Lajme nga mjekesia

[Asteroid]

Rreth 300 mijë njerëz shumë prej tyre gra të moshuara, shtrohen çdo vit në spital (ne Sh.B.A.)si pasojë e fraktuarave të kockave. Por një studim i kohëve të fundit lë të kuptohet se këto fraktura mes grave në periudhën pas menopauzës, mund të shmangen me disa ushtrime të lehta fizike, përfshi ecjen. Gjatë studimit që zgjati 10 vjet, u morrën në shqyrtim 61 mijë gra të moshës 40 deri në 77. Mjekja Diane Feskanich pranë spitalit Brigham në Boston thotë se gratë që kryenin ecje 4 orë në javë ulën 40 përqind mundësitë e prekjes nga fraktura. Sipas studimit, edhe gratë që kryejnë një jetë aktive fizike gëzojnë të njëjtën mbrojtje nga frakturat si ajo që sigurohet nga përdorimi i hormoneve.

[Asteroid]

Trauma nga aksidentet është shkaktari i tretë kryesor i vdekjeve në Amerikë. Kur viktima hyn në dhomën e urgjencës, koha nuk pret. Viktima vizitohet menjëherë nga mjekët për të parë nëse plagosja, në kokë, në shtyllën kurrizore, në gjoks, apo stomak, rrezikon jetën e viktimës. Kur rasti nuk është urgjent, ky lloj vlerësimi kryehet në pavionin e radiologjisë.

Doktor Robert Novelline është drejtor i pavionit të radiologjisë në spitalin qëndror të Bostonit. Qëndra e tij është e para në Shtetet e Bashkuara që filloi të përdori një lloj të ri skanimi të shumëfishtë e shumë të shpejtë. Nëpërmjet kësaj metode koka e pacientit mund të skanohet brenda 20 sekondave, një mënyrë kjo mjaft e shpejtë krahasuar me 1 orë e 20 minuta që nevojitet për një skanim të ngjashëm me aparatura të zakonëshme.

Doktor Novelline thotë kjo metodë e re skanimi ndihmon jashtëzakonisht mjekët në sallën e operacionit pasi i lejon kirurgët të ndërhyjnë me shpejtësi dhe në vendin e duhur. Në Shtetet e Bashkuara afro 40 përqind e spitaleve përdorin këtë metodë të re skanimi.

[Asteroid]

Një raport i ri që u bë publik dje nga Shoqata Amerikane e Mjekësisë tregon se përdorimi i alkoolit shkakton dëme të pariparueshme në zhvillimin e trurit të adoleshentëve. Deri tani në përgjithësi besohej se të rinjtë e marrin veten shpejt nga efektet e të pirit. Por shkencëtarët kanë zbuluar se është krejtësisht e kundërta. Alkooli shkakton më shumë dëme, ndoshta të pariparueshme në zhvillimin e trurit të të rinjve nën moshën 21 vjeçare sesa tek grupmoshat e tjera. Studimi tregon se përdorimi i alkoolit gjatë viteve të adoleshencës shkakton dëme në kujtesë dhe në qendrën e të mësuarit në tru, si edhe në lobet e tij të përparme që kanë të bëjnë me marrjen e vendimeve dhe gjykimin. Nga krahasimi i imazheve të trurit të adoleshentëve që kishin abuzuar me pijet alkoolike, me të atyre që nuk pinin, doli se ata që pinin e kishin zonën e trurit që merret me kujtesën dhe të mësuarit 10 për qind më të vogël. Ky është një zvogëlim i konsiderueshëm dhe ndoshta i pariparueshëm. Studimi tregon gjithashtu se ata që pinin kishin më shumë mundësi që të kishin rezultate të ulëta në shkollë, të vuanin emocionalisht dhe të përpiqeshin të vrisnin veten. Në studim thuhet se edhe pirja apo dehja e rastësishme, rriste mundësinë për dëmtimin e trurit të të rinjve, duke provuar se vendimet që marrin të rinjtë për të pirë apo mos pirë alkool, përcaktojnë cilësinë e trurit të tyre për sot dhe për të ardhmen

[Asteroid]

Shkencëtarët thonë se ndërsa riprodhimi gjenetik i qelizave është i mundshëm, nuk është ende e sigurt nëse shkenca ka arritur atë shkallë zhvillimi për të prodhuar qelizën me përbërjen e duhur gjenetike për të zëvëndësuar qelizën e sëmurë

Shtrohet pyetja; a është në gjendje që metoda e riprodhimit të qelizave të ndihmojë njerëzit që vuajnë nga hemoragjia cerebrale, shtylla kurrizore, ose nga Alcajmeri. Shkencëtarët pranë universitetit të Teksasit mendojnë se po. Ata thonë se kanë gjetur një zgjidhje të këtij problemi; një përzierje proteinash që ndihmon zhvillimin e riprodhimit të qelizave.

Shkencëtarja Ping Wu dhe ekipi i saj i kryen provat duke futur në trurin dhe në shtyllën kurrizore të një miu në laborator një përzierje proteinash dhe e vëzhguan atë deri në riprodhimin e neuroneve të nevojëshme. Mjekja Wu thotë se 90 përqind e qelizave nervore të injektuara në tru u zhvilluan në neurone. Më e rëndësishmja është se neuronet ishin pikërisht të llojit që shkencëtarët donin të riprodhonin.

Ndërkohë që prova të tjera në këtë fushë janë të nevojëshme, proteina që ndihmon në riprodhimin e neuroneve ka nxitur shpresat e atyre që kanë nevojë për zëvëndësimin e qelizave nervore.

[Asteroid]

Diabeti i tipit 2 mund të bëhet shkak për sëmundje të zemrës, të veshkave dhe verbim. Por në një studim të kohëve të fundit thuhet se gratë që hanë çdo ditë 30 gram arra kanë 30 përqind më pak gjasa për t’u prekur nga diabeti i tipit 2. Ndërsa tek gratë që marrin çdo ditë nga një lugë gjalp kikirikësh rreziku është 20 përqind.

Veç yndyrës së mirë, arrat gjithashtu përmbajnë vitamina të shumta, proteina minerale dhe fibër. Shkencëtarët pranë universitetit Harvard në Boston përfshinë në studimin e tyre rreth 83 mijë gra të moshës 34 deri 59 vjeç. Studimi vazhdoi 16 vjet. Kur analizuan të dhënat, shkencëtarët vunë re se arrat dhe gjalpi i kikirikëve mund të ulin rrezikun e prekjes nga diabeti i tipit 2 tek gratë.

Në studim thuhet gjithashtu se ndryshe nga mendimi i përgjithsëm, arra, bajamet, lajthitë dhe kikirikët nuk luanjë ndonjë rol në shtimin e peshës trupore.

[Asteroid]

Tensioni i larte shpesh është quajtur “një vrasës i heshtur”. Një studim i fundit, ndër më të rëndësishmit sipas komunitetit mjekësor, i botuar këto ditë në revistën e shoqatës amerikane të mjekësisë mund të ndryshojë mënyrën e kurimit të atyre që vuajnë nga tensioni i lartë. Studimi, arrin në përfundimin se një grup ilaçesh, të klasës së diuretikëve, të përdorur që para 50 vjetësh, jo vetëm që kushtojnë shumë më pak por janë edhe më të efektëshme sesa ilaçet e reja që firmat farmaceutike i reklamojnë me aq bujë.

Për uljen e tensionit në nivele normale ekzistojnë rreth 180 lloj ilaçesh. Por sipas një studimi të fundit, ilaçe e klasës së diuretikëve janë më të efektshmit për këtë qëllim.

“Gjatë studimit, vumë re këto ilaçe të vjetra janë më të mira jo vetëm për uljen e tensionit por edhe për parandalimin e komplikacioneve kardio-vaskulare,” thotë mjeku Paid Whelton i Departamentit të Mjeksisë në Universitetin Tulane.

Sipas studimit, pacientët e trajtuar me diuretikë, një klasë ilaçesh që pakësojnë kripërat dhe lëngjet në organizëm, rrezikoheshin më pak nga goditjet në zemër dhe zmadhimi i zemrës, sesa pacientët që merrnin ilaçe të reja e më të shtrenjta.

Studimi i financuar nga qeveria, që mori në shqyrtim 33 mijë persona 55 vjeç e sipër, ështe studimi më i gjerë klinik i këtij lloji i kryer ndonjëherë.

Çdo pacient pjesmarrës në studim e kishte tensionin 14 me 9 ose më të lartë. Disave iu dhanë diuretikë, si hidro-kloro-tiazide, të tjerëve iu dhanë ilaçe të reja të klasës së adelatit dhe amlodipinës, dhe një grupi tjetër, ilaçe të klasës së kaptoprilit.

Rezultatet ishin aq të qarta se që një mjek tha se nëse pacientët që vuajnë nga tensioni i lartë nuk marrin ilaçe të tilla, duhet të pyesin mjekun e tyre se përse nuk u ka dhënë.

“Ky studim shënon një pikë kthese. Studimi është i gjërë, i saktë dhe i pakundërshtueshëm, dhe mendoj se do të ketë një ndikim mjaft të madh në praktikën mjekësore,” thekson mjeku Michael Alelerman i Kolegjit të Mjeksisë Albert Einstein.

Diuretikët, të prodhuara prej kohësh, kushtojnë me lirë, një dozë mujore është më pak se 9 dollarë. Ndërsa ilaçet e reja të paktën 4 herë më shumë. Kjo është arsyeja që firmat farmaceutike u bëjnë atyre reklama të fuqishme.

Për t’i bërë ballë kësaj gjëndjeje, Instituti Kombëtar i Shëndetit po ndërmerr një përpjekje të pashembullt për të nxitur përdorimin e diuretikëve. 700 mjekë që morën pjesë në studim do të shpërndahen në mbarë vendin në përpjekje për të bindur mjekët që t’u këshillojnë më shpesh pacientëve të tyre ilaçe diuretikë.

Aktualisht, vetëm 30 përqind e personave që vuajnë nga tensioni i lartë trajtohen me diuretikë. Shkencëtarët thonë se nëse arrijnë që ky numër të ngrihet në 50 përqind, kjo do të shpëtonte jetë njerëzish dhe do t’i kursente ekonomisë çdo vit miliarda dollarë.

[Asteroid]

Kompania Cloniaid pretendon se ka klonuar një qenie njerëzore. Nga një hotel i Floridës, Brigitte Boisellier që drejton kompaninë Clonaid bëri deklaratën e saj por pa paraqitur ndonjë fotografi të asaj që ajo tha se ishte një foshnje klonuar.

Kompania Clonaid thotë se foshnja është vajzë e riprodhuar nga ADN ja e nënës së vet. Kjo kompani e quan këtë lindje si historike, ndërsa shkencëtarë të tjerë shprehen me fjalë më pak të mira. Ata mendojnë deklarata të tilla bëhen vetëm për publicitet dhe bujë Shkencëtarët kanë arritur të klonojnë dele, mace e lopë, por jo pa rrezikun e lartë për deformime fatale.

Kjo është pikërisht arsyeja që agjencia amerikane e ilaçeve ka ndaluar klonimin. Po ashtu shumë shkencëtarë besojnë se klonimi është i rrezikshëm dhe në kundërshtim me etikën.

Profesor Alta Charo thotë se nëse lajmi mbi klonimin e njeriut është i vërtetë dhe nëse foshnja duket se është e shëndetëshme, kjo do të përbënte një mesazh të rrezikshëm se teknologjia e klonimit është efektive dhe pa rrezik.

Megjithatë, disa shkencëtarë janë hedhur në përpjekje për të realizuar klonimin. Një prej tyre, mjeku italian Severino Antinori, pretendon se muajin tjetër një grua do të lindë vajzën e saj të klonuar.

[Asteroid]

Në një studim botuar në revistën e shoqatës amerikane të mjekësisë thuhet se ngrënia e peshkut mund të ndihmojë në uljen e rrezikt të hemoragjisë cerebrale, një nga shkaktarët kryesorë të vdekjeve në Shtetet e Bashkuara.

Gjithashtu, shkencëtarët pranë universitetit Harvard studiuan për 12 vjet dietën ushqimore të 40 mijë burrave të moshave nga 40 deri në 75 vjeç. Studimi arrin në përfundimin se personat që hanë mish peshku thuajse çdo ditë dhe ata që përdorin mish peshku vetëm disa herë në muaj përfitojnë thuajse njësoj për nga shëndeti.

Mishi i peshkut ndihmon në parandalimin e hemoragjisë cerebrale pasi acidi yndyror që përmban peshku ndihmon qarkullimin e gjakut. Gjatë këtij studimi, shkencëtarët nuk u përqëndruan në ndonjë pesh të veçantë, prandaj duket se përdorimi i çfardolloj peshku për ushqim, është i mirë për shëndetin.

[Asteroid]

Shkencëtarët thonë se frutat dhe perimet, veç vlerave ushqimore kanë edhe aftësi kuruese. Gjatë një studimi të kohëve të fundit, shkencëtarët arritën në përfundimin se perimet kanë një përmbajtje të lartë magnezi, një lloj minerali që mjekët shpesh e rekomandojnë për trajtimin e shumë sëmundjeve. Jeta e Lynne Suo sundohej nga dhimbja. Nga dhimbja e artritit. Nga dhimbja kronike e muskujve. Për afro tetë vjet ajo mbijetoi duke përdorur ilaçe kundra dhimbjes dhe steroide. Por për çudinë e saj lehtësimi më i madh i dhimbjeve nuk erdhi nga ndonjë ilaç, por nga minerali i magnezit.

Sarah Shaw pati një aksident automobilistik që e la atë me dhimbje në këmbë, dhe pa gjumë, derisa ajo filloi të merrte një tablet 600 miligramëshe magnezi çdo ditë.

Histori të tilla nuk e habisin specialisten Linda Rapson. Ajo mendon se rreth 70 për qind e pacientëve të saj demonstrojnë shenja të mungesës së magnezit, si dhimbje muskujsh, marrje mendsh e të tjera.

Mungesa në magnezium lidhet gjithashtu me sëmundjen e zemrës dhe me tipin e diabetit dy. Shumë njerëz zakonisht nuk konsumojmë një sasi të mjaftueshme të perimesh që përmbajnë këtë mineral, dhe nuk pimë një sasi të mjaftueshme uji të pasur në minerale. Mbi të gjitha, një dietë e mbushur me sheqer dhe brumëra, apo me shumë kalcium, shteron magnezin. Gjithashtu stresi çon në pakësimin në organizëm të këtij minerali jetësor.

Mjekja Mildred Seelig ka rreth katër dekada që po studion magnezin. Ajo po shkruan një libër, i cili pritet të botohet së shpejti, për të bërë të njohur këto veti të magnezit. Ajo dëshiron që kryerja e studimeve që të konfirmojnë rezultatet që ajo ka parë dhe ato që kanë raportuar pacientët e saj. Ata pranojnë që magnezi nuk është një kurë për gjithçka, por një trajtim i thjesht dhe i efektshëm të cilit nuk i është kushtuar rëndësi.

[Asteroid]

Sipas statistikave, rreth 10 milionë amerikanë vuajnë nga shrregullimet e të ngrënit, shkaktar kryesor i shumë sëmundjeve. Shumë vuajnë nga Anoreksia nervoze, pasi për të mos shtuar peshë, u nënshtrohen dietave ushqimore përtjej kufijve ekstreme. Shkencëtarët në fushën gjenetike tani thonë se si mbi pesha trupore ashtu edhe nën pesha e shkaktuar nga anoreksia mund të jenë sëmundje të trashëguara gjenetikisht. Por cilët nga 31 mijë gjenet e kodit gjenetik të njeriut mund të jenë fajtorë për këto sëmundje. Shkencëtarët po punojnë për përcaktimin e këtij gjeni duke marrë në studim pjestarë të familjeve që vuajnë nga anoreksia. Megjithatë shkencëtarët thonë se problemi mund të mos jetë vetëm gjenetik, por edhe pjesë e kulturës dhe mjedisit ku jetojmë. Për anoreksinë deri tani nuk ka ndonjë kurë mjekësore, por shkencëtarët shpresojnë të gjejnë një zgjidhje të këtij problemi në përfudnim të studimit që priet të zgjasë 4 vjet.