Mediatori shqiptar liron 3 pengjet rumune në Irak

[Davius]

Pas dy Simonave, edhe tre gazetarë rumunë shpëtohen nga terroristët irakenë në Bagdat. 5 jetë njerëzish të shpëtuara lidhen me një emër, Ilir Kulla. 31 vjeçari, aktualisht kryetar i Komitetit Shtetëror të Kulteve në Shqipëri, gjatë eksperiencës së tij si gazetar mundi të krijojë shumë njohje, lidhje e miqësi që më pas sollën dy ngjarje tepër të bujshme në Itali, në Rumani dhe sigurisht në Shqipëri. Për tre ditë rresht Ilir Kulla nëpërmjet miqve të tij në Lindjen e Mesme mundi të dërgoje një mesazh në zemër të Irakut, në Bagdat, aty ku mbaheshin peng tre gazetarët.

Agjensitë e lajmeve njoftonin se lideri rebel Abu Asaf al Zarqavi ishte përgjegjësi i pengmarrjes. Më pas u tha se ishte grupi "Mu'adh Bin Jabal". Në 9 maj përfunduam negocimet dhe në 23 maj të tre gazetarët u lanë të lirë dhe tani e kësaj dite vazhdojnë jetën dhe punën e tyre në Bukuresht. Gjithçka u mbajt e fshehtë dhe çuditërisht edhe nga vetë realizuesi i lirimit të pengjeve. Ilir Kulla në atë kohën ndodhej në fshatrat e Korçës duke përgatitur fushatën e tij elektorale. Ai ishte zgjedhur kandidat për deputet një nga zonat elektorale të Korçës. Ndoshta ndokush tjetër do ta përdorte deri në minutën e fundit këtë kartë të fortë gjatë fushatës.

Lirimi

Dy ditë pasi rrebelët irakenë rrëmbyen tre gazetarët rumunë, Marie Jeanne Ion, kameramani Sorin Dumitru Miscoci i stacionit televiziv "Prima Tv" dhe gazetari Ovidiu Ohanesian, Rumania nisi të kërkojë ndihmë të gjitha vendeve aleate. Ata u morën peng më 28 mars, një ditë pasi presidenti rumun vizitoi Irakun dhe deklaroi se trupat e vendit të tij nuk do tërhiqen. Kërkohej të shpëtohej jeta e tyre. Rrebelët kërkonin largimin e trupave rumune nga Iraku. Situata delikati bëri që të kërkohej çdo informacion i mundshëm dhe rrugë shpëtimi. Zgjidhja u gjet. Shërbimet sekrete të ushtrisë rumune, kthyen sytë nga Shqipëria. Ambasada rumune, ambasadori dhe konsulli në Tiranë ishin në djeni të hisotrisë së lirimit të dy italianeve, Simona Pari dhe Simona Torreta në shtator të 2004.

Ata e njihnin shumë mirë Ilir Kullën dhe rolin e tij në këtë lirim. Foto e Ilir Kullës përkrah Nikola Kaliparit (drejtues i lartë i shërbimit sekret italian) dhe Salah El Din Kuftaro, djali i myftiut të madh të Sirisë, ishte prova dhe ajo u botua në mediat shqiptare por edhe ato italiane. Ministria e Mbrojtjes së Rumanisë i nisi homologes së saj shqiptare një kërkesë zyrtare për të ndihmuar në lirimin e tre gazetarëve. Ministri Majko i paraqiti kërkesën e bërë kryetarit të Komitetit Shtetëror të Kulteve Ilir Kulla dhe më pas kërkesa zyrtare drejtuar kryeministrit Nano vuri në lëvizje gjithë skemën e lirmit të gazetarëve. Kulla, pas kthimit nga Roma, në 5 maj të këtij viti mbëriti menjëherë në një vend të Lindjes së Mesme.

Ka shumë gjasa në Damask, kryeqyteti i Sirisë. Prej andej realizoi lirimin e dy italianeve. Lidhja e tij e vjetër me atë vend ishte Salah El Din Kuftaro. Një njeri shumë prestigjizo në vendin e tij dhe drejtues i fondacionit fetar "Abou Nour". Më i rëndësishmi fondacion islamik në Lindjen e Mesme. Fjala e djalit të Myftiut të madh të Sirisë peshon shumë, ajo arriti të shpëtojë jetën e dy italianeve të marra peng në shtator të vitit të kaluar por dha të njëjtin rezultat edhe këtë herë. Nga 5 maji deri në 9 maj, Kulla qëndroi në Damask pranë miqve të tij fetarë në këtë vend. Sapo mbëriti në këtë vend, mundi të marrë shpejt lajmin se tre gazetarët janë mirë me shëndet dhe nuk ishin ekzekutuar. Pak minuta më vonë, Presidenti rumun Traian Basesku i dha lajmin kombit të vet se tre gazetarët janë shëndoshë e mirë. Operacioni vazhdonte. Rrebelët irakenë të kontaktuar nëpërmjet të tretëve kërkuan një javë kohë për t'i liruar. Në Bukuresht megjithatë vazhdonte ankthi. Qeveria rumune e quante shumë të rëndësishëm lirimin e pengjeve, ngjarje e cila kishte shokuar gjithë vendin. Pas 7 ditësh, pengjet ende nuk u liruan.

Telefoni i Kullës nisi të binte sërish. "Dështoi operacioni", kjo ishte pyetja. Një tjetër kontakt me Lindjen e Mesme dhe menjëherë vjen lajmi, edhe pak ditë të tjera. Ndërsa ditët kalonin në Shqipëri nisi fushata elektorale. Pak orë para se të mbyllej afati i dytë në gjithë botën u hap lajmi menjëherë. Tre gazetarët rumunë u liruan. Gjeneral Lejtnant Sergiu Medar, shef i shërbimeve sekrete të ushtrisë rumune në qershor i drejtohet me një letër falenderimi Ilir Kullës ku shkruan: Drejtoria e shërbimit sekret të ushtrisë rumune ju falenderon ngrohtësisht për ndihmën tuaj në zgjidhjen e kësaj çështjeje dhe shpreson në një bashkëpunim të frytshëm

Gazeta Shqiptare

[GWENI]

Davius
Ne cilen gazte gjindet ky artikull, nese ke mundesi me me tregu.

[Davius]

Gazeta Shqiptare

..................