Deklarata pas ndeshjes AC Milan - Liverpool

[Davius]

FA: Të pamundurën për Liverpulin

Federata Angleze e Futbollit (FA) vazhdon "luftën" e saj me UEFA-n për t'i siguruar Liverpulit një vend në edicionin e ardhshëm të Ligës së Kampioneve. Drejtori ekzekutiv, Brajan Baruik, deklaroi: "Do të mundohemi deri në fund t'i japim mundësi Liverpulit që ta mbrojë trofeun e fituar." Liverpuli fitoi ndaj Milanit, pas gjuajtjeve të 11-metërshave në finalen e Stambollit, por e përfundoi kampionatin në vend të pestë të renditjes. Të enjten, UEFA deklaroi se nuk do t'i ndryshonte rregullat për të lejuar Liverpulin të merrte pjesë në edicionin e ardhshëm të Championsit, por federata angleze shpreson akoma:

"Do të vazhdojmë të bisedojmë me UEFA-n. I kemi dërguar një kërkesë UEFA-s, para se Liverpuli të fitonte në finale, dhe do të vazhdojmë të insistojmë për një ndryshim të rregullave. Situata për UEFA-n është shumë e çuditshme, pasi Liga e Kampioneve vitin tjetër nuk do të ketë kampionin e saj. Vetë logjika e kësaj fjalie tregon se çfarë vendimi duhet marrë", - përfundoi Baruik. Ky rast nuk është i ri në Champions, pasi në 2001-shin, Reali fitoi kupën, por u rendit i pesti në kampionat. Në atë rast, federata spanjolle vendosi të linte jashtë Saragozën e vendit të katërt, për të lejuar madrilenët të mbronin trofeun në sezonin pasardhës. "Ky vendim i takon vetëm federatës angleze. Rregullat janë rregulla dhe duhen zbatuar," - deklaroi zëdhënësi i UEFA-s.


Bekenbauer: Liverpuli e meriton Championsin
Rregulli i UEFA-s nuk lejon që një vend të përfaqësohet në Champions, me më shumë se katër ekipe. Federata Angleze e Futbollit ka vendosur që katër ekipet e kualifikuara janë Çelsi, Arsenali Mançesteri dhe Evertoni. Liverpuli, i cili u shpall kampion i këtij edicioni, nuk do ta ketë të drejtën për të mbrojtur trofeun e fituar. Sipas Franc Bekenbauerit, presidentit të komitetit organizativ të Botërorit 2006, duke qenë kampion, Liverpuli ka të drejtë të marrë pjesë në edicionin e ardhshëm: "Ekipi anglez ka të drejtë të ketë mundësinë ta mbrojë trofeun e fituar."

[Davius]

Ouen: Nuk jam i penduar për largimin

Sulmuesi i ekipit të Realit të Madridit, Majkëll Ouen, nuk pendohet për largimin e tij nga "Anfield Road", edhe pasi Liverpuli u shpall kampion Europe. Anglezi u shpreh i lumtur për suksesin e ish-ekipit të tij. "Jam i lumtur që shokët e mi fituan Ligën e Kampioneve, por jam po aq i lumtur që vendosa të luaj te Reali i Madridit. Nga një pikëpamje neutrale, ndeshja ishte e mrekullueshme. Tre gola në gjashtë minuta ishin të pabesueshëm. Pasi shënoi golin e parë, Liverpuli filloi të besonte vërtet për përmbysjen e rezultatit," - deklaroi Oueni.

Sulmuesi 25-vjeçar kaloi te Reali, verën e kaluar, për shumën e 15 milionë dollarëve dhe në sezonin e tij të parë ka shënuar 12 gola në kampionat, edhe pse shumicën e ndeshjeve i ka filluar nga stoli. Kalimi i Ouenit te Reali nuk solli suksesin e pritur nga anglezi. "Merengesët" u eliminuan në 1/16 të Ligës së Kampioneve nga ekipi i Juventusit dhe nuk mundën të shkonin më shumë se vendi i dytë në kampionat. "Kam arritur të fitoj shumë gjëra te Liverpuli. Fitova Kupën UEFA, Superkupën Europiane, Kupën e Ligës dhe Kupën e Anglisë. Natyrisht, Liga e Kampioneve është shumë më e rëndësishme dhe unë do të doja ta fitoja me ekipin e Realit. Ndihem mirë këtu dhe dëshiroj të fitoj gjithçka me këtë klub," - përfundoi Oueni.

[Davius]

Traore: Milani po festonte në pushim!

Asnjë nuk ndihet. Kapiteni Xherrard dhe futbollistët e tjerë të Liverpulit i bëjnë lëvdata fitores së tyre ndaj një Milani dhe mjeshtrisë së Benitezit për të karikuar një skuadër që u fut në dhomat e zhveshjes me një disavantazh 0-3. Por e vërteta duket se është një tjetër..., sipas versionit të mbrojtësit Xhimi Traore. Forca dhe euforia e Liverpulit në pjesën e dytë, sipas mbrojtësit francez, është shkaktuar pikërisht nga Milani.

Ai tregon: "Kur u futëm në dhomat e zhveshjes, dëgjuam futbollistët e Milanit që kishin filluar të festonin fitimin e Championsit. Festonin sikur gjithçka të kishte marrë fund, sikur të ishin kampionët e Europës. Dhe kjo na dha nerv, ngrintë, kurajo dhe forcë për të luajtur në pjesën e dytë. Dëshira për hakmarrje na dha mundësinë të barazonim dhe të fitonim me penallti." Traore përjetoi një makth të vërtetë në pjesën e parë, kur shkaktoi faullin ndaj Pirlos. Faull nga i cili Maldini shënoi golin e parë për Milanin, vetëm pas 45 sekondave lojë. Mbrojtësi vazhdon rrëfimin e tij:

Ishte shumë e vështirë të dëgjoje fjalët e trajnerit në pushim. Ai po përpiqej të na shpjegonte se çfarë duhej të bënim për të marrë kontrollin e lojës dhe për të gjetur golin. Sinqerisht nuk besoja se do t'ia dilnim mbanë. Më duhet të pranoj që Milani na ndihmoi me festën e parakohshme. Pas golit tonë të parë, kuqezinjtë u trembën dhe u shtynë në mbrojtje. Aktivizimi i Hamanit ishte vendimtar, mesfusha jonë fitoi grintën dhe eksperiencën e tij. Benitezi më tha: shënoni në dhjetë minutat e para të pjesës së dytë dhe Milani do të shokohet." Më pas, sipas Traores: "Kontrolli i barazimit u bë i mundur falë Karragerit dhe Xherrardit, të cilët drejtuan me mjeshtri repartet e tyre. Derisa erdhi fundi i ndeshjes, ku bëri gjithçka Dudek. Me pritjen e tij ndaj Shevës dhe me pritjen e penalltisë së Pirlos na dha kupën." Traore sezonin e ardhshëm shpreson të qëndrojë te Liverpuli, pavarësisht interesimit të Evertonit. Trajneri Benitez, i pyetyr në lidhje me deklaratat e Traores, u shpreh se do ta kishte të vështirë t'i konfirmonte: "U futa i fundit në dhomat zhveshjes, e bëj gjithmonë diçka të tillë dhe, të jem i sinqertë, nuk pashë njeri të festonte.

Por në dialogjet e futbollistëve të Milanin, në pritje për të filluar ndeshjen, pashë një lloj vetëkënaqësie. Edhe unë jam latin, por nuk e di nëse do të kisha festuar pas një pjese të parë në avantazh 3-0. Gjithsesi, jam i lumtur për kupën e fituar dhe për entuziazmin që ka përfshirë skuadrën time. Vitin e ardhshëm na duhet ende punë për të arritur Çelsin, Arsenalin dhe Mançesterin." Në fund, trajneri i Liverpulit thotë për krahasimet që i janë bërë kësaj skuadre me Porton e Mourinjos, apo Greqinë e Rehagelit: "Nuk e di nëse fituam duke ndjekur shembullin e këtyre dy skuadrave, di vetëm që ashtu si ne, edhe ata e merituan suksesin. Milani? Eshtë një nga skuadrat më të mëdha në botë, por në rast se më vjen një ofertë e tyre, më duhet ta refuzoj, sepse në Liverpul ndihem njeriu më i lumtur në botë. Pas largimit nga Valencia e kisha të vështirë të mendoja se do të gjeja gjithë këtë entuziazëm."

[Davius]

E vërteta që nuk na intereson


Nga Gabriele MARKOTI

1. E dashur Itali!

Mjaft shkrove e the se sulmet e "Heiselit", që sollën shembjen e murit, janë fryt i "çmendurisë vrasëse" dhe mbi të gjitha e motivuar nga huliganët (meqë ra fjala, mjaft e përdorëm termin "huliganë" për të shquar tifozët anglezë në trasfertë: "huliganët" janë të dhunshmit që e përdorin futbollin si një justifikim për dhunosjen, nuk është një term përgjithësues për tifozët anglezë). Motivimi ishte i madh dhe çdokush do të kishte marrë dylbitë për të parë se çfarë kishte ndodhur herën e fundit që një skuadër italiane ishte ndeshur me Liverpulin, përveç Juventusit (e ndeshur disa muaj më parë në Ligën e Kampionëve) duhet ta dijë.
Flasim për finalen e Kupës së Kampionëve një vit më parë: Roma-Liverpul, e fituar nga të kuqtë me penallti si dhe finalja tjetër e mëpasme, që të gjithë duhet ta harrojnë. Në atë rast, tifozët e Liverpulit u sulmuan, u rrahën dhe u therën nga rrugaçë të kamufluar si tifozë të Romës (apo mbase ishin tifozë të vërtetë, nuk do ta mësojmë kurrë). Dhe, akoma më e rëndë, shumë nga këto ngjarje u zhvilluan nën hundën e policisë, e cila ishte më shumë e shqetësuar për t'u hequr fishekzjarret, orët dhe monedhat (të gjitha objekte-dihet- të rrezikshme) anglezëve në hyrjen e stadiumit (për të mos i kthyer më mëpas). Jashtë stadiumit ishte tendosur një treg i vërtetë me bajoneta dhe thika (shumë thika). Kjo edhe pse shoferët e autobuzëve e kishin ndarë mendjen për të ikur nëpër shtëpi, duke i lënë nëpër rrugë anglezët.
Vini re mirë që, duke parë kostot e asaj trasferte dhe të faktit se Liverpuli në ato vite ishte një prej qyteteve më të varfra e të dëshpëruara të Europës (jo se ka ndryshuar shumë nga ky këndvështrim), udhëtimin e kishin ndërmarrë kryesisht familjet, por ndryshimi me 180 gradë ishte se 12 muaj më pas do të vinte Brukseli (udhëtim më i thjeshtë dhe më i lirë edhe për huliganët). Këta varfanjakë u shënjestruan pa mëshirë dhe për ta rritur edhe ca faturën e ngjarjeve - sipas dëshmitarëve - ishte ardhja e papritur e disa ultrasve lacialë, të mbërritur në "Olimpiko" për t'ua nxirë jetën verdhekuqve. Por më e keqja do të vinte më pas. Tifozët e Liverpulit dhe disa banda me motorë, rrugaçë të vërtetë, i dhanë jetë një gjuetie të vërtetë alla angleze, me dhjetëra të therur, midis të cilëve edhe një djalosh njëmbëdhjetë vjeçar, që mori tetëdhjetë qepje në fytyrë. Ose mbase nga fakti që disa pronarë hotelesh hapën dyert dhe hodhën nëpër rrugë valixhet e anglezëve, duke i braktisur në fatin e tyre. Ose mbase nga fakti që rreth 200 tifozë të Liverpulit u detyruan të strehohen në konsullatën britanike, vendi i vetëm që mund t'i merrte nën mbrojtje.
E gjithë kjo la për trashëgim një ndjenjë të rëndë hakmarrjeje ndaj italianëve. Një hakmarrje - e punësuar, pa asnjë dyshim, edhe nga ekzagjerimet që, në këto raste, janë një ritual - që u manifestua kundër juventinëve në "Heisel". T'i dënojmë me të drejtë tifozët anglezë në "Heisel" (dhe bashkë me ta autoritetet belge, UEFA-n si dhe pjesën e mbeturve të legenave). Por të mos ia fusim gjithnjë kot. Motivet ishin.

2. E dashur Angli!

Mjaft e justifikove veten se tifozët e Liverpulit ishin provokuar nga "huliganët" italianë në sektorin Z. Ultrasit e Juves (meqë ra fjala, njerëz të mirë, ashtu siç e pamë në Anfild marsin e shkuar) ishin në një sketor tjetër. Dhe mjaft the se ishte vetëm një tentativë për të shuar një zjarr dhe tifozët italianë të frikësuar ia mbathën dhe u ra muri në kokë. Tamam, pikërisht kështu. Ju vazhdoni të flisni për një komunizëm të fshehur, prej së cilës mbërriti një mbathja-mbathja e përgjithshme e më pas një mur, që papritur ra në mënyrë të pashpjegueshme mbi kokën e italianëve, duke vrarë 39 veta. Lexoni për të besuar. Ja çfarë shkruante ueb sajti zyrtar i Liverpulit: www.liverpoolfc.tv/lfc_story/heysel/.
"Për ju, sjellja e djemve tuaj solli vetëm diçka të vogël, një kontribut të rastësishëm në tragjedi. Për ju, Heiseli është si një Cunami, një fakt tragjik, por i pashpjegueshëm. Të gjitha broçkulla. Një pjese prej jush e ka kuptuar atë që ka ndodhur dhe ka kërkuar falje. Një pjesë prej jush vazhdon të bëjë sikur nuk ka ndodhur asgjë. E ndërmjet këtyre, fatkeqësisht, je dhe ti, i dashur Liverpul Futboll Klub, së bashku me pesë kupat e tua të Champions-it".

[Davius]

UEFA, drejt zgjidhjes së dilemës "Liverpul"

Organizata Europiane e Futbollit (UEFA) kërkon të gjejë një zgjidhje pozitive për Liverpulin, i cili kërkon të drejtën për të luajtur në Championsin e ardhshëm. Elita e klubeve europiane ka ndërhyrë për këtë problem dhe presidenti i UEFA-s, Lenart Johanson, tha: "Do të mundohemi të gjejmë një zgjidhje pozitive, që të jenë të gjithë të lumtur."