PD: Negociatat u mbyllën, qeveria e re publikohet në 10 gusht

[Xhuxhumaku]

“Standartet” e ankthit!

Dr. Mirela Oktrova

Ishte një mbrëmje e nxehtë vere, e ngarkuar me deklarata politike herë të ekzaltuara dhe herë cinike, me konkluzione evazive vëzhguesish dhe rezultate paraprake të paplota, me maratona të stërgjata konferencash shtypi dhe lakimin e gjithëgjendur të fjalës “standart(e)”. “Ç´plane ke sonte?” ishte mesazhi, që disa miq, i dërguan një shoku të përbashkët, punonjës administrate, të cilin kishin dy muaj pa e parë. “Të pres të nesërmen!” erdhi përgjigjja. Më pas komunikimi u konvertua në heshtje dhe humori i mbrëmjes iu blatua reflektimit. Në këtë kohë të ngarkuar, kur nervat pulsojnë me lajme dhe platforma qeverisëse, kur temperaturat dublojnë ethet e pushtetit dhe administrata amullon në jerm, s´ishte hera e parë, që prekja ankthin... . Po tek vazhdoja të dëgjoja stërstrapacimin e fjalës „standarte“ s´di pse mendja më sajoi diçiturën më të hidhur të këtyre paszgjedhjeve, idenë se të vetmet standarte të plotësuara mbeteshin „standartet“ e ankthit...

****
Qëkurse vendosëm të mposhtim izolimin tonë dhe të synojmë drejt botës së lirë, na është bërë zakon të krahasohemi me të. Po ndërsa dëshira për të ecur drejt saj ka mbetur e pandryshuar, linjat e krahasimit me të kanë variuar në përputhje me premisat dhe interesat e krahasimit. Shpesh i kemi dhënë vetes zemër, duke u treguar romatikë idealistë, i jemi referuar traditës e pozitës gjeografike dhe jemi munduar të bindim veten, se ndryshimi s´është i thellë dhe se rruga para nesh nuk është e gjatë. Herë të tjera jemi munduar të jemi realistë dhe të vëmë gishtin në plagë, i jemi referuar mendësisë dhe komportimit tonë social duke kuptuar, se largësia që na ndan prej së pjesës së botës që synojmë është aq e thellë, sa afrimi me të duket frikësisht larg.

Krahasimi thuajse obsesiv s´u mungoi as këtyre zgjedhjeve. Propagandimi i afateve aventureske të integrimit euro-atlantik, shpërdorimi i kontakteve private dhe axhendave diplomatike për qëllimet e fushatës dhe loja me deklaratat e personaliteteve të huaja gjatë dhe pas votimit përbëjnë nga njëra anë dëshmi të shpërdorimit flagrant të dëshirës së shqiptarëve për integrim. Shndërrimi i standartit të zgjedhjeve në matës të së drejtës së Shqipërisë për integrim, varësoi vlerësimin tonë të zgjedhjeve nga ai botës për to, duke reflektuar në anën tjetër të metën tonë kronike të zhvendosjes së vendimeve përtej kufijve. Po pasi vëzhguesit ndërkombëtarë folën për plotësim të pjesshëm të standarteve, është detyra jonë tani të analizojmë, se në cilat aspekte ia arritëm t´u ngjajmë demokracive, ku synojmë dhe në cilat jo.

Nëse do të vendosnim të ishim realistë dhe të sinqertë me veten, do të duhej të pranonim se zgjedhjet tona ndryshuan thuajse në të gjithë aspektet nga përkatëset në Perëndim. Në përgatitjen e fushatës ato dëshmuan parametra të dyshimtë të përzgjedhjes së kandidatëve, mostransparencë për personalitetin dhe burimet e tyre të pasurimit, pamundësi skualifikimi për shpërdoruesit e postit për interesat e fushatës dhe lista të fallsifikuara partiake a lá Dushk. Fushata u shqua për njëtrajtshmëri dhe vulgaritet replikash elektorale, për injorim të zgjedhësve dhe instrumentalizim të dëshirës së tyre për integrim, për gabime flagrante në pasqyrimin mediatik të fushatës dhe papërgjegjësi për shpenzimet gjigande. Paszgjedhjet e çuditën botën sa me stërzgjatjet dhe zvarritjet e numërimit të votave ashtu edhe me papërgjegjësinë e deklaratave partiake, sa me tendencën për manipulim aq dhe me bezdinë e vëzhgimit, sa me arbitraritetin elektoral aq edhe me papërgjegjësinë politike.

Optimistët padyshim që do të kundërvihen me argumentin, se s´duhet nxirë një realitet, i vlerësuar si gjysëm standart prej të huajve. Natyrisht, nëse të huajt vlerësojnë se standartet tona demokratike kanë përparuar, kjo s´duhet nënvleftësuar dhe aq më pak mohuar. Po ajo, prej së cilës duhet të distancohemi ne urgjentisht është të vetkënaqurit me vlerësimin e jashtëm të një realiteti, të cilin e përditë e ndjejmë, se paraqitet shumë më kritik nga ç´duket e ç´thuhet. Ne të gjithë bëjmë mirë të kuptojmë se standartet tona jo vetëm që mund t´i ngremë vetëm vetë, por dhe mund t´i vëzhgojmë dhe vlerësojmë para së gjithash vetë. Nëse provimin e demokracisë duam ta marrim për të mësuar për të ardhmen, nuk mund të pretendojmë ta kalojmë atë duke kopjuar. Standartet e zgjedhjeve tona do të ngrihen kështu kur ne të kuptojmë se në kabinën e votimit hyhet për të votuar, se zgjedhjet nuk janë farsë por nevojë dhe se kryqi në fletën e votimit është përgjegjësia e secilit për të nesërmen.

Se për ç´standarte bëjmë fjalë ne kur në mes të Tiranës votoi babai për djalin, shoku për miqtë dhe gruaja për fisin e burrit? Ç´standart plotëson zgjedhësi i paguar, që mësyn kabinën për të këmbyer votën e plotësuar me një bosh? Ku është demokracia kur rivalët blihen dhe kërcënohen dhe shumicën e vendos një kërrabë teli, që nxjerr dhe prish vota? Sa i lirë është një vendim elektoral, që blihet me një muaj ujë, drita dhe patate? Për ç´standarte mund të bëhet fjalë kur parazgjedhjet i dominon ankthi i blerjes së votave dhe paszgjedhjet frika e zbulimit të manipulimit? Ç`mund të presë nga demokracia një zgjedhës i blerë dhe ç´i jep asaj një deputet i vjedhur?

Ka ardhur koha të kuptojmë, se lojën që kërkojmë t´ua luajmë të huajve ka kohë që po ia luajmë vetvetes, se fantazmat që na zënë frymën i kemi ngritur dhe ushqyer vetë, se nëse pushteti nuk na respekton kemi merituar të na injorojë, se korrupsionin nuk e lind një krah politik po një mendësi e tërë shoqërore, se një shoqëri e korruptuar nuk mund të mos korruptojë një sistem zgjedhor dhe se zgjedhjet e korruptuara nuk të japin dorë për të luftuar korrupsionin. Nuk mund të kërkojë zgjedhje të ndershme ai që e filloi karrierën duke vjedhur mastiç, nuk mund të denoncojë mashtrimin kush gënjeu fshatarët me çeqe dhe përralla integrimi, nuk mund të denoncojë padrejtësitë kush vodhi pasuri e kërcënoi ekzistenca, nuk mund të kërkojë luajalitet kush blen karrige e shet bindje, s´mund të pretendojë për krizë të moralit, kush s´ka respektuar vlera kurrë…

Shoqëria jonë do të nisë të ngrejë standartet, kur të bëhet e sinqertë me veten dhe të pushojë se jetuari me „sikur“. S´është nevoja të synojmë t´i bëjmë zgjedhjet si bota – le të tentojmë fillimisht të bëjmë zgjedhje. Le të punojmë pa mashtruar, të mos flasim pa dëgjuar dhe të përpiqemi të mbajmë premtimet. Për t´iu afruar botës nuk mjafton t´i mbushësh mendjen asaj se je ashtu siç do të jesh – për t´u bërë si bota duhet të duash dhe përpiqesh të bëhesh ndryshe nga ç´je. „Mos ëndërro jetën – jeto ëndrrën“, është parrulla e realistëve, “jeto liritë e tua!” është përkthimi i saj i vyer prej demokratëve.
Demokracia është fundi i traditës së pulave të lagura, fundi i metodave policore, vdekja e frikës dhe triumfi i logjikës: s´ka deklarim pasurie pa hetimin e burimeve, s´ka financim fushate pa transparencën e rrugëve e formave, s´ka zgjedhje pa votuar, s´ka pushtet pa njohur autoritetin e tij, s´ka të drejtë pa mundësinë e ushtrimit të saj.

Objektivat e qeverisjes së re janë gjigande, ashtu siç është gjigand edhe premtimi për të shbërë kujtesën negative. Antikorrupsioni, përshpejtimi i integrimit, decentralizimi dhe përgjithësisht reformat kërkojnë mobilizimin e më shumë se një force politike. Përpjekja për angazhimin e sa më shumë syresh në qeverisjen e ardhshme, pavarësisht në i vlen shumicës absolute, bashkimit të shqiptarëve apo të dyjave bashkë reflekton prirjen për përfillje. Nëse partitë e vogla dalin nga roli i vasalit dhe shumica i mbahet përfilljes, ndryshimi ka shanse ta mënjanojë ankthin. Nëse jo, shumica mund të shndërrohet në mbytëse dhe ankthi në vrasës. Qeverisja do objektiva, por realizimi do njerëz. Që njerëzit të punojnë, duhet eleminuar ankthi i flakjes, denigrimit dhe kuteve joprofesionale. Që pozita të mbajë premtimet, duhet vigjilenca e opozitës, që politika të mos shkasë, duhet shoqëria civile, mediat dhe e drejta e pacënuar për t´u shprehur hapur. Ndryshim s´do të thotë të ndryshosh arritjet pozitive, ndryshimi mund të fillojë dhe si ndryshim i konceptit për ndryshimin! Mund të fillohet dhe me çstandartizimin e ankthit!


17/07/2005
KATEGORIA: Analiza

[BvizioN]

Korrik 17, 2005 - 11:13

Tiranë

PD publikon programin e 100 ditëve të para të qeverisjes

PD: Gjysma e legalizimeve brenda 2005

Do të shkarkohet stafi i lartë i KESH dhe të korruptuarit. Largimi i të inkriminuarve nga institucionet dhe të korruptuarve nga doganat.Goditje e grupeve të njohura kriminale. Rishikim i Ligjit të Pronave, hapje e dyerve të UT për të githë

Darina Tanushi

TIRANË – Kryetari i PD-së, njëkohësisht edhe kandidati i opozitës për postin e kryeministrit, Sali Berisha ka bërë publike dje, gjatë një mbledhjeje të hapur të Komitetit të Orientimit të Politikave platformën e qeverisjes për 100 ditët e para, pas marrjes së drejtimit të ekzekutivit. Në një listë të gjatë të atyre çka do të bëjnë demokratët rendisin edhe një synim tepër ambicioz siç është shpresa që brenda vtit 2005 të nënshkruhet marrëveshja e Stabilizim-asociimit me Bashkimin Evropian. Sipas kësaj platforme, qeverisja e re kërkon që në gjysmën e mbetur të këtij viti të kryejë më shumë se gjysmën e legalizimeve. Në program thuhet se do të bëhet një rishikim i ligjit për legalizimet e banesave dhe do të rifillojë procesi në përputhje me ndryshimet ligjore. Po kështu mendohet që në 100 ditët e para të qeverisjes të bëhet edhe një rishikim i ligjit për kthimin dhe kompensimin e pronave në përputhje me programin e PD-së dhe të aleatëve të saj.PD-ja angazhohet të bëjë një llogaritje të saktë dhe transparente të kostos dhe hartim të programit të kompensimit. Qeverisja e re në fillimet e saj do të krijojë edhe një Task-Force antikorrupsion nën drejtimin e Kryeministrit, për të intensifikuar luftën kundër korrupsionit. Sipas kësaj platforme, do të kryhet edhe transparenca (për aq sa i takon qeverisë dhe PD-së) për financimet e zgjedhjeve të vitit 2005. Sipas kompozimit të qeverisë me pak kabinete, do të bëhet edhe ristrukturimi i ministrive dhe institucioneve qendrore të ekzekutivit. Po kështu,thuhet në platformë, do të mbyllen ose shkurtohen një rrjet i tërë institucionesh parazitare rreth Këshillit të Ministrave dhe ministrive të ndryshme. Ndërkohë qeverisja demokrate do të ndryshojë stafin e lartë drejtues të koorporatës elektroenergjitike, do të largojë punonjësit e korruptuar dhe merr përsipër të kryejë një kontroll të thellë financiar në këtë kompani, do të ketë reduktim të faturimit aforfe në më shumë se 30% të rasteve dhe zëvendësimi i tyre me faturën sipas matësave elektrikë të konsumit dhe do të sigurojë furnizimin me energji elektrike për dimrin 2005-2006 në të gjithë vendin. Një ndër pikat e kësaj platforme është edhe bllokimi dhe anullimi i kontratës së shitjes së Albtelekom.


Berisha
Gjatë fjalës së mbajtur në takimin me KOP-in, kryetari i PD-së u shpreh se, "një grup i kualifikuar ka bërë projektin e 100 ditëve të qeverisjes, i cili pjesërisht iu paraqit elektoratit, tërësisht do t´i paraqitet parlamentit të ardhshëm". Ai i ftoi anëtarët e KOP që mbi këtë dokument të punojnë dhe të debatojnë me grupin e ekspertëve. "100 ditët e ardhshme duhet të jetë ditët më intensive të jetë sonë. Në 100 ditët e para ne do të hedhim themelet e ndryshimit ndaj edhe studiojeni me vëmendje. Ai është një projekt, ai duhet të pasurohet me propozimet dhe sugjerimet e idetë tuaja detatiste",- tha Berisha. Ne ju kemi premtuar shqiptarëve, tha ai, se gjashtë muajt e parë do të jenë arritjet e qarta në betejën kundër çmontimit të këtij sistemi. "Këtu nuk do të ketë asnjë kompleks. Ata që përdorin si justifikim se korrupsion ka kudo, ne u përgjigjemi se kjo është e vërtetë, por sistemim korrupsioni sipas Bashkimit Europian dhe institucioneve të tjera ka vetëm në Shqipëri, se korrupsioni u rrit 300% nga ´96 deri në 2003 sipas raportit të BB, se shteti ka rënë 300%. Këta i kanë fshehur pjesët më denoncuese. Ndaj edhe duhet që veprimi të organizohet në këtë shkallë që ky sistem të çmontohet nga të gjitha objektet ligjore",- tha Berisha. Ne kemi qenë të përcaktuar për një tranzicion të qytetëruar, tha më tej Berisha, por humbësi i mbylli dyert këtij tranzicioni, i zhytur në komplekse dhe në lidhje, nga të cilat nuk mund të dalë. Zoti Nano zgjodhi rrugën tjetër. Është zgjedhja e tij, por ne nuk heqim dorë nga përgatitja intensive për një tranzicion të butë, tha Berisha.

17/07/2005 ( Shekulli )

[BvizioN]

Kryetari i PD-së, tha se jo të gjitha partitë aleate, do të përfaqësohen në kabinetin qeveritar

Berisha: Jo çdo aleat ministër

"Duhet të kenë parasysh interesin e reformave dhe jo përmasat e copës"

N.Perndoj
TIRANE - Jo çdo aleat që do të përfshihet në koalicionin e ardhshëm, të drejtuar nga Partia Demokratike, do të marrë pjesë në qeverisje. Kryetari i Partisë Demokratike, Sali Berisha, tha dje se, qeverisja e ardhshme do të jetë në funksion të zbatimit të reformave në vend. Për këtë arsye, ai ka kërkuar edhe mirëkuptimin e aleatëve, se ristrukturimi i qeverisë, do të nisë nga baza deri në kabinetin qeveritar, duke pasur parasysh dhe numrin e vendeve në qeveri, që do të reduktohet në 14 poste ministrore. "Mendoj se, nëse vënë interesin e reformave në mes dhe jo përmasat e copës, do të gjejmë marrëveshjen, do të qeverisim shumë mirë së bashku pasi, sot ne kemi të gjithë pjekurinë, përkushtimin, ekspertizën për të proçeduar me shpejtësi në interes të të gjithë qytetarëve shqiptarë, në kuadrin e reformave. Ajo ç´ka unë mund të deklaroj për anëtarët e koalicionit me të cilët fituam zgjedhjet dhe anëtarëve të tjerë të ftuar, forcave të tjera të ftuara, se ne jemi të vendosur që të ndajmë qeverisjen, me të gjithë ata që janë të gatshëm të kontribuojnë në reforma. Por, baza mbi të cilën ne jemi të vendosur të negociojmë, është një bazë e gjerë. Natyrisht, kur them strukturim, them që qeverisja do të strukturohet nga baza deri në piramidën kryesore, si një qeverisje koalicioni",- tha Berisha. Deri më tani, krahas partive të vogla të djathta edhe tre partitë e majta, i kanë kthyer një përgjigje pozitive, ftesës së Partisë Demokratike për të filluar negociatat. Secila prej partive, përveç atyre të majta, i kanë bërë publike në një farë mënyre pretendimet e tyre, që janë deri më tani në nivel ministror. Por, kjo duket se do të jetë e pamundur për disa prej tyre, nisur nga numri i vogël, siç u shpreh edhe lideri demokrat, Berisha, por edhe nga përfshirja e njerëzve kryesorë të PD-së dhe anëtarëve të KOP-it, përfshirjen e të cilëve e konfirmoi dje, lideri i opozitës. "Nuk ka mëdyshje se përfaqësimi do të bëhet duke lexuar me përgjegjësi mesazhin që dha elektorati shqiptar. Kështu që, edhe ata do të përfaqësohen denjësisht. Unë mund të them që kabineti do të jetë me një nivel të lartë ekspertize", - shtoi ai. Pak ditë më parë, Kryetari i PD-së, Sali Berisha, u shpreh se kërkesa për bashkëpunim me partitë e qendrës dhe qendrës së majtë, nuk bëhet për qëllime numrash. Ai është shprehur se deri më tani, PD ka një mazhorancë të rehatshme. "Mendoj se shansi historik i shqiptarëve, janë proçedimi me seriozitet i qeverisë së ardhshme ndaj reformave. Pa dyshim, më të suksesshme, më të mbështetshe janë ato refoma që kryhen nga një qeveri me spektër të gjerë përfaqësimi", - u shpreh Berisha pak ditë më parë. Kryetari i demokratëve u shpreh se, ky proces reformash do të nxjerrë Shqipërinë nga varfëria drejt mirëqenies, nga ngrirja e proçesit të integrimit në integrimin e saj, nga papunësia në punësim, nga dëshpërimi në shpresë, nga mungesa e rendit publik, në një vend të sigurt më tërheqës se të gjithë të tjerët në rajon, për investimet e huaja.




18/07/2005 ( Shekulli )

[BvizioN]

Tirane

Koalicioni qeveritar që do të krijohet, do të cilësohet si "koalicioni për reforma dhe antikorrupsion"

Qeveria, nisin bisedimet zyrtare

Takimet, në zyrat e kryesisë së Kuvendit. Berisha do të propozojë i pari postet

Nevila Perndoj

TIRANE - Nga sot e ditët në vijim, demokratët do të fillojne negociatat më partitë e koalicionit të djathtë dhe tre partitë e tjera të qendrës, dhe qendrës së majtë, që e kanë pranuar tashmë ftesën. Zyrtarë të PD-së, janë treguar dje, tepër të rezervuar mbi nivelin e përfaqësimit, duke shtuar se gjithçka do të bëhet publike gjatë kësaj jave. Ndërkohë, drejtues të partive të vogla janë në pritje të qëndrimit që PD, do të bëjë lidhur me datën dhe kohën se kur do të zhvillohet. Secila prej partive të djathta, i kanë kthyer një përgjigje me shkrim ku shprehen të gatshëm për të negociuar. Por, asnjë prej tyre nuk ka paraqitur në përgjigjen e ftesës, kërkesat e tyre ndaj qeverisë së ardhshme, duke sqaruar se, kjo do të jetë objekt diskutimi gjatë negociatave. Drejtues të partive të vogla, u shprehen dje për "Shekullin" se gjatë negociatave, do të dëgjojnë propozimet e PD-së për partinë që ata kryesojnë. Kësaj here, partitë aleate do të kërkojnë nga PD, edhe propozimet që kjo seli ka edhe ndaj partive të tjera. Pra, secila prej partive do të kërkojë edhe pozicionin që do të kenë partitë e tjera të ftuara, me qëllim që të japin objeksionet e tyre. Deri më tani, përveç përgjigjeve që janë kthyer nga secila parti, asgjë tjetër nuk është bërë e qartë rreth formës së negociimit. E vetmja gjë që dihet, është se, negociatat do të jenë bilaterale dhe palët do të mblidhen në zyrat e Kuvendit, ndërkohë që niveli i përfaqësimit të partive të vogla, do të jetë në varësi të nivelit, që do të ketë Partia Demokratike. Mendohet që negociatat të fillojnë njëherë me partitë e vogla me më pak pretendime, për të vazhduar më pas me ato që pretendojnë dy ose më shumë portofole ministrore.

Qeveria
Koalicioni me bazë të gjerë që pritet të konfigurojë Partia Demokratike, do të cilësohet si koalicioni për reforma dhe antikorrupsion. Partia Demokratike, do ta cilësojë të tillë koalicionin, ndërkohë që zyrtarë të lartë të PD-së, kanë menduar gjatë se çfarë do të bëhet me këtë koalicion apo me partitë, që do të jenë përbërëse të saj. Burime nga Partia Demokratike, thanë dje për "Shekullin" se, prej ditësh, në kryesinë e kësaj partie, po forcohet ideja se, secili prej deputetëve përfshirës në këtë koalicion apo edhe ata që do të përfshihen në qeverisjen e ardhshme, do të bëjë transparencën e të ardhurave që ata kanë, sa para kanë, nga i kanë dhe ku i kanë investuar. Kjo do të jetë kërkesa e parë, që do t´u drejtohet të gjithë atyre përfaqësuesve, që do të marrin pjesë në qeveri, për ta shtrirë më pas kërkesën edhe tek deputetët e tjerë në Kuvend. Anëtarët e kryesisë, sqaruan se transparenca duhet të fillojë nga vetë kabineti i ardhshëm, për të dhënë ai modelin e parë të qeverisjes me duar të pastra. Grupe brenda kryesisë e kanë kërkuar me forcë këtë inisiativë, ndërkohë që si kërkesë, pritet të formalizohet brenda kësaj jave, ndaj të gjithë atyre që do të marrin pjesë në qeveri. Anëtarët e kryesisë i qëndrojnë gjithashtu mendimit se, që ditën e parë të hapjes së legjislaturës, të gjithë deputetët e opozitës, por edhe ata që do të kenë përfaqësimin e tyre në qeveri, do tu hiqet imuniteti i deputetit. Kjo do të jetë lëvizja e parë. Ndërkohë që, në lidershipin e PD-së, po punohet edhe për amendimin e ligjit të konfliktit të interesave, një nga insiativat që Berisha ka premtuar se do ta realizojë brenda 100 ditëve të qeverisjes së tij. Një tjetër inisiativë që po përgatitet në kryesinë e PD-së, është edhe ajo e shkëputjes së politikanëve nga projektet me organizatat joqeveritare. Demokratët kërkojnë që të shmangin shembullin e mjaft prej politikanëve socialistë, të cilët deri ditën e fundit, e kanë praktikuar një gjë të tillë. Ata këmbëngulin që OJF-të, të kenë tashmë rolin e tyre të pavarur dhe jo duke iu bashkuar qeverisë së ardhshme. Paralelisht, po punohet edhe për krijimin e Task-Forcës antikorrupsion, nën drejtimin e kryeministrit të ardhshëm, Sali Berisha, bashkë me rishikimin e rolit të njësisë antikorrupsion si dhe adoptimin e planit të detajuar të masave. Në 100 ditë e para të qeverisë, është premtuar se do të punohet edhe për luftën kundër krimit të organizuar e trafiqeve, përmes një pakete masash, që përfshijnë ristrukturimin e institucioneve kryesore me rol në këtë fushë si dhe largimi, bazuar në prova, i punonjësve të inkriminuar.



Disa nga pikat që po diskutohen në kryesi:

Ministrat do të deklarojnë xhepat
Që ditën e parë të hiqet imuniteti i deputetit
Po punohet për amendimin e konfliktit të interesave
Asnjë politikan i PD-së të mos përfitojë projekte nga OJF-të





18/07/2005 ( Shekulli )

[Albo]

Dy kryetarët e partive janë takuar dje dhe kanë rënë parimisht dakort, për postet në qeveri

Berisha-Pollo, pakt për qeverinë

PDR drejt Shëndetësisë dhe Integrimit. Problem kërkesat e katër deputetëve të tjerë të PDR

Nevila Perndoj

TIRANË - Lideri i opozitës, Sali Berisha, ka arritur dje marrëveshjen e parë me Kryetarin e PDR-së, Genc Pollo, ndërkohë që, pas këtij pakti, ka mbetur e pakënaqur një pjesë e konsiderueshme e deputetëve reformatorë. Burime nga PDR deklaruan dje për “Shekullin” se, kryetari i kësaj partie, Genc Pollo, ka dalë i kënaqur nga takimi i zhvilluar me liderin e opozitës, Sali Berisha. Gjatë takimit, mësohet se Pollo i ka kërkuar Berishës postin e Ministrisë së Integrimit, dhe njëkohësisht edhe postin e Ministrisë së Shëndetësisë, për ta drejtuar deputeti Tritan Shehu. Pra, Pollo, mësohet të ketë kërkuar dy ministri, meqënëse dikasteret në fjalë, nuk përfshihen në ambicjen e njerëzve të Partisë Demokratike. Por në anën tjetër, brënda PDR ekziston një grup tjetër më i madh i drejtuar nga nënkryetari i PDR-së, Nard Ndoka. Mësohet se Ndoka ka mbështetjen e tre deputetëve të tjerë të PDR-së, ç’ka përfaqëson edhe shumicën e deputetëve reformatorë kundrejt kryetarit të PDR-së, Genc Pollo, i cili deri më tani, nga grupi parlamentar ka vetëm mbështetjen e Tritan Shehut. Burime nga Partia Demokratike, deklaruan dje për “Shekullin” se Ndoka nga ana e tij, ka parashtruar një sërë kërkesash, që do të ishin sipas tij, të vlefshme për përfaqësimin e PDR-së në qeveri. Mësohet se Ndoka nuk ka paraqitur ndonjë kërkesë për ministri, meqënëse ky do të jetë atribut i kryetarit të partisë, Genc Pollo, por një përfaqësim më të gjerë në nivel zv/ministrash. Mësohet se ai ka kërkuar që PDR-së, krahas një ministrie që mund të jetë ose e Integrimit, e Jashtme apo e Arsimit, t’i jepen edhe dy zv/ministra. Burime nga PD, shtuan se Ndoka kërkon gjithashtu postin e Kryetarit të Komisionit të Rendit dhe SHISH-it, dhe postin e nënkryetarit të Kuvendit që mendohet të drejtohet nga Sekretari i Përgjithshëm i PDR-së, Ferdinand Xhaferri. Por, burime nga Partia Demokratike, deklaruan se deri më tani, janë marrë në shqyrtim kërkesat e Pollos, meqënëse PDR ka vendosur që të jetë ai dhe Shehu grupi negociator për përfaqësimin e kësaj partie në qeverinë e re. Në të njëjtën kohë, edhe grupi tjetër prej katër deputetësh, që mbështetet aktualisht nga Nard Ndoka, është një tjetër hallkë e rëndësishme që sipas zyrtarëve të PD-së, duhet sqaruar dhe zgjidhur. Prej kohësh, tashmë në PDR janë shfaqur dy grupe të ndryshme qëndrimesh. Kjo është dukur qartë në deklaratat që Ndoka dhe Xhaferri, kanë dhënë për ftesën e Berishës, drejtuar ish-aleatëve të PS-së për të bashkëpunuar. Ndoka dhe Xhaferri e kanë mirëpritur pa kushte ftesën për zgjerim të qeverisë, duke theksuar se kjo do t’i shërbente realizimit të reformave dhe kuorumit të nevojshëm për zgjedhjen e Presidentit në vitin 2007. Në anën tjetër, nënkryetari i PDR-së, Tritan Shehu, i cili është edhe negociator me Pollon, është shprehur se bashkëpunimi me partitë e majta do të derformonte vullnetin e zgjedhësve. Ndërsa vetë Pollo, në një intervistë televizive ka theksuar se, bashkëpunimi do të ishte i nevojshëm vetëm me PBDNJ e drejtuar nga Vangjel Dule.


Kryetari i PDR-së, Genc Pollo, ka kërkuar dy ministri:
Ministrinë e Integrimit
Ministrinë e Shëndetësisë


Nënkryetari i PDR-së, Nard Ndoka ka kërkuar:
Drejtimin e Komisionit të Rendit dhe SHISH-it
Dy zv/ministra dhe 1 ministri
Nënkryetarin e Kuvendit

[Albo]

Rikthimi i pronës, “thembra e Akilit” në negociatat mes demokratëve dhe republikanëve

PR bën kompromis për pronat me PD

Garuli: S’diskutuam për ligjin 7501, por do të ketë amendim pjesor

Blerina Sinani
Në negociatat e djeshme me demo-kratët, republikanët e kanë lënë mënjanë kërkesën e tyre themelore për abrogimin e ligjit 7501, në kompensim të premtimit se maxhoranca e re do të ndryshojë disa nene të këtij ligji, që plotësojnë një pjesë të kërkesave të ish-pronarëve.

Rishikimi i ligjit “Për kthimin dhe kompensimin e pronave” është diskutuar dje gjerësisht mes përfaqësuesve të PR-së, Garuli e Alibali dhe atyre të PD-së, Bode e Ruli. Thelbi i programit ekonomik të PR-së, tradicionalisht është mbështetur në premtimin për rikthimin e plotë të pronës tek pronarët e vjetër dhe për këtë qëllim, në vazhdimësi ka kërkuar rrëzimin e ligjit 7501, ligj i cili ka aktualisht konsensusin e PD-së dhe PS-së. Në diskutimin e djeshëm mes PR-së e PD-së, thelbi i debatit ka qenë qëndrimi për pronën, për shkak se ajo përbën pikën më të fortë të programit politik të kësaj partie. PR ka kërkuar plotësimin e premtimit për pronarët, por nuk ka këmbëngulur në rrëzimin e ligjit 5701, i cili njeh kompensimin e pronarëve, por jo rikthimin e plotë të pronës. Në debatin politik mes PR-së dhe PD-së ky problem mbetet thembra e Akilit, ndërkohë që diskutimi për postet duket se nuk ka pasur probleme.
Pra, dje ka mbetur jashtë negociatave të zhvilluara ligji për tokën, 7501, për të cilin PR-ja ka kërkuar prej kohësh abrogim, ndërsa PD-ja e ka kundërshtuar me forcë. Sekretari i përgjithshëm i PR-së, Garuli, ndërsa pohon se nuk është folur për ligjin 7501, thotë se me PD-në do të diskutojnë për ato çështja ku programet kanë pika të përafërta, duke ditur mjaft mirë se demokratët nuk duan ta abrogojnë ligjin 7501. Nga ana tjetër, edhe negociatori demokrat, Genc Ruli, pohon se nuk është folur për këtë ligj të tokës. Ai thekson se është folur për kthimin dhe kompensimin e pronave, që sipas tij do të rishikohet në disa detaje, por nuk do të ndryshohet në thelb.

Kërkesat e PR-së
Në negociatat e zhvilluara dje mes grupit negociator të PD-së, ku bënin pjesë sekretari i përgjithshëm i PD-së, Ritvan Bode, dhe Genc Ruli dhe grupit të PR-së, ku bënin pjesë sekretari i përgjithshëm, Aleksandër Garuli, dhe nënkryetari, Neritan Alibali, një vend të veçantë kanë zënë diskutimet në lidhje me ligjin “Për kthimin dhe Kompensimin e Pronave”. Grupi negociator i PR-së ka kërkuar që ky ligj të rishikohet, pa dëmtuar programin e demokratëve”. Përfqësuesit e këtij grupi shprehen se kanë gjetur mirëkuptimin e grupit negociator të demo-kratëve. Një pikë ku mund të shihet ky ligj, sipas Garulit, janë fermat në zonat bregdetare, të cilat u janë dhënë firmave fantazmë dhe që mund të kthehen në një kontingjent për kompensim. Po dje janë zhvilluar negociata edhe me kreun e PBL-së, Arian Starova. Palët kanë rëndë dakord që partia e tij të përfaqësohet në një post zv/ministri në kabinetin e ardhshëm. Ndërsa për postet e niveleve të tjera do të diskutohet në negociatat që do të vijojnë gjatë javës.

Godo komenton negociatat mes PD-së dhe PR-së

“Çështja e pronave s’ka dallime ligjesh”

Presidenti i nderit në Asamblenë e Përgjithshme të PR-së, Sabri Godo, ka komentuar dje negociatat mes republikanëve dhe demokratëve dhe faktin që aty është diskutuar mbi çështjen e pronave, si pikë programore e PR-së. Godo është shprehur se në negociatat, që do të mbështeten mbi programin e PR-së, një vend të veçantë do të zërë çështja e pronave. Ai nuk bëri një dallim mes ligjeve të pronave, si ai i kompensimit të tyre apo ligji 7501. Godo theksoi se, kur përmendet çështja e pronës, e cila është pjesë e rëndësishme e programit të PR-së, këtu futen të gjitha ligjet që kanë të bëjnë me këtë çështje dhe nuk mund të ketë dallime. Edhe në mbledhjen e fundit që ka zhvilluar Asambleja e Përgjithshme e republikanëve është vendosur që PR-ja do ta ketë si detyrë kryesore në gjithë veprimtarinë e saj mbrojtjen e interesave të pronarëve. Republikanët kanë kërkuar herë pas herë që të abrogohet ligji 7501.

[Albo]

PD skicon qeverine e re

E Enjte, 21 Korrik 2005

Republikanet do te drejtojne Ministrine e Mbrojtjes, ndersa reformatoret ne kembim te Ministrise se Jashtme, marrin Integrimin dhe nenkryetarin e Kuvendit. Bamir Topi drejt uniformave blu, Bode ne Ministrine e Financave, ndersa Genc Ruli ne dikasterin e Ekonomise

Partia Demokratike ka drejtuar me intensitet nje seri negociatash me aleatet e saj, duke arritur, te pakten per momentin, ne ndertimin e nje skice per ekzekutivin e ardhshem. Gjate nje bisede me zyrtaret e Partise Republikane, mesohet se demokratet kane rene dakort per te rezervuar per partine e Fatmir Mediut, Ministrine e Mbrojtjes, krahas dy zv/ministrave. Sekretari i Pergjithshem i PD, Ridvan Bode ka biseduar me nenkryetarin e PR, Neritan Alibali dhe me Sekretarin e Pergjithshem, Aleksander Garuli, per bashkepunimin e ardhshem mes PD dhe PR. Sipas PR, Ministria e Mbrojties dhe dy zv/ministra, te Pushtetit Vendor e Decentralizimit dhe te Transporteve, duhet t'u perkasin atyre. Nje variant me te cilin duket te kene rene dakort edhe demokratet.

Nderkohe, Partia Demokratike duket te kete rene parimisht dakort edhe me kerkesen e Partise Agraro-Ambjentaliste per te marre postin e ministrit te Bujqesise e Ushqimit dhe dy zv/ministra. Lufter Xhuveli, me 4 deputete ne Kuvendin e ri, ndodhet prane realizimit te endrres se tij per t'u rikthyer ne dikasterin, ku u zevendesua nga Agron Duka. Megjithate, rezervimi i Ministrise se Bujqesise per agraret, ende zyrtarisht ne koalicion edhe me Partine Socialiste te Fatos Nanos, ka krijuar zhvendosje te tjera ne skemen e demokrateve. Bamir Topi eshte orientuar drejt Ministrise se Rendit Publik, duke zhvendosur prej drejtiimit te uniformave blu, Sokol Olldashin.

Megjithate, demokratet ende nuk kane percaktuar marredhenien e tyre me reformatoret. Genc Pollo ende synon Ministrine e Puneve te Jashtme, ku konkurenca duket te jete shtuar. Jozefina Topalli dhe Besnik Mustafaj mbeten nder kandidaturat me te forta per te drejtuar diplomacine, duke zbritur Pollon ne Ministrine e Integrimit. Ne kompensim, Partise Demokrate mund t'i ofrohet nje post parlamentar. Me i mundshmi eshte ai i nenkryetarit te Kuvendit per Ferdinand Xhaferrin.

Ne vathen demokrate, gjerat duken te jene me te qarta. Ministria e Financave eshte percaktuar te drejtohet nga Ridvan Bode, ndersa Genc Ruli, bashke me rikthimin e tij ne politiken aktive, do te marre edhe drejtimin e Ministrise se Ekonomise. Dy poste kyce te reformave ekonomike, ndersa kryetari i Partise Demokratike, Sali Berisha, ka premtuar nje seri masash te menjehershme me ardhjen ne pushtet.

Korrieri

[mani]

Ende "tym i zi" për qeverinë e Berishës


--------------------------------------------------------------------------------



Para dy ditësh, në ambjentet politike dhe gazetareske shqiptare, po qarkullonte një batutë, domethënia e të cilës jo vetëm ishte jashtëzakonisht e vërtetë, por edhe të linte një fije humori për qeverinë e ardhshme që pritet të kryesojë kryeministri Sali Berisha. Sipas kësaj batute, bëhej e qartë që "nëse nga Pallati i Medias së Nikollë Lesit, (kryetarit të PDK-së), do të dilte tym i bardhë, atëherë do të ishte krijuar qeveria e Berishës. Për sa kohë që në këtë pallat mediatik, del tym i zi, atëherë nuk ka formim të ndonjë qeverie".
Sigurisht, batuta me përmbajtje fetare, shkon dukshëm me profilin e partisë së drejtuar nga Lesi. Pra qeveria e ardhshme e Berishës, kalon në të njëjtën skemë si në zgjedhjen e Papës së Vatikanit. Dhe fati i kësaj qeverie, varet nga Kardinalët politikë shqiptarë, të cilët nuk vijnë nga kontinente apo shtete të ndryshme, por nga background-e politike të ndryshme. Për të thelluar analizën, le të shohim disa fakte konkrete që "minojnë" bashkëpunimin e PD me të djathtët, apo të majtët për krijimin e qeverisë së re.

PD - PR
Berisha dhe Mediu, aleatë të përjetshëm dhe pothuajse të sigurt. Në këto zgjedhje, Berisha orientoi bashkëpunimin e partisë së tij në porporcional, tek PR, aq sa kjo ngjalli pakënaqësi tek aleatët e tjerë të djathtë të Berishës. Në këmbim të këtij favori, republikanët do të pranojnë edhe tolerimet programore mes programit të PD e PR që më së shumti kanë të bëjnë me ligjin 7501 të pronave, që Berisha nuk ka ndërmend ta ndryshojë ndonjëherë, sikurse pretendojnë republikanët, pronarë të mëdhenj tokash.

PD-PDR
Berisha-Pollo, i përkasin të njëjtës së djathtë. Në programet e dy partive, nuk ka shumë dallime që të ndikojnë rreth programit. Madje edhe thirrja e Pollos që Berisha të mos afrojë parti të majta në qeveri, "nuk pi shumë ujë" në këtë komunikim të përbashkët mes tyre. Ajo që do të ndikojë në raportet e ardhshme mes tyre, ka të bëjë me inatet e vjetra, që kryetari, dhe ish-nënkryetari i PD, kanë përjetuar kohë më parë. Pollo u largua nga PD si një "djalë plangprishës" në momentin më të vështirë për këtë parti. Në kuvendin e PD kur ai kandidoi përballë Berishës, Pollo adresoi shumë akuza në drejtim të Berishës: autoritar, njeri që donte të komandonte i vetëm partinë, që nuk pyet për njeri etj. Në atë kohë, Pollo "u përjashtua" nga partia, së bashku me emra të tjerë si Ylli Vejsiu, Leonard Demi, etj, të cilët mbështetën nënkryetarin në linjën e tij. Nga ndërkombëtarët, Pollo vlerësohej si një shpresë për reformimin e PD, ndërsa Berisha, si një politikan që duhet të largohej. Pollo hyri shumë shpejt në PPE dhe një gjë e tillë nuk u mirëprit nga Berisha. Ka gjasa, që kontraditat e tyre të dikurshme, të rikthehen edhe në qeverisjen që do të pasojë.

PD-PDK
Mund të konsiderohet si shumë e brishtë marrëdhënia mes Berishës dhe Lesit. Militantët e PD nuk i harrojnë dot shkrimet opozitare të gazetës "Koha Jonë" si "Berisha duart me gjak", "Shqipëria digjet, Berisha krihet" etj, të cilat patën influencën e tyre në publik dhe në rënien e Berishës-President në vitin 1997. Sigurisht që Nikollë Lesi nuk ka harruar as diegien e gazetës nga qeveria e atëhershme dhe as orët që ai dhe gazetarët kanë kaluar nëpër qelitë e burgjeve dhe as persekutimin dhe përndjekjen deri në fshehje të familjes në vende që të mos gjendeshin. Pas tetë vjetësh, shumë gjëra kanë ndryshuar, por nuk ndryshon dot Nikollë Lesi, edhe sikur të ketë ndryshuar Berisha. Lesi pranon më mirë të qëndrojë opozitar i përjetshëm i të gjitha qeverive, sesa të përfshihet në tratativa ku ai nuk ndihet i barabartë dhe një gjë të tillë, e thotë edhe vetë. Ndaj dy votat e Lesit, janë kaq të paqëndrueshme në Parlament, sa e detyrojnë Berishën që ndonjëherë ti llogarisë në favor të tij, e herë të tjera jo.

PD-PBL
Marrëdhëniet e Berishës me politikanin e vjetër në moshë Teodor Laço, kanë qenë shumë të mira në opozitë. Por me Arjan Starovën, ka ca kontradita për të thënë të vërtetën. Berisha harroi që kryetarin e kësaj partie ta kandidonte në mazhoritar në zgjedhjet e tre korrikut, duke mos i lënë në fakt asnjë zonë të lirë. Ndaj dhe zoti Starova, i cili firmosi një kontratë bashkëpunimi me PD, sikurse me partitë e tjera nuk e ka të kollajtë ta "kapërdijë" një fakt të tillë. Tani që edhe Starova është një votë në Kuvend, i kërkon kthimin e "restos" Berishës për këtë harresë. Një post zv.ministri për partinë aleate të PD të drejtuar nga Starova, është shumë pak. Por edhe një post ministri, vetëm me një deputet në Kuvend, është shumë. Nuk dihet ende se si do të shkojë bashkëpunimi mes tyre.

Ne përfundim
Përveç PR, me të gjithë aleatët e tjerë të djathtë, Berisha ka marrëdhënie shumë të brishta, aq sa edhe numrat që ka në Kuvend. Nuk do të na duket ndonjë çudi, nëse imagjinojmë që në qeverinë e ardhshme, Berisha kryeministër, të kërkojë që të dalë "ndonjë deputetë nga pularia ku mund të jetë fshehur" për të votuar në Kuvend. Ndaj duke lënë moralin mënjanë (të cilin politika as e ka dhe as e ndjen) Berisha kërkon dhe patjetër do të thërrasë në ndihmë 4 votat e Xhuvelit, dhe 3 votat e PBDNJ-së (parti të cilat në çdo qeveri socialiste kanë pasur ministrat e tyre). Dhe me ç'po flitet dhe ç'po kërkohet, numri i ministrive të kabinetit të ardhshëm qeveritar kurrsesi nuk mund të jetë 14 siç është deklaruar nga pretendenti për kryeministër. Ashtu sikurse të gjitha votat që e mbështesin, mund t'i humbasin me një të rërë të lapsit. Berisha ka zënë vendin e një kryenegociatori që merr e jep me partitë, ndërsa gjithë deputetët e tij, ndoshta duhet të rreshtohen poshtë Pallatit Mediatik të Nikollë Lesit, dhe të presin që prej godinës së re të padjegur, (por ende të palegalizuar) të dalë…tymi i bardhë.

[Brari]

Eja bejme nje diskutim se si do duhej te jete qeveria e re.. qofte si cilesi njerzish qofte si program apo tjera kualitete.. etjetj..


Ja psh c'thot Pollua ne gazete:

--

Kryetari i reformatorëve, Genc Pollo kërkon të bashkohen tri ministri


PDR, dakord me kabinet të “vogël”

“Shkurtimi i ministrive sjell më pak shpenzime”

Eva Gjura
Qeverisje të vogël dhe efikase kanë kërkuar dje reformatorët duke theksuar se kjo ndodh nëse bashkohen tre ministri, të cilat mund të funksionojnë edhe të bashkuara.

Për demokratët e rinj bashkimi i këtyre ministrive dhe zvogëlimi i kabinetit qeverisës do të shkurtojë shpenzimet parazitare dhe do të krijojë mundësi për një qeveri sa më të manovrueshme.

Deklarata
Gjatë një konference për shtyp dje, kryetari i PDR-së, Genc Pollo, ka deklaruar se kjo forcë politike mbështet vendimin e PD-së për një qeverisje të vogël dhe eficente. Ai është shprehur se: “Në kuadrin e negociatave dhe bashkëpunimin për ndërtimin e qeverisë së re të koalicionit të qendrës së djathtë, Partia Demokrate e Re e mbështet idenë e Partisë Demokratike për reduktimin e numrit të dikastereve të ekzekutivit”. PDR-ja e sheh këtë gjë si një element të rëndësishem jo thjesht për shkurtimin e shpenzimeve parazitare, por edhe si një premisë për krijimin e një qeverie më të manovrueshme, me një nivel zhdërvjelltësie më të lartë. Kryereformatori tha se me tej se: “Në këtë mënyrë do të kufizojmë burokracinë dhe do t’u japim rrugëzgjidhje problemeve të ndryshme më shpejt dhe me një kosto më të ulët”. Kjo, sipas Pollos, do të bëhet duke korrigjuar edhe gabimet e qeverisë së kaluar, e cila deri më tani ka krijuar dikastere artificiale për individë apo forca politike të veçanta. “Krahas kësaj, ne jemi duke punuar edhe për përsosjen dhe konkretizimin e ideve tona të shumta si pjesë e programit të qeverisë së ardhshme, në pajtueshmëri me idetë e mësipërme të ristrukturimit”, është shprehur Pollo. Ndërsa në ditët në vijim, grupet e eksperteve të të dyja partive do të punojnë së bashku për një platformë të përbashkët qeverisëse. Dhe në këtë kuadër reformatorët mendojnë që do të ishte oportune dhe eficente bashkimi i disa ministrive mbi bazën e objektivave të përbashkëta qe kanë, duke shfrytëzuar në këtë mënyrë më mirë kapacitetet njerëzore, organizative dhe materiale të tyre.

Ministritë
Reformatorët i kanë sugjeruar Partisë Demokratike se cilat nga ministritë mund të shkrijë ajo për të pasur një qeveri të vogël dhe sa më të manovrueshme. Sipas tyre do të ishte me vend bashkimi i Ministrisë së Rendit me Ministrinë e Pushtetit Vendor dhe Decentralizimit për të krijuar Ministrinë e Brendshme, bashkimin e Ministrisë së Mjedisit me atë të Shëndetësisë, përfshirja e Ministrisë së Integrimit brenda Ministrisë së Jashtme, si dhe të disa dikastereve të tjera për të cilat PDR-ja është ende në studim. Gjithashtu dje PDR-ja ka mbajtur mbledhjen e përbashkët të sekretariatit dhe grupit parlamentar të PDR-së, të cilët kanë marrë në shqyrtim situatën dhe kanë vendosur për hapat e metejshëm që do të ndjekë kjo forcë politike.




propozimi

Ministria e Rendit të bashkohet me Ministrinë e Pushtetit Vendor dhe Decentralizimit për të krijuar Ministrinë e Brendshme
Ministria e Mjedisit të bashkohet me atë të Shëndetësisë
Ministria e Integrimit të përfshihet brenda Ministrisë së Jashtme

[Labeati]

Edhe une jam i mendimit qe burokracia shtetnore duhet shkurtuar, bile ne mase drastike.

Ministrite e teperta e te panevojshme te krijuara per tu hapur vend miqve e farefisit, me qindra nepunes, shofera, benza, dieta, udhetime jashte, jane barre e panevojshme per buxhetin e lodhur shqiptar.

Ministria E Integrimit eshte nje apendesit, parazit kot, dublues i panevojshem i Min Jashtme.

Po ashtu jam kunder ekzistences se Min. Pushtetit Vendor. Ky pushtet nuk ka nevoje per Ministri qe ta mbaje nen tutela burokratike. Ka ligje, komuna e bashki qe i ka zgjedhe populli, ka ligj per funksionimin e pushtetit lokal, taksat etj, ka edhe Gjykata e Kontroll Shteti, Ministria nuk duhet gje.

Ministria e Mjedisit mund te shkrihet duke i kaluar kompetencat e shendetit ambientalist (pluhrat, ndotjet etj) Min se Shendetesise apo edhe asaj te Turizmit per demtimin e ekosistemeve, etj.

Pervec kesaj them se ka vend per thjeshtimin e aparatit shteteror, sidomos shoferave. Cdo drejtori ka shofera, miq e farefis qe jane edhe ndermjetesa te korrupsionit.
Vetem ministri e zv.ministrat te kene shofer.

Te gjithe te tjeret ta nisin vete makinen, te jete kusht patenta e makines per vendin e punes.