Dinamo "E Madhe"

[Qerim]

Presidenti i bluve shprehet optimist për të ardhmen e skuadrës në Europë dhe në kampionatin shqiptar &nbsp02-06-2005
Sulaj: Tani shiheni Dinamon e madhe
Aurel CELIBASHI


Menjëherë sapo ka prezantuar trajnerin e ri, Ramon Kabreron, presidenti i bluve, Besnik Sulaj, është shprehur me optimizëm për të ardhmen e skuadrës. Koka drejtuese e Dinamos është i bindur se që dje ka filluar të projektohet Dinamo e madhe, e cila do të jetë e denjë për Kupën Intertoto dhe gjithashtu për kampionatin shqiptar. "Që dje, Ramon Kabrero do të jetë trajneri i Dinamos. Vendosa të zgjedh një trajner të huaj dhe me shumë eksperiencë në futboll, pasi synimet e mia janë që të ndërtoj një ekip shumë të madh. Ai tashmë do të fillojë punë dhe kam besim se do ta ndihmojë skuadrën me eksperiencën e tij në futbollin modern, ku në veçanti argjentinasit shquhen për lojën e tyre spektakolare. Jam i bindur se me ardhjen e trajnerit kemi hedhur një hap të madh përpara, për t'u bërë skuadra më e mirë e kampionatit shqiptar, por gjithashtu për të qenë liderë në Ballkan dhe më shumë akoma në Europë,"- bën të ditur Sulaj. Sipas tij, trajneri Kabrero ka firmosur një kontratë njëvjeçare, me opsion për t'u rinovuar. Argjentinasi, menjëherë dje, ka dalë në stërvitje me grupin, ndërkohë që në ditët në vazhdim pritet të luhen 2-3 ndeshje miqësore.
Për sa u takon ardhjeve të reja në skuadër, Sulaj konfirmon se janë disa futbollistë që janë projektuar, madje janë kryer edhe bisedat e zakonshme. "Sigurisht, përforcimet janë pjesë e strategjisë së klubit tonë. Do të afrojmë në ekip disa futbollistë, të cilët kanë spikatur në kampionatin shqiptar, pa harruar edhe tre argjentinasit që mbërrijnë sot."
Bosi i bluve i është përgjigjur gjithashtu edhe pyetjes në lidhje me ndonjë largim të mundshëm të futbollistëve aktualë nga ekipi. "Brenda këtyre 2-3 ditëve do të vendoset çdo gjë. Personalisht besoj se do të ruhet 98% e kontigjentit që mbylli kampionatin e fundit. Për sa u takon emrave, do t'i merrni vesh në vazhdim,"- sqaroi dje Sulaj.
Duke iu kthyer Dinamos, presidenti u shpreh shumë entuziast për të ardhmen e ekipit që financon, teksa bëri të ditur se synimi është kalimi i dy tureve në Kupën Intertoto dhe gjithashtu shpallja kampion sezonin e ardhshëm. "Në radhë të parë, duhet të bëjmë një paraqitje dinjitoze në Europë, ku të paktën të kalojmë dy turet e para. Më pas, objektivi ynë do të përqendrohet te titulli kampion, ku shpresoj që edhe ekipet të tjera të forcohen ashtu si ne. Më pas, lufta do të bëhet më e bukur dhe tifozët do të kthehen në shkallët e stadiumeve. Ajo që do të theksoja është se të gjithë duhet të shohin tani Dinamon e madhe që kam pasur në mendje për të ndërtuar,"- përfundoi fjalën e tij Besnik Sulaj.

[GeNi_25]

O Qerim eshte e vertete qe DINAMOJA kete vit do te jete me te vertete e madhe. Kemi nje ndeshje te veshtire me kroatet por mendoj se do ta kalojme kete turn. Shpresoj ne fitore.

[GeNi_25]

Dinamovita mbeshteteni ekipin ne ndeshjen per intertoto, le te tregojme se jemi me te shumte ne numer se tirona qe mezi i grumbullon 10 pleqe, 9 plaka, dhe dy tre çiliminj.

[il_padrino]

Dinamo dhe vetem Dinamo !!!!!

[Qerim]

13-06-2005

Kaseta filmike e Varteksit, sa e vështirë për t'u gjetur!

Aurel CELIBASHI


Kur na ndajnë edhe 6 ditë nga përballja e parë midis Dinamos dhe Varteksit për Kupën Intertoto, nuk është bërë ende asgjë për sa i takon gjetjes së një kasete filmike që kroatët kanë luajtur së fundmi. Trajneri Ramon Kabrero është shprehur shumë i shqetësuar që nuk ka pasur mundësi ta njohë kundërshtarin dhe më pas të informojë futbollistët e vet për pikat e forta e të dobëta të tij. Siç janë gjasat, dinamovitët do ta njohin Varteksin vetëm në fushën e lojës, sepse është shumë e vështirë për ta siguruar një kasetë filmike.

Kabrero u jep pak frymëmarrje lojtarëve
Pas ndeshjes miqësore me Shkëndijën, dje blutë nuk kanë dalë në stërvitje. Trajneri Ramon Kabrero preferoi t'u jepte një ditë frymëmarrje lojtarëve, duke parë se gjatë gjithë 11 ditëve të kaluara, skuadra ka marrë shumë ngarkesë fizike. Duke filluar që sot, vëmendja më shumë do të përqendrohet në aspektin tekniko-taktik, ku do të mësohet më shumë në lidhje me formacionin e mundshëm anti-Varteks. Janë të shumta dilemat për sa i takon futbollistëve që do të zbresin në fushë, duke parë se afrikanët janë mbrapa në përgatitje.

[Qerim]

Varteksi eliminoi edhe inter turku-Finlande, pra ishte nje ekip i forte.

Mendoj se Dinamo nuk na turperoi kesaj rradhe ashtu sic ka bere heret e tjera.

[Qerim]

Trajneri kroat i bluve shpreson të qëndrojë sa më gjatë në skuadër &nbsp06-08-2005
Bonaçiç: S'do të kem fatin e paraardhësve
Aurel CELIBASHI


Trajneri i Dinamos, Luka Bonaçiç, është i bindur se do të qëndrojë për shumë kohë në drejtimin e skuadrës. Pasi ka mësuar se blutë sezonin e kaluar ndërruan tre trajnerë (Sejdini-Paskuli-Canaj), është habitur, sepse, sipas tij, vetëm kështu një ekip nuk mund të shkojë përpara. Sapo ka shkelur në kryeqytet dhe ka marrë në duar çelësat e Dinamos, kroati menjëherë ka filluar punën me "dorë të hekurt", duke seleksionuar pjesën më të madhe të lojtarëve.
Tashmë në dispozicionin e tij kanë mbetur 13 futbollistë, ndërkohë që në ditët në vazhdim pritet që numri i tyre të shtohet.
Për "Sportin shqiptar", njëshi i stolit dinamovit bën të ditur se nuk do të ketë fatin e paraardhësve të tij, pasi gëzon mbështetjen maksimale të presidentit Sulaj.
"Jam habitur vërtet kur më thanë se në sezonin e kaluar skuadra ndërroi tre trajnerë. Është vërtet një masakër për futbollistët ndërrimi i shpeshtë i trajnerëve, pasi dihet që secili ka metodën e tij të punës dhe njëkohësisht lojtarët e preferuar. Mendoj se kjo ka qenë arsyeja kryesore pse ekipi nuk arriti të bënte një figurë të mirë në Kupën e Shqipërisë, por edhe të renditej në vendin e parë. Tani që kam ardhur vetë në krye të Dinamos, jam i bindur se s'do të kem fatin e paraardhësve të mi, të cilët qëndruan vetëm nga 3 muaj në skuadër. Presidenti Besnik Sulaj, por edhe drejtuesit e tjerë të klubit, më ka dhënë mbështetje maksimale në punën time, që do të thotë se kanë besim tek unë,"- bën të ditur ish-trajneri i Hajdukut të Splitit dhe Varteksit.
U bënë 21 ditë që Luka Bonaçiç gjendet te blutë dhe duhet theksuar se po ndihet fryma e re që ka futur në ekip. Përveç regjimit dhe një disipline të rreptë, kroati ka marrë përsipër të bëjë edhe seleksionimin e futbollistëve që janë aktualisht, por edhe ata që mbërrijnë. Deri tani, trajneri blu ka larguar 8 futbollistë si të padëshiruar, ndërkohë që pret të shohë të tjerët dhe më pas të vendosë. Ditët e fazës përgatitore në kryeqytet kanë qenë shumë të lodhshme për lojtarët dhe një gjë të tillë e pranon edhe vetë Bonaçiç.
"Po shoh që futbollistët janë shumë të lodhur nga stërvitja që kanë kryer. Jam i kënaqur me punën që kanë zhvilluar deri tani dhe me fillimin e javës tjetër besoj se ngarkesa fizike do të bjerë, ndërkohë që do t'i jepet përparësi anës tekniko-taktike. Të dielën kam planifikuar një tjetër ndeshje miqësore me Besëlidhjen, pasi ky ekip kishte një përgatitje të mirë dhe na vuri disa herë në vështirësi kur u ndeshëm një javë më parë. Shpresoj që deri në fillimin e kampionatit do të zhvillojmë edhe disa ndeshje të tjera, ndërsa jam në pritje të përforcimeve nga Argjentina,"- vazhdon idenë e tij trajneri që kërkon të ndryshojë imazhin e bluve.
Në lidhje me kundërshtarët, Luka Bonaçiç jep edhe opinionet e para, ndonëse nuk ka një njohje të plotë. E vetmja skuadër që kroati mund të flasë me kompetencë është Tirana, sepse bardheblutë i ka ndjekur rregullisht në katër përballjet e tyre për Ligën e Kampionëve. "Tiranën e shoh si kundërshtaren më të vështirë. E kam parë se si luajti ndaj Goricës dhe CSKA-s dhe mund të them se në gjirin e saj ka disa kualitete që bëjnë diferencën. Megjithatë, nga informacionet që kam, janë përforcuar ndjeshëm Partizani, Elbasani dhe Vllaznia, që do të thotë se lufta për titullin kampion do të vendoset në javën e fundit të kampionatit."


Dede: Faleminderit Dinamo, do qëndroj në Elbasan
"Falënderoj presidentin Sulaj për ofertën që më bëri, por do të qëndroj në Elbasan, sepse në këtë qytet ndihem shumë mirë. Jam shumë i kënaqur që një ekip me tradita si Dinamo interesohet për mua, por tani është shumë vonë dhe unë kam pranuar kushtet e drejtuesve të Elbasanit, të cilët pothuajse janë njëlloj me ato të bluve. Edhe një herë tjetër më bëhet qejfi që jam vënë në shënjestër të disa skuadrave, çka do të thotë se më vlerësojnë, ndërkohë që unë tashmë e kam bërë zgjedhjen e time, që është Elbasani,"- i tha dje gazetës mbrojtësi "i hekurt" Nevil Dede.


Zëvendësi i kroatit, përgatitës atletik
Pas largimit të Sokol Metës, trajneri Luka Bonaçiç ka punuar i vetëm në stërvitje. Nga burime brenda skuadrës mësohet se kroati është në kërkim të një përgatitësi atletik, i cili nuk përjashtohet të vijë nga jashtë. Drejtuesit blu janë vënë në kërkim të një përgatitësi atletik dhe është e sigurt që nuk do të kthehet më italiani Stefano Neri, i cili punoi për 10 muaj te blutë dhe më pas u shkarkua për eliminimin nga Kupa Intertoto.



Marinjo-Eskudero, ata që pritet të rikthehen
Për drejtuesit, por edhe për gjithë tifozët blu mund të bëhet realitet rikthimi në ekip i peruanit Huan Karlos Marinjos dhe Leandro Eskuderos. Më në fund, drejtori sportiv, Pedro Pablo Paskuli, ka arritur një marrëveshje me ta dhe pritet që sot ose nesër të mbërrijnë në kryeqytet. Mësohet se mesfushori peruan do të vijë së bashku me bashkëshorten dhe fëmijën e tij. Me ardhjen e të dy amerikano-latinëve, merkatoja e bluve mund të quhet përfundimisht e mbyllur.

[Qerim]

Mesfushori i sapolarguar nga Tirana ka pranuar të rivishet blu

Dinamo i hap sërish derën Julian Ahmatajt

A.CELIBASHI

Dinamo i hap sërish derën Julian Ahmatajt, të sapolarguarit nga radhët e Tiranës me motivacionin për thyerje të rregullores së klubit. Edhe pse i "preu në besë" dy muaj më parë, kur firmosi për bardheblutë, drejtuesit blu vazhdojnë t'i kërkojnë sërish shërbimet e Ahmatajt dhe gjithë ditën e djeshme kanë pasur kontakte telefonike me të. Nga ajo që mësohet nga burime brenda skuadrës, presidenti Besnik Sulaj i ka propozuar elbasanasit të njëjtën kontratë, të cilën e kishin diskutuar që përpara ndeshjeve në Kupën Intertoto. Tashmë pritet vetëm përgjigjja e Julian Ahmatajt, i cili pasi të tërheqë kartonin nga klubi "Tirana", do të firmosë menjëherë kontratën dyvjeçare me blutë kryeqytetas. Me ardhjen e 27-vjeçarit në skuadër, do të rritej shumë konkurrenca për një fanellë titullari në krahun e majtë të mbrojtjes dinamovite, pasi për momentin aty aktivizohen Kone', Alikaj dhe Ballço, pa harruar që nesër pritet të mbërrijë edhe argjentinasi Leandro Eskudero. Gjithsesi, do të jetë trajneri Luka Bonaçiç ai që do të vendosë se kush do të luaj, ndërkohë që këtë herë është e sigurt se ai do të kthehet të luajë me Dinamon, skuadër me të cilën ka fituar titullin e parë kampion në sezonin 2001-2002. Më parë, Ahmataj është aktivizuar edhe në radhët e Bylisit, Teutës, Partizanit dhe Elbasanit.


Bisaku-Vinçetiç, mbërrijnë të besuarit e kroatit
Në stërvitjen e djeshme të bluve është vënë re prania e dy futbollistëve të rinj, të cilët janë vënë menjëherë nën urdhrat e trajnerit Bonaçiç. Bëhet fjalë për shqiptarin që jeton prej vitesh në Kroaci, Leonard Bisakun dhe kroatin Goran Vinçetiç, të cilët kanë luajtur më parë me Hajdukun e Splitit, aty ku janë njohur edhe me njëshin e stolit blu. Bisaku është një mesfushor qëndre, ndërkohë që Vinçetiç luan si mbrojtës krahu dhe mendohet se do të jenë dy përforcime të rëndësishme për Dinamon gjatë kësaj merkatoje vere. Pasi të kryejnë disa ditë stërvitje, të dy futbollistët pritet të nënshkruajnë kontratat e reja me presidentin Sulaj, sepse nuk është e nevojshme që ata të provohen nga trajneri Luka Bonaçiç.

[GeNi_25]

Kete vit mendoj (jo vetem une por edhe shumica e dinamoviteve) se Dinamoja ka per ta fituar kete kampionat. Marinjo, Eskudero, Ahmataj apo edhe nja dy kroat (mendohet se Bonaçiç ka ndermend te testoj edhe dy futbollist kroat keto dite) qe mendohet te vijne keto dite jane nje perforecim shume i mire per Dinamon.(po te krahasohen me blerjet qe ekipet e tjera te superliges kane bere kete vere) Nuk na mbetet gje tjeter veçse ti urojme suksese.

[GeNi_25]

Besa e Kavajes e tregoi edhe njehere qe nuk i ka marre kot barazimin Tiranes, fitoren Shkodres dhe Partizanit.

Dinamo edhe pse luajti nje loje te bukur nuk arriti te mberthente 3 pikshin.