EKSPOZITA/ Galeria e Leopoldit në kryeqytetin austriak, bën privilegje maksimale për vizitorët “e paturpshëm”
Lakuriqësia, një mënyrë për të hyrë falas në muze
VIENË – Të “kursehesh” në veshje, nuk është dhe aq keq. Të paktën do të mund të vizitosh falas një nga muzeumet më të veçanta të botës, që gjendet në kryeqytetin austriak. Tipik për ekspozitat nudo, Muzeu i Leopoldit në Vjenë ka ftuar që edhe vizitorët të jenë të tillë, pra lakuriq. Nisur dhe nga vapa e këtyre ditëve të nxehta të korrikut, “të paturpshmit” që do të shohin ekspozitën do të kenë dy favore njëkohësisht; nuk do të djersijnë dhe më kryesorja, hyrja për ta do të jetë falas. Edhe pse ky nuk është një kusht i detyrueshëm, shërbimi për vizitorët nudistë do të jetë shumë i veçantë në disa drejtime. Të favorizuar do të jenë edhe ata që janë më pak “skandalozë”, të cilët do të shëtisin nëpër galeri me rroba banjoje. Parrulla në muzeumin e Leopoldit duket se funksionon kështu: “Sa më i zhveshur të jetë vizitori, aq më i privilegjuar është ai”.
Vizitorët
Edhe pse për shumë njerëz ftesa e drejtuesve të Muzeut të Leopoldit mund të duket e paarritshme, në fakt ka ndodhur krejt e kundërta. Lakuriqët nuk kanë vonuar që të shohin ekspozitën e veçantë, me temë ashtu si paraqitja e tyre. Të ardhur nga vende të ndryshme të botës, por edhe shumë vjenezë, vizitorët kanë qenë thuajse të gjithë të zhveshur, pavarësisht nga format e trupit. Megjithatë, nuk kanë munguar edhe femrat me rroba banjoje, apo edhe ndonjë “e (i) turpshëm” e (i) veshur. Por, ata që kanë qenë të veshur kanë rënë në sy më tepër se ata që kanë qenë me zhveshur. Kjo i ka vënë në siklet vizitorët jolakuriqë!
KRAHASIMI/ Ku ngjan dhe ku ndryshon një trup i zhveshur në jetën e përditshme nga ai në art
Pornografia, sa larg nga nudizmi?!
“Seksi i dobët” është më i forti në art. Femrat gjithmonë kanë frymëzuar mjeshtrat e vërtetë
Elisabeta ILNICA
TIRANË - Nudizmi nuk mund dhe nuk duhet të ngatërrohet me pornografinë. E përbashkëta e tyre është lakuriqësia, por nuk kanë të bëjnë aspak me njëra-tjetrën përsa i përket funksionit. Nudizmi në pikturë, skulpturë, fotomodelizëm, apo gjini të tjera të ngjashme me to, është një art më vete, që qëndron shumë më lart se sa thjesht një trup i zhveshur. Nëse dikush do të kishte përpara modelin lakuriq dhe më pas pikturën, skulpturën apo foton përkatëse, adhurimi nuk do të ishte për njeriun-nudo, por për artin-nudo. Ky i fundit është i pavdekshëm dhe shembujt janë të qartë. Kryeveprat më të mëdha botërore, por tashmë edhe në Shqipëri, janë nudot artistike. Lakuriqësia në këtë koncept ka frymëzuar krijuesit më të mëdhenj, si Goya, Boticelli, Kavaradosi, Renoir, Mikelanxhelo, Da Vinçi, etj., apo edhe skulptorë dhe piktorë të tjerë, sidomos të Rilindjes Europiane. Këta mjeshtra kanë bërë mrekulli me trupat e zhveshur, që pavarësisht nga koha, vazhdojnë të mbajnë majat më të larta të klasifikimit të artit. Të gjithë këta emra i kanë kushtuar një pjesë të rëndësishme të krijmtarisë së tyre nudos artistike, sidomos asaj femërore. Po ashtu, edhe në fotografi nudoja është një nga më të preferuarat dhe nuk lidhet fare me anën erotike të paraqitjes, por thjesht me trupin e njeriut, sidomos atij femëror, që dihet se është më joshës nga natyra. Siç duket nga përvoja, i ashtuquajturi “seks i dobët” është më i forti në botën e artit, duke iu rezistuar të gjitha shekujve, pavarësisht nga situatat e vështira fetare apo politike që ka kaluar çdo shtet.
FTESA/ Amerikani Spenser Tunik u kërkon qytetarëve të Lionit që të pozojnë zhveshur në kujtim të 11 shtatorit
Trupi, lënda e fotografisë nudo
LION – Fotografi amerikan Spenser Tunik, i njohur për klishetë e tij të nudove kolektive, ka ftuar qytetarët e Lionit të pozojnë të zhveshur në përkujtim të 11 shtatorit, për të arritur në këtë mënyrë realizmin e parë të këtij lljoi në Francë, kanë bërë të ditur të premten organizatorët e këtij aktiviteti. Artisti që tashmë ka fotografuar grupe njerëzish të zhveshur në Barcelonë, Londër dhe Nju-Jork, shpreson se shumë vullnetarë do të pranojnë të zhvishen për të, sipas iniciatorit të këtij projekti Xhorxh Vernei-Karron, gjatë një konference për shtyp. "Pa vullnetarët nuk mund të ketë vepra arti. Lënda e këtij profesioni është trupi", ka theksuar ai duke buzëqeshur. "Do të shohim nëse qytetarët e Lionit do të jenë të hapur".
Modelët do të mblidhen të dielën më 11 shtator, rreth orës 03.00 të mëngjesit, pavarësisht kushteve meteorologjike, në një vend ende të panjohur. Vullnetarët do të zhvishen të gjithë njëkohësisht dhe do të pozojnë sipas instruksioneve të Spenser Tunik. "Unë kam ndjekur qëndrimin e tij të fundit në Nju-Kesëll, 15 ditë më parë", ka treguar zoti Vernei-Karron. "Në minutat e para të gjithë ndjehen në siklet, por më pas të gjithë qetësohen dhe kalojnë në buzëqeshje. Është një moment tepër i çuditshëm". Për të, vepra e artit konsiston në përqendrimin e trupit dhe jo në tirazhin e fotografive, që nuk janë gjë tjetër, veçse kujtim i momentit. (AFP)
FENOMENI/ Shqiptarët ende nuk janë gati që të pranojnë në shoqërinë e përditshme një njeri lakuriq
Arti i ndaluar në emër të moralit
“Imoralët” në vendin tonë janë vetëm banorë të artit. Plazhet nudo mbeten projekte të zverdhura të investitorëve
TIRANË – Shqiptarët ende nuk janë gati që të pranojnë në shoqëri një njeri lakuriq. “Imoralët” në vendin tonë janë vetëm banorë të artit, edhe këta shumë të paktë, ndërsa për në plazh apo për ndonjë eveniment tjetër, as që bëhet fjalë. Të mësuar me përuljen ndaj disa rregullave strikte të vendosura nga dikush që identifikohet nën emrin “moral”, nudot pranohen vetëm brenda kuadrateve të ngushtë të Akademisë së Arteve apo disa metrave katrorë në Galerinë Kombëtare. Jashtë tyre ato janë të ndaluara. Jo me ligj, por me moral! Dhe kur dikush guxon dhe tregon lakuriqësinë, ai është i dënuar që të rrijë brenda këtyre hapësirave.
Pikturat
Gjatë sistemit komunist pikturat nudo në Shqipëri u kthyen një “specie” në zhdukje, edhe pse ende sa kishin filluar të lindnin. Me ardhjen e demokracisë, pikturat e mbijetuara nga zhdukja apo nga djegia, nisën që të dalin dalëngadalë. Në fillim me pak drojë dhe më pas me krenari, krijuesit e nudove nisën të tregonin për veprat e tyre se si kishin arritur t’i shpëtonin deri në ditët e sotme. Madje, gjatë këtyre rrëfimeve nisi dhe një garë se kush ishte nudisti më i madh në Shqipëri. Ndërsa skulporët e kësaj gjinie ishin të rrallë, për shkak të mundësisë gati zero për t’i fshehur ato. Ndërkaq, vitet e fundit është shfaqur tendeca e lakuriqësisë shqiptare në internet. Në fakt, thuhet se fotot janë të femrave shqiptare, por asnjëra prej tyre nuk ështe vetëdeklaruar ndonjëherë.
Plazhi
Trupat e zhveshur janë të ndaluar në të gjithë plazhet shqiptare. Asnjë biznes vendas apo i huaj nuk ka investuar për të bërë një plazh privat nudo, pavarësisht se bregdeti ynë ofron mundësi të tilla, me gjire të virgjëra. Edhe pse disa investitorë kanë projektuar disa herë një mundësi të tillë, plazhet nudo kanë mbetur thjesht një skicë, që edhe për disa vite të tjera do të vazhdojë të mbetet e tillë, pra një letër e shkarravitur.
E. ILNICA
Vangush Mio
Njeriu i portreteve njerëzore
TIRANË – Një ndër krijuesit më të mëdhenj të pikturave nudo, Vangjush Mio. Edhe pse ka gjysëm shekulli që është ndarë nga jeta, kohët e fundit Galeria Kombëtare e Arteve në Tiranë ka ekspozuar 110 vepra që rrëfyen “jetën prej artisti”. Piktori që krijoi me aq dashuri portrete njerëzorë e trupa lakuriqësisht të vërtetë, peisazhe plot ndjenjë të hollë e dashuri, më në fund ka treguar “vetveten” në një ekspozitë retrospektivë me vepra në fondi i Galerisë Kombëtare. Numërohen mbi 400 tablo të tij dhe po aq vizatime, të cilat ruhen në studion-muze të piktorit (Korçë), në Galerinë Kombëtare të Arteve, në Galerinë e Arteve-Korçë dhe në koleksionet e institucioneve të larta. Sipas kritikëve të artit, Mio zë një vend të rëndësishëm në historinë e artit shqiptar, duke u vlerësuar si një nga piktorët realistë të gjysmës së parë të shekullit XX.
Marre Dita.
Përgjigju Duke Cituar
Postuar më parë nga Xhuxhumaku
Krijoni Kontakt