Skandal Ne Ushtrine Shqiptare!!

[Shpirt Njeriu]

Ushtari i xhenios vret pas grindjes 17-vjeçarin


--------------------------------------------------------------------------------

Gerti Xhaja


TIRANE

Ka mjaftuar një fjalë goje që ushtari i Batalionit të Xhenios së Ushtrisë në Babrru të hapte zjarr me breshëri në drejtim të një grupi fëmijësh e adoleshentësh duke bërë një masakër të vërtetë. Afrim Versuli 17 vjeç, ka gjetur vdekjen e menjëhershme kurse Dashamir Gjoni, 18 vjeç është plagosur. "Ti je një çerr!", ishte fyerja që rekruti kavajas Naim Avdia, nuk e ka duruar duke qëlluar pa asnjë hezitim në drejtim të 5 adoleshentëve që ndodheshin në një fushë disa metra jashtë murit rrethues të repartit. Madje ai ka pritur i qetë mbërritjen e eprorëve dhe ushtarëve të tjerë, të cilëve u ka dorëzuar armën. Policia kriminale e Komisariatit numër 3 dhe policia Ushtarake kanë vijuar më pas me hetimet dhe procedurat e arrestimit të rekrutit. Megjithëse fati është treguar zemërgjerë me tre të tjerët, që u kanë shpëtuar paq breshërive, duket se për ta do të nevojitet shumë kohë që të marrin veten. Për të plagosurin shpëtimtarja ka qenë një pemë, e cila e ka fshehur për së miri trupin e tij, ndërsa plumbat e kanë zënë në duart që ai i kishte të zbuluara. Fill pasi ka lënë spitalin, Dashamir Gjoni ka rrëfyer për Gazetën tmerrin e përjetuar kur është gjendur nën breshërinë e plumbave.

Ku ishit kur ndodhi ngjarja?
Ishim mbledhur te fusha afër repartit ku luajmë zakonisht me top. Isha unë, Afrimi, vëllai i tij, Jetmiri dhe tre çuna të tjerë. Shkojmë gjithmonë për të mbledhur hekurishte në repart, por aty pamë që ushtar ishte një tip që nuk na ka lënë herë të tjera dhe nuk u afruam. Ai bënte shërbimin përballë nesh dhe e thirri Afrimin. Dëgjova t'i bërtiste, por Afrimi nuk qëndroi shumë. Ai i tha "ti je një çerr" dhe bëri të largohej. Në këtë moment ushtari drejtoi armën dhe qëlloi.

A dëgjuat se çfarë tha ushtari?
Nuk mora vesh gjë se ata qëndruan shumë pak. Pastaj ai drejtoi armën dhe pa thënë asnjë fjalë qëlloi në fillim drejt Afrimit dhe pastaj nga ne. Unë u fsheha pas një peme që kisha afër. I dëgjoja plumbat të më kalonin dhe dy prej tyre më morën në dorën që kisha jashtë dhe mbahesha nga pema, ndërsa të tjerët më kaluan ngjitur me trupin.

A kishit dijeni për ndonjë grindje mes Afrimit dhe ushtarit?
Afrimi ishte shoku im më i ngushtë dhe po të kishte ndonjë gjë do ma kishte thënë. Pastaj neve rrinim bashkë gjithë kohën dhe nuk e kam parë të zihej. Me ushtarët kemi shumë muhabet, i takojmë gjithnjë. Atje ka mbeturina hekurishtesh të vjetra, që janë të hedhura dhe shpesh u kërkojmë leje të marrim ndonjë nga ato për t'i shitur. Nuk kemi patur ndonjëherë probleme me ta. Madje i qerasnim edhe kur dilnin jashtë repartit.

Kush ju ndihmoi pas ngjarjes?
Disa banorë më panë me duart e gjakosura dhe më çuan në spital. Nuk vura re se çfarë ndodhi pas të shtënave. Pashë Jetmnirin dhe të tjerët që ishin hedhur në përrua dhe në një moment lëshova pemën dhe u sula drejt tyre. Pasi kamë kaluar në anën tjetër të lumit kam kërkuar ndihmë te personi i parë që pashë në rrugë. Pastaj më morën dhe më çuan në spital. Më thanë që në spital po vinte dhe Afrimi, por unë nuk e pashë. Më vonë mësova se ai kishte vdekur. Nuk më besohet se në mëngjes ishim bashkë, kurse tani ai iku përgjithmonë…


Rrëfimi i Jetmirit, vëllait të viktimës, dëshmitar i ngjarjes

"Ishim te fusha për të luajtur futboll"

13-vjeçari ka mbetur i vetmi mashkull në shtëpi
Eshtë vetëm 13 vjeç, dhe jep pamjen e një të rrituri të cilit tashmë i ka mbetur barra e të qënurit shtylla e shtëpisë. Megjithëse kanë kaluar vetëm pak orë nga çasti kur pa breshëritë e automatikut të derdheshin mbi trupin e të vëllait, Jetmiri, me një vetëkontroll që do ta kishin zili më të mëdhenjtë, mundohet t'i jepte sadopak zemër të ëmës. Në ndonjë çast lotët e tradhëtojnë, por ai tregohet i kujdesshëm që të mos e shohin kështu mamaja dhe dy motrat. Jetmiri i takon të gjithë që vijnë në shtëpi dhe u shpjegon atyre ngjarjen e tmerrshme që e ka përjetuar vetë. Një skenë që ndoshta nuk ka për ta harruar. Ndërsa familjarët i rrinë pranë dhe duken tepër të shqetësuar për pasojat që ngjarja mund të ketë në rritjen e tij. Ja rrëfimi i Jetmirit për Gazetën.

A mund të tregosh atë që ka ndodhur?
Ishim te fusha, për të luajtur top. Ai ushtari, donte të na përzinte. Në këtë moment Afrimi i'a ktheu duke i thënë se ishim jashtë repartit dhe mund të luanim. Por ai nuk priti më dhe qëlloi.
Ti i dëgjove të ziheshin?
Nuk ishte zënkë. Afrimi i tha: Ik ore andej, se nuk kam punë ty. Kurse ai na shau dhe na qëlloi për të na vrarë. Unë u hodha me vrap nga lumi dhe ika bashkë me të tjerët. Veç, Afrimit që mbeti atje…

[Shpirt Njeriu]

PROKURORIA/ Përfundimi pas hetimit të vrasjes së adoleshentit 16-vjeçar

"Ushtari qëlloi brenda rrethimit"
"Hapi zjarr pasi shkëmbyen sharje e replika"


--------------------------------------------------------------------------------

Gazmend Janku


TIRANE

Adoleshenti 16-vjeçar Afrim Versuli, që mbeti i vdekur dhe shoku i tij që u plagos, Dashamir Gjoni, janë qëlluar nga ushtari roje i repartit ushtarak të xhenios brenda rrethimit të zonës ushtarake. Në këtë konkluzion paraprak kanë arritur hetuesit dhe ekspertë të policisë, që shkuan menjëherë në vendngjarje. Nga këqyrja e vendngjarjes, si dhe nga dëshmitë e para të marra atje, burime pranë organit të akuzës janë shprehur për Gazetën se viktima dhe shoku i tij i plagosur në momentin që është hapur zjarr kanë qenë brenda ambienteve të repartit ushtarak, duke kundërshtuar thirrjet e ushtarit të rojes për t'u larguar.

Versioni
Sipas burimeve policore dhe atyre të prokurorisë, viktima Afrim Versuli futej në ambientet e repartit ushtarak të xhenios dhe mblidhte hekurishte. Një natë para ngjarjes tragjike ushtari Naim Avdia e kishte paralajmëruar viktimën që të mos futej më në ambientet e repartit. Por paraditen e djeshme 16-vjeçari së bashku me shokun e tij kishte tentuar të kryente ritualin e tij, kur ushtari i rojes, Avdia, i kishte bërë sërish thirrje për t'u kthyer. Në këtë moment, gjithnjë sipas burimeve të lartpërmendura, midis viktimës dhe ushtarit janë shkëmbyer replika kundërshtuese, që më pas kaluan edhe në sharje dhe ofendime. Kaq ka mjaftuar që ushtari i xhenios të humbë logjikën dhe të drejtojë armën e tij automatike ndaj adoleshentëve, duke zbrazur dhjetëra plumba mbi ta.

Hetimi
Pas kryerjeve të veprimeve të para hetimore në vendngjarje, ushtari 19-vjeçar Naim Avdia është arrestuar me urdhër të Prokurorisë Ushtarake, e cila pritet të vazhdojë më tej hetimet. Sipas burimeve pranë këtij seksioni, ushtari ka deklaruar se u kishte qëlluar dy djemve pasi kishin hyrë në ambientet e repartit ushtarak. Ndërkaq, të njëjtat burime janë shprehur se motivi që ka deklaruar ushtari nuk mund të justifikojë veprimin e kryer nga ai. Duke pasur paraysh edhe rrethanat dhe kohën kur ndodhi ngjarja, hetuesit ushtarakë janë shprehur se përdorimi i armës ndaj adoleshentëve ka qenë fare i panevojshëm, pasi në të tilla raste përveç thirrjeve verbale, ushtarët e rojes instruktohen që gjatë ditës mund të paralajmërojnë me armë duke qëlluar vetëm në ajër.


Kërkesa e familjarëve pas ngjarjes

"Shteti të paguajë të paktën varrimin"
Ushtria duhet të ketë të paktën detyrimin moral për të marrë përsipër shpenzimet e ceremonisë së varrimit". Kështu u shpreh për Gazetën, Nderim Kaceli, kushëri i parë i viktimës. Në fakt, familja e ardhur nga 14 vjet më parë fshatrat e Matit ndodhet në gjendje të vështirë ekonomike dhe humbja e djalit të madh e vështirëson edhe më shumë këtë gjendje. Mungesa të atit e ka bërë edhe më të vështirë situatën në familje. Janë të afërmit ata, të cilët organizonin çdo gjë, që ceremonia e varrimit të shkonte sipas riteve dhe zakonave të zonës së tyre. Sipas tij, adoleshenti është vrarë pa ndonjë shkak serioz, dhe i përket drejtësisë që të dënojë fajtorin. "I kemi respektuar të gjithë ushtarët, ata vijnë shpesh dhe kërkojnë ujë nga çezmat tona. Na vjen keq se janë pa njeri këtu e ndonjëherë u kemi dhënë dhe për të ngrënë, prandaj nuk e meritonim një gjë të tillë", përfundon Nderimi duke kërkuar të mos flasë më tepër.

[ArberXYZ]

Ushtari nuk ka vepruar drejte, por te te shaje ai kalamani, nga nona, ketu nuk durohet mo. Vije veten ne poziten e ushtarit. Ca kalamaj jane futur brenda rrepartit, qe eshte gje e ndaluar, ushtari iu thote qe te dalin jashte, ata jo vetem qe nuk pranojne por fillojne edhe ta shajne nga nena. Ne kete moment (si cdokush besoj), ushtari humbet vetkontrollin dhe shtien ne drejtim te tyre. Me thon te drejten, edhe nuk duroj te me shajne ca picirruke nga gjeja me e shtrejte, nena.

Kush e ka fajin?

E kush tjeter pervecse, edukates familjare.