Gazeta Elektronike: "Futbolli Ndërkombtar" (Nr.3)

[viganv]

Serie A

Luka Toni: Firence më tërheq


Luka Toni është në vështirësi me Palermon dhe tanimë ndodhet në prag të largimit, pavarësisht nga përgënjeshtrimet, jo edhe aq të bindura, të presidentit Zamparini. "Firence është një qytet fantastik me një president entuziast, - ka thënë Toni, - dhe ka një trajner të madh. Jam i sigurt se do të rikthehet që sivjet në nivelet e larta. Ideja për të luajtur atje, më tërheq dhe interesimi i tyre më josh".

[viganv]

Serie A

Udineze, 7 milionë euro nëse e do Baxanin


Administratori i deleguar i Sampdorias, Bepe Marota, ka fiksuar çmimin e Fabio Baxanit, shtatë milionë euro. Lojtari ndodhet në shënjestrën e Udinezes, që është e gatshme t'ia plotësojë kërkesat Kozmit. Klubi gjenovez nuk do të pranonte ta jepte lojtarin hua apo në bashkëpronësi.

[viganv]

Serie A


Zyrtare, Xhenoa merr Kristian Abiatin

Kristan Abiati është portieri i ri i Xhenoas. Klubi kuqeblu e ka marrë hua nga Milani dhe mund ta blejë plotësisht sezonin e ardhshëm, duke u paguar kuqezinjve tre milionë euro. Transferimi i portierit, në këtë pikë, do të bëhet fakt i kryer, vetëm nëse do të konfirmohet se Xhenoa s'do të përjashtohet nga Seria A, për çështjen e hetimit të shitjeve të ndeshjeve.

[viganv]

Serie A


Lotito: Sezari do të qëndrojë, Sereni jo

Sot Lacio mund të arrijë blerjen e Kribarit. Koha varet nga Udinezja, që do ta lërë të lirë brazilianin sapo të arrijë marrëveshjen me Juventusin për Tudorin. Dje Lotito ka pasur një takim me Liveranin, i cili ndodhet në dilemë mes shitjes dhe përzgjatjes së kontratës. Presidenti, më pas, ka sqaruar: "Sezari do të qëndrojë, ndaj tij kemi një detyrim. Sereni? Nëse dikush na kërkon të largohet, të na paraqesë edhe zgjidhjen e kontratës."

[viganv]

Serie A

Pandev: Do të jetë viti im me Lacion

Kam dashur gjithnjë të qëndroj te Lacio, edhe pse më kërkonte Interi. Jam absolutisht i bindur që në këtë sezon do të shënohet edhe shpërthimi im. E pranoj që, më mirë ndihem te Lacio, se sa te Interi". Fjalë të Goran Pandevit, në ditën e tij të parë të stërvitjes me Lacion, që ka filluar fazën e parë përgatitore për sezonin e ardhshëm. Më pas, maqedonasi shtoi: "Tani duhet të fitojmë Intertoton dhe të shkojmë në Kupën UEFA".

[viganv]

Bundesliga

Santa Kruz: Dua të jem i rëndësishëm



Paraqitja e Roke Santa Kruzit në takimin miqësor midis Bajernit dhe ekipit të Mynihut 1860, nuk mbeti pa u vënë re nga trajneri Feliks Magat, i cili deklaroi: "Pres shumë nga Roke gjatë këtij sezoni". Sulmuesi i njohur me nofkën e "grabitësit të pamëshirshëm", arriti të shënonte katër gola në 34 minutat e para, duke fituar duartrokitjet e tifozëve bavarezë. Megjithatë, aktualisht Santa Kruz nuk hyn ndër zgjedhjet e para të trajnerit Magat, pas paraqitjes së jashtëzakonshme të Roi Makait dhe Klaudio Pizarros. Sulmuesi 23-vjeçar i Bajernit deklaroi: "Për mua, ky sezon është shumë i rëndësishëm. U ktheva përpara përfundimit të pushimeve, pasi doja të rikuperoja kohën e humbur gjatë dëmtimit. Duhet të filloj stërvitjen pak më shpejt se të tjerët. Kam nevojë për pak kohë për të rigjetur formën time". Në sezonin e kaluar, Santa Kruz luajti vetëm në katër takime, për shkak të dëmtimeve të shumta. Dy operacione në gju dhe vdekja tragjike e vëllait të tij ia kanë vështirësuar shumë punën paraguajanit, i cili është në sezonin e tij të katërt tek ekipi i Bajernit. "Më duhet të luaj më shpesh. Shpresoj që në sezonin e ardhshëm, të kem mundësi të luaj edhe në Ligën e Kampioneve," - deklaroi Santa Kruzi. Trajneri Feliks Magat u shpreh se do të ishte i lumtur t'i jepte mundësi lojtarit të tij, për të treguar vlerat në fushën e lojës. "Për mua, ai është si një lojtar i ri. Kam shumë shpresë se ai do të arrijë të rikonfirmohet në nivelet më të larta të futbollit europian." Roke Santa Kruz ka akoma edhe një vit në kontratën e tij me Bajernin e Mynihut, por për të janë interesuar edhe disa klube si Herta e Berlinit dhe Shtutgarti.

[viganv]

Bundesliga


Ismael dhe Karimi, dita e parë me Bajernin



Dy blerjet e reja të skuadrës bavareze, Ismael dhe Karimi, kanë zhvilluar dje stërvitjen e parë me Bajernin. Ismaeli njihet në Gjermani pas paraqitjes së tij të suksesshme me Verderin dhe 26-vjeçari ka qenë i kërkuar për një kohë të gjatë nga Magati, ndërsa iraniani Karimi, në deklaratën e tij të parë pas stërvitjes, tha: "Jam shumë i lumtur që do të luaj me një skuadër si Bajerni. Këtu kam mundësi t'i shndërroj në realitet të gjitha ëndrrat e mia."

[viganv]

Bundesliga


Bajerni i Mynihut i ka propozuar një kontratë dyvjeçare 20-vjeçarit Andreas Otl, i cili në dy sezonet e fundit ka luajtur 59 ndeshje si titullar në kategorinë e tretë gjermane. Kështu, Otli ka të ngjarë të jetë talenti i radhës, i zbuluar nga drejtuesit bavarezë, pas Shvainstaigerit dhe Guerreros, të zbuluar vjet, dhe Hargrivsit një vit më parë.

Madouni, te Bajern Leverkusen

Leverkuseni ka përfunduar blerjen e Ahmed Madounit nga Borusia e Dortmundit. 24-vjeçari ka firmosur një kontratë dyvjeçare dhe do të zërë te skuadra e Augentalerit vendin e Pogatetzit, i cili javën e kaluar firmosi për Midëllsbroun. Trajneri gjerman tha: "Madouni është përfitimi ideal për ne dhe mund të luajë përkrah Novotnit, sepse Jan Inger është shumë i ri.

[viganv]

Bundesliga

Hënes: Bajerni, si Gjermania



Drejtori i përgjithshëm i Bajernit të Mynihut, Uli Hënes, po përgatitet për fillimin e sezonit të ri dhe u shpreh i kënaqur për paraqitjen e ekipit të Gjermanisë në Kupën e Konfederatave. 53-vjeçari deklaroi: "Tre muajt e fundit më kanë dhënë një kënaqësi të veçantë. Asnjë nuk mund ta imagjinonte që ekipi i Gjermanisë do të zhvillonte një kompeticion të jashtëzakonshëm." Hënesi komentoi progresin e Bastian Shveinsteigerit, i cili bëri një paraqitje të mirë në Kupën e Konfederatave. Ja dhe intervista e tij e plotë:
- Si ndiheni në prag të sezonit të ri?
- Jam shumë i lumtur që të gjithë lojtarët u rikthyen në ekip. Nuk ke si të mos jesh i gëzuar, kur të gjithë lojtarët kthehen në formë të mirë. Sezoni i kaluar ishte një sukses për ekipin tonë. Shpresojmë që këtë sezon të arrijmë të përmirësohemi akoma më shumë.
- Pushimet e verës u zëvendësuan nga Kupa e Konfederatave. Mendoni se lojtarët e ekipit tuaj do ta vuajnë lodhjen e tepërt?
- Vitin e kaluar kaluam disa momente të paharrueshme me ekipin e Bajernit. Luajtëm shumë mirë në Ligën e Kampioneve dhe arritëm të fitonim kupën dhe kampionatin gjerman. Lojtarët që morën pjesë në Kupën e Konfederatave, nuk janë aspak të lodhur. Përkundrazi, asnjë nuk e priste që Gjermania do të luante një futboll të nivelit të lartë. Nëse vazhdojmë kështu, do të kemi mundësi të mira në kampionatin botëror.
- Filozofia e Gjermanisë i ngjan shumë asaj të Bajernit: forcë fizike dhe sulm të shpejtë. Ju si mendoni?
- Për një trajner kombëtareje është më e lehtë, pasi mund të zgjedhë midis më shumë lojtarëve cilësorë. Nëse dëmtohet dikush, ai mund ta zëvendësojë duke grumbulluar një lojtar tjetër. Kurse për një trajner të thjeshtë, merkatoja ka limite dhe nuk mund të bëhen zëvendësime në mes të kampionatit. Por, në aspektin filozofik, jam dakord se ka gjëra të ngjashme midis Gjermanisë dhe Bajernit. Dëshira në sulm dhe forca fizike janë karakteristë e këtyre ekipeve.
- Dy nga lojtarët e Bajernit fituan reputacion gjatë Kupës së Konfederatave. Si e vlerësoni progresin e bërë nga Bastain Shveinsteiger dhe Sebastian Daizler?
- Bastian Shveinsteiger ka bërë një progres të jashtëzakonshëm. Jam një njeri optimist, por nuk e imagjinoja kurrë se ai do të bëhej kaq shpejt një titullar i rregullt i kombëtares së Gjermanisë. Ka shumë fantazi në lojë dhe ne jemi shumë krenarë për të. Nëse vazhdon në këtë rrugë, do të jemi më të sigurtë për Kupën e Botës.
- Po Sebastian Daizler?
- Sebastian Daizler ka kaluar një periudhë të vështirë, por për mendimin tim, kjo i përket së kaluarës. Arriti të zhvillonte një sezon të mirë te Bajerni i Mynihut dhe ka bërë një paraqitje të mirë me kombëtaren. Kupa e Konfederatave i ka dhënë shumë besim në vetvete dhe jam i bindur se është në rrugë të mbarë. Jam i bindur se edhe te Bajenri, ai do të arrijë të japë maksimumin e tij.
- Mikael Balak arriti të konfirmohej edhe një herë si lideri i kombëtares së Gjermanisë. Ç'mendim keni për të?
- Balaku është i jashtëzakonshëm brenda dhe jashtë fushës. Në Kupën e Konfederatave, ai tregoi edhe një herë se është lojtari më i mirë i ekipit kombëtar. Jemi me fat që e kemi te Bajerni. Nuk do të habitesha nëse vitin tjetër do të shpallej lojtari më i mirë.

[viganv]

Premier Liga

Çelsi do Xherrardin, Liverpuli thotë "jo"


Liverpuli ka refuzuar ofertën e ekipit të Çelsit për blerjen e mesfushorit Stiven Xherrard. Drejtori i përgjithshëm i Liverpulit, Rik Perri, deklaroi për BBC-në që Çelsi kishte bërë një ofertë prej 54 milionë eurosh klubit të "redsave". "Konfirmoj se Çelsi ka bërë një ofertë për Xherrardin, por ne e refuzuam", - deklaroi Perri. Në faqen zyrtare të ekipit kampion të Anglisë shkruhej: "Pas komenteve të Rik Perrit, Çelsi konfirmon interesimin e tij për mesfushorin Stiven Xherrard. Detajet e kësaj oferte nuk janë të disponueshme. Dy ditë më parë, Xherrardi refuzoi rinovimin e kontratës së tij me Liverpulin. Pas fitimit të Ligës së Kampioneve, Xherrardi rinovoi edhe për dy vjet kontratën e tij. Drejtuesit e Liverpulit i kërkuan mesfushorit anglez të rinovonte kontratën e tij deri në 2010-tën, por bisedimet u ndërprenë, për shkak të një zënke të Xherrardit me trajnerin Benitez. Megjithatë, trajneri spanjoll u shpreh se klubi nuk ka asnjë nevojë financiare për të shitur mesfushorin Xherrard. "Nuk na duhen para. Nuk kemi nevojë ta shesim Stivin. I kemi përzgjedhur lojtarët që duam të mbajmë në ekip dhe ka shumë lojtarë që duan të luajnë me kampionët e Europës. Do të blejmë disa, por jo shumë. Tifozët duhet ta pranojnë këtë. Unë dëshiroj që Xherrardi të qëndrojë me ne deri në fund të karrierës së tij. I gjithë bordi drejtues dëshiron që ai të qëndrojë. Do të flasim sërish me lojtarin, me menaxherin e tij dhe do të përpiqemi të gjejmë një zgjidhje. Do të mundohemi të rihapim bisedimet dhe të gjejmë një marrëveshje të kënaqshme për të dyja palët. Por faktin që Xherrardi mund të kalojë te Çelsi, e bën më të besueshëm vetë deklarata e mesfushorit anglez: "Kam gjashtë javë që përpiqem të gjej gjuhën e përbashkët me drejtuesit për kontratën e re. Tani nuk mund të duroj më. Me gjithë respektin për drejtuesit dhe tifozët, dua të luaj gjetkë." Edhe Reali i Madridit ka shfaqur interes për mesfushorin e kombëtares së Anglisë, i cili ka edhe dy vite në kontratën e tij aktuale me ekipin e Liverpulit. Tashmë Reali dhe Çelsi kanë bërë ofertat e tyre për Xherrardin, i cili u shpreh se Liverpuli nuk u kishte kushtuar aspak rëndësi negociatave për rinovimin e kontratës së tij. Në Spanjë, drejtuesit e Realit janë optimistë, pasi janë të bindur se Xherrardi nuk do ta linte kurrë Liverpulin për të kaluar te një tjetër klub anglez. Drejtori sportiv i Realit të Madridit, Arigo Saki, tha: "Sigurisht që jemi të interesuar për të. Cili klub nuk do të ishte?" Megjithatë, Saki u shpreh se më parë Xherrardi duhet të tregojë interes për të kaluar tek ekipi i Realit. "Derisa lojtari të shprehë dëshirën e tij, ne nuk do të përfshihemi në një luftë për shërbimet e tij." Gjithashtu, Saki i mohoi zërat mbi një marrëveshje me ekipin e Çelsit, për të mbajtur të ulët çmimin e Xherrardit. "Nuk kemi asnjë marrëveshje me ekipin e Çelsit. Si mund të kishim një të tillë, kur jemi gjithmonë në garë për të njëjtët lojtarë. Sipas mediave, Xherrardi përfiton 60.000 paund në javë me kontratën e tij aktuale, me ekipin e Liverpulit. Reali i Madridit do të ishte i gatshëm t'i ofronte një pagë prej 130.000 paundësh në javë, ndërsa Çelsi nuk do të shkonte më shumë se 90.000 paund në javë. Më 13 korrik, Liverpuli do të fillojë fushatën e tij për mbrojtjen e titullit kampion të Europës dhe do të luajë ndeshjen e parë të turit të tretë të Ligës së Kampioneve. Ekipi i drejtuar nga Rafael Benitezi do të luajë ndaj ekipit uellsian TNS. Nëse Xherrardi do të marrë pjesë në këtë ndeshje, ai nuk do të ketë mundësi të luajë në Champions me asnjë ekip tjetër.