Kombëtarja Shqiptare - (Lajme)

[zeus]

Ilion Lika duket se do të jetë i gatshëm për ndeshjen e 4 qershorit, që kombëtarja jonë do të zhvillojë në Tiranë me Gjeorgjinë. Lajmin e ka konfirmuar dje stafi i kombëtares menjëherë pas mbërritjes në Rinas. Kështu, sipas ndihmësit të trajnerit Hans Peter Brigel, Kreshnik Agolli, Ilion Lika i ka të gjitha mundësitë të aktivizohet në takimin e së shtunës. "Gjatë ditëve në Gjermani dhe Poloni ai ka punuar me fizioterapistin Bulinger dhe them se të shtunën do të jetë gati për ndeshjen. Të paktën kështu shpresojmë të gjithë," - ka pohuar dje ndihmësi i Brigelit, Agolli.

---------------------------------------------------------

[zeus]

-----------------------------------------------


Zoti Brigel, keni zhvilluar një ndeshje miqësore me Poloninë dhe keni humbur. A mund të na jepni një mendim për ndeshjen e pardjeshme?

- Për mendimin tim, ishte një ndeshje e mirë e kombëtares sonë, edhe pse nuk ishim në Poloni me të gjithë skuadrën e parë. Që kur e nisën, mund të them se ideja ishte që të vëzhgonim lojtarët e kombëtares, të cilët kanë munguar për arsye dëmtimi, apo edhe ata që nuk kanë luajtur gjatë kësaj kohe. Një pjesë e futbollistëve ishte në gjendje të mirë, ndërsa pjesa tjetër kishte akoma probleme, të cilat u shfaqën në këtë ndeshje miqësore. Për ndeshjen them se jam i kënaqur për nga loja që u zhvillua. Skuadra lëvizi mirë edhe pa top. Mund të them se pas golit e morëm veten dhe ishim shumë superiorë për një kohë të gjatë. Gjithsesi, futbolli kështu e ka, humbet edhe kur nuk e meriton. Mund të them me plot gojën se një barazim do të ishte më i drejtë në ndeshjen e së dielës. Këtë e them duke u bazuar tek ndeshja.

Keni luajtur me një sulmues ndaj Polonisë dhe nuk keni shënuar. A do të përdorni këtë skemë edhe ndaj Gjeorgjisë të shtunën?

- Mendoj se sulmi ka zhvilluar një ndeshje të mirë. Nuk kemi luajtur tamam me një sulmues. Gjithsesi, mund të them se në takimin me Gjeorgjinë do të jemi më agresivë. Do të ndryshojmë shumë dhe do të luajmë me dy sulmues.

Zoti Brigel, të flasim për sulmuesit. Reparti ofensiv i kombëtares prej më shumë se 8?9 muajsh nuk shënon gol...

- Tashmë është kuptuar që ne çalojmë në sulm. Futbollistët tanë nuk shënojnë prej kohësh dhe ky është një problem. Por fakti është se ne si skuadër dhe sulmuesit kanë pasur raste për gol. Por ato nuk janë shfrytëzuar nga vetë sulmuesit. Ne jemi një ekip që ndërtojmë raste për gol. Finalizimi është arma jonë më e dobët, ndryshe nga më parë. Këtë duhet ta shohim te lojtarët, ndonëse duhet të bëjmë të pamundurën që të shënojmë.

Mister, lista prej 23 futbollistësh do të ndryshojë për dy ndeshjet me Gjeorgjinë dhe Danimarkën, apo do të jenë ata lojtarë që keni grumbulluar ditë më parë?

- Nuk ka dyshim që në ndeshjet me Gjeorgjinë dhe Danimarkën do të jenë të njëjtët futbollistë që kam grumbulluar më parë. Ju siguroj që lista nuk të ketë asnjë ndryshim, do të kemi të njëjtin grup. Për këtë të jeni të gjithë të sigurt.

-----------------------------------------------

[BlueBaron]

Kuqezinjtë, nën drejtimin e trajnerit të kombëtares shqiptare, Hans Peter Brigel, më në fund kanë zbritur në tokën shqiptare. Kuqezinjtë kanë udhëtuar nga Berlini me avionin e linjës Berlin?Tiranë. Skuadra është pritur në tokën shqiptare nga punonjësit e federatës sonë. Menjëherë kuqezinjtë i kanë hipur autobusit dhe kanë udhëtuar drejt Durrësit, ku janë akomoduar në hotelin "Adriatik". Sipas programit, kuqezinjtë kanë zhvilluar edhe një stërvitje çlodhëse buzë detit, menjëherë pas udhëtimit të gjatë nga Gjermania. Sipas informacioneve, i gjithë grupi sot në darkë pritet të jetë i plotë. Veç 19 futbollistëve që kanë udhëtuar në Poloni, do të jenë edhe lojtarët e tjerë të kombëtares, të grumbulluar për ndeshjen me Gjeorgjinë dhe Ukrainën. Jupi ka mbërritur që dje paradite, ndërkohë që në darkë pritet të vijnë Tare, Bogdani Cana dhe Beqiri. Sot, stafi i kombëtares ka planifikuar vetëm një stërvitje pasdite, në orën 17.00, në stadiumin "Niko Dovana". Gjithsesi, gjasat janë që stërvitje të zhvillohet edhe paradite. Edhe të mërkurën kuqezinjtë pritet të zhvillojnë stërvitjen e radhës, ndërkohë që të premten trajneri dhe skuadra do të transferohen në Tiranë për stërvitjen e fundit në "Qemal Stafa", para takimit të së shtunës, që kombëtarja jonë do të zhvillojë me dyer të mbyllura me Gjeorgjinë.


P.S. Nuk mund te rrije pa e ndare kete foto me antaret e tjere te forumit ...

[zeus]

---------------------------------------------------

Bogdani-Tare, Tare-Bogdani, sa besoni se kjo mund të funksionojë?

"Po, besoj se e patë se në Turqi u morëm vesh shumë mirë me njëri- tjetrin. Kjo do të thotë se ne vërtetë jemi shumë shtatlartë të dy, por kompletohemi".

Në Turqi, Tare ku krijonte shumë hapësira?

"Më shumë se kaq në Turqi luajtëm pranë njëri-tjetrit dhe kjo ishte gjëja më e mirë. Ky është çelësi i bashkëjetesës së sulmuesve. Nëse pasimet midis tyre janë të sakta, atëherë edhe goli mund të vijë".

Do ta provoni me Gjeorgjinë?

"Kjo nuk varet nga unë, është Brigel ai që vendos se kush duhet të luajë në sulm. Unë di të them vetëm që me Taren në sulm gjendem vërtet mirë".

Me që ra fjala te Brigel, në Verona nuk e kanë më për zemër, që kur ju grumbulloi me Gjeorgjinë?

"Dëgjo, kjo është një çështje ku unë jam plotësisht jashtë loje. Nuk dua të prononcohem, unë varem nga klubi, por përfaqësuesja mbetet gjithnjë përfaqësuese. Nuk mund të bëhen numra, një ftesë nga Brigel nuk refuzohet".

Duket sikur Bogdani dhe Brigel tani merren vesh. Kohë më parë lëshonin replika?

"Tani dua ta harroj atë histori".

Jeni grumbulluar që 17 vjeç në përfaqësuese…?

"Po, por të them të drejtën në tri ndeshjet e fundit e kam ndjerë veten më mirë. Kjo s'ka të bëjë shumë me moshën por me faktin që ky është sezoni im më i mirë. Nuk do të kisha vënë kurrë bast për 17 gola në ekipin e Veronës brenda një sezoni".

Me një Veronë që po provon të shkojë në A?

"Nuk është kaq e lehtë gjithsesi. Të mendosh që në fillim të sezonit kishim si objektiv shpëtimin, tani më duket një mrekulli ajo që kemi bërë. Kemi pasur edhe ne oshilacionet tona, por në fund të fundit pothuaj kurrë nuk na janë ndarë dëmtimet dhe fati i keq".

Nëse Verona nuk shkon në A?

"Do ta provojmë sërish sezonin e ardhshëm".

Me Bogdanin në bord?

"Asgjë nuk është e sigurtë, sepse kurrë nuk dihet se çfarë të ofron e ardhmja. Unë kam pasur disa oferta nga disa klube në Serinë A, por për momentin nuk dua të bëj asnjë emër publik. Të luajmë ndeshjet me përfaqësuesen dhe ndeshjet e fundit me Veronën dhe pastaj do vendosim".



---------------------------------------------------

[zeus]

--------------------------------------------------------------------------

Flet Brigel para heshtjes per shtyp qe fillon sot


Pa spektatorë kundër Gjeorgjisë?

"Është hera e parë që e bëjmë një gjë të tillë dhe mua më vjen keq, pasi futbollistët nuk janë përshtatur ndonjëherë me një situatë të tillë. Duhet të ambientohemi sa më shpejt dhe të dalim në lojën tonë. Psikologjikisht nuk do të jetë e lehtë. Ne zhvilluam një stërvitje pa praninë e tifozëve dhe unë po ju them që nga shkaqet që e bëmë një gjë të tillë ka qenë edhe kjo. Pak lojtarë e kanë bërë një gjë të tillë në të shkuarën dhe ne gjithashtu vetë duhet të përmirësohemi ende shumë psikologjikisht e jo më të luajmë pa tifozë fare".

Cana dhe Lala nuk do të jenë në mesin e fushës. Një rezultat pozitiv mund të arrihet edhe pa ata të dy?

"Ne gjithnjë duhet të mendojmë për dublimin e pozicioneve dhe duhet patjetër që të marrim masa që edhe kur kemi mungesa të rëndësishme t'i zëvendësojmë".

Porta është një problem. Lika nuk është në gjendjen e tij më të mirë?

"Nuk e di se çdo të bëjmë në këtë repart. Vetëm dita e nesërme do të japë një përgjigje përfundimtare. Po, është e vërtetë që kemi një farë problemi në këtë pjesës të fushës, por asgjë nuk është e pariparueshme. Nëse Lika nuk është gati, do të luajë dikush tjetër…".

Mendoni se Hidi mund ta përballlojë psikologjikisht një ndeshje të tillë?

"Ok, edhe Lika ishte një portier i ri, por shumë shpejt fitoi zemrat e të gjithëve. Kjo është çështje ambientimi, unë kam shumë besim tek ky djalë. Në Poloni më pëlqeu, luajti i sigurt dhe ndërhyri mirë në daljet".

Arjan Beqaj ka deklaruar ditë më parë në "Gazetën Shqiptare" se askush nuk i kishte kërkuar sqarime në lidhje me formën e tij fizike. A mund të themi që përfundimisht Beqaj është një çështje?

"Unë e di që ai është i dëmtuar dhe pas operacionit ai prej kohësh nuk ka luajtur. Nga FSHF-ja kam kërkuar kontakt me të, por FSHF më është përgjigjur që prej kohësh nuk luan dhe është i dëmtuar".

Rraklli dhe Bushi në mënyrë të mistershme nuk janë grumbulluar. Mund të jetë kjo lamtumira e fundit për këta dy futbollistë?

"Këtë nuk mund ta them me siguri. Bushi nuk ka luajtur prej javësh për shkak të një dëmtimi që ka pasur. Rraklli dhe Muka i Tiranës për momentin nuk janë në një gjendje të mirë fizike. Ju e patë për shembull Mukën në ndeshjen me Greqinë… Këtu ka një problem të madh, kur unë i fus në fushë këta futbollistë të gjithë thonë se përse e bëra, ndërkohë që kur nuk i grumbulloj më thonë përse nuk e bëra. Nuk besoj se gjithnjë duhet të jap shpjegime për vendimet e mia".

A është gati formacioni që do të ndeshet me Gjeorgjinë?

"Ka gjithnjë pikëpyetje. Jo, mund të them që nuk kam vendosur…".

Murati mund të jetë një alternativë për Canën dhe Lalën në mesfushë?

"Gjendja fizike e Muratit është ende e papërshtatshme. Kështu që për mua është ende larg formacionit. Do të presim deri të shtunën dhe pastaj do të vendosim se ç'do të bëjmë".

Shkëmbi ka luajtur shumë mirë me Poloninë. Mos ndoshta tani Skela nuk është më i pazëvendësueshëm?

"Ai ka luajtur shumë mirë me Poloninë, madje detyrat e mia i zbatoi deri në imtësi. Momentalisht është një alternativë e mirë për Skelën".

Pikëpyetja e madhe e kësaj ndeshje, do të luajmë me 3-5-2 apo 4-4-2?

"Këtë ende nuk e di. Mjaftohem të them që do të luajmë me dy sulmues".

Çfarë do të ndodhë nesër, do të fitojë Shqipëria?

"Ne futemi për ta bërë një gjë të tillë në fushë, prandaj unë them se duhet të luajmë për të fituar".

Nëse nuk merret asnjë pikë në këto dy ndeshje, çdo të ndodhë me vetë trajnerin Brigel?

"Nga ana ime s'do të ketë asnjë vendim largimi, për këtë ju siguroj".



--------------------------------------------------------------------------

[zeus]

------------------------------------------------------

Për Hans Peter Brigelin kjo mund të jetë ndeshja e ndryshimeve të mëdha. Mbi të gjitha në modul. Megjithëse 4-2-31 i aplikuar në Poloni ka rezultuar i pranishëm, trajneri nuk ka ndërmend ta përdorë kundër Gjeorgjisë, madje ai po projekton të braktisë edhe të famshmin 3-5-2, me të cilin ka rreshtuar skuadrën në fushë në të gjitha këto vite. Mungesat e Canës dhe Lalës mund të kushtëzojnë gjithçka dhe gjithashtu edhe pasiguritë në mbrojtje mund të bëjnë që në këtë repart të rreshtohen 4 futbollistë. Lika do të jetë i sigurt në portë, ndërkohë që në mbrojtje, sipas burimeve pranë trajnerit Brigel, mund të luajnë Çipi dhe Osmani në qendër, Aliaj në të majtë dhe Beqiri në të djathtë. Mesfusha sërish mund të përbëhet nga katër futbollistë: në të majtë është Murati i sigurt, ndërkohë që në të djathtë do të luajë Klodian Duro. Në qendër Skela pret partnerin e tij, që sipas të gjitha gjasave mund të jetë Hasi. Sulmi do të përbëhet nga dy futbollistë, ku Tare e Bogdani janë pothuaj të sigurt.

Në rast se Brigel do t'i rikthehet skemës 3-5-2, atëherë gjërat mund të ndryshojnë. Në portë sërish do të jetë Lika, ndërkohë që në mbrojtje mund të rreshtohen në vijë të drejtë Çipi, Aliaj dhe Beqiri. Në mesfushë do të jenë 5 futbollistë dhe Muratit, Skelës, Hasit dhe Duros mund t'u shtohet ose Jupi ose Shkëmbi. Në sulm Tare e Bogdani do të jenë në balotazh për një vend, ndërkohë që më i tërhequr mund të luajë Myrtaj. Për Kapllanin mund të ketë shumë pak hapësira, ashtu si në fakt edhe për Dragushën, që në Poloni tregoi qartë se kishte disa javë jashtë forme.

------------------------------------------------------

[Duke_Of_Arberia]

Kuqezinjtë, nën drejtimin e trajnerit të kombëtares shqiptare, Hans Peter Brigel, më në fund kanë zbritur në tokën shqiptare. Kuqezinjtë kanë udhëtuar nga Berlini me avionin e linjës Berlin?Tiranë. Skuadra është pritur në tokën shqiptare nga punonjësit e federatës sonë. Menjëherë kuqezinjtë i kanë hipur autobusit dhe kanë udhëtuar drejt Durrësit, ku janë akomoduar në hotelin "Adriatik". Sipas programit, kuqezinjtë kanë zhvilluar edhe një stërvitje çlodhëse buzë detit, menjëherë pas udhëtimit të gjatë nga Gjermania. Sipas informacioneve, i gjithë grupi sot në darkë pritet të jetë i plotë. Veç 19 futbollistëve që kanë udhëtuar në Poloni, do të jenë edhe lojtarët e tjerë të kombëtares, të grumbulluar për ndeshjen me Gjeorgjinë dhe Ukrainën. Jupi ka mbërritur që dje paradite, ndërkohë që në darkë pritet të vijnë Tare, Bogdani Cana dhe Beqiri. Sot, stafi i kombëtares ka planifikuar vetëm një stërvitje pasdite, në orën 17.00, në stadiumin "Niko Dovana". Gjithsesi, gjasat janë që stërvitje të zhvillohet edhe paradite. Edhe të mërkurën kuqezinjtë pritet të zhvillojnë stërvitjen e radhës, ndërkohë që të premten trajneri dhe skuadra do të transferohen në Tiranë për stërvitjen e fundit në "Qemal Stafa", para takimit të së shtunës, që kombëtarja jonë do të zhvillojë me dyer të mbyllura me Gjeorgjinë.


P.S. Nuk mund te rrije pa e ndare kete foto me antaret e tjere te forumit ...

Hallall foton skutho, te mbush shpirtin kur e shef. Ishalla i shpartallon turku mire e mire ato plehrat neser.

Forca Shqiperia!!!!!

[inter_forever]

Trajneri i Gjeorgjise Zhires thote qe kjo ndeshje nuk ka interes per Gjeorgjine , pasi gjithcka eshte mbyllur per kualifikim.
Thote gjithashtu qe ka 6 mungesa kryesore ne formacion.

Mungesat ndoshta na favorizojne , por problemi eshte se kur ekipi tjeter loz per qef dhe pa tension , ka mundesi qe i del loja e bukur.

Ndersa problemi yne eshte stadiumi bosh.
Nuk ka denim me te poshter sesa te lozesh pa publik , sidomos per tanet qe me perkrahjen e publikut kane ecur disi.

Nesje...

Shpresojme ne nje fitore neser...Keto 3 pike na duhen per nje renditje sa me te mire ...Shpresojme te leme pas kazaket dhe gjergjianet...

p.s
Turqi - Greqi do jete ndeshje e forte...kush eshte ne Itali mund ta shofe tek Sport Italia ..e jep direkt....

[zeus]

-----------------------------------------------------------

Ekipi ynë përfaqësues Shpresa përsëri nuk ka mundur të fitojë në Shqipëri, edhe pse përballë ka pasur një kundërshtar jo shumë të fortë. Dje, kuqezinjtë e Shpresës janë mposhtur nga gjeorgjianët, duke mbetur sërish në kuotën e shtatë pikëve, të grumbulluar gjatë ndeshjeve të luajtura deri tani në kuadrin e takimeve kualifikuese për kampionatin europian. Loja e skuadrës sonë ka filluar mjaft e çorientuar dhe me një mesfushë thuajse inekzistente. Ndërsa spektatorët që kishin mbushur një pjesë të konsiderueshme të stadiumit "Ruzhdi Bizhuta" ishin në formë të shkëlqyer, kjo nuk ndodhte në fushën e lojës me Shpresën e Shqipërisë. Sulmi ynë i pambështetur nga mesfusha nuk arriti të vinte në pozita të vështira mbrojtjen mike pothuajse deri në mbyllje të pjesës së parë. Gjeorgjianët, nga ana e tyre, dukeshin më të organizuar dhe më të përgatitur. Shpeshherë, ata u përpoqën të organizonin kundërsulmin, duke kërkuar edhe golin e epërsisë, por në gjuajtjet e bëra nuk patën saktësinë e duhur. Me fillimin e pjesës së dytë loja e Shpresës së Shqipërisë u përmirësua dhe miqtë filluan ta ndiejnë rrezikun real disa herë. Por në minutën 69-të Cotsirixe arrin ta dërgojë topin pas shpinës së Llanit, duke përfituar nga pasiguria dhe rreshtimi i keq i mbrojtësve kuqezinj. Pas pësimit të golit, futbollistët tanë zgjohen dhe lëvizin më lirshëm. Trajneri i kuqezinjve bën ndryshime në rreshtimin e lojtarëve dhe loja përmirësohet dukshëm. Fundi i ndeshjes bëhet emocionues dhe aroma e golit shqiptar fillon të ndihet së tepërmi, por edhe pse në tri minutat shtesë goli troket fort në portën e Totlaxes, sportdashësit vendës nuk i gëzohen dot atij. Bega godet shtyllën, ndërsa Kraja nuk ka fatin të barazojë, duke e mbyllur me rezultat negativ edhe këtë ndeshje. Një ndeshje e varfër e tanëve, që vetëm në minutat e fundit iu afruan rrezikshëm portës së kundërshtarit. Le të shpresojmë që kjo tablo të mos përsëritet sonte, kur në fushë do të zbresin ekipet e para përfaqësuese.

-----------------------------------------------------------

[miko]

Nr.1

Suksesi i kuqezinjve erdhi si rezultat i kundërshtarit të dobët dhe jo si meritë e tyre, pasi lëshimi në fund nuk falet

Gjeorgjia, fitorja e vetmisë së madhe

Mund të kishte marrë ngjyra të tjera fitorja e arritur mbrëmë nga kombëtarja shqiptare përballë asaj gjeorgjiane. Fitorja mbetet fitore, por një 3-0, apo dhe 3-1 do të ishte me të vërtetë shumë e bukur, pasi mundësitë ishin. Fituesi nuk gjykohet, por nëse kundërshtari do të kishte qenë paksa më i denjë, rezultati do të ishte ndryshe. Vërtet ne dominuam në tërësi, por duhet thënë që kjo erdhi më shumë nga përgjumja e Gjeorgjisë sesa për meritën tonë. Duke lënë rezultatin mënjanë, mund të thuhet se në disa aspekte të tjera kombëtarja jonë ka fituar shumë. Igli Tare më në fund është zhbllokuar, madje ka shënuar dy gola. Në shpërblim ky për shtatlartin shqiptar, që pothuajse në çdo ndeshje i ka munguar goli. Sa keq që këta gola u shënuan tani, kur në këtë moment më shumë vlejnë për statistikë. Megjithatë, Tare ka qenë më i miri në fushë. Kjo nisur jo vetëm nga golat, por edhe nga lëvizjet që bënte me Bogdanin, që tani mund të quhet edhe i domosdoshëm për kuqezinjtë. Pa të sulmi ynë venitet, pasi ai është mjaft i shpejtë. Rasti më i mirë është shënimi i golit të dytë. Bogdani ka grintë dhe lufton shumë, duke bërë gjithmonë presing. Përveç Tares dhe Bogdanit, një lojë shumë të mirë ka bërë Skela dhe në këtë drejtim ne kemi fituar shumë, pasi edhe mesfushori organizativ kishte disa ndeshje që nuk ishte në formë. Një gol dhe një asist ishte mënyra më e mirë për t'u kthyer si "dirigjent" në ekipin kombëtar. Të tjerët kanë qenë konstantë. Lojtari më i dobët dhe ndoshta ai që i prishi punë ekipit në krahun e djathtë ishte Klodian Duro, i cili vazhdon ta mbajë gjatë topin, duke e humbur atë. Pothuaj asnjë kros në drejtim të zonës kundërshtare nga ai, kur ne në sulm kemi dy gjigantë.
Por le t'i kthehemi ndeshjes. Si gjithmonë, ne e nisim keq, për të mos thënë që na është bërë në modë këto kohët e fundit që hutohemi në minutat e para, sa që pësojmë shumë shpejt gola. Në dy minutat e para, gjeorgjianët erdhën 2-3 herë në zonën tonë dhe kërkuan të shënonin. Pastaj, ashtu siç ndodh me ekipin tonë, ne e morëm shumë shpejt veten dhe Tare ka bërë ndoshta triblimin më të mirë me ekipin kombëtar, duke nxjerrë jashtë loje portierin kundërshtar dhe duke shënuar me portën bosh. Kapiteni ynë në këtë ndeshje e meriton të përgëzohet për këtë gol. Loja në sulm e kuqezinjve është e mirë. Bogdani dhe Tare shpeshherë spostohen në të majtë, duke ndërruar vendet me njëri-tjetrin dhe duke çorientuar mbrojtjen gjeorgjiane. Por Bogdani spostohej edhe në të djathtë, ashtu siç ishte rasti i golit të dytë, ku ai merr shpejt krahun dhe me zgjuarësi nuk shërben për Taren, por jep një asist për Skelën, i cili me një gjuajtje teknike e dërgon topin në cepin e portës. Por deri në momentin e dytë ekipi ynë kishte krijuar edhe 2-3 raste të mira për gol. Ndërrimi i detyruar i Haxhit të dëmtuar nuk solli ndonjë në problem për mbrojtjen tonë. Aliaj zë vendin e tij, pozicion natyral ky për vlonjatin, ndërsa respektivisht Beqiri merr vendin e Aliajt, ndërsa Çipi i sapofutur merr qendrën e mbrojtjes, çka është dhe pozicioni ideal për të. Skema ndryshon, pasi nga 3-5-2 ekipi kalon në 4-4-2. Gjeorgjia, në krahun tjetër, është inekzistente dhe e pafuqishme për t'u kundërpërgjigjur. Një pjesë e parë e dominuar totalisht nga tanët, ku rezultati mund të ishte më i thellë.
Pjesa e dytë fillon më e organizuar për miqtë, që duken sikur kërkojnë të bëjnë diçka. Gjeorgjianët fillojnë të bëjnë presing. Megjithatë, kombëtarja shqiptare luan mirë taktikisht në këto minuta dhe ndoshta kjo solli edhe golin e tretë për ne. Tanët dukeshin sikur po mbronin rezultatin, por në fakt kërkonin kundërsulmin dhe deri diku u realizua. Skela tregon edhe një herë se është më i miri në krosim, duke e çuar saktë topin për Taren, i cili gjen cepin e portës, atje ku portieri gjeorgjian nuk mund ta kapte. U duk sikur ndeshja u mbyll këtu, ose më mirë të gjithë prisnin që ne të shënonim prapë, pasi deri në minutën e 60-të Gjeorgjia nuk kishte krijuar ndonjë rast të pastër. Pas golit të tretë, ne lëshuam shumë në lojë, duke e menduar lojën të mbyllur. Miqtë, që shkëndijat e para i kishin dhënë, pasi goditën nga larg tri herë portën, madje njëra kishte përfunduar në shtyllë, arrijnë të shënojnë një gol, i cili u shënua po nga distanca. Ndoshta zëvendësimi i Bogdanit, që me të drejtë mund të jetë sakrifikuar për ndeshjen me Danimarkën, ndikoi në sulmin tonë, i cili nuk qe në gjendje të shtynte më përpara. Myrtaj lëvizi disi, por në rastin që iu dha nuk arriti të shënonte. Ndërrimi i fundit, Shkëmbi, për Skelën nuk solli asgjë të re, për të mos thënë ndikoi për keq. Shkëmbi nuk arriti të orientohej në ato pak minuta që u aktivizua, duke mos kryer punën që kishte bërë Skela. Në minutat e fundit, gjeorgjianët fillojnë e bëhen më të shpejtë në lojë dhe në minutën e fundit, madje në sekondat e fundit, në një gjuajtje-kros ata shënojnë për herë të dytë. Nëse do të kishte edhe pak kohë, ashtu siç po shkonte loja, miqtë edhe mund të kishin barazuar, por ata u zgjuan vonë dhe ne morëm një fitore, që nuk mund të quhet e madhe. E përsërisim, nëse përballë do të kishte qenë një ekip tjetër, ne nuk do të dilnim të fituar. Kjo do të thotë se në Danimarkë një barazim do të quhej historik.

---------------------------------------------------------------------------------------------------

Nr.2

Trajneri i kombëtares analizon ndeshjen e mbrëmshme me Gjeorgjinë

Brigel: U kthyem te shënimi i golave

Trajneri i kombëtares kuqezi, Hans Peter Brigel, ka qenë i lumtur mbrëmë pas ndeshjes me Gjeorgjinë edhe për një fakt tjetër, veç 3 pikëve të marra. Ai ka vlerësuar faktin se skuadra kombëtare i është rikthyer shënimit të golit. Madje e ka gjetur plot tri herë rrjetën e kundërshtarit mbrëmë, ndërkohë që, sipas tij, duhej të kishim shënuar më shumë. Duke folur në konferencën për shtyp pas ndeshjes, gjermani i kombëtares sonë u shpreh: "Dua të them që në fillim se e patëm të vështirë në një stadium të boshatisur. Futbollistët nuk ishin mësuar të luanin në një mjedis të tillë, i cili të bënte të ndiheshe vërtet keq. Madje, në pesë minutat e para, ndeshja ngjante me një seancë stërvitore. Kësisoj, edhe pse fituam, në këtë këndvështrim, them se nuk përjetuam ndonjë kënaqësi të madhe. Unë nuk e di se si e ka të përcaktuar FIFA, por do të ishte më mirë që ndeshja të luhej në fushë asnjanëse, se sa në një stadium të boshatisur. Sidoqoftë, duke iu rikthyer analizës së ndeshjes, duhet të jemi të kënaqur me shënimin e golave dhe me marrjen e 3 pikëve. Pas pesë minutave të para, kur skuadra m'u duk e fjetur, por e morëm veten dhe krijuam volum të madh loje. Madje krijuam disa raste të pastra për shënim. Ne vërtet e gjetëm 3 herë rrugën e rrjetës së kundërshtarit, por duhej të kishim shënuar më shumë, nisur nga rastet e krijuara. Pas minutës së 75-të, skuadra ra, edhe sepse ishte në avantazhin 3-0. Për mua, kjo erdhi edhe nga dalja jashtë loje e Haxhit dhe e Bogdanit, dy pika të forta në këtë ndeshje, të cilët nuk i kishim llogaritur për t'i zëvendësuar. Megjithatë, ata u dëmtuan dhe ishim të detyruar t'i zëvendësonim me të tjerë. Sidomos dalja e Bogdanit them se na penalizoi shumë, pasi ai e mbante në çdo moment në presion mbrojtjen kundërshtare, në thellësi të saj, sidomos në goditjet standarde."
Më tej, duke folur për kundërshtarin, Brigeli shtoi: "Gjeorgjia është një skuadër e mirë, gjë të cilën e tregoi edhe në ndeshjen ndaj nesh, pavarësisht se kishte disa mungesa. Lojtarë të tillë si Kalaxe apo Kobiashvili bëjnë diferencën dhe të japin siguri, prandaj Gjeorgjia duhet vlerësuar. Ne arritëm ta fitonim ndeshjen e kthimit me të dhe kjo ka shumë rëndësi, pasi është një rival i drejtpërdrejtë për t'u renditur sa më lart në klasifikim dhe për të pasur privilegje të tjera në shortin e europianit të ardhshëm."
Në fund të fjalës së tij, Brigeli foli edhe për ndeshjen e radhës me Danimarkën: "Na pret një ndeshje e vështirë, për vetë faktin se Danimarka është ende në lojë për t'u kualifikuar, prandaj do ta kërkojë me çdo kusht fitoren. Madje e parashikoj se do të luajë me tre sulmues ndaj nesh, çka na detyron të ndryshojmë edhe ne skemën e lojës. Pra, do të na duhet të luajmë me katër mbrojtës. Mua më shqetëson shumë dëmtimi i Haxhit, i cili nuk e besoj se do të jetë i gatshëm për sfidën me Danimarkën. Gjithsesi, këtë do ta ketë në dorë stafi mjekësor. Po kështu, një tërheqje muskulare pësoi edhe Bogdani, i cili gjithashtu rrezikon për ndeshjen e radhës. Pra, siç e shihni, do të na kthehen Cana dhe Lala, por mund të na mungojnë Haxhi me Bogdanin, dy pika të tjera mjaft të forta. Ne do të luajmë lirshëm ndaj Danimarkës, pasi nuk e kemi presionin e vendësve. Një pikë në këtë ndeshje do të ishte sukses i madh. Tani kemi 9 pikë, por e them me bindje se do të kemi më shumë në të ardhmen."

-------------------------------------------------------------------------------------------------------

Nr.3

Kuqezinjtë mposhtin gjeorgjianët, në një ndeshje ku minutat e fundit ishin të rrezikshme

Gjeorgjia, fitorja që friksoi

Shqipëri - Gjeorgji 3-2

Shënues: Tare 6', 55', Skela 33', Burduli 85', Kobiashvili 93'

Shqipëria:
Lika
Beqiri
T. Osmani
Aliaj
Haxhi (Çipi 29')
Hasi
Duro
Jupi
Skela (Shkëmbi 85')
Bogdani (Myrtaj 66')
Tare
Trajner: Hans P. Brigel

Gjeorgjia:
Sturua
Kaladze
Kobiashvili
Rekhiashvili
Khizanishvili
Jakobia
Makaradze (Burduli 66')
Daraselia
Salukvadze
Asatiani
Demetradze
Trajner: A. Zhires
Gjyqtarë: D.A.Tudor, K.Nica, A.Onita (Rumani)
Kartonë të verdhë: Rekhiashvili, Jupi, Hasi, Osmani, Duro


1'- Gjeorgjianët ndërtojnë aksionin e parë, i afrohen portës sonë, por goditja e Demetradzes është e lehtë dhe jashtë.
6'- Hasi kroson saktësisht në zonë për Igli Taren, që del i vetëm përballë portierit gjeorgjian, shkëputet mjaft bukur, e shmang atë dhe më pas e dërgon lehtësisht topin në rrjetë. 1-0 për Shqipërinë.
12'- Goditje dënimi për kuqezinjtë. Hasi kroson rrezikshëm në zonë, por në fund ndërhyn mbrojtja gjeorgjiane.
16'- Demetradze kroson në zonë, por topin e largon nga zona, pas një ndërhyrjeje të saktë me kokë, Osmani.
17'- Aliaj provon me një goditje qëndrore nga jashtë zonës, pret në pozicion Sturua.
22'- Shkëputje e jashtëzakonshme e Duros, që futet në zonë dhe pason prapa për Hasin. Ky i fundit godet, por jashtë.
23'- Skela godet befasisht portën dhe me vështirësi grushton Sturua. Ndërkohë një mbrojtës gjeorgjian dhe e largon topin nga zona, para se Bogdani ta dërgonte në rrjetë.
28'- Përfitojnë gjeorgjianët dhe Demetradze kroson, por topi mjaft në thellësi.
31'- Bogdani, megjithëse disa metra larg zonës, godet fuqishëm, por gjuajtja e tij është qendrore dhe portieri gjeorgjian arrin të grushtojë, duke e nxjerrë topin jashtë.
33'- Bogdani rrëmben një top në gjysmëfushën gjeorgjiane, futet me shpejtësi në zonë, sheh të lirë Skelën, pason për të dhe vlonjati godet saktë, duke e dërguar topin në rrjetë. 2-0 për kuqezinjtë.
35'- Aliaj kroson në zonë, por mbrojtja mike e largon rrezikun para se topi të përfundojë te këmbët e Jupit.
41'- Kobiashvili tenton të zërë në befasi portën tonë me një goditje të fortë, por grushton pas një daljeje portieri Lika.
45'- Asatiani, nga krahu i majtë, kroson në zonë për Demetradzen, por ndërhyn bukur Çipi me kokë, duke e larguar topin nga zona.
47'- Kaladze kroson në zonë, por Çipi ndërhyn sërish me kokë, duke e kthyer topin te portieri Lika.
48'- Shqipëria ka mundësinë e një kundërsulmi me protagonist Bogdanin, por sulmuesi ynë nuk e arrin topin në kohë.
50'- Aliaj nga e djathta, kroson në zonë për Bogdanin, që godet me kokë, por grushton portieri mik. Topi përfundon te Skela, që godet përsëri dhe Sturua bën sërish mrekullinë.
51'- Lika tregohet tepër i vëmendshëm, duke e kaluar topin jashtë, pas një goditjeje të gjeorgjianëve.
54'- Gjeorgjianët e kthejnë topin pas te portieri dhe ky i fundit, i kërcënuar nga Tare, rrezikon duke e larguar me shumë vështirësi.
55'- Skela bën një veprim të bukur në afërsi të zonës, duke u futur mjaft mirë në brendësi të saj, kroson në mënyrë perfekte për Taren, që godet saktë me kokë dhe topi përfundon në rrjetë. 3-0 për kuqezinjtë.
60'- Aliaj shërben sërish nga e majta e sulmit tonë, por këtë herë për Bogdanin, që shumë pranë portës godet, topi kalon mbi traun e portës.
62'- Goditje dënimi për tanët. Hasi kroson në zonë dhe përsëri është Bogdani që godet me kokë, duke kërcënuar portën gjeorgjiane.
65'- Goditje dënimi për Gjeorgjinë, shumë pranë zonës sonë. Demetradze godet dhe topi kalon ngjitur me traun e portës së Likës.
67'- Kaladze kroson në zonë, por Lika del e pret në pozicion.
68'- Goditje dënimi për Gjeorgjinë. Kobiashvili godet fort dhe topi ndalet nga shtylla e majtë pingule e portës së mbrojtur nga Lika.
69'- Kundërsulm i menjëhershëm i kuqezinjve. Myrtaj shkëputet në mesfushë, shmang edhe portierin, godet në portë, por një mbrojtës ndërhyn në fund, duke shpëtuar portën nga një tjetër gol i sigurtë.
74'- Duro kroson në zonë, godet në dyluftim Myrtaj, që vë në vështirësi Sturuan.
80'- Kobiashvili fut një top të rrezikshën në zonën tonë, por gjeorgjianët zihen në pozicion jashtë loje.
85'- Gjeorgjianët kombinojnë mirë me njëri-tjetrin nga e djathta e gjysmëfushës sonë. Një pasim i saktë për Burdulin, i cili në afërsi të zonës, godet saktë dhe topi përfundon në rrjetë. 3-1.
88'- Daraselia përfiton nga një pakujdesje e mbrojtjes sonë dhe godet në portë, por pa shënjestruar si duhet.
90'- Myrtaj kërkon të zërë në befasi portierin gjeorgjian me një goditje nga larg portës, por nuk ia arrin dot qëllimit.
90+3'- Goditje dënimi për Gjeorgjinë. Kobiashvili kroson në zonë, por topi nuk preket nga askush dhe përfundon në rrjetë. 3-2. Këtu përfundon edhe ndeshja Shqipëri-Gjeorgji, e vlefshme për eliminatoret e Botërorit 2006. Kuqezinjtë tanë fitojnë me plot meritë një ndeshje, rezultati i së cilës kurrësesi nuk i përgjigjet asaj që u zhvillua në stadiumin e boshatisur "Qemal Stafa".

-----------------------------------------------------------------------------------------------------

Marrë nga www.sportishqiptar.com.al