Lajme nga mjekesia

[Asteroid]

Shkencëtarët thonë se përdorimi i antibiotikëve nga gratë mund të bëhet shkak për zhvillimin e kancerit në gji. Po megjithatë, shkencëtarët theksojnë se antibiotikët vazhdojnë të jenë ilaçet më të efektëshme kundër infeksioneve.
Sipas një studimi të, botuar në revistën Jama, Revista e Shoqatës së Mjekëve Amerikanë, shkencëtarët kanë zbuluar një lidhje të mundëshme midis antibiotikëve dhe kancerit të gjirit. Studimi u krye nga mjekët Christine Velicer dhe John Pitter së bashku me kolegët e tyre nga universiteti i Washingtoni. Ata studiuan të dhënat mjekësore të mbi 10 mijë grave, duke filluar nga viti 1993 deri më 2001.

Nga studimi doli se gratë që përdornin antibiotike për një kohë të gjatë ishin në rrezik më të madh për t’u prekur nga kanceri i gjirit. Por edhe gratë që përdornin rrallë antibiotike, ndodheshin në një shkallë të lartë rreziku për t’u prekur nga kjo sëmundje Mjekja Velicer thotë se sa më shumë që një grua kishte përdorur antibiotike aq më të mëdha ishin gjasat që ajo të prekej nga kanceri i gjirit.

Megjithatë duhet theksuar se studimi nuk arrin në përfundimin se antibiotikët e shtojnë rrezikun e zhvillimit të kancerit të gjirit. Megjithatë mjekët thonë se studimi nuk do të thotë që të ndërpritet përdorimi i antibiotikëve. Mjekët janë të një mendimi se antibiotikët vazhdojnë të luajnë një rol tepër të dobishëm në mjekësi dhe se ato përbëjnë një mjet mjaft të efektshëm për trajtimin e infeksioneve.

[Xhuxhumaku]

STUDIMI/ Kafeja ka veti antioksiduese, për të parandaluar disa patologji të mëlçisë

Kafeja, faktor për rritjen e jetëgjatësisë

Tregojnë se Gustavi III i Zvicrës, në vitin '700, kërkonte të shtonte dhembjet e të dënuarve me vdekje, duke përdorur doza të mëdha kafeje. Të dënuarit jo vetëm që nuk vdisnin, por kishin jetëgjatësi të lartë. Dihej prej kohësh që kafeja nuk dëmtonte shëndetin, por që të bëntë mirë, kishte kohë që nuk kishte ndodhur. Tani ata që nënvizojnë efektet mbi jetëgjatësinë dhe shëndetin të kësaj pijeje, janë specialistët e Insitutit Kombëtar të Studimeve për Ushqimet në Itali. Sipas tyre, nëse pini 3-5 filxhanë kafe në ditë jo vetëm nuk ju krijon probleme, por bën mirë për shëndetin e të gjithëve, madje dhe të atyre që vuajnë nga hipertensioni dhe të grave shtatzëna. “Tashmë duhet të hidhen poshtë të gjitha dyshimet rreth efekteve anësore të mundshme të kafesë që pihet në doza “normale”, duke u rekomanduar kujdes vetëm atyre që nuk durojnë kafeinën, të cilët mund të përdorin kafen e ftohtë”.
Duket se kafeja ka veti mbrojtëse ndaj shumë sëmundjeve, si p.sh. Diabeti i tipit 2, Parkinsoni dhe arteriosklerozave. Nëse hani një vakt me ushqime të skuqura, të pasura me radikale të lira, kafeja ka veti antioksidante. Kafeja ka rol të rëndësishëm në metabolizëm, falë një veprimi stimulus që ka për të ndihmuar për të kaluar momentet e lodhjes dhe rrit përqendrimin. Sipas studuesve, kafeja ka veti akntioksiduese për të parandaluar disa patologji të mëlçisë, në veçanti cerozën. Hidhet poshtë gjithashtu ideja se kafeja dëmton gratë shtatzëna, sepse nga studimi ka rezultuar se nuk ekziston asnjë lloj lidhjeje mes përdorimit të kafesë dhe rrerzikut për lindje të parakohshme”,- citohet mes të tjerash në raportin “Kafeja dhe shëndeti”.

MJEKJA/ “Qumështi i nënës ndihmon në asimilimin e lëndëve të rëndësishme për organizmin”

Pse duhet preferuar qumështi i gjirit

Siguron mbrojtje kundër infeksioneve dhe garanton një shkallë të lartë imuniteti të organizmit
TIRANË- “Kohët e fundit periudha e të ushqyerit me gji sa vjen e po zvogëlohet. Gjithmonë e më tepër nënat po preferojnë që të përdorin qumështin artificial, duke harruar se sado elemente ushyqese të përmbajë ai, nuk e zëvendëson dot kurrë qumështin e gjirit”,- thotë Xhemile Topi, mjeke pediatre.

Për më tepër, sipas saj, qumështi i gjirit ndihmon në krijimin e një raporti të pazëvendësueshëm midis nënës dhe fëmijës, i cili vazhdon gjatë gjithë jetës. “Ushqyerja me gji është mënyra më e mirë për të pasur një fëmijë të shëndetshëm dhe të zhvilluar normalisht. Të sapolindurit flenë shumë dhe pinë pak, mund të ndodhë që të pinë dhe vetëm 2-3 herë në ditë, më pas nisin të ndjenë uri, duke kërkuar të pinë edhe 13 herë në ditë. Nëse fëmija pi shumë herë, kjo ndodh për dy arsye; ose fëmija ka nevojë, pra, ndjen uri, ka dhembje, ndjen kënaqësi, por nuk duhet menduar kurrërsesi se i kthehet në ves.

Në momentin që nëna do të ketë një sasi të konsiderueshme qumështi, ai do të kërkojë të pijë më pak. Por nëna nuk ka pse përton, sepse nëpërmjet ushqyerjes me gji, fëmija jo vetëm heq urine, por njëkohësisht merr përkëdheli dhe ndihet i sigurt”,- thotë më tej pediatrja. Sipas saj, qumështi i nënës përfaqëson ushqimin bazë për fëmijën, për 6 muajt e parë të jetës, gjë që duhet të vazhdojë deri në dy vjeç. Ashtu si çdo ushqim tjetër, përbëhet nga disa elemente të rëndësishme për ekzistencën e fëmijës, ai mund të konsiderohet si ushqimi më i përshtashëm për ushqyerjen e tij, sepse ofron shumë përparsi. “Përparësia e parë e qumështit të gjirit lidhet me një varietet përbërësish që i garantojnë çdo fëmije ushqimin që u përshtatet nevojave të tij, ndryshe nga qumështi artificial që gjithmonë ndryshon në shije dhe në përbërës. Përmban proteina në sasinë dhe cilësinë e nevojshme për nevojat metabolike të bebes”,- nënvizon mjekja.

Sipas saj, qumështi i gjirit ndihmon në asimilimin e lëndëve të rëndësishme për organizimin në rritje të të voglit, që garantojnë rritje dhe zhvillimin normal të tij, si: yndyrnat, hekuri, vitaminat. “Ajo që është më e rëndësishme, është rol i shumëfishtë që luan qumështi i gjirit për mbrojtjen kundër infeksioneve dhe rrit shkallën e imunitetit të organizmit të fëmijës”,- përfundon mjekja.

Ushqyerja me gji garanton

- asimilim më të mirë të yndyrnave;

-asimilim më të mirë të hekurit

- ul sasinë e kripës në veshka dhe ul rrezikun për dehidratim të organizmit;

- në përbërjen e tij ka vitaminat e nevojshme për rritjen dhe zhvillimin normal të fëmijës.

-është i njëjtë në shije dhe përbërje

-siguron lidhjen psikologjike nënë-fëmijë

STUDIMI/ Pacientet e prekura nga tumori në gji, që kryejnë ecje të rregullta, kanë më shumë mundësi për të mbijetuar

Punët shtëpiake dhe të ecurit ndihmojnë për kancerin

UASHINGTON – Është e vërtetë se punët e përditshme shtëpiake mund të mos i pëlqejnë askujt, por bëjnë mirë për shëndetin, sepse mund të ulin rrezikun për shfaqjen e disa formave të tumorit në mitër.

Ky është përfundimi i një studimi të përbashkët nga një grup shkencëtarësh amerikanë dhe kinezë, të cilët kanë punuar së bashku për disa muaj.

Një studim i dytë ka treguar se pacientet që janë të prekura nga tumori në gji e kanë kryer ecje të rregullta, kanë pasur më shumë mundësi për të mbijetuar. Studimi ka treguar se aktiviteti fizik ndihmon në uljen e rrezikut për shfaqjen e disa formave tumorale, përveç se ndihmon në përballimin më të mirë dhe madje në parandalimin e sëmundjeve kardiake dhe të diabetit.

“Rezultatet tona përqafojnë idenë se rreziku i kancerit mund të ulet nëse mbahet një stil jetese aktive, e cila përfshin shetitje sa më gjata dhe kujdesje për punët shtëpiake ,- kanë pohuar autorët e studimit.

Ekipi i mjekëve ka arritur të vërtetojë se nëse te këta persona, që janë të prekur nga këto forma tumorale, ecin shumë dhe bëjnë punë shtëpiake, mund të arrihet që të ulet rreziku për shfajn e këtyre problemeve. Përfundimi është arritur pas analizmit të të dhënave të rreth 974 grave të moshës nga 30 në 69 vjeç, te të cilat është ulur ndjeshëm niveli i vdekshmërisë, pas programeve të rregullta me ushtrime fizike.

Marre nga gazeta "Dita"

[Xhuxhumaku]

MJEKËSI/ Duhet të përdoren frutat, perimet dhe buka me përzierje gruri

Buka e bardhë shton rrezikun për diabetin

Personat që pëlqejnë bukën e bardhë duhet të mësojnë se ky tip ushqimi, ashtu si të gjitha ato që kanë në përbërje të tyre amidonin, shton rrezikun për t’u prekur nga diabeti i tipit 2, që është forma më e përhapur e sëmundjes, pasi ndikon në rritjen e nivelit të sheqerit në gjak. Këtë hipotezë e ka hedhur Allison Hodge, i “Cancer Council” në Viktoria, të Australisë që këshillon të preferohen frutat, perimet dhe buka me përzierje gruri. Hodge ka analizuar efektin e glicerinës së këtij ushqimi. Për të studiuar efektin që ka treguesi glicemik në shfaqjen e diabetit të tipit 2, Hodge ka analizuar të dhënat e 36.787 personave për 4 vjet. Këta nuk vuanin nga diabeti dhe ishin me moshë 40- 69 vjeç. Rreth 400 persona janë prekur nga diabeti gjatë këtyre 4 vitevë vëzhgimi dhe ata që kishin ngrënë më shumë bukë të bardhë (gjysma e hanin të paktën 17 herë në javë), ose ushqime të tjera që kishin tregues glicemik të lartë, ishin më të rrezikuar për t’u prekur nga diabeti i tipit 2, në disa raste me një propabilitet 30 për qind më tepër. “Ky lloj ushqimi, ka shpjeguar Hodge,-shkakton rritjen e peshës dhe një punë të madhe për pankreasin, gjë që mund të shkaktojë ezaurim të qelizave që u “është delaguar” prodhimi i insulinës, që të dyja shkaqe të rritjes së rrezikut për zhvillimin e diabetit të tipit 2”. Por jo gjithçka është kaq lineare. Studiuesit kanë vërejtur se ata që ndiqnin një dietë me vlera të larta karbohidratesh, sheqernash dhe magnezi, duket të ishin të mbrojtur nga diabeti i tipit 2. Veçse nuk është shumë e qartë se përse ndodh një gjë e tillë. Ka mundësi që niveli i lartë i karbohidrateve mund të sjellë një sasi të vogël yndyrnash, rrethanë që mund të kontrollojë prodhimin e insulinës.

STUDIMI/ Analizat kanë treguar se niveli i stresit i shkaktuar nga frika ndaj infertilitetit ka efekte negative te mashkulli

Stresi nga infertiliteti ndikon në cilësinë e spermës

Studime të mëparshme kanë treguar për ekzistencën e një lidhjeje mes stresit dhe infertilitetit mashkullor. Pranë Departamentit të Psikiatrisë të “Siegen University” në Gjermani është vlerësuar impakti që ka stresi ndaj infertilitetit mbi përqendrimin e spermës.

Ekspertët kanë marrë nën shqyrtim rreth 120 pacientë, që i janë nënshtruar për dy herë një vizite andrologjike për të analizuar fertilitetin e këtyre personave.

E këto janë bërë në një distancë prej 6 muajsh nga njëra-tjetra.

Përpara çdo analize diagnostifikuese fertiliteti, pacientëve u është dhënë të përpilonin një pyetësor, me anë të të cilit synohej të vlerësohej stresi që shkaktohej nga infertiliteti.

Analizat kanë treguar se niveli i stresit nga infertiliteti kishte efekte negative në cilësinë e spermës.

Analiza të mëtejshme kanë treguar se gjendja e fertilitetit nuk kishte asnjë impakt mbi stresin nga infertiliteti.

Përfundimet e këtij studimi kanë treguar se stresi i krijuar për shkak të infertilitetit është një faktor mjaft i rëndësishëm në uljen e cilësisë së spermës. Marrë nga: Xagena

NDIHMA E SHPEJTË

Dalja e gjakut nga hunda

Pacienti duhet të qëndrojë drejt, me kokën e përkulur pak përpara. Vendosja e kokës mbrapa mund të shkaktojë bllokim të frymëmarrjes dhe mungesë rehatie. Pacienti duhet të marrë frymë me anë të gojës, ndërsa kap fort pjesën e butë të hundës (majën), derisa të pushojë gjakderdhja. Shmangni shfryrjen e hundës për disa orë pas daljes së gjakut. Vrimat e hundës duhet të qëndrojnë të bllokuara nga gjakmpiksja, e cila nuk duhet hequr. Nëse ndihma e parë jep rezultat dhe gjakderdhja përsëritet, konsultohuni me mjekun.

[shkodrane82]

Mr Big shume teme e nevojshme kjo per forumin, se besoj se te vjen keq
nese shtojme dhe ne tjeret ndonje gje...!

P.S Te pashe mrame ne film, se dija se te ka kape zemra ty..lol


Shtatzania e vonuar, diçka e zgjuar


Gratë të cilat nuk kanë lindur fëmijë deri në moshën 30 vjeç nuk mund të mbështeten detyrimisht në teknikat artificiale të lindjes për të mbetur shtatzënë, tregon një studim. Autori i studimit shprehet se teknologjitë e riprodhimit si ajo in vitro nuk mund të kompensojnë plotësisht kohën e lindshmërisë që kalon me moshë. I bazuar në përllogaritjet kompjuterike Dr. Henri Leridon zbuloi se nëse gratë shtyjnë mbetjen shtatzënë për herë të parë nga mosha 30-35 vjeç teknologjitë e riprodhimit do të ndihmojnë vetëm për gjysmën e mundësisë së lindshmërisë që ato humbin gjatë pesë vjetëve.


Niveli i ulët i kolesterolit tregues i kancerit të gjirit


Tek gratë e moshuara me mbipeshë, nivelet e ulta të kolesterolit (të mirë) HDL mund të jenë një tregues i rrezikut të shtuar të kancerit të gjirit, sugjerojnë studimet e kryera në Norvegji. Mjekja Anne-Sofie Furberg me aktivitet pranë Universitetit Tromso në Norvegji dhe kolegët e saj studjuan afro 39.000 gra norvegjeze, të cilat siguruan të dhëna për lipidet, peshën, dietën dhe për mënyrën e jetesës. Ato u vëzhguan për një periudhë kohore prej 17 vjetësh, kohë gjatë së cilës një numër total prej 708 grash u prekën nga
kanceri i gjirit.



Konsumimi pijeve alkoolike shton rrezikun nga kanceri i mëlçisë

Përdorimi i tepruarv i pijeve alkoolike, diabeti dhe hepatiti viral kombinojnë sinergjikisht për të shtuar rrezikun e zhvillimit të kancerit të mëlçisë, bëhet e ditur sipas një studimi të ri. Si kryesues i ekipit të studimit, mjeku Jian-Min Yuan deklaroi për "Reuters Health" se "mjekët duhet të jenë të vetëdijshëm për rreziqet e larta të kancerit të mëlçisë tek pacientët që janë obezë dhe të cilët kalojnë rreziqe të tjera si infektimi me virusin e hepatitit".


Macet, buburrecat, lagështira dhe myku kanë lidhje me astmën

Myku që përhapet me anë të ajrit po konsiderohet gjithnjë e më tepër si një faktor i rrezikshëm për astmën dhe aktualisht një studim i ri tregon se nivelet e larta të bakterieve të tilla gjenden në brendësitë e shtëpive të qyteteve së bashku me macet, buburrecat dhe problemet që lidhen me lagështirën. Rezultatet e këtij studimi të publikuar në gazetën "Journal of Allergy and Clinical Immunology", bazohen në marrjen në analizë të 414 fëmijëve të ndjeshëm ndaj mykut, të cilët vuajnë nga astma. Subjektet në fjalë u përzgjodhën nga shtatë komunitete urbane në Shtetet e Bashkuara të Amerikës.

[Xhuxhumaku]

STUDIMI/ Nëse përdoren çdo ditë ekstraktet e çajit jeshil, ulin rrezikun me 90 %

Çaji jeshil parandalon kancerin në prostatë

Një studim italian i kohëve të fundit ka treguar se nëse përdoren çdo ditë ekstrakte çaji jeshil, arrihet të parandalohet në 90 % të rasteve kanceri në prostat. Studimi është kryer te rreth 62 pacientë me lezione pre-malinje në prostat dhe vetëm një burrë është sëmurur, ndërkohë që 31 të tjerë që formonin grupin, nuk janë prekur nga kjo pathologji. “Studimet paraprake kanë treguar se katekinat e çajit jeshil, ose EGCG i pastër (përbërësi bazë i katekinës), pengojnë zhvillimin e qelizave të sëmura të modeleve laboratorikë. Qëllimi ynë ishte të vërtetonim të njëjtin veprim dhe te qelizat njerëzore dhe përgjigja ishte pozitive”,- ka nënvizuar optimist njëri prej studiuesve që kanë punuar për studimin.

Katekinat janë të padëmshme te njeriu, por studiuesit kanë parë se EGCG godet direkt qelizat e kancerit të prostates, duke i çuar të vetëvriten, pa prekur qelizat e shëndetshme. Studiuesit italianë kanë identifikuar targetin e mundshëm të veprimit të EGCG.

Kampioni i pacinetëve ishte me moshë nga 45 deri në 75 vjeç dhe janë përjashtuar vegjetarianët dhe ata që përdornin çaj jeshil apo antioksidantë. Nga 62 vullnetarët, 32 prej tyre kanë marrë tre doza të përditshme me katekina, 200 mg për dozë dhe pas 12 muaj trajtimi, i janë nënshtruar të gjithë biopsisë. Mes atyre që ishin trajtuar me 600 mg në ditë me GTCs, u verifikua vetëm një rast me kancer, ndërsa në grupin tjetër që trajtohej me pak mg, u vu re një rritje e rrezikut me 30%.

Studiuesit kanë pohuar se dieta mesdhetare e pasur me perime, është mjaft e mirë për të ulur rrezikun nga kanceri në prostat.

"Ende nuk dimë saktë se si veprojnë proceset biologjike të kancerit, por dimë se ai i prostatës është mjaft i përhapur në Perëndim”,-kanë thënë studiuesit.

STUDIMI/ Reagimi ndaj stresit nuk është e thënë të jetë i njëjtë te të gjithë njerëzit

Stresi, jo gjithmonë shkak për infarkte

Nëse truri arrin të përballojë stresin, atëherë rreziku për të patur probleme me infarktin eliminohen. Ky përfundim ka dalë nga Robert Soufer, i Institutit të Mjekësisë Kardiovaskulare në Universitetin e Jalit, dhe është publikuar në numrin e fundit të revistës “Circulation”.

Dihej prej kohësh që stresi ishte një ndër shkaktarët kryesorë për shfaqjen e këtij problemi dhe se aftësia për të ruajtur qetësinë ishte ndihma më e mirë për të ruajtur zemrën. Ajo që nuk arrihej të kuptohej mirë është fakti se si truri ynë ndërhynte për të kontrolluar funksionimin e zemrës, ose se cilat ishin reagimet që shkaktonin probleme të tilla.

Soufer ka fotografuar, duke përdorur rezonancën magnetike nukleare, trurin e personave të shëndetshëm dhe të atyre që gjatë jetës së tyre kishin patur probleme me zemrën. Studimi ka arritur të sqarojë se si zonat e trurit që “ndizen” në rastet e shqetësimeve të papritura me zemrën, janë të njëjtat me ato që u përgjigjen stimujve si frika dhe ankthi.

“Megjithatë, kaq nuk mjafton për të dalë në përfundimin se nëse ndiheni të stresuar, do të provokoni infart. Truri i çdonjërit prej nesh është i ndryshëm dhe në bazë dhe të eksperiencës së jetës, neuronet që takohen rastësisht, janë të ndryshme te secili nga ne”, -nënvizon Soufer. Bëhet fjalë për atë që njihet si plastikë e trurit, pra aftësia e neuroneve tona për t‘iu përgjigjur stimujve të jashtëm. “Për këtë arsye nuk do të jetë kurrë një tru i ngjashëm me një tjetër e kështu reagimi ndaj stresit nuk është e thënë të jetë i njëjtë te të gjithë njerëzit ”,- ka përfunduar specialisti.

Marre nga gazeta Dita.

[Larsus]

Nga New York Times: Drejtuesit e nje shtepie botuese po perpiqen te zbulojne se si eshte e mundur qe asnje nuk e vuri re qe njeri prej punonjesve kishte 5 dite qe vazhdonte te rrinte i vdekur i ulur ne tavolinen e tij te punes, derisa dikush e kishte pyetur nese ndihej mire apo jo. George Turklebaum, 51, i cili korigjonte dokumenta ne kete shtepi botimi qe prej 30 vjetesh, pati nje atak zemre ne pune ku ndodheshin dhe 23 punonjes te tjere.
Ai qetesisht nderroi jete diten e hene, por kete nuk e vuri re njeri deri te shtunen, kur njeri nga pastruesit e godines e pyeti perse ai po punonte per fundjave.
Shefi i tij, Elliot Wachiaski, tha: "George ishte i pari qe vinte ne pune cdo mengjes dhe i fundit qe largohej ne darke, keshtu qe nuk eshte dicka e pazakonte qe ai ndenji ne te njejtin pozicion per gjithe ate kohe pa thene asgje. Ai ishte gjithmone shume e zhytur ne punen e tij."
Autopsia vertetoi se ai kishte vdekur qe prej 5 ditesh nga nje atak ne zemer. George ishte duke korrigjuar disa dokumenta mjekesore kur ai vdiq.
Ju mund t'u jepni kolegeve tuaj nga nje te shtyre me berryl here pas here. \

Morali i ngjarjes:
MOS PUNONI SHUME. ASKUSH NUK VE RE.

[StormAngel]

Ja fobitë që na shqetësojnë përditë


Shekulli online

Fobitë janë shpesh nje objekt apo fenomen qe na shkakton frike, sa here qe kujtojme ose gjendemi perballe ketij objekti. Fjala "Fobi" tregon një frikë të fortë, joreale nga sendet, ndodhitë apo ndjenjat. Reann Dumont i cili sheron të sëmurët nga fobia prej 20 vjetesh, tregon se shumë njerëz për t'iu shmangur situatave të ndryshme bëhen të burgosur shtëpiake ose jetojnë me një vështirësi, ku shumica gjejne prehje tek alkooli. Rreth tri të katërtat e njerëzve me fobi nuk kërkojnë ndihmë. Në shumë raste ndikon edhe turpi, pasi çrregullimet psikike në disa kultura janë të stigmatizuara. Disa nuk e kuptojne se çfarë po ndodh, prandaj nuk ndihen te qete emocionalisht. Ekzistojnë disa fobi të njohura, por shkenctarët i klasifikojnë në tri kategori: Fobitë të cilat janë të perqendruara në objekte, insekte, kafshë, fluturime apo mjediset e mbyllura. Fobia shoqërore karakterizohet me frikën nga turpi publik si në rastet kur duhet të mbahet ndonjë fjalim.

Ja disa lloje fobish :

Ablutophobia- Frika nga pastrimi dhe larja
Achluophobia- Frika nga terri
Agliophobia- Frika nga dhimbjet
Ailurophobia- Frika nga macja
Anuptaphobia- Frika nga vetmia
Bibliophobia- Frika nga librat
Carnophobia- Frika nga mishi
Catoptrophobia- Frika nga pasqyrja
Chionophobia- Frika nga bora
Clinophobia- Frika nga shtrati
Dikephobia- Frika nga drejtësia
Didaskaleinophobia- Frika për të shkuar në shkollë
Dystychiphobia- Frika nga aksidentet
Ecophobia- Frika nga shtëpia
Eleutherophobia- Frika nga liria
Eurotophobia- Frika nga gjenitalet femërore
Ergophobia- Frika nga puna
Gamophobia- Frika nga martesa
Genophobia- Frika nga seksi
Gerascophobia- Frika nga pleqëria
Glossophobia- Frika e mbajtjes se fjalimeve në publik
Heliophobia- Frika nga dielli

[Xhuxhumaku]

STUDIMI/ Te burrat që pijnë 6 kafe në ditë rreziku ulet me 54 për qind

Kafeja ndihmon në parandalimin e diabetit

Përveçse është një minierë antioksidantësh dhe ndihmon në dieta, kafeja, nëse pihet rregullisht çdo ditë, ndihmon në uljen e rrezikut për t’u prekur nga diabeti. Ky është përfundimi i një studimi të publikuar në “Annals of Internal Medicine”, i cili ka treguar se te burrat që pijnë gjashtë ose më shumë kafe në ditë, rreziku për t’u prekur nga diabeti ulet me 54 për qind, ndërsa te gratë me 30 për qind. Beneficet e kafesë së filtruar, kanë qenë disi më modeste: kështu, te burrat rreziku nga diabeti ulej me 26 për qind, ndërsa te gratë, 15 për qind. Po sipas këtij studimi, çaji nuk jepte asnjë lloj rezultati.

Sipas Frank Hu, profesor pranë “Harvard School of Public Health”, që është një nga autorët e studimit: "prova se kafeja normale ka veti mbrojtëse ndaj diabetit, tashmë është vërtetuar”. Veçse sipas tij, ky studim nuk përbën një justifikim për të përdorur në sasi të madhe kafenë.

Për të shmangur një sëmundje si diabeti, duhet që të ruhet në kontroll pesha trupore, të hahet mirë dhe të qëndrohet fizikisht aktiv. Ndryshe nga sa mendojnë shumë persona, se konsumi i sheqerit nuk ndikon në shfaqjen e diabetit, kjo është një formë e sëmundjeve kardiovaskulare, shkaqet e së cilës duhen kërkuar te mbipesha dhe në stilin e jetës.

Nëse një person është mbipeshë dhe bën një jetë sedentare, vuan nga hipertensioni ose nga niveli i lartë i kolesterolit në gjak, të gjithë organet jetësorë të tij ndodhen nën stres, e për pasojë e detyrojnë trupin të prodhojë pak insulinë dhe të japë një përgjigje të pamjaftueshme ndaj insulinës së prodhuar. Nëse niveli i insulinës nuk është stabël, mund të dëmtohen enët e gjakut, që mund të shkaktojnë që nga problemet me sytë, deri te ato me veshkat dhe zemrën.

Studimi i ri ka analizuar të dhënat e rreth 125.000 pacientëve, të cilët i janë nënshtuar disa analizave nga 12 –18 vjet. Studime të tjera, ende në fazë fillestare, kanë treguar se pija ka efekte pozitive në parandalimin e sëmundjes së parkinsonit, kancerit të kolitit, cirozës epatike dhe depresionit. Nga ana tjetër, një filxhan kafe në ditë ndihmon ndaj krizave të astmës.

Ana tjetër e medaljes është fakti se kafeja ndikon në gjumë dhe në disa raste shkakton ankth.

Megjithatë, mbetet për t’u studiuar mekanizmi, nëpërmjet të cilit kafeja shkakton efekte të tilla pozitive.

Sipas Frank Hu, gabimi qëndron në faktin se vëmendja përqendrohet gjithmoë mbi kafeinën, duke harruar se kjo është një pije shumë komplekse, efektet biologjike të së cilës ende nuk njihen mirë.

Sipas Amleto D’Amicis, epidemiolog në “INRAN”, tashmë janë hedhur poshtë të gjitha mendimet rreth efekteve të padëshiruara të kafesë, dhe po vihet re se është një ushqim i pasur me veti antioksidante, potas dhe disa vitamina. “Përveç kësaj, studime të fundit kanë treguar se nëse konsumohet gjatë një vakti me bazë të lartë oksidante, si në rastin e ushqimeve të skuqura, kafeja ndihmon për të mbrojtur lipoproteinat”,- ka theksuar mjeku.

MJEKËSI/ Gastro-hepatologia Edlira Ibra tregon sekretet e një stomaku “të hekurt”

Menuja e ulçërave dhe gastriteve

“Ndikimi i kuzhinës tradicionale shqiptare, që bazohet në yndyrë, erëza dhe salca, ushqimet “armike” të stomakut”

Aida MALAJ

TIRANË- Tashmë pas vizitës së fundit te mjeku, ju duhet të tregoheni të kujdesshëm në menunë e përditshme? Miqtë ju kanë këshilluar të eliminoni mjaft ushqime nga tryeza juaj, por edhe pse po privoheni prej tyre, nuk ndieni ndonjë lloj lehtësimi? Por çfarë këshillojnë mjekët? Çfarë duhet eliminuar dhe shtuar në tryezë, tashmë që vuani nga gastriti apo në rastin më të keq nga ulçera? A ndikon dieta në eliminimin e këtyre problemeve?

Sipas Edlira Ibras, mjeke gastro-hepatologe pranë Poliklinikës së lagjes nr. 9, dieta luan një rol të rëndësishëm në evoluimin e sëmundjes. “Edhe pse në disa studime botërore nuk pranohet fakti se elementi dietë luan rol të rëndësishëm në shfaqjen e këtyre sëmundjeve, unë kam konstatuar nga përvoja ime personale si mjeke, se faktori dietik luan rol gati parësor në shfaqjen e këtyre pathologjive. Ndoshta këtu ndikon edhe kuzhina tradicionale shqiptare, që bazohet në përdorimin e tepërt të yndyrës, ushqimeve pikante dhe salcave, që janë dhe ushqimet “armike” të stomakut”,- nënvizon mjekja specialiste.

Sipas saj, menuja dhe regjimi ushqimor luan një rol po aq të rëndësishëm në shfaqjen e rasteve me gastrit ose ulçër, sa dhe përdorimi i duhanit, alkoolit dhe kafesë, seksit, medikamenteve dhe infeksionit nga “helikobakter pilori”, si dhe ndikimi i moshes dhe trashëgimisë.

“Çdo njeri duhet të tregohet i kujdeshëm në menunë dhe regjimin ushqimor të përditshëm. Të gjithë duhet të dinë se ushqimi është një nga faktorët kryesorë në shfaqjen e mjaft pathologjive kronike, të cilat në bazë kanë kequshyerjen dhe mungesën e elementeve bazë ushqimore, që garantojnë shëndet. Kështu, nëse doni të parandaloni këto sëmundje, është mirë të tregoheni të kujdesshëm në ushqimet që përdorni”,- këshillon gastro-hepatologia.

Menuja

Mund të hanë:

-qumësht jo më shumë 200-250 ml, si ushqim dhe jo si ilaç

-supra me makarona dhe oriz

-mish viçi dhe bagëtie, pula, peshk (të pjekura ose të ziera)

-fruta: mollë, pjeshkë dhe banane

-bukë të ndjenjur, jo të sapodalë nga furra

-duhet të hanë pak dhe shpesh (tre vaktet kryesore dhe dy të ndërmjetme)

Ju ndalohen

-çajrat

- pijet shumë të ftohta

-lëngjet e gazuara, përveç ujit

-çdo gjë e skuqur

-çdo gjë me salcë e piper

-të thartat

-frutat: portokalli, limoni dhe mandarinat

-shumë të ëmbëlat

-pijet alkoolike

-cigarja dhe kafeja

-sallata jeshile dhe sallatrat e tjera turshi dhe konservat

-bukë e ngrohtë dhe ushqime të nxehta

-medikamente si: aspirina, kortizoni etj.

[Xhuxhumaku]

Studimi/Alkooli rrit fluksin e gjakut dhe ndikon në parandalimin e problemeve mendore

Vera dhe birra parandalojnë iktusin dhe infarktin

Gratë që pijnë birrë dhe verë janë “më inteligjente”. Ky është përfundimi i një studimi të publikuar kohët e fundit, i cili ka treguar se këto pije ndihmojnë në parandalimin e iktusit dhe infarktit.

Studimi i publikuar në “Neë England Journal of Medicine” i kryer nga një grup studiuesish të “Harvard School of Public Health” në Boston, ka analizuar të dhënat e një grupi prej 12.000 grash, të moshave nga 70 deri 81 vjeç. Këto gra janë intervistuar nëpërmjet telefonit dhe u është kërkuar t’u përgjigjen disa pyetjeve, për të analizuar nivelin e tyre intelektual. Këto pyetje varionin që nga memorizimi i disa informacioneve e deri te numërimi. Dy vjet më pas, grupi i studiuesve të drejtuar nga Francine Grodstein, ka marrë në pyetje sërish të njëjtin grup dhe ka konsultuar rezultatet. Gratë që kishin deklaruar se pinin një herë në ditë një gotë verë apo birrë, kishin rezultate më të mira se pjesa tjetër. Studiuesit nuk kanë vënë re diferenca thelbësore mes grave që preferonin verën apo birrën. Si përfundim, studiuesit arritën në konkluzionin se alkooli rrit fluksin e gjakut, dhe mund të ndikojë në parandalimin e problemeve mendore. Grodstein ka saktësuar se studimi nuk duhet konsideruar si një nxitje për të përdorur alkool ose të pini më shumë, sepse abuzimi i fshin të gjitha beneficet.

Studime të tjera kanë treguar se si mund të krijohet lidhja mes përdorimit të alkoolit dhe një proteine që ndikon në shfaqjen e sëmundjes së Alzimerit. Kjo proteinë mund të çaktivizohet nga alkooli.

MJEKËT/ “Mbrojtja e parë e fëmijës fillon që në shtatzani. Në muajin e pestë dhe të gjashtë gruaja kryen dy doza të tetanozit”

Kur duhet të vaksinohet bebi

Përdorni kompresa me ujë të ftohtë dhe niseshte në vendin e vaksinimit. Mbani nën kontroll temperaturën me shurup paracetamoli

TIRANË- Pediatrit këmbëngulin se periudha më e mirë për kryerjen e vaksinave janë 6 vitet e para të jetës së fëmijës, kohë kur organizmi i të voglit është ende në formim.

“Në fakt mbrojtja e parë e fëmijës fillon që në periudhën e shtatzanisë. Në muajin e pestë dhe të gjashtë gruaja kryen dy doza të tetanozit, të rëndësishme për zhvillimin e shëndetshëm të fetusit të fëmijës.

Ndërsa vaksinimi i vërtetë i fëmijës nis që ditën e dytë të jetës. Që në maternitet i vogli bën vaksinën e tuberkulozit dhe hepatitit viral. Vaksina e tuberkulozit aplikohet nën lëkurë, në supin e majtë dhe pas javës së tretë ose të 4 fillon të skuqet. Kjo kalon vetë dhe nëna nuk duhet ta ngacmojë.

Më pas, që kur i vogli mbush 2 muaj, duhet të kryejë tre vaksina: hepatitin viral, difterinë+ tetanoz+ pertius dhe poliomelitin”,- sqarojnë mjekët.

Hepatiti viral është i pari që i jepet fëmijës dhe është më i lehti për t’u aplikuar, sepse nuk shkakton temperaturë dhe as dhimbje pas aplikimit. “Me qëllim që fëmija të mos traumatizohet, këshillohet që vaksina e dytë të jepet pas një ore. Fëmija duhet të jetë i shëndetshëm, me peshë normale dhe pa probleme shëndetësore”,- këshillojnë më tej mjekët.

Sipas tyre, vaksina e poliomelitit dhe doza e dytë e difteri+tetanoz+pertus, duhet të bëhet kur fëmija mbush 4 muajsh. “Poliomeliti sërish merret 2 pika nga goja. Në rast se fëmija është i sëmurë atë ditë, vaksina mund të bëhet deri dy javë më pas nga data e caktuar. Veçse nuk duhet harruar që i vogli të vaksinohet. Më pas kur fëmija mbush 6 muaj, duhet bërë sërish vaksina e hepatit viral, poliomelitit dhe difteri+tetanoz+pertus. Veçse duhet të kihet parasysh se vaksina e DTP (difteri+tetanoz+pertus) i duhet bërë fëmijës 1 javë pas aplikimit të vaksinës së hepatitit. Këto mund të shoqërohen me temperaturë, prandaj kërkohet një kujdes maksimal nga prindërit, në mënyrë që ajo të mbahet nën kontroll e të mos krijojë komplikacione”,- vazhdojnë më tej mjekët.

Vaksina e rradhës është ajo e fruth-rubeolës, që duhet bërë kur i vogli mbush 1 vjeç. “Kjo vaksinë bëhet në krah dhe pas 1 jave mund të japë temepraturë dhe të shfaqen disa puçrra si ato të vapës, por që mund të kalojnë duke përdorur pak shurup paracetamoli”,- thonë ata.

18-24 muajsh mjekët këshillojmë të bëhet sërish poliomeliti dhe doza e radhës e difteri+tetanoz+pertus. “Në këtë moshë fëmija nis të ecë dhe natyrisht që do të ketë më pak shqetësime. Kjo është dhe fundi i problemeve të vaksinave, sepse tashmë të voglit do t’i duhet të vaksinohet vetëm kur të mbushë 5 dhe 6 vjeç. Kështu, në moshën 5 vjeç ai duhet të bëjë fruth-robeolën, e cila do të pasohet në moshën 6-vjeçare nga poliomelit dhe vetëm difteri+tetonoz”, përfundojnë mjekët.

Këshilla për vaksnimin

Përpara se të vaksinoni fëmijët tuaj, duhet të keni parasysh këshillat e mëposhtme:

Vaksina e poliomeliti nuk jepet kur:

-Fëmija merr mjekim me antibiotikë

-Kur fëmija ka diarre, sepse në këtë rast vaksina eliminohet.

-Pas vaksinimit i vogli nuk duhet të pijë ujë, sepse uji me klor e shkatërron atë

-Më vonë mund t’i jepet ujë i zier

-Nëse fëmija e pështyn ose vjell vaksinën, ajo duhet të bëhet sërish

-Pas aplikimit në vendin e vaksinës vendosni kompresa me ujë dhe niseshte

-Në rast temperature, këshillohet paracetamol-shurup nga goja dhe një banjo komplet e fëmijës

-Nëse temperatura kalon mbi 38 gradë, jepini paracetamol supost.
-Kompresat nuk duhet të jenë me alkool ose raki, sepse shkaktojnë skuqje.

STUDIMI/ Kush do të jetojë gjatë, duhet të hajë peshk të paktën një herë në dy ditë

Dieta me bazë peshku, sekreti i jetëgjatësisë

TOKIO –Kush do të jetojë gjatë, duhet të hajë peshk të paktën një herë në dy ditë.
Nuk është thjesht një thënie popullore, por rezultatet e një studimi të zhvilluar në Japoni për rreth 19 vjet, nga një grup shkencëtarësh të Universitetit “Shiga”. Studiuesit kanë marrë në analizë të dhënat e rreth 9.252 personash (4.070 prej të cilëve burra dhe 5.182 gra të moshave nga 30 deri në 64 vjeç).

Për burrat studimi provon me saktësinë me të madhe se rezultatet e “eliksirit” të jetëgjatësisë është një dietë me bazë peshku. Sipas studiuesve dieta është mjaft e dobishme për burrat, të cilët janë më pak të ekspozuar ndaj rreziqeve për infarkt dhe iktuse cerebrale. Ndërsa për gratë studimi nuk ka të njëjtat përfundime ndërmjet kategorive të ndryshme. “Por kjo nuk do të thotë,- shpjegojnë studiuesit,- se përpara seksit femër peshku humbet aftësitë e tij.

Mendojmë se arsyeja e kësaj mungese funksionimi qëndron se aspetativa e jetës së grave është më e lartë se ajo e burrave (në Japoni në 2003, gratë kishin një moshë mesatare jetëgjatësie 84-vjeçare, ndërsa burrat 78,3)”.

Sipas studiuesve japonezë, studimi tregon se dieta me bazë peshku është një nga sekretet e jetëgjatësisë së japonezëve që prej vitesh janë në majat e klasifikimeve për jetëgjatësinë si për gratë, ashtu dhe për burrat.

[Xhuxhumaku]

STUDIMI/Presioni social, që i shtyn të bëjnë çdo gjë në mënyrë të shkëlqyer, bëhet shumë i madh

Gratë perëndimore, të sëmura nga ”perfeksionizmi”

Gratë perëndimore janë të stresuara dhe “të sëmura nga perfeksionizmi”. Shumë prej tyre preken nga probleme fizike dhe mendore, për shkak të përpjekjeve për të qenë perfekte në çdo aspekt të jetës së tyre: puna, fëmijët dhe punët e shtëpisë. “Janë shtuar kërkesat te gratë, e tashmë këto përfshijnë çdo aspekt të jetës së tyre”, -nënvizon psikologia Mahena Stief. “Kështu, presioni social, që i shtyn të bëjnë çdo gjë në mënyrë të shkëlqyer, bëhet shumë i madh. Sidomos për personat që ende nuk kanë vendosur prioritetet e tyre në jetë”. Sipas ekspertes gjermane, kjo situatë vë në rrezik në mënyrë të veçantë gratë që bëjnë shumë gjëra njëkohësisht, duke ngritur kështu një kurth për shëndetin e tyre. “Shpesh herë gratë mendojnë se duhet të bëjnë diçka më mirë, nga sa presin të tjerët”- nënvizon Jutta Meyer-Kles, konsulente ekonomike në Gjermaninë Lindore, e kështu, super-perfeksionizmi mund të çojë në depresion, sindroma obsesive-kompulsive, madje duke shkaktuar probleme fizike, probleme me gjumin, por dhe ndjeshmëri më të madhe ndaj sëmundjeve”,- shpjegon ekspertja. Nëse tensioni i brendshëm është shumë i lartë, organizmi kërkon një valvul për ta nxjerrë jashtë. Kriza migrene dhe debulesë manifestohen rregullisht në fund javë, duke i prishur dhe ditët e pushimit”,-shton ajo. Kundër efekteve të “sëmundjes së perfeksionizmit” ekspertja gjermane rekomandon pushime të shkurtra gjatë punës dhe ushtrime qetësuese që mund t’i bëni në shtëpi. Së fundi, gratë perfeksioniste duhet të revolucionalizojnë idetë e tyre mbi jetën. “Të paktën një herë në vit, duhet të pyesin veten se çfarë duan në të vërtetë? Pasi të kenë përcaktuar objektivat, duhet të fiskojnë prioritetet, duke përfshirë mes tyre dhe disa darka me miqtë”. Gjithashtu, është e nevojshme që të mësojnë të delegojnë punët në zyrë, duke u lënë partnerëve hapësirën e tyre, pa dashur të bëjnë gjithçka vetë dhe menjëherë. Stresi nga perfeksionizmi mund të luftohet, edhe duke imponuar ndonjë pushim dhe relas më tepër. (Mal/Adnkronos Salute)