Gazeta Elektronike: "Futbolli Ndërkombtar" (Nr.3)

[viganv]

Premier Liga

Kleberson: Nëse s'luaj, zgjedh Benfikën

Mesfushori brazilian i ekipit të Mançesterit, Kleberson, ka pranuar se do të ishte i interesuar të kalonte te Benfika, nëse nuk arrinte të siguronte një vend si titullar në ekipin e "Djajve të kuq". "Nëse nuk do të më jepet mundësia për të luajtur te Junajtidi, atëherë duhet të më lejojnë të largohem. Nuk kam pasur fat këtu dhe shpresoj që këtë vit të ndryshoj gjithçka."

[viganv]

Premier Liga

Xherrard-Liverpul, afron lamtumira...



Bisedimet e Stiven Xherrardit me drejtuesit e Liverpulit nuk kanë dhënë rezultatet e pritura dhe tashmë duket se mesfushori anglez është pranë largimit nga "Anfield Road". Marrëdhëniet e Xherrardit me trajnerin Rafael Benitez u prishën plotësisht, teksa këta të fundit patën një grindje gjatë seancës stërvitore. Mesfushori anglez, i cili e drejtoi ekipin e tij drejt fitimit të Ligës së Kampioneve, ka kërkuar një rritje page prej 80.000 paundësh në javë. Pas ofertave të Çelsit dhe Realit të Madridit, Xherrardi nuk ka dëshirë ta rinovojë kontratën e tij me ekipin e Liverpulit. Pas bisedimeve të bëra gjatë ditës së djeshme, menaxheri i lojtarit, Stiv Marshall, deklaroi: "Durimi i Stivenit mbaroi pas bisedimit me Rafa Benitezin dhe Rik Perrin, dhe tashmë midis tyre mund të them që ka marrë fund çdo lloj marrëveshjeje. Nëse ata do të kishin dashur të arrinin një marrëveshje, mund ta kishin bërë për dy orë. Stiveni nuk arrin të kuptojë se përse ata nuk janë gati të negociojnë ashtu si duhet. Tashmë ai ka vendosur dhe nuk do të flasë me drejtuesit e Liverpulit. Në qoftë se ata vijnë për të rihapur negocimet, ai ka për të refuzuar sërish." Xherrardi dhe menaxheri i tij janë të bindur se Liverpuli thjesht nuk ka mundësitë financiare për t'i ofruar atij pagën prej 80.000 paundësh në javë. Drejtori i përgjithshëm i klubit të Liverpulit, Rik Perri, u shpreh se kërkesat e Xherrardit ishin të ekzagjeruara për buxhetin e klubit anglez. Përgjigjja e Xherrardit ishte mbyllja e negociatave, që në javën e parë të bisedimeve. 25-vjeçari, i cili është rritur te klubi i Liverpulit, u shpreh se nuk dëshironte të largohej, por drejtuesit nuk i kishin lënë asnjë zgjidhje tjetër. Mosmarrëveshjet me Benitezin nisën gjatë javës së kaluar, pasi Xherrardi, i cili ka edhe dy vite të tjera në kontratën që firmosi në verën e kaluar, vendosi të stërvitej i vetëm. Pas bisedimit me Xherrardin, trajneri spanjoll, i revoltuar, tha: "Nuk ka asnjë mosmarrëveshje. Këshilltarët e tij thjesht kërkonin një motiv të fortë për ta larguar nga ekipi. Nuk e kam idenë se çfarë po ndodh, pasi po akuzohem për një fushatë të pavërtetë, për të larguar Stivenin nga ekipi i Liverpulit. Dëshira ime është që ai të qëndrojë". Megjithatë, një pjesë të fajit, Benitezi ia ka vënë edhe drejtorit të përgjithshëm, Nik Perrit, i cili vendosi të shkonte me pushime, para se të fillonin bisedimet me Stiven Xherrardin. Tani mesfushori anglez nuk beson më te Benitezi, i cili, pas suksesit në Ligën e Kampioneve, i premtoi një kontratë të denjë për nivelin e tij. Raporti midis tyre ka arritur në pikën ku ata nuk flasin me njëri-tjetrin, edhe gjatë seancave stërvitore. Vendimi i Xherrardit për të mos i hapur më negociatat, nuk i lë zgjidhje tjetër Liverpulit, përveç se të konsiderojë ofertat e Realit dhe të Çelsit. Ekipi i Roman Abramoviçit është interesuar edhe më parë për mesfushorin e Liverpulit, dhe "blutë" do të ishin të gatshëm të ofronin 35 milionë paund për shërbimet e 25-vjeçarit.

[viganv]

Premier Liga

Benitez: Stiven, qëndro me ne


Trajneri i ekipit të Liverpulit, Rafael Benitez, u shpreh se dëshiron që Stiven Xherrard ta përfundojë karrierën e tij në "Anfield Road". Menaxheri i Xherrardit u shpreh se bisedimet për rinovimin e kontratës së lojtarit, kishin dështuar. Pas zërave për largimin e mundshëm të Xherrardit, trajneri Benitez tha: "Dëshira ime është që Xherrardi të qëndrojë me ne. Do të doja ta kisha Stivenin përkrah edhe për shumë vite. Kur të largohem, do të doja që Xherrardi të merrte vendin tim. Po ndërtojmë një ekip më të mirë dhe Stiveni është pjesë e këtij ekipi. Gjatë sezonit të kaluar u mundova tri herë të bindja Xherrardin për të firmosur një kontratë të re. Në çdo rast, ai na tha të prisnim, kështu që ne pritëm. Këtë vit duam të fitojmë më shumë trofe, prandaj kemi sjellë në ekip shumë lojtarë të rinj." Edhe drejtori i përgjithshëm, Nik Perri, shpreson që Stiven Xherrardi të pranojë t'i rihapë bisedimet për rinovimin e kontratës së tij. "Trajneri dëshiron që Stiveni të qëndrojë dhe këtë e ka bërë të qartë shumë herë. Shpresojmë akoma që kjo situatë të jetë e riparueshme. Kur u takuam gjatë javës së kaluar, çdo gjë shkonte shumë mirë. Nuk na ka shkuar asnjëherë në mendje për ta shitur Xherrardin. Paratë nuk janë shkaku i kësaj mosmarrëveshjeje."

[viganv]

Premier Liga

Mourinjo: Çelsi do t'i ulë shpenzimet


Trajneri i Çelsit, Hoze Mourinjo, i cili ka shpenzuar rreth 100 milionë paund për blerjet e lojtarëve, u shpreh se në të ardhmen nuk do të kishte nevojë të bënte shpenzime të tilla. Mourinjo erdhi në stolin e Çelsit 13 muaj më parë dhe shfrytëzoi më së miri burimet financiare të Roman Abramoviçit, duke i dhënë titullin kampion ekipit londinez. "Në të ardhmen, Çelsi nuk do të ketë nevojë për një buxhet të tillë. Unë kam një kontratë pesëvjeçare dhe jam i sigurtë se në vitin e fundit të kontratës sime, nuk do të blejmë asnjë lojtar. Sezonin e ardhshëm do të marrim dy ose tre lojtarë të rinj." Në një intervistë të dhënë për gazetën "The Times", trajneri portugez u shpreh se në sezonin e kaluar kishte përdorur veten e tij për të tërhequr vëmendjen e mediave nga lojtarët e ekipit të tij. "E vura veten nën shënjestrën e mediave, duke thënë gjëra që mund të keqkuptoheshin nga disa njerëz. Si për shembull: Unë jam i veçantë, dua të fitoj që në sezonin e parë, nuk më interesojnë potencialet e Arsenalit dhe të Mançesterit, dhe kam për të fituar, edhe pse asnjë nuk e ka bërë më parë që në vitin e parë. Duke bërë këtë, e vura veten në qendër të vëmendjes, por gjithashtu i vura lojtarët nën presion. U thashë atyre: Të gjithë jeni lojtarë të nivelit të lartë, por asnjë prej jush nuk ka fituar Premier Ligën ose Ligën e Kampioneve dhe nuk do të quheni të suksesshëm deri sa të fitoni. Mbase i lëndova pak, por krijova ambicie në skuadër. Nuk ishte e këndshme, por funksionoi." Mourinjo u shpreh se ndihej me fat që kishte në ekip lojtarë si Frenk Lampard dhe Xhon Terri: "Isha me fat që gjeta në ekip Terrin dhe Lampardin, dhe menjëherë pas tyre ishte Klod Makelele. Ata janë shembujt perfektë të lojtarëve të mëdhenj".

[viganv]

Premier Liga

Mourinjo, 50 milionë euro për Trezegenë


Çelsi e ka rritur ofertën për sulmuesin e Juvetusit, David Trezege, deri në 54 milionë euro. Drejtori i përgjithshëm i ekipit të Juventusit, Luçiano Moxhi, refuzoi ofertën e parë të Çelsit, por pohoi se të dyja palët janë akoma në bisedime për sulmuesin francez. Edhe pse trajneri Fabio Kapelo e konsideron të pashitshëm sulmuesin francez, drejtuesit juventinë mund ta konsiderojnë ofertën e lartë të klubit anglez. Sulmuesi francez ka kaluar një sezon të vështirë, për shkak të dëmtimeve, ndërsa Çelsi e sheh si zëvendësuesin ideal të sulmuesit Hernan Krespo, i cili dëshiron të qëndrojë tek ekipi i Milanit. "Çelsi po mundohet të më bindë që të rikthehem në Angli, por dëshira ime është të luaj me Milanin. Po kaloj pushimet më stresuese të jetës sime, pasi nuk e di akoma ekipin ku do të luaj në sezonin e ardhshëm", - deklaroi Krespo.

[viganv]

Premier Liga

Kjuell arriti të fitonte një shumë prej 300.000 paundësh si dëmshpërblim, pasi Geri Lineker u shpall fajtor për shpifje. Çështja që përfshiu ish-lojtarin e kombëtares së Anglisë dhe mesfushorin australian, u zgjidh në favor të këtij të fundit.

Zenden u prezantua tek ekipi i tij i ri, Liverpuli. Ish-mesfushori i ekipit të Çelsit dhe Midëllsbrout do të luajë tek ekipi kampion i Europës për dy sezonet e ardhshme. "Pas kurorëzimit të tyre më 25 maj, ishte e vështirë ta refuzoja një ofertë të tillë", - deklaroi Zendeni.

[viganv]

Premier Liga

Evertoni është vënë në ndjekje të dyshes së Valencias, mbrojtësit Moreti dhe mesfushorit afrikan, Lamin Sisoko. Trajneri Devid Mojes tha: "Po mundohemi të sjellim dy lojtarë të rinj në ekip. Të dy lojtarët na interesojnë dhe shpresoj të arrijmë një marrëveshje sa më shpejt.

MekKarti ka insistuar se dëshiron të kalojë tek ekipi i Blekburnit dhe për ta bërë këtë, do të ishte i gatshëm ta prishte kontratën e tij aktuale me ekipin e Portos. Afrikano-jugori ka edhe dy vite të mbetura në kontratë me ekipin e Portos.

[viganv]

Premier Liga

Belami është ende i pavendosur për të ardhmen e tij. 25-vjeçari i Njukasëllit, i cili në sezonin e kaluar luajti me ekipin e Sëlltikut, nuk është grumbulluar akoma në stërvitjen e ekipit të tij, pasi ka kërkuar një javë pushim për të vendosur mbi ekipin e tij të ardhshëm.

[viganv]

Serie A

Morati pranon: Po ndjekim Xhilardinon



"Xhilardino? Po, po e ndjekim dhe duhet të them se nuk bëhet fjalë për një interesim të kohëve të fundit, pasi kemi kohë që po e ndjekim me shumë vëmendje. Është një çështje që ka të bëjë me një sektor, atë të sulmit, ku, ç'është e vërteta, nuk kemi një domosdoshmëri të menjëhershme të kryejmë një blerje të madhe. Bëhet fjalë për një lojtar shumë të zotin dhe Interi e ka detyrë të tentojë, por në mënyrën e duhur. Dua të them se nuk kam ndër mend të ushqej ankande. Por as t'i pësoj ato."
Zëri i Masimo Moratit nga Nju Jorku, i ndërprerë vetëm nga të lehurat e qenit të shtëpisë së bijës së tij, kur në Itali ishte ora 21.45 e një dite të ndezur nga entuziazmi i shprehur përmes telefonit, mailit dhe faksit nga publiku zikaltër. Tifozët e Interit, pas ndarjes të ashpër me Vierin, e kanë pritur krahëhapur lajmin se edhe Interi është në valle për qendërsulmuesin e Parmës. Kundërsulmi i nisur nga Morati ndaj Milanit, që është ende për t'u konsideruar në avantazh, duhet parë si përpjekje për të formuar një dyshe sulmuese ëndrrash, por edhe si një lajmërim ndaj pretendentëve për Xhilën: s'do të pranojmë "puçe". Por tifozëve, dhe vetë Moratit mbi të gjitha, u intereson kryesisht çështja teknike: Adriano﷓Xhilardino është një dyshe me vlerë botërore. Kështu që mes plazheve dhe vendeve malore, tifozët e kanë ringritur kokën, të vetëdijshëm se kanë rigjetur Moratin më të mirë, atë të blerjeve të pamundura, të entuziazmit gjithëpërfshirës. Si për ta plotësuar portretin e situatës, thuajse njëkohësisht me fjalët e Moratit, ka mbërritur edhe konfirmimi i Parmës për manovrat interiste. Drejtori sportiv, Oreste Çinkuini, ka zgjedhur televizionin Telelombardia, për të rrëfyer të vërtetën e tij lidhur me mëndafshin që mbulon Alberto Xhilardinon. "Po, kam folur me Moratin shumë herë. Me të kemi marrëdhënie të mira dhe kemi folur për Xhilardinon. Nga ana tjetër, bëhet fjalë për një kampion që kërkohet nga shumë klube të mëdha, dhe Interi është një prej tyre. Galiani? Me të kemi pasur një takim serioz, pas të cilit na la të lirë të bisedojmë me klube të tjera." Natyrisht, është diskutuar edhe çështja lidhur me dëshirat e lojtarit. Ka kohë që ekspertët e merkatos bëjnë të ditur se Xhilardino i ka dhënë fjalën Milanit, por Çinkuini e ka korrigjuar me fjalë të rëndësishme këtë qëndrim. "Besoj se po t'i mbërrinte ndonjë ofertë joshëse nga ana e një klubi të madh, Xhilardino do ta merrte në konsideratë. Është një çështje e hapur. Mendoj se Milani vazhdon të jetë i interesuar, por nuk përjashtohet edhe blici i ndonjë klubi tjetër, që s'është e thënë të jetë medoemos italian. Çelsi, për shembull, me sa di unë, nuk ka mbetur i kënaqur nga sezoni i Drogbasë, londinezët tani kanë nevojë për një finalizues të madh". Dhe "ëmbëlsira në fund", Çinkuini tregon një skenar të papritur. "Nëse mbërrin ndonjë pronar i rëndësishëm, ka mundësi që të vendosë ta mbajë Xhilardinon, edhe pse drejtuesit e Parmës në këtë moment po përpiqen t'i japin një të ardhme klubit, që kalon nga shitja e lojtarit."

[viganv]

Serie A

Fiorentina, në shënjestër edhe Iakuinta



Fiorentina ka ndër mend t'i dhurojë Prandelit dy sulmues. Të gjitha lëvizjet e drejtorit sportiv, Pantaleo Korvino janë të drejtuara drejt kësaj "trioje", Iakuinta, Korradi dhe Luka Toni. Në orët e fundit është bërë pikërisht një ofertë për qendërsulmuesin e Udinezes, që ka shënuar 13 gola në kampionatin e fundit, duke qenë protagonist drejt fluturimit në Champions. Pas lamtumirës së Spaletit, bomberi 27-vjeçar, e konsideron të mbyllur përvojën e tij në Udine dhe zbarkimi në Firence duket ideal. Dhe pikërisht Iakuinta, me çdo mundësi do të jetë përforcimi i parë i rëndësishëm në sulm i Fiorentinës. Udinezes i janë afruar 9 milionë euro.