakt, Simone Inzagi, gjatë ndeshjes së djeshme stërvitore, ka pësuar një traumë të fortë në hemikostatin e djathtë. Testet radiografike, së cilave u është nënshtruar sulmuesi, kanë nxjerrë në pah thyerjen e brinjës së dhjetë djathtas. Ish-sulmuesi i Sampit tani duhet të qëndrojë dy javë pushim absolut, gjatë të cilave do t'u nënshtrohet trajtimeve fizioterapeutike dhe mjekësore.

[viganv]

Serie A

Fiorentina, Prandeli: Do të ngjitemi lart

Çezare Prandeli mezi pret ta nisë aventurën me ekipin vjollcë. "Fiorentina është një klub që ka dëshirë të shkojë lart, - ka thënë ai, - me këta tifozë kaq të ngrohtë që i qëndrojnë gjithnjë pranë skuadrës. Do të jetë e rëndësishme ta nisnim me frymën e duhur." Flitet për një ardhje të mundshme të Xhilardinos, por trajneri frenon: "Alberto do të shkojë në një skuadër të madhe, ku të mund të luajë edhe në Europë."