Ekonomia ne 3-mujorin e pare 2005 - INSTAT

[Eros26]

Me poshte jepen disa tregues te ekonomise shqiptare per 3-mujorin e pare te 2005-es si dhe krahasimi me periudha te ndrushme te 2004-es!
Keto te dhena jane botuar nga INSTAT!

Indeksi i shitjeve për të gjitha ndërmarrjet në shkallë vëndi për tremujorin e parë të vitit 2005 arriti në 161.2%, ku si bazë krahasimi është tremujori i parë i vitit 2001=100.
Gjatë këtij tremujori vlerësohet që shitjet në vlerë për produktet dhe shërbimet të jenë rritur 61.2% në krahasim me tremujorin e parë të vitit 2001. Me rritje ndaj tremujorit bazë rezultojnë të gjitha degët e ekonomisë. Ndjeshëm në këtë rritje influencon dega tregëti hotele restorante duke realizuar rreth 44% të rritjes totale të ekonomisë për këtë tremujor.
Për ndërmarrjet që operojnë në Industrinë nxjerrëse Indeksi i shitjeve është realizuar 132.1%, pra me një rritje 32.1% në krahasim me tremujorin e parë të vitit 2001.
Këtë tremujor nxjerrja e produkteve energjetike rezulton me 10% rritje krahasuar me tremujorin bazë. Ky sektor realizon dhe 67% të rritjes në këtë degë megjithse nxjerrja e produkteve joenergjetike rezulton me një rritje 172.4%
krahasuar me tremujorin bazë. Indeksi i shitjeve për ndërmarrjet e Industrisë Përpunuese në tremujorin e parë 2005 është 138.8%.
Është rritur kërkesa për produkte të industrisë ushqimore në këtë tremujor rreth 11.3%, krahasuar më tremujorin bazë.Në industrinë përpunuese me rritje të konsiderueshme të nivelit të shitjeve ndaj tremujorit të parë 2001 paraqitet industria e letrës, kartonit, botimeve, industria e kauçukut e plastikës fabrikimi i artikujve mineralë jo metalikë etj. Me rënie krahasuar me tremujorin bazë paraqiten fabrikimi i mjeteve te transportit 52.6%, industria kimike 35.9%, punimet me dru 12.1% dhe tekstile veshje respektivisht 2%.
Sektori i Energjisë elektrike, gazit dhe ujit këtë tremujor është realizuar 108.2% me nje rritje 8.2% krahasuar me tremujorin e parë 2001, ndërsa krahasuar me tremujorin e mëparshëm ka një rënie 9.9%.
Ndërmarrjet që veprojnë në sektorin e Ndërtimit e kanë rritur vëllimin e punimeve në këtë tremujor krahasuar më tremujorin bazë 96%.
Në sektorin e tregtisë, hoteleve dhe restoranteve Indeksi i Shitjeve vlerësohet me rritje 59.6% në krahasim me tremujorin e parë 2001.
Ndërmarrjet që operojnë në sektorin e Trasportit dhe Telekomunikacionit, tremujorin e parë të këtij viti kanë realizuar një vëllim shitjesh në shërbime 160.3% më të lartë se në tremujorin e parë 2001, ndërsa në krahasim më tremujorin e mëparshëm ka një rënie prej 5.3%. Kjo shkaktohet kryesisht nga rënia e nivelit të shitjeve në transport megjithse ky sektor përfaqëson rreth 25% të volumit të shitjeve të realizuara në degën e transport +
telekomunikacionit.
Në degët e tjera të ekonomisë Indeksi i Shitjeve gjatë tremujorit të parë të vitit 2005 arriti në 161.8%, në krahasim me tremujorin bazë.

TREGTIA E JASHTME

Gjatë tremujorit të parë të vitit 2005, eksporti i mallrave në vlerë arriti në 15343 milion lekë ose rreth 3% më pak se në tremujorin e katërt të vitit 2004 dhe rreth 6% më shumë se në të njëjtin tremujor të vitit të kaluar.
Importi tregtar i mallrave në vlerë gjatë tremujorit të parë të vitit 2005 arriti në 52593 milion lekë ose rreth 23% më shumë se në tremujorin e katërt të vitit 2004 dhe 5% më shumë se në të njëjtin tremujor të vitit të kaluar.
Ndihmat humanitare në mallra arritën në 224 milion lekë ose rreth 58% më pak se në tremujorin e katërt të vitit 2004.
Përqindja e mbulimit të eksporteve nga importet gjithsej, në tremujorin e parë të vitit 2005 ishte rreth 29%.
Gjatë këtij tremujori rreth 65.6% të totalit të eksporteve dhe 13.6% të importit tregtar, e zuri grupi "Teksile dhe këpucë".
Grupi "Materiale ndërtimi dhe metale" përfaqëson rreth 12.4% të totalit të eksportit dhe rreth 13.9% të importit tregtar.
Eksporti i grupit "Ushqime, pije, duhan" është 7% i totalit të eksportit të këtij tremujori.
Importi i "Makineri, pajisje dhe pjesë këmbimi" është 21.9% i totalit të importit tregtar.
Partnerët kryesorë tregtarë, edhe gjatë këtij tremujori vazhduan të jenë Italia dhe Greqia, me të cilat është kryer respektivisht rreth 31.5% dhe 16.7% e importit tregtar dhe rreth 74.8% dhe 12.3% e eksportit.
Me vendet e Bashkimit Europian është kryer rreth 92.6% e eksporteve dhe rreth 65.6% e importeve tregtare.

TREGUES TË KËRKESËS SË BRENDËSHME ÇMIMET

Indeksi i çmimeve të konsumit në tremujorin e parë 2005 arriti në 108.5 % (Dhjetor 2001 = 100), duke shënuar një rritje prej 3.3 për qind kundrejt tremujorit të katërt 2004.
Krahasuar me të njëjtën periudhë të vitit të kaluar IÇK
shënoi një rritje prej 2.8 per qind. Rritja e IÇK gjatë këtij tremujori është rezultat i rritjes së indeksit të grupit "Ushqime dhe pije jo alkolike" prej 4.3 për qind, dhe grupit "Pije alkolike dhe duhan" prej 0.4 për qind. Gjatë tremujorit të parë 2005 çmimi mesatar i një kg buke është 64.5 lekë duke qëndruar pothuajse në të njëjtin
nivel. Ndërsa çmimi mesatar i një kg mish vici i freskët ështe 638.8 lekë nga 636.8 lekë që ishte në tremujorin e kaluar.
Indeksi i kushtimit në ndërtim arriti në 122.8 për qind në tremujorin e parë 2005 duke shënuar një rritje prej 1.2 për qind krahasur me tremujorin e mëparshëm.
Indeksi i çmimeve të prodhimit në tremujorin e parë 2005 është 132.55 për qind duke shënuar nje rritje prej 1.33 për qind kundrejt tremujorit të mëparshëm.

TREGUESIT FINANCIARE

Të ardhurat e buxhetit të përgjithshëm në fund të periudhës janar-mars të vitit 2005, arritën në 45.4 miliardë lekë, duke rezultuar me një tejkalim prej rreth 528 milionë lekë ose rreth 101.2 përqind të nivelit të programuar për këte periudhë. Krahasuar me të njëjtën periudhë të vitit të kaluar këto të ardhura rezultojnë rreth 10 përqind më të larta ose rreth 4.0 miliardë lekë më shumë.
Shpenzimet e buxhetit të përgjithshëm në fund të tremujorit 2005, arritën në 46.8 miliardë lekë, nga 47.6 miliardë lekë të planifikuara, (ose rreth 98.3 përqind), duke
qenë rreth 8 përqind më të larta se në të njejtën periudhë të vitit të kaluar, ose rreth 3.4 miliardë lekë më shumë. Situata e deficitit të përgjithshëm në fund të muajit Mars, paraqitet brenda kufijve të parashikimit të këtij treguesi.

FORCAT E PUNES

Gjatë tremujorit të parë të vitit 2005, numri i të punësuarve në vend mbetet në të njëjtat nivele me ato të fundit të vitit 2004. Megjithatë forcat e punës kanë një ulje shumë të lehtë vetëm me 1 mijë, kjo për shkak të uljes së numrit të të papunëve të rregjistruar në zyrat e punësimit.
Për tremujorin e katër të vitit 2004 kemi të rregjistruar 157 mijë punëkërkues të papunë, gjatë tremujorit të pare numri bie në 156 mijë. Numri i personave që përfitojnë pagesë papunësie ka rritje me 500, në këtë grup janë përfshirë dhe përfituesit nga skemat e veçanta, pagesa të kryera në bazë të Vendimeve të Këshillit të Ministrave për persona që dalin të papunë dhe që fitojnë të drejtën e
trajtimit për një vit me pagën e fundit të vendit të punës.
Më pas ata futen në trajtim sipas skemës së pagesës së
papunësisë.
Niveli i papunësisë bie lehtë duke shkuar në 14.3 për qind.
Paga mesatare në sektorin shtetëror për tremujorin e parë 2005 ka rritje me 3 për qind krahasuar me mesataren e tremujorit të fundit të vitit 2004.Kjo vjen kryesisht për shkak të rritjes se pagave në fund te vitit parardhës për disa grupe punonjësish të arsimit parauniversitar, për punonjës me arsim të lartë ne sistemin e Ministrisë së Shëndetësisë etj.
Paga minimale është e pandryshuar, po kështu në të njëjtat nivele është dhe pagesa e papunësise për të papunët si dhe ndihma ekonomike mesatare për familje.