Kombëtarja Shqiptare - (Lajme)

[zeus]

--------------------------------------------------------------

Perfaqesuesja e futbollit te Bosnjës eshte e gatshme te luajë kunder kombetares sone ne daten 1 mars. Marreveshja konfirmohet nga drejtuesit e FSHF dhe ndeshja do te zhvillohet ne Tirane. E vetmja pengese mund te paraqitet nese Bosnja dhe Shqiperia do te jene ne te njejtin grup per eliminatoret e Evropianit. Gjithashtu kombetarja jone ka rezervuar te drejten per te anulluar ndeshjen me Bosnjen neqoftese nderkohe gjen ndonje kundershtar më të fortë për miqësoren.

--------------------------------------------------------------

[zeus]

--------------------------------------------------------

Debatik Curri pret që së shpejti të përfundojë procedura e pajisjes së tij me pasaportën shqiptare dhe të debutojë në fanellën kuqezi. Mesfushori kosovar mendon se kjo mund të ndodhë qysh në eliminatoret për kampionatin evropian, të cilat fillojnë këtë vjeshtë.

"Punën time tashmë e kam kryer. Çdo gjë që është kërkuar nga unë prej zyrtarëve të futbollit shqiptar ka përfunduar. Tani mbetet që FSHF-ja të kryejë punë e saj",- thotë Curri.
"Unë jam i gatshëm qysh tani për fanellën kuqezi", - shton ai.

Debatik Curri është shprehur se misioni tij i ri tashmë duhet të kishte filluar, mirëpo disa vonesa me kompletimin e dokumentacionit e kanë shtyrë atë për pak kohë.

"Pajisja ime me pasaportë shqiptare tani duhej të ishte një punë e kryer. Por unë shpresoj që kjo gjë të realizohet së shpejti në një periudhë shumë të shkurtër",- vazhdon të shprehet Curri, i pyetur rreth kësaj çështjeje.

Sipas tij, kanë qenë paraqitjet impresive në radhët e ekipit ukrainas që i kanë shtyrë zyrtarët e futbollit shqiptar të mendojnë për përfshirjen e tij në radhët e ekipit kuqezi.

"Lojërat që kam bërë këtë sezon në Vorsklla, me siguri më kanë sjell këtu ku jam, pra që të shpresoj për një debutim të shpejtë në fanellën kuqezi",- thotë 22-vjeçari, Debatik Curri.

Curri është i bindur se me përfshirjen e tij në kombëtaren kuqezi, do të fillojë një epoke e re e karrierës së tij.

"Normalisht që maksimumi i arritjeve për një lojtar është të luajë në ekipin kombëtar. Mirëpo, jo vetëm kjo, por vetë fakti që je pjesë e ekipit kombëtar, do të thotë se të ofrohen mundësi shumë të tjera",- përfundon kosovari Curri, i cili pret të pajiset me pasaportë shqiptare për t'u aktivizuar më pas në radhët e kuqezinjve.

Ndërkohë, mesfushori kosovar, Debatik Curri, nëse do të jetë i përfshirë në kombëtaren e Shqipërisë për eliminatoret e kampionatit evropian, si kundërshtarë do të dëshironte Anglinë ose Gjermaninë.

"Le të jetë çfarëdo kundërshtari, por të them të drejtën do të kisha shumë dëshirë që të ndesheshim me Gjermaninë ose Anglinë. Vetëm kur të përballesh më kundërshtarë si ata, mund të tregosh vlerat e tua të vërteta dhe të shohësh se ku je," - shprehet Debatik Curri.

--------------------------------------------------------

[zeus]

--------------------------------------------------------

Sulmuesi dhe kapiteni i kombëtares sonë, Igli Tare, është bërë objekt i një sherri me serbin e Interit, Mihajloviç, teksa hynin në dhomat e zhveshjes në pushim të ndeshjes së kupës, Lacio-Inter, luajtur të mërkurën në stadiumin "Olimpiko" të Romës.

Në nënkalimin e "Olimpikos", edhe Mihajlloviçi me Taren janë goditur me grushta ndaj njëri-tjetrit teksa ktheheshin në dhomat e zhveshjes, në pushimin e pjesës së parë. Momente tensioni dhe fjalë të rënda mes tyre, derisa Liverani ndërhyri për t'i ndarë, por paksa vonë. Për pasojë, serbi i Interit u kthye në fushë me dy shenja në qafë.

I pyetur rreth këtij incidenti, për të cilin ka shkruar dje shtypi italian, vetë Igli Tare, kapiteni i kombëtares sonë dhe sulmuesi i Lacios, ka pranuar konfrontimin me fjalë dhe pastaj edhe fizik me serbin e Interit, Sinisha Mihajloviç. Tare ka sqaruar pozicionin e tij në këtë sherr: "Në fakt, ky futbollist serb i Interit gjithnjë ka pasur tendencën për t'i fyer shqiptarët, kur i është dhënë mundësia, siç ndodhi edhe me mua. Për sa i takon sherrit në "Olimpiko", mes meje dhe Mihajloviçit, ai ka nisur që në fushën e lojës, në pjesën e parë, kur serbi i Interit më shau "albanese di merda", fjalë të cilat, të gjithë shqiptarët i dinë. Unë nuk e durova këtë fyerje dhe i thashë që këto të m'i thoshte në tunel këto, kur të hynim në dhomat e zhveshjes, në pushim të dy pjesëve. Pasi ra bilbili i përfundimit të 45-minutave të para, nxitova të hyja njëherësh në tunel për te dhomat e zhveshjes, iu drejtova Mihajloviçit, duke i kërkuar llogari për ofendimin që më bëri gjatë lojës në fushë. Këtu gjakrat u nxehën, ofendimet ishin të dyanëshme, aq sa në një moment e kapa prej fyti dhe e godita. Do të kishte shkuar më keq situata, nëse nuk do t'i ruhesha gjyqtarit të katërt, i cili po vinte pas nesh. Sidoqoftë, ka ndërhyrë Liverani, duke na ndarë. Më pas, pjesa e dytë ka vijuar normalisht, pa asnjë problem mes nesh, ndërkohë që pas ndeshjes, Mihajloviç më takoi dhe më kërkoi falje për gjithçka ndodhi".

--------------------------------------------------------

[Pasiqe]

Editorial i www.albaniasoccer.com

Miqësoret, shumë zhurmë për asgjë

Flitet për organizimin e ndeshjeve miqësore, por akoma asgjë konkrete për skuadrën kombëtare, vetëm turne që shkaterrojnë protokollin e punës për kampionatin dhe gjendjen sportive të skuadrave


Vazhdonë të trumbetojnë që ndeshja miqësore e radhës e përfaqësueses së Shqipërisë është ajo me Bosnjën ne 1 mars 2006, kur lart e poshtë thuhet se kjo apo skuadër janë në horizont për një miqësore.

Përse duhet të mos informohet saktësisht media futbollistike, por të dëgjohen gjepura fenomenale? Do të ishte shume mirë, sikur atëherë që çdo gjë të jetë vendosur dhe të jetë zyrtarizuar nga federatat përkatëse dhe të jetë aprovuar nga organi më i lartë i futbollit Europian apo botëror të përhapej lajmi.

Kanë ngelur pak më shumë se katër javë për të shkuar te 1 marsi dhe të gjithë ata që marrin sadopak erë nga sporti dhe futbolli e dinë shumë mirë se të konfirmosh një ndeshje ndërkombëtare të nivelit profesionist duhet më tepër kohë se kaq.

Në fakt prej më se nje muaji, në sitin web të FIFAs, pikërisht http://www.fifa.com/en/mens/fixtures...IH-ALL,00.html, gjithkush mund të shohë që në datën 28 shkurt (pra një ditë përpara ndeshjes “planifikuar” me Shqipërine) Bosnja ka ndeshje miqësore me Japoninë në Gjermani. Ndoshta, sportdashësit duhet të besojnë gjepurën që Bosnja, pa u tharë djersa nga ndeshja me sybajamet, do marri aeroplanin e do vijë në Tiranë të luajë me Shqipërinë të nesërmen.

Gjithashtu, pretendohet se më 1 Mars Shqipëria mund të luajë me Portugalinë, pasi janë zhvilluar bisedime midis palëve. Se si mund të realizohet kjo, nuk dihet, kur faktet tregojnë se Portugalia ka ndeshje miqësore me Arabinë Saudite në Dusseldorf.

Fakti është se Shqipëria (vendi 83 në renditjen FIFA) nuk ka asnjë ndeshje miqësore të planifikuar deri tani. Plus, që nga përfundimi i eliminatoreve të botërorit nuk ka zhvilluar asnjë ndeshje miqësore në datat e lira 12 dhe 16 nëntor (si kanë zhvilluar pothuaj gjithë skuadrat e tjera). Bosnja, si thamë më lart ka ndeshjen me Japoninë.

Skuadrat pjesëmarrëse të grupit tonë eliminator për EURO 2008, Rumania (vendi 27 në renditjen FIFA) ka bërë dy ndeshje miqësore deri tani (me Bregun e Fildishtë në 12 nëntor dhe me Nigerinë në 16 nëntor 2005). Bullgaria (vendi 39 në renditjen FIFA – kujtojmë që Ukraina, fituesja e grupit për eliminatoret e Botërorit që sapo përfundoi është në vendin e 40) ka bërë ndeshje miqësore kontrolli më 16 nëntor me Meksikën. Sllovenia (vendi 69 në renditjen FIFA) nuk ka bërë ndeshje miqësore dhe nuk ka të planifikuara. Bjellorusia (vendi 60 në renditjen FIFA – më lart se Sllovenia) luajti me Letoninë në 12 nëntor. Madje edhe Luksemburgu (vendi 151 në renditjen FIFA) ka ndeshje të planifikuar me Belgjikën më 1 mars. Mos flasim për Hollandën që e ka kalendarin plot.

Për miqësore dhe planifikim të kalendarit të miqësoreve duhej menduar më parë, por edhe tani – sa nuk është akoma tepër vonë dhe të mos lihet kjo detyrë shumë e rëndësishme për pas zgjedhjeve të Federatës. Nëse skuadra nuk luan, do hasi probleme gjatë lojës dhe rrezikojnë të mungojnë edhe rezultatet. Skuadrat e mëdha, po dhe ato të mesme e deri te Luksemburgu planifikojnë miqësoret me kohë. Në përgjithësi një skuadër përfaqësuese duhet të luajë minimumi 12-13 ndeshje në vit. Nga këto 4-5 duhet të jenë miqësore. Skuadrat e mira kanë të gjithat mbi 15 ndeshje në vit sepse bëjnë më shumë testime. Shqipëria ka një mesatare prej 10 ndeshjesh në vit në 5 vitet e fundit. Edhe pse ka pasur përmirësim, ka shumë për të shkuar aty ku Shqipëria meriton.

Ndoshta, çdokush mendon që Shqipëia ka kampionat pa nivel dhe pretendimet dhe sukseset tona nuk mund të jenë shumë të mëdha. Atëherë si shpjegohet që SHBA, kampionati MLS i së cilës nuk është aspak në nivelin e Premier Liga, Bundesliga, Seria A, La Liga, apo Ligue 1, por skuadra e tyre përfaqësuese ndodhet më lart në renditjen e FIFA-s se sa mjaft nga skuadrat e shteteve me kampionat shumë më të fortë. Organizimi është gjëja më e rëndësishme dhe ndeshjet e shumta të kombëtares amerikane (rreth 20 në vit), bëjnë që skuadra të grumbullohet shumë shpesh. Edhe pse SHBA nuk ka traditë në futboll, ka vite të tëra që kombëtarja e futbollit amerikane është më lart në renditjen FIFA se Italia apo Gjermania. Kjo në sajë të organizimit të përsosur, të ndeshjeve të shumta miqësore, të cilat ngrenë koeficentin ELO dhe të rezultateve të mira (kualifikim i përhershëm ne Kupën e Botës në 25 vjetët e fundit). Jo vetëm kaq, por edhe skuadrat e universiteteve amerikane e kanë organizimin më të zhvilluar se skuadra e përfaqësueses së Shqipërisë. Jo vetëm kalendari i veprimtarive zyrtare është i planifikuar, por edhe datat e miqësoreve janë të rregulluara 1 vit më parë. Bile edhe biletat e avioneve dhe hotelet janë të prenotuara. Asnjë e papritur nuk ndodh po të jesh i organizuar mirë. Stresi i vizave, hoteleve, parave të biletave nuk ekziston. Lojtarët mendojnë 100% të kohës si të fitojnë ndeshjet, për fizikun e tyre dhe për te ndenjur në formë dhe nuk e prishin gjakun për gjëra të tjera.

Kjo nuk është hera e parë që nga organet më të larta drejtuese të futbollit në Shqipëri ka dizinformim në lidhje me miqësoret. Përse ndodh diçka e tillë dhe mbahen me shpresa për zhvillimin e mundshëm të miqësoreve si sportdashësit ashtu edhe Media? Kur FSHF-ja e pa që Bosnja e la opcionin Shqipëri pse nuk konfirmoi me ndonje skuadër tjetër të vogël të cilët kishin dashur të luanin me Shqipërinë? C’të keqe kishte të luanim prapë me Gjeorgjinë? Aq më tepër kur trajneri aktual i saj TopMueller është mik i Brigelit. Futbolli Gjeorgjian është shumë i ngjashëm me ne dhe do ishin testim i mirë. Miqësoret nuk janë për para, janë investim për fitore në ndeshje të rëndësishme sepse shërbejnë për testuar skuadrën, qoftë edhe nëse harxhet për të udhëtuar deri atje janë deri diku të kushtueshme. Por që të fitosh duhet të investosh në mënyrë efektive dhe jo të organizohen turne që të shkatërrohet gjithë sistemi i asaj pune që trajnerët dhe stafi ekipor kanë bërë për të sjellë në formë skuadrat e tyre.

Në përgjithësi për të përgatitur një ndeshje duhet luajtur ose me një skuadër të ngjashme si kundërshtari, ose me një më të dobët thjesht për të provuar skema sulmi. Përfaqësuesja e Shqipërisë ka në grup tre nga katër skuadrat Ballkanike që kanë shkollë edukimi futbolli sllave (Bullgari, Slloveni dhe Bjellorusi), Rumaninë dhe dy skuadra të vendeve të ulëta (Holandën dhe Luksemburgun). I bie që do ishte mirë të testoheshim me Belgjikën (nga e cila kemi kujtime të bukura) dhe me ndonje skuadër tjetër sllave. Maqedonia do ishte ideale për testim. Nëse mundim Maqedoninë në miqësore, mund të fillojmë të mendojmë të mundim edhe skuadra si Sllovenia apo Bullgaria. Edhe Kroacia do ishte shumë e nevojshme. Le të mendojë federata të planifikojë ndeshje miqësore me këto kombëtare një vit përpara e të mos fillojë deklaratat “do kërkojmë miqësore pas caktimit të kalendarit”.

Nëse nuk planifikohen mirë miqësoret, Shqipëria rrezikon jo vetëm të kalohet në renditje nga Bjellorusia, e cila ka skuadër shumë të fortë, po t’i japë pikë edhe Luksemburgut, skuadër që ka vite që s’merr pikë.

Eshte e lehte të kritikojmë Brigelin i cili s’është gjë tjetër, vecse seleksionues i skuadrës kombëtare, po aty ku çalohet është FSHF-ja, e cila nga ana organizative po lë gjithmonë e më shumë për të dëshiruar. Nëse Brigeli nuk thërret lojtarë të rëndësishëm është kollaj t’i lihet faji atij, po duhet menduar që ai duhet të ketë edhe kushtet që t’i shohë këta lojtarë se si mund të integrohen në skuadrën përfaqësuese. Dhe kjo mund të bëhet vetëm në ndeshje miqësore.

[zeus]

-----------------------------------------------------

SuperBogdani e ka udhëhequr Sienën drejt një fitoreje të re. Sulmuesi shqiptar ka qenë protagonisti kryesor në fitoren e madhe të Sienës, i cili me tre golat e tij e ka fundosur Palermon në "Renzo Barbera", me rezultat 3-1.


- A është ky 3-golëshi i parë për Erjon Bogdanin?

- Jo, ky nuk është i pari. Në fakt, tre gola kam shënuar edhe kur kam luajtur në kampionatin shqiptar. Ndërsa jashtë Shqipërisë, kjo është hera e parë që shënoj tre gola në një ndeshje. Jam shumë i lumtur që golat e mi i krijuan skuadrës rastin të mposhtë një skuadër të fortë, siç është Palermo.

- Këta tre gola a do të stimulojnë largimin e Bogdanit nga Siena, kur dihet se nuk i kanë munguar ofertat?

- Jo, unë jam mirë në Siena dhe nuk e kam ndërmend të largohem që këtej. Kam marrëdhënie shumë të mira me trajnerin dhe kryesinë e klubit dhe më vjen mirë që me lojëra të mira po e shpaguaj besimin e dhënë. Që në ditët e para, kur kam ardhur në Siena, kam pasur një trajtim shumë të mirë nga të gjithë dhe do të përpiqem që me gola dhe paraqitje të mira ta justifikoj këtë mikpritje.

- A ka ndonjë domethënie numri 81 në fanelën e Bogdanit?

- Jo, jo, nuk ka ndonjë domethënie të veçantë. Një vit më parë këtë numër e kam mbajtur derisa luaja në Verona, ku kisha shënuar 17 gola. Ishte dëshira ime që këtë numër ta mbaja edhe në Siena.

- Bogdani, flasim pak për kombëtaren. Diçka për shortin e eliminatoreve të Euro 2008-ës?

- Nuk diskutohet, është një grup shumë i vështirë. Dihet që Holanda është favorit absolut, por nuk duhet harruar as Rumania dhe Bullgaria, të cilat kanë kombëtare shumë të papërshtatshme për ekipin tonë. Ne duhet që ndeshje pas ndeshjeje të përpiqemi të mbledhim sa më shumë pikë dhe të shpresojmë deri në fund. Ky është futbolli, nuk i dihet kurrë.

- Siena dhe kombëtarja. Si e gjen veten Bogdani mes këtyre dy formacioneve?

- Unë e kam thënë edhe më parë që Siena dhe kombëtarja janë dy dashuritë e mia të mëdha. Shpresoj ta ruaj këtë ritëm dhe të jap maksimumin për të dyja formacionet.

-----------------------------------------------------

[zeus]

--------------------------------------------

Kombëtarja B e Shqipërisë, e cila për disa ditë do të zhvillojë në Norçia një përgatitje, ka udhëtuar e përgjysmuar drejt Italisë. Në grupin e lojtarëve që janë nisur dje drejt Barit me avion nuk kanë qenë shumë lojtarë. Sipas informacioneve nga sektori i ekipeve kombëtare, jo të gjithë lojtarët kanë udhëtuar për t'u bashkuar me trajnerin Brigel në Itali. Salihi dhe Kraja nuk kanë marrë vizë dhe do të nisen vetëm sot. Gjithashtu, edhe Muzaka do të udhëtojë sot drejt Peruxhias, pasi ka pasur një provim në shkollë. Së bashku me grupin e sotëm do të udhëtojë edhe Emiliano Veliaj i Besës, ndërkohë që Alban Dragusha përfundimisht nuk ka udhëtuar me ekipin, pasi është i dëmtuar. Edhe Klodian Duro dhe Bledar Mancaku nuk janë nisur me kombëtaren B. Në FSHF të bëjnë të ditur se këta lojtarë do të bashkohen me grupin në Norçia vetëm në ditët në vazhdim.

--------------------------------------------

[zeus]

-------------------------------------------

Kombëtarja shqiptare mund të luajë një miqësore me Kosta Rikën, një nga skuadrat finaliste në botërorin e Gjermanisë. Ka qenë zëdhënësi i shtypit në FSHF ai që e ka pohuar dje një fakt të tillë menjëherë pas përfundimit të konferencës për shtyp të presidentit të FSHF së, Armand Duka. Kështu, sipas informacioneve zyrtare në federatë, Federata e Kosta Rikës, në prag të Botërorit 2006, është në kërkim të një skuadre ballkanike për të zhvilluar një ndeshje miqësore. Federatës sonë i ka pëlqyer kjo ftesë e ardhur nga Karaibet e largëta dhe u ka kthyer menjëherë përgjigje pozitive drejtuesve të federatës së Kosta Rikës.

"Mund të them se kemi ditë që jemi në bashkëbisedim me federatën e Kosta Rikës për një miqësore që mund të zhvillohet në Tiranë më 1 mars. Jemi shumë afër marrëveshjes. Presim vetëm përgjigjen përfundimtare nga skuadra nga Karaibet. FSHF është e bindur që kjo miqësore do të zhvillohet. Zyrtarizimi i saj është çështje orësh," është shprehur zëdhënësi i shtypit.

Pra, me të gjitha gjasat, kombëtarja shqiptare pritet që më 1 mars, në Tiranë, në stadiumin kombëtar "Qemal Stafa" të zhvillojë miqësoren e parë për 2006-ën. Sipas informacioneve në FSHF, të dyja palët nuk kanë folur ende për detajet e ndeshjes. I sigurt është fakti se ndeshja do të luhet në Tiranë. Nëse ndodh që kostarikasit bien përfundimisht dakord që të zhvillohet kjo ndeshje miqësore, për kuqezinjtë do të jetë hera e parë që luajnë me këtë kombëtare. Më parë, skuadra jonë kombëtare është ndeshur edhe me Kubën dhe Meksikën. Ndërkohë, ndeshja me Kosta Rikën, që në FSHF e konsiderojnë të sigurt, nuk është e vetmja miqësore që kuqezinjtë do të zhvillojnë në muajin mars. FSHF ka arritur një marrëveshje edhe me një tjetër kombëtare për zhvillimin e një miqësoreje në muajin mars. Eshtë Gjeorgjia ajo që kërkon një miqësore me Shqipërinë në fund të muajit mars dhe të dyja palët kanë rënë dakord që të zhvillohet një miqësore në mars. Eshtë caktuar edhe data dhe bëhet fjalë për 22 marsin.

-------------------------------------------

[zeus]

--------------------------------------------------------

Kombetarja jone B zhvilloi dje ndeshjen e pare te turneut ne Norcia. Perballe saj ishte ekipi i Norcias. Kuqezinjte arriten nje fitore te lehte me rezultatin 6-0. Salihi dhe Bylykbashi shenuan nga dy gola, ndersa golat e tjere u shenuan nga Duro dhe Veliaj.

Formacioni i pare:

Hidi, Pisha, Xhafa, Kraja, Beqiri, Veliaj, Mehmeti, Bulku, Duro, Salihi, Bylykbashi

Ne pjesen e dyte u aktivizuan edhe Allmuça, Muzaka, Teli, Sina dhe Vrapi.

--------------------------------------------------------

[zeus]

---------------------------------------------------

"Bogu" ka shenuar perseri per Sienen ne ndeshjen e sotme. Ne fakt ja zuri me "çorape" po goli ishte i rendesishem per ekipin qe mori barazimin me Ascoli. Bogdanit ju anullua edhe nje gol per pozicion jashte loje.

---------------------------------------------------

[zeus]

------------------------------------------------

Kombëtarja jonë B, që ndodhet në Norçia prej datës 30 janar, ka zhvilluar dje ndeshjen e parë zyrtare në këtë turne. Përballë kuqezinjve tanë kanë qenë rumunët e Politeknikas, të cilët janë mundur pastër 3-0 nga të besuarit e Brigelit. Ndeshja është dominuar gjatë gjithë kohës nga kombëtarja jonë B, e cila e ka gjetur golin e avantazhit në minutën e 20-të, me anë të Dorian Bylykbashit. Ky i fundit ka kthyer në gol një faull për tanët. Nuk do të kalonte shumë, por në minutën e 30-të, pas një kombinimi të bukur mes kapitenit kuqezi, Klodian Duro dhe Bylykbashit, ky i fundit ta dyfishonte rezultatin. Pas këtij momenti, loja ashpërsohet disi, pasi rumunët e Politeknikas nuk pajtohen me rezultatin, duke i tejkaluar caqet e fait-play-it. Sidoqoftë, kuqezinjtë tanë kanë ditur të ruajnë gjakftohtësinë dhe ta trefishojnë rezultatin sërish me anë të Bylykbashit, në minutën e 70-të. Ndeshja është ndjekur nga një numër i konsiderueshëm shqiptarësh, që punojnë e jetojnë në Itali. Më shumë në sy ka rënë dyshja elbasanase, K.Duro-Bylykbashi, të cilët kanë zhvilluar një ndeshje mjaft cilësore. Kombëtarja jonë B e ka filluar ndeshjen me këtë formacion: Lika, Pisha, E.Xhafa, Sina, Teli, Vrapi, Mehmeti, E.Bulku, K.Duro, Bylykbashi dhe Abilaliaj. Me fillimin e pjesës së dytë, Salihi ka zënë vendin e Abilaliajt dhe A.Beqiri vendin e Sinës, ndërkohë që në minutën e 85-të, Veliaj ka zëvendësuar autorin e 3 golave, Bylykbashin, ndërsa Dabulla ka zëvendësuar Vrapin.
Ndeshja e radhës për kuqezinjtë tanë do të jetë më 8 shkurt, ndaj Juventus Zyrih. Kujtojmë se në grupin e kombëtares sonë B janë dy skuadrat rumune, FC Uta Arad dhe Politeknika, skuadra zvicerane, Juventus Zyrih, dhe skuadra spanjolle EFU Fuertas Ventura.

------------------------------------------------