Gazeta Elektronike: "Futbolli Ndërkombtar" (Nr.3)

[viganv]

Futboll Miks

Parreira: Kemi risjellë fantazinë në pushtet



Ekipi aktual i Brazilit ka filluar të krahasohet me ekipet e viteve 1958, 1970 dhe 1982, ku në kombëtaren e "Selesaos" luanin lojtarë si Pele, Garinça, Ziko, Sokrates dhe Falkao. Ronaldinjo, Kaka, Adriano dhe Robinjo janë disa nga emrat e tanishëm të kombëtares së Brazilit, të cilët po arrijnë të dhurojnë spektakël në fushën e lojës. Pas përfundimit të finales së Kupës së Konfederatave, trajneri i Brazilit, Karlos Alberto Parreira, festoi duke kënduar e kërcyer bashkë me lojtarët e tij, të cilët ngjanin sikur po parakalonin në karnavalet e Rio de Zhaneiros. Më pas festa e Parreirës u zhvendos në hollin e hotelit, ku Parreira, entuziast për fitoren, tha: "Eshtë vërtet një grup i bukur lojtarësh. Një kor që nuk ka nevojë për një dirigjent. Eshtë e lehtë të të zërë gjumi kur ke në ekip lojtarë të tillë." Parreira ka qenë pjesë e stafit të kombëtares së Brazilit që në botërorin e '70-ës dhe tani, në 2005-ën, ndodhet përsëri në krye të ekipit të "Selesaos". "Bota ka ndryshuar shumë që nga vitet 70, po ashtu edhe futbolli. Megjithatë, në kombëtaren e sotme të Brazilit ka disa gjëra të ngjashme me kombëtaren e viteve 70. Brazili im, ashtu si ai i atëhershmi, ka atë që të gjithë brazilianët duan: nuk është një ekip i mbështetur mbi forcën fizike. Ne kemi fantazi, dhe për mua kjo është bukuria e këtij sporti. Disa herë njerëzit i keqkuptojnë cilësitë e vërteta të futbollit. Futbolli nuk qendron te shpejtësia, fuqia dhe forca e lojtarit. Futbolli kërkon fantazi dhe, kur arrin t'i shtosh pak teknikë, mund të kesh ekipin më të fortë në botë. Ne po përpiqemi ta bëjmë këtë, duke luajtur një futboll të bukur. Për të krijuar një grup të suksesshëm duhet kohë dhe durim. Do të ishte bukur të drejtoje një ekip për një kohë të gjatë, por nuk funksionon kështu në asnjë vend të botës, as në Brazil, ku ka një traditë të madhe futbollistike dhe tifozët kërkojnë që ekipi të qëndrojë gjithmonë në majat e futbollit botëror. Megjithatë, ndihem shumë optimist pasi jemi në rrugën e duhur. Kemi luajtur disa ndeshje të bukura këtu në Europë dhe arritëm të fitonim Kupën e Konfederatave. Nuk jemi ende gati për në botëror, por kemi arritur të formojmë një grup të suksesshëm. Me Adrianon, Ronaldinjon, Ronaldon, Kakanë dhe Robinjo ekipi ynë nuk ka vetëm një lider. Në Kupën e Konfederatave Adriano tregoi se përveç muskujve ka edhe shumë teknikë në fushën e blertë. Ndërsa Ronaldinjo më habit në çdo ndeshje që luan. Prandaj nuk mund të zgjedhësh një lider të vetëm. Edhe pse nuk mori pjesë në Kupën e Konfederatave, Ronaldo mbetet një lojtar i klasit të lartë; dhe unë jam i bindur se ka akoma shumë për të dhënë për këtë ekip." - deklaroi Parreira.

[viganv]

Futboll Miks

Osmani, firma vlen 450 mijë euro





Shumë hamendje në adresë të futbollistit korçar të kombëtares Tefik Osmani, madje në shtypin e përditshëm është folur shumë herë që do të firmosë sot, apo nesër, me këtë, apo me atë ekip. Të gjitha këtyre, vetë Tefik Osmani u ka dhënë fund, duke hedhur firmën përfundimtare në kontratën e re me ekipin e Metalurgut të Zaporozhjes së Ukrainës. Kjo ka ndodhur ditën e premte, në orën 18:00, dhe menjëherë Osmani ka dalë në stërvitjen e parë me ekipin në Pula të Kroacisë, aty ku është duke zhvilluar fazën përgatitore edhe ekipi i Metalurgut. Plot 450 mijë euro ka vlejtur firma e Osmanit për dy vjet, një shumë vërtet e madhe, duke parë që Tefik Osmani është vetëm 20 vjeç dhe është korçari i parë në historinë e futbollit që në këtë moshë do të mund të luajë jashtë kufijve, që luan për kombëtaren shqiptare dhe korçari i pari që do të përfitojë një shumë të tillë në një shtet tjetër. 180 mijë euro ka përfituar Osmani që ditën e parë që ka firmosur dhe pjesa e mbetur do t'i ndahet gradualisht gjatë 2 viteve të qëndrimit në Ukrainë me Metalurgun.
- Tani mund të themi që gjithçka ka përfunduar me sukses për Tefik Osmanin?
- Më vjen vërtet mirë që më së fundi firmosa dhe tani s'më ngelet gjë tjetër vetëm që të filloj punën për të justifikuar të gjithë besimin që më kanë dhënë, duke pranuar që unë të luaja me Metalurgun.
Keni një javë në Kroaci që po zhvilloni fazën përgatitore dhe vetëm pas një jave firmosët. Përse?
Eshtë e vërtetë që kam një javë që ndodhem në Kroaci me ekipin për fazë përgatitore dhe vetëm të premten pasdite arrita të firmosja këtë kontratë 2 vjeçare. Por u desh një javë për vetë faktin se drejtuesit ukrainas u bindën plotësisht që unë vleja, por edhe unë vetë prita deri në fund të plotësoheshin përfundimisht edhe kërkesat e mia. Disa ditë u desh të merrja përgjigje edhe për analizat që bëra dhe gjithçka kaloi si jo më mirë. Ka rëndësi që më së fundi firmosa me Metalurgun dhe kam vërtet emocione, pasi është ekipi im i parë jashtë kufijve që më duhet të luaj.
450 mijë euro do të përfitoni nga kjo kontratë. E vërtetë?
Sigurisht që po. Pas bisedës që bëra me presidentin e klubit të Metalurgut, unë kisha këtë kërkesë dhe ai ma plotësoi. Ishte kjo shumë që më joshi dhe më duket se drejtuesit e këtij ekipi janë vërtet korrektë, pasi 180 mijë euro arrita që t'i merrja menjëherë që në fillim, më pas pranova të hidhja edhe firmën mbi kontratë. Për mua, në këtë moshë nuk vlejnë më shumë paratë, sesa të luaj sa më mirë në fushën e lojës. Por në fund të fundit një shumë e tillë është vërtet e majme dhe shumë më shumë sesa ekipi turk që desha të firmosja para pak javësh.
Ndodheni në Pula të Kroacisë për fazën përgatitore. Ju personalisht si ndiheni?
Shumë mirë. Që ditën e parë kam filluar stërvitjen dhe kam ndjekur programin e drejtuesve ukrainas. Eshtë vërtet një regjim i rreptë dhe po kryejmë dy seanca stërvitore në ditë. Në ndeshjen e parë miqësore nuk u aktivizova, pasi nuk dëshiroja vetë. Kjo për arsye se pa firmosur nuk mund të vishja bluzën e Metalurgut dhe rashë dakord me trajnerin që të aktivizohem në formacion menjëherë sapo të hidhja firmën e re. Për mua, mbi të gjitha është një përvojë e re, që do shumë punë, por besoj se është më se e realizueshme, pasi edhe në Shqipëri unë s'e ndava stërvitjen.
Me Metalurgun tani jeni 2 shqiptarë, madje 2 korçarë. Cilat janë përshtypjet tuaja?
Tashmë që kam në ekip edhe një lojtar tjetër, si Bledi Shkëmbi, them se kam një ndihmesë më shumë, pasi më ka ndihmuar për shumë gjëra këtu me ekipin e Metalurgut. Njihem prej shumë vitesh me Shkëmbin dhe është vërtet një futbollist i mirë. Shpresoj që t'ia kalojmë si jo më mirë deri në fund dhe jam i bindur që kjo gjë do të ndodhë. Unë them që ka korçarë të tjerë që mund të luajnë jashtë kufijve dhe gjithmonë Korça ka treguar se di të nxjerrë futbollistë, sepse është vërtet një fidanishte e futbollit shqiptar.
Mund të na thoni diçka për kombëtaren shqiptare?
Tani jam duke menduar për ekipin e ri, por shumë shpejt do të më duhet të mendoj edhe për kombëtaren. Për mua ishte një ëndërr të luaja me kombëtaren, por tani që ja kam arritur ndihem vërtet i lumtur. Jam vetëm 20 vjeç dhe shpresoj që të luaj për shumë vite me bluzën e Shqipërisë. Do zoti më realizon të gjitha ëndrrat që kam, që sidoqoftë më ka ndihmuar shumë deri në këtë moment.

[viganv]

Futboll Miks

Plotësohen kushtet e UEFA-s për "Niko Dovanën"


Stadiumi "Niko Dovana" është i gatshëm për të pritur ndeshjen e parë të Kupës UEFA kundër ekipit nga Bosnjë?Hercegovina, Shiroki Brijeg. Pavarësisht se organizimi i futbollit europian nuk e ka dhënë verdiktin përfundimtar, tashmë nuk ka ashnjë arsye që ndeshja të mos zhvillohet në Durrës. Të gjitha kushtet e vëna nga UEFA janë plotësuar, në një kohë që kushti kryesor për rikonstruksionin e rrugës që të çon në stadium është drejt përfundimit. Bashkia e qytetit të Durrësit është në përfundim të asfaltimit të rrugës dhe sheshit qendror përballë stadiumit "Niko Dovana", duke i dhënë këtij stadiumi një pamje dinjitoze. Po kështu, është plotësuar kërkesa e UEFA-s për ndarjen e vendit në tribunën kryesore, ku hyjnë futbollistët dhe gjyqtarët me atë të tifozëve. Janë krijuar ambientet e veçanta për shtypin, si dhe është ndërhyrë për të përmirësuar infrastrukturën e tribunës kryesore dhe ambienteve të brendshme të stadiumit. Përfaqësues të komisionit të licensimeve që kanë parë në terren këto kushte të realizuara dhe kanë bërë fotografimet dhe relacionin përkatës, pritet që t'ia çojnë këtë informacion të dokumentuar zyrtarëve të UEFA-s, për të dhënë verdiktin përfundimtar. Sipas të gjitha gjasave, përgjigjja pozitive do të jetë vetëm një formalitet.
Hasanbelliu bashkohet me ekipin në Pogradec
Presidenti i Teutës është bashkuar me ekipin në qytetin e Pogradecit. Hasanbelliu është informuar në lidhje me kushtet në të cilat po zhvillon stërvitje ekipi, ku problem kryesor ka qenë gjendja e rënduar e fushës ku zhvillon stërvitje ekipi. Ky fakt është vërejtur më mirë në miqësoren që Teuta zhvilloi me ekipin e Elbasanit. Po kështu, presidenti i Teutës ka zhvilluar një takim me stafin dhe ekipin, të cilët i ka njohur me ekipin që do të përballet në Kupën UEFA. Më pas, presidenti i Teutës i ka premtuar trajnerit Nica se do t'i sigurohet i gjithë informacioni i nevojshëm për të njohur më mirë kundërshtarin, përfshi këtu edhe një kasetë filmike nga ndeshjet e fundit të kampionatit që ka zhvilluar ekipi i Shiroki Brijegut. Presidenti i Teutës ka kërkuar nga futbollistët më shumë besim dhe vendosmëri për të kaluar turin e parë të Kupës UEFA, në një kohë që për kalimin e turit do të ketë edhe shpërblime përkatëse.

[viganv]

Premier Liga

Çelsi këmbëngul për Krespon



Drejtuesit e Çelsit po përpiqen të bindin Hernan Krespon të rikthehet në Londër. Sulmuesi argjentinas, i cili vitin e kaluar luajti tek ekipi i Milanit, dëshiron të qendrojë në Itali dhe për ta arritur këtë, do të ishte i gatshëm të ulte fitimet e tij. 29-vjeçari, gjatë një interviste të dhënë për gazetën "The People", tha: "Çelsi po përpiqet të më mbushë mendjen për t'u kthyer në "Stemford Bridge", por dëshira ime është të qëndroj në Itali. Nuk kam pasur asnjëherë probleme me trajnerin Mourinjo. Nuk kam folur me të, por më kanë thënë që ka ndryshuar mendim për mua. Po kaloj një periudhë të vështirë, pasi nuk e di akoma se për cilin klub do të luaj. Që nga humbja në finalen e Ligës së Kampioneve, gëzimi im i vetëm ka qenë martesa ime." Çelsi, i cili e bleu Krespon në 2003-shin për 16 milionë paund, ka shprehur interesimin e tij për sulmuesit Fernando Torres, David Trezege, Andrei Shevçenko, Adriano dhe Samuel Eto.

[viganv]

Premier Liga

Ferguson, përkrah Glazerin



Trajneri Aleks Ferguson ka mbështetur pronarët e rinj të klubit të Mançester Junajtidit dhe shpreson që këtë gjë ta bëjnë edhe tifozët e "Djajve të kuq". Pas takimit me vëllezërit Glazer, Fergusoni u shpreh se klubi dhe tifozët duhet të fokusohen vetëm te futbolli dhe jo tek ana financiare e tij: "Takimi ishte shumë pozitiv dhe ata më siguruan se do të mbështesnin çdo vendim të stafit drejtues të ekipit. Kjo ka qenë një kohë e vështirë për të gjithë, por tani e rëndësishme është t'i rikthehemi futbollit".
Fergusoni u bëri apel tifozëve të qetësoheshin, pas protestave të dhunshme, gjatë vizitës së parë të Glazerit në "Old Traford". "Ka pasur shumë tension gjatë kohëve të fundit dhe shpresoj që me fillimin e sezonit të ri, të qetësohen të gjithë," - deklaroi trajneri i Mançesterit. Pozitat e Fergusonit në stolin e Mançesterit duken më solide pas takimit të tij me presidentin e klubit. Drejtori i përgjithshëm i klubit anglez, Devid Zhill, deklaroi: "Fergusoni ka një kontratë të gjatë me klubin dhe nuk do të largohet edhe për tri vitet e ardhshme. Presidenti i ri i klubit është i vetëdijshëm që suksesi nuk është i garantuar. Megjithatë, Fergusoni do të ketë të gjitha mjetet e duhura për ta bërë këtë." Mesfushori Kristiano Ronaldo është pranë rinovimit të kontratës së tij dhe Devid Zhill është i bindur se edhe mbrojtësi Rio Ferdinand do të bëjë të njëjtën gjë: "Ronaldo është shumë pranë rinovimit të kontratës dhe do të firmosë brenda kësaj jave. Nuk e di përse Rio nuk ka firmosur ende. Por ne duam që ai të qëndrojë dhe jemi të bindur se edhe ai ka dëshirë të qëndrojë në "Old Traford".

[viganv]

Premier Liga

Hleb: Do të mësoj nga Vieira



Aleksandër Hleb beson se tek Arsenali ka mundësi të fitojë diçka të rëndësishme në karrierën e tij futbollistike. "Topçinjtë" kanë qenë pretendentë dhe kanë fituar në pesë sezonet e fundit trofe të ndryshëm në Angli, por në Ligën e Kampioneve skuadra e Vengerit nuk ka shkuar më larg se çerekfinalet. Hlebi shprehet i gatshëm për Premier Ligën, por gjithashtu i garanton Arsenalit një forcë më shumë në synimin e tij për të fituar Championsin. Mesfushori biellorus ka deklaruar se fakti që do të luajë përkrah Patrik Vieirasë, ka ndikuar në zgjidhjen e tij për të lënë Shtutgartin.
"Arsenali ka një skuadër të madhe, - tha Hlebi, - por që ka pasur ecurinë e duhur në Ligën e Kampioneve. Unë do të jap kontributin tim që, duke filluar nga sezonin i ardhshëm, ecuria e Arsenalit në Champions të jetë e denjë për forcën e kësaj skuadre, që unë e rendis ndërmjet tri më të fortave në botë." Më pas, 24-vjeçari vazhdon deklaratën e tij me elozhet për Vieiranë: "Çdo mesfushor në qarkullim do ta kishte ëndërr të luante përkrah Vieirasë. Sezonin e ardhshëm, unë e kam këtë fat. Falë ndihmësit të tij do ta kem edhe më të lehtë ambientimin në Premier Ligë. Aftësitë e francezit i njoh prej kohësh dhe më në fund më jepet mundësia të luaj përkrah tij. Dua të mësoj nga Patriku." Hlebi kaloi tek Arsenali vetëm javën e kaluar, pas një eksperience katërvjeçare te Shtutgarti. Skuadër në të cilën u bë i famshëm, pasi në moshën 19-vjeçare u largua nga Bate Barisov. Sezonin e kaluar, në Ligën e Kampioneve dhe në Bundesligë ishte një nga pikat më të forta të skuadrës gjermane, e cila gjithsesi e mbylli kampionatin në vendin e pesë. Pavarësisht nga mbërritja e Trapatonit, Hlebi nuk e ktheu mendimin dhe zgjodhi Londrën. Zgjidhjen e tij, ai e shpjegon: "Desha të luaja në një ambient ndryshe. Falënderoj Shtutgartin për besimin që pati tek unë. Pra do ta kisha pasur më të vështirë të arrija në një kampionat të tillë si Premier Liga. Nuk mund të refuzoja ofertën e Arsenalit. Do të luaj në një nga skuadrat më të forta në botë dhe në Ligën e Kampioneve. Kjo është një veprimtari shumë e rëndësishme, në të cilën nuk dua të mungoj." Pikërisht fakti që Shtutgarti do të luajë sezonin e ardhshëm në Kupën UEFA, i detyroi drejtuesit e skuadrës gjermane të pranonin ofertën 12 milionë euroshe për Hlebin.
Ndërkohë, Arsenali është pranë marrjes së portierit Rikardo nga Sportingu i Lisbonës. Portugezi, që është edhe numri 1 i kombëtares portugeze, shihet nga Vengeri si zëvendësuesi ideal i Lehmanit, i cili nuk i jep garancitë e mjaftueshme trajnerit francez për sezonin e ardhshëm. Vetë Rikardo pranoi interesimin e "topçinjve" në një deklaratë për shtypin portugez: "Kam mësuar interesimin e Arsenalit për mua. Jam gati të luaj me "topçinjtë", por më parë ata duhet të plotësojnë kushtet financiare të Sportingut."

[viganv]

Premier Liga

Man.Utd: Runi nuk është në shitje


Drejtori i përgjithshëm i ekipit të Mançester Junajtidit, Devid Zhill, deklaroi se sulmuesi Uejn Runi është i pashitshëm, edhe pse pronarët e rinj të klubit kanë 500 milionë paund borxh, pas blerjes së klubit të "Djajve të kuq". "Uejn Runi është i pashitshëm. Luftuam gjatë për ta sjellë në "Old Traford" dhe nuk kemi ndër mend të heqim dorë prej tij", - deklaroi Zhilli.

[viganv]

Premier Liga

Ferdinand, pranë rinovimit


Rio Ferdinand është pranë rinovimit me Mançester Junajtidin. Presidenti Glazer ka deklaruar se rinovimi i Ferdinandit është një nga prioritet e "Djajve të kuq". Sipas shtypit britanik, drejtuesit e Junajtidit kanë pranuar kërkesat ekonomike të mbrojtësit shtatlartë dhe firma duhet të vijë javën e ardhshme.

[viganv]

Premier Liga


Sounes: Qëndrimi te Njukasëlli, një sfidë...

Trajneri i Njukasëllit, Grim Sounes, ka zhvilluar një merkato aktive gjatë kësaj vere. Gjatë një interviste të dhënë për gazetën "World", ai u shpreh optimist për sezonin e ardhshëm: "Për mua është një sfidë e vështirë dhe do të jem me fat nëse arrij të rezistoj në këtë post edhe për 12 muaj të tjerë. Megjithatë, jam optimist se në sezonin e ardhshëm, do të arrijmë të renditemi midis ekipeve më të mira të Anglisë".

[viganv]

Premier Liga

Dakurt, pranë rikthimit në Premier Ligë

Mesfushori i Romës, Oliver Dakurt, shprehu dëshirën e tij për të kaluar tek ekipi i Boltonit, pavarësisht interesit të Birmingemit dhe Mançester Junajtidit. 30-vjeçari ka arritur të fitojë famë pikërisht në Premier Ligë, me ekipin e Evertonit dhe Lidsit, dhe tashmë atij i ka përfunduar kontrata me klubin italian. Vitin e ardhshëm, Boltoni do të luajë në Kupën UEFA.