Cenolli, Bartezi shqiptar i Londrës

[White_Angel]

Ka emigruar drejt Italisë që fëmijë dhe pastaj është stacionuar në
Angli, ku luan në rolin e "gardianit"

Cenolli, Bartezi shqiptar i Londrës

Flet futbollisti i vetëm kuqezi, profesionist në Angli


Nga Londra Muhamed Veliu



Gazeta Shqiptare" ka biseduar me të parin shqiptar i cili ka mundur
të fusë këmbët në futbollin profesionist anglez. Portieri 23-vjeçar,
Marjo Cenolli rrëfen rrugën e vështirë që ka ndjekur në futboll,
idhullin e tij Piter Smikell si dhe planet për të ardhmen. Kur
familja Cenolli nga Durrësi do të merrte rrugën e emigracionit për
në Itali, Marjo ishte fëmija më i vogël i saj. Ata do të vendoseshin
pranë qytetit të Perugias. I dhënë pas botës së futbollit, Marjo
tregon se që nga momenti i parë i mbërritjes në Itali, futbolli dhe
dëshira për të parë stadiumet ishin nga më kryesoret. Nuk do të
vononte shumë që ai të aktivizohej me ekipin e Perugia AC për
grupmoshat e vogla. Kur sapo kishte mbushur të 16-at, do të luante
për një mini kampionat "Trofeun Berluskoni". "Gjuetarët" e talenteve
të reja të ardhur nga Anglia në këtë turne do të spikatnin talentin
e durrsakut, të cilit së bashku me italianin Paulo Dela Ciana do t'i
ofronin një ftesë prove, në ekipin e të rinjve Crystale Palace në
Londër. Trajneri Peter Nicols nuk do të hezitonte nënshkrimin e një
kontrate me shqiptarin Cenolli. "Fushat angleze ishin të
mrekullueshme. U ndjeva me shumë fat të arrija dhe të luaja për një
ekip anglez", kujton Cenolli ardhjen në Selhurst Park gjatë vitit
1997 dhe shton: "Po atë vit në ekipin e të rriturve erdhën edhe dy
italianë, Atilo Lombardo së bashku me Mikele Padovana, me të cilët
rrinim bashkë". Një krizë financiare e Crystale Palace do ta çonte
në shpërbërjen e ekipit. Kjo ngjarje do të shërbente për Marjon si
një kohë pushimi disamujor. Nuk zgjati shumë kur ish-presideti i
Crystal Palace, Ron Noades, bleu ekipin FC Brentford në jug të
Anglisë, dhe me portierin shqiptar Noades do të nënshkruante një
kontratë dyvjeçare. Ekipi i të rinjve do të ishte stacioni më i ri
për Marjon si portjer i parë, ndërsa për ekipin e parë si portier
rezervë. I pakënaqur me FC Brentford, Marjo ambicioz tenton për një
ekip më të mirë. Farombro Toën në qytetin e Southampton do të ishte
një zgjidhje provizore duke kaluar më pas tek Enfield Toën në Londër
dhe Berkamsted Town. Një telefonatë nga menaxheri i tij Atilio
Franculi do t'i ndryshonte në pak orë destinacionin. Nuk ishte
ndonjë ekip anglez që kërkonte në portë Cenollin, por Hamilton
Thunder FC Kanada. Me një biletë në xhep, dy valixhe vetëm pak orë
nga telefonata e Franculit ai do t'i hipte avionit për të mbërritur
në Kanadanë e largët, ku do të aktivizohej për një vit. Me mbarimin
e kontratës ai do të rikthej në Londër. Më 30 Dhjetor të 2004 pas
disa bisedimeve me klube të ndryshme angleze, menaxheri Atilio
Franciuli arriti të bëjë transfertën e radhës për Cenollin. Dave
Caroll ishte dakord ta ofronte atë në gjirin e skuadrës Winsdor FC.
Pas aktivizimit si portier i parë dhe njohjes me lojtarët e
skuadrës, Cenolli do të cilësohej nga gazeta lokale e Windorit "The
Observer" si Bartezi shqiptar.

Cenolli: Një ditë do të luajë me skuadrën kuqezi
Kombëtarja, ambicia e tij e madhe

Marjo Cenolli është i pari shqiptar që ka mundur të luajë në ligën
profesioniste angleze të futbollit. Aktivizimi i tij për tre vjet me
Crystal Palace në Jug të Londrës, dy vjet me Brend Fordin dhe me
Farbrown i japin atij këtë status. Pas kosovaro-finlandezit Shefki
Kuqi, që luan në Ipswich Town dhe vëllait të tij Njaziut, që
aktivizohet me Birmingham City, Cenolli është i vetmi shqiptar që
aktualisht luan në futbollin anglez. Megjithëse larg Shqipërisë dhe
vëzhgimit të trajnerëve shqiptarë, ai do të kishte rastin të vishte
fanelën kuq e zi si portier i parë i kombëtares për U21 në vitin
2000, i ftuar nga trajneri Bujar Kasmi. "Që nga ajo ditë mbase pse
unë luaja në futbollin profesionist, apo për kapriçiot e disa
njerëzve, unë nuk isha më pjesëtar i ekipit kombëtar", shprehet
Marjo, i cili shpreson që një ditë të jetë sërish në gjirin e ekipit
kombëtar. Pyetjes nëse ai ka tentuar të futet në kombëtare sërish i
përgjigjet: "Nartyrisht, por problemi është se unë mund të jem i
pëlqyeshëm si lojtar për disa njerëz dhe i papëlqyeshëm për disa të
tjerë. Por unë gjithsesi jam optimist. Me ardhjen e Brigelit unë
shpresoja se ai do të ndryshonte diçka, por janë ende disa njerëz që
duket se po bëjnë lista me lojtarë të preferuar. Shpresoj se dikush
do ta lexojë këtë intervistë dhe do të kuptojë se ka lojtarë si
vetja ime që luajnë jashtë dhe nuk janë të njohur, madje do të
shtoja janë të harruar. Do të isha shumë i lumtur që në grumbullimet
e ardhshme të Brigelit, në ndeshjet "zbor" siç i quan ai, të më
jepet rasti edhe mua të jem i pranishëm". Cenolli flet edhe për
skuadrën e tij."Tek ky ekip ndihem mirë dhe më duan të gjithë,
shprehet Marjo teksa pimë një kapuçino pranë lagjes South Gate në
veri të Londrës, i cili me keqardhje më pas tregon se ka nxjerrë
shpatullën në ndeshjen e së shtunës, dhe tani duhet të presë disa
javë për t'u shëruar.






White_Angel