Gjykata liron shqiptarin, dyshohej se vodhi rrogat e një kompanie !

[White_Angel]

Bien akuzat për kuksianin

Angli, Bashkim Driaj akuzohej për grabitje



Nga Londra Muhamed Veliu


ANGLI

Një juri angleze ka shpallur të pafajshëm një emigrant shqiptar që
akuzohej për grabitjen e rrogave të punëtorëve në një kompani
ndërtimi në Londër. Bashkim Driaj nga Kukësi akuzohej se në
bashkëpunim me dy persona të tjerë, të cilët i shpëtuan kapjes nga
policia, më 9 korrik të 2004 ndërmorën grabitjen e 3 mijë e 760
stërlinave dhe dy çeqeve. Sipas prokurorisë angleze, grupi i
personave nga Europa Lindore përdorën dhunë ndaj ndarësit të
rrogave. Në pamundësi për të kapur autorët pas grabitjes, policia
rrethoi vendin ku kishte ndodhur ngjarja. Nga këqyrja e vendit
ekspertët e kriminalistikës arritën të grumbullojnë si prova
materiale vetëm disa bishta cigaresh, të cilat u dërguan në
laborator për të nxjerrë kampione ADN-je. Në fakt, kjo metodë e
sofistikuar, e cila ka gozhduar kriminelë të rrezikshëm anglezë, ka
rezultuar efikase dhe e suksesshme për policinë në zgjidhjen e këtij
krimi. Ata disa ditë më vonë kanë bërë arrestimin e shqiptarit, pasi
ka rezultuar se ADN-ja e cigares i përkiste atij. Grupi hetimor nuk
ka ngurruar të ngrejë akuzën ndaj emigrantit shqiptar për grabitje.


Procesi

Për katër ditë me radhë gjykata e Snaresbrook, në lindje të Londrës,
ka dëgjuar dëshmitë e policëve që janë marrë me investigimin e
ngjarjes. Por dëshmitari kryesor në proces, ndarësi i pagave, nuk ka
drejtuar gishtin nga i akuzuari Driaj, për ta cilësuar atë si
grabitësin e tij. Po ashtu, gjykatës iu tregua se dëshmitari kryesor
gjatë një parade identifikimi nuk e kishte zgjedhur shqiptarin si
një nga tre grabitësit. Kjo ka qenë kthesa vendimtare në proces për
lirimin e shqiptarit. Në ditën e katër të procesit jurisë i është
dashur më pak se 40 minuta për të arritur në konkluzionin se
shqiptari me origjinë nga Kukësi, Bashkim Driaj, nuk mund të dënohej
vetëm nga ADN-ja e bishtave të cigareve. Ata ia kanë komunikuar
vendimin e marrë unanimisht gjykatësit, duke bërë kështu lirimin e
shqiptarit.


Gjykatësi: Përkthyesja ndihmoi shumë në proces

Në fund të procesit, gjykatësi i çështjes D.Whitaker ka falënderuar
përkthyesen Orsida Gjebrea për punën e saj të shpejtë, duke u
shprehur se asnjëherë gjatë karierës së tij kur ka gjykuar persona
joanglezë, nuk ka parë një përkthyese aq të aftë. "Mendoj se
aftësitë e tua në përkthimin e kësaj çështjeje ndihmuan që ky proces
gjyqësor të mbarojë kaq shpejt. Sikurse unë, edhe prokurori i
çështjes me palën mbrojtëse të jemi mirënjohës", është shprehur ai.






White_Angel