Kombëtarja Shqiptare - (Lajme)

[zeus]

------------------------------------------------------------

Futbollisti i kombëtares shqiptare Edvin Murati është shumë pesimist për gjendjen e tij shëndetësore. Sipas vetë mesfushorit të krahut të majtë, problemet me këmbën e thyer vazhdojnë ta lënë atë jashtë fushave të lojës. Këmba e thyer akoma nuk është ngjitur dhe kështu Edvini duhet të marrë rrugën drejt Parisit për t'u vizituar. Madje, sipas të gjitha gjasave, mund t'i nënshtrohet edhe ndonjë operacioni të dytë, për të njëjtin problem. Murati gjithashtu shprehet se është pesimist për të ardhmen, çka do të thotë se do t'i mungojë kombëtares kuqezi në dy ndeshjet e radhës, me Turqinë dhe Greqinë. Madje riaftësimi i këmbës mund të vazhdojë për shumë kohë.


- Edvin, si është gjendja e këmbës pas gjithë kësaj kohe që ka kaluar?

- Të them të vërtetën, gjendja e këmbës sime nuk është shumë e mirë. Sipas mjekëve, nuk ka asnjë përmirësim. Kjo sepse kocka nuk më është ngjitur dhe kështu unë nuk mund të stërvitem. E them edhe një herë se kam probleme me këmbën e thyer dhe rrezikoj të mos luaj për disa kohë.

- Thatë që e thyera nuk është ngjitur ende?

- Po, nga grafitë që kam bërë del se është kështu. Nga ana tjetër, ndiej dhimbje kur vrapoj. Nuk mund të zhvilloj dot stërvitje dhe kështu më është dashur të pres akoma derisa të riaftësohem plotësisht. Kam fat, pasi edhe ekipi tani po ecën mirë. Gjithsesi, shpresoj që të filloj sa më shpejt stërvitjen me skuadrën, edhe pse nuk varet nga unë. Në fillim duhet të shoh me kujdes gjendjen e këmbës dhe më pas të marr këto lloj vendimesh.

- Kemi dëgjuar se mund ta operoni sërish këmbën në Paris...

- Këtë nuk mund ta them me siguri, sepse gjithçka do ta vendosë vizita që do të bëj të enjten në Paris. Pra, pasnesër do të bëj në vizitë te doktori që u operova për të parë gjendjen e këmbës. Më pas, ai do të japë konkluzionet e tij për këtë vizitë që do të zhvilloj në Francë. Kështu si po shkojnë punët, nuk përjashtohet mundësia që të riaftësohem edhe atje.

- Kur do ta bëni vizitën?

- Të enjten kam planifikuar të udhëtoj drejt Francës.

- Pra, nuk do të jeni në dy ndeshjet me Turqinë dhe Greqinë?

- Do të jetë shumë e vështirë që të riaftësohem për këto dy takime, ndonëse qëllimi im ishte që të luaja. Në ndeshjen me Ukrainën isha në tribunë dhe mendoja se në Turqi dhe Greqi do të luaja nga minuta e parë. Por nuk ishte e thënë. Dëmtimi është i rëndë dhe jam shumë pesimist për të ardhmen. Gjithsesi, të mos themi jo përfundimisht, se ndoshta ndodh edhe ndonjë mrekulli.

- Dy fjalë për Fortuzin?

- Po luan shumë mirë. Ka shënuar 3 gola. Njëri prej tyre i ka dhënë skuadrës fitoren. Me të vërtetë po paraqitet shumë mirë. Jam i gëzuar për të, se po tregon se është një lojtar klasi. Shpresoj që të vazhdojë kështu deri në fund të kampionatit, sepse më kompenson në njëfarë mënyre edhe mua.

- Kalojmë te kombëtarja. Me Ukrainën humbëm, ndërsa me Turqinë dhe Greqinë kemi shansin e fundit, apo jo?

- Edhe pse humbëm me Ukrainën, shanset tona për t'u kualifikuar në botëror ekzistojnë. Thjesht duhet të marrim pikë në ndeshjet e ardhshme, pasi në grupin tonë gjërat do të mbyllen vetëm në fund të takimeve.

- Sa pikë duhet të marrë Shqipëria në dy trasfertat me Turqinë dhe Greqinë për të qenë në valle për botërorin?

- Duke parë forcën e këtyre dy ekipeve, mendoj se me me dy pikë do të ishim të kënaqur. Edhe një fitore nuk do të ishte keq. Gjithsesi, këtë le t'ia lëmë fushës së lojës.

- Me Greqinë do të fitojmë?

- Eshtë skuadër shumë e fortë në shtëpi. Edhe për të ky takim është shumë delikat. Për ne, një barazim në Athinë do të ishte i kënaqshëm.

- Golin kundër Greqisë kush do ta shënojë këtë herë?

- E rëndësishme është që të shënojmë. Pastaj se kush nuk ka rëndësi.

------------------------------------------------------------

[zeus]

-----------------------------------------------

"Duhet të besojmë që të arrijmë vendin e dytë në grup. Dhe për këtë duhet të marrim të paktën 2 pikë". Ishin këto fjalët e trajnerit të kombëtares shqiptare, Hans Peter Brigel, pak minuta para fillimit të "zborit" me futbollistët e kampionatit shqiptar.

Gjermani gjithashtu është shprehur se ndeshja me Greqinë është e veçantë pasi ata do të kërkojnë revanshin. Brigeli ka folur konkretisht për dy ndeshjet me Turqinë dhe Greqinë, ku, sipas tij, kuqezinjtë duhet të dalin të paktën me dy pikë.

- Zoti Brigel, së shpejti Turqia dhe Greqia. Shansi i fundit për kombëtaren për në botëror?

- Eshtë e vërtetë që dy takimet e ardhshme të kombëtares janë shumë të vështira, sepse luajmë me dy ekipe shumë të mëdha. Këto dy skuadra luajnë para publikut të tyre dhe domosdoshmërisht duhet të fitojnë, ose në rastin më të keq të marrin pikë. Turqia është një ekip shumë i fortë në shtëpi, ndërsa ndeshja me Greqinë është disi e veçantë. Ata kërkojnë revansh për ndeshjen e humbur në shtator. Pra, me pak fjalë, janë dy skuadra të mëdha. Turqit janë të tretët në botë dhe grekët kampionë Europe. Gjithsesi, ne nuk trembemi. Shkojmë në Turqi dhe Greqi për pikë. Vetëm kjo do të thoshte vendi i dytë në grup. Ky është synimi ynë.

- Gjithsesi, ju duhet të fitoni me Turqinë, në të kundërt, pas një humbjeje në Stamboll, kualifikimi duket shumë i vështirë...

- Nuk mund të them se nëse humbasim ndaj Turqisë dalim nga lufta për në botëror. Jam i mendimit se në dy takimet me Turqinë dhe Greqinë duhet të kënaqemi edhe me dy pikë. Nëse e arrijmë këtë gjë, jam i mendimit se jemi në garë për vendin e dytë. Nëse marrim 3 pikë, akoma më mirë. Jam i bindur se ekipet e tjera do të lënë pikë gjatë rrugës, duke u ndeshur me njëra-tjetrën. Po kështu, në këto dy takime do të na duhet pak më shumë fat. Në Gjeorgji kemi luajtur shumë mirë, kemi pasur 10 raste për gol, por në fund jemi mundur 2-0. Vetëm kështu nuk dua të ndodhë.

- A keni vëzhguar futbollistë shqiptarë që luajnë në Europë?

- Po, disa prej tyre i kam vëzhguar. Sidomos ata që luajnë në kampionatin gjerman, por edhe Canën e ndonjë tjetër. Kam dërguar njerëz të shohin Taren dhe Bogdanin, që vazhdojnë të kalojnë formë të mirë sportive. Edhe Myrtaj po luan. Problem mbetet mbrojtja, pasi kemi të dëmtuar Çipin dhe Dallkun. Gjithashtu, gjendja e lojtarëve është përmirësuar dhe në ndeshjen e parë me Turqinë shpresoj që të kem në dispozicion lojtarë me eksperiencë loje. Në ndeshjen me Ukrainën nuk e patëm këtë privilegj.

-----------------------------------------------

[zeus]

-------------------------------------------------------

"Po, nuk do të jem më portier i ekipit kombëtar. Kam qenë në Tiranë dhe kam biseduar gjatë me trajnerin Hans Peter Brigel. Atij i kam shprehur gjithçka. I thashë mendimin tim, i cili kurrsesi nuk ishte i lehtë"

Strakosha, i cili me 29 mars mbush 40-vjeç, është menduar gjatë për të kryer një veprim ndoshta më të vështirin në karrierën e tij të gjatë sportive. Tashmë, veç kostumit kuqezi ai ka dorëzuar edhe shiritin e kapitenit të skuadrës, duke mbetur në histori si futbollisti, që ka luajtur me kombëtaren e Shqipërisë me moshën më të madhe. Madje ai ka mbyllur edhe "kapitullin" kombëtare teksa ka veshur në një numër rekord, më shumë se askush tjetër, 74 herë fanelën e ekipit përfaqësues.

Strakosha, tha mbrëmë se e mori këtë vendim, duke i dhënë fund edhe një mendimi që e ka shoqëruar sidomos kohët e fundit. Ai thotë se sivjet do t'i japë fund edhe karrierës së tij si futbollist, duke i dhënë mundësi aktivizimit të më të rinjve, për të cilët ka shumë besim se do ta zëvendësojnë denjësisht.

"Dikur unë zëvendësova një portier të madh, si Perlat Musta, edhe mua tani do të më zëvendësojnë të tjerët",- tha legjenda kuqezi. Portieri legjendar i kuqezinjve pranon se asnjëherë nuk e ka ndjerë veten të pazëvendësueshëm dhe se paraqitjen me ekipin kombëtar e ka quajtur gjithmonë një nder të madh, por edhe një obligim për veten e tij.
Kur do ta lerë futbollin Strakosha? Ka qenë një pyetje, që aq sa i ka munduar të tjerët, e ka vënë në dilemë edhe qëndrimin e tij.

"Ishte megjithë mend një pyetje që gjithmonë më ka vënë në mendime. Shumë herë kam menduar për ta bërë një gjë të tillë, për t'ia lënë vendin më të rinjve. Këtu më kuptoni drejtë, sepse nuk dua të ofendoj asnjë prej çunave, që janë kandidatë për të luajtur në ekipin kombëtar. Por respekti dhe besimi që kanë treguar për mua, trajneri dhe drejtuesit e tjerë të federatës që janë pranë ekipit kombëtar, më kanë bërë edhe të bëj gjithçka për ta merituar këtë besim. Unë kam luftuar gjatë gjithë karrierës sime që të justifikoj njëherë besimin e kolegëve të mi futbollistë me të cilët luaj, por edhe të trajnerit. Pastaj paraqitjen time e kanë vlerësuar sportdashësit, specialistët, gazetarët etj".

Edhe pse shifrat e tij përbëjnë rekorde, ai nuk ka qejf t'i quajë megjithatë kështu... "Nuk e kam menduar dhe nuk më shkuar ndonjëherë ndërmend, që të luaj për të plotësuar një numër ndeshjesh, që ju i quani rekorde. Të jeni të bindur se rekordet do të thyhen gjithnjë. Shqipërisë nuk i kanë munguar dhe nuk do t'i mungojnë kurrë talentet".

Strakosha çmon shumë tifozërinë shqiptare. "Ata janë të mrekullueshëm. Nuk duan t'ja dinë nëse është ndeshje miqësore apo zyrtare. Ndeshjet për ata janë njësoj, kanë një kuptim, luan kombëtarja. Unë për vete, kur kam luajtur në prani të tyre, e kam ndierë veten shumë të lumtur. Ata më kanë përkrahur dhe e kam ndierë veten borxhli ndaj tyre".

Legjenda e portës shqiptare thotë se asnjëherë nuk e ka diskutuar punën e kapitenit. "Asnjëherë qëllimi im nuk ka qenë të ve shiritin e kapitenit. Ua them sinqerisht, se më mirë është të jesh kapiten në sajë të respektit që kanë lojtarët, trajnerët, drejtuesit, tifozët, se sa ta vendosësh shiritin për arsye të ndryshme".

I kujtoni fillimet? "Posi jo. Megjithëse kanë kaluar shumë vite që atëherë, gjithçka ka ngelur e ngulitur në mëndjen time. Dhe kjo sepse fillimi është gjithnjë i vështirë. Ishte viti i parë që kisha shkuar te Dinamo, pasi më parë luaja me Memaliajn, me Minatorin. Atëherë ekipin kombëtar e kishte marrë një trajner gjermanolindor. Me thënë të drejtën, kur më grumbulluan, nuk isha fort i bindur se e meritoja për të luajtur me kombëtaren. Është e vërtetë se ai vit te Dinamo ishte një vit i suksesshëm, sepse fituam edhe titullin kampion, morëm edhe kupën e Republikës, por megjithatë unë nuk e mendoja se e meritoja të isha portier i ekipit kombëtar. Por meqë trajneri ishte gjerman, mendoja se ai si huaj, i shikonte gjërat më ndryshe. Atëherë luante me ekipin kombëtar një portier i madh, si Perlat Musta, por ai ishte i dënuar. Megjithatë respektin që m'u bë për të më thirrur në kombëtare, unë e vlerësova në maksimun duke e quajtur një nder i madh që më bëhej".

Portieri i kombëtares shqiptare, i cili ka 15 vjet, që luan në kampionatet greke, ka thyer edhe një rekord të këtij vendi. Ai është i vetmi futbollist, që deri tani ka luajtur me 9 skuadra të ndryshme. Panionios është skuadra e 9-të, për të cilën ka nënshkruar Foto Strakosha gjatë 15 vjetëve të qëndrimit të tij në Greqi. Në fillim portieri ynë ka mbrojtur portën e Pas Janinës. Më tej ai nënshkroi me skuadrën Ethnikos të Pireut dhe shumë shpejt u bë portier i skuadrës më të mirë greke, Olimpiakos, me të cilin fitoi një herë edhe titullin kampion të Greqisë. Pas 5 vjetësh, "ankorimi" në Pire, Foto Strakosha bëhet pronë e skuadrës së klubit më të vjetër grek, Panionios, me të cilin fitoi një vit edhe kupën e Greqisë. Tek skuadra kuqeblu, Strakosha arrin kulmin e formës së tij. Ishte kjo arsyeja që atij i dedikohet gjithçka që arriti atë vit Panionios në kupën e kupave të Europës. Pas Panioniosit, për 3 vjet ai do të ishte "kështjella" e Jonikosit. Falë aftësive të tij, skuadra modeste pranë Pireut, arrin të përballojë sfidat e mëdha të kategorisë A. Më vonë Foti do të jetë kapiten i Kalitheas, i asaj skuadre, që do të kishte si rrallë herë në gjirin e saj edhe Bledar Kolën, por edhe Elton Koçën. Pas një viti, ai largohet që andej, për të përfaqësuar për 6 muaj skuadrën e kategorisë B, Ethnikos Asteras. Për bardhekuqtë e Kesarianisë, Strakosha luajti në 13 ndeshje, ku u dallua për formën e tij mjaft të mirë. Ishte kjo arsyeja, që ai u ftua nga skuadra e kategorisë së parë, Prodheftiki. Por nuk do të ishte ky stacioni i fundit për portierin legjendar të kombëtares shqiptare. Forma e tij e shkëlqyer e riktheu atë, pra edhe njëherë në kategorinë A. Ishte një rast unikal në historinë e fubollit grek, që një lojtar me një moshë të tillë të shkëlqejë aq shumë sa të rithirret në kategorinë A si shpëtimtar i një skuadre. Panionios është mesa duket stacioni i tij i fundit në rrugën e gjatë, të vështirë, por edhe të bukur të futbollit.

Strakosha kujton edhe ndeshjen e parë me ekipin kombëtar, madje kujton edhe çfarë ka ndodhur. "Duke shkuar në Rejkjavik, në Londër ndodhi një incident dhe trajneri gjerman dha dorëheqjen. Drejtimin e mori profesor Bejkush Birçe. Unë luajta në atë ndeshje ndaj Islandës dhe pësuam dy gola në kufinjtë e pjesë së parë dhe të dytë. Kjo ka ndodhur me 30 qershor 1990".

Cila ka qenë ndeshja më e bukur 74 takimet e luajtura nga ai? "Duke përfshirë edhe ndeshjen me Suedinë, e cila megjithatë ishte një ndeshje miqësore, dua të ju them se kombëtarja jonë në 20 vitet e fundit ka arritur 4 suksese të mëdha. Fitorja me Belgjikën në Tiranë 2-0, të cilën unë e kam ndjekur si spektator, fitorja me Greqinë po në Tiranë 2-0 dhe fitorja ndaj Rusisë në Shkodër 3-1, në të cilat së bashku me kontributin e shokëve, ka qenë edhe kontributi im".

Legjendari me emrin Foti kujton edhe ato ndeshje, që nuk ka dëshirë t'i kujtojë, siç ishte takimi miqësor me Portugalinë. "Megjithatë në atë ndeshje unë luajta edhe pse isha i sëmurë dhe nuk prish punë se faji më ka ngelur mua".

Portieri i madh i kombëtares së Shqipërisë ka qenë i ndjeshëm edhe ndaj atyre, që shumëkush i ka quajtur të "frikshëm". "Dua të përmend sulmuesin gjerman Jurgen Klinsman. Ndoshta në lojën me këmbë ai nuk ka qenë fort i rrezikshëm, por në goditjet me kokë ishte vërtetë i tillë. Më ka ngelur në kujtesë edhe goli i pësuar në Angli nga Ouen. Nuk mund ta harroj edhe golin e pësuar nga Stojçkov në Shqipëri".

Strakosha, i cili njeh mirë futbollin grek, prononcohet edhe për ndeshjen e ardhshme që do të zhvillohet në Athinë. "Është e 4-ta herë rresht, që në aktivitete të ndryshme, jemi në të njejtin grup me Greqinë. Duhet pranuar se futbolli grek është rrritur shumë. Kështu që edhe shkalla e vështirësisë me këtë ekip është rritur mjaft".

Në fund ai jep mendimin e vet edhe për ekipin kombëtar. "Duhet të jemi optimistë, por duhet ecur me këmbë në tokë. Ekipi ynë ka treguar vlera, por duhet më shumë përpjekje, duhet më shumë profesionalizëm, duhet më shumë kujdes, duhet më shumë besim".

Ky pra është Foto Strakosha. Ai u bë i madh edhe pse nuk lindi pranë stadiumeve të mëdhenj. Ai u bë një sportist i shkëlqyer edhe pse babai i tij ishte një shofer i mirë. Ai e vazhdoi sportin deri në këtë moshë, që përbën një gjë të veçantë edhe pse kur ishte i vogël, nuk e linin të luante me top. Ai nuk ishte portieri i futur me mik, por portieri që gjithçka e ka fituar me djersë dhe stërvitje të mëdha. Ai nuk ishte njeriu i akademive të mëdha, por është njeriu pasionant, që edhe në këtë moshë nuk i ndahet shkollës. Strakosha nuk krenohet kurrë me ato çfarë ka arritur. Ai ka bërë atë që nuk e ka bërë deri tani asnjë sportist tjetër shqiptar, e megjithatë Strakosha nuk ka dëshirë t'i përmendë ato, duke e quajtur si detyrë. Ai, si pak kush edhe pse ka vite në Greqi, edhe pse ka tashmë pasaportë greke, kurrë nuk e ka mohuar se nga vinte. Madje ai e ka quajtur krenari fanelën kuqezi, që e ka veshur më shumë se askush. Ai ka për të mbetur në histori për shprehjet e tij të guximshme. Strakosha ishte nga ata që e ngriti më shumë zërin pas ngjarjeve të rënda në Athinë e qytete të tjera të Greqisë, që pasuan ndeshjen Shqipëri-Greqi. Mediat më prestigjoze në Greqi botonin fjalët e Strakoshës: "Jam i shqetësuar se deri ku do të arrijë kjo gjëndje. Në Greqi jetojnë me me qindra e mijëra shqiptarë. Si do të rriten fëmijët e atyre njerëve që çdo ditë shkojnë në shkollë me fëmijët grekë. Kush është ai që mbjellë ndarje dhe urrejtje? Çfarë ndjenjash do të kultivojnë tek ata fëmijë dhe si do të trajtojnë njeri-tjetrin? A mundet ndokush të më përgjigjet për këtë? Nuk i kuptoj të gjitha. Ndërsa mendoja se duke luajtur futboll shprehja dashuri dhe respekt, dhe asnjëherë nuk mendoja se futbolli do të bëhej shkak që të krijonte armiq".

Foto Strakosha i takon atij brezi të shkëlqyer, ku së bashku me Rudi Vatën, Bledar Kolën, Igli Taren, Alban Bushin, etj., i dhanë Shqipërisë emrin e madh, teksa kanë provuar të maten denjësisht me korifenjtë e futbollit botëror, duke shkruar në biografinë e tyre ato ndeshje të shkëlqyera ndaj Gjermanisë, Anglisë, Greqisë etj, që kanë për të mbetur gjithnjë të paharruara në sytë dhe mendjet e opinionit sportiv shqiptar.

Strakosha, si asnjë sportist tjetër është njeriu që është shpallur nga dy qytete shqiptare, "Qytetar nderi" i tyre. Strakosha është bashkëshorti i shkëlqyer dhe prindi shembullor. Dy djemtë e tij, Dhimitri dhe Thomai, tek stërviten çdo ditë, ëndërrojnë t'i ngjajnë babait.

Foto Strakosha mbrëmë vonë tha: "Falënderoj publikun e shkëlqyer shqiptar, gjithë trajnerët që kanë bashkëpunuar me mua gjatë karrierës sime sportive dhe gjithë kolegët e mi futbollistë me të cilët kemi ndarë së bashku gjithçka, të mirën dhe të keqen, gëzimet dhe hidhërimet".




TE VAFTE MBARE FOTO!

-------------------------------------------------------

[zeus]

----------------------------------------------------------

Trajneri i përfaqësueses sonë, Hans Peter Brigel, ka pranuar të komentojë vendimin e kapitenit Foto Strakosha për t'u larguar nga kombëtarja. Brigeli është shprehur se ka biseduar gjatë në telefon me Strakoshën, ku ai i ka paraqitur arsyet për përfundimin e karrierës së tij sportive me ekipin përfaqësues. Gjermani ka shtuar se e ka pranuar largimin e Strakoshës si portier i ekipit tonë përfaqësues, edhe pse ai do të jetë i pranishëm në ndeshjet me Turqinë dhe Greqinë si portier i tretë. Prezencën e Strakoshës si portier i tretë Brigeli e ka argumentuar me faktin se "si kapiten i skuadrës, Strakosha do ta mbështesë ekipin përfaqësues moralisht." Trajneri Brigel e ka vlerësuar Foto Strakoshën, duke thënë se ai ka pasur një karrierë të shkëlqyer dhe kontributi i tij në ekipin përfaqësues ka qenë i madh. Duke iu referuar sërish shkaqeve të largimit të Strakoshës, trajneri Brigel ka shtuar se dihej që në moshën 40 apo 41-vjeçare Fotoja do ta linte një ditë futbollin. Për sa i përket portierit, i cili do të zëvendësojë Strakoshën në ndeshjet me Turqinë dhe me Greqinë, Hans Peter Brigel ka deklaruar:
"Me keqardhje e pranova dorëheqjen e Strakoshës nga kombëtarja. Sidoqoftë, është shansi për portierët e tjerë, si Lika dhe Beqaj, që të tregojnë aftësitë e tyre përballë ekipeve të mëdha si Turqia dhe Greqia, të cilat luajnë në sulm. Do të shikojmë se sa do t'i kontrollojnë nervat Beqaj apo Lika, kur të luajnë në stadiume me mbi 40 mijë spektatorë." Duke iu referuar këtij argumenti, Brigeli ka shtuar se është vendimtare që portierët të ruajnë qetësinë. Për sa i përket faktit se cili prej portierëve do të zëvendësojë Strakoshën në ndeshjet me përfaqësueset turke dhe greke, Brigeli ka deklaruar se "njëri prej këtyre dy portierëve do të luajë, por se cili do të jetë ekzaktësisht, kjo do të përcaktohet më vonë."

----------------------------------------------------------

[zeus]

------------------------------------------------------

Bledar Kola

"Besoj se bëri atë që duhej të bënte. Ishte koha e duhur për mbylljen e një karriere të madhe. Brigeli nuk e linte të largohej. Por gjithsesi ky është vendimi i tij. Tani Beqaj dhe Lika do të largohen nga hija e Fotos dhe kanë rastin për të treguar veten e tyre në kombëtare. Gjithsesi, mungesa e Fotos do të jetë shumë e rëndë. Do të jetë një mungesë psikologjike, pasi ai është një personalitet që do t'i mungojë kombëtares shqiptare."

Besnik Hasi

"Nuk e besoj. Nuk është e vërtetë. Eshtë një humbje për kombëtaren shqiptare. Fotoja është mitik i futbollit tonë. Ai ka meritë shumë të madhe në kombëtare. Ka qenë një kapiten i vërtetë. Njeri shumë i këndshëm dhe shumë i rëndësishëm për kombëtaren tonë. Ai është një kualitet që zor se e gjen nëpër ekipe. Një humbje shumë e madhe për kombëtaren tonë. Gjithsesi, ai ka bërë zgjedhjen e duhur. Atë që edhe unë apo tjetri do ta bëjnë kur t'i vijë koha. Tani duhet të jenë portierët e rinj ata që duhet të justifikojnë veten."

Altin Haxhi

"Për mua, Fotoja është një njeri dhe mik shumë i mirë. Një sportist i madh dhe modern. I drejtë në vendimet e tij, ashtu si edhe në zgjedhjen që ka bërë. Mund të kishte vazhduar edhe pak me fanellën kuqezi. Mosha në këtë mes nuk ka të bëjë, pasi ai është gjigant. Eshtë një model për të gjithë. Një humbje për kombëtaren shqiptare, pasi mund t'u jepte më shumë kuqezinjve."

Edvin Murati

"Nuk po më besohet. E di që e ka menduar shumë mirë para se ta bëjë këtë veprim. Për mua është një lojtar i madh. Vendimi që duhet të merrte ka qenë shumë i vështirë, pasi e ka tentuar edhe më parë, por jam i bindur se do të jetë në të mirë të ekipit dhe për këtë gjë ai meriton respekt nga të gjithë. Vjen një moment që çdo lojtar duhet të largohet nga kombëtarja. Ai me të vërtetë e ka bërë këtë gjë për të mirën e kombëtares. Mbi të gjitha ai nuk ishte egoist, prandaj u ka hapur rrugën të tjerëve."

Alban Bushi

"Më duket e pabesueshme. Foti i ka dhënë shumë kombëtares shqiptare dhe fanellës kuqezi. Për skuadrën është një humbje e pazëvendësueshme, edhe pse ai ishte në një moshë të madhe."

Geri Çipi

"Foto Strakosha për mua ka qenë, është dhe do të mbetet një nga legjendat e portës së kombëtares sonë. Ai është tërhequr në këto momente nga kombëtarja, por kontributi i madh që ka dhënë do të kujtohet gjithmonë. Nuk di çfarë të them më shumë, sepse ishte zgjedhje e tij. Në këto momente kombëtares sonë i ka humbur një nga lojtarët që i ka dhënë aq shumë ekipit tonë përfaqësues. E përsëris, që edhe pse është larguar, emri i Strakoshës do të përmendet si një nga legjendat e padiskutueshme të portës."

Altin Rraklli

"Strakosha deri tani ka formuar legjendën e vërtetë të portës sonë. Ka qenë gjithmonë numri 1 dhe e ka përfaqësuar me dinjitet ekipin tonë përfaqësues. Jam vërtet i habitur, sepse sapo e kam mësuar një lajm të tillë. Mendoj se Strakosha mund të jepte më shumë për ekipin tonë përfaqësues, të paktën deri në fund të ndeshjeve eliminatore të Botërorit të Gjermanisë 2006. Megjithatë, Strakosha i di më mirë problemet dhe është ai që i merr në fund të fundit vendimet që kanë të bëjnë me karrierën e tij personale. Strakosha ka qenë mbi të gjitha një njeri i mirë. Por edhe një profesionist i pashembullt. Prandaj them se kombëtarja, me largimin e tij, ka humbur jo pak, por një futbollist të madh."

Adrian Aliaj

"Po, tani më njoftuan për tërheqjen e Fotos. Nëse e ka lënë me dëshirë, atëherë ne të gjithë duhet ta respektojmë vendimin e tij. Unë mund të them se Fotoja ka dhënë shumë për kombëtaren shqiptare. Eshtë një legjendë që duhet respektuar. Tani duhet t'i bëjmë një përcjellje të madhe këtij kampioni, për të cilin faktet flasin vetë dhe nuk kanë nevojë për koment. Sa prish punë largimi i Fotos do të pyesnin të gjithë? Unë mund të përgjigjem se për lojtarë si Fotoja ka nevojë kombëtarja shqiptare. Mbase ai do të jetë i pazëvendësueshëm për shumë kohë në skuadër. Por shpresoj që në dy ndeshjet e ardhshme që kemi në Turqi dhe Greqi të jetë aty me ne, për të na dhënë mbështetje morale, për të cilën kemi shumë nevojë."

------------------------------------------------------

[zeus]

--------------------------------------------------------------

Shqipëria duhet të luajë dy ndeshjet e ardhshme "shtëpiake" të vlefshme për eliminatoret e Botërorit Gjermani 2006, kundër Gjeorgjisë (4 qershor 2005) dhe Kazakistanit (3 shtator 2005), me dyer të mbyllura. Ky vendim është marrë nga komisioni i disiplinës së FIFA-s (shef: Marsel Matie, Zvicër) më 4 mars 2005 për shkak të disa incidenteve që ndodhën për eliminatoret e Botërorit në ndeshjen Shqipëri-Ukrainë, të luajtur në Tiranë më 9 shkurt 2005.

Komisioni ka vendosur të njëjtën masë edhe për Kosta Rikën, pasi pati incidente në takimin që ata patën me Panamanë. Mbi të gjitha, Federata Shqiptare e Futbollit dhe ajo kostarikane duhet të paguajnë përkatësisht një gjobë prej 40 mijë dhe 20 mijë frangash zviceriane. Këto vendime janë marrë të martën më 8 mars 2005.
Duke marrë parasysh raportin e gjyqtarit dhe atë të vëzhguesit të ndeshjes Shqipëri-Ukrainë, ndeshje e zhvilluar më 9 shkurt 2005, tifozët e skuadrës pritëse kanë hedhur në fushë objekte të ndryshme si shishe me ujë, ndriçues, monedha dhe mbajtëse flamujsh. Ky episod është regjistruar në fundin e takimit. Stafi i sigurisë nuk arritit ta vërë dot gjendjen nën kontroll.
Sipas një vendimi të marrë në tetor të 2004-s, komisioni disiplinor i FIFA-s ka marrë një masë për të njëjtat incidente kundrejt FSHF-së. Gjoba e atëhershme kapi shumën e 14 mijë frangave zviceriane dhe FSHF-ja u paralajmërua për vendime më të ashpra, nëse në të ardhmen do të përsëriteshin raste të tilla dhune.
Këto vendime mund të kontestohen përpara Komitetit të Apelit të FIFA-s. Apelimi mund të bëhet tri ditë pas komunikimit të masës së marrë dhe duhet paraqitur brenda shtatë ditësh.


--------------------------------------------------------------

[zeus]

--------------------------------------------------------

Gadishmëria e Besnik Hasit për ndeshjet e fundmarsit në Stamboll dhe Athinë është në pikëpyetje, pasi mesfushori gjakovar i Anderlehtit është në garë me kohën që të përfundojë riaftësimin e plotë dhe të paraqitet në fushën e lojës. Gjakovari thotë se për të është e rëndësishmë të paraqitet në atë ndeshje, ndërsa roli që do të ketë nuk e brengos aspak.

"Unë do ta ndihmoj ekipin ku është e nevojshme më së shumti, gjë për të cilën do të vendosë trajneri,"- thotë kosovari.

- Besnik, si po shkon riaftësimi nga dëmtimi që keni pësuar javë më parë?

- Deri tani shumë mirë. Gjithsesi, nuk jam në 100 për qind të formës. Tani po bëj vrapime individuale. Po mundohem të mos dëmtohem sërish. Javën e ardhshme do të zhvilloj edhe një ndeshje me ekipin e dytë të Anderlehtit. Nëse mjekët më thonë që mund të vazhdoj, atëherë do ta bëj, pra do të stërvitem për të arritur formën sportive. Në të kundërt, më duhet të pres akoma.

- Mendoni se do të jeni me kombëtaren për dy ndeshjet e fundmarsit?

- Them se po, edhe pse më duhet të jem i rezervuar. Duhet të shoh një herë gjendjen e këmbës dhe më pas të flas me siguri. Gjithsesi, prania ime me kombëtaren nuk është 100 për qind, pasi varet nga situata që do të jem. Gjithsesi, jam optimist për të ardhmen.

- Besnik ndeshjen me Ukrainën e keni parë nga tribuna. Jemi mundur dhe shanset tona për t'u kualifikuar në botëror janë zvogëluar, apo jo?

- Po, vërtet. Humbja ka bërë të vetën, pasi nëse do të kishim fituar do të ishte ndryshe. Shanset tona për të shkuar në botëror janë zvogëluar shumë. Përpara kemi ekipe shumë të forta, të cilat do të kërkojnë të mundin Shqipërinë. Me tripikëshin e lënë do të kishte qenë ndryshe. Tani na duhet të mos gabojmë që të jemi në valle. Të paktën të fitojmë një nga dy ndeshjet e radhës.

- Brigeli ka thënë se edhe me 2 pikë mund të vazhdohet të ëndërrohet...

- Edhe unë jam i këtij mendimi. Me një fitore ose dy barazime jemi akoma në lojë. Gjithsesi, ndeshjet me Turqinë dhe Greqinë janë shumë të vështira. Janë ekipe shumë të forta në fushat e tyre dhe ne duhet të japim maksimumin që të marrim pikë në trasfertë. Gjithsesi, besoj tek ekipi ynë në një rezultat pozitiv, nëse luan mirë ka fatin me vete dhe nuk ka dëmtime. Për dy ndeshjet e ardhshme, nëse arrijmë një rezultat të mirë, ekipi ynë do të kishte një motiv më shumë. Në anën psikike janë dy ndeshje të vështira. Ne duhet t'i kuptojmë ato si ndeshje të rëndomta. Kuptohet se grekët kërkojnë hakmarrje dhe psikikisht do të jetë lojë e vështirë.

- Skuadra vazhdon të vuajë nga dëmtimet dhe formën e lojtarëve që nuk luajnë me ekipet e tyre?

- Gjithmonë dëmtimet dhe forma jo e mirë na kanë kushtëzuar në lojë. Skuadra jonë luan pa disa titullarë, të cilët janë të rëndësishëm për skuadrën. Ndërsa disa të tjerë nuk luajnë në skuadrat e tyre dhe e gjithë kjo ndikon në formën e tyre sportive. Lojtarë që qëndrojnë në stol kombëtarja jonë ka disa, dhe janë të rëndësishëm. Kur ata aktivizoheshin, bënin diferencën, ndërsa tani kanë probleme. Gjithsesi, shpresoj që të gjitha këto probleme të minimizohen në dy takimet e ardhshme. Ne hyjmë në fushë për të fituar. Duhet të mendojmë të luajmë dhe të fitojmë.

- Kombëtarja jonë do t'i luajë dy ndeshjet e ardhshme në shtëpi pa tifozë, pas ndëshkimit të FIFA-s. Çdo të thotë kjo për ju?

- Eshtë një ndëshkim mjaft i rëndë për Shqipërinë, jo se ne futbollistëve do të na mungojë mobilizimi i duhur për të fituar ndaj Gjeorgjisë dhe Kazakistanit, por sepse përkrahja e publikut tonë dihet se çfarë roli ka. Më vjen shumë keq që do të luajmë në një stadium bosh, pikërisht aty ky na ka pritur gjithnjë koreografia e mrekullueshme kuqezi. Ky ndëshkim penalizon më shumë tifozët, të cilët kanë bërë gjithnjë çmos për ta parë e mbështetur nga afër kombëtaren.

--------------------------------------------------------

[zeus]

------------------------------------------------------------

Erion Bogdani e ka marrë ftesën për dy ndeshjet e radhës kualifikuese të kombëtares sonë me Turqinë dhe Greqinë. Ai do të bashkohet me kombëtaren mbrëmjen e 20 marsit në Antalia dhe do të kthehet në Verona më 31 mars.

------------------------------------------------------------

[zeus]

--------------------------------------------------------

- Geri, në kupë përballë Lushnjës iu rikthyet më në fund fushës, por e latë lojën që në pjesën e parë. Nuk ishte shumë e qartë pse ndodhi kjo...

- U largova shpejt për shkak të dëmtimit. Nuk isha në gjendje ta vazhdoja më ndeshjen, sepse ndieja dhimbje, prandaj zëvendësimi ishte më se i detyrueshëm. Pas largimit nga fusha, pra atë ditë, kam bërë një vizitë të shpejtë. Megjithatë, për momentin nuk di të them asgjë më shumë, përveç faktit që nuk jam në gjendje të luaj më me skuadrën.

- Atëherë, për sa kohë do të qëndroni larg fushës?

- Jam në pritje të një vizite tjetër. Vizitën do ta bëj brenda këtyre ditëve në Gjermani dhe vetem atëherë do të mësoj më saktë se kur do t'i kthehem edhe një herë tjetër fushës. Momentalisht nuk mund të luaj asnjë minutë, kështu që më mbetet të bëj kontrollin e duhur mjekësor për problemet që më kanë dalë nga dëmtimet e njëpasnjëshme. Gjatë këtij sezoni, në momentin që i jam rikthyer fushës, jam dëmtuar përnjëherësh. Pra, problemet e gjurit nuk më janë ndarë gjatë tërë edicionit dhe sigurisht që më kanë shqetësuar shumë.

- Por pas pak ditësh, kombëtarja luan dy ndeshje shumë të rëndësishme me Turqinë dhe Greqinë. Po para këtyre takimeve të rëndësishme a do të riktheheni?

- Më vjen vërtet keq, sepse natyrisht që dëshira ime dhe e kujdo tjetër është e madhe, por me gjendjen e momentit them se nuk do të jem për dy ndeshjet e ardhshme të kombëtares. Unë akoma nuk kam shkuar në Gjermani dhe gjithashtu ende nuk kam bërë ekzaminimin e dëmtimit të fundit në gju. Pastaj më duhet edhe ca kohë për t'u riaftësuar plotësisht. I kam lajmëruar mjekët dhe drejtuesit e kombëtares për këtë çështje dhe tani më mbetet të shpresoj që t'i rikthehem sa më shpejt fushës.

- Në fakt, Shqipëria gjatë ndeshjeve të fundit ka pasur shumë probleme me të dëmtuarit. Mos ndoshta kjo është një nga arsyet që ekipi ynë ka humbur në "Qemal Stafa"?

- Patjetër që kjo është një arsye shumë e fortë, që ka ndikuar ndjeshëm në rezultatet e fundit. Ekipi ynë ka pasur shumë probleme me lojtarët e formacionit bazë. Përveç meje, lojtarë të tjerë, si Hasi, Murati, Aliaj, Tare etj., ose nuk kanë qenë në gjendje të luajnë fare me përfaqësuesen, ose nuk kanë qenë 100% në formë për shkaqe dëmtimi. Përfaqësuesja ka qenë vazhdimisht e kushtëzuar nga problemet e papritura dhe për pak ditë janë bërë ndryshime për t'u parapritë ndeshjeve. Madje, fakt është se në dy ndeshjet e humbura në fushën tonë, me Danimarkën dhe Ukrainën, ne kemi dalë në fushë me mungesa të shumta.

- Megjithëse nuk do të luani në 2 takimet e radhës, ç'mendoni për këto dy sfida përballë fqinjëve tanë, por jashtë fushës sonë?

- Janë shumë të vështira, si njëra, ashtu edhe tjetra. Dy kundërshtarë të fortë ballkanas, me mjaft reputacion në aktivitetet e rëndësishme ndërkombëtare, me të cilët jemi ndeshur disa herë gjatë viteve të fundit dhe deri diku i njohim mirë. Sigurisht, kur flitet për sfida të tilla, duke qenë se dihen pretendimet e Greqisë dhe Turqisë, për sa i përket rezultatit është e vështirë të flasësh. Megjithatë, humbja që na shkaktoi Ukraina nuk do të thotë se Shqipërisë i janë mbyllur tashmë dyert e fitores, qoftë edhe për ndeshjet që luan jashtë fushës. Gjatë viteve të fundit, të gjithë e kanë parë nivelin e lojës së kombëtares, kështu që duhet të jemi më tepër optimistë, sepse shanset për të marrë pikë përballë çdo kundërshtari, në çdo ndeshje që luajmë, ekzistojnë gjithmonë. Unë kam besim se shokët e skuadrës për këto ndeshje do të dinë ta mbrojnë me dinjitet fanellën kuqezi, madje t'u sigurojnë shqiptarëve edhe ndonjë dhuratë të veçantë, ndoshta për të kompensuar humbjet e fundit në fushën tonë.

- Urojmë të jeni në fushë me Kazakistanin e Gjeorgjinë. Por Shqipëria, pas një vendimi të fundit, do t'i luajë këto ndeshje pa tifozë. Komenti juaj?

- E kam mësuar me hidhërim, si çdo shqiptar tjetër, një gjë të tillë. Pas marrjes së vendimit të fundit, vërtet është për të ardhur keq që Shqipëria do të luajë dy ndeshje në "Qemal Stafa" me shkallë të boshatisura. Kur luan ekipi ynë përfaqësues, jo vetëm në "Qemal Stafa", por edhe nëpër rrugët e kryeqytetit përkrahja e tifozërisë sonë përherë ka qenë e pakrahasueshme. Në rast të ndonjë rezultati pozitiv në ndeshjet e fundmarsit, interesi do të jetë po kaq i madh se deri tani. Për këtë na vjen keq që nuk do të kemi përkrahjen e tifozëve, që vijnë nga të tëra anët e Shqipërisë.

- A mendoni se shanset tona për një biletë në Gjermani kanë marrë fund pas humbjes me Ukrainën?

- Mendoj se 2 ndeshjet e radhës mund të jenë përcaktuese. Por gjithashtu deri në fund kanë mbetur shumë ndeshje të tjera, kështu që gjithça varet nga rezultatet që do të arrijmë ne dhe të tjerët.

- Kur sezonit po i vjen fundi, a keni menduar për të ardhmen tuaj?

- Akoma. Së pari, më duhet të kaloj dëmtimin. Pa iu rikthyer fushës së lojës dhe ekipit me të cilin luaj, pra Tiranës, nuk kam si të mendoj për edicionin tjetër.

--------------------------------------------------------

[zeus]

--------------------------------------------------------

Pas përpjekjeve të drejtuesve më të lartë të FSHF-së, u bë e mundur që dënimi i rëndë i disiplinorit të FIFA-s i dhënë më 15 mars të përgjysmohet. Pra, nga dy ndeshje që kombëtarja kuqezi do të luante pa praninë e tifozëve në fushën e saj, tashmë vetëm një prej tyre do të jetë e tillë. Pra, kuqezinjtë do të luajnë pa shikues vetëm në takimin e qershorit me Kazakistanin. Komisioni i apelit të FIFA-s është treguar zemërgjerë teksa ka pranuar përgjysmë kërkesën e palës shqiptare. Përgjysmimi i dënimit u arrit pas këmbënguljes së presidentit të FSHF-së, Armand Duka. Ky i fundit e çoi çështjen në apel dhe mori një avokat shumë të njohur për kombëtaren tonë. Bëhet fjalë për të mirënjohurin Skënder Fani, një nga avokatët më të mirë sportivë me origjinë shqiptare, që më parë ka mbajtur presidencën e ekipit austriak Austria e Vienës. Pala jonë i ka paraqitur komisionit të apelit në FIFA kasetat filmike të takimit, dokumente dhe ka bërë edhe mbrojtjen e rastit, ku është shprehur se dënimi është shumë i rëndë dhe komisioni i apelit duhet ta ndryshojë atë në favor të Shqipërisë. Sipas burimeve zyrtare në federatë, ka qenë zotësia e avokatit Skënder Fani ajo që ka bërë që dënimi të përgjysmohet. Kjo edhe sepse avokati ynë Skënder Fani është zotuar personalisht dhe për FSHF-në që në Shqipëri nuk kanë për të ndodhur më gjëra të tilla.

--------------------------------------------------------