AC Milan vs Liverpool - (Foto & Lajme)

[Davius]

....................

[Davius]

.................,................

[Davius]

..............................,.

[Davius]

Liverpuli fiton Ligën e Kampioneve


Liverpuli është kampion Europe për herë të pestë në historinë e tij. Këtë herë "të kuqtë" kanë fituar në mënyrën më të pabesueshme. Arrin Milanin pas një disavantazhi 0-3 në 45 minutat e para, me tre gola të shpejtë dhe fiton në fund Ligën e Kampioneve, pas 11-metërshave. Një kupë e hedhur në ajër nga Milani që në fundin e pjesës së parë kishte besuar se mund të përsëritej një finale e fituar si ato ndaj Steauas dhe Barcelonës, nga 4-0. Ançeloti ka bërë një zgjidhje të çuditshme përpara fillimit të ndeshjes, por jo në fushë, në stol. Trajneri kuqezi merr me vete Dorrasonë dhe Tomasonin, dhe lë në tribunë Brokin dhe Inzagin.

Nga ana tjetër, Benitezi bazohet sërish te 4-4-1-1, me Kjuellin pas shpinës së Barrosit dhe me Sizenë në stol. 43 sekonda, kaq i kanë mjaftuar Milanit për të shënuar golin e parë. Pirlo ekzekuton një goditje dënimi, duke krosuar për kapitenin Maldini, i cili godet në hyrje të zonës dhe kalon në avantazh kuqezinjtë. Ishte goli që duhej të vendoste fatet e ndeshjes, por nuk ndodh kështu. Milani në pjesën e parë duket se është në ditën e tij më të mirë. Kuqezinjtë ushtrojnë një presing perfekt dhe shpeshherë dhurojnë spektakël. Kaka dhe Sedorf janë të papërmbajtshëm. Në minutën e 14-të, Krespo ka rastin më të mirë për të shënuar, por Luis Garsia shpëton Liverpulin, duke e larguar topin në vijën fatale.

Gjithsesi, në fundin e pjesës së dytë merr kontrollin e lojës Kaka. Në fillim braziliani pason për Shevçenkon, i cili gjen të lirë Krespon dhe Milani shënon golin e dytë. Një minutë nga fundi i pjesës së parë, argjentinasi përsëritet. Pas një pasimi të marrë nga Kaka, ish-sulmuesi i Çelsit kalon portierin Dukek, 3-0. Mbyllet pjesa e parë me bindjen se fituesi është përcaktuar. Në fillim të pjesës së dytë, Liverpuli futet në fushë me një marsh tjetër, edhe pse Milani me Shevçenkon mund të kishte shënuar golin e katërt. Xherrardi godet me kokë dhe e dërgon topin atje ku nuk mund ta kapte Dida, 1-3. Tre minuta më vonë, Smicer godet shkëlqyeshëm nga jashtë zone dhe e ngushton diferencën në 2-3. Milani është në kaos dhe Liverpuli përfiton duke bërë mrekullinë. Në minutën e 14-të të pjesës së dytë, kontakt ndërmjet Gatuzos dhe Xherrardit, Mejuto Gonzales akordon 11-metërsh. Godet Ksabi Alonso, pret Dida, por topi rikthehet te spanjolli, i cili shënon golin e tretë.

E pabesueshmja ka ndodhur, Milan-Liverpul 3-3 në "Ataturk". Deri në fundin e kohës së rregullt është Milani ai që kalon shokun dhe përpiqet të fitojë. Skuadra e Benitezit, pas tri ndërrimeve të bëra nga trajneri spanjoll, thjesht mbrohet në pritje në ndonjë kundërsulmi të rrezikshëm. Tomason dhe Kaka shpërdorojnë dy raste flagrante që do të kishin mbyllur ndeshjen. Braziliani bllokohet nga Dudeku pas një pasimi të Krespos, ndërsa danezi nuk shënon në pozicion të favorshëm, pas një krosimi të Serzhinjos, i sapofutur. Në kohën shtesë, kuqezinjtë e Ançelotit vazhdojnë të jenë në kërkim të golit të barazimit, por mbrojtja e Liverpulit, edhe pse me fat, arrin të shpëtojë. Dhe pikërisht kur mbetej edhe një minutë lojë nga koha shtesë, Shevçenko shpërdoron rastin më të mirë për Milanin.

Ukrainasi devijon me kokë një kros të Pirlos pak metra para Dudekut, por portieri polak bën mrekullinë. Pret goditjen e parë të ukrainasit dhe kur topi rikthehet te Sheva, arrin me pëllëmbën e dorës së majtë të presë goditjen e sulmuesit kuqezi. Një rast i rrallë, i cili dha shenjën e parë që fati në finalen turke do të ishte i gjithi me Liverpulin. Penalltitë ishin shembulli më i mirë i kësaj. Godet i pari për kuqezinjtë Serxhinjo dhe gabon. Nuk fal Haman, ndërkohë që gabimi i Pirlos në penalltinë e dytë të Milanit duket se shënoi përfundimisht fatet e kësaj ndeshjeje. Shënojnë më pas Size dhe Tomason. Dida arrin të presë 11-metërshin e goditur nga Rise, por duket se është shumë vonë. Shënon për kuqezinjtë Kaka, për Liverpulin Smicer, derisa Dudeku pret penalltinë e Shevçenkos dhe Liverpuli mund të fesojë kupën e pestë në historinë e tij.

[Davius]

.....................,............

[Davius]

...............................

[Davius]

Kjo është skuadra e Benitezit...


"Nuk do të ecësh kurrë i vetëm". Ky është titulli i këngës së kënduar për 120 minuta nga tifozët e Liverpulit, të cilët sollën një atmosferë të mrekullueshme në stadiumin "Ataturk" të Stambollit. Shumë pak veta do ta kishin menduar triumfin e djeshëm të "redsave", të cilët arritën të fitonin Ligën e Kampioneve, 20 vjet pas tragjedisë së "Hejselit". Këta ishin lojtarët që luajtën në finalen e ditës së djeshme:
Jerzi Dudek: Numri një i portës së Liverpulit arriti t'i jepte kupën ekipit të tij, pas pritjes së dy penalltive dhe të disa rasteve të pastra për gol për ekipin e Milanit. Polaku ishte në lartësinë e duhur dhe doli fitimtar në duelin me brazilianin Dida.
Stiv Finan: 29-vjeçari i mbrojtjes së "redsave" është një nga zbulimet e këtij viti në Ligën e Kampioneve.

Ndaj Juventusit dhe Çelsit, Finani ka qenë pothuajse i përkryer në çdo drejtim. Lojtari i kombëtares irlandeze, pas një sezoni të vështirë në Premier Ligë, dje ndaj Milanit zhvilloi ndeshjen e jetës.
Xhimi Karrager: Në sezonin e tij të shtatë me ekipin e Liverpulit, këtë vit ai ka arritur të bëhet i pakalueshëm në mbrojtje, duke u afirmuar si një nga mbrojtësit më të mirë në kampionatin anglez. Pas Drogbasë dhe Ibrahimoviçit, mbrëmjen e djeshme arriti ta neutralizonte edhe sulmuesin Andrij Shevçenko.
Sami Hipia: Gjiganti finlandez është "shpirti" i mbrojtjes së ekipit të Liverpulit. Ai është i pakalueshëm në ajër dhe shumë i rrezikshëm në sulm. Finalja e djeshme ndaj Milanit mund të ketë qenë ndeshja e fundit me fanellën e Liverpulit. Gjatë ndeshjes së djeshme ishte një siguri më shumë për trajnerin Benitez.
Xhimi Traore: Mbrojtësi qendror i Liverpulit ka fituar vendin e titullarit, duke u spostuar në të majtën e fushës. 25-vjeçari është shumë i fortë fizikisht dhe këtë e tregoi edhe gjatë ndeshjes së djeshme, ku u gjend nën presion për 120 minuta.

Luis Garsia: Pas golave decizivë ndaj Juventusit dhe ndaj Çelsit, spanjolli është bërë beniamini i ri i tifozerisë së Liverpulit. Ish-mesfushori i Barcelonës ka arritur të ambientohet përsosmërisht me futbollin anglez. Edhe pse në ndeshjen e djeshme nuk arriti të shënonte, ai ishte rreziku kryesor i portës së mbrojtur nga Nelson Dida.
Stiven Xherrard: Kapiteni 25-vjeçar është simboli dhe flamuri i vërtetë i Liverpulit. Ndaj Milanit, ai ishte heroi i ndeshjes. Xherrardi arriti të shënonte golin e parë për Liverpulin dhe 6 minuta më vonë fitoi 11-metërshin, që e çoi rezultatin në 3-3. Taktik dhe elegant, Xherrardi është një nga mesfushorët më të mirë në qarkullim.
Dietmar Haman: Edhe pse ky sezon nuk ishte i shkëlqyer për të, Hamani arriti të zinte një vend në finalen e Stambollit, pas daljes së Finanit. Gjithashtu, Hamani ishte dhe ekzekutuesi i penalltisë së dytë për Liverpulin, duke arritur të mposhtte Didën. Me futjen e tij në fushë, mesfusha e Liverpulit arriti të konsolidohej.

Xhon Arne Rise: Mesfushori i majtë i Liverpulit është një nga lojtarët "merkato" të ekipit anglez. I kërkuar nga shumë klube europiane, Rise është një lojtar shumë i rrezikshëm, sidomos para portës. Në ndeshjen e djeshme ishte një nga kolonat bazë të zbritjeve të rralla të Liverpulit.
Ksabi Alonso: Ish-lojtari i Real Sociedadit shënoi golin e barazimit në finalen e djeshme për ekipin e Liverpulit. Një dëmtim në janar e la jashtë fushe për tre muaj, por dje spanjolli ka arritur të dalë fitimtar ndaj Xhenaro Gatuzos. Cilësitë e tij janë vizioni i lojës dhe saktësia në pasime.
Djibril Size: Sulmuesi francez ishte "karta e fshehur" e trajnerit Rafael Benitez. Shumë i shpejtë në shpërthimet e tij, në minutat e fundit të takimit arriti të krijonte shumë probleme për holandezin Jap Stam. Sezoni i tij i parë në Angli ka qenë i vështirë, për shkak të dëmtimeve, por këtë vit arrin të shpallet kampion Europe me ekipin e Liverpulit.

Herri Kjuell: Fantazisti australian është një nga talentet e ekipit të Liverpulit. Gjatë ndeshjes së djeshme nuk arriti të futej asnjëherë në lojë dhe u zëvendësua nga çeku Smicer. . Që nga koha kur luante me ekipin e Lidsit, Kjuelli vihej në dukje për klasin e tij të pamohueshëm.
Igor Biscan: Kroati ka qenë një nga lojtarët më në formë për ekipin e Liverpulit, në ndeshjet e fundit, por trajneri Benitez nuk e zgjodhi në formacionin titullar të takimit të djeshëm. Edhe pse nuk luajti ndaj Milanit, ai është një nga ideatorët e suksesit të Liverpulit.
Milan Barosh: Ka qenë njeriu më i diskutuar dhe më i shumëpritur, para finales së djeshme. Golashënuesi më i mirë i kampionatit europian të Portugalisë, ndaj Milanit nuk ka arritur të gjejë rrugën e rrjetës. Egoist para portës, Baroshi dallohet për nuhatjen e tij për gol

[Davius]

.................,..............

[Davius]

Benitez: Kisha besim te Liverpuli

Portieri i ekipit të Liverpulit, Jerzi Dudek, deklaroi se ekipi i tij tashmë ishte në Parajsë, pas fitimit të Ligës së Kampioneve. Liverpuli arriti të fitonte me penallti, edhe pse 45 minutat e para i mbylli në disavantazh të tre golave. "Ishte e vështirë të rikuperonim tre golat e disavantazhit, por ne ia dolëm mbanë. Kjo është nata jonë dhe e të gjithë njerëzve që udhëtuan deri këtu për të na mbështetur.

Tashmë ndihemi sikur të ishim në Parajsë," - deklaroi Dudeku. Golat e Stiven Xherrardit, Vladimir Smicerit dhe Ksabi Alonsos, në shtatë minutat e para të pjesës së dytë, i dhanë mundësi Liverpulit të barazonin rezultatin në 3-3. Portieri polak u shpreh se lëvizjet e tij para lojtarëve të Milanit, gjatë gjuajtjes së penalltive, ishin të kopjuara nga një tjetër portier i Liverpulit, Brus Groblar, i cili pati vepruar në të njëjtën mënyrë edhe në finalen e vitit 1984, ndaj ekipit të Romës. "Pas përfundimit të kohës shtesë, Xhimi Karager m'u afrua dhe më tha të ndiqja shembullin e Groblarit, i cili arrinte t'i shpërqendronte kundërshtarët e tij, duke lëvizur shpesh", - përfundoi Dudeku.
Spanjolli Ksabi Alonso, i cili shënoi golin e barazimit për Liverpulit, pas ndeshjes deklaroi:

"E gjithë merita për këtë sukses është e trajnerit Benitez. Ai nuk na lë kurrë të ulim kokat dhe të dorëzohemi. Vazhduam të shpresonim, edhe pse ishim në disavantazh të tre golave." Trajneri Benitez, pas ngritjes së kupës, deklaroi: "Problemi im i tanishëm është që nuk gjej dot fjalët për të përshkruar gëzimin tim. Na u desh të flisnim pas pjesës së parë. Na duhej të ndryshonim diçka në lojën tonë dhe menduam se një gol në minutat e para do të rihapte krejt takimin. Pasi shënuam golin e parë, mund të shihja te lojtarët një vullnet të pabesueshëm. Kisha besim tek ata. Ata besonin se mund t'ia dilnin mbanë dhe ia arritën qëllimit. Ndërsa sulmuesi i ekipit të Milanit, danezi Tomason, tha: "E lamë të na ikte nga duart kjo finale dhe na vjen keq për këtë. Liverpuli luajti mirë në pjesën e dytë dhe ne u shpërqendruam për 10 minuta. Kjo na kushtoi pësimin e tre golave. Secili prej nesh është i dëshpëruar për këtë humbje, pasi e meritonim fitoren."

[Davius]

.....................,...........