Bukuroshja që nuk fal
Nuk i është dashur të bëjë shumë punë për t’u njohur dhe më pas për t’u bërë e famshme. I ka mjaftuar bukuria, natyrisht zëri i veçantë dhe një bashkëpunim me grupin hip-hop më të famshëm në Kosovë, “Tingulli 3” dhe menjëherë Nora Istrefi u bë e njohur jo vetëm në Kosovë, por edhe Shqipëri e Maqedoni.
Akoma asnjë këngë të sajën, asnjë album, asnjë pjesëmarrje në aktivitete të muzikës së lehtë dhe fati i trokiti në derë. Më pas të gjithë donin të dinin diçka më shumë për këtë vajzë e cilësuar menjëherë nga të gjithë si “seks bombë”. Mirëpo Nora mjaftohej vetëm me daljet e saj në skenë, duke mos thënë asgjë për mediat. Deri vonë, sidomos për publikun që jeton në Shqipëri, vajza me flokë të zeza dhe trup të hatashëm, ishte një mister i vërtetë. U desh pjesëmarrja në “Top fest” dy vite më parë që të kishim mundësi ta shikonim nga afër dhe pse jo, të mësonim diçka më shumë për të. Por si gjithmonë informacionet e tavolinave, ato jozyrtaret janë shumë më interesante se ato pak fjalë që Nora thoshte në media mbi bashkëpunimet e saj të suksesshme muzikore.
Nuk vonuan të përhapeshin zëra se Nora Istrefi nuk kishte vetëm lidhje pune me Getoarin, këngëtarin e grupit “Tingulli 3”, por edhe lidhje sentimentale. Ndërkohë gjithçka mohohej nga Nora kur ajo pyetej nga gazetarët. Edhe fakti që ajo u bë xheloze kur po ky grup bëri një këngë me Çiljetën dhe më pas thuhej se Getoari e la për t’u lidhur me këtë të fundit...
Veçse të gjithë ama e kemi parë se ajo çka “Tingulli 3” na solli me këngën “Dridhe-dridhe” ishte ku e ku më joshëse se kënga “Muzika jonë” me Nora Istrefin, e cila për çudi nuk po jepet më në asnjë televizion aq sa ka rrezik që askush mos ta kujtojë më. Por tani, Nora mund ta kërkonte suksesin edhe vetëm, pse jo, ajo dinte që të gjithë prisnin krijimin e radhës. Dhe nuk vonuan klipet njëri pas tjetrit, njëri më sensual se tjetri dhe për çudi pothuajse të gjitha me përmbajtje të njëjtë, pak a shumë të përshkruara nga slogani “unë edhe mund të të lë, nëse shoh se ti nuk më do”. E filloi këtë cikël këngësh me “Taxi”, ku vajza tregonte se mund të kërkonte një taksi fare e vetme në mes të natës, pasi çuni me të cilin rrinte ia ishte ngritur keq nervat. “Shko tash”, “Unë e di”, “Negativ është përgjigja ime për ty”, thuhet në këngët e saj, si një thirrje për t’i larguar ata që nuk e meritojnë dashurinë e saj.
Duke pasur parasysh se sot një këngëtar ka një konkurrencë të paparë si për performancën ashtu edhe për pamjen, Nora nuk ka ngurruar që shpesh të tregojë se ajo nuk duhet të krahasohet me askënd. “Unë nuk jam as Adelina dhe as Genta, unë jam Nora Istrefi”, është shprehur ajo, tashmë e sigurt që para saj dyert ishin të gjitha të hapura dhe nuk rrezikonte asgjë.
Në vorbullën e thashethemeve për jetën private por edhe atë profesionale, Nora është akuzuar që disa nga këngët e saj janë të kopjuara, madje dikush ka thënë se ajo e ka kopjuar identik këngën amerikane “The one”. Por Nora nuk duket e shqetësuar nga ato që thuhen, ajo kënaqet pasi çdo këngë e saj është një hit, ajo tashmë është një nga më të kërkuarat në turne e aktivitete të ndryshme. Si për ta mbajtur këtë atmosferë sa më të ndezur, albumin e radhës ajo e titullon “Opium”. Madje, duke marrë shkak nga ky titull, jo pak gazetarë janë bërë kuriozë, duke e pyetur nëse ka marrë ndonjë lloj droge në jetën e saj. Natyrisht përgjigjja e mençur e Norës ka qenë jo.
Ajo e kërkon suksesin me çdo kusht, por çuditërisht përveç dy paraqitjeve të saj në “Top fest”, nuk duket shumë e dhënë pas kompeticioneve të muzikës së lehtë në Shqipëri apo Kosovë. A thua i mjafton ky sukses që ka apo ndjehet e pazonja për të qenë në konkurrencë me kolegë që janë të afirmuar për kualitetet vokale? Mbase kjo e fundit nuk është e vërtetë pasi shumë këngëtarë me eksperiencë e vlerësojnë shumë vokalin e Norës dhe aftësinë e saj për të kënduar për shumë orë live.
Kënga, nga mamaja te vajza
Nuk ka qenë e rastësishme dalja në skenë e Norës. Për ata që nuk e dinë, Nora ka kënduar që fëmijë e përkrahur shumë nga prindërit, sidomos nga e ëma Syzana Tahirsylaj, një këngëtare e njohur e viteve ‘80 në Kosovë. I ati, i cili nuk jeton më, Nezir Istrefi njihej në Kosovë si redaktor, publicist, aktor dhe shkrimtar.
Disa gjera që nuk i dini
Pëlqen plazhin e Ulqinit dhe të Durrësit edhe pse pohon se këto kohë nuk ka pasur mundësi të bëjë pushime për shkak të angazhimeve të shumta.
Në albumin e saj të dytë ka edhe një këngë që titullohet “Lule mbi varr”. Këngëtarja tregon se ia ka kushtuar të atit, duke përcjellë me tinguj dhimbjen e madhe për faktin që ai nuk jeton më.
Kënga shqiptare që pëlqen më shumë titullohet “Faleminderit” e kënduar nga grupi “Elita 5”.
Ashtu si shumë këngëtare të tjera menaxherja e Norës është e ëma, e cila ka edhe një favor të madh që është brenda profesionit të saj.
Këngëtarja vazhdon shkollën për modë, duke u shprehur se pasioni i saj për këtë fushë është po aq i madh sa ai për këngën.
Në internet ka qarkulluar për shumë kohë një foto montazh ku Nora paraqitet në toptess. E pyetur për këtë fakt, Nora është shprehur se nuk e ka fare zili trupin e vajzës që i kanë bërë montazhin pasi është shumë e kënaqur me trupin e saj, i cili është ashtu siç ia ka falur Zoti. Gjëja që i pëlqen të ndryshojë më së shumti është ngjyra e flokëve të saj.
Përgjigju Duke Cituar
Krijoni Kontakt