Lajmi më i fundit nga zgjedhjet e 3 korrikut

[Albo]

Jozefina Topalli dhe Gramoz Ruçi replikojnë në distancë

PD: Kemi fituar në 56 zona
PS: Në avantazh në 53 KZZ

"Beteja" me shifrat e votave në numërim

Altin Kreka

PS dhe PD dje deri vonë nuk janë tërhequr nga thirjet për fitore. Me një ndryshim, zëdhënësit e PD sa herë komunikonin rezultatet ishin të gëzuar dhe duket se nuk e ndjenin lodhjen e pritjes së gjatë të rezultateve ndërsa në selinë e PS kishte nervozizëm. Numri dy i PS, Gramoz Ruçi ishte i vetmi që dilte në konferencë për shtyp dhe komunikoi se PS lufton në 53 zona elektorale duke përmendur disa herë fitoren e të majtëve në dy zona të Shkodrës.

Berisha ishte i pari që prezantoi disa nga deputetët fitues në këto zgjedhje. Në krah të Ylli Pangos, Bujar Nishani, Sokol Olldashi, Safet Sula. Berisha i prezantoi këta kandidatë duke qëndruar në këtë dhe duke thënë se po ju prezantoj njerëzit që nxorën nga politika, "kockën e mafias rajonale Shyqyri Duraku", "mamuthin e korrupsionit Naçi", "idhullin e krimit të oragnizuar Igli Toska". Ai tha se këta i kanë bërë një shërbim të madh kombit. Kjo dalje e Berishës ndërsa shifrat vazhdonin të rriteshin në favor të PD-së entuziazmi i Berishës rritej. Ndërsa Jozefina Topalli nxitoi të deklaronte "kryeministri Berisha". Vetë kryetari i PD-së tha se do të qeverisë së bashku me aleatët në koalicion por ai nuk preferoi që të deklaronte se si do të bëhej kjo qeveri, mbase për faktin se është ende shpejt për të kaluar në këtë fazë.
Ruçi
Numri dy i PS i quajti dje kërcënim të rendit festimet e PD në shumë sheshe për rezultatet që shpalleshin. Ai tha se rezultatet ende nuk kanë dalë dhe se PS rezulton të jetë në avantazh në 53 zona. Entuziazmi i Ruçit nuk është ai që ishte në vitin 2001 kur doli dhe deklaronte shifrat e fitores së PS. Këtë herë Ruçi ishte shumë më nervoz në deklarimet e tij duke mos e fshehur faktin që partia e tij ishte drejt rrugës së sigurt të daljes në opozitë. Arsyet socialistët le ti gjejnë në komoditetin e të qënit në opozitë për disa kohë.


KQZ

Komisioni qëndror i zgjedhjeve dje deklaroi se procesi është mbyllur në një pjesë të madhe të zonave. Në 27 zona vazhdon procesi i numërimit të votave (deri dje në mesnatë) dhe në disa zona, si në 88 dhe 90 janë bllokuar nxjerrja e rezultateve për shkak të konflikteve që kanë mes tyre komsionerët. Celibashi gjatë deklarimeve për shtyp vlerësoi procesin dhe kërkoi nga komisionerët që pavarësisht konflikteve që kanë të arrijnë dhe të marrin vendim për zonat në mënyrë që të nxjerrin rezultatet e këtyre zgjedhjeve. Mëngjesi i ditës së sotme duket se do të jetë edhe koha kur do të bëhet e qartë se cili ka fituar dhe kush ka humbur, megjithëse tashmë është e qartë që PD do t'i takojë të formojë qeverinë dhe kryeministër të jetë Sali Berisha.

Gazeta Shqiptare

[Albo]

Skema te të majtët u merr vota edhe në mazhoritar kandidatëve socialistë

"Dushku" funksionoi për PD, por dështoi tek PS
PR partia e parë, humbet Balli Kombëtar

Altin Kreka

Skema e "Dushkut" ka funksionuar shumë më mirë mes PD dhe PR se sa me aleatët e tjerë të koalicionit të djathtë, gjithashtu edhe LZHK. Ndërsa në koalicionin e majtë 6 parti kanë kaluar pragun elektoral prej 2.5% përfshi edhe LSI që është jashtë grupimit. Skema e Dushkut nuk ka funisionuar shumë mirë mes të majtëve për shkak se fushata nuk u bë në funksion të kësaj ideje. Nga ana tjetër PD duket se i kanë humbur disa aleatë rrugës që janë dy partitë e Ballit Kombëtar, Bashkimi Demokrat dhe partia e Karamelos. Shkak ka qenë fushata e cila e drejtoi votën e PD në propocional vetëm drejt disa partive. Por skema e Dushkut të PD-së do të funksionojë shumë më mirë se PS sepse koalicioni i djathtë nuk do të humbë asnjë votë. Krijimi i grupimit "Aleanca për Liri, Drejtësi dhe Mirëqënie bën që votat që kanë marrë aleatët që nuk arrijnë mbi 2.5% të mos shkojnë dëm. Ato do të kalojnë për llogari të partive të tjera gjatë momentit të llogaritjes së vendeve në propocional. Të djathtët dhe të majtët duket se kanë vota të njëjta në propocional rreth 33 përqind. Ndërsa për PS dhe PD e kanë dhënë votën një numër i barabartë votuesish, poër këto vota duket se nuk kanë asnjë vlerë duke patur parasysh faktin se PS dhe PD nuk marrin asnjë mandat nga propocionali.

Skema e PD
Skema që përdori PD me aleatët e saj në këto zgjedhje funksionoi në mënyrë shumë efikase. PD nënshkroi një marrëveshje dhe realizoi fushatë të përqëndruar së bashku me aleatët. Synimi ishte ndarja sa më e mirë e votave në propocional si dhe bashkrendimi i forcave për të ndihmuar në maksimum kandidatët e PD në mazhoritar. Për këtë arsye aleatët e PD nuk vendosën kandidatë në mazhoritar duke mbledhur kështu të gjitha votat. Nga ana tjetër goditën shumë fortë LZHK, e cila ishte e vetmja forcë politike që krijonte probleme për të djathtët. Funksionimi shumë i mirë i kësaj skeme u duk qartë te votat që morrën të djathtët. Kandidatët e PD nuk kishin asnjë rival nga e djathta dhe përqëndrimi i votave të tyre solli fitoren mbi të majtët që ishin të përçarë megjithëse në shumë zona ishin shumicë përballë të djathtëve.

Skema e PS
Socialistët realizuan një skemë shumë më të dobët me aleatët e tyre. PS nuk arriti asnjë marrëveshje me ta, përveç një pakti të heshtur me PBDNJ për të mos u përplasur në zonën e Himarës ku u vendos si kandidaturë e pavarur ish-ministri i Drejtësisë Spiro Peçi. Ishte Nano i cili shumë muaj para zgjedhjeve nuk e pranoi sygjerimin e ministrit të Jashtëm Kastriot Islami. Ky i fundit propozoi arritjen e një marrëveshje me aleatët në mënyrë që këta të fundit të mos vendosnin kandidatë në mazhoritar që vota të mos ndahej por të bashkëpunonin në propocional. Nano nuk e pranoi këtë sygjerim dhe rezultatet negative ai është duke i parë që nga dita e dielë e në vazhdim.

Gazeta Shqiptare

[Albo]

Emra të panjohur në politikë mposhtin rivalët e tyre

Fitoret e papritura të Olldashit, Sterkajt e Doshit

Ata janë surprizat e vërteta të këtyre zgjedhjeve. Kanë fituar në bastjonet e partive rivale duke "fundosur" emra të njohur të legjislaturës së kaluar. Sokol Olldashi, Paulin Sterkaj, Engjëll Cara apo Tomë Doshi kanë siguruar pa vështirësi fitoren në votimet e 3 korrikut me një diferencë të konsiderueshme votash. Emra të njohur apo të panjohur të politikës, ata kanë arritur të marrin fitoren nga duart e rivalëve të tyre duke u kthyer nga kandidatë në deputetë të parlamentit të ardhshëm shqiptar. Fare i papritur ka qenë triumfi i kandidatit të PS-së, Tomë Doshit përballë Valentin Palajt të PD-së, dy herë deputet në zonën 7 të qarkut të Shkodrës. Biznesmeni dhe presidenti i Profarmës, Doshi, zhvilloi një fushatë të fortë dhe arriti të kthente bastjonin demokrat në një zonë socialiste. Ndërkohë, demokrati Sokol Olldashi arriti të mundë Ministrin e Bujqësisë, Agron Duka në zonën 26 në Shijak me rreth 54 përqind të votave kundrejt 43 përqind që mori bosi i "Aibës". Olldashit i ka mjaftuar një fushatë thuajse modeste për të siguruar fitoren në zonën e Dukës. Çudia më e madhe ishte ajo që ndodhi në zonën 1, në qarkun e Shkodrës, ku veterani demokrat Pjetër Arbnori humbi përballë ish-komisarit dhe biznesmenit Paulin Sterkaj, që siguroi 51 përqind të votave. Arbnori mori vetëm 44,3 përqind në një zonë demokrate, por ku ai kandidonte për herë të parë.
Surpriza më interesante vjen nga zona 49 në Golem, ku një kandidat thuajse i panjohur mundi zëvendësministrin e Turizmit dhe Rregullimit të Territorit, Artan Lame. Demokrati Engjëll Cara, me profesion agronom, fitoi 56,06 për qind të votave kundrejt 35,4 për qind të Lames, ekspertit të turizmit në një zonë ku ai kishte përqëndruar aktivisht fushatën e tij. Po në qarkun e Durrësit, kandidati i Partisë Demokratike në zonën 29, Gazmend Oketa, la shumë prapa në garën elektorale kryetarin e FRESH-it, Gjergj Koja, një ndër kandidatët e rëndësishëm të PS-së. Koja siguroi vetëm 33,8 për qind të votave kundrejt 54 për qind të votave që fitoi Oketa. Edhe pse gati i panjohur, kandidati demokrat arritit të bindte zgjedhësit e kësaj zone të heqin dorë nga vota për socialistët. Shefi i diplomacisë shqiptare, Kastriot Islami ka provuar të njëjtën disfatë në zgjedhjet e 3 korrikut nga një kandidat i panjohur demokrat. Artur Shehu e siguroi fitoren në zonën e Mallakastrës, bastjon i gjithmonshëm i socialistëve, si rezultat i ndarjes së votave socialiste mes kandidatit të PS-së, Islami dhe atij LSI-së, Fatos Klosi. Shehu fitoi vetëm 40 për qind të votave, ndërsa Islami mori 39,26 përqind të tyre, një diferencë shumë e vogël kjo. Ndërkohë, në zonën 30 në qarkun e Durrësit, kandidati demokrat Genc Juka siguroi fitoren ndaj socialistit Sokol Kokomani. Juka, një emër thuajse i panjohur në kampin e demokratëve mori rreth 42, 69 për qind të votave, ndërsa kandidati i PS-së, Kokomani, mori vetëm 35,25 për qind të tyre.

Gazeta shqiptare

[Humdinger]

Nano:-Deputetet tane fitojne ne 55 zona

TIRANE- Kryeministri Nano dje pasdite ka dhënë një konferencë për shtyp për mediat vendase dhe të huaja ku ka nënvizuar qartë dhe saktë se e rëndësishme në këtoz gjedhje është se janë zbatuar të gjitha standartet ndërkombëtare. Ai ka vlerësuar rolin e qeverisë shqiptare në repsektimin e këtyre standarteve dhe zhvillimin e zgjedhjeve të lira e të ndershme. "Jam këtu me autoritetin e Kryeministrit, për të theksuar se ne kërkuam dhe vendosëm standarte për zgjedhje të lira dhe Qeveria është krenare që arriti ta bëjë këtë gjë.

Gjithkush që po sillet, që nga deklarimet deri tek veprimet bllokuese të administrimit të rezultateve të zgjedhjeve, në grupe numërimi apo në komisione, kryesisht përfaqësues të opozitës, ka tendcenca t'i thyejë këto standarte dhe pasi kam kontaktuar drejtpërsëdrejti me drejtuesit e institucioneve që ngarkon Kushtetuta me administrimin e zgjedhjeve, pasi kam marrë gjithë informacionin e drejtpërdrejtë, apo pjesën që ata kanë bërë publike - i referohem tërheqjes së vëmendjes nga Kryetari i KQZ-së, zoti Celibashi para pak kohe - pasi kam komunikuar nëpërmjet zyrës sime me drejtuesit e ODIHR-it dhe të OSBE-së, me ambasadoorët e vendeve kryesore, veçanërisht të Trojkës që ka Presidencën e BE-së, dua të theksoj se ne do të vazhdojmë deri në fund të respektojmë ligjin dhe nuk do të lejojmë as Berishën, askënd tjetër t'i thyejë standartet e këtyre zgjedhjeve, të cilat, e riktheksoj, për qeverinë janë më të rëndësishme sesa rezultati.

E theksoj këtë, duke sjellë në vëmedje të të gjithëve, votues dhe administrues të votës, se ligji është mbi të gjithë dhe qeveria është e vendosur të mos lejojë që ligji të shkelet.

Në frymë njerëzore, dhe me filozofinë politike që më karakterizon, këtë dua ta përkthej me sentencën "zëri i shqiptarëve nuk mund të mbytet", votat e tyre do të numërohen. Prandaj mesazhi im në këtë konferencë shtypi është: Të numërohen votat. Faleminderit!", ka qënë deklarata e kryeministrit Fatos Nano dhënë dje në një konferencë për shtyp.

Zëri Popullit

[Albo]

Socialistët humbin në zona të padiskutueshme në jug të vendit

Rrëzohen 4 ministra të PS dhe Pjetër Arbnori

Artemida Collaku


Ish kryetari i parë i parlamentit pas rrëzimit të sistemit totalitar, Pjetër Arbnori ka humbur thellë në zonën ku kandidonte përballë rivalit socialist Paulin Sterkaj, ish-funksionar i lartë i policisë gjatë qeverisjes së PD. Rezultati i dalë në zonën zgjedhore me numër 1 në fakt shënoi një nga rrëzimet më të mëdha të ndodhura gjatë zgjedhjeve të 3 korrikut. Pjetër Arbnori deputet i Partisë Demokratike për katër mandate radhazi në parlament ka humbur me rezultatin 44.23 për qind, përballë 51.27 për qind të votave të fituara nga ish-drejtori i Policisë Paulin Sterkaj. Në zgjedhjet e vitit 2001 kjo zonë u fitua nga kandidati i Partisë Demokratike Gjovalin Bzheta, i cili në këto zgjedhje nuk është kandiduar nga selia blu. Megjithatë zona me numër 1 nuk është i vetmi bastion i PD-së i humbur. Nga informacionet e ardhura nga Komisioni Qendror i Zgjedhjeve konfirmohet se zona nga ky nënkryetarja e PD-së Jozefina Topalli ka marrë mandatin është humbur në zgjedhjet e 3 korrikut nga kandidati i PD-së, Valentin Palaj. Palaj ka humbur në këtë zonë me një diferencë prej 6 përqindësh, përballë kandidatit socialist Tom Doshi.


Humbjet e PS-së

Shumë herë më të mëdha kanë qenë humbjet e bastioneve nga Partia Socialiste, apo të kandidaturave të cilat konsideroheshin të sigurta në betejën zgjedhore të 3 korrikut. Ministri i Bujqësisë Agron Duka ka pësuar një humbje të thellë, me një diferencë prej 11 për qind përballë kandidati i PD-së Sokol Olldashi, kryetari i degës së PD-së në Tiranë. Megjithatë kjo humbje nuk mund të konsiderohet si humbje bastioni pasi shumkush e di dhe e ka pranuar se Shijaku është një zonë me bindje të djathta. Kur flitet për humbje bastionesh të PS-së shembulli më i mirë është humbja e zonës me numër 73 ku kandidonte Ministri i Jashtëm Kastriot Islami me një diferencë mjaft të ngushtë deri në pasditen e ditës së djeshme. Përballë ministrit Islami, kandidonte Artur Shehi. Por humbje jo e vogël për PS-në ishte edhe zona e kombinatit me numër 34, ku rivalë ishin Ministri i Rendit Igli Toska si dhe anëtari i kryesisë së Partisë Demokratike Bujar Nishani. Diferenca mes dy revalëve është rreth 7 për qind në favor të kandidatit Bujar Nishani. Zona më numër 34 në zgjedhjet e vitit 2001 ka nxjerrë deputete Monika Kryemadhi. Përfundimi i procesit të numërimit në zonën me numër 38 ka nxjerrë fitues në momentet e fundit kandidatin e PD-së dekanin e Fakultetit të Shkemcave Sociale Ylli Pango me një diferencë prej 300 votash, duke nxjerrë humbës Ministrin e Financave Anastas Angjeli. Jo e vogël është edhe humbja e kandidatit të Partisë Socialiste Arben Ahmetaj zv/ministër i Integrimit në zonën me numër 33, përballë juristit dhe anëtarit të KOP-it Lulëzim Basha. Diferenca me dy rivalëve është rreth 12 për qind në favor të kandidatit demokrat Basha. Në zgjedhjet e 2001 kjo zonë ka nxjerrë deputet Ministrin e Mjedisit Et'hem Ruka. Ndërkohë humbje basitoni mund të konsiderohet edhe ajo e zonës me numër 41 ku kandiduan Ministri i Transporteve Spartak Poçi dhe sekretari për marrëdhëniet me Publikun në Partinë Demokratike, Spartak Ngjela. Ky i fundit ka fituar me një diferencë për rreth 6 për qind nga kandidati Poçi. E njëjta situatë paraqitet edhe në zonën me numër 49 ku zv/ministri i Turizimit Artan Lame ka humbur përballë kandidatit demokrat Engjëll Cara. Ky i fundit është në avantazh me 21 për qind më shumë se Lame. Ndërkohë Partia Socialiste ka humbur edhe në zonën me numër 37 ku kandiduan ish drejtori i doganave Shpëtim Idrizi si dhe zëdhënësi i Partisë Demokratike deputeti Edi Paloka. Diferenca mes dy kandidatëve ka qenë 5 për qind.



Përplasja mes PD në zonën 1, Shkodër

Pjetër Arbnori deputeti i katër mandateve në Partinë Demokratike humbi në një zonë e cila konsiderohej bastioni kësaj partie. Në fakt propozimi i kandidaturës së Arbnorit në zonën 1 u shoqërua me kontestime nga ana e bazës demokrate, e cila kërkonte me çdo kusht rekandidimin e ish-deputetit Gjovalin Bzheta por një gjë e tillë nuk u pranua nga lidershipi i selisë blu. Megjithëse pas këtij vendimi pritej një reagim i menjëhershëm një gjë e tillë nuk ndodhi por mesa duket demokratët kanë vendosur që kandidatura e vendosur nga lidershipi i PD-së të mos votohej.

Gazeta shqiptare

[Humdinger]

Çfare prisni nga Raporti i OSBE-ODIHR-it dhe sa mund ta cënojnë integritetin e procesit zgjedhor te gjitha keto qe thate, akuzat ndaj opozitës?

Unë nuk mund të bëj detyrën e Misionit monitorues të zgjedhjeve që drejtohet nga ODIHR. Nga informacioni që kam, ata do të dalin pas pak në një raport të paralajmëruar, paraprak, për vlerësimin e procesit zgjedhor në ditën e zgjedhjeve. Unë shpresoj që ky raport të njohë normalitetin dhe kontributet e qeverisë dhe të subjekteve dhe institucioneve që ngarkon Kushtetuta me detyra, në respektimin e standartave për zgjedhje të lira dhe demokratike, të njihen dhe të vlerësohen, pra shpresoj të jenë në të njëjtën linjë që unë kam folur nga mbrëmë deri tani dhe besoj se drejtuesit e këtij Misioni të rëndësishëm për zgjedhjet në një vend partner dhe anëtar të OSBE-së dhe të Organizatave të tjera shumëpalëshe, duke bërë detyrën do të japin mesazhin e duhur që procesi të administrohet deri në fund, në mënyrë që legjitimiteti i rezultateve dhe i autoriteteve që dalin nga zgjedhjet, të mos ketë asnjë hije dyshimi.



Në fakt ju thoni se janë komisionerët e PD-së që kanë bllokuar punën por PD thotë nga ana e saj se ka edhe komisionerë të PS-së që kanë braktisur punën në komisione?

Ju jeni e lirë dhe sovrane të shtoni informacion. Unë sapo dhashë pjesën time të informacionit. Pas një kontaktimi të drejtpërdrejt telefonik, me të gjithë kandidatët e mi në të 100 zonat dhe nuk më rezulton në asnjë rast që heronjtë e numërimit të votave, apo anëtarë të komisioneve të Partisë Socialiste - po them heronj sepse është një punë e lodhshme në këto orë gjithashtu - të mos jenë prezent në detyrë. Përkundrazi, po sforcohen për të rikthyer në detyrë përfaqësuesit e opozitës, të cilët në 7-8 qendra numërimi të po kaq zonave, mungojnë edhe tani.

Masat nëse duhen marrë, nuk i marr unë, sepse siç dëgjuam edhe Kryetarin e KQZ, Kodi ka sanksione për cilindo dhe komisionerët nuk kanë ngjyrë në këtë rast, nuk mund të merren në mbrojtje nga njëra palë dhe të ndëshkohen nga pala tjetër.

Zëri Popullit

[Humdinger]

Nëse mazhoranca juaj nuk do të ishte e tillë për të krijuar qeverinë dhe, nga ana tjetër, disidenti Meta mund të krijojë me ju një maxhorancë që mund të mundë Berishën, a do të ketë një marrëveshje për këtë?

Duke bërë një pyetje që është gjithmonë aktive në Shqipëri, veçanërisht në marrëdhëniet e Shqipërisë me botën civile, nga edhe vini ju, asgjë nuk është e pamundur. Atëherë për të qenë më shpjegues. Të mundësh Berishën nuk është e pamundur. Të bësh disidentin, si një snob, nuk është e pamundur. Rezultatet paraprake, që po i ndjekim të gjithë, më bëjnë të rikonfirmoj sërish që asgjë nuk është e pamundur. Në substancë dhe si tendencë, ka filluar, nga numërimi i votave, që në qendrat më në disfavor për ne, në të gjitha zonat elektorale, të shihet fort tendenca e rikuperimit tonë dhe shifrat aktuale më japin si parti vendin e parë, shumicën. Një shumicë relative ende, pasi jemi akoma në pikavarazhin e 1/3 së zonave. Kështu që, duke konkluduar, asgjë nuk është e pamundur.

Zëri Popullit

[Humdinger]

Ju thoni se keni fituar 1/3 e zonave, por njëkohësisht Partia Demokratike deklaron se ka fituar 1/3 e votave. Nga është e vërteta?

Fakt është që unë jam këtu për të rikonfirmuar respektin absolut ndaj atyre që numërojnë votat. Faktet që unë paraqes janë fakte. Në dallim nga fakte të tjera, që përfaqësuesit e Berishës në qendra të ndryshme, komisionerë apo përgjegjës për numërimin e votave, po e bllokojnë atë që prej tre orësh, ose duke braktisur detyrën dhe përgjegjësinë që u takon atyre, sipas ligjit. Fakti që përmenda, në 55 zona janë në avantazh përfaqësuesit e mi, në 44 zona ata të Berishës dhe në 1 zonë Meta, ai është në një avantazh ndoshta të pakontrollueshëm. Dhe jemi këtu. Por ju duhet ta ç'dramatizoni pak. Sepse shuma mes meje dhe Berishës nuk bën kurrë 100.

Zëri Popullit

[Humdinger]

Ruçi - Deklarimi i rezultatit, vetëm në fund të numërimit

TIRANE- Ka dalë në një konferencë për shtyp, sekretari i Përgjithshëm i PSSH, Gramoz Ruci i cili ka garantuar se PS është në avantazh në më shumë zona se sa PD. "Akoma nuk ka mbaruar procesi i votimit ku kanë ngelur edhe nga 10 kuti votimi për zonë elektorale. Nga të gjitha evidencat zyrtare pranë KZZ-ve, përsëri na rezulton se 55 zona elektorale kandidatët e Partisë Socialiste prijnë garën në zonat respektive. Ne kemi qëndruar gjithmonë duke zbatuar deri më një rigorozisht kërkesat e kodit, ruajtjen e etikës elektorale dhe mbi të gjitha të standarteve dhe të qetësisë në vend. E kundërta po ndodh me kundërshtarët tanë politikë. Së pari, në asnjë rast, në asnjë zonë elektorale dhe atje ku prijmë me rezultatin, edhe atje ku nuk e prijmë rezultatin, komisionerët tanë janë rigorozisht të kodit deri në përmbushjen e detyrës së tyre. Dhe ne përsëri u kërkojmë të njëjtën gjë edhe në këtë komunikim me publikun.

Kundërshtarët tanë jo vetëm që nuk reflektuan ndaj asaj vërejtje dhe asaj thirrje që i bëmë në orën 15.00 i vetmi ndryshim që doli dhe shpallën një deputet më shumë se ne. Në një kohë që në disa zona elektorale kanë bllokuar dy kutitë e fundit dhe meqë rezultati është për Partinë Socialiste, atëherë ata thonë që këto dy kuti votimi nuk duhet të hapen. Ashtu sikurse në zonën nr.38 të "Qytetit të Studentit" i ka rrethuar profesori i psikologjisë, nuk i dimë me se dhe hajde të punojë ai komision në këto kushte terrori. Të njëjtën gjë do të thosha tek zona nr.37 ku kandidati i PS-së është para, të njëjtën gjë do të thosha tek zona nr.36 në Tiranë që kandidati i PS-së është para. Prandaj, unë do t’i bëja përsëri apel lidershipit të partisë Demokratike që ethet e fitores të mos bëjnë të shkelet ligji dhe të prishet qetësia në vend. Ne jemi për standartet, jemi për stabilitetin, jemi të përfundojë procesin deri në fund siç e nisëm.

Prandaj i bëjmë apel edhe organizmave ndërkombëtare që asistojnë, monitorojnë procesin e zgjedhjeve që të shkojnë dhe të asistojnë pikërisht në pikat më të nxehta, pikërisht në ato vende ku rrezikohet të hidhet në erë procesi zgjedhor në Shqipëri", ka qënë deklarata e Sekretarit të Përgjithshëm të PSSH, Gramoz Ruci mbrëmë në një konferencë për shtyp. Ndërkohë që Berisha festonte dhe premtonte se do të qeverisë me 55 deputetë.



Keni mundësi të qeverisni, qoftë edhe me aleatët?

Unë deklarova edhe në drekë se Partia Socialiste me mandatin që do marrë në mazhoritar dhe PS së bashku me aleatët i ka të gjitha garancitë dhe jemi tërësisht të gatshëm për të bashkëqeverisur, pasi për 8 vjet pavarësisht se kemi pasur numrat, kemi bashkëqeverisur. Madje, edhe me forca të qëndrës së djathtë.



Mirëpo PD ka shpallur fitoren në qëndër të Tiranës?

Gjithshka mund të ndodhë këtu. Madje, u shpall që Musa Ulqini, kryetari i PS së Tiranës, humbi. Ai ka marrë mandatin. U shpall që edhe Ermelinda Meksi ka humbur, është në kutitë e votimit dhe është mbi 500 vota para. U shpall Idrizi apo Harasani i humbur, janë dhe 10 kutitë e fundit dhe janë para me rezultatin që në drekë.



Ju po deklaroni se keni fituar?

Ju thashë që në drekë që Partia Socialiste udhëheq në 55 zona. Dhe nuk thashë që ka fituar, pasi fiton kur merr mandatin. E dyta, zonja Topalli llogarit tek 56 deputetët edhe zonjën Çeço në Gjirokastër duke thënë se këto dy kuti votimi unë nuk i hapsepse unë nuk dua t’i hap, pasi më rrezikon rezultati mua ose në zona të tjera në Tiranë apo jashtë Tirane.

Edhe unë që jam mbi 2 mijë vota para nuk e shpall rezultatin këtu.



Ku keni fituar realisht?

Në Veri, deri tani ka përfunduar në zonën nr.7 ku është shpallur fitues kandidati jonë dhe është deri më tani 1000 vota para. Të njëjtën gjë do të thoja në Mirditë, në Lezhë, në një zonë tjetër në Shkodër, në një zonë tjetër në Dibër e kështu me rradhë.



Ku është kryetari i Partisë?

Kryetari i Partisë është në krye të detyrës, në karrigen e kryeministrit, sepse ju e shikoni se një moment duhet dhe të prishet rendi dhe qetësia publike në kryeqytet edhe më gjerë.

S.Vuciterna

Zëri Popullit

[Albo]

Rezultat paraprake te deritanishem te numerimit te votave

Qarku Shkoder
Zona 1: Fiton Paulin Sterkaj(PS) me 51.3%, humbet Pjeter Arbnori(PD).
Zona 2: Fiton Astrit Bushati(PD) me 52.7%, humbet Pal Lera(PS).
Zona 3: Fiton Ramiz Cobaj(PD) me 47.4%, humbet Leke Cukaj(PS).
Zona 4: Fiton Gilman Bakalli(PD) me 58%, humbet Musa Heta(PS).
Zona 5: Fiton Arenca Trashani(PD) 55.2%, humbet Ramadan Hasanaj(PS).
Zona 6: Fiton Jozefina Topalli(PD) me 60.5%, humbet Zen Cuni(PS).
Zona 7: Fiton Tom Doshi(PS) me 52.7%, humbet Valentin Palaj(PD).
Zona 8: Fiton Nard Ndoka(PD) me 60.3%, humbet Nikolin Dedvukaj(PS).
Zona 9: Fiton Rrexhep Uka(PD) me 42.9%, humbet Viktor Doda(PS).


Qarku Kukes
Zona 10: Fiton Aleksander Biberaj(PD) me 66.9%, humbet Ali Berbati(PS).
Zona 11: Fiton Jemin Gjana(PD) me 48.8%, humbet Rrexhep Ukperaj(PS).
Zona 12: Fiton Fatos Hoxha(PD) me 48.9%, humbet Asllan Dogjani(PS).


Qarku Lezhe
Zona 13: Fiton Aldo Bumci(PD) me 53.2%, humbet Zef Preci(PS).
Zona 14: Fiton Prec Zogaj(PD) me 46.1%, humbet Gjovalin Kadeli(PS).
Zona 15: Fiton Gjovalin Prenga(PD) me 38.9%, humbet Mark Nikolli(PS).
Zona 16: Fiton Gjoke Vuksani(PD) me 47.2%, humbet Albert Cakoni(PS).
Zona 17: Fiton Pal Dajci(PD) me 44.9%, humbet Shkelqim Cami(PS).


Qarku Diber
Zona 18: Fiton Qemal Minxhozi(PS) me 41.8%, humbet Gani Hoxha(PD).
Zona 19: Fiton Idriz Xhomara(PD) me 51.3%, humbet Skender Demiraj(PS).
Zona 20: Fiton Sali Shehu(PD) me 49.1%, humbet Ardit Kaja(PS).
Zona 21: Fiton Rahim Kaleci(PD) me 49.8%, humbet Ilir Gjoni(PS).
Zona 22: Fiton Neshat Fana(PD) me 50.2%, humbet Sadri Abazi(PS).


Qarku Durres
Zona 23: Fiton Shkelqim Ziri(PD) me 47.5%, humbet Bujar Derveni(PS).
Zona 24: Fiton Ndricim Babasi(PD) me 49.2%, humbet Natasha Paco(PS).
Zona 25: Fiton Sami Gjergji(PD) me 58.2%, humbet Emin Barci(PS).
Zona 26: Fiton Sokol Olldashi(PD) me 50.1%, humbet Agron Duka(PS).
Zona 27: Fiton Flori Bajramaj(PD) me 58.6%, humbet Lulzim Traga(PS).
Zona 28: Fiton Ferdinand Xhaferi(PD) me 54.8%, humbet Gazmir Bizhga(PS).
Zona 29: Fiton Gazmend Oketa(PD) me 54.5%, humbet Gjergj Koja(PS).
Zona 30: Fiton Genc Juka(PD) me 49.6%, humbet Sokol Kokomani(PS).


Qarku Tirane
Zona 31: Fiton Bamir Topi(PD) me 52.1%, humbet Mimi Kodheli(PS).
Zona 32: Fiton Besnik Mustafaj(PD) me 54.8%, humbet Luan Rama.
Zona 33: Fiton Lulzim Basha(PD) me 47.7%, humbet Arben Ahmetaj(PS).
Zona 34: Fiton Bujar Nishani(PD) me 40.8%, humbet Igli Toska(PS).
Zona 35: Fiton Ermelinda Meksi(PS) me 41.7%, humbet Apollon Bace(PD).
Zona 36: Fiton Shaban Memia(PD) me 47.1%, humbet Andis Harasani(PS).
Zona 37: Fiton Edi Paloka(PD) me 46.5%, humbet Shpetim Idrizi(PS).
Zona 38: Fiton Anastas Angjeli(PS) me 44.2%, humbet Ylli Pango(PS).
Zona 39: Fiton Majlinda Bregu(PD) me 50.3%, humbet Petrit Malaj(PS).
Zona 40: Fiton Gezim Karapici(PD) me 41.9%, humbet Majlinda Keta(PS).
Zona 41: Fiton Spartak Ngjela(PD) me 38.1%, humbet Spartak Poci(PS).
Zona 42: Fiton Neritan Sejamini(PD) me 42.5%, humbet Musa Ulqini(PS).
Zona 43: Fiton Safet Sulaj(PD) me 55.6%, humbet Shyqyri Duraku(PS).
Zona 44: Fiton Astrit Patozi(PD) me 51.9%, humbet Bashkim Haxhiu(PS).
Zona 45: Fiton Leonard Demi(PD) me 50%, humbet Mehmet Hasalami(PS).
Zona 46: Fiton Durim Lamaj(PS) me 56.7%, humbet Luftim Ahmetaj(PD).
Zona 47: Fiton Hasan Hoxha(PS) me 37%, humbet Baki Shehi(PD).
Zona 48: Fiton Sali Berisha (PD) me 60.9%, humbet Agim Hushi(PS).
Zona 49: Fiton Engjell Cara(PD) me 56.1%, humbet Artan Lame(PS).
Zona 50: Fiton Agron Dibra(PS) me 45.9%, humbet Luan Skuqi(PD).


Qarku Elbasan
Zona 51: Fiton Dashnor Sula(PD) me 59.9%, humbet Shpetim Kateshi(PS).
Zona 52: Fiton Durim Hushi(PS) me 44.9%, humbet Nuri Hasa(PD).
Zona 53: Fiton Taulant Dedja(PS) me 46.4%, humbet Omer Stringa(PD).
Zona 54: Fiton Aurel Bylykbashi(PD) me 49.2%, humbet Qazim Sejdini(PS).
Zona 56: Fiton Valentina Leksaj(PS) me 55.7, humbet Hyqmet Lleshi(PD).
Zona 57: Fiton Namik Dokle(PS) me 51.5%, humbet Mehmet Ibaj.
Zona 58: Fiton Ndricim Hysa(PS) me 44.8%, humbet Behexhet Uruci(PD).
Zona 59: Fiton Elmaz Sherifi(PS) me 43.4%, humbet Fadil Merzheku(PD).
Zona 60: Fiton Taulant Balla(PS) me 58.2%, humbet Skender Cota(PD).


Qarku Fier
Zona 62: Fiton Blerim Cela(PD) me 29.9% humbet Spartak Braho(LSI).
Zona 63: Fiton Mevlan Xhindoli(PD) me 43%, humbet Vath Koreshi(PS).
Zona 65: Fiton Arta Dade(PS) me 39.8%, humbet Ndini Ndoni(PD).
Zona 66: Fiton Albert Caci(PS) me 51.3%, humbet Viktor Gjini(PD).
Zona 67: Fiton Petro Koci(PS) me 43.9, humbet Vasillaq Ngresi(PD).
Zona 69: Fiton Ylli Bufi(PS) me 42.1%, humbet Bardhi Meli(LSI).
Zona 72: Fiton Rajmonda Stefa(PS) me 37.7%, humbet Dritan Prifti(LSI).
Zona 73: Fiton Artur Shehu(PD) 40.1%, humbet Kastriot Islami(PS).


Qarku Berat
Zona 74: Fiton Mehmet Xheka(PD) me 48.3%, humbet Flamur Rogu(PS).
Zona 75: Fiton Erion Brace(PS) me 38.8%, humbet Dritan Hasnedari(PD).
Zona 78: Fiton Bashkim Fino(PS) me 44.4%, humbet Aleksander Melonashi(PD).
Zona 79: Fiton Ilir Meta(LSI) me 56%, humbet Adnor Shameti(PS).


Qarku Korce
Zona 80: Fiton Ben Blushi(PS) me 49.2%, humbet Gjergji Pendavinji(PD).
Zona 81: Fiton Ridvan Bode(PD) me 51.3%, humbet Ahmet Hoxhallari(PS).
Zona 83: Fiton Ilir Rusmali(PD) me 57.2%, humbet Ilir Kulla(PS).
Zona 84: Fiton Edmond Spaho(PD) me 47.5%, humbet Fehmi Xhemo(PS).
Zona 85: Fiton Fatmir Xhafaj(PS) me 42.2%, humbet Eris Hoxha(PD).
Zona 87: Fitom Mehmet Hoxha(PD) me 52.7%, humbet Agim Isaku(PS).

Qarku Gjirokaster
Zona 89: Fiton Flamur Hoxha(PS) me 56.1%, humbet Mitro Cela(PD).
Zona 90: Fiton Makbule Ceco(PS) me 45.5%, humbet Genc Ruli(PD).
Zona 92: Fiton Spiro Ksera(PBDNJ) me 62.6%, humbet Vangjel Tavo(PS).


Qarku Vlore
Zona 93: Fiton Arben Malaj(PS) me 47.2%, humbet Moisi Meminaj(PD).
Zona 95: Fiton Arben Isaraj(PS) me 46.3, humbet Genci Panozaqi(PD).
Zona 98: Fiton Spiro Peci(Pavarur) me 55.2%, humbet Arjan Dhimertika(PD).
Zona 99: Fiton Fatos Nano(PS) me 53.9%, humbet Besnik Aliaj(PD).

* Ky nuk eshte rezultati final zyrtar i zgjedhjeve.
* Numerimi vazhdon dhe rezultatet mund te ndryshojne.
* Burimi i informacionit eshte Komisioni Qendror i Zgjedhjeve



Rezultati i pergjithshem i numerimit deri ne keto momente:

Prej 84 zonave ku vazhdon procesi i numerimit:
PD fiton ne 52 zona ose 61.90%.
PS fiton ne 29 zona ose 34.52%.
LSI fiton ne 1 zone ose 1.19%.
PBDNJ Fiton ne 1 zone ose 1.19%.
Kandidat i pavarur ne 1 zone ose 1.19%.