Kursi veror i shqipes, mbledh albanologët e huaj?

[Letersia 76]

Kursi veror i shqipes, mbjell albanologë


Ka filluar prej disa ditësh kursi veror i gjuhës shqipe për të huajt. Në këtë kurs marrin pjesë 30 të huaj nga Italia, Rusia dhe Polonia dhe mësimi i gjuhës shqipe bëhet nga profesorët më të mirë të katedrës së gjuhës shqipe, në fakultetin Filologjik. Profesori Shezai Rrokaj, iniciator i këtij kursi prej disa vjetësh tregon se tashmë është krijuar një traditë e mirë, ku studentë të vende të ndryshme vijnë në Shqipëri, për të mësuar gjuhën shqipe. Studentët e huaj që vijnë në Shqipëri për të mësuar gjuhën shqipe, e mësojnë atë për qëllime studimi dhe duan që në të ardhmen t'ua mësojnë brezave të tjerë. Gjuhëtari Rrokaj thekson se mësimi i gjuhës shqipe, këtë vit është alternuar, jo vetëm në auditore, por edhe në mjedise të caktuara, si kinema, stacione treni, teatër, lulishte etj, në të cilat studentët praktikojnë gjuhën shqipe, për situata të ndryshme. Njëri prej studentëve Aleksandër Novik, rrëfen se ka 15 vjet që studion gjuhën shqipe dhe ka mbaruar degën e gjuhës shqipe në San Petërburg. "Mua më intereson shumë etnografia ballkanike, për këtë qëllim, kam nisur të mësoj gjuhën shqipe",-thotë Novik. Aleksandra Mikulskaja, Anna Shots dhe Sergei Kalinjik, janë po nga Rusia dhe frekuentojnë të njëjtën degë dhe e mësojnë shqipen me profesorët e katedrës së gjuhës shqipe në San Petërburg. "Me anë të këtij kursi synojmë të mbjellin farat e para të albanologëve dhe diplomatëve që do të përfaqësojnë vendin tonë kudo. Mendojmë që në të ardhmen, kursi veror të finalizohet me një institut të gjuhës shqipe për të huajt",-përfundoi Rrokaj.