Përgjaket tubimi i simpatizantëve të PD-së. Leonard Prifti vret 50-vjeçarin Taullau dhe eliminohet prej njerëzve të tij
Lushnje, i kërkuari i bandës vret në miting, ekzekutohet
LUSHNJE-
Tubimi i simpatizantëve të PD-së që festonin fitoren është kthyer në një masakër të përgjakshme, në qendër të Lushnjes. I akuzuari si anëtar i bandës së Lushnjes, Leonard Prifti, duket se ka shfrytëzuar situatën e rrëmujshme që sundonte në qytet për të marrë hak për konflikte të vjetra, duke ndjekur dhe më pas vrarë një 50-vjeçar. Burime nga policia e Lushnjes pohojnë për “Shekullin” se djemtë e viktimës, 50-vjeçarit Baki Taullau kanë eliminuar brenda pak minutash anëtarin e bandës së Lushnjes, duke e çuar në dy, numrin e viktimave të kësaj ngjarjeje të rëndë. Krimi i dyfishtë, i ndodhur mbrëmë rreth orës 22.30 minuta në qendër të Lushnjes ka shkaktuar panik tek shumë qytetarë që kishin dalë në shesh, për të festuar mbi atë që në orët e vona të mbrëmjes së djeshme është cilësuar një fitore e Partisë Demokratike.
Masakra
Në orët e vona të mbrëmjes së djeshme, mësohet se Leonard Prifti, i njohur si njëri prej të akuzuarve si anëtar i bandës së Lushnjes, ka ndjekur 50-vjeçarin Baki Taullau, derisa ka shfrytëzuar momentin për ta ekzekutuar. Burimet e policisë lokale pohojnë se Prifti ka hapur zjarr në mes të turmës së njerëzve euforikë për fitoren, duke lënë përtokë 50-vjeçarin Taullau. Ai ka tentuar të largohet menjëherë prej vendit të ngjarjes, por kanë qenë të afërmit e viktimës ata që nuk e kanë lënë.
Mësohet se familjarët e Taullaut kanë qenë gjithashtu të armatosur dhe janë kundërpërgjigjur në mënyrë të menjëhershme, duke eliminuar njërin prej personave më të kërkuar në vend, Priftin. Policia e Lushnjes ka konfirmuar identitetin e personit të dytë të ekzekutuar, duke thënë se ai është pikërisht anëtari i bandës së Lushnjes, Prifti. Ndërkaq, të akuzuarit si autorë të vrasjes së dytë, janë larguar nga vendi i krimit, duke lënë përtokë të vdekur të afërmin e tyre dhe Leonard Priftin.
Motivi
Sipas hetimeve paraprake të policisë së Lushnjes, mësohet se ngjarja e rëndë ka ndodhur për shkak të konflikteve të vjetra, që dyshohet të kenë lindur vite më parë mes Priftit dhe Baki Taullau. Më 18 maj të këtij viti, karburanti i 50-vjeçarit të vrarë mbrëmjen e djeshme u trondit nga një sasi tritoli, e cila më shumë sesa një atentat u duk si një kërcënim i mundshëm.
Asokohe, Taullau mohoi të kishte marrë ndonjë kërcënim apo të kishte hasmëri me ndonjë person, por burime të policisë që hetuan ngjarjen pohuan për “Shekullin” se pronari i karburantit kishte qënë pjesë e një atentati të ndodhur në vitin 2002, ku mbeti i vrarë 22-vjeçari Julian Kastrati. Policia e Lushnjes është në hetim e sipër, për të zbuluar armiqësinë e Taullaut me anëtarin e bandës së Lushnjes, por në orët e vona të mbrëmjes së djeshme është pohuar hakmarrja, si motiv i këtij krimi të ndodhur. Ndërkaq, policia lokale ka identifikuar autorët e vrasjes së Leonard Priftit dhe është vënë në ndjekje të tyre. Gjatë orëve të vona të natës, janë shoqëruar disa persona në polici si dhe janë kontrolluar disa banesa, por nuk është bërë e mundur kapja e tyre
Përgjigju Duke Cituar
Postuar më parë nga Brari
Krijoni Kontakt