"Cheetos Pizza"- patatina kancerogjene në tregun shqiptar

[Xhuxhumaku]

Lajmi i ores 11:00 PM



arkiv
TIRANE (30 Maj) - Mediat greke dhe ato bullgare kane denoncuar tregtimin e patatinave me substanca kancerogjene ne Shqiperi dhe ne disa shtete te tjera te rajonit. Keshtu kompania greke Tasty Foods, ka hedhur ne treg patatinat "Cheetos Pizza", te cilat permbajne substancen ngjyruese kancerogjene "para red" substance e ndaluar nga Bashkimi Europian qe ne vitin 1995, substance e cila perdoret edhe per te printuar. Patatina te kesaj kompanie gjenden fare lehte ne tregun shqiptar duke qene se ato importohen nga Greqia . Gjithnje sipas mediave greke dhe bullgare deri tani keto patatina te ndaluara nga Bashkimi Europian jane shitur ne Shqiperi, Greqi, Bullgari, Bosnje e Hercegovine. em/em (/BalkanWeb)

[Xhuxhumaku]

Mediat greke japin alarmin për “Cheetos Pizza”: Kanë përbërës me rrezik të lartë kancerogjen

Ushqime kancerogjene në Shqipëri

Produktet e “Tasty Food”, janë ndaluar në vendet e BE-së. Ato janë shpërndarë në Shqipëri, Bullgari e Bosnje

Florian Papadhimitri

TIRANË- Tregu shqiptar mund të jetë “pushtuar” nga ushqime me rrezik të lartë kancerogjen dhe konsumatorët, sidomos fëmijët, janë më të rrezikuarit nga këto ushqime. Alarmin për ushqimet kancerogjene dhe me përbërës të lartë intoksikues e kanë dhënë gjatë dy ditëve të fundit pothuajse të gjitha mediat greke, të cilat paralajmërojnë kunsumatorët që të mos konsumojnë produktin “Cheetos Pizza”, të prodhuar nga kompania “Tasty Food”. Të dhënat alarmante janë publikuar në mediat greke, pas disa kontrolleve që kanë bërë institucionet e specializuara në disa fabrika të Greqisë, ku, pas rezultateve të analizave, ndaj “Tasty Food” është hapur çështje penale nga organet e drejtësisë greke. Kështu, përveç të dhënave për rrezikun e ushqimit, mediat greke kanë bërë të ditur se tregu kryesor i kësaj kompanie dhe i produktit “Cheetos Pizza”, janë Shqipëria, Bosnje-Hercegovina dhe Bullgaria, ku ky produkt ka hyrë në masë të madhe dhe është i konsumueshëm prej disa kohësh. Një ndër gazetat e përditshme më të mëdha të Geqisë “Kathimerini”, ka paralëmruar konsumatorët me titullin “Mos hani e mos fshini”, pasi, përveç këtij ushqimi, ka pasur denoncim dhe për një kompani që prodhonte pajisje elektroshtëpiake, të cilat vinin në rrezik jetën e njerëzve, pasi shkarkonin energji elektrike. Në mediat shqiptare, së pari, lajmi është publikuar nga televizioni “A1”, televizion i cili citonte dhe media të tjera të vendeve ku këto produkte janë shpërndarë.
Alarmi
Të dielën që lamë pas, të gjithë konsumatorët grekë ishin njoftuar nga mediat për rrezikun që u kanosej atyre nga konsumimi i “Cheetos Pizza”, dhe i disa produkteve të tjera të kompanisë “Tasty Food”. Sipas analizave të Ministrisë së Kujdesit dhe Shëndetit, në produktin “Cheetos Pizza” është gjetur një sasi e madhe e përbërësit me aftësi ngjyruese “Para Red”, e cila mund të shkaktojë sëmundje kancerogjene dhe vdekje të personave që e konsumojnë. Sipas së përditshmes “Kathimerini”, alarmi, së pari, ka ardhur nga Holanda, ku “Tasty Food” kishte hedhur në treg dy produkte të tjera të saj. Pas rastve të Holandës, Ministria greke për Kujdesin dhe Shëndetin dhe Komisioni për Mbrojtjen e Konsumatorit dhe Shëndëtit në KE kanë ndaluar në mënyrë kategorike konsumimin e këtyre produkteve, duke cilësuar si ushqim me rrezikshmëri shumë të lartë “Cheetos Pizza”. Mediat greke theksojnë se përbërësi ngjyrues “Para Red” dhe “Cheetos Pizza” janë kategorikisht të ndaluara për të hyrë në tregjet e vendeve të Bashkimit Evropian. Përsa i përket rastit të Holandës, fabrika greke ka eksportuar në këtë shtet rreth 1 mijë e 500 kilogramë nga dy produkte të tjera, të cilat kanë paraqitur rrezik të lartë për konsumatorët.
Shqipëri
I pyetur mbrëmë nga “Shekulli”, drejtori i Kontrollit të Ushqimit në Ministrinë e Bujqësisë dhe Ushqimit, Nazri Haxhia, është shprehur se në vendin tonë nuk ka pasur ushqime të kësaj marke të bllokuara. Drejtori Haxhia ka bërë të ditur mbrëmë se në çdo pikë doganore ka përfaqësues të tri inspektoriateve të ndryshme, të cilët kontrollojnë dhe bëjnë analiza të të gjitha ushqimeve që hyjnë në vend. “Ende nuk ka pasur raste të ushqimeve me përmbajtje kancerogjene apo me ndonjë rrezik tjetër. Të gjitha mallrat zhdoganohen, mbyllen në magazina dhe dalin prej aty vetëm pasi të jepet leje nga analizat që bëjnë inspektorët e higjienës, veterinarë dhe ata të ushqimit”, - ka thënë mbrëmë Nazri Haxhia. Sipas drejtorit të Kontrollit të Ushqimit, kontrolle, përveçse në pikat doganore, bëhen rregullisht dhe ne tregjet e ndryshme, ku mallrat, të cilat nuk përmbushin standardet, sekuestrohen dhe më pas asgjësohen, por, thotë ai, “nuk kemi pasur raste të mallrave me rrezik kancerogjen”. Mallrat që vijnë nga importi në përgjithësi janë të paketuara dhe kontrollohen më së shumti për afatet e skadencës.

Përbërësi “Para Red ”
0,15 miligramë mund të shkaktojnë vdekjen e një personi të rritur.
0,0357 miligramë mund të shkaktojë vdekjen e një personi të mitur.




31/05/2005
KATEGORIA: Ekonomi

Marre nga Shekulli

[Xhuxhumaku]

VENDIMI/ Ministria e Bujqësisë bllokon sasitë në Gjirokastër, Tiranë dhe Korçë. Do të kryhen analizat

Bllokohen në magazina patatinat “Cheetos”

Laura Dashi

TIRANË- Ministria e Bujqësisë dhe e Ushqimit ka bllokuar të gjitha patatinat “Cheetos Pizza”, të cilat gjendeshin në magazinat e Gjirokastrës, Tiranës dhe Korçës. Zyrtarë të Ministrisë së Bujqësisë kanë theksuar se ende nuk dihet nëse këto patatina përmbajnë Para Red (substancë kancerogjene). Sipas Ministrisë së Bujqësisë, në këtë institucion nuk ka asnjë lajm zyrtar lidhur me patatinat kancerogjene. Në këto rast njoftimet vijnë nga Brukseli, nga zyrat e ALERT (raportet për ushqimin), ndërkohë që në Ministrinë e Bujqësisë nuk ka ardhur asnjë njoftim i tillë.

Kontrolli

Të gjitha patatinat “Cheetos Pizza”, të bllokuara në Shqipëri, do t’i nënshtrohen një kontrolli nga Inspektoriati i Higjenës. Drejtori i Inspektoriatit të Lartë të Kontrollit të Ushqimeve, Nazri Haxhia, ka theksuar se patatinat “Cheetos Pizza”, të importuara nga Greqia, do t’i nënshtrohen një kontrolli. Ndërkohë, analizat që do të nxjerrin përfundimin nëse këto patatina janë me lëndë kancerogjene, zgjasin më shumë se një javë. Burime zyrtare pranë Ministrisë së Bujqësisë dhe Ushqimit kanë theksuar se në momentin që këto produkte janë importuar në Shqipëri, i janë nënshtruar një kontrolli dhe kanë rezultuar pa probleme. Patatinat “Cheetos Pizza” i prodhon kompania “Pepsi Co” dhe në Shqipëri i importon firma “Elka”.

Problematika

“Defekti” i këtij ushqimi qëndron në një përbërës kancerogjen, i cili përdoret për ngjyrim dhe që quhet "Para Red". Ky përbërës është në kundërshtim me standardet e Komunitetit Evropian për ushqimet dhe nuk duhet përdorur. Sipas mediave greke dhe bullgare, kompania që prodhon “Cheetos” ka futur në të produktin “Para Red”, i cili dëmton ADN-në e njeriut. Megjithatë, duket se në kompaninë që e prodhon këtë lloj ushqimi nuk ushtrohet aq shumë kontroll. Qindra ose mijëra fëmijë shqiptarë blejnë thuajse çdo ditë qese me ushqime të tilla. Çdo qese ka nga një lodër, e cila ka ndikuar në rritjen e kërkesës për to në tregun shqiptar. Ndërkohë, tregjet shqiptare, si dhe ato të disa vendeve të Ballkanit, janë të mbushura me këtë lloj ushqimi dhe lodra njëkohësisht për fëmijë, i cila është mjaft i rrezikshëm për jetën e tyre.

ALARMI

Lajmi për futjen në Shqipëri të këtyre lloj patatinash është publikuar dy ditë më parë nga “Sofia News”, duke njoftuar se shkaku është një ngjyrues kancerogjen, përdorimi i të cilit është i ndaluar nga Komuniteti Evropian. Ky prodhim është konstatuar në tregun bullgar dhe më vonë është mesuar se ai eksportohej nga Greqia edhe në Shqipëri, Bosnjë-Hercegovinë, si dhe në vendin ku prodhohet. Gjithashtu, sipas të njëjtit burim lajmi, të cituar dhe nga mediat greke, ky lloj ushqim i paketuar i quajtur "Cheetos Pizza" prodhohet nga shoqëria "Tasty Foods Company" dhe eksportohet prej shtetit helen nga firma të ndryshme, të cilat e fusin atë në shtetet e lartpërmendura të Ballkanit pa asnjë lloj problemi. Pas publikimit në mediat bullgare të lajmit, menjëherë çështjen e kanë ndjekur edhe mediat greke, vendi ku ndodhet edhe kompania, e cila prodhon patatinat “Cheetos Pizza”. Duket se mediat e Ballkanit kanë arritur në të njëjtin përfundim se për këto patatinat është dhënë tashmë alarmi nga Komuniteti Evropian për lëndën kancerogjene që përmban.

REAGIMI/ Kompania prodhuese konfirmon se patatinat me “Para Red” janë ndaluar

“Patatinat e rrezikshme nuk kanë hyrë në Shqipëri”

TIRANË- Kompania “Tasty”, e cila prodhon patatinat, ka mohuar faktin se “Cheetos Pizza” kanë përmbajtje kancerogjene. Sipas njoftimit zyrtar të shoqërisë, një ngjyrorës ushqimor i pamiratuar nga Bashkimi Europian, i quajtur “Para Red”, është vënë re në erëzat që kompania ka blerë dhe përdorur për prodhimin e një sasie shumë të vogël të “Cheetos Pizza”. Autoritetet lokale dhe europiane të garantimit të cilësisë së ushqimeve konfirmojnë se niveli shumë i ulët i “Para Red” (4 në 1 miliard, ndërkohë që shumë shtete europiane pranojnë nivele nga 100 deri në 1000 për 1 miliard) i gjendur në produkt nuk është i rrezikshëm për shëndetin e konsumatorëve. “Megjithëse ky përbërës nuk përbën rrezik për konsumatorët, kompania “Tasty”, në bashkëpunim me autoritetet e garantimit të cilësisë së ushqimeve në Greqi, ka ndaluar përdorimin e saj dhe ka tërhequr nga qarkullimi këtë përbërës, i cili gjendej në treg me sasi shumë të vogla. Ky veprim u ndërmor nga kompania për të mos krijuar asnjë shqetësim tek konsumatorët. Përbërësi i lartpërmendur është përdoruar vetëm në produktin “Cheetos Pizza”, me datë skadence nga 23.06.2005 deri më 14.07.2005. Produktet me këto data skadimi nuk kanë hyrë në tregun shqiptar. “Tasty”, i pranishëm në Shqipëri që prej 8 vjetësh, ka fituar besimin e konsumatorëve. Duke patur si qëllim kryesor cilësinë e lartë dhe mbrojtjen e konsumatorëve, ka prodhuar dhe vazhdon të prodhojë produkte cilësore që kërkohen dhe pëlqehen nga konsumatori shqiptar”,- theksohet në njoftimin e kompanisë “Tasty”.

Marre nga "Dita Informacion"