Zgjedhjet e ndershme domosdoshmëri

[Himarioti]

Zgjedhjet e ndershme domosdoshmëri

Nga Agron Gurabardhi
Jurist

Një sistem demokratik përbëhet nga dy pole të kundërta, nga qeveria dhe opozita. Ky polarizim dialektik realizon zhvillimin dhe përparimin e vendit. Alternimi ndodh atëhere kur elektorati, në rastin kur votohet me votë të lirë dhe të ndershme, refuzon të mbështesë qeverinë dhe ia jep votën opozitës. Kur elektorati është i kënaqur vazhdon të mbështesë qeverinë. Eksperienca e vëndeve të emancipuara ka treguar se pas dy e shumta tre seanca zgjedhjesh pozicionet këmbehen.
Kriza qeverisëse që kaloi mazhoranca e sotme dhe që nuk u shfrytëzua nga opozita tregon se kur i shkojnë punët keq njërës dhe asgjë nuk ndryshon atëhere është keq edhe pala tjetër. Asnjëra palë nuk afron asgjë të mirë dhe ky është rezultat i një krize të përgjithëshme.
Mënyrat e veprimit dhe organizimit të qeverisjes si dhe shërbimet administrative të tyre i përngjajnë administratës së perandorisë osmane që nuk vlejnë në kushtet e shtetit ligjor e të ekonomisë së tregut. Që do të thotë se me mënyrat e vjetra nuk mund të zgjidhësh problemin e një sistemi të ri.
Mungesa e demokracisë pasqyrohet çdo ditë në vendin e miratimit të ligjeve, ku propozimet e opozitës në çdo ligj të miratuar hidhen poshtë nga mazhoranca, e cila me anën e kartonave pamundëson idet reale përmirësuese të bëra nga opozita të cilat do të çonin përpara në pozita të shëndosha zhvillimin e vendit.
Në sallën e parlamentit gjithësecili ka të drejtë të refuzojë një vendim, qoftë edhe demokratik por që nuk ka sjellur rezultat, aq më tepër opozitarët. Kur bëhet fjalë për ligjin ekzistues të zgjedhjeve, mbi zonat elektorale, secili prej deputetëve opozitarë e ka detyrë, ndaj elektoratit të tij, të refuzojë mbështetjen e deputetëve të mazhorancës, të cilët këmbëngulin në mbrojtjen e ligjeve të tilla jodemokratike. Shpesh ligjeve të tilla i thuren hymne pikërisht për shkak të një mungese të një demokracie parlamentare dhe pastaj elektorati kalon në protesta masive. Kjo bëhet e ndjeshme edhe për komunitetin ndërkombëtar, i cili më pas ndërhyn dhe bëhet faktor kryesor për zgjidhjen e konflikteve të tilla. Pas kësaj, vëndit ku miratohen ligjet, i duhet që të fillojë dhe të rifillojë nga e para duke patur mbi kokë "edukatorët" evropianë të Organizatës për Sigurimin dhe Bashkëpunim Europian, të cilët japin orientime e ku të dy palët duhet të bien dakort. Detyrat, në formë rekomandimi, saktësojnë edhe një herë se dështimi në organizimin e zgjedhjeve sipas standarteve ndërkombëtare, do të ishte një hap serioz prapa për nënshkrimin e marrveshjes së asocim-stabilizimit. Nga ana tjetër opozita e ka të nevojshme të rishohë pozicionin me aleatët, për të mos përsëritur rrethana të tilla ku nga i njëjti "koalicion" apo "bashkim" të ndodhë absurditeti, ku propozohet nga njëra anë bashkimi i së djathtës e nga ana tjetër vota për qeverinë. Ose nga njëra anë kërkohet mocion për rrëzimin e kryeministrit e nga ana tjetër bëhen me të bisedime për të marrë pjesë në qeveri. Theksojmë se kjo ka çuar në një mungesë serioziteti dhe në një çoroditje jo vetëm të koalicionit por edhe të elektoratit, i cili nuk gjeti forca për të besuar e mbështetur këtë koalicion. Kjo nuk duhej anashkaluar, përkundrazi duhej analizuar për të parë realitetin objektivisht dhe përgjegjësitë e gjithësecilit.
Ky realitet solli si reagim nevojën e përnjëherëshme të pasurimit të kulturës politike e të programit politik të PD-së dhe pasurimin kultural e njerëzor të përbërjes së saj. Në vijim të kësaj kjo parti bëhet më e besueshme për elektoratin, pasi ajo ka ndryshuar mënyrat e organizimit të jetës politike në përbërjen e saj. Ajo tashmë është e hapur, duke siguruar pjesmarrje të njerëzve në të nga nivele të ndryshme të shoqërisë civile, të cilët shohin te PD-ja një reformim real mbi parime demokratike dhe me program në shërbim të popullit me qëllim që njerëzit të marrin pjesë aktive në jetën e saj dhe të votojnë për të.
Eshtë normale kur diçka nuk shkon në rregull të bësh një analizë dhe të nxjerrësh konkluzione për të përmirësuar gjëndjen. Pikërisht këtë bëri opozita e si rezultat i saj shumë njerëz nga shoqëria civile që ishin jashtë saj i janë afruar politikës, duke u marrur direkt e duke dhënë kontributin e tyre në fusha të caktuara ose indirekt ata kontribojnë për të me votën e tyre. Kjo në një farë mënyre i jep atyre të drejtën politike të japin ndihmesën e tyre për përparimin e kombit.
Degët e partive në rrethe duhet në mënyrë zinxhir të ndjekin inisiativën dhe veprimet e qëndrës, të demokratizohen, të hapen, të respektojnë mendimin opozitar, të lënë fjalën e lirë dhe hapësirë për çdo individ, të bëjnë analiza, të heqin dorë nga urdhërat dhe diktatet dhe mos fyejnë anëtarët që kanë mendime të ndryshme, por përkundrazi të institucionalizojnë atë. Vota të jetë e lirë që të mos ndodhë si në kongresin e fundit të partisë më të vjetër në vend, ku u arrit shtypja përfundimtare e mendimit të lirë dhe opozitar. Eshtë fakt që pas 50 vjetësh kjo parti u nda dhe shumë njerëz gëzohen që u shkëputën nga ajo, pasi ajo kthyer në pronë private e një grupi shum të vogël individësh që shpërdorojnë besimin e elektoratit të tij, i cili i ka kthyer krahët.
Gjatë këtyre zgjedhjeve elektorati kërkon nga PD-ja aleancë me partitë e opozitës që kanë treguar seriozitet në bashkëpunim. Në këtë kuadër KOP-i duhet të projektojë e t'i propozojë PD-së aleancat e saj me partitë e spektrit djathtë. Për këte ajo me specialistët e saj duhet të paraqitet në terren për të testuar e parashikuar peshën reale që zënë këto parti, në mënyrë që PD-ja në këto aleanca të jetë sa më serioze. Nëse këto parti kapin një përqindje të konsiderueshme atëhere aleanca ose bashkëpunimi kthehet në një domosdoshmëri. Kështu do të pranohet ajo që partitë që përbëjnë aleancën të konsiderohen si përfaqësuese të mendimeve të ndryshme, të cilat të jenë të tolerueshme dhe sipas peshës së tyre në elektorat, të merren në konsideratë. Marrëveshjet të jenë paraprake, publike, transparente për të saktësuar pozicionin në rast të një lajthitje të mëvonëshme. Kjo taktikë çon në zgjedhje në mënyrë më të kontrolluar dhe me përfundime të parashikuara. Kjo do të prodhojë bashkërendimin e forcave opozitare dhe kundërshtare të regjimit të sotëm, i instaluar ky në mënyrë të turpshme në Shqipëri që nga viti1997.
Domosdoshmëria e përmirësimit të ligjit zgjedhor, hartës elektorale, i heq mundësinë pozitës të garantojë pushtetin. Në rast të kundërt mbështetur mbi ligjin elektoral ekzistues, popullit shqiptar do t'i duhet të qëndrojë ditë e natë në shesh për të vendosur në vend gjënë më themelore, votën, për të bërë të mundur rotacionin e pushtetit. Elektorati i kërkon forcave që do të vijnë në pushtet, demokraci, programe reale e të besueshme në shërbim të tyre, zgjedhje të ndershme e të lira. Kjo me qëllimin që jeta shqiptare, që për fat të keq është zhytur në nivelet më të turpshme të organizimit të saj dhe të bërjes së politikës, të ngrihet atje ku e meriton, në nivelet evropiane.

Gjenevë, Shkurt 2005

[Dito]

bobobobobobo prap zgjedhje, po jeni cuna e goca te reja mer daje boni qejf leni politikanet se sja ka pa kush hajrin. Shifni mer daje noi party gjekundi se spo na duhet fare politika.

Dito.